5. ப⁴த்தக்³க³வத்தகதா²

363. தேன கோ² பன ஸமயேன ச²ப்³ப³க்³கி³யா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா ப⁴த்தக்³க³ம் க³ச்ச²ந்தி, வோக்கம்மபி தே²ரானம் பி⁴க்கூ²னம் புரதோ புரதோ க³ச்ச²ந்தி, தே²ரேபி பி⁴க்கூ² அனுபக²ஜ்ஜ நிஸீத³ந்தி, நவேபி பி⁴க்கூ² ஆஸனேன படிபா³ஹந்தி, ஸங்கா⁴டிம்பி ஓத்த²ரித்வா அந்தரக⁴ரே நிஸீத³ந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா ப⁴த்தக்³க³ம் க³ச்சி²ஸ்ஸந்தி, வோக்கம்மபி தே²ரானம் பி⁴க்கூ²னம் புரதோ புரதோ க³ச்சி²ஸ்ஸந்தி, தே²ரேபி பி⁴க்கூ² அனுபக²ஜ்ஜ நிஸீதி³ஸ்ஸந்தி, நவேபி பி⁴க்கூ² ஆஸனேனபி படிபா³ஹிஸ்ஸந்தி, ஸங்கா⁴டிம்பி ஓத்த²ரித்வா அந்தரக⁴ரே நிஸீதி³ஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா ப⁴த்தக்³க³ம் க³ச்ச²ந்தி, வோக்கம்மபி தே²ரானம் பி⁴க்கூ²னம் புரதோ புரதோ க³ச்ச²ந்தி, தே²ரேபி பி⁴க்கூ² அனுபக²ஜ்ஜ நிஸீத³ந்தி, நவேபி பி⁴க்கூ² ஆஸனேன படிபா³ஹந்தி, ஸங்கா⁴டிம்பி ஓத்த²ரித்வா அந்தரக⁴ரே நிஸீத³ந்தீ’’தி? ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

364. ‘‘தேன ஹி, பி⁴க்க²வே, பி⁴க்கூ²னம் ப⁴த்தக்³க³வத்தம் பஞ்ஞபேஸ்ஸாமி யதா² பி⁴க்கூ²ஹி ப⁴த்தக்³கே³ ஸம்மா வத்திதப்³ப³ம். ஸசே ஆராமே காலோ ஆரோசிதோ ஹோதி, திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா ஸகு³ணம் கத்வா ஸங்கா⁴டியோ பாருபித்வா க³ண்டி²கம் படிமுஞ்சித்வா தோ⁴வித்வா பத்தம் க³ஹேத்வா ஸாது⁴கம் அதரமானேன கா³மோ பவிஸிதப்³போ³.

‘‘ந வோக்கம்ம தே²ரானம் பி⁴க்கூ²னம் புரதோ புரதோ க³ந்தப்³ப³ம். ஸுப்படிச்ச²ன்னேன அந்தரக⁴ரே க³ந்தப்³ப³ம். ஸுஸம்வுதேன அந்தரக⁴ரே க³ந்தப்³ப³ம். ஓக்கி²த்தசக்கு²னா அந்தரக⁴ரே க³ந்தப்³ப³ம். ந உக்கி²த்தகாய அந்தரக⁴ரே க³ந்தப்³ப³ம். ந உஜ்ஜக்³கி⁴காய அந்தரக⁴ரே க³ந்தப்³ப³ம். அப்பஸத்³தே³ன அந்தரக⁴ரே க³ந்தப்³ப³ம். ந காயப்பசாலகம் அந்தரக⁴ரே க³ந்தப்³ப³ம். ந பா³ஹுப்பசாலகம் அந்தரக⁴ரே க³ந்தப்³ப³ம். ந ஸீஸப்பசாலகம் அந்தரக⁴ரே க³ந்தப்³ப³ம். ந க²ம்ப⁴கதேன அந்தரக⁴ரே க³ந்தப்³ப³ம். ந ஓகு³ண்டி²தேன அந்தரக⁴ரே க³ந்தப்³ப³ம். ந உக்குடிகாய அந்தரக⁴ரே க³ந்தப்³ப³ம்.

‘‘ஸுப்படிச்ச²ன்னேன அந்தரக⁴ரே நிஸீதி³தப்³ப³ம். ஸுஸம்வுதேன அந்தரக⁴ரே நிஸீதி³தப்³ப³ம். ஓக்கி²த்தசக்கு²னா அந்தரக⁴ரே நிஸீதி³தப்³ப³ம். ந உக்கி²த்தகாய அந்தரக⁴ரே நிஸீதி³தப்³ப³ம் ந உஜ்ஜக்³கி⁴காய அந்தரக⁴ரே நிஸீதி³தப்³ப³ம், அப்பஸத்³தே³ன அந்தரக⁴ரே நிஸீதி³தப்³ப³. ந காயப்பசாலகம் அந்தரக⁴ரே நிஸீதி³தப்³ப³ம். ந பா³ஹுப்பசாலகம் அந்தரக⁴ரே நிஸீதி³தப்³ப³ம். ந ஸீஸப்பசாலகம் அந்தரக⁴ரே நிஸீதி³தப்³ப³ம். ந க²ம்ப⁴கதேன அந்தரக⁴ரே நிஸீதி³தப்³ப³ம். ந ஓகு³ண்டி²தேன அந்தரக⁴ரே நிஸீதி³தப்³ப³ம். ந பல்லத்தி²காய அந்தரக⁴ரே நிஸீதி³தப்³ப³ம். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ம். ந நவா பி⁴க்கூ² ஆஸனேன படிபா³ஹிதப்³பா³. ந ஸங்கா⁴டிம் ஓத்த²ரித்வா அந்தரக⁴ரே நிஸீதி³தப்³ப³ம்.

