1. பட²மபா⁴ணவாரோ

விஹாரானுஜானனம்

294. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ப⁴க³வதா பி⁴க்கூ²னம் ஸேனாஸனம் அபஞ்ஞத்தம் ஹோதி. தே ச பி⁴க்கூ² தஹம் தஹம் விஹரந்தி – அரஞ்ஞே, ருக்க²மூலே, பப்³ப³தே, கந்த³ராயம், கி³ரிகு³ஹாயம், ஸுஸானே, வனபத்தே², அஜ்ஜோ²காஸே, பலாலபுஞ்ஜே. தே காலஸ்ஸேவ ததோ ததோ உபனிக்க²மந்தி – அரஞ்ஞா ருக்க²மூலா பப்³ப³தா கந்த³ரா கி³ரிகு³ஹா ஸுஸானா வனபத்தா² அஜ்ஜோ²காஸா பலாலபுஞ்ஜா, பாஸாதி³கேன அபி⁴க்கந்தேன படிக்கந்தேன, ஆலோகிதேன விலோகிதேன, ஸமிஞ்ஜிதேன பஸாரிதேன, ஓக்கி²த்தசக்கூ², இரியாபத²ஸம்பன்னா. தேன கோ² பன ஸமயேன ராஜக³ஹகோ ஸேட்டீ² [ஸேட்டி² (க.)] காலஸ்ஸேவ உய்யானம் அக³மாஸி. அத்³த³ஸா கோ² ராஜக³ஹகோ ஸேட்டீ² தே பி⁴க்கூ² காலஸ்ஸேவ ததோ ததோ உபனிக்க²மந்தே – அரஞ்ஞா ருக்க²மூலா பப்³ப³தா கந்த³ரா கி³ரிகு³ஹா ஸுஸானா வனபத்தா² அஜ்ஜோ²காஸா பலாலபுஞ்ஜா, பாஸாதி³கேன அபி⁴க்கந்தேன படிக்கந்தேன, ஆலோகிதேன விலோகிதேன, ஸமிஞ்ஜிதேன பஸாரிதேன, ஓக்கி²த்தசக்கூ², இரியாபத²ஸம்பன்னே. தி³ஸ்வானஸ்ஸ சித்தம் பஸீதி³. அத² கோ² ராஜக³ஹகோ ஸேட்டீ² யேன தே பி⁴க்கூ² தேனுபஸங்கமி, உபஸங்கமித்வா தே பி⁴க்கூ² ஏதத³வோச – ‘‘ஸசாஹம், ப⁴ந்தே, விஹாரே காராபேய்யம், வஸேய்யாத² மே விஹாரேஸூ’’தி? ‘‘ந கோ², க³ஹபதி, ப⁴க³வதா விஹாரா அனுஞ்ஞாதா’’தி. ‘‘தேன ஹி, ப⁴ந்தே, ப⁴க³வந்தம் படிபுச்சி²த்வா மம ஆரோசேய்யாதா²’’தி. ‘‘ஏவம் க³ஹபதீ’’தி கோ² தே பி⁴க்கூ² ராஜக³ஹகஸ்ஸ ஸேட்டி²ஸ்ஸ படிஸ்ஸுத்வா யேன ப⁴க³வா தேனுபஸங்கமிம்ஸு, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘ராஜக³ஹகோ, ப⁴ந்தே, ஸேட்டீ² விஹாரே காராபேதுகாமோ. கத²ம் நு கோ², ப⁴ந்தே, அம்ஹேஹி [ப⁴ந்தே (ஸீ. க.)] படிபஜ்ஜிதப்³ப³’’ந்தி? அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பஞ்ச லேணானி [பஞ்ச ஸேனாஸனானி (ஸ்யா.)] – விஹாரம், அட்³ட⁴யோக³ம், பாஸாத³ம், ஹம்மியம், கு³ஹ’’ந்தி.

