2. து³தியபா⁴ணவாரோ

அனாத²பிண்டி³கவத்து²

304. தேன கோ² பன ஸமயேன அனாத²பிண்டி³கோ க³ஹபதி ராஜக³ஹகஸ்ஸ ஸேட்டி²ஸ்ஸ ப⁴கி³னிபதிகோ ஹோதி. அத² கோ² அனாத²பிண்டி³கோ க³ஹபதி ராஜக³ஹம் அக³மாஸி கேனசிதே³வ கரணீயேன. தேன கோ² பன ஸமயேன ராஜக³ஹகேன ஸேட்டி²னா ஸ்வாதனாய பு³த்³த⁴ப்பமுகோ² ஸங்கோ⁴ நிமந்திதோ ஹோதி. அத² கோ² ராஜக³ஹகோ ஸேட்டீ² தா³ஸே ச கம்மகாரே [கம்மகரே (ஸீ. ஸ்யா.)] ச ஆணாபேஸி – ‘‘தேன ஹி, ப⁴ணே, காலஸ்ஸேவ உட்டா²ய யாகு³யோ பசத², ப⁴த்தானி பசத², ஸூபானி ஸம்பாதே³த², உத்தரிப⁴ங்கா³னி ஸம்பாதே³தா²’’தி. அத² கோ² அனாத²பிண்டி³கஸ்ஸ க³ஹபதிஸ்ஸ ஏதத³ஹோஸி – ‘‘புப்³பே³ க்²வாயம் க³ஹபதி மயி ஆக³தே ஸப்³ப³கிச்சானி நிக்கி²பித்வா மமஞ்ஞேவ ஸத்³தி⁴ம் படிஸம்மோத³தி. ஸோதா³னாயம் விக்கி²த்தரூபோ தா³ஸே ச கம்மகாரே ச ஆணாபேஸி – ‘தேன ஹி, ப⁴ணே, காலஸ்ஸேவ உட்டா²ய யாகு³யோ பசத², ப⁴த்தானி பசத², ஸூபானி ஸம்பாதே³த², உத்தரிப⁴ங்கா³னி ஸம்பாதே³தா²’தி. கிம் நு கோ² இமஸ்ஸ க³ஹபதிஸ்ஸ ஆவாஹோ வா ப⁴விஸ்ஸதி, விவாஹோ வா ப⁴விஸ்ஸதி, மஹாயஞ்ஞோ வா பச்சுபட்டி²தோ, ராஜா வா மாக³தோ⁴ ஸேனியோ பி³ம்பி³ஸாரோ நிமந்திதோ ஸ்வாதனாய ஸத்³தி⁴ம் ப³லகாயேனா’’தி?

அத² கோ² ராஜக³ஹகோ ஸேட்டீ² தா³ஸே ச கம்மகாரே ச ஆணாபேத்வா யேன அனாத²பிண்டி³கோ க³ஹபதி தேனுபஸங்கமி, உபஸங்கமித்வா அனாத²பிண்டி³கேன க³ஹபதினா ஸத்³தி⁴ம் படிஸம்மோதி³த்வா ஏகமந்தம் நிஸீதி³. ஏகமந்தம் நிஸின்னம் கோ² ராஜக³ஹகம் ஸேட்டி²ம் அனாத²பிண்டி³கோ க³ஹபதி ஏதத³வோச – ‘‘புப்³பே³ கோ² த்வம், க³ஹபதி, மயி ஆக³தே ஸப்³ப³கிச்சானி நிக்கி²பித்வா மமஞ்ஞேவ ஸத்³தி⁴ம் படிஸம்மோத³ஸி. ஸோதா³னி த்வம் விக்கி²த்தரூபோ தா³ஸே ச கம்மகாரே ச ஆணாபேஸி – ‘தேன ஹி, ப⁴ணே, காலஸ்ஸேவ உட்டா²ய யாகு³யோ பசத², ப⁴த்தானி பசத², ஸூபானி ஸம்பாதே³த², உத்தரிப⁴ங்கா³னி ஸம்பாதே³தா²’தி. கிம் நு கோ² தே, க³ஹபதி, ஆவாஹோ வா ப⁴விஸ்ஸதி, விவாஹோ வா ப⁴விஸ்ஸதி, மஹாயஞ்ஞோ வா பச்சுபட்டி²தோ, ராஜா வா மாக³தோ⁴ ஸேனியோ பி³ம்பி³ஸாரோ நிமந்திதோ ஸ்வாதனாய ஸத்³தி⁴ம் ப³லகாயேனா’’தி? ‘‘ந மே, க³ஹபதி, ஆவாஹோ வா ப⁴விஸ்ஸதி, நாபி விவாஹோ வா ப⁴விஸ்ஸதி, நாபி ராஜா வா மாக³தோ⁴ ஸேனியோ பி³ம்பி³ஸாரோ நிமந்திதோ ஸ்வாதனாய ஸத்³தி⁴ம் ப³லகாயேன; அபி ச மே மஹாயஞ்ஞோ பச்சுபட்டி²தோ; ஸ்வாதனாய பு³த்³த⁴ப்பமுகோ² ஸங்கோ⁴ நிமந்திதோ’’தி. ‘‘பு³த்³தோ⁴தி த்வம், க³ஹபதி, வதே³ஸீ’’தி? ‘‘பு³த்³தோ⁴ த்யாஹம், க³ஹபதி, வதா³மீ’’தி. ‘‘பு³த்³தோ⁴தி த்வம், க³ஹபதி, வதே³ஸீ’’தி? ‘‘பு³த்³தோ⁴ த்யாஹம், க³ஹபதி, வதா³மீ’’தி. ‘‘பு³த்³தோ⁴தி த்வம், க³ஹபதி, வதே³ஸீ’’தி? ‘‘பு³த்³தோ⁴ த்யாஹம், க³ஹபதி, வதா³மீ’’தி. ‘‘கோ⁴ஸோபி கோ² ஏஸோ, க³ஹபதி, து³ல்லபோ⁴ லோகஸ்மிம் யதி³த³ம் – பு³த்³தோ⁴ பு³த்³தோ⁴தி. ஸக்கா நு கோ², க³ஹபதி, இமம் காலம் தம் ப⁴க³வந்தம் த³ஸ்ஸனாய உபஸங்கமிதும் அரஹந்தம் ஸம்மாஸம்பு³த்³த⁴’’ந்தி? ‘‘அகாலோ கோ², க³ஹபதி, இமம் காலம் தம் ப⁴க³வந்தம் த³ஸ்ஸனாய உபஸங்கமிதும் அரஹந்தம் ஸம்மாஸம்பு³த்³த⁴ம். ஸ்வேதா³னி த்வம் காலேன தம் ப⁴க³வந்தம் த³ஸ்ஸனாய உபஸங்கமிஸ்ஸஸி அரஹந்தம் ஸம்மாஸம்பு³த்³த⁴’’ந்தி. அத² கோ² அனாத²பிண்டி³கோ க³ஹபதி – ஸ்வேதா³னாஹம் காலேன தம் ப⁴க³வந்தம் த³ஸ்ஸனாய உபஸங்கமிஸ்ஸாமி அரஹந்தம் ஸம்மாஸம்பு³த்³த⁴ந்தி – பு³த்³த⁴க³தாய ஸதியா நிபஜ்ஜித்வா ரத்தியா ஸுத³ம் திக்க²த்தும் வுட்டா²ஸி பபா⁴தம் மஞ்ஞமானோ.