‘‘உத³கே தி³ய்யமானே உபோ⁴ஹி ஹத்தே²ஹி பத்தம் படிக்³க³ஹேத்வா உத³கம் படிக்³க³ஹேதப்³ப³ம். நீசம் கத்வா ஸாது⁴கம் அப்படிக⁴ம்ஸந்தேன பத்தோ தோ⁴விதப்³போ³. ஸசே உத³கப்படிக்³கா³ஹகோ ஹோதி, நீசம் கத்வா உத³கப்படிக்³க³ஹே உத³கம் ஆஸிஞ்சிதப்³ப³ம் – மா உத³கப்படிக்³கா³ஹகோ உத³கேன ஓஸிஞ்சி [ஓஸிஞ்சிய்யீ (க.)], மா ஸாமந்தா பி⁴க்கூ² உத³கேன ஓஸிஞ்சிம்ஸு [ஓஸிஞ்சிய்யிம்ஸு (க.)], மா ஸங்கா⁴டி உத³கேன ஓஸிஞ்சீதி. ஸசே உத³கப்படிக்³கா³ஹகோ ந ஹோதி, நீசம் கத்வா ச²மாய உத³கம் ஆஸிஞ்சிதப்³ப³ம் – மா ஸாமந்தா பி⁴க்கூ² உத³கேன ஓஸிஞ்சிம்ஸு, மா ஸங்கா⁴டி உத³கேன ஓஸிஞ்சீதி.

‘‘ஓத³னே தி³ய்யமானே உபோ⁴ஹி ஹத்தே²ஹி பத்தம் படிக்³க³ஹேத்வா ஓத³னோ படிக்³க³ஹேதப்³போ³, ஸூபஸ்ஸ ஓகாஸோ காதப்³போ³. ஸசே ஹோதி ஸப்பி வா தேலம் வா உத்தரிப⁴ங்க³ம் வா, தே²ரேன வத்தப்³போ³ – ‘ஸப்³பே³ஸம் ஸமகம் ஸம்பாதே³ஹீ’தி. ஸக்கச்சம் பிண்ட³பாதோ படிக்³க³ஹேதப்³போ³. பத்தஸஞ்ஞினா பிண்ட³பாதோ படிக்³க³ஹேதப்³போ³. ஸமஸூபகோ பிண்ட³பாதோ படிக்³க³ஹேதப்³போ³. ஸமதித்திகோ பிண்ட³பாதோ படிக்³க³ஹேதப்³போ³.

‘‘ந தாவ தே²ரேன பு⁴ஞ்ஜிதப்³ப³ம் யாவ ந ஸப்³பே³ஸம் ஓத³னோ ஸம்பத்தோ ஹோதி. ஸக்கச்சம் பிண்ட³பாதோ பு⁴ஞ்ஜிதப்³போ³. பத்தஸஞ்ஞினா பிண்ட³பாதோ பு⁴ஞ்ஜிதப்³போ³. ஸபதா³னம் பிண்ட³பாதோ பு⁴ஞ்ஜிதப்³போ³. ஸமஸூபகோ பிண்ட³பாதோ பு⁴ஞ்ஜிதப்³போ³. ந தூ²பகதோ ஓமத்³தி³த்வா பிண்டி³பாதோ பு⁴ஞ்ஜிதப்³போ³. ந ஸூபம் வா ப்³யஞ்ஜனம் வா ஓத³னேன படிச்சா²தே³தப்³ப³ம் பி⁴ய்யோகம்யதம் உபாதா³ய. ந ஸூபம் வா ஓத³னம் வா அகி³லானேன அத்தனோ அத்தா²ய விஞ்ஞாபேத்வா பு⁴ஞ்ஜிதப்³ப³ம். ந உஜ்ஜா²னஸஞ்ஞினா பரேஸம் பத்தோ ஓலோகேதப்³போ³. நாதிமஹந்தோ கப³ளோ காதப்³போ³. பரிமண்ட³லோ ஆலோபோ காதப்³போ³. ந அனாஹடே கப³ளே முக²த்³வாரம் விவரிதப்³ப³ம். ந பு⁴ஞ்ஜமானேன ஸப்³போ³ ஹத்தோ² முகே² பக்கி²பிதப்³போ³. ந ஸகப³ளேன முகே²ன ப்³யாஹரிதப்³ப³ம். ந பிண்டு³க்கே²பகம் பு⁴ஞ்ஜிதப்³ப³ம். ந கப³ளாவச்சே²த³கம் பு⁴ஞ்ஜிதப்³ப³ம். ந அவக³ண்ட³காரகம் பு⁴ஞ்ஜிதப்³ப³ம். ந ஹத்த²னித்³து⁴னகம் பு⁴ஞ்ஜிதப்³ப³ம். ந ஸித்தா²வகாரகம் பு⁴ஞ்ஜிதப்³ப³ம். ந ஜிவ்ஹானிச்சா²ரகம் பு⁴ஞ்ஜிதப்³ப³ம். ந சபுசபுகாரகம் பு⁴ஞ்ஜிதப்³ப³ம். ந ஸுருஸுருகாரகம் பு⁴ஞ்ஜிதப்³ப³ம். ந ஹத்த²னில்லேஹகம் பு⁴ஞ்ஜிதப்³ப³ம். ந பத்தனில்லேஹகம் பு⁴ஞ்ஜிதப்³ப³ம். ந ஓட்ட²னில்லேஹகம் பு⁴ஞ்ஜிதப்³ப³ம்.

‘‘ந ஸாமிஸேன ஹத்தே²ன பானீயதா²லகோ படிக்³க³ஹேதப்³போ³. ந தாவ தே²ரேன உத³கம் படிக்³க³ஹேதப்³ப³ம் யாவ ந ஸப்³பே³வ பு⁴த்தாவினோ ஹோந்தி. உத³கே தி³ய்யமானே உபோ⁴ஹி ஹத்தே²ஹி பத்தம் படிக்³க³ஹேத்வா உத³கம் படிக்³க³ஹேதப்³ப³ம். நீசம் கத்வா ஸாது⁴கம் அப்படிக⁴ம்ஸந்தேன பத்தோ தோ⁴விதப்³போ³. ஸசே உத³கப்படிக்³கா³ஹகோ ஹோதி, நீசம் கத்வா உத³கப்படிக்³க³ஹே உத³கம் ஆஸிஞ்சிதப்³ப³ம் – மா உத³கப்படிக்³கா³ஹகோ உத³கேன ஓஸிஞ்சி, மா ஸாமந்தா பி⁴க்கூ² உத³கேன ஓஸிஞ்சிம்ஸு, மா ஸங்கா⁴டி உத³கேன ஓஸிஞ்சீதி. ஸசே உத³கப்படிக்³கா³ஹகோ ந ஹோதி, நீசம் கத்வா ச²மாய உத³கம் ஆஸிஞ்சிதப்³ப³ம் – மா ஸாமந்தா பி⁴க்கூ² உத³கேன ஓஸிஞ்சிம்ஸு, மா ஸங்கா⁴டி உத³கேன ஓஸிஞ்சீதி. ந ஸஸித்த²கம் பத்ததோ⁴வனம் அந்தரக⁴ரே ச²ட்³டே³தப்³ப³ம்.

‘‘நிவத்தந்தேன நவகேஹி பி⁴க்கூ²ஹி பட²மதரம் நிவத்திதப்³ப³ம். பச்சா² தே²ரேஹி ஸுப்படிச்ச²ன்னேன அந்தரக⁴ரே க³ந்தப்³ப³ம். ஸுஸம்வுதேன அந்தரக⁴ரே க³ந்தப்³ப³ம். ஓக்கி²த்தசக்கு²னா அந்தரக⁴ரே க³ந்தப்³ப³ம். ந உக்கி²த்தகாய அந்தரக⁴ரே க³ந்தப்³ப³ம். ந உஜ்ஜக்³கி⁴காய அந்தரக⁴ரே க³ந்தப்³ப³ம். அப்பஸத்³தே³ன அந்தரக⁴ரே க³ந்தப்³ப³ம். ந காயப்பசாலகம் அந்தரக⁴ரே க³ந்தப்³ப³ம். ந பா³ஹுப்பசாலகம் அந்தரக⁴ரே க³ந்தப்³ப³ம். ந ஸீஸப்பசாலகம் அந்தரக⁴ரே க³ந்தப்³ப³ம். ந க²ம்ப⁴கதேன அந்தரக⁴ரே க³ந்தப்³ப³ம். ந ஓகு³ண்டி²தேன அந்தரக⁴ரே க³ந்தப்³ப³ம். ந உக்குடிகாய அந்தரக⁴ரே க³ந்தப்³ப³ம். இத³ம் கோ², பி⁴க்க²வே, பி⁴க்கூ²னம் ப⁴த்தக்³க³வத்தம் யதா² பி⁴க்கூ²ஹி ப⁴த்தக்³கே³ ஸம்மா வத்திதப்³ப³’’ந்தி.

பட²மபா⁴ணவாரோ நிட்டி²தோ.