அத² கோ² தே பி⁴க்கூ² யேன ராஜக³ஹகோ ஸேட்டீ² தேனுபஸங்கமிம்ஸு, உபஸங்கமித்வா ராஜக³ஹகம் ஸேட்டி²ம் ஏதத³வோசும் – ‘‘அனுஞ்ஞாதா கோ², க³ஹபதி, ப⁴க³வதா விஹாரா; யஸ்ஸதா³னி காலம் மஞ்ஞஸீ’’தி. அத² கோ² ராஜக³ஹகோ ஸேட்டீ² ஏகாஹேனேவ ஸட்டி²விஹாரே பதிட்டா²பேஸி. அத² கோ² ராஜக³ஹகோ ஸேட்டீ² தே ஸட்டி²விஹாரே பரியோஸாபேத்வா யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ராஜக³ஹகோ ஸேட்டீ² ப⁴க³வந்தம் ஏதத³வோச – ‘‘அதி⁴வாஸேது மே, ப⁴ந்தே, ப⁴க³வா ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² ராஜக³ஹகோ ஸேட்டீ² ப⁴க³வதோ அதி⁴வாஸனம் விதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

அத² கோ² ராஜக³ஹகோ ஸேட்டீ² தஸ்ஸா ரத்தியா அச்சயேன பணீதம் கா²த³னீயம் போ⁴ஜனீயம் படியாதா³பேத்வா ப⁴க³வதோ காலம் ஆரோசாபேஸி – ‘‘காலோ, ப⁴ந்தே, நிட்டி²தம் ப⁴த்த’’ந்தி. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன ராஜக³ஹகஸ்ஸ ஸேட்டி²ஸ்ஸ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³ ஸத்³தி⁴ம் பி⁴க்கு²ஸங்கே⁴ன. அத² கோ² ராஜக³ஹகோ ஸேட்டீ² பு³த்³த⁴ப்பமுக²ம் பி⁴க்கு²ஸங்க⁴ம் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேத்வா ஸம்பவாரேத்வா, ப⁴க³வந்தம் பு⁴த்தாவிம் ஓனீதபத்தபாணிம், ஏகமந்தம் நிஸீதி³. ஏகமந்தம் நிஸின்னோ கோ² ராஜக³ஹகோ ஸேட்டீ² ப⁴க³வந்தம் ஏதத³வோச – ‘‘ஏதே மே, ப⁴ந்தே, ஸட்டி²விஹாரா புஞ்ஞத்தி²கேன ஸக்³க³த்தி²கேன காராபிதா. கதா²ஹம், ப⁴ந்தே, தேஸு விஹாரேஸு படிபஜ்ஜாமீ’’தி? ‘‘தேன ஹி த்வம், க³ஹபதி, தே ஸட்டி²விஹாரே ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ பதிட்டா²பேஹீ’’தி. ‘‘ஏவம் ப⁴ந்தே’’தி கோ² ராஜக³ஹகோ ஸேட்டீ² ப⁴க³வதோ படிஸ்ஸுத்வா தே ஸட்டி²விஹாரே ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ பதிட்டா²பேஸி.

295. அத² கோ² ப⁴க³வா ராஜக³ஹகம் ஸேட்டி²ம் இமாஹி கா³தா²ஹி அனுமோதி³ –

‘‘ஸீதம் உண்ஹம் படிஹந்தி [படிஹனதி (க.)], ததோ வாளமிகா³னி ச;

ஸரீஸபே ச மகஸே, ஸிஸிரே சாபி வுட்டி²யோ.

‘‘ததோ வாதாதபோ கோ⁴ரே, ஸஞ்ஜாதோ [வாதாதபே கோ⁴ரே, ஸஞ்ஜாதே (க. ஸத்³த³னீதி)] படிஹஞ்ஞதி;

லேணத்த²ஞ்ச ஸுக²த்த²ஞ்ச, ஜா²யிதுஞ்ச விபஸ்ஸிதும்.

‘‘விஹாரதா³னம் ஸங்க⁴ஸ்ஸ, அக்³க³ம் பு³த்³தே⁴ன [பு³த்³தே⁴ஹி (ஸ்யா.)] வண்ணிதம்;

தஸ்மா ஹி பண்டி³தோ, போஸோ ஸம்பஸ்ஸம் அத்த²மத்தனோ.

‘‘விஹாரே காரயே ரம்மே, வாஸயேத்த² ப³ஹுஸ்ஸுதே;

தேஸம் அன்னஞ்ச பானஞ்ச, வத்த²ஸேனாஸனானி ச;

த³தே³ய்ய உஜுபூ⁴தேஸு, விப்பஸன்னேன சேதஸா.

‘‘தே தஸ்ஸ த⁴ம்மம் தே³ஸேந்தி, ஸப்³ப³து³க்கா²பனூத³னம்;

யம் ஸோ த⁴ம்மம் இத⁴ஞ்ஞாய, பரினிப்³பா³தி அனாஸவோ’’தி.

