1. ஆக³ந்துகவத்தகதா²

356. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆக³ந்துகா பி⁴க்கூ² ஸஉபாஹனாபி ஆராமம் பவிஸந்தி, ச²த்தபக்³க³ஹிதாபி ஆராமம் பவிஸந்தி, ஓகு³ண்டி²தாபி ஆராமம் பவிஸந்தி, ஸீஸேபி சீவரம் கரித்வா ஆராமம் பவிஸந்தி, பானீயேனபி பாதே³ தோ⁴வந்தி, வுட்³ட⁴தரேபி ஆவாஸிகே பி⁴க்கூ² ந அபி⁴வாதே³ந்தி, நபி ஸேனாஸனம் புச்ச²ந்தி. அஞ்ஞதரோபி ஆக³ந்துகோ பி⁴க்கு² அனஜ்ஜா²வுட்ட²ம் விஹாரம் க⁴டிகம் உக்³கா⁴டேத்வா கவாடம் பணாமேத்வா ஸஹஸா பாவிஸி. தஸ்ஸ உபரிபிட்டி²தோ [உபரிபிட்ட²தோ (?)] அஹி க²ந்தே⁴ பபதி. ஸோ பீ⁴தோ விஸ்ஸரமகாஸி. பி⁴க்கூ² உபதா⁴வித்வா தம் பி⁴க்கு²ம் ஏதத³வோசும் – ‘‘கிஸ்ஸ த்வம், ஆவுஸோ, விஸ்ஸரமகாஸீ’’தி? அத² கோ² ஸோ பி⁴க்கு² பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆக³ந்துகா பி⁴க்கூ² ஸஉபாஹனாபி ஆராமம் பவிஸிஸ்ஸந்தி, ச²த்தபக்³க³ஹிதாபி ஆராமம் பவிஸிஸ்ஸந்தி, ஓகு³ண்டி²தாபி ஆராமம் பவிஸிஸ்ஸந்தி, ஸீஸேபி சீவரம் கரித்வா ஆராமம் பவிஸிஸ்ஸந்தி, பானீயேனபி பாதே³ தோ⁴விஸ்ஸந்தி, வுட்³ட⁴தரேபி ஆவாஸிகே பி⁴க்கூ² ந அபி⁴வாதே³ஸ்ஸந்தி, நபி ஸேனாஸனம் புச்சி²ஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, ‘‘ஆக³ந்துகா பி⁴க்கூ² ஸஉபாஹனாபி ஆராமம் பவிஸந்தி, ச²த்தபக்³க³ஹிதாபி ஆராமம் பவிஸந்தி, ஓகு³ண்டி²தாபி ஆராமம் பவிஸந்தி, ஸீஸேபி சீவரம் கரித்வா ஆராமம் பவிஸந்தி, பானீயேனிபி பாதே³ தோ⁴வந்தி, வுட்³ட⁴தரேபி ஆவாஸிகே பி⁴க்கூ² ந அபி⁴வாதே³ந்தி, நபி ஸேனாஸனம் புச்ச²ந்தீதி. ஸச்சம் ப⁴க³வாதி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம பி⁴க்க²வே ஆக³ந்துகா பி⁴க்கூ² ஸஉபாஹனாபி ஆராமம் பவிஸிஸ்ஸந்தி, ச²த்தபக்³க³ஹிதாபி ஆராமம் பவிஸிஸ்ஸந்தி, ஓகு³ண்டி²தாபி ஆராமம் பவிஸிஸ்ஸந்தி, ஸீஸேபி சீவரம் கரித்வா ஆராமம் பவிஸிஸ்ஸந்தி, பானீயேனபி பாதே³ தோ⁴விஸ்ஸந்தி, வுட்³ட⁴தரேபி ஆவாஸிகே பி⁴க்கூ² ந அபி⁴வாதே³ஸ்ஸந்தி, நபி ஸேனாஸனம் புச்சி²ஸ்ஸந்தி, நேதம் பி⁴க்க²வே அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

