59. க³மிகாதி³னிஸ்ஸயவத்தூ²னி

121. தேன கோ² பன ஸமயேன அஞ்ஞதரோ பி⁴க்கு² கோஸலேஸு ஜனபதே³ அத்³தா⁴னமக்³க³ப்படிபன்னோ ஹோதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தம் ‘ந அனிஸ்ஸிதேன வத்த²ப்³ப³’ந்தி. அஹஞ்சம்ஹி நிஸ்ஸயகரணீயோ அத்³தா⁴னமக்³க³ப்படிபன்னோ, கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அத்³தா⁴னமக்³க³ப்படிபன்னேன பி⁴க்கு²னா நிஸ்ஸயம் அலப⁴மானேன அனிஸ்ஸிதேன வத்து²ந்தி.

தேன கோ² பன ஸமயேன த்³வே பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹோந்தி. தே அஞ்ஞதரம் ஆவாஸம் உபக³ச்சி²ம்ஸு. தத்த² ஏகோ பி⁴க்கு² கி³லானோ ஹோதி. அத² கோ² தஸ்ஸ கி³லானஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தம் ‘ந அனிஸ்ஸிதேன வத்த²ப்³ப³’ந்தி. அஹஞ்சம்ஹி நிஸ்ஸயகரணீயோ கி³லானோ, கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கி³லானேன பி⁴க்கு²னா நிஸ்ஸயம் அலப⁴மானேன அனிஸ்ஸிதேன வத்து²ந்தி.

அத² கோ² தஸ்ஸ கி³லானுபட்டா²கஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தம் ‘ந அனிஸ்ஸிதேன வத்த²ப்³ப³’ந்தி. அஹஞ்சம்ஹி நிஸ்ஸயகரணீயோ, அயஞ்ச பி⁴க்கு² கி³லானோ, கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கி³லானுபட்டா²கேன பி⁴க்கு²னா நிஸ்ஸயம் அலப⁴மானேன யாசியமானேன அனிஸ்ஸிதேன வத்து²ந்தி.

தேன கோ² பன ஸமயேன அஞ்ஞதரோ பி⁴க்கு² அரஞ்ஞே விஹரதி. தஸ்ஸ ச தஸ்மிம் ஸேனாஸனே பா²ஸு ஹோதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தம் ‘ந அனிஸ்ஸிதேன வத்த²ப்³ப³’ந்தி. அஹஞ்சம்ஹி நிஸ்ஸயகரணீயோ அரஞ்ஞே விஹராமி, மய்ஹஞ்ச இமஸ்மிம் ஸேனாஸனே பா²ஸு ஹோதி, கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஆரஞ்ஞிகேன பி⁴க்கு²னா பா²ஸுவிஹாரம் ஸல்லக்கே²ந்தேன நிஸ்ஸயம் அலப⁴மானேன அனிஸ்ஸிதேன வத்து²ம் – யதா³ பதிரூபோ நிஸ்ஸயதா³யகோ ஆக³ச்சி²ஸ்ஸதி, ததா³ தஸ்ஸ நிஸ்ஸாய வஸிஸ்ஸாமீதி.