அத² கோ² ப⁴க³வா ராஜக³ஹகம் ஸேட்டி²ம் இமாஹி கா³தா²ஹி அனுமோதி³த்வா உட்டா²யாஸனா பக்காமி.

296. அஸ்ஸோஸும் கோ² மனுஸ்ஸா – ‘‘ப⁴க³வதா கிர விஹாரா அனுஞ்ஞாதா’’தி ஸக்கச்சம் [தே ஸக்கச்சம் (ஸ்யா. கம்.)] விஹாரே காராபேந்தி. தே விஹாரா அகவாடகா ஹோந்தி; அஹீபி விச்சி²காபி ஸதபதி³யோபி பவிஸந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கவாட’’ந்தி. பி⁴த்திசி²த்³த³ம் கரித்வா வல்லியாபி ரஜ்ஜுயாபி கவாடம் ப³ந்த⁴ந்தி. உந்தூ³ரேஹிபி உபசிகாஹிபி க²ஜ்ஜந்தி. க²யிதப³ந்த⁴னானி கவாடானி பதந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பிட்ட²ஸங்கா⁴டம் உது³க்க²லிகம் உத்தரபாஸக’’ந்தி. கவாடா ந பு²ஸீயந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஆவிஞ்ச²னச்சி²த்³த³ம் ஆவிஞ்ச²னரஜ்ஜு’’ந்தி. கவாடா ந த²கியந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, அக்³க³ளவட்டிம் கபிஸீஸகம் ஸூசிகம் க⁴டிக’’ந்தி.

தேன கோ² பன ஸமயேன பி⁴க்கூ² ந ஸக்கோந்தி கவாடம் அபாபுரிதும். ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, தாளச்சி²த்³த³ம். தீணி தாளானி – லோஹதாளம், கட்ட²தாளம், விஸாணதாள’’ந்தி. யேஹி [யேபி (ஸீ. ஸ்யா.)] தே உக்³கா⁴டேத்வா பவிஸந்தி [விஸாணதாளம், யேஹி தே உக்³கா⁴டேத்வா பவிஸந்தீதி (க.)], விஹாரா அகு³த்தா ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, யந்தகம் ஸூசிக’’ந்தி.

தேன கோ² பன ஸமயேன விஹாரா திணச்ச²த³னா ஹோந்தி; ஸீதகாலே ஸீதா, உண்ஹகாலே உண்ஹா. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காது’’ந்தி.

தேன கோ² பன ஸமயேன விஹாரா அவாதபானகா ஹோந்தி அசக்கு²ஸ்ஸா து³க்³க³ந்தா⁴. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, தீணி வாதபானானி – வேதி³காவாதபானம், ஜாலவாதபானம், ஸலாகவாதபான’’ந்தி. வாதபானந்தரிகாய காளகாபி வக்³கு³லியோபி பவிஸந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, வாதபானசக்கலிக’’ந்தி. சக்கலிகந்தரிகாயபி காளகாபி வக்³கு³லியோபி பவிஸந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, வாதபானகவாடகம் வாதபானபி⁴ஸிக’’ந்தி.

தேன கோ² பன ஸமயேன பி⁴க்கூ² ச²மாயம் ஸயந்தி. க³த்தானிபி சீவரானிபி பம்ஸுகிதானி ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, திணஸந்தா²ரக’’ந்தி. திணஸந்தா²ரகோ உந்தூ³ரேஹிபி உபசிகாஹிபி க²ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மிட்³டி⁴’’ந்தி [மீட⁴ந்தி (ஸீ.), மிடி⁴ந்தி (ஸ்யா.)]. மிட்³டி⁴யா க³த்தானி து³க்கா² ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பி³த³லமஞ்சக’’ந்தி.

மஞ்சபீடா²தி³அனுஜானனம்

297. தேன கோ² பன ஸமயேன ஸங்க⁴ஸ்ஸ ஸோஸானிகோ மஸாரகோ மஞ்சோ உப்பன்னோ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மஸாரகம் மஞ்ச’’ந்தி. மஸாரகம் பீட²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மஸாரகம் பீட²’’ந்தி.