305. [ஸம். நி. 1.242] அத² கோ² அனாத²பிண்டி³கோ க³ஹபதி யேன ஸிவகத்³வாரம் [ஸீவத்³வாரம் (ஸீ.), ஸீதவனத்³வாரம் (ஸ்யா.)] தேனுபஸங்கமி. அமனுஸ்ஸா த்³வாரம் விவரிம்ஸு. அத² கோ² அனாத²பிண்டி³கஸ்ஸ க³ஹபதிஸ்ஸ நக³ரம்ஹா நிக்க²ந்தஸ்ஸ ஆலோகோ அந்தரதா⁴யி, அந்த⁴காரோ பாதுரஹோஸி, ப⁴யம் ச²ம்பி⁴தத்தம் லோமஹம்ஸோ உத³பாதி³; ததோவ புன நிவத்திதுகாமோ அஹோஸி. அத² கோ² ஸிவகோ [ஸீவகோ (ஸீ. ஸ்யா.)] யக்கோ² அந்தரஹிதோ ஸத்³த³மனுஸ்ஸாவேஸி –

‘‘ஸதம் ஹத்தீ² ஸதம் அஸ்ஸா, ஸதம் அஸ்ஸதரீரதா²;

ஸதம் கஞ்ஞாஸஹஸ்ஸானி, ஆமுக்கமணிகுண்ட³லா;

ஏகஸ்ஸ பத³வீதிஹாரஸ்ஸ, கலம் நாக்³க⁴ந்தி ஸோளஸிம் [ஸோளஸிந்தி (ஸீ. க.)].

‘‘அபி⁴க்கம க³ஹபதி அபி⁴க்கம க³ஹபதி;

அபி⁴க்கந்தம் தே ஸேய்யோ நோ படிக்கந்த’’ந்தி.

அத² கோ² அனாத²பிண்டி³கஸ்ஸ க³ஹபதிஸ்ஸ அந்த⁴காரோ அந்தரதா⁴யி, ஆலோகோ பாதுரஹோஸி. யம் அஹோஸி ப⁴யம் ச²ம்பி⁴தத்தம் லோமஹம்ஸோ ஸோ படிப்பஸ்ஸம்பி⁴. து³தியம்பி கோ²…பே… ததியம்பி கோ²…பே… அனாத²பிண்டி³கஸ்ஸ க³ஹபதிஸ்ஸ ஆலோகோ அந்தரதா⁴யி, அந்த⁴காரோ பாதுரஹோஸி, ப⁴யம் ச²ம்பி⁴தத்தம் லோமஹம்ஸோ உத³பாதி³, ததோவ புன நிவத்திதுகாமோ அஹோஸி. ததியம்பி கோ² ஸிவகோ யக்கோ² அந்தரஹிதோ ஸத்³த³மனுஸ்ஸாவேஸி –

‘‘ஸதம் ஹத்தீ² ஸதம் அஸ்ஸா, ஸதம் அஸ்ஸதரீரதா²;

ஸதம் கஞ்ஞாஸஹஸ்ஸானி, ஆமுக்கமணிகுண்ட³லா;

ஏகஸ்ஸ பத³வீதிஹாரஸ்ஸ, கலம் நாக்³க⁴ந்தி ஸோளஸிம்.

‘‘அபி⁴க்கம க³ஹபதி அபி⁴க்கம க³ஹபதி,

அபி⁴க்கந்தம் தே ஸேய்யோ நோ படிக்கந்த’’ந்தி.

ததியம்பி கோ² அனாத²பிண்டி³கஸ்ஸ க³ஹபதிஸ்ஸ அந்த⁴காரோ அந்தரதா⁴யி, ஆலோகோ பாதுரஹோஸி, யம் அஹோஸி ப⁴யம் ச²ம்பி⁴தத்தம் லோமஹம்ஸோ, ஸோ படிப்பஸ்ஸம்பி⁴. அத² கோ² அனாத²பிண்டி³கோ க³ஹபதி யேன ஸீதவனம் தேனுபஸங்கமி. தேன கோ² பன ஸமயேன ப⁴க³வா ரத்தியா பச்சூஸஸமயம் பச்சுட்டா²ய அஜ்ஜோ²காஸே சங்கமதி. அத்³த³ஸா கோ² ப⁴க³வா அனாத²பிண்டி³கம் க³ஹபதிம் தூ³ரதோவ ஆக³ச்ச²ந்தம். தி³ஸ்வான சங்கமா ஓரோஹித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா அனாத²பிண்டி³கம் க³ஹபதிம் ஏதத³வோச – ‘‘ஏஹி ஸுத³த்தா’’தி. அத² கோ² அனாத²பிண்டி³கோ க³ஹபதி – நாமேன மம் ப⁴க³வா ஆலபதீதி – ஹட்டோ² உத³க்³கோ³ யேன ப⁴க³வா தேனுபஸங்கமி, உபஸங்கமித்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தம் ஏதத³வோச – ‘‘கச்சி, ப⁴ந்தே, ப⁴க³வா ஸுக²ம் ஸயித்தா²’’தி?

[ஸம். நி. 1.242] ‘‘ஸப்³ப³தா³ வே ஸுக²ம் ஸேதி, ப்³ராஹ்மணோ பரினிப்³பு³தோ;

யோ ந லிம்பதி காமேஸு, ஸீதிபூ⁴தோ நிரூபதி⁴.

‘‘ஸப்³பா³ ஆஸத்தியோ சே²த்வா, வினேய்ய ஹத³யே த³ரம்;

உபஸந்தோ ஸுக²ம் ஸேதி, ஸந்திம் பப்புய்ய சேதஸா’’தி [சேதஸோதி (ஸீ. ஸ்யா.)].

அத² கோ² ப⁴க³வா அனாத²பிண்டி³கஸ்ஸ க³ஹபதிஸ்ஸ அனுபுப்³பி³ம் கத²ம் [ஆனுபுப்³பி³கத²ம் (ஸீ.)] கதே²ஸி, ஸேய்யதி²த³ம் – தா³னகத²ம் ஸீலகத²ம் ஸக்³க³கத²ம், காமானம் ஆதீ³னவம் ஓகாரம் ஸம்கிலேஸம், நேக்க²ம்மே ஆனிஸம்ஸம் பகாஸேஸி. யதா³ ப⁴க³வா அஞ்ஞாஸி அனாத²பிண்டி³கம் க³ஹபதிம் கல்லசித்தம் முது³சித்தம் வினீவரணசித்தம் உத³க்³க³சித்தம் பஸன்னசித்தம், அத² யா பு³த்³தா⁴னம் ஸாமுக்கம்ஸிகா த⁴ம்மதே³ஸனா தம் பகாஸேஸி – து³க்க²ம், ஸமுத³யம், நிரோத⁴ம், மக்³க³ம். ஸேய்யதா²பி நாம ஸுத்³த⁴ம் வத்த²ம் அபக³தகாளகம் ஸம்மதே³வ ரஜனம் படிக்³க³ண்ஹேய்ய, ஏவமேவ அனாத²பிண்டி³கஸ்ஸ க³ஹபதிஸ்ஸ தஸ்மிம்யேவ ஆஸனே விரஜம் வீதமலம் த⁴ம்மசக்கு²ம் உத³பாதி³ – யம் கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்மந்தி. அத² கோ² அனாத²பிண்டி³கோ க³ஹபதி தி³ட்ட²த⁴ம்மோ பத்தத⁴ம்மோ விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ² விக³தகத²ம்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தம் ஏதத³வோச – ‘‘அபி⁴க்கந்தம் ப⁴ந்தே, அபி⁴க்கந்தம் ப⁴ந்தே! ஸேய்யதா²பி, ப⁴ந்தே, நிக்குஜ்ஜிதம் வா உக்குஜ்ஜேய்ய, படிச்ச²ன்னம் வா விவரேய்ய, மூள்ஹஸ்ஸ வா மக்³க³ம் ஆசிக்கே²ய்ய, அந்த⁴காரே வா தேலபஜ்ஜோதம் தா⁴ரேய்ய – சக்கு²மந்தோ ரூபானி த³க்க²ந்தீதி – ஏவமேவம் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹம், ப⁴ந்தே, ப⁴க³வந்தம் ஸரணம் க³ச்சா²மி, த⁴ம்மஞ்ச, பி⁴க்கு²ஸங்க⁴ஞ்ச. உபாஸகம் மம் ப⁴க³வா தா⁴ரேது அஜ்ஜதக்³கே³ பாணுபேதம் ஸரணம் க³தம். அதி⁴வாஸேது ச மே, ப⁴ந்தே, ப⁴க³வா ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன.

