7. ஆரஞ்ஞிகவத்தகதா²

367. தேன கோ² பன ஸமயேன ஸம்ப³ஹுலா பி⁴க்கூ² அரஞ்ஞே விஹரந்தி. தே நேவ பானீயம் உபட்டா²பேந்தி, ந பரிபோ⁴ஜனீயம் உபட்டா²பேந்தி, ந அக்³கி³ம் உபட்டா²பேந்தி, ந அரணிஸஹிதம் உபட்டா²பேந்தி, ந நக்க²த்தபதா³னி ஜானந்தி, ந தி³ஸாபா⁴க³ம் ஜானந்தி. சோரா தத்த² க³ந்த்வா தே பி⁴க்கூ² ஏதத³வோசும் – ‘‘அத்தி², ப⁴ந்தே, பானீய’’ந்தி? ‘‘நத்தா²வுஸோ’’தி. ‘‘அத்தி², ப⁴ந்தே, பரிபோ⁴ஜனீய’’ந்தி? ‘‘நத்தா²வுஸோ’’தி. ‘‘அத்தி², ப⁴ந்தே, அக்³கீ³’’தி? ‘‘நத்தா²வுஸோ’’தி. ‘‘அத்தி², ப⁴ந்தே, அரணிஸஹித’’ந்தி? ‘‘நத்தா²வுஸோ’’தி. ( ) [(அத்தி² ப⁴ந்தே நக்க²த்தபதா³னீதி, ந ஜானாம ஆவுஸோதி, அத்தி² ப⁴ந்தே தி³ஸாபா⁴க³ந்தி, ந ஜானாம ஆவுஸோதி.) ஸீ. விமதிடீகாய பன ஸமேதி] ‘‘கேனஜ்ஜ, ப⁴ந்தே, யுத்த’’ந்தி? ‘‘ந கோ² மயம், ஆவுஸோ, ஜானாமா’’தி. ‘‘கதமாயம், ப⁴ந்தே, தி³ஸா’’தி? ‘‘ந கோ² மயம், ஆவுஸோ, ஜானாமா’’தி. அத² கோ² தே சோரா – ‘நேவிமேஸம் பானீயம் அத்தி², ந பரிபோ⁴ஜனீயம் அத்தி², ந அக்³கி³ அத்தி², ந அரணிஸஹிதம் அத்தி², ந நக்க²த்தபதா³னி ஜானந்தி, ந தி³ஸாபா⁴க³ம் ஜானந்தி; சோரா இமே, நயிமே பி⁴க்கூ²’தி – ஆகோடேத்வா பக்கமிம்ஸு. அத² கோ² தே பி⁴க்கூ² பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி –

368. ‘‘தேன ஹி, பி⁴க்க²வே, ஆரஞ்ஞிகானம் பி⁴க்கூ²னம் வத்தம் பஞ்ஞபேஸ்ஸாமி யதா² ஆரஞ்ஞிகேஹி பி⁴க்கூ²ஹி ஸம்மா வத்திதப்³ப³ம். ஆரஞ்ஞிகேன, பி⁴க்க²வே, பி⁴க்கு²னா காலஸ்ஸேவ உட்டா²ய பத்தம் த²விகாய பக்கி²பித்வா அம்ஸே ஆலக்³கே³த்வா சீவரம் க²ந்தே⁴ கரித்வா உபாஹனா ஆரோஹித்வா தா³ருப⁴ண்ட³ம் மத்திகாப⁴ண்ட³ம் படிஸாமேத்வா த்³வாரவாதபானம் த²கேத்வா ஸேனாஸனா ஓதரிதப்³ப³ம் – இதா³னி கா³மம் பவிஸிஸ்ஸாமீதி. உபாஹனா ஓமுஞ்சித்வா நீசம் கத்வா பப்போ²டேத்வா த²விகாய பக்கி²பித்வா அம்ஸே ஆலக்³கே³த்வா திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா ஸகு³ணம் கத்வா ஸங்கா⁴டியோ பாருபித்வா க³ண்டி²கம் படிமுஞ்சித்வா தோ⁴வித்வா பத்தம் க³ஹேத்வா ஸாது⁴கம் அதரமானேன கா³மோ பவிஸிதப்³போ³. ஸுப்படிச்ச²ன்னேன அந்தரக⁴ரே க³ந்தப்³ப³ம்…பே… ந க²ம்ப⁴கதேன அந்தரக⁴ரே க³ந்தப்³ப³ம். ந ஓகு³ண்டி²தேன அந்தரக⁴ரே க³ந்தப்³ப³ம். ந உக்குடிகாய அந்தரக⁴ரே க³ந்தப்³ப³ம்.