தேன கோ² பன ஸமயேன ஸங்க⁴ஸ்ஸ ஸோஸானிகோ பு³ந்தி³காப³த்³தோ⁴ மஞ்சோ உப்பன்னோ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பு³ந்தி³காப³த்³த⁴ம் மஞ்ச’’ந்தி. பு³ந்தி³காப³த்³த⁴ம் பீட²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பு³ந்தி³காப³த்³த⁴ம் பீட²’’ந்தி.

தேன கோ² பன ஸமயேன ஸங்க⁴ஸ்ஸ ஸோஸானிகோ குளீரபாத³கோ மஞ்சோ உப்பன்னோ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, குளீரபாத³கம் மஞ்ச’’ந்தி. குளீரபாத³கம் பீட²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, குளீரபாத³கம் பீட²’’ந்தி.

தேன கோ² பன ஸமயேன ஸங்க⁴ஸ்ஸ ஸோஸானிகோ ஆஹச்சபாத³கோ மஞ்சோ உப்பன்னோ ஹோதி. ப⁴க³வதோ ஏதமத்த²ம் ஓராசேஸும். ‘‘அனுஜானாமி, பி⁴க்க²வே, ஆஹச்சபாத³கம் மஞ்ச’’ந்தி. ஆஹச்சபாத³கம் பீட²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஆஹச்சபாத³கம் பீட²’’ந்தி.

தேன கோ² பன ஸமயேன ஸங்க⁴ஸ்ஸ ஆஸந்தி³கோ உப்பன்னோ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஆஸந்தி³க’’ந்தி. உச்சகோ ஆஸந்தி³கோ உப்பன்னோ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உச்சகம்பி ஆஸந்தி³க’’ந்தி. ஸத்தங்கோ³ உப்பன்னோ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஸத்தங்க³’’ந்தி. உச்சகோ ஸத்தங்கோ³ உப்பன்னோ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உச்சகம்பி ஸத்தங்க³’’ந்தி. ப⁴த்³த³பீட²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ப⁴த்³த³பீட²’’ந்தி. பீடி²கா உப்பன்னா ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பீடி²க’’ந்தி. ஏளகபாத³கம் பீட²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஏளகபாத³கம் பீட²’’ந்தி. ஆமலகவட்டிகம் [ஆமலகவண்டிகம் (ஸ்யா.)] பீட²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஆமலகவட்டிகம் பீட²’’ந்தி. ப²லகம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ப²லக’’ந்தி. கோச்ச²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கோச்ச²’’ந்தி. பலாலபீட²ம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பலாலபீட²’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சே மஞ்சே ஸயந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, உச்சே மஞ்சே ஸயிதப்³ப³ம். யோ ஸயேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² நீசே மஞ்சே ஸயந்தோ அஹினா த³ட்டோ² ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மஞ்சபடிபாத³க’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சே மஞ்சபடிபாத³கே தா⁴ரேந்தி, ஸஹ மஞ்சபடிபாத³கேஹி பவேதே⁴ந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, உச்சா மஞ்சபடிபாத³கா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்ட²ங்கு³லபரமம் மஞ்சபடிபாத³க’’ந்தி.

தேன கோ² பன ஸமயேன ஸங்க⁴ஸ்ஸ ஸுத்தம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஸுத்தம் மஞ்சம் வேடே²து’’ந்தி [வேதுந்தி (ஸீ.)]. அங்கா³னி ப³ஹுஸுத்தம் பரியாதி³யந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, அங்கே³ விஜ்ஜி²த்வா அட்ட²பத³கம் வேடே²து’’ந்தி. சோளகம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, சிமிலிகம் காது’’ந்தி. தூலிகா உப்பன்னா ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, விஜடேத்வா பி³ப்³போ³ஹனம் [பி³ம்போ³ஹனம் (ஸீ. ஸ்யா. பி³ம்ப³ + ஓஹனம்)] காதும். தீணி தூலானி – ருக்க²தூலம், லதாதூலம், போடகிதூல’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² அத்³த⁴காயிகானி [அட்³ட⁴காயிகானி (க.)] பி³ப்³போ³ஹனானி தா⁴ரேந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, அட்³ட⁴காயிகானி பி³ப்³போ³ஹனானி தா⁴ரேதப்³பா³னி. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஸீஸப்பமாணம் பி³ப்³போ³ஹனம் காது’’ந்தி.