357. ‘‘தேன ஹி, பி⁴க்க²வே, ஆக³ந்துகானம் பி⁴க்கூ²னம் வத்தம் பஞ்ஞபேஸ்ஸாமி யதா² ஆக³ந்துகேஹி பி⁴க்கூ²ஹி ஸம்மா வத்திதப்³ப³ம். ஆக³ந்துகேன, பி⁴க்க²வே, பி⁴க்கு²னா ‘இதா³னி ஆராமம் பவிஸிஸ்ஸாமீ’தி உபாஹனா ஓமுஞ்சித்வா நீசம் கத்வா பப்போ²டேத்வா க³ஹேத்வா ச²த்தம் அபனாமேத்வா ஸீஸம் விவரித்வா ஸீஸே சீவரம் [விவரித்வா சீவரம் (க.)] க²ந்தே⁴ கத்வா ஸாது⁴கம் அதரமானேன ஆராமோ பவிஸிதப்³போ³. ஆராமம் பவிஸந்தேன ஸல்லக்கே²தப்³ப³ம் – ‘கத்த² ஆவாஸிகா பி⁴க்கூ² படிக்கமந்தீ’தி? யத்த² ஆவாஸிகா பி⁴க்கூ² படிக்கமந்தி – உபட்டா²னஸாலாய வா மண்ட³பே வா ருக்க²மூலே வா – தத்த² க³ந்த்வா ஏகமந்தம் பத்தோ நிக்கி²பிதப்³போ³; ஏகமந்தம் சீவரம் நிக்கி²பிதப்³ப³ம்; பதிரூபம் ஆஸனம் க³ஹேத்வா நிஸீதி³தப்³ப³ம்; பானீயம் புச்சி²தப்³ப³ம், பரிபோ⁴ஜனீயம் புச்சி²தப்³ப³ம் – ‘கதமம் பானீயம், கதமம் பரிபோ⁴ஜனீய’ந்தி? ஸசே பானீயேன அத்தோ² ஹோதி, பானீயம் க³ஹேத்வா பாதப்³ப³ம். ஸசே பரிபோ⁴ஜனீயேன அத்தோ² ஹோதி, பரிபோ⁴ஜனீயம் க³ஹேத்வா பாதா³ தோ⁴விதப்³பா³. பாதே³ தோ⁴வந்தேன ஏகேன ஹத்தே²ன உத³கம் ஆஸிஞ்சிதப்³ப³ம், ஏகேன ஹத்தே²ன பாதா³ தோ⁴விதப்³பா³. தேனேவ உத³கம் ஆஸிஞ்சிதப்³ப³ம் [யேன ஹத்தே²ன உத³கம் ஆஸிஞ்சிதப்³ப³ம் (ஸ்யா.)] ந தேனேவ ஹத்தே²ன பாதா³ தோ⁴விதப்³பா³. உபாஹனபுஞ்ச²னசோளகம் புச்சி²த்வா உபாஹனா புஞ்சி²தப்³பா³. உபாஹனா புஞ்ச²ந்தேன பட²மம் ஸுக்கே²ன சோளகேன புஞ்சி²தப்³பா³, பச்சா² அல்லேன. உபாஹனாபுஞ்ச²னசோளகம் தோ⁴வித்வா [பீளேத்வா (ஸ்யா.)] ஏகமந்தம் விஸ்ஸஜ்ஜேதப்³ப³ம்.

‘‘ஸசே ஆவாஸிகோ பி⁴க்கு² வுட்³டோ⁴ ஹோதி, அபி⁴வாதே³தப்³போ³. ஸசே நவகோ ஹோதி, அபி⁴வாதா³பேதப்³போ³. ஸேனாஸனம் புச்சி²தப்³ப³ம் – ‘கதமம் மே ஸேனாஸனம் பாபுணாதீ’தி? அஜ்ஜா²வுட்ட²ம் வா அனஜ்ஜா²வுட்ட²ம் வா புச்சி²தப்³ப³ம், கோ³சரோ புச்சி²தப்³போ³, அகோ³சரோ புச்சி²தப்³போ³, ஸேக்க²ஸம்மதானி [ஸேக²ஸம்மதானி (க.)] குலானி புச்சி²தப்³பா³னி, வச்சட்டா²னம் புச்சி²தப்³ப³ம், பஸ்ஸாவட்டா²னம் புச்சி²தப்³ப³ம், பானீயம் புச்சி²தப்³ப³ம், பரிபோ⁴ஜனீயம் புச்சி²தப்³ப³ம், கத்தரத³ண்டோ³ புச்சி²தப்³போ³, ஸங்க⁴ஸ்ஸ கதிகஸண்டா²னம் புச்சி²தப்³ப³ம் – ‘கம் காலம் பவிஸிதப்³ப³ம், கம் காலம் நிக்க²மிதப்³ப³’ந்தி? ஸசே விஹாரோ அனஜ்ஜா²வுட்டோ² ஹோதி, கவாடம் ஆகோடேத்வா முஹுத்தம் ஆக³மேத்வா க⁴டிகம் உக்³கா⁴டேத்வா கவாடம் பணாமேத்வா ப³ஹி டி²தேன நில்லோகேதப்³போ³.

