2. ஆவாஸிகவத்தகதா²

358. தேன கோ² பன ஸமயேன ஆவாஸிகா பி⁴க்கூ² ஆக³ந்துகே பி⁴க்கூ² தி³ஸ்வா நேவ ஆஸனம் பஞ்ஞபேந்தி, ந பாதோ³த³கம் பாத³பீட²ம் பாத³கத²லிகம் உபனிக்கி²பந்தி, ந பச்சுக்³க³ந்த்வா பத்தசீவரம் படிக்³க³ண்ஹந்தி, ந பானீயேன புச்ச²ந்தி [ந பானீயேன புச்ச²ந்தி, ந பரிபோ⁴ஜனீயேன புச்ச²ந்தி (ஸ்யா. கம்.)], ந வுட்³ட⁴தரேபி ஆக³ந்துகே பி⁴க்கூ² அபி⁴வாதே³ந்தி, ந ஸேனாஸனம் பஞ்ஞபேந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆவாஸிகா பி⁴க்கூ² ஆக³ந்துகே பி⁴க்கூ² தி³ஸ்வா நேவ ஆஸனம் பஞ்ஞபேஸ்ஸந்தி, ந பாதோ³த³கம் பாத³பீட²ம் பாத³கத²லிகம் உபனிக்கி²பிஸ்ஸந்தி, ந பச்சுக்³க³ந்த்வா பத்தசீவரம் படிக்³க³ஹிஸ்ஸந்தி, ந பானீயேன புச்சி²ஸ்ஸந்தி, வுட்³ட⁴தரேபி ஆக³ந்துகே பி⁴க்கூ² ந அபி⁴வாதே³ஸ்ஸந்தி, ந ஸேனாஸனம் பஞ்ஞபேஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ஸச்சம் கிரம், பி⁴க்க²வே…பே… ஸச்சம் ப⁴க³வாதி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

359. ‘‘தேன ஹி, பி⁴க்க²வே, ஆவாஸிகானம் பி⁴க்கூ²னம் வத்தம் பஞ்ஞபேஸ்ஸாமி யதா² ஆவாஸிகேஹி பி⁴க்கூ²ஹி ஸம்மா வத்திதப்³ப³ம். ஆவாஸிகேன, பி⁴க்க²வே, பி⁴க்கு²னா ஆக³ந்துகம் பி⁴க்கு²ம் வுட்³ட⁴தரம் தி³ஸ்வா ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம், பச்சுக்³க³ந்த்வா பத்தசீவரம் படிக்³க³ஹேதப்³ப³ம், பானீயேன புச்சி²தப்³போ³ [பானீயேன புச்சி²தப்³போ³, பரிபோ⁴ஜனீயேன புச்சி²தப்³போ³ (ஸ்யா.)]. ஸசே உஸ்ஸஹதி, உபாஹனா புஞ்சி²தப்³பா³. உபாஹனா புஞ்ச²ந்தேன பட²மம் ஸுக்கே²ன சோளகேன புஞ்சி²தப்³பா³, பச்சா² அல்லேன. உபாஹனாபுஞ்ச²னசோளகம் தோ⁴வித்வா [தோ⁴வித்வா பீளேத்வா (ஸ்யா.)] ஏகமந்தம் விஸ்ஸஜ்ஜேதப்³ப³ம்.

‘‘ஆக³ந்துகோ பி⁴க்கு² வுட்³ட⁴தரோ அபி⁴வாதே³தப்³போ³. ஸேனாஸனம் பஞ்ஞபேதப்³ப³ம் – ‘ஏதம் தே ஸேனாஸனம் பாபுணாதீ’தி. அஜ்ஜா²வுட்ட²ம் வா அனஜ்ஜா²வுட்ட²ம் வா ஆசிக்கி²தப்³ப³ம். கோ³சரோ ஆசிக்கி²தப்³போ³. அகோ³சரோ ஆசிக்கி²தப்³போ³. ஸேக்க²ஸம்மதானி குலானி ஆசிக்கி²தப்³பா³னி. வச்சட்டா²னம் ஆசிக்கி²தப்³ப³ம். பஸ்ஸாவட்டா²னம் ஆசிக்கி²தப்³ப³ம். பானீயம் ஆசிக்கி²தப்³ப³ம். பரிபோ⁴ஜனீயம் ஆசிக்கி²தப்³ப³ம். கத்தரத³ண்டோ³ ஆசிக்கி²தப்³போ³. ஸங்க⁴ஸ்ஸ கதிகஸண்டா²னம் ஆசிக்கி²தப்³ப³ம் – ‘இமம் காலம் பவிஸிதப்³ப³ம், இமம் காலம் நிக்க²மிதப்³ப³’ந்தி.

‘‘ஸசே நவகோ ஹோதி, நிஸின்னகேனேவ ஆசிக்கி²தப்³ப³ம் – ‘அத்ர பத்தம் நிக்கி²பாஹி, அத்ர சீவரம் நிக்கி²பாஹி, இத³ம் ஆஸனம் நிஸீதா³ஹீ’தி. பானீயம் ஆசிக்கி²தப்³ப³ம். பரிபோ⁴ஜனீயம் ஆசிக்கி²தப்³ப³ம். உபாஹனாபுஞ்ச²னசோளகம் ஆசிக்கி²தப்³ப³ம். ஆக³ந்துகோ பி⁴க்கு² நவகோ அபி⁴வாதா³பேதப்³போ³. ஸேனாஸனம் ஆசிக்கி²தப்³ப³ம் – ‘ஏதம் தே ஸேனாஸனம் பாபுணாதீ’தி. அஜ்ஜா²வுட்ட²ம் வா அனஜ்ஜா²வுட்ட²ம் வா ஆசிக்கி²தப்³ப³ம். கோ³சரோ ஆசிக்கி²தப்³போ³. அகோ³சரோ ஆசிக்கி²தப்³போ³. ஸேக்க²ஸம்மதானி குலானி ஆசிக்கி²தப்³பா³னி. வச்சட்டா²னம் ஆசிக்கி²தப்³ப³ம். பஸ்ஸாவட்டா²னம் ஆசிக்கி²தப்³ப³ம். பானீயம் ஆசிக்கி²தப்³ப³ம். பரிபோ⁴ஜனீயம் ஆசிக்கி²தப்³ப³ம். கத்தரத³ண்டோ³ ஆசிக்கி²தப்³போ³. ஸங்க⁴ஸ்ஸ கதிகஸண்டா²னம் ஆசிக்கி²தப்³ப³ம் – ‘இமம் காலம் பவிஸிதப்³ப³ம், இமம் காலம் நிக்க²மிதப்³ப³’ந்தி. இத³ம் கோ², பி⁴க்க²வே, ஆவாஸிகானம் பி⁴க்கூ²னம் வத்தம் யதா² ஆவாஸிகேஹி பி⁴க்கூ²ஹி ஸம்மா வத்திதப்³ப³’’ந்தி.