தேன கோ² பன ஸமயேன ராஜக³ஹே கி³ரக்³க³ஸமஜ்ஜோ ஹோதி. மனுஸ்ஸா மஹாமத்தானம் அத்தா²ய பி⁴ஸியோ படியாதே³ந்தி – உண்ணபி⁴ஸிம், சோளபி⁴ஸிம், வாகபி⁴ஸிம், திணபி⁴ஸிம், பண்ணபி⁴ஸிம். தே வீதிவத்தே ஸமஜ்ஜே ச²விம் உப்பாடேத்வா ஹரந்தி. அத்³த³ஸாஸும் கோ² பி⁴க்கூ² ஸமஜ்ஜட்டா²னே ப³ஹும் உண்ணம்பி சோளகம்பி வாகம்பி திணம்பி பண்ணம்பி ச²ட்டிதம். தி³ஸ்வான ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பஞ்ச பி⁴ஸியோ – உண்ணபி⁴ஸிம், சோளபி⁴ஸிம், வாகபி⁴ஸிம், திணபி⁴ஸிம், பண்ணபி⁴ஸி’’ந்தி.

தேன கோ² பன ஸமயேன ஸங்க⁴ஸ்ஸ ஸேனாஸனபரிக்கா²ரிகம் து³ஸ்ஸம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பி⁴ஸிம் ஓனந்தி⁴து’’ந்தி [ஓனத்³தி⁴தும் (ஸ்யா.)].

தேன கோ² பன ஸமயேன பி⁴க்கூ² மஞ்சபி⁴ஸிம் பீடே² ஸந்த²ரந்தி, பீட²பி⁴ஸிம் மஞ்சே ஸந்த²ரந்தி. பி⁴ஸியோ பரிபி⁴ஜ்ஜந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஓனத்³த⁴மஞ்சம் [ஓனத்³த⁴மஞ்சம் (க.) ஏவமுபரிபி] ஓனத்³த⁴பீட²’’ந்தி. உல்லோகம் அகரித்வா ஸந்த²ரந்தி, ஹேட்ட²தோ நிபதந்தி [நிபடந்தி (க.), நிப்ப²டந்தி (ஸீ.), நிப்பாடேந்தி (ஸ்யா.)] …பே… ‘‘அனுஜானாமி, பி⁴க்க²வே, உல்லோகம் கரித்வா ஸந்த²ரித்வா பி⁴ஸிம் ஓனந்தி⁴து’’ந்தி. ச²விம் உப்பாடேத்வா ஹரந்தி…பே… ‘‘அனுஜானாமி, பி⁴க்க²வே, போ²ஸிது’’ந்தி. ஹரந்தியேவ…பே… ‘‘அனுஜானாமி, பி⁴க்க²வே, ப⁴த்திகம்ம’’ந்தி. ஹரந்தியேவ…பே… ‘‘அனுஜானாமி, பி⁴க்க²வே, ஹத்த²ப⁴த்திகம்ம’’ந்தி. ஹரந்தியேவ…பே… ‘‘அனுஜானாமி, பி⁴க்க²வே, ஹத்த²ப⁴த்தி’’ந்தி.

ஸேதவண்ணாதி³அனுஜானனம்

298. தேன கோ² பன ஸமயேன தித்தி²யானம் ஸேய்யாயோ ஸேதவண்ணா ஹோந்தி, காளவண்ணகதா பூ⁴மி, கே³ருகபரிகம்மகதா பி⁴த்தி. ப³ஹூ மனுஸ்ஸா ஸேய்யாபேக்க²கா க³ச்ச²ந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, விஹாரே ஸேதவண்ணம் காளவண்ணம் கே³ருகபரிகம்ம’’ந்தி.

தேன கோ² பன ஸமயேன ப²ருஸாய பி⁴த்தியா ஸேதவண்ணோ ந நிபததி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, து²ஸபிண்ட³ம் த³த்வா பாணிகாய படிபா³ஹேத்வா ஸேதவண்ணம் நிபாதேது’’ந்தி. ஸேதவண்ணோ அனிப³ந்த⁴னீயோ ஹோதி…பே… ‘‘அனுஜானாமி, பி⁴க்க²வே, ஸண்ஹமத்திகம் த³த்வா பாணிகாய படிபா³ஹேத்வா ஸேதவண்ணம் நிபாதேது’’ந்தி. ஸேதவண்ணோ அனிப³ந்த⁴னீயோ ஹோதி…பே… ‘‘அனுஜானாமி, பி⁴க்க²வே, இக்காஸம் பிட்ட²மத்³த³’’ந்தி.