அத² கோ² அனாத²பிண்டி³கோ க³ஹபதி ப⁴க³வதோ அதி⁴வாஸனம் விதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அஸ்ஸோஸி கோ² ராஜக³ஹகோ ஸேட்டீ² – ‘‘அனாத²பிண்டி³கேன கிர க³ஹபதினா ஸ்வாதனாய பு³த்³த⁴ப்பமுகோ² ஸங்கோ⁴ நிமந்திதோ’’தி.

306. அத² கோ² ராஜக³ஹகோ ஸேட்டீ² அனாத²பிண்டி³கம் க³ஹபதிம் ஏதத³வோச – ‘‘தயா கிர, க³ஹபதி, ஸ்வாதனாய பு³த்³த⁴ப்பமுகோ² ஸங்கோ⁴ நிமந்திதோ. த்வஞ்சாஸி ஆக³ந்துகோ. தே³மி தே, க³ஹபதி, வேய்யாயிகம் யேன த்வம் பு³த்³த⁴ப்பமுக²ஸ்ஸ ஸங்க⁴ஸ்ஸ ப⁴த்தம் கரேய்யாஸீ’’தி. ‘‘அலம், க³ஹபதி அத்தி² மே வேய்யாயிகம் யேனாஹம் பு³த்³த⁴ப்பமுக²ஸ்ஸ ஸங்க⁴ஸ்ஸ ப⁴த்தம் கரிஸ்ஸாமீ’’தி.

அஸ்ஸோஸி கோ² ராஜக³ஹகோ நேக³மோ – ‘‘அனாத²பிண்டி³கேன கிர க³ஹபதினா ஸ்வாதனாய பு³த்³த⁴ப்பமுகோ² ஸங்கோ⁴ நிமந்திதோ’’தி. அத² கோ² ராஜக³ஹகோ நேக³மோ அனாத²பிண்டி³கம் க³ஹபதிம் ஏதத³வோச – ‘‘தயா கிர, க³ஹபதி, ஸ்வாதனாய பு³த்³த⁴ப்பமுகோ² ஸங்கோ⁴ நிமந்திதோ. த்வஞ்சாஸி ஆக³ந்துகோ. தே³மி தே, க³ஹபதி, வேய்யாயிகம் யேன த்வம் பு³த்³த⁴ப்பமுக²ஸ்ஸ ஸங்க⁴ஸ்ஸ ப⁴த்தம் கரேய்யாஸீ’’தி. ‘‘அலம் அய்ய; அத்தி² மே வேய்யாயிகம் யேனாஹம் பு³த்³த⁴ப்பமுக²ஸ்ஸ ஸங்க⁴ஸ்ஸ ப⁴த்தம் கரிஸ்ஸாமீ’’தி.

அஸ்ஸோஸி கோ² ராஜா மாக³தோ⁴ ஸேனியோ பி³ம்பி³ஸாரோ – ‘‘அனாத²பிண்டி³கேன கிர க³ஹபதினா ஸ்வாதனாய பு³த்³த⁴ப்பமுகோ² ஸங்கோ⁴ நிமந்திதோ’’தி. அத² கோ² ராஜா மாக³தோ⁴ ஸேனியோ பி³ம்பி³ஸாரோ அனாத²பிண்டி³கம் க³ஹபதிம் ஏதத³வோச – ‘‘தயா கிர, க³ஹபதி, ஸ்வாதனாய பு³த்³த⁴ப்பமுகோ² ஸங்கோ⁴ நிமந்திதோ. த்வஞ்சாஸி ஆக³ந்துகோ. தே³மி தே, க³ஹபதி, வேய்யாயிகம் யேன த்வம் பு³த்³த⁴ப்பமுக²ஸ்ஸ ஸங்க⁴ஸ்ஸ ப⁴த்தம் கரேய்யாஸீ’’தி. ‘‘அலம் தே³வ; அத்தி² மே வேய்யாயிகம் யேனாஹம் பு³த்³த⁴ப்பமுக²ஸ்ஸ ஸங்க⁴ஸ்ஸ ப⁴த்தம் கரிஸ்ஸாமீ’’தி.

அத² கோ² அனாத²பிண்டி³கோ க³ஹபதி தஸ்ஸா ரத்தியா அச்சயேன ராஜக³ஹகஸ்ஸ ஸேட்டி²ஸ்ஸ நிவேஸனே பணீதம் கா²த³னீயம் போ⁴ஜனீயம் படியாதா³பேத்வா ப⁴க³வதோ காலம் ஆரோசாபேஸி – ‘‘காலோ, ப⁴ந்தே, நிட்டி²தம் ப⁴த்த’’ந்தி. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன ராஜக³ஹகஸ்ஸ ஸேட்டி²ஸ்ஸ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³ ஸத்³தி⁴ம் பி⁴க்கு²ஸங்கே⁴ன. அத² கோ² அனாத²பிண்டி³கோ க³ஹபதி பு³த்³த⁴ப்பமுக²ம் பி⁴க்கு²ஸங்க⁴ம் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேத்வா ஸம்பவாரேத்வா, ப⁴க³வந்தம் பு⁴த்தாவிம் ஓனீதபத்தபாணிம், ஏகமந்தம் நிஸீதி³. ஏகமந்தம் நிஸின்னோ கோ² அனாத²பிண்டி³கோ க³ஹபதி ப⁴க³வந்தம் ஏதத³வோச – ‘‘அதி⁴வாஸேது மே, ப⁴ந்தே, ப⁴க³வா ஸாவத்தி²யம் வஸ்ஸாவாஸம் ஸத்³தி⁴ம் பி⁴க்கு²ஸங்கே⁴னா’’தி. ‘‘ஸுஞ்ஞாகா³ரே கோ², க³ஹபதி, ததா²க³தா அபி⁴ரமந்தீ’’தி. ‘‘அஞ்ஞாதம் ப⁴க³வா, அஞ்ஞாதம் ஸுக³தா’’தி. அத² கோ² ப⁴க³வா அனாத²பிண்டி³கம் க³ஹபதிம் த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி.

307. தேன கோ² பன ஸமயேன அனாத²பிண்டி³கோ க³ஹபதி ப³ஹுமித்தோ ஹோதி ப³ஹுஸஹாயோ ஆதே³ய்யவாசோ. அத² கோ² அனாத²பிண்டி³கோ க³ஹபதி ராஜக³ஹே தம் கரணீயம் தீரேத்வா யேன ஸாவத்தி² தேன பக்காமி. அத² கோ² அனாத²பிண்டி³கோ க³ஹபதி அந்தராமக்³கே³ மனுஸ்ஸே ஆணாபேஸி – ‘‘ஆராமே, அய்யா, கரோத², விஹாரே பதிட்டா²பேத², தா³னானி பட்ட²பேத². பு³த்³தோ⁴ லோகே உப்பன்னோ. ஸோ ச மயா ப⁴க³வா நிமந்திதோ இமினா மக்³கே³ன ஆக³ச்சி²ஸ்ஸதீ’’தி. அத² கோ² தே மனுஸ்ஸா அனாத²பிண்டி³கேன க³ஹபதினா உய்யோஜிதா ஆராமே அகம்ஸு, விஹாரே பதிட்டா²பேஸும், தா³னானி பட்ட²பேஸும்.

அத² கோ² அனாத²பிண்டி³கோ க³ஹபதி ஸாவத்தி²ம் க³ந்த்வா ஸமந்தா ஸாவத்தி²ம் அனுவிலோகேஸி – ‘‘கத்த² நு கோ² ப⁴க³வா விஹரேய்ய? யம் அஸ்ஸ கா³மதோ நேவ அதிதூ³ரே ந அச்சாஸன்னே, க³மனாக³மனஸம்பன்னம், அத்தி²கானம் அத்தி²கானம் மனுஸ்ஸானம் அபி⁴க்கமனீயம், தி³வா அப்பாகிண்ணம், ரத்திம் அப்பஸத்³த³ம், அப்பனிக்³கோ⁴ஸம், விஜனவாதம், மனுஸ்ஸராஹஸ்ஸேய்யகம், படிஸல்லானஸாருப்ப’’ந்தி.

