43. த³ண்ட³கம்மவத்து²

107. தேன கோ² பன ஸமயேன ஸாமணேரா பி⁴க்கூ²ஸு அகா³ரவா அப்பதிஸ்ஸா அஸபா⁴க³வுத்திகா விஹரந்தி. பி⁴க்கூ² உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸாமணேரா பி⁴க்கூ²ஸு அகா³ரவா அப்பதிஸ்ஸா அஸபா⁴க³வுத்திகா விஹரிஸ்ஸந்தீ’’தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ ஸாமணேரஸ்ஸ த³ண்ட³கம்மம் காதும். பி⁴க்கூ²னம் அலாபா⁴ய பரிஸக்கதி, பி⁴க்கூ²னம் அனத்தா²ய பரிஸக்கதி, பி⁴க்கூ²னம் அவாஸாய பரிஸக்கதி, பி⁴க்கூ² அக்கோஸதி பரிபா⁴ஸதி, பி⁴க்கூ² பி⁴க்கூ²ஹி பே⁴தே³தி – அனுஜானாமி, பி⁴க்க²வே, இமேஹி பஞ்சஹங்கே³ஹி ஸமன்னாக³தஸ்ஸ ஸாமணேரஸ்ஸ த³ண்ட³கம்மம் காதுந்தி.

அத² கோ² பி⁴க்கூ²னம் ஏதத³ஹோஸி – ‘‘கிம் நு கோ² த³ண்ட³கம்மம் காதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஆவரணம் காதுந்தி.

தேன கோ² பன ஸமயேன பி⁴க்கூ² ஸாமணேரானம் ஸப்³ப³ம் ஸங்கா⁴ராமம் ஆவரணம் கரோந்தி. ஸாமணேரா ஆராமம் பவிஸிதும் அலப⁴மானா பக்கமந்திபி, விப்³ப⁴மந்திபி, தித்தி²யேஸுபி ஸங்கமந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸப்³போ³ ஸங்கா⁴ராமோ ஆவரணம் காதப்³போ³. யோ கரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, யத்த² வா வஸதி, யத்த² வா படிக்கமதி, தத்த² ஆவரணம் காதுந்தி.

தேன கோ² பன ஸமயேன பி⁴க்கூ² ஸாமணேரானம் முக²த்³வாரிகம் ஆஹாரம் ஆவரணம் கரோந்தி. மனுஸ்ஸா யாகு³பானம்பி ஸங்க⁴ப⁴த்தம்பி கரோந்தா ஸாமணேரே ஏவம் வதே³ந்தி – ‘‘ஏத², ப⁴ந்தே, யாகு³ம் பிவத²; ஏத², ப⁴ந்தே, ப⁴த்தம் பு⁴ஞ்ஜதா²’’தி. ஸாமணேரா ஏவம் வதே³ந்தி – ‘‘நாவுஸோ, லப்³பா⁴. பி⁴க்கூ²ஹி ஆவரணம் கத’’ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ப⁴த³ந்தா ஸாமணேரானம் முக²த்³வாரிகம் ஆஹாரம் ஆவரணம் கரிஸ்ஸந்தீ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, முக²த்³வாரிகோ ஆஹாரோ ஆவரணம் காதப்³போ³. யோ கரேய்ய, ஆபத்தி து³க்கடஸ்ஸாதி.

த³ண்ட³கம்மவத்து² நிட்டி²தம்.