தேன கோ² பன ஸமயேன ப²ருஸாய பி⁴த்தியா கே³ருகா ந நிபததி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, து²ஸபிண்ட³ம் த³த்வா பாணிகாய படிபா³ஹேத்வா கே³ருகம் நிபாதேது’’ந்தி. கே³ருகா அனிப³ந்த⁴னீயா ஹோதி …பே… ‘‘அனுஜானாமி, பி⁴க்க²வே, குண்ட³கமத்திகம் த³த்வா பாணிகாய படிபா³ஹேத்வா கே³ருகம் நிபாதேது’’ந்தி. கே³ருகா அனிப³ந்த⁴னீயா ஹோதி…பே… ‘‘அனுஜானாமி, பி⁴க்க²வே, ஸாஸபகுட்டம் ஸித்த²தேலக’’ந்தி. அச்சுஸ்ஸன்னம் ஹோதி…பே… ‘‘அனுஜானாமி, பி⁴க்க²வே, சோளகேன பச்சுத்³த⁴ரிது’’ந்தி.

தேன கோ² பன ஸமயேன ப²ருஸாய பூ⁴மியா காளவண்ணோ ந நிபததி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, து²ஸபிண்ட³ம் த³த்வா பாணிகாய படிபா³ஹேத்வா காளவண்ணம் நிபாதேது’’ந்தி. காளவண்ணோ அனிப³ந்த⁴னீயோ ஹோதி…பே… ‘‘அனுஜானாமி, பி⁴க்க²வே, க³ண்டு³மத்திகம் த³த்வா பாணிகாய படிபா³ஹேத்வா காளவண்ணம் நிபாதேது’’ந்தி. காளவண்ணோ அனிப³ந்த⁴னீயோ ஹோதி…பே… ‘‘அனுஜானாமி, பி⁴க்க²வே, இக்காஸம் கஸாவ’’ந்தி.

படிபா⁴னசித்தபடிக்கே²பம்

299. தேன கோ² பன ஸமயேன ச²ப்³ப³க்³கி³யா பி⁴க்கூ² விஹாரே படிபா⁴னசித்தம் காராபேந்தி – இத்தி²ரூபகம் புரிஸரூபகம். மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, படிபா⁴னசித்தம் காராபேதப்³ப³ம் – இத்தி²ரூபகம் புரிஸரூபகம். யோ காராபேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மாலாகம்மம் லதாகம்மம் மகரத³ந்தகம் பஞ்சபடிக’’ந்தி.

இட்ட²காசயாதி³அனுஜானனம்

300. தேன கோ² பன ஸமயேன விஹாரா நீசவத்து²கா ஹோந்தி, உத³கேன ஓத்த²ரிய்யந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி.

தேன கோ² பன ஸமயேன விஹாரா ஆளகமந்தா³ ஹோந்தி. பி⁴க்கூ² ஹிரியந்தி நிபஜ்ஜிதும். ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, திரோகரணி’’ந்தி. திரோகரணிம் உக்கி²பித்வா ஓலோகேந்தி…பே… ‘‘அனுஜானாமி, பி⁴க்க²வே, அட்³ட⁴குட்டக’’ந்தி. அட்³ட⁴குட்டகா உபரிதோ ஓலோகேந்தி…பே… ‘‘அனுஜானாமி, பி⁴க்க²வே, தயோ க³ப்³பே⁴ – ஸிவிகாக³ப்³ப⁴ம், நாளிகாக³ப்³ப⁴ம், ஹம்மியக³ப்³ப⁴’’ந்தி.

தேன கோ² பன ஸமயேன பி⁴க்கூ² கு²த்³த³கே விஹாரே மஜ்ஜே² க³ப்³ப⁴ம் கரோந்தி. உபசாரோ ந ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கு²த்³த³கே விஹாரே ஏகமந்தம் க³ப்³ப⁴ம் காதும், மஹல்லகே மஜ்ஜே²’’தி.

தேன கோ² பன ஸமயேன விஹாரஸ்ஸ குட்டபாதோ³ ஜீரதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, குலங்கபாத³க’’ந்தி [குளுங்கபாத³கந்தி (ஸீ.)]. விஹாரஸ்ஸ குட்டோ ஓவஸ்ஸதி…பே…‘‘அனுஜானாமி, பி⁴க்க²வே, பரித்தாணகிடிகம் உத்³த³ஸுத⁴’’ந்தி [உத்³தா⁴ஸுத⁴ந்தி (ஸ்யா.)].