அத்³த³ஸா கோ² அனாத²பிண்டி³கோ க³ஹபதி ஜேதஸ்ஸ குமாரஸ்ஸ [ராஜகுமாரஸ்ஸ (ஸீ. ஸ்யா. கம்.)] உய்யானம் – கா³மதோ நேவ அதிதூ³ரே ந அச்சாஸன்னே, க³மனாக³மனஸம்பன்னம், அத்தி²கானம் அத்தி²கானம் மனுஸ்ஸானம் அபி⁴க்கமனீயம், தி³வா அப்பாகிண்ணம், ரத்திம் அப்பஸத்³த³ம், அப்பனிக்³கோ⁴ஸம், விஜனவாதம், மனுஸ்ஸராஹஸ்ஸேய்யகம், படிஸல்லானஸாருப்பம். தி³ஸ்வான யேன ஜேதோ குமாரோ தேனுபஸங்கமி, உபஸங்கமித்வா ஜேதம் குமாரம் ஏதத³வோச – ‘‘தே³ஹி மே, அய்யபுத்த, உய்யானம் ஆராமம் காது’’ந்தி [கேதும் (வஜீரபு³த்³தி⁴டீகாயம்)]. ‘‘அதே³ய்யோ, க³ஹபதி, ஆராமோ அபி கோடிஸந்த²ரேனா’’தி. ‘‘க³ஹிதோ, அய்யபுத்த, ஆராமோ’’தி. ‘‘ந, க³ஹபதி, க³ஹிதோ ஆராமோ’’தி. க³ஹிதோ ந க³ஹிதோதி வோஹாரிகே மஹாமத்தே புச்சி²ம்ஸு. மஹாமத்தா ஏவமாஹம்ஸு – ‘‘யதோ தயா, அய்யபுத்த, அக்³கோ⁴ கதோ, க³ஹிதோ ஆராமோ’’தி. அத² கோ² அனாத²பிண்டி³கோ க³ஹபதி ஸகடேஹி ஹிரஞ்ஞம் நிப்³பா³ஹாபேத்வா ஜேதவனம் கோடிஸந்த²ரம் ஸந்த²ராபேஸி. ஸகிம் நீஹடம் ஹிரஞ்ஞம் தோ²கஸ்ஸ ஓகாஸஸ்ஸ கோட்ட²கஸாமந்தா நப்பஹோதி. அத² கோ² அனாத²பிண்டி³கோ க³ஹபதி மனுஸ்ஸே ஆணாபேஸி – ‘‘க³ச்ச²த², ப⁴ணே, ஹிரஞ்ஞம் ஆஹரத²; இமம் ஓகாஸம் ஸந்த²ரிஸ்ஸாமா’’தி.

அத² கோ² ஜேதஸ்ஸ குமாரஸ்ஸ ஏதத³ஹோஸி – ‘‘ந கோ² இத³ம் ஓரகம் ப⁴விஸ்ஸதி, யதா²யம் க³ஹபதி தாவ ப³ஹும் ஹிரஞ்ஞம் பரிச்சஜதீ’’தி. அனாத²பிண்டி³கம் க³ஹபதிம் ஏதத³வோச – ‘‘அலம், க³ஹபதி; மா தம் ஓகாஸம் ஸந்த²ராபேஸி. தே³ஹி மே ஏதம் ஓகாஸம். மமேதம் தா³னம் ப⁴விஸ்ஸதீ’’தி. அத² கோ² அனாத²பிண்டி³கோ க³ஹபதி – அயம் கோ² ஜேதோ குமாரோ அபி⁴ஞ்ஞாதோ ஞாதமனுஸ்ஸோ; மஹத்தி²கோ கோ² பன ஏவரூபானம் ஞாதமனுஸ்ஸானம் இமஸ்மிம் த⁴ம்மவினயே பஸாதோ³தி – தம் ஓகாஸம் ஜேதஸ்ஸ குமாரஸ்ஸ பாதா³ஸி [அதா³ஸி (ஸ்யா.)]. அத² கோ² ஜேதோ குமாரோ தஸ்மிம் ஓகாஸே கோட்ட²கம் மாபேஸி.

அத² கோ² அனாத²பிண்டி³கோ க³ஹபதி ஜேதவனே விஹாரே காராபேஸி, பரிவேணானி காராபேஸி, கோட்ட²கே காராபேஸி, உபட்டா²னஸாலாயோ காராபேஸி, அக்³கி³ஸாலாயோ காராபேஸி, கப்பியகுடியோ காராபேஸி, வச்சகுடியோ காராபேஸி, சங்கமே காராபேஸி, சங்கமனஸாலாயோ காராபேஸி, உத³பானே காராபேஸி, உத³பானஸாலாயோ காராபேஸி, ஜந்தாக⁴ரே காராபேஸி, ஜந்தாக⁴ரஸாலாயோ காராபேஸி, போக்க²ரணியோ காராபேஸி, மண்ட³பே காராபேஸி.

நவகம்மதா³னம்

308. அத² கோ² ப⁴க³வா ராஜக³ஹே யதா²பி⁴ரந்தம் விஹரித்வா யேன வேஸாலீ தேன சாரிகம் பக்காமி. அனுபுப்³பே³ன சாரிகம் சரமானோ யேன வேஸாலீ தத³வஸரி. தத்ர ஸுத³ம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன மனுஸ்ஸா ஸக்கச்சம் நவகம்மம் கரோந்தி. யேபி பி⁴க்கூ² நவகம்மம் அதி⁴ட்டே²ந்தி தேபி ஸக்கச்சம் உபட்டே²ந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன. அத² கோ² அஞ்ஞதரஸ்ஸ த³லித்³த³ஸ்ஸ துன்னவாயஸ்ஸ ஏதத³ஹோஸி – ‘‘ந கோ² இத³ம் ஓரகம் ப⁴விஸ்ஸதி, யத²யிமே மனுஸ்ஸா ஸக்கச்சம் நவகம்மம் கரோந்தி; யம்னூனாஹம்பி நவகம்மம் கரேய்ய’’ந்தி. அத² கோ² ஸோ த³லித்³தோ³ துன்னவாயோ ஸாமம் சிக்க²ல்லம் மத்³தி³த்வா இட்ட²காயோ சினித்வா குட்டம் உட்டா²பேஸி. தேன அகுஸலகேன சிதா வங்கா பி⁴த்தி பரிபதி. து³தியம்பி கோ²…பே… ததியம்பி கோ² ஸோ த³லித்³தோ³ துன்னவாயோ ஸாமம் சிக்க²ல்லம் மத்³தி³த்வா இட்ட²காயோ சினித்வா குட்டம் உட்டா²பேஸி. தேன அகுஸலகேன சிதா வங்கா பி⁴த்தி பரிபதி. அத² கோ² ஸோ த³லித்³தோ³ துன்னவாயோ உஜ்ஜா²யதி கி²ய்யதி விபாசேதி – ‘‘யே இமேஸம் ஸமணானம் ஸக்யபுத்தியானம் தே³ந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரம், தே இமே ஓவத³ந்தி அனுஸாஸந்தி, தேஸஞ்ச நவகம்மம் அதி⁴ட்டே²ந்தி. அஹம் பனம்ஹி த³லித்³தோ³. ந மம் கோசி ஓவத³தி வா அனுஸாஸதி வா நவகம்மம் வா அதி⁴ட்டே²தீ’’தி. அஸ்ஸோஸும் கோ² பி⁴க்கூ² தஸ்ஸ த³லித்³த³ஸ்ஸ துன்னவாயஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, நவகம்மம் தா³தும். நவகம்மிகோ, பி⁴க்க²வே, பி⁴க்கு² உஸ்ஸுக்கம் ஆபஜ்ஜிஸ்ஸதி – ‘கிந்தி நு கோ² விஹாரோ கி²ப்பம் பரியோஸானம் க³ச்சே²ய்யா’தி; க²ண்ட³ம் பு²ல்லம் படிஸங்க²ரிஸ்ஸதி. ஏவஞ்ச பன, பி⁴க்க²வே, தா³தப்³ப³ம். பட²மம் பி⁴க்கு² யாசிதப்³போ³, யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

309. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ க³ஹபதினோ விஹாரம் இத்த²ன்னாமஸ்ஸ பி⁴க்கு²னோ நவகம்மம் த³தே³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமஸ்ஸ க³ஹபதினோ விஹாரம் இத்த²ன்னாமஸ்ஸ பி⁴க்கு²னோ நவகம்மம் தே³தி. யஸ்ஸாயஸ்மதோ க²மதி இத்த²ன்னாமஸ்ஸ க³ஹபதினோ விஹாரம் இத்த²ன்னாமஸ்ஸ பி⁴க்கு²னோ நவகம்மஸ்ஸ தா³னம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னோ ஸங்கே⁴ன இத்த²ன்னாமஸ்ஸ க³ஹபதினோ விஹாரோ இத்த²ன்னாமஸ்ஸ பி⁴க்கு²னோ நவகம்மம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

அக்³கா³ஸனாதி³அனுஜானனம்

310. அத² கோ² ப⁴க³வா வேஸாலியம் யதா²பி⁴ரந்தம் விஹரித்வா யேன ஸாவத்தி² தேன சாரிகம் பக்காமி. தேன கோ² பன ஸமயேன ச²ப்³ப³க்³கி³யானம் பி⁴க்கூ²னம் அந்தேவாஸிகா பி⁴க்கூ² பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா விஹாரே பரிக்³க³ண்ஹந்தி, ஸேய்யாயோ பரிக்³க³ண்ஹந்தி – இத³ம் அம்ஹாகம் உபஜ்ஜா²யானம் ப⁴விஸ்ஸதி, இத³ம் அம்ஹாகம் ஆசரியானம் ப⁴விஸ்ஸதி, இத³ம் அம்ஹாகம் ப⁴விஸ்ஸதீ’’தி.

அத² கோ² ஆயஸ்மா ஸாரிபுத்தோ பு³த்³த⁴ப்பமுக²ஸ்ஸ ஸங்க⁴ஸ்ஸ பிட்டி²தோ பிட்டி²தோ க³ந்த்வா விஹாரேஸு பரிக்³க³ஹிதேஸு, ஸேய்யாஸு பரிக்³க³ஹிதாஸு, ஸேய்யம் அலப⁴மானோ அஞ்ஞதரஸ்மிம் ருக்க²மூலே நிஸீதி³. அத² கோ² ப⁴க³வா ரத்தியா பச்சூஸஸமயம் பச்சுட்டா²ய உக்காஸி. ஆயஸ்மாபி ஸாரிபுத்தோ உக்காஸி. ‘‘கோ ஏத்தா²’’தி? ‘‘அஹம், ப⁴க³வா, ஸாரிபுத்தோ’’தி. ‘‘கிஸ்ஸ த்வம், ஸாரிபுத்தம், இத⁴ நிஸின்னோ’’தி? அத² கோ² ஆயஸ்மா ஸாரிபுத்தோ ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, ச²ப்³ப³க்³கி³யானம் பி⁴க்கூ²னம் அந்தேவாஸிகா பி⁴க்கூ² பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா விஹாரே பரிக்³க³ண்ஹந்தி, ஸேய்யாயோ பரிக்³க³ண்ஹந்தி – இத³ம் அம்ஹாகம் உபஜ்ஜா²யானம் ப⁴விஸ்ஸதி, இத³ம் அம்ஹாகம் ஆசரியானம் ப⁴விஸ்ஸதி, இத³ம் அம்ஹாகம் ப⁴விஸ்ஸதீ’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம தே, பி⁴க்க²வே, மோக⁴புரிஸா பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா விஹாரே பரிக்³க³ஹேஸ்ஸந்தி, ஸேய்யாயோ பரிக்³க³ஹேஸ்ஸந்தி – இத³ம் அம்ஹாகம் உபஜ்ஜா²யானம் ப⁴விஸ்ஸதி, இத³ம் அம்ஹாகம் ஆசரியானம் ப⁴விஸ்ஸதி, இத³ம் அம்ஹாகம் ப⁴விஸ்ஸதீதி! நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘கோ, பி⁴க்க²வே, அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி?

ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, க²த்தியகுலா பப்³ப³ஜிதோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, ப்³ராஹ்மணகுலா பப்³ப³ஜிதோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, க³ஹபதிகுலா பப்³ப³ஜிதோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, ஸுத்தந்திகோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, வினயத⁴ரோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, த⁴ம்மகதி²கோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, பட²மஸ்ஸ ஜா²னஸ்ஸ லாபீ⁴ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, து³தியஸ்ஸ ஜா²னஸ்ஸ லாபீ⁴ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, ததியஸ்ஸ ஜா²னஸ்ஸ லாபீ⁴ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, சதுத்த²ஸ்ஸ ஜா²னஸ்ஸ லாபீ⁴ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, ஸோதாபன்னோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, ஸகதா³கா³மீ…பே… யோ, ப⁴க³வா, அனாகா³மீ…பே… யோ, ப⁴க³வா, அரஹா ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, தேவிஜ்ஜோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி. ஏகச்சே பி⁴க்கூ² ஏவமாஹம்ஸு – ‘‘யோ, ப⁴க³வா, ச²ளபி⁴ஞ்ஞோ ஸோ அரஹதி அக்³கா³ஸனம் அக்³கோ³த³கம் அக்³க³பிண்ட³’’ந்தி.

311. அத² கோ² ப⁴க³வா பி⁴க்கூ² ஆமந்தேஸி – ‘‘பூ⁴தபுப்³ப³ம், பி⁴க்க²வே, ஹிமவந்தபதே³ஸே [ஹிமவந்தபஸ்ஸே (ஸீ. ஸ்யா.)] மஹானிக்³ரோதோ⁴ அஹோஸி. தம் தயோ ஸஹாயா உபனிஸ்ஸாய விஹரிம்ஸு – தித்திரோ ச, மக்கடோ ச, ஹத்தி²னாகோ³ ச. தே அஞ்ஞமஞ்ஞம் அகா³ரவா அப்பதிஸ்ஸா அஸபா⁴க³வுத்திகா விஹரந்தி. அத² கோ², பி⁴க்க²வே, தேஸம் ஸஹாயானம் ஏதத³ஹோஸி – ‘அஹோ நூன மயம் ஜானேய்யாம யம் அம்ஹாகம் ஜாதியா மஹந்ததரம் தம் மயம் ஸக்கரேய்யாம க³ரும் கரேய்யாம மானேய்யாம பூஜேய்யாம, தஸ்ஸ ச மயம் ஓவாதே³ திட்டே²ய்யாமா’தி.

‘‘அத² கோ², பி⁴க்க²வே, தித்திரோ ச மக்கடோ ச ஹத்தி²னாக³ம் புச்சி²ம்ஸு – ‘த்வம், ஸம்ம, கிம் போராணம் ஸரஸீ’தி? ‘யதா³ஹம், ஸம்மா, போதோ ஹோமி, இமம் நிக்³ரோத⁴ம் அந்தரா ஸத்தீ²னம் [அந்தராஸத்தி²கம் (ஸீ.)] கரித்வா அதிக்கமாமி, அக்³க³ங்குரகம் மே உத³ரம் சு²பதி. இமாஹம், ஸம்மா, போராணம் ஸராமீ’தி.

‘‘அத² கோ², பி⁴க்க²வே, தித்திரோ ச ஹத்தி²னாகோ³ ச மக்கடம் புச்சி²ம்ஸு – ‘த்வம், ஸம்ம, கிம் போராணம் ஸரஸீ’தி? ‘யதா³ஹம், ஸம்மா, சா²போ ஹோமி, ச²மாயம் நிஸீதி³த்வா இமஸ்ஸ நிக்³ரோத⁴ஸ்ஸ அக்³க³ங்குரகம் கா²தா³மி. இமாஹம், ஸம்மா, போராணம் ஸராமீ’தி.

‘‘அத² கோ², பி⁴க்க²வே, மக்கடோ ச ஹத்தி²னாகோ³ ச தித்திரம் புச்சி²ம்ஸு – ‘த்வம், ஸம்ம, கிம் போராணம் ஸரஸீ’தி? ‘அமுகஸ்மிம், ஸம்மா, ஓகாஸே மஹானிக்³ரோதோ⁴ அஹோஸி. ததோ அஹம் ப²லம் ப⁴க்கி²த்வா இமஸ்மிம் ஓகாஸே வச்சம் அகாஸிம்; தஸ்ஸாயம் நிக்³ரோதோ⁴ ஜாதோ. ததா³ஹம், ஸம்மா, ஜாதியா மஹந்ததரோ’தி.

