15. உபஜ்ஜா²யவத்தகதா²

64. தேன கோ² பன ஸமயேன பி⁴க்கூ² அனுபஜ்ஜா²யகா அனாசரியகா [இத³ம் பத³ம் ஸீ. ஸ்யா. போத்த²கேஸு நத்தி²] அனோவதி³யமானா அனனுஸாஸியமானா து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரந்தி; மனுஸ்ஸானம் [தே மனுஸ்ஸானம் (க.)] பு⁴ஞ்ஜமானானம் உபரிபோ⁴ஜனேபி உத்திட்ட²பத்தம் உபனாமேந்தி, உபரிகா²த³னீயேபி உத்திட்ட²பத்தம் உபனாமேந்தி, உபரிஸாயனீயேபி உத்திட்ட²பத்தம் உபனாமேந்தி, உபரிபானீயேபி உத்திட்ட²பத்தம் உபனாமேந்தி; ஸாமம் ஸூபம்பி ஓத³னம்பி விஞ்ஞாபேத்வா பு⁴ஞ்ஜந்தி; ப⁴த்தக்³கே³பி உச்சாஸத்³தா³ மஹாஸத்³தா³ விஹரந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரிஸ்ஸந்தி; மனுஸ்ஸானம் பு⁴ஞ்ஜமானானம், உபரிபோ⁴ஜனேபி உத்திட்ட²பத்தம் உபனாமேஸ்ஸந்தி, உபரிகா²த³னீயேபி உத்திட்ட²பத்தம் உபனாமேஸ்ஸந்தி, உபரிஸாயனீயேபி உத்திட்ட²பத்தம் உபனாமேஸ்ஸந்தி, உபரிபானீயேபி உத்திட்ட²பத்தம் உபனாமேஸ்ஸந்தி; ஸாமம் ஸூபம்பி ஓத³னம்பி விஞ்ஞாபேத்வா பு⁴ஞ்ஜிஸ்ஸந்தி; ப⁴த்தக்³கே³பி உச்சாஸத்³தா³ மஹாஸத்³தா³ விஹரிஸ்ஸந்தி ஸேய்யதா²பி ப்³ராஹ்மணா ப்³ராஹ்மணபோ⁴ஜனே’’தி.

அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா² ஸந்துட்டா² லஜ்ஜினோ குக்குச்சகா ஸிக்கா²காமா, தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரிஸ்ஸந்தி; மனுஸ்ஸானம் பு⁴ஞ்ஜமானானம், உபரிபோ⁴ஜனேபி உத்திட்ட²பத்தம் உபனாமேஸ்ஸந்தி, உபரிகா²த³னீயேபி உத்திட்ட²பத்தம் உபனாமேஸ்ஸந்தி, உபரிஸாயனீயேபி உத்திட்ட²பத்தம் உபனாமேஸ்ஸந்தி, உபரிபானீயேபி உத்திட்ட²பத்தம் உபனாமேஸ்ஸந்தி; ஸாமம் ஸூபம்பி ஓத³னம்பி விஞ்ஞாபேத்வா பு⁴ஞ்ஜிஸ்ஸந்தி; ப⁴த்தக்³கே³பி உச்சாஸத்³தா³ மஹாஸத்³தா³ விஹரிஸ்ஸந்தீ’’தி. அத² கோ² தே பி⁴க்கூ²…பே… ப⁴க³வதோ ஏதமத்த²ம் ஆரோசேஸும்.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரந்தி, மனுஸ்ஸானம் பு⁴ஞ்ஜமானானம் உபரி போ⁴ஜனேபி உத்திட்ட²பத்தம் உபனாமேந்தி, உபரிகா²த³னீயேபி உத்திட்ட²பத்தம் உபனாமேந்தி, உபரிஸாயனீயேபி உத்திட்ட²பத்தம் உபனாமேந்தி, உபரிபானீயேபி உத்திட்ட²பத்தம் உபனாமேந்தி, ஸாமம் ஸூபம்பி ஓத³னம்பி விஞ்ஞாபேத்வா பு⁴ஞ்ஜந்தி, ப⁴த்தக்³கே³பி உச்சாஸத்³தா³ மஹாஸத்³தா³ விஹரந்தீ’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், பி⁴க்க²வே, தேஸம் மோக⁴புரிஸானம் அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம தே, பி⁴க்க²வே, மோக⁴புரிஸா து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரிஸ்ஸந்தி, மனுஸ்ஸானம் பு⁴ஞ்ஜமானானம் உபரிபோ⁴ஜனேபி உத்திட்ட²பத்தம் உபனாமேஸ்ஸந்தி, உபரிகா²த³னீயேபி உத்திட்ட²பத்தம் உபனாமேஸ்ஸந்தி, உபரிஸாயனீயேபி உத்திட்ட²பத்தம் உபனாமேஸ்ஸந்தி, உபரிபானீயேபி உத்திட்ட²பத்தம் உபனாமேஸ்ஸந்தி, ஸாமம் ஸூபம்பி ஓத³னம்பி விஞ்ஞாபேத்வா பு⁴ஞ்ஜிஸ்ஸந்தி, ப⁴த்தக்³கே³பி உச்சாஸத்³தா³ மஹாஸத்³தா³ விஹரிஸ்ஸந்தி. நேதம், பி⁴க்க²வே, அப்பஸன்னானம் வா பஸாதா³ய, பஸன்னானம் வா பி⁴ய்யோபா⁴வாய. அத² க்²வேதம், பி⁴க்க²வே, அப்பஸன்னானஞ்சேவ அப்பஸாதா³ய, பஸன்னானஞ்ச ஏகச்சானம் அஞ்ஞத²த்தாயா’’தி. அத² கோ² ப⁴க³வா தே பி⁴க்கூ² அனேகபரியாயேன விக³ரஹித்வா து³ப்³ப⁴ரதாய து³ப்போஸதாய மஹிச்ச²தாய அஸந்துட்டி²தாய [அஸந்துட்டி²யா (ஸீ.), அஸந்துட்ட²தாய (ஸ்யா)] ஸங்க³ணிகாய கோஸஜ்ஜஸ்ஸ அவண்ணம் பா⁴ஸித்வா அனேகபரியாயேன ஸுப⁴ரதாய ஸுபோஸதாய அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ [விரியாரம்ப⁴ஸ்ஸ (ஸீ. ஸ்யா.)] வண்ணம் பா⁴ஸித்வா பி⁴க்கூ²னம் தத³னுச்ச²விகம் தத³னுலோமிகம் த⁴ம்மிம் கத²ம் கத்வா பி⁴க்கூ² ஆமந்தேஸி –

65. ‘‘அனுஜானாமி, பி⁴க்க²வே, உபஜ்ஜா²யம். உபஜ்ஜா²யோ, பி⁴க்க²வே, ஸத்³தி⁴விஹாரிகம்ஹி புத்தசித்தம் உபட்ட²பேஸ்ஸதி, ஸத்³தி⁴விஹாரிகோ உபஜ்ஜா²யம்ஹி பிதுசித்தம் உபட்ட²பேஸ்ஸதி. ஏவம் தே அஞ்ஞமஞ்ஞம் ஸகா³ரவா ஸப்பதிஸ்ஸா ஸபா⁴க³வுத்தினோ விஹரந்தா இமஸ்மிம் த⁴ம்மவினயே வுட்³டி⁴ம் விருள்ஹிம் வேபுல்லம் ஆபஜ்ஜிஸ்ஸந்தி. ஏவஞ்ச பன, பி⁴க்க²வே, உபஜ்ஜா²யோ க³ஹேதப்³போ³ – ஏகம்ஸம் உத்தராஸங்க³ம் கரித்வா பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘உபஜ்ஜா²யோ மே, ப⁴ந்தே, ஹோஹி; உபஜ்ஜா²யோ மே, ப⁴ந்தே, ஹோஹி; உபஜ்ஜா²யோ மே, ப⁴ந்தே, ஹோஹீ’தி. ஸாஹூதி வா லஹூதி வா ஓபாயிகந்தி வா பதிரூபந்தி வா பாஸாதி³கேன ஸம்பாதே³ஹீதி வா காயேன விஞ்ஞாபேதி, வாசாய விஞ்ஞாபேதி, காயேன வாசாய [ந வாசாய (க.)] விஞ்ஞாபேதி, க³ஹிதோ ஹோதி உபஜ்ஜா²யோ; ந காயேன விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந க³ஹிதோ ஹோதி உபஜ்ஜா²யோ.