தேன கோ² பன ஸமயேன அஞ்ஞதரஸ்ஸ பி⁴க்கு²னோ திணச்ச²த³னா அஹி க²ந்தே⁴ பததி. ஸோ பீ⁴தோ விஸ்ஸரமகாஸி. பி⁴க்கூ² உபதா⁴வித்வா தம் பி⁴க்கு²ம் ஏதத³வோசும் – ‘‘கிஸ்ஸ த்வம், ஆவுஸோ, விஸ்ஸரமகாஸீ’’தி? அத² கோ² ஸோ பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, விதான’’ந்தி.

தேன கோ² பன ஸமயேன பி⁴க்கூ² மஞ்சபாதே³பி பீட²பாதே³பி த²விகாயோ லக்³கே³ந்தி. உந்தூ³ரேஹிபி உபசிகாஹிபி க²ஜ்ஜந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பி⁴த்திகி²லம் நாக³த³ந்தக’’ந்தி.

தேன கோ² பன ஸமயேன பி⁴க்கூ² மஞ்சேபி பீடே²பி சீவரம் நிக்கி²பந்தி. சீவரம் பரிபி⁴ஜ்ஜிதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, விஹாரே சீவரவம்ஸம் சீவரரஜ்ஜு’’ந்தி.

தேன கோ² பன ஸமயேன விஹாரா அனாளிந்த³கா ஹோந்தி அப்படிஸ்ஸரணா. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஆளிந்த³ம் பக⁴னம் பகுட்டம் [பகுட்³ட³ம் (ஸீ.)] ஓஸாரக’’ந்தி. ஆளிந்தா³ பாகடா ஹோந்தி. பி⁴க்கூ² ஹிரியந்தி நிபஜ்ஜிதும்…பே… ‘‘அனுஜானாமி, பி⁴க்க²வே, ஸம்ஸரணகிடிகம் உக்³கா⁴டனகிடிக’’ந்தி.

உபட்டா²னஸாலாஅனுஜானனம்

301. தேன கோ² பன ஸமயேன பி⁴க்கூ² அஜ்ஜோ²காஸே ப⁴த்தவிஸ்ஸக்³க³ம் கரோந்தா ஸீதேனபி உண்ஹேனபி கிலமந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உபட்டா²னஸால’’ந்தி. உபட்டா²னஸாலா நீசவத்து²கா ஹோதி, உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. உபட்டா²னஸாலாய திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிகம் சீவரவம்ஸம் சீவரரஜ்ஜு’’ந்தி.

தேன கோ² பன ஸமயேன பி⁴க்கூ² அஜ்ஜோ²காஸே ச²மாய சீவரம் பத்த²ரந்தி. சீவரம் பம்ஸுகிதம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, அஜ்ஜோ²காஸே சீவரவம்ஸம் சீவரரஜ்ஜு’’ந்தி. பானீயம் ஓதப்பதி…பே… ‘‘அனுஜானாமி, பி⁴க்க²வே, பானீயஸாலம் பானீயமண்ட³ப’’ந்தி. பானீயஸாலா நீசவத்து²கா ஹோதி, உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. பானீயஸாலாய திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிகம் சீவரவம்ஸம் சீவரரஜ்ஜு’’ந்தி. பானீயபா⁴ஜனம் ந ஸம்விஜ்ஜதி…பே… ‘‘அனுஜானாமி, பி⁴க்க²வே, பானீயஸங்க²ம் பானீயஸராவக’’ந்தி.

பாகாராதி³அனுஜானனம்

302. தேன கோ² பன ஸமயேன விஹாரா அபரிக்கி²த்தா ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பரிக்கி²பிதும் தயோ பாகாரே – இட்ட²காபாகாரம், ஸிலாபாகாரம், தா³ருபாகார’’ந்தி. கோட்ட²கோ ந ஹோதி…பே… ‘‘அனுஜானாமி, பி⁴க்க²வே, கோட்ட²க’’ந்தி. கோட்ட²கோ நீசவத்து²கோ ஹோதி, உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. கோட்ட²கஸ்ஸ கவாடம் ந ஹோதி…பே… ‘‘அனுஜானாமி, பி⁴க்க²வே, கவாடம் பிட்ட²ஸங்கா⁴டம் உது³க்க²லிகம் உத்தரபாஸகம் அக்³க³ளவட்டிம் கபிஸீஸகம் ஸூசிகம் க⁴டிகம் தாளச்சி²த்³த³ம் ஆவிஞ்ச²னச்சி²த்³த³ம் ஆவிஞ்ச²னரஜ்ஜு’’ந்தி. கோட்ட²கே திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிக’’ந்தி.