‘‘அத² கோ², பி⁴க்க²வே, மக்கடோ ச ஹத்தி²னாகோ³ ச தித்திரம் ஏதத³வோசும் – ‘த்வம், ஸம்ம, அம்ஹாகம் ஜாதியா மஹந்ததரோ. தம் மயம் ஸக்கரிஸ்ஸாம க³ரும் கரிஸ்ஸாம மானேஸ்ஸாம பூஜேஸ்ஸாம, துய்ஹஞ்ச மயம் ஓவாதே³ பதிட்டி²ஸ்ஸாமா’தி. அத² கோ², பி⁴க்க²வே, தித்திரோ மக்கடஞ்ச ஹத்தி²னாக³ஞ்ச பஞ்சஸு ஸீலேஸு ஸமாத³பேஸி, அத்தனா ச பஞ்சஸு ஸீலேஸு ஸமாதா³ய வத்ததி. தே அஞ்ஞமஞ்ஞம் ஸகா³ரவா ஸப்பதிஸ்ஸா ஸபா⁴க³வுத்திகா விஹரித்வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிம்ஸு. ஏவம் கோ² தம், பி⁴க்க²வே, தித்திரியம் நாம ப்³ரஹ்மசரியம் அஹோஸி.

[ஜா. 1.1.37] ‘‘யே வுட்³ட⁴மபசாயந்தி, நரா த⁴ம்மஸ்ஸ கோவிதா³;

தி³ட்டே² த⁴ம்மே ச பாஸம்ஸா, ஸம்பராயே ச ஸுக்³க³தீ’’தி.

‘‘தே ஹி நாம, பி⁴க்க²வே, திரச்சா²னக³தா பாணா அஞ்ஞமஞ்ஞம் ஸகா³ரவா ஸப்பதிஸ்ஸா ஸபா⁴க³வுத்திகா விஹரிஸ்ஸந்தி. இத⁴ கோ² தம், பி⁴க்க²வே, ஸோபே⁴த² யம் தும்ஹே ஏவம் ஸ்வாக்கா²தே த⁴ம்மவினயே பப்³ப³ஜிதா ஸமானா அஞ்ஞமஞ்ஞம் அகா³ரவா அப்பதிஸ்ஸா அஸபா⁴க³வுத்திகா விஹரேய்யாத²? நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, யதா²வுட்³ட⁴ம் அபி⁴வாத³னம், பச்சுட்டா²னம், அஞ்ஜலிகம்மம், ஸாமீசிகம்மம், அக்³கா³ஸனம், அக்³கோ³த³கம், அக்³க³பிண்ட³ம். ந ச, பி⁴க்க²வே, ஸங்கி⁴கம் யதா²வுட்³ட⁴ம் படிபா³ஹிதப்³ப³ம். யோ படிபா³ஹேய்ய, ஆபத்தி து³க்கடஸ்ஸா’’தி.

அவந்தி³யாதி³புக்³க³லா

312. ‘‘த³ஸயிமே, பி⁴க்க²வே, அவந்தி³யா – புரே உபஸம்பன்னேன பச்சா² உபஸம்பன்னோ அவந்தி³யோ, அனுபஸம்பன்னோ அவந்தி³யோ, நானாஸம்வாஸகோ வுட்³ட⁴தரோ அத⁴ம்மவாதீ³ அவந்தி³யோ, மாதுகா³மோ அவந்தி³யோ, பண்ட³கோ அவந்தி³யோ, பாரிவாஸிகோ அவந்தி³யோ, மூலாயபடிகஸ்ஸனாரஹோ அவந்தி³யோ, மானத்தாரஹோ அவந்தி³யோ, மானத்தசாரிகோ அவந்தி³யோ, அப்³பா⁴னாரஹோ அவந்தி³யோ. இமே கோ², பி⁴க்க²வே, த³ஸ அவந்தி³யா.

‘‘தயோமே, பி⁴க்க²வே, வந்தி³யா – பச்சா² உபஸம்பன்னேன புரே உபஸம்பன்னோ வந்தி³யோ, நானாஸம்வாஸகோ வுட்³ட⁴தரோ த⁴ம்மவாதீ³ வந்தி³யோ, ஸதே³வகே பி⁴க்க²வே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ததா²க³தோ அரஹம் ஸம்மாஸம்பு³த்³தோ⁴ வந்தி³யோ. இமே கோ², பி⁴க்க²வே, தயோ வந்தி³யா’’தி.

ஆஸனப்படிபா³ஹனபடிக்கே²பம்

313. தேன கோ² பன ஸமயேன மனுஸ்ஸா ஸங்க⁴ம் உத்³தி³ஸ்ஸ மண்ட³பே படியாதே³ந்தி, ஸந்த²ரே படியாதே³ந்தி, ஓகாஸே படியாதே³ந்தி. ச²ப்³ப³க்³கி³யானம் பி⁴க்கூ²னம் அந்தேவாஸிகா பி⁴க்கூ² – ‘ஸங்கி⁴கஞ்ஞேவ ப⁴க³வதா யதா²வுட்³ட⁴ம் அனுஞ்ஞாதம், நோ உத்³தி³ஸ்ஸகத’ந்தி பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா மண்ட³பேபி பரிக்³க³ண்ஹந்தி, ஸந்த²ரேபி பரிக்³க³ண்ஹந்தி, ஓகாஸேபி பரிக்³க³ண்ஹந்தி – இத³ம் அம்ஹாகம் உபஜ்ஜா²யானம் ப⁴விஸ்ஸதி, இத³ம் அம்ஹாகம் ஆசரியானம் ப⁴விஸ்ஸதி, இத³ம் அம்ஹாகம் ப⁴விஸ்ஸதீதி. அத² கோ² ஆயஸ்மா ஸாரிபுத்தோ பு³த்³த⁴ப்பமுக²ஸ்ஸ ஸங்க⁴ஸ்ஸ பிட்டி²தோ பிட்டி²தோ க³ந்த்வா மண்ட³பேஸு பரிக்³க³ஹிதேஸு, ஸந்த²ரேஸு பரிக்³க³ஹிதேஸு, ஓகாஸேஸு பரிக்³க³ஹிதேஸு, ஓகாஸம் அலப⁴மானோ அஞ்ஞதரஸ்மிம் ருக்க²மூலே நிஸீதி³. அத² கோ² ப⁴க³வா ரத்தியா பச்சூஸஸமயம் பச்சுட்டா²ய உக்காஸி. ஆயஸ்மாபி ஸாரிபுத்தோ உக்காஸி. ‘‘கோ ஏத்தா²’’தி? ‘‘அஹம், ப⁴க³வா, ஸாரிபுத்தோ’’தி. ‘‘கிஸ்ஸ த்வம், ஸாரிபுத்த, இத⁴ நிஸின்னோ’’தி? அத² கோ² ஆயஸ்மா ஸாரிபுத்தோ ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, ச²ப்³ப³க்³கி³யானம் பி⁴க்கூ²னம் அந்தேவாஸிகா பி⁴க்கூ² – ‘ஸங்கி⁴கஞ்ஞேவ ப⁴க³வதா யதா²வுட்³ட⁴ம் அனுஞ்ஞாதம், நோ உத்³தி³ஸ்ஸகத’ந்தி பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா மண்ட³பே பரிக்³க³ண்ஹந்தி, ஸந்த²ரே பரிக்³க³ண்ஹந்தி, ஓகாஸே பரிக்³க³ண்ஹந்தி – இத³ம் அம்ஹாகம் உபஜ்ஜா²யானம் ப⁴விஸ்ஸதி, இத³ம் அம்ஹாகம் ஆசரியானம் ப⁴விஸ்ஸதி, இத³ம் அம்ஹாகம் ப⁴விஸ்ஸதீ’’தி? ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, உத்³தி³ஸ்ஸகதம்பி யதா²வுட்³ட⁴ம் படிபா³ஹேதப்³ப³ம். யோ படிபா³ஹேய்ய, ஆபத்தி து³க்கடஸ்ஸா’’தி.