66. [சூளவ. 376 ஆத³யோ]‘‘ஸத்³தி⁴விஹாரிகேன, பி⁴க்க²வே, உபஜ்ஜா²யம்ஹி ஸம்மா வத்திதப்³ப³ம். தத்ராயம் ஸம்மாவத்தனா –

‘‘காலஸ்ஸேவ வுட்டா²ய உபாஹனா ஓமுஞ்சித்வா ஏகம்ஸம் உத்தராஸங்க³ம் கரித்வா த³ந்தகட்ட²ம் தா³தப்³ப³ம், முகோ²த³கம் தா³தப்³ப³ம், ஆஸனம் பஞ்ஞபேதப்³ப³ம். ஸசே யாகு³ ஹோதி, பா⁴ஜனம் தோ⁴வித்வா யாகு³ உபனாமேதப்³பா³. யாகு³ம் பீதஸ்ஸ உத³கம் த³த்வா பா⁴ஜனம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா படிஸாமேதப்³ப³ம். உபஜ்ஜா²யம்ஹி வுட்டி²தே ஆஸனம் உத்³த⁴ரிதப்³ப³ம். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே உபஜ்ஜா²யோ கா³மம் பவிஸிதுகாமோ ஹோதி, நிவாஸனம் தா³தப்³ப³ம், படினிவாஸனம் படிக்³க³ஹேதப்³ப³ம், காயப³ந்த⁴னம் தா³தப்³ப³ம், ஸகு³ணம் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ [ஸஉத³கோ (க.)] தா³தப்³போ³. ஸசே உபஜ்ஜா²யோ பச்சா²ஸமணம் ஆகங்க²தி, திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா ஸகு³ணம் கத்வா ஸங்கா⁴டியோ பாருபித்வா க³ண்டி²கம் படிமுஞ்சித்வா தோ⁴வித்வா பத்தம் க³ஹேத்வா உபஜ்ஜா²யஸ்ஸ பச்சா²ஸமணேன ஹோதப்³ப³ம். நாதிதூ³ரே க³ந்தப்³ப³ம், நாச்சாஸன்னே க³ந்தப்³ப³ம், பத்தபரியாபன்னம் படிக்³க³ஹேதப்³ப³ம். ந உபஜ்ஜா²யஸ்ஸ ப⁴ணமானஸ்ஸ அந்தரந்தரா கதா² ஓபாதேதப்³பா³. உபஜ்ஜா²யோ ஆபத்திஸாமந்தா ப⁴ணமானோ நிவாரேதப்³போ³.

‘‘நிவத்தந்தேன பட²மதரம் ஆக³ந்த்வா ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம், பச்சுக்³க³ந்த்வா பத்தசீவரம் படிக்³க³ஹேதப்³ப³ம், படினிவாஸனம் தா³தப்³ப³ம், நிவாஸனம் படிக்³க³ஹேதப்³ப³ம். ஸசே சீவரம் ஸின்னம் ஹோதி, முஹுத்தம் உண்ஹே ஓதாபேதப்³ப³ம், ந ச உண்ஹே சீவரம் நித³ஹிதப்³ப³ம்; சீவரம் ஸங்க⁴ரிதப்³ப³ம், சீவரம் ஸங்க⁴ரந்தேன சதுரங்கு³லம் கண்ணம் உஸ்ஸாரேத்வா சீவரம் ஸங்க⁴ரிதப்³ப³ம் – மா மஜ்ஜே² ப⁴ங்கோ³ அஹோஸீதி. ஓபோ⁴கே³ காயப³ந்த⁴னம் காதப்³ப³ம்.