தேன கோ² பன ஸமயேன பரிவேணம் சிக்க²ல்லம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மரும்ப³ம் உபகிரிது’’ந்தி. ந பரியாபுணந்தி…பே… ‘‘அனுஜானாமி, பி⁴க்க²வே, பத³ரஸிலம் நிக்கி²பிது’’ந்தி. உத³கம் ஸந்திட்ட²தி…பே… ‘‘அனுஜானாமி, பி⁴க்க²வே, உத³கனித்³த⁴மன’’ந்தி.

தேன கோ² பன ஸமயேன பி⁴க்கூ² பரிவேணே தஹம் தஹம் அக்³கி³ட்டா²னம் கரோந்தி. பரிவேணம் உக்லாபம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஏகமந்தம் அக்³கி³ஸாலம் காது’’ந்தி. அக்³கி³ஸாலா நீசவத்து²கா ஹோதி, உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. அக்³கி³ஸாலாய கவாடம் ந ஹோதி…பே… ‘‘அனுஜானாமி, பி⁴க்க²வே, கவாடம் பிட்ட²ஸங்கா⁴டம் உது³க்க²லிகம் உத்தரபாஸகம் அக்³க³ளவட்டிம் கபிஸீஸகம் ஸூசிகம் க⁴டிகம் தாளச்சி²த்³த³ம் ஆவிஞ்ச²னச்சி²த்³த³ம் ஆவிஞ்ச²னரஜ்ஜு’’ந்தி. அக்³கி³ஸாலாய திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிகம் சீவரவம்ஸம் சீவரரஜ்ஜு’’ந்தி.

ஆராமபரிக்கே²பஅனுஜானனம்

303. தேன கோ² பன ஸமயேன ஆராமோ அபரிக்கி²த்தோ ஹோதி. அஜகாபி பஸுகாபி உபரோபே விஹேடே²ந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பரிக்கி²பிதும் தயோ வாடே – வேளுவாடம், கண்ட³கவாடம் [வடே வேளுவடம் கண்ட³கவடம் (ஸ்யா.)], பரிக²’’ந்தி. கோட்ட²கோ ந ஹோதி. ததே²வ அஜகாபி பஸுகாபி உபரோபே விஹேடே²ந்தி…பே… ‘‘அனுஜானாமி, பி⁴க்க²வே, கோட்ட²கம் அபேஸிம் யமககவாடம் தோரணம் பலிக⁴’’ந்தி. கோட்ட²கே திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிக’’ந்தி. ஆராமோ சிக்க²ல்லோ ஹோதி…பே… ‘‘அனுஜானாமி, பி⁴க்க²வே, மரும்ப³ம் உபகிரிது’’ந்தி. ந பரியாபுணந்தி…பே… ‘‘அனுஜானாமி, பி⁴க்க²வே, பத³ரஸிலம் நிக்கி²பிது’’ந்தி. உத³கம் ஸந்திட்ட²தி…பே… ‘‘அனுஜானாமி, பி⁴க்க²வே, உத³கனித்³த⁴மன’’ந்தி.

தேன கோ² பன ஸமயேன ராஜா மாக³தோ⁴ ஸேனியோ பி³ம்பி³ஸாரோ ஸங்க⁴ஸ்ஸ அத்தா²ய ஸுதா⁴மத்திகாலேபனம் பாஸாத³ம் காரேதுகாமோ ஹோதி. அத² கோ² பி⁴க்கூ²னம் ஏதத³ஹோஸி – ‘‘கிம் நு கோ² ப⁴க³வதா ச²த³னம் அனுஞ்ஞாதம், கிம் அனனுஞ்ஞாத’’ந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பஞ்ச ச²த³னானி – இட்ட²காச²த³னம், ஸிலாச²த³னம், ஸுதா⁴ச²த³னம், திணச்ச²த³னம், பண்ணச்ச²த³ன’’ந்தி.

பட²மபா⁴ணவாரோ நிட்டி²தோ.