9. ஜந்தாக⁴ரவத்தகதா²

371. தேன கோ² பன ஸமயேன ச²ப்³ப³க்³கி³யா பி⁴க்கூ² ஜந்தாக⁴ரே தே²ரேஹி பி⁴க்கூ²ஹி நிவாரியமானா அனாத³ரியம் படிச்ச பஹூதம் கட்ட²ம் ஆரோபேத்வா அக்³கி³ம் த³த்வா த்³வாரம் த²கேத்வா த்³வாரே நிஸீத³ந்தி. பி⁴க்கூ² [தே²ரா ச பி⁴க்கூ² (ஸ்யா. கம்.)] உண்ஹாபி⁴தத்தா த்³வாரம் அலப⁴மானா முச்சி²தா பபதந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஜந்தாக⁴ரே தே²ரேஹி பி⁴க்கூ²ஹி நிவாரியமானா அனாத³ரியம் படிச்ச பஹூதம் கட்ட²ம் ஆரோபேத்வா அக்³கி³ம் த³த்வா த்³வாரம் த²கேத்வா த்³வாரே நிஸீதி³ஸ்ஸந்தி! பி⁴க்கூ² உண்ஹாபி⁴தத்தா த்³வாரம் அலப⁴மானா முச்சி²தா பபதந்தீ’’தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ² ஜந்தாக⁴ரே தே²ரேஹி பி⁴க்கூ²ஹி நிவாரியமானா அனாத³ரியம் படிச்ச பஹூதம் கட்ட²ம் ஆரோபேத்வா அக்³கி³ம் த³த்வா த்³வாரம் த²கேத்வா த்³வாரே நிஸீத³ந்தி; பி⁴க்கூ² உண்ஹாபி⁴தத்தா த்³வாரம் அலப⁴மானா முச்சி²தா பபதந்தீ’’தி? ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ஜந்தாக⁴ரே தே²ரேன பி⁴க்கு²னா நிவாரியமானேன அனாத³ரியம் படிச்ச பஹூதம் கட்ட²ம் ஆரோபேத்வா அக்³கி³ தா³தப்³போ³. யோ த³தே³ய்ய, ஆபத்தி து³க்கடஸ்ஸ. ந, பி⁴க்க²வே, த்³வாரம் த²கேத்வா த்³வாரே நிஸீதி³தப்³ப³ம். யோ நிஸீதே³ய்ய, ஆபத்தி து³க்கடஸ்ஸ.

372. ‘‘தேன ஹி, பி⁴க்க²வே, பி⁴க்கூ²னம் ஜந்தாக⁴ரவத்தம் பஞ்ஞபேஸ்ஸாமி யதா² பி⁴க்கூ²ஹி ஜந்தாக⁴ரே ஸம்மா வத்திதப்³ப³ம். யோ பட²மம் ஜந்தாக⁴ரம் க³ச்ச²தி, ஸசே சா²ரிகா உஸ்ஸன்னா ஹோதி, சா²ரிகா ச²ட்³டே³தப்³பா³. ஸசே ஜந்தாக⁴ரம் உக்லாபம் ஹோதி, ஜந்தாக⁴ரம் ஸம்மஜ்ஜிதப்³ப³ம். ஸசே பரிப⁴ண்ட³ம் உக்லாபம் ஹோதி, பரிப⁴ண்ட³ம் ஸம்மஜ்ஜிதப்³ப³ம். ஸசே பரிவேணம் உக்லாபம் ஹோதி, பரிவேணம் ஸம்மஜ்ஜிதப்³ப³ம். ஸசே கோட்ட²கோ உக்லாபோ ஹோதி, கோட்ட²கோ ஸம்மஜ்ஜிதப்³போ³. ஸசே ஜந்தாக⁴ரஸாலா உக்லாபா ஹோதி, ஜந்தாக⁴ரஸாலா ஸம்மஜ்ஜிதப்³பா³.

‘‘சுண்ணம் ஸன்னேதப்³ப³ம், மத்திகா தேமேதப்³பா³, உத³கதோ³ணிகாய உத³கம் ஆஸிஞ்சிதப்³ப³ம். ஜந்தாக⁴ரம் பவிஸந்தேன மத்திகாய முக²ம் மக்கே²த்வா புரதோ ச பச்ச²தோ ச படிச்சா²தே³த்வா ஜந்தாக⁴ரம் பவிஸிதப்³ப³ம். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ம். ந நவா பி⁴க்கூ² ஆஸனேன படிபா³ஹிதப்³பா³. ஸசே உஸ்ஸஹதி, ஜந்தாக⁴ரே தே²ரானம் பி⁴க்கூ²னம் பரிகம்மம் காதப்³ப³ம். ஜந்தாக⁴ரா நிக்க²மந்தேன ஜந்தாக⁴ரபீட²ம் ஆதா³ய புரதோ ச பச்ச²தோ ச படிச்சா²தே³த்வா ஜந்தாக⁴ரா நிக்க²மிதப்³ப³ம். ஸசே உஸ்ஸஹதி, உத³கேபி தே²ரானம் பி⁴க்கூ²னம் பரிகம்மம் காதப்³ப³ம். ந தே²ரானம் பி⁴க்கூ²னம் புரதோபி நஹாயிதப்³ப³ம், ந உபரிதோபி நஹாயிதப்³ப³ம். நஹாதேன உத்தரந்தேன ஓதரந்தானம் மக்³கோ³ தா³தப்³போ³. யோ பச்சா² ஜந்தாக⁴ரா நிக்க²மதி, ஸசே ஜந்தாக⁴ரம் சிக்க²ல்லம் ஹோதி, தோ⁴விதப்³ப³ம். மத்திகாதோ³ணிகம் தோ⁴வித்வா ஜந்தாக⁴ரபீட²ம் படிஸாமேத்வா அக்³கி³ம் விஜ்ஜா²பேத்வா த்³வாரம் த²கேத்வா பக்கமிதப்³ப³ம். இத³ம் கோ², பி⁴க்க²வே, பி⁴க்கூ²னம் ஜந்தாக⁴ரவத்தம் யதா² பி⁴க்கூ²ஹி ஜந்தாக⁴ரே ஸம்மா வத்திதப்³ப³’’ந்தி.