6. பிண்ட³சாரிகவத்தகதா²

365. தேன கோ² பன ஸமயேன பிண்ட³சாரிகா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரந்தி, அஸல்லக்கே²த்வாபி நிவேஸனம் பவிஸந்தி, அஸல்லக்கே²த்வாபி நிக்க²மந்தி, அதிஸஹஸாபி பவிஸந்தி, அதிஸஹஸாபி நிக்க²மந்தி, அதிதூ³ரேபி திட்ட²ந்தி, அச்சாஸன்னேபி திட்ட²ந்தி, அதிசிரம்பி திட்ட²ந்தி, அதிலஹும்பி நிவத்தந்தி. அஞ்ஞதரோபி பிண்ட³சாரிகோ பி⁴க்கு² அஸல்லக்கே²த்வா நிவேஸனம் பாவிஸி. ஸோ ச த்³வாரம் மஞ்ஞமானோ அஞ்ஞதரம் ஓவரகம் பாவிஸி. தஸ்மிம்பி ஓவரகே இத்தீ² நக்³கா³ உத்தானா நிபன்னா ஹோதி. அத்³த³ஸா கோ² ஸோ பி⁴க்கு² தம் இத்தி²ம் நக்³க³ம் உத்தானம் நிபன்னம். தி³ஸ்வான – ‘‘நயித³ம் த்³வாரம், ஓவரகம் இத³’’ந்தி தம்ஹா ஓவரகா நிக்க²மி. அத்³த³ஸா கோ² தஸ்ஸா இத்தி²யா ஸாமிகோ தம் இத்தி²ம் நக்³க³ம் உத்தானம் நிபன்னம். தி³ஸ்வான – ‘‘இமினா மே பி⁴க்கு²னா பஜாபதீ தூ³ஸிதா’’தி தம் பி⁴க்கு²ம் க³ஹேத்வா ஆகோடேஸி. அத² கோ² ஸா இத்தீ² தேன ஸத்³தே³ன படிபு³ஜ்ஜி²த்வா தம் புரிஸம் ஏதத³வோச – ‘‘கிஸ்ஸ த்வம், அய்ய, இமம் பி⁴க்கு²ம் ஆகோடேஸீ’’தி? ‘‘இமினாஸி த்வம் பி⁴க்கு²னா தூ³ஸிதா’’தி? ‘‘நாஹம், அய்ய, இமினா பி⁴க்கு²னா தூ³ஸிதா; அகாரகோ ஸோ பி⁴க்கூ²’’தி தம் பி⁴க்கு²ம் முஞ்சாபேஸி. அத² கோ² ஸோ பி⁴க்கு² ஆராமம் க³ந்த்வா பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பிண்ட³சாரிகா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரிஸ்ஸந்தி, அஸல்லக்கே²த்வாபி நிவேஸனம் பவிஸிஸ்ஸந்தி, அஸல்லக்கே²த்வாபி நிக்க²மிஸ்ஸந்தி, அதிஸஹஸாபி பவிஸிஸ்ஸந்தி, அதிஸஹஸாபி நிக்க²மிஸ்ஸந்தி, அதிதூ³ரேபி திட்டி²ஸ்ஸந்தி, அச்சாஸன்னேபி திட்டி²ஸ்ஸந்தி, அதிசிரம்பி திட்டி²ஸ்ஸந்தி, அதிலஹும்பி நிவத்திஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே…பே… ஸச்சம் ப⁴க³வாதி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

366. ‘‘தேன ஹி, பி⁴க்க²வே, பிண்ட³சாரிகானம் பி⁴க்கூ²னம் வத்தம் பஞ்ஞாபேஸ்ஸாமி யதா² பிண்ட³சாரிகேஹி பி⁴க்கூ²ஹி ஸம்மா வத்திதப்³ப³ம். பிண்ட³சாரிகேன, பி⁴க்க²வே, பி⁴க்கு²னா – ‘இதா³னி கா³மம் பவிஸிஸ்ஸாமீ’தி திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா ஸகு³ணம் கத்வா ஸங்கா⁴டியோ பாருபித்வா க³ண்டி²கம் படிமுஞ்சித்வா தோ⁴வித்வா பத்தம் க³ஹேத்வா ஸாது⁴கம் அதரமானேன கா³மோ பவிஸிதப்³போ³.

‘‘ஸுப்படிச்ச²ன்னேன அந்தரக⁴ரே க³ந்தப்³ப³ம். ஸுஸம்வுதேன அந்தரக⁴ரே க³ந்தப்³ப³ம். ஓக்கி²த்தசக்கு²னா அந்தரக⁴ரே க³ந்தப்³ப³ம். ந உக்கி²த்தகாய அந்தரக⁴ரே க³ந்தப்³ப³ம். ந உஜ்ஜக்³கி⁴காய அந்தரக⁴ரே க³ந்தப்³ப³ம். அப்பஸத்³தே³ன அந்தரக⁴ரே க³ந்தப்³ப³ம். ந காயப்பசாலகம் அந்தரக⁴ரே க³ந்தப்³ப³ம். ந பா³ஹுப்பசாலகம் அந்தரக⁴ரே க³ந்தப்³ப³ம். ந ஸீஸப்பசாலகம் அந்தரக⁴ரே க³ந்தப்³ப³ம். ந க²ம்ப⁴கதேன அந்தரக⁴ரே க³ந்தப்³ப³ம். ந ஓகு³ண்டி²தேன அந்தரக⁴ரே க³ந்தப்³ப³ம். ந உக்குடிகாய அந்தரக⁴ரே க³ந்தப்³ப³ம்.

‘‘நிவேஸனம் பவிஸந்தேன ஸல்லக்கே²தப்³ப³ம் – ‘இமினா பவிஸிஸ்ஸாமி, இமினா நிக்க²மிஸ்ஸாமீ’தி. நாதிஸஹஸா பவிஸிதப்³ப³ம். நாதிஸஹஸா நிக்க²மிதப்³ப³ம். நாதிதூ³ரே டா²தப்³ப³ம். நாச்சாஸன்னே டா²தப்³ப³ம். நாதிசிரம் டா²தப்³ப³ம். நாதிலஹும் நிவத்திதப்³ப³ம். டி²தகேன ஸல்லக்கே²தப்³ப³ம் – ‘பி⁴க்க²ம் தா³துகாமா வா அதா³துகாமா வா’தி. ஸசே கம்மம் வா நிக்கி²பதி, ஆஸனா வா வுட்டா²தி, கடச்சு²ம் வா பராமஸதி, பா⁴ஜனம் வா பராமஸதி, ட²பேதி [டா²பேதி (க.)] வா – தா³துகாமஸ்ஸாதி [தா³துகாமியாதி (ஸ்யா.), தா³துகாமா வியாதி (ஸீ.)] டா²தப்³ப³ம். பி⁴க்கா²ய தி³ய்யமானாய வாமேன ஹத்தே²ன ஸங்கா⁴டிம் உச்சாரேத்வா த³க்கி²ணேன ஹத்தே²ன பத்தம் பணாமேத்வா உபோ⁴ஹி ஹத்தே²ஹி பத்தம் படிக்³க³ஹேத்வா பி⁴க்கா² படிக்³க³ஹேதப்³பா³. ந ச பி⁴க்கா²தா³யிகாய முக²ம் உல்லோகேதப்³ப³ம் [ஓலோகேதப்³ப³ம் (ஸ்யா.)]. ஸல்லக்கே²தப்³ப³ம் – ‘ஸூபம் தா³துகாமா வா அதா³துகாமா வா’தி. ஸசே கடச்சு²ம் வா பராமஸதி, பா⁴ஜனம் வா பராமஸதி, ட²பேதி வா – தா³துகாமஸ்ஸாதி டா²தப்³ப³ம். பி⁴க்கா²ய தி³ன்னாய ஸங்கா⁴டியா பத்தம் படிச்சா²தே³த்வா ஸாது⁴கம் அதரமானேன நிவத்திதப்³ப³ம்.

‘‘ஸுப்படிச்ச²ன்னேன அந்தரக⁴ரே க³ந்தப்³ப³ம். ஸுஸம்வுதேன அந்தரக⁴ரே க³ந்தப்³ப³ம். ஓக்கி²த்தசக்கு²னா அந்தரக⁴ரே க³ந்தப்³ப³ம். ந உக்கி²த்தகாய அந்தரக⁴ரே க³ந்தப்³ப³ம். ந உஜ்ஜக்³கி⁴காய அந்தரக⁴ரே க³ந்தப்³ப³ம். அப்பஸத்³தே³ன அந்தரக⁴ரே க³ந்தப்³ப³ம். ந காயப்பசாலகம் அந்தரக⁴ரே க³ந்தப்³ப³ம். ந பா³ஹுப்பசாலகம் அந்தரக⁴ரே க³ந்தப்³ப³ம். ந ஸீஸப்பசாலகம் அந்தரக⁴ரே க³ந்தப்³ப³ம். ந க²ம்ப⁴கதேன அந்தரக⁴ரே க³ந்தப்³ப³ம். ந ஓகு³ண்டி²தேன அந்தரக⁴ரே க³ந்தப்³ப³ம். ந உக்குடிகாய அந்தரக⁴ரே க³ந்தப்³ப³ம். யோ பட²மம் கா³மதோ பிண்டா³ய படிக்கமதி, தேன ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம், அவக்காரபாதி தோ⁴வித்வா உபட்டா²பேதப்³பா³, பானீயம் பரிபோ⁴ஜனீயம் உபட்டா²பேதப்³ப³ம். யோ பச்சா² கா³மதோ பிண்டா³ய படிக்கமதி, ஸசே ஹோதி பு⁴த்தாவஸேஸோ, ஸசே ஆகங்க²தி, பு⁴ஞ்ஜிதப்³ப³ம். நோ சே ஆகங்க²தி, அப்பஹரிதே வா ச²ட்³டே³தப்³ப³ம், அப்பாணகே வா உத³கே ஓபிலாபேதப்³ப³ம். தேன ஆஸனம் உத்³த⁴ரிதப்³ப³ம், பாதோ³த³கம் பாத³பீட²ம் பாத³கத²லிகம் படிஸாமேதப்³ப³ம், அவக்காரபாதி தோ⁴வித்வா படிஸாமேதப்³பா³, பானீயம் பரிபோ⁴ஜனீயம் படிஸாமேதப்³ப³ம், ப⁴த்தக்³க³ம் ஸம்மஜ்ஜிதப்³ப³ம். யோ பஸ்ஸதி பானீயக⁴டம் வா பரிபோ⁴ஜனீயக⁴டம் வா வச்சக⁴டம் வா ரித்தம் துச்ச²ம் தேன உபட்டா²பேதப்³ப³ம். ஸசஸ்ஸ ஹோதி அவிஸய்ஹம், ஹத்த²விகாரேன து³தியம் ஆமந்தேத்வா ஹத்த²விலங்க⁴கேன உபட்டா²பேதப்³ப³ம், ந ச தப்பச்சயா வாசா பி⁴ந்தி³தப்³பா³. இத³ம் கோ², பி⁴க்க²வே, பிண்ட³சாரிகானம் பி⁴க்கூ²னம் வத்தம் யதா² பிண்ட³சாரிகேஹி பி⁴க்கூ²ஹி ஸம்மா வத்திதப்³ப³’’ந்தி.