கி³ஹிவிகதஅனுஜானனம்

314. தேன கோ² பன ஸமயேன மனுஸ்ஸா ப⁴த்தக்³கே³ அந்தரக⁴ரே உச்சாஸயனமஹாஸயனானி பஞ்ஞபேந்தி, ஸேய்யதி²த³ம் – ஆஸந்தி³ம், பல்லங்கம், கோ³னகம், சித்தகம், படிகம், படலிகம், தூலிகம், விகதிகம், உத்³த³லோமிம், ஏகந்தலோமிம், கட்டிஸ்ஸம், கோஸேய்யம் [கோஸேய்யம் கம்ப³லம் (ஸீ. ஸ்யா.)], குத்தகம், ஹத்த²த்த²ரம், அஸ்ஸத்த²ரம், ரத²த்த²ரம், அஜினபவேணிம், கத³லிமிக³பவரபச்சத்த²ரணம், ஸஉத்தரச்ச²த³ம், உப⁴தோலோஹிதகூபதா⁴னம். பி⁴க்கூ² குக்குச்சாயந்தா நாபி⁴னிஸீத³ந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ட²பேத்வா தீணி – ஆஸந்தி³ம், பல்லங்கம், தூலிகம் – கி³ஹிவிகதம் [கி³ஹிவிகடம் (ஸீ. க.), அவஸேஸம் கி³ஹிவிகடம் (ஸ்யா.)] அபி⁴னிஸீதி³தும், நத்வேவ அபி⁴னிபஜ்ஜிது’’ந்தி.

தேன கோ² பன ஸமயேன மனுஸ்ஸா ப⁴த்தக்³கே³ அந்தரக⁴ரே தூலோனத்³த⁴ம் மஞ்சம்பி பீட²ம்பி பஞ்ஞபேந்தி. பி⁴க்கூ² குக்குச்சாயந்தா நாபி⁴னிஸீத³ந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கி³ஹிவிகதம் அபி⁴னிஸீதி³தும், நத்வேவ அபி⁴னிபஜ்ஜிது’’ந்தி.

ஜேதவனவிஹாரானுமோத³னா

315. அத² கோ² ப⁴க³வா அனுபுப்³பே³ன சாரிகம் சரமானோ யேன ஸாவத்தி² தத³வஸரி. தத்ர ஸுத³ம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² அனாத²பிண்டி³கோ க³ஹபதி யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² அனாத²பிண்டி³கோ க³ஹபதி ப⁴க³வந்தம் ஏதத³வோச – ‘‘அதி⁴வாஸேது மே, ப⁴ந்தே, ப⁴க³வா ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² அனாத²பிண்டி³கோ க³ஹபதி ப⁴க³வதோ அதி⁴வாஸனம் விதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² அனாத²பிண்டி³கோ க³ஹபதி தஸ்ஸா ரத்தியா அச்சயேன பணீதம் கா²த³னீயம் போ⁴ஜனீயம் படியாதா³பேத்வா ப⁴க³வதோ காலம் ஆரோசாபேஸி – ‘‘காலோ, ப⁴ந்தே, நிட்டி²தம் ப⁴த்த’’ந்தி. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன அனாத²பிண்டி³கஸ்ஸ க³ஹபதிஸ்ஸ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³ ஸத்³தி⁴ம் பி⁴க்கு²ஸங்கே⁴ன. அத² கோ² அனாத²பிண்டி³கோ க³ஹபதி பு³த்³த⁴ப்பமுக²ம் பி⁴க்கு²ஸங்க⁴ம் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேத்வா ஸம்பவாரேத்வா, ப⁴க³வந்தம் பு⁴த்தாவிம் ஓனீதபத்தபாணிம், ஏகமந்தம் நிஸீதி³. ஏகமந்தம் நிஸின்னோ கோ² அனாத²பிண்டி³கோ க³ஹபதி ப⁴க³வந்தம் ஏதத³வோச – ‘‘கதா²ஹம், ப⁴ந்தே, ஜேதவனே படிபஜ்ஜாமீ’’தி? ‘‘தேன ஹி த்வம், க³ஹபதி, ஜேதவனம் ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ பதிட்ட²பேஹீ’’தி. ‘‘ஏவம் ப⁴ந்தே’’தி கோ² அனாத²பிண்டி³கோ க³ஹபதி ப⁴க³வதோ படிஸ்ஸுத்வா ஜேதவனம் ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ பதிட்டா²பேஸி.

அத² கோ² ப⁴க³வா அனாத²பிண்டி³கம் க³ஹபதிம் இமாஹி கா³தா²ஹி அனுமோதி³ –

‘‘ஸீதம் உண்ஹம் படிஹந்தி, ததோ வாளமிகா³னி ச;

ஸரீஸபே ச மகஸே, ஸிஸிரே சாபி வுட்டி²யோ.

‘‘ததோ வாதாதபோ கோ⁴ரோ, ஸஞ்ஜாதோ படிஹஞ்ஞதி;

லேணத்த²ஞ்ச ஸுக²த்த²ஞ்ச, ஜா²யிதுஞ்ச விபஸ்ஸிதும்.

‘‘விஹாரதா³னம் ஸங்க⁴ஸ்ஸ, அக்³க³ம் பு³த்³தே⁴ன வண்ணிதம்;

தஸ்மா ஹி பண்டி³தோ போஸோ, ஸம்பஸ்ஸம் அத்த²மத்தனோ.

‘‘விஹாரே காரயே ரம்மே, வாஸயேத்த² ப³ஹுஸ்ஸுதே;

தேஸம் அன்னஞ்ச பானஞ்ச, வத்த²ஸேனாஸனானி ச;

த³தே³ய்ய உஜுபூ⁴தேஸு, விப்பஸன்னேன சேதஸா.

‘‘தே தஸ்ஸ த⁴ம்மம் தே³ஸேந்தி, ஸப்³ப³து³க்கா²பனூத³னம்;

யம் ஸோ த⁴ம்மம் இத⁴ஞ்ஞாய, பரினிப்³பா³தி அனாஸவோ’’தி.

அத² கோ² ப⁴க³வா அனாத²பிண்டி³கம் க³ஹபதிம் இமாஹி கா³தா²ஹி அனுமோதி³த்வா உட்டா²யாஸனா பக்காமி.

ஆஸனப்படிபா³ஹனாதி³

316. தேன கோ² பன ஸமயேன அஞ்ஞதரஸ்ஸ ஆஜீவகஸாவகஸ்ஸ மஹாமத்தஸ்ஸ ஸங்க⁴ப⁴த்தம் ஹோதி. ஆயஸ்மா உபனந்தோ³ ஸக்யபுத்தோ பச்சா² ஆக³ந்த்வா விப்பகதபோ⁴ஜனம் ஆனந்தரிகம் பி⁴க்கு²ம் வுட்டா²பேஸி. ப⁴த்தக்³க³ம் கோலாஹலம் அஹோஸி. அத² கோ² ஸோ மஹாமத்தோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ஸமணா ஸக்யபுத்தியா பச்சா² ஆக³ந்த்வா விப்பகதபோ⁴ஜனம் ஆனந்தரிகம் பி⁴க்கு²ம் வுட்டா²பேஸ்ஸந்தி! ப⁴த்தக்³க³ம் கோலாஹலம் அஹோஸி. நனு நாம லப்³பா⁴ அஞ்ஞத்ராபி நிஸின்னேன யாவத³த்த²ம் பு⁴ஞ்ஜிது’’ந்தி? அஸ்ஸோஸும் கோ² பி⁴க்கூ² தஸ்ஸ மஹாமத்தஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ பச்சா² ஆக³ந்த்வா விப்பகதபோ⁴ஜனம் ஆனந்தரிகம் பி⁴க்கு²ம் வுட்டா²பேஸ்ஸதி! ப⁴த்தக்³க³ம் கோலாஹலம் அஹோஸீ’’தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘ஸச்சம் கிர த்வம், உபனந்த³, பச்சா² ஆக³ந்த்வா விப்பகதபோ⁴ஜனம் ஆனந்தரிகம் பி⁴க்கு²ம் வுட்டா²பேஸி, ப⁴த்தக்³க³ம் கோலாஹலம் அஹோஸீ’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம த்வம், மோக⁴புரிஸ, பச்சா² ஆக³ந்த்வா விப்பகதபோ⁴ஜனம் ஆனந்தரிகம் பி⁴க்கு²ம் வுட்டா²பேஸ்ஸஸி? ப⁴த்தக்³க³ம் கோலாஹலம் அஹோஸி. நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, விப்பகதபோ⁴ஜனோ [போ⁴ஜனோ ஆனந்தரிகோ (ஸ்யா.)] பி⁴க்கு² வுட்டா²பேதப்³போ³. யோ வுட்டா²பேய்ய, ஆபத்தி து³க்கடஸ்ஸ. ஸசே வுட்டா²பேதி, பவாரிதோ ச ஹோதி, ‘க³ச்ச² உத³கம் ஆஹரா’தி வத்தப்³போ³. ஏவஞ்சேதம் லபே⁴த², இச்சேதம் குஸலம். நோ சே லபே⁴த², ஸாது⁴கம் ஸித்தா²னி கி³லித்வா வுட்³ட⁴தரஸ்ஸ பி⁴க்கு²னோ ஆஸனம் தா³தப்³ப³ம். ந த்வேவாஹம், பி⁴க்க²வே, கேனசி பரியாயேன வுட்³ட⁴தரஸ்ஸ பி⁴க்கு²னோ ஆஸனம் படிபா³ஹிதப்³ப³ந்தி வதா³மி. யோ படிபா³ஹேய்ய, ஆபத்தி து³க்கடஸ்ஸாதி’’.

