10. வச்சகுடிவத்தகதா²

373. தேன கோ² பன ஸமயேன அஞ்ஞதரோ பி⁴க்கு² ப்³ராஹ்மணஜாதிகோ வச்சம் கத்வா ந இச்ச²தி ஆசமேதும் – கோ இமம் வஸலம் து³க்³க³ந்த⁴ம் ஆமஸிஸ்ஸதீதி [ஆசமிஸ்ஸதீதி (க.)]. தஸ்ஸ வச்சமக்³கே³ கிமி ஸண்டா²தி. அத² கோ² ஸோ பி⁴க்கு² பி⁴க்கூ²னம் ஏதமத்த²ம் ஆரோசேஸி. ‘‘கிம் பன த்வம், ஆவுஸோ, வச்சம் கத்வா ந ஆசமேஸீ’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² வச்சம் கத்வா ந ஆசமேஸ்ஸதீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், பி⁴க்கு², வச்சம் கத்வா ந ஆசமேஸீ’’தி? ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, வச்சம் கத்வா ஸதி உத³கே நாசமேதப்³ப³ம். யோ நாசமேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² வச்சகுடியா யதா²வுட்³ட⁴ம் வச்சம் கரோந்தி. நவகா பி⁴க்கூ² பட²மதரம் ஆக³ந்த்வா வச்சிதா ஆக³மேந்தி. தே வச்சம் ஸந்தா⁴ரேந்தா முச்சி²தா பபதந்தி. ப⁴க³வதோ ஏதமத்த²ம் ஆரோசேஸும்…பே… ஸச்சம் கிர பி⁴க்க²வே…பே… ஸச்சம் ப⁴க³வாதி…பே… ‘‘ந, பி⁴க்க²வே, வச்சகுடியா யதா²வுட்³ட⁴ம் வச்சோ காதப்³போ³. யோ கரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஆக³தபடிபாடியா வச்சம் காது’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² அதிஸஹஸாபி வச்சகுடிம் பவிஸந்தி, உப்³ப⁴ஜித்வாபி [உப்³பு⁴ஜ்ஜித்வாபி (ஸீ.), உப்³பு⁴ஜித்வா (ஸ்யா.)] பவிஸந்தி, நித்து²னந்தாபி வச்சம் கரோந்தி, த³ந்தகட்ட²ம் கா²த³ந்தாபி வச்சம் கரோந்தி, ப³ஹித்³தா⁴பி வச்சதோ³ணிகாய வச்சம் கரோந்தி, ப³ஹித்³தா⁴பி பஸ்ஸாவதோ³ணிகாய பஸ்ஸாவம் கரோந்தி, பஸ்ஸாவதோ³ணிகாயபி கே²ளம் கரோந்தி, ப²ருஸேனபி கட்டே²ன அவலேக²ந்தி, அவலேக²னகட்ட²ம்பி வச்சகூபம்ஹி பாதேந்தி, அதிஸஹஸாபி நிக்க²மந்தி, உப்³ப⁴ஜித்வாபி நிக்க²மந்தி, சபுசபுகாரகம்பி ஆசமேந்தி, ஆசமனஸராவகேபி உத³கம் ஸேஸேந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அதிஸஹஸாபி வச்சகுடிம் பவிஸிஸ்ஸந்தி, உப்³ப⁴ஜித்வாபி பவிஸிஸ்ஸந்தி, நித்து²னந்தாபி வச்சம் கரிஸ்ஸந்தி, த³ந்தகட்ட²ம் கா²த³ந்தாபி வச்சம் கரிஸ்ஸந்தி, ப³ஹித்³தா⁴பி வச்சதோ³ணிகாய வச்சம் கரிஸ்ஸந்தி, ப³ஹித்³தா⁴பி பஸ்ஸாவதோ³ணிகாய பஸ்ஸாவம் கரிஸ்ஸந்தி, பஸ்ஸாவதோ³ணிகாயபி கே²ளம் கரிஸ்ஸந்தி, ப²ருஸேனபி கட்டே²ன அவலேகி²ஸ்ஸந்தி, அவலேக²னகட்ட²ம்பி வச்சகூபம்ஹி பாதேஸ்ஸந்தி, அதிஸஹஸாபி நிக்க²மிஸ்ஸந்தி, உப்³ப⁴ஜித்வாபி நிக்க²மிஸ்ஸந்தி, சபுசபுகாரகம்பி ஆசமேஸ்ஸந்தி, ஆசமனஸராவகேபி உத³கம் ஸேஸேஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே…பே… ஸச்சம் ப⁴க³வாதி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

374. ‘‘தேன ஹி, பி⁴க்க²வே, பி⁴க்கூ²னம் வச்சகுடிவத்தம் பஞ்ஞபேஸ்ஸாமி யதா² பி⁴க்கூ²ஹி வச்சகுடியா ஸம்மா வத்திதப்³ப³ம். யோ வச்சகுடிம் க³ச்ச²தி தேன ப³ஹி டி²தேன [ப³ஹி டி²தேன (ஸீ. க.)] உக்காஸிதப்³ப³ம். அந்தோ நிஸின்னேனபி உக்காஸிதப்³ப³ம். சீவரவம்ஸே வா சீவரரஜ்ஜுயா வா சீவரம் நிக்கி²பித்வா ஸாது⁴கம் அதரமானேன வச்சகுடீ பவிஸிதப்³பா³. நாதிஸஹஸா பவிஸிதப்³பா³. ந உப்³ப⁴ஜித்வா பவிஸிதப்³பா³. வச்சபாது³காய டி²தேன உப்³ப⁴ஜிதப்³ப³ம். ந நித்து²னந்தேன வச்சோ காதப்³போ³. ந த³ந்தகட்ட²ம் கா²த³ந்தேன வச்சோ காதப்³போ³. ந ப³ஹித்³தா⁴ வச்சதோ³ணிகாய வச்சோ காதப்³போ³. ந ப³ஹித்³தா⁴ பஸ்ஸாவதோ³ணிகாய பஸ்ஸாவோ காதப்³போ³. ந பஸ்ஸாவதோ³ணிகாய கே²ளோ காதப்³போ³. ந ப²ருஸேன கட்டே²ன அவலேகி²தப்³ப³ம். ந அவலேக²னகட்ட²ம் வச்சகூபம்ஹி பாதேதப்³ப³ம். வச்சபாது³காய டி²தேன படிச்சா²தே³தப்³ப³ம். நாதிஸஹஸா நிக்க²மிதப்³ப³ம். ந உப்³ப⁴ஜித்வா நிக்க²மிதப்³ப³ம். ஆசமனபாது³காய டி²தேன உப்³ப⁴ஜிதப்³ப³ம். ந சபுசபுகாரகம் ஆசமேதப்³ப³ம். ந ஆசமனஸராவகே உத³கம் ஸேஸேதப்³ப³ம். ஆசமனபாது³காய டி²தேன படிச்சா²தே³தப்³ப³ம்.

‘‘ஸசே வச்சகுடி உஹதா [ஊஹதா (ஸீ. ஸ்யா.)] ஹோதி, தோ⁴விதப்³பா³. ஸசே அவலேக²னபித⁴ரோ பூரோ ஹோதி, அவலேக²னகட்ட²ம் ச²ட்³டே³தப்³ப³ம். ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பரிப⁴ண்ட³ம் உக்லாபம் ஹோதி, பரிப⁴ண்ட³ம் ஸம்மஜ்ஜிதப்³ப³ம். ஸசே பரிவேணம் உக்லாபம் ஹோதி, பரிவேணம் ஸம்மஜ்ஜிதப்³ப³ம். ஸசே கோட்ட²கோ உக்லாபோ ஹோதி, கோட்ட²கோ ஸம்மஜ்ஜிதப்³போ³. ஸசே ஆசமனகும்பி⁴யா உத³கம் ந ஹோதி, ஆசமனகும்பி⁴யா உத³கம் ஆஸிஞ்சிதப்³ப³ம். இத³ம் கோ², பி⁴க்க²வே, பி⁴க்கூ²னம் வச்சகுடிவத்தம் யதா² பி⁴க்கூ²ஹி வச்சகுடியா ஸம்மா வத்திதப்³ப³’’ந்தி.