‘‘ஸசே பிண்ட³பாதோ ஹோதி, உபஜ்ஜா²யோ ச பு⁴ஞ்ஜிதுகாமோ ஹோதி, உத³கம் த³த்வா பிண்ட³பாதோ உபனாமேதப்³போ³. உபஜ்ஜா²யோ பானீயேன புச்சி²தப்³போ³. பு⁴த்தாவிஸ்ஸ உத³கம் த³த்வா பத்தம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா வோத³கம் கத்வா முஹுத்தம் உண்ஹே ஓதாபேதப்³போ³, ந ச உண்ஹே பத்தோ நித³ஹிதப்³போ³. பத்தசீவரம் நிக்கி²பிதப்³ப³ம். பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரம் நிக்கி²பிதப்³ப³ம். உபஜ்ஜா²யம்ஹி வுட்டி²தே ஆஸனம் உத்³த⁴ரிதப்³ப³ம், பாதோ³த³கம் பாத³பீட²ம் பாத³கத²லிகம் படிஸாமேதப்³ப³ம். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே உபஜ்ஜா²யோ நஹாயிதுகாமோ ஹோதி, நஹானம் படியாதே³தப்³ப³ம். ஸசே ஸீதேன அத்தோ² ஹோதி, ஸீதம் படியாதே³தப்³ப³ம். ஸசே உண்ஹேன அத்தோ² ஹோதி, உண்ஹம் படியாதே³தப்³ப³ம்.

‘‘ஸசே உபஜ்ஜா²யோ ஜந்தாக⁴ரம் பவிஸிதுகாமோ ஹோதி, சுண்ணம் ஸன்னேதப்³ப³ம், மத்திகா தேமேதப்³பா³, ஜந்தாக⁴ரபீட²ம் ஆதா³ய உபஜ்ஜா²யஸ்ஸ பிட்டி²தோ பிட்டி²தோ க³ந்த்வா ஜந்தாக⁴ரபீட²ம் த³த்வா சீவரம் படிக்³க³ஹேத்வா ஏகமந்தம் நிக்கி²பிதப்³ப³ம், சுண்ணம் தா³தப்³ப³ம், மத்திகா தா³தப்³பா³. ஸசே உஸ்ஸஹதி, ஜந்தாக⁴ரம் பவிஸிதப்³ப³ம். ஜந்தாக⁴ரம் பவிஸந்தேன மத்திகாய முக²ம் மக்கே²த்வா புரதோ ச பச்ச²தோ ச படிச்சா²தே³த்வா ஜந்தாக⁴ரம் பவிஸிதப்³ப³ம். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ம். ந நவா பி⁴க்கூ² ஆஸனேன படிபா³ஹிதப்³பா³. ஜந்தாக⁴ரே உபஜ்ஜா²யஸ்ஸ பரிகம்மம் காதப்³ப³ம். ஜந்தாக⁴ரா நிக்க²மந்தேன ஜந்தாக⁴ரபீட²ம் ஆதா³ய புரதோ ச பச்ச²தோ ச படிச்சா²தே³த்வா ஜந்தாக⁴ரா நிக்க²மிதப்³ப³ம்.

‘‘உத³கேபி உபஜ்ஜா²யஸ்ஸ பரிகம்மம் காதப்³ப³ம். நஹாதேன பட²மதரம் உத்தரித்வா அத்தனோ க³த்தம் வோத³கம் கத்வா நிவாஸேத்வா உபஜ்ஜா²யஸ்ஸ க³த்ததோ உத³கம் பமஜ்ஜிதப்³ப³ம், நிவாஸனம் தா³தப்³ப³ம், ஸங்கா⁴டி தா³தப்³பா³, ஜந்தாக⁴ரபீட²ம் ஆதா³ய பட²மதரம் ஆக³ந்த்வா ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம், உபஜ்ஜா²யோ பானீயேன புச்சி²தப்³போ³. ஸசே உத்³தி³ஸாபேதுகாமோ ஹோதி, உத்³தி³ஸிதப்³போ³. ஸசே பரிபுச்சி²துகாமோ ஹோதி, பரிபுச்சி²தப்³போ³.