தேன கோ² பன ஸமயேன ச²ப்³ப³க்³கி³யா பி⁴க்கூ² கி³லானே பி⁴க்கூ² வுட்டா²பேந்தி. கி³லானா ஏவம் வதே³ந்தி – ‘‘ந மயம், ஆவுஸோ, ஸக்கோம வுட்டா²தும், கி³லானாம்ஹா’’தி. ‘‘மயம் ஆயஸ்மந்தே வுட்டா²பேஸ்ஸாமா’’தி பரிக்³க³ஹேத்வா வுட்டா²பேத்வா டி²தகே முஞ்சந்தி. கி³லானா முச்சி²தா பபதந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, கி³லானோ வுட்டா²பேதப்³போ³. யோ வுட்டா²பேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² ‘கி³லானா மயம்ஹா அவுட்டா²பனீயா’தி வரஸேய்யாயோ பலிபு³த்³தே⁴ந்தி [பலிபு³ந்த⁴ந்தி (க.)]. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கி³லானஸ்ஸ பதிரூபம் ஸேய்யம் தா³து’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² லேஸகப்பேன ஸேனாஸனம் படிபா³ஹந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, லேஸகப்பேன ஸேனாஸனம் படிபா³ஹிதப்³ப³ம். யோ படிபா³ஹேய்ய, ஆபத்தி து³க்கடஸ்ஸா’’தி.

[பாசி. 122] தேன கோ² பன ஸமயேன ஸத்தரஸவக்³கி³யா பி⁴க்கூ² அஞ்ஞதரம் பச்சந்திமம் மஹாவிஹாரம் படிஸங்க²ரோந்தி – ‘இத⁴ மயம் வஸ்ஸம் வஸிஸ்ஸாமா’தி. அத்³த³ஸம்ஸு [அத்³த³ஸாஸும் (க.)] கோ² ச²ப்³ப³க்³கி³யா பி⁴க்கூ² ஸத்தரஸவக்³கி³யே பி⁴க்கூ² விஹாரம் [அஞ்ஞதரம் விஹாரம் (க.)] படிஸங்க²ரோந்தே. தி³ஸ்வான ஏவமாஹம்ஸு – ‘‘இமே, ஆவுஸோ, ஸத்தரஸவக்³கி³யா பி⁴க்கூ² விஹாரம் படிஸங்க²ரோந்தி. ஹந்த³ நே வுட்டா²பேஸ்ஸாமா’’தி. ஏகச்சே ஏவமாஹம்ஸு – ‘‘ஆக³மேதா²வுஸோ, யாவ படிஸங்க²ரோந்தி, படிஸங்க²தே வுட்டா²பேஸ்ஸாமா’’தி. அத² கோ² ச²ப்³ப³க்³கி³யா பி⁴க்கூ² ஸத்தரஸவக்³கி³யே பி⁴க்கூ² ஏதத³வோசும் – ‘‘உட்டே²தா²வுஸோ, அம்ஹாகம் விஹாரோ பாபுணாதீ’’தி. ‘‘நனு, ஆவுஸோ, படிகச்சேவ ஆசிக்கி²தப்³ப³ம்? மயஞ்சஞ்ஞம் படிஸங்க²ரேய்யாமா’’தி. ‘‘நனு, ஆவுஸோ, ஸங்கி⁴கோ விஹாரோ’’தி? ‘‘ஆமாவுஸோ, ஸங்கி⁴கோ விஹாரோ’’தி. ‘‘உட்டே²தா²வுஸோ, அம்ஹாகம் விஹாரோ பாபுணாதீ’’தி. ‘‘மஹல்லகோ, ஆவுஸோ, விஹாரோ; தும்ஹேபி வஸத², மயம்பி வஸிஸ்ஸாமா’’தி. ‘‘உட்டே²தா²வுஸோ, அம்ஹாகம் விஹாரோ பாபுணாதீ’’தி குபிதா அனத்தமனா கீ³வாயம் க³ஹேத்வா நிக்கட்³ட⁴ந்தி. தே நிக்கட்³டி⁴யமானா ரோத³ந்தி. பி⁴க்கூ² ஏவமாஹம்ஸு – ‘‘கிஸ்ஸ தும்ஹே, ஆவுஸோ, ரோத³தா²’’தி? ‘‘இமே, ஆவுஸோ, ச²ப்³ப³க்³கி³யா பி⁴க்கூ² குபிதா அனத்தமனா அம்ஹே ஸங்கி⁴கா விஹாரா நிக்கட்³ட⁴ந்தீ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² குபிதா அனத்தமனா பி⁴க்கூ² ஸங்கி⁴கா விஹாரா நிக்கட்³டி⁴ஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, தும்ஹே பி⁴க்க²வே, குபிதா அனத்தமனா ஸங்கி⁴கா விஹாரா பி⁴க்கூ² நிக்கட்³ட⁴தா²’’தி? ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, குபிதேன அனத்தமனேன பி⁴க்கு² ஸங்கி⁴கா விஹாரா நிக்கட்³டி⁴தப்³போ³. யோ நிக்கட்³டே⁴ய்ய, யதா²த⁴ம்மோ காரேதப்³போ³. அனுஜானாமி, பி⁴க்க²வே, ஸேனாஸனம் கா³ஹேது’’ந்தி.

ஸேனாஸனக்³கா³ஹாபகஸம்முதி

317. அத² கோ² பி⁴க்கூ²னம் ஏதத³ஹோஸி – ‘கேன நு கோ² ஸேனாஸனம் கா³ஹேதப்³ப³’’ந்தி? ப⁴க³வதோ ஏதமத்த²ம் ஆரோசேஸும் …பே… ‘‘அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தம் பி⁴க்கு²ம் ஸேனாஸனக்³கா³ஹாபகம் ஸம்மன்னிதும் – யோ ந ச²ந்தா³க³திம் க³ச்சே²ய்ய, ந தோ³ஸாக³திம் க³ச்சே²ய்ய, ந மோஹாக³திம் க³ச்சே²ய்ய, ந ப⁴யாக³திம் க³ச்சே²ய்ய, க³ஹிதாக³ஹிதஞ்ச ஜானேய்ய. ஏவஞ்ச பன, பி⁴க்க²வே, ஸம்மன்னிதப்³போ³ –

‘‘பட²மம் பி⁴க்கு² யாசிதப்³போ³, யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ஸேனாஸனக்³கா³ஹாபகம் ஸம்மன்னேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமம் பி⁴க்கு²ம் ஸேனாஸனக்³கