51. பிதுகா⁴தகவத்து²

113. தேன கோ² பன ஸமயேன அஞ்ஞதரோ மாணவகோ பிதரம் ஜீவிதா வோரோபேஸி. ஸோ தேன பாபகேன கம்மேன அட்டீயதி ஹராயதி ஜிகு³ச்ச²தி. அத² கோ² தஸ்ஸ மாணவகஸ்ஸ ஏதத³ஹோஸி ‘‘கேன நு கோ² அஹம் உபாயேன இமஸ்ஸ பாபகஸ்ஸ கம்மஸ்ஸ நிக்க²ந்திம் கரேய்ய’’ந்தி. அத² கோ² தஸ்ஸ மாணவகஸ்ஸ ஏதத³ஹோஸி ‘‘இமே கோ² ஸமணா ஸக்யபுத்தியா த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா, ஸசே கோ² அஹம் ஸமணேஸு ஸக்யபுத்தியேஸு பப்³ப³ஜேய்யம், ஏவாஹம் இமஸ்ஸ பாபகஸ்ஸ கம்மஸ்ஸ நிக்க²ந்திம் கரேய்ய’’ந்தி. அத² கோ² ஸோ மாணவகோ பி⁴க்கூ² உபஸங்கமித்வா பப்³ப³ஜ்ஜம் யாசி. பி⁴க்கூ² ஆயஸ்மந்தம் உபாலிம் ஏதத³வோசும் – ‘‘புப்³பே³பி கோ², ஆவுஸோ உபாலி, நாகோ³ மாணவகவண்ணேன பி⁴க்கூ²ஸு பப்³ப³ஜிதோ, இங்கா⁴வுஸோ, உபாலி, இமம் மாணவகம் அனுயுஞ்ஜாஹீ’’தி. அத² கோ² ஸோ மாணவகோ ஆயஸ்மதா உபாலினா அனுயுஞ்ஜீயமானோ ஏதமத்த²ம் ஆரோசேஸி. ஆயஸ்மா உபாலி பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். பிதுகா⁴தகோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³தி.