‘‘யஸ்மிம் விஹாரே உபஜ்ஜா²யோ விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி, ஸோதே⁴தப்³போ³. விஹாரம் ஸோதே⁴ந்தேன பட²மம் பத்தசீவரம் நீஹரித்வா ஏகமந்தம் நிக்கி²பிதப்³ப³ம். நிஸீத³னபச்சத்த²ரணம் நீஹரித்வா ஏகமந்தம் நிக்கி²பிதப்³ப³ம். பி⁴ஸிபி³ப்³போ³ஹனம் [பி⁴ஸிபி³ம்போ³ஹனம் (ஸீ. ஸ்யா.)] நீஹரித்வா ஏகமந்தம் நிக்கி²பிதப்³ப³ம். மஞ்சோ நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், நீஹரித்வா ஏகமந்தம் நிக்கி²பிதப்³போ³. பீட²ம் நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், நீஹரித்வா ஏகமந்தம் நிக்கி²பிதப்³ப³ம். மஞ்சபடிபாத³கா நீஹரித்வா ஏகமந்தம் நிக்கி²பிதப்³பா³. கே²ளமல்லகோ நீஹரித்வா ஏகமந்தம் நிக்கி²பிதப்³போ³. அபஸ்ஸேனப²லகம் நீஹரித்வா ஏகமந்தம் நிக்கி²பிதப்³ப³ம். பூ⁴மத்த²ரணம் யதா²பஞ்ஞத்தம் ஸல்லக்கே²த்வா நீஹரித்வா ஏகமந்தம் நிக்கி²பிதப்³ப³ம். ஸசே விஹாரே ஸந்தானகம் ஹோதி, உல்லோகா பட²மம் ஓஹாரேதப்³ப³ம், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி. ஸங்காரம் விசினித்வா ஏகமந்தம் ச²ட்³டே³தப்³ப³ம்.

‘‘பூ⁴மத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். மஞ்சபடிபாத³கா ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³பா³. மஞ்சோ ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், அதிஹரித்வா யதா²பஞ்ஞத்தம் பஞ்ஞபேதப்³போ³. பீட²ம் ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், அதிஹரித்வா யதா²பஞ்ஞத்தம் பஞ்ஞபேதப்³ப³ம். பி⁴ஸிபி³ப்³போ³ஹனம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். நிஸீத³னபச்சத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். கே²ளமல்லகோ ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³போ³. அபஸ்ஸேனப²லகம் ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³ப³ம். பத்தசீவரம் நிக்கி²பிதப்³ப³ம். பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரம் நிக்கி²பிதப்³ப³ம்.

‘‘ஸசே புரத்தி²மா ஸரஜா வாதா வாயந்தி, புரத்தி²மா வாதபானா த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா த²கேதப்³பா³. ஸசே உத்தரா ஸரஜா வாதா வாயந்தி, உத்தரா வாதபானா த²கேதப்³பா³. ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திம் த²கேதப்³பா³. ஸசே உண்ஹகாலோ ஹோதி, தி³வா வாதபானா த²கேதப்³பா³, ரத்திம் விவரிதப்³பா³.

‘‘ஸசே பரிவேணம் உக்லாபம் ஹோதி, பரிவேணம் ஸம்மஜ்ஜிதப்³ப³ம். ஸசே கோட்ட²கோ உக்லாபோ ஹோதி, கோட்ட²கோ ஸம்மஜ்ஜிதப்³போ³. ஸசே உபட்டா²னஸாலா உக்லாபா ஹோதி, உபட்டா²னஸாலா ஸம்மஜ்ஜிதப்³பா³. ஸசே அக்³கி³ஸாலா உக்லாபா ஹோதி, அக்³கி³ஸாலா ஸம்மஜ்ஜிதப்³பா³. ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பானீயம் ந ஹோதி, பானீயம் உபட்டா²பேதப்³ப³ம். ஸசே பரிபோ⁴ஜனீயம் ந ஹோதி, பரிபோ⁴ஜனீயம் உபட்டா²பேதப்³ப³ம். ஸசே ஆசமனகும்பி⁴யா உத³கம் ந ஹோதி, ஆசமனகும்பி⁴யா உத³கம் ஆஸிஞ்சிதப்³ப³ம்.

‘‘ஸசே உபஜ்ஜா²யஸ்ஸ அனபி⁴ரதி உப்பன்னா ஹோதி, ஸத்³தி⁴விஹாரிகேன வூபகாஸேதப்³போ³, வூபகாஸாபேதப்³போ³, த⁴ம்மகதா² வாஸ்ஸ காதப்³பா³. ஸசே உபஜ்ஜா²யஸ்ஸ குக்குச்சம் உப்பன்னம் ஹோதி, ஸத்³தி⁴விஹாரிகேன வினோதே³தப்³ப³ம், வினோதா³பேதப்³ப³ம், த⁴ம்மகதா² வாஸ்ஸ காதப்³பா³. ஸசே உபஜ்ஜா²யஸ்ஸ தி³ட்டி²க³தம் உப்பன்னம் ஹோதி, ஸத்³தி⁴விஹாரிகேன விவேசேதப்³ப³ம், விவேசாபேதப்³ப³ம், த⁴ம்மகதா² வாஸ்ஸ காதப்³பா³. ஸசே உபஜ்ஜா²யோ க³ருத⁴ம்மம் அஜ்ஜா²பன்னோ ஹோதி பரிவாஸாரஹோ, ஸத்³தி⁴விஹாரிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ உபஜ்ஜா²யஸ்ஸ பரிவாஸம் த³தே³ய்யாதி. ஸசே உபஜ்ஜா²யோ மூலாய படிகஸ்ஸனாரஹோ ஹோதி, ஸத்³தி⁴விஹாரிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ உபஜ்ஜா²யம் மூலாய படிகஸ்ஸேய்யாதி. ஸசே உபஜ்ஜா²யோ மானத்தாரஹோ ஹோதி, ஸத்³தி⁴விஹாரிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ உபஜ்ஜா²யஸ்ஸ மானத்தம் த³தே³ய்யாதி. ஸசே உபஜ்ஜா²யோ அப்³பா⁴னாரஹோ ஹோதி, ஸத்³தி⁴விஹாரிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ உபஜ்ஜா²யம் அப்³பே⁴ய்யாதி. ஸசே ஸங்கோ⁴ உபஜ்ஜா²யஸ்ஸ கம்மம் கத்துகாமோ ஹோதி தஜ்ஜனீயம் வா நியஸ்ஸம் [நியஸம் (க.)] வா பப்³பா³ஜனீயம் வா படிஸாரணீயம் வா உக்கே²பனீயம் வா, ஸத்³தி⁴விஹாரிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ உபஜ்ஜா²யஸ்ஸ கம்மம் ந கரேய்ய லஹுகாய வா பரிணாமேய்யாதி. கதம் வா பனஸ்ஸ ஹோதி ஸங்கே⁴ன கம்மம் தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா, ஸத்³தி⁴விஹாரிகேன உஸ்ஸுக்கம் காதப்³ப³ம் – கிந்தி நு கோ² உபஜ்ஜா²யோ ஸம்மா வத்தேய்ய, லோமம் பாதேய்ய, நேத்தா²ரம் வத்தேய்ய, ஸங்கோ⁴ தம் கம்மம் படிப்பஸ்ஸம்பே⁴ய்யாதி.

‘‘ஸசே உபஜ்ஜா²யஸ்ஸ சீவரம் தோ⁴விதப்³ப³ம் ஹோதி, ஸத்³தி⁴விஹாரிகேன தோ⁴விதப்³ப³ம், உஸ்ஸுக்கம் வா காதப்³ப³ம் – கிந்தி நு கோ² உபஜ்ஜா²யஸ்ஸ சீவரம் தோ⁴வியேதா²தி. ஸசே உபஜ்ஜா²யஸ்ஸ சீவரம் காதப்³ப³ம் ஹோதி, ஸத்³தி⁴விஹாரிகேன காதப்³ப³ம், உஸ்ஸுக்கம் வா காதப்³ப³ம் – கிந்தி நு கோ² உபஜ்ஜா²யஸ்ஸ சீவரம் கரியேதா²தி. ஸசே உபஜ்ஜா²யஸ்ஸ ரஜனம் பசிதப்³ப³ம் ஹோதி, ஸத்³தி⁴விஹாரிகேன பசிதப்³ப³ம், உஸ்ஸுக்கம் வா காதப்³ப³ம் – கிந்தி நு கோ² உபஜ்ஜா²யஸ்ஸ ரஜனம் பசியேதா²தி. ஸசே உபஜ்ஜா²யஸ்ஸ சீவரம் ரஜிதப்³ப³ம் [ரஜேதப்³ப³ம் (ஸீ. ஸ்யா.)] ஹோதி, ஸத்³தி⁴விஹாரிகேன ரஜிதப்³ப³ம், உஸ்ஸுக்கம் வா காதப்³ப³ம் – கிந்தி நு கோ² உபஜ்ஜா²யஸ்ஸ சீவரம் ரஜியேதா²தி. சீவரம் ரஜந்தேன [ரஜேந்தேன (ஸீ. ஸ்யா.)] ஸாது⁴கம் ஸம்பரிவத்தகம் ஸம்பரிவத்தகம் ரஜிதப்³ப³ம், ந ச அச்சி²ன்னே தே²வே பக்கமிதப்³ப³ம்.

‘‘ந உபஜ்ஜா²யம் அனாபுச்சா² ஏகச்சஸ்ஸ பத்தோ தா³தப்³போ³, ந ஏகச்சஸ்ஸ பத்தோ படிக்³க³ஹேதப்³போ³; ந ஏகச்சஸ்ஸ சீவரம் தா³தப்³ப³ம், ந ஏகச்சஸ்ஸ சீவரம் படிக்³க³ஹேதப்³ப³ம்; ந ஏகச்சஸ்ஸ பரிக்கா²ரோ தா³தப்³போ³, ந ஏகச்சஸ்ஸ பரிக்கா²ரோ படிக்³க³ஹேதப்³போ³; ந ஏகச்சஸ்ஸ கேஸா சே²தே³தப்³பா³ [சே²த்தப்³பா³ (ஸீ.), சே²தி³தப்³பா³ (க.)], ந ஏகச்சேன கேஸா சே²தா³பேதப்³பா³; ந ஏகச்சஸ்ஸ பரிகம்மம் காதப்³ப³ம், ந ஏகச்சேன பரிகம்மம் காராபேதப்³ப³ம்; ந ஏகச்சஸ்ஸ வேய்யாவச்சோ [வேய்யாவச்சம் (கத்த²சி)] காதப்³போ³, ந ஏகச்சேன வேய்யாவச்சோ காராபேதப்³போ³; ந ஏகச்சஸ்ஸ பச்சா²ஸமணேன ஹோதப்³ப³ம், ந ஏகச்சோ பச்சா²ஸமணோ ஆதா³தப்³போ³; ந ஏகச்சஸ்ஸ பிண்ட³பாதோ நீஹரிதப்³போ³, ந ஏகச்சேன பிண்ட³பாதோ நீஹராபேதப்³போ³; ந உபஜ்ஜா²யம் அனாபுச்சா² கா³மோ பவிஸிதப்³போ³; ந ஸுஸானம் க³ந்தப்³ப³ம்; ந தி³ஸா பக்கமிதப்³பா³. ஸசே உபஜ்ஜா²யோ கி³லானோ ஹோதி, யாவஜீவம் உபட்டா²தப்³போ³; வுட்டா²னமஸ்ஸ ஆக³மேதப்³ப³’’ந்தி.

உபஜ்ஜா²யவத்தம் நிட்டி²தம்.