‘‘ஸசே விஹாரோ உக்லாபோ ஹோதி, மஞ்சே வா மஞ்சோ ஆரோபிதோ ஹோதி, பீடே² வா பீட²ம் ஆரோபிதம் ஹோதி, ஸேனாஸனம் உபரி புஞ்ஜீகதம் [புஞ்ஜகிதம் (க.)] ஹோதி, ஸசே உஸ்ஸஹதி, ஸோதே⁴தப்³போ³. [மஹாவ. 66-67 (தோ²கம் விஸதி³ஸம்)] விஹாரம் ஸோதே⁴ந்தேன பட²மம் பூ⁴மத்த²ரணம் நீஹரித்வா ஏகமந்தம் நிக்கி²பிதப்³ப³ம்; மஞ்சபடிபாத³கா நீஹரித்வா ஏகமந்தம் நிக்கி²பிதப்³பா³; பி⁴ஸிபி³ப்³போ³ஹனம் நீஹரித்வா ஏகமந்தம் நிக்கி²பிதப்³ப³ம்; நிஸீத³னபச்சத்த²ரணம் நீஹரித்வா ஏகமந்தம் நிக்கி²பிதப்³ப³ம்; மஞ்சோ நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், நீஹரித்வா ஏகமந்தம் நிக்கி²பிதப்³போ³; பீட²ம் நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், நீஹரித்வா ஏகமந்தம் நிக்கி²பிதப்³ப³ம்; கே²ளமல்லகோ நீஹரித்வா ஏகமந்தம் நிக்கி²பிதப்³போ³; அபஸ்ஸேனப²லகம் நீஹரித்வா ஏகமந்தம் நிக்கி²பிதப்³ப³ம். ஸசே விஹாரே ஸந்தானகம் ஹோதி, உல்லோகா பட²மம் ஓஹாரேதப்³ப³ம், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி [ஊஹஞ்ஞீதி (ஸீ. ஸ்யா.)]. ஸங்காரம் விசினித்வா ஏகமந்தம் ச²ட்³டே³தப்³ப³ம்.

‘‘பூ⁴மத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²டா²னே [யதா²பஞ்ஞத்தம் (ஸீ. ஸ்யா.), யதா²பா⁴க³ம் (க.)] பஞ்ஞபேதப்³ப³ம். மஞ்சபடிபாத³கா ஓதாபேத்வா பமஜ்ஜித்வா அதிஹரித்வா யதா²டா²னே [யதா²பா⁴க³ம் (ஸ்யா. க.)] ட²பேதப்³பா³. மஞ்சோ ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், அதிஹரித்வா யதா²டா²னே [யதா²பா⁴க³ம் (ஸ்யா. க.)] பஞ்ஞபேதப்³போ³. பீட²ம் ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், அதிஹரித்வா யதா²டா²னே [யதா²பா⁴க³ம் (ஸ்யா. க.)] பஞ்ஞபேதப்³ப³ம். பி⁴ஸிபி³ப்³போ³ஹனம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பா⁴க³ம் பஞ்ஞபேதப்³ப³ம். நிஸீத³னபச்சத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பா⁴க³ம் பஞ்ஞபேதப்³ப³ம். கே²ளமல்லகோ ஓதாபேத்வா பமஜ்ஜித்வா அதிஹரித்வா யதா²பா⁴க³ம் ட²பேதப்³போ³. அபஸ்ஸேனப²லகம் ஓதாபேத்வா பமஜ்ஜித்வா அதிஹரித்வா யதா²பா⁴க³ம் ட²பேதப்³ப³ம். பத்தசீவரம் நிக்கி²பிதப்³ப³ம். பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரம் நிக்கி²பிதப்³ப³ம்.

‘‘ஸசே புரத்தி²மா ஸரஜா வாதா வாயந்தி, புரத்தி²மா வாதபானா த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா த²கேதப்³பா³. ஸசே உத்தரா ஸரஜா வாதா வாயந்தி, உத்தரா வாதபானா த²கேதப்³பா³. ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திம் த²கேதப்³பா³. ஸசே உண்ஹகாலோ ஹோதி, தி³வா வாதபானா த²கேதப்³பா³, ரத்திம் விவரிதப்³பா³.

‘‘ஸசே பரிவேணம் உக்லாபம் ஹோதி, பரிவேணம் ஸம்மஜ்ஜிதப்³ப³ம். ஸசே கோட்ட²கோ உக்லாபோ ஹோதி, கோட்ட²கோ ஸம்மஜ்ஜிதப்³போ³. ஸசே உபட்டா²னஸாலா உக்லாபா ஹோதி, உபட்டா²னஸாலா ஸம்மஜ்ஜிதப்³பா³. ஸசே அக்³கி³ஸாலா உக்லாபா ஹோதி, அக்³கி³ஸாலா ஸம்மஜ்ஜிதப்³பா³. ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பானீயம் ந ஹோதி, பானீயம் உபட்டா²பேதப்³ப³ம். ஸசே பரிபோ⁴ஜனீயம் ந ஹோதி, பரிபோ⁴ஜனீயம் உபட்டா²பேதப்³ப³ம். ஸசே ஆசமனகும்பி⁴யா உத³கம் ந ஹோதி, ஆசமனகும்பி⁴யா உத³கம் ஆஸிஞ்சிதப்³ப³ம். இத³ம் கோ², பி⁴க்க²வே, ஆக³ந்துகானம் பி⁴க்கூ²னம் வத்தம் யதா² ஆக³ந்துகேஹி பி⁴க்கூ²ஹி ஸம்மா வத்திதப்³ப³’’ந்தி.