‘‘நிவேஸனம் பவிஸந்தேன ஸல்லக்கே²தப்³ப³ம் – ‘இமினா பவிஸிஸ்ஸாமி, இமினா நிக்க²மிஸ்ஸாமீ’தி. நாதிஸஹஸா பவிஸிதப்³ப³ம். நாதிஸஹஸா நிக்க²மிதப்³ப³ம். நாதிதூ³ரே டா²தப்³ப³ம். நாச்சாஸன்னே டா²தப்³ப³ம். நாதிசிரம் டா²தப்³ப³ம். நாதிலஹும் நிவத்திதப்³ப³ம். டி²தகேன ஸல்லக்கே²தப்³ப³ம் – ‘பி⁴க்க²ம் தா³துகாமா வா அதா³துகாமா வா’தி. ஸசே கம்மம் வா நிக்கி²பதி, ஆஸனா வா வுட்டா²தி, கடச்சு²ம் வா பராமஸதி, பா⁴ஜனம் வா பராமஸதி, ட²பேதி வா – தா³துகாமஸ்ஸாதி டா²தப்³ப³ம். பி⁴க்கா²ய தி³ய்யமானாய வாமேன ஹத்தே²ன ஸங்கா⁴டிம் உச்சாரேத்வா த³க்கி²ணேன ஹத்தே²ன பத்தம் பணாமேத்வா உபோ⁴ஹி ஹத்தே²ஹி பத்தம் படிக்³க³ஹேத்வா பி⁴க்கா² படிக்³க³ஹேதப்³பா³. ந ச பி⁴க்கா²தா³யிகாய முக²ம் உல்லோகேதப்³ப³ம். ஸல்லக்கே²தப்³ப³ம் – ‘ஸூபம் தா³துகாமா வா அதா³துகாமா வா’தி. ஸசே கடச்சு² வா பராமஸதி, பா⁴ஜனம் வா பராமஸதி, ட²பேதி வா – தா³துகாமஸ்ஸாதி டா²தப்³ப³ம். பி⁴க்கா²ய தி³ன்னாய ஸங்கா⁴டியா பத்தம் படிச்சா²தே³த்வா ஸாது⁴கம் அதரமானேன நிவத்திதப்³ப³ம்.

‘‘ஸுப்படிச்ச²ன்னேன அந்தரக⁴ரே க³ந்தப்³ப³ம்…பே… ந உக்குடிகாய அந்தரக⁴ரே க³ந்தப்³ப³ம். கா³மதோ நிக்க²மித்வா பத்தம் த²விகாய பக்கி²பித்வா அம்ஸே ஆலக்³கே³த்வா சீவரம் ஸங்க⁴ரித்வா ஸீஸே கரித்வா உபாஹனா ஆரோஹித்வா க³ந்தப்³ப³ம்.

‘‘ஆரஞ்ஞிகேன, பி⁴க்க²வே, பி⁴க்கு²னா பானீயம் உபட்டா²பேதப்³ப³ம், பரிபோ⁴ஜனீயம் உபட்டா²பேதப்³ப³ம், அக்³கி³ உபட்டா²பேதப்³போ³, அரணிஸஹிதம் உபட்டா²பேதப்³ப³ம், கத்தரத³ண்டோ³ உபட்டா²பேதப்³போ³, நக்க²த்தபதா³னி உக்³க³ஹேதப்³பா³னி – ஸகலானி வா ஏகதே³ஸானி வா, தி³ஸாகுஸலேன ப⁴விதப்³ப³ம். இத³ம் கோ², பி⁴க்க²வே, ஆரஞ்ஞிகானம் பி⁴க்கூ²னம் வத்தம் யதா² ஆரஞ்ஞிகேஹி பி⁴க்கூ²ஹி ஸம்மா வத்திதப்³ப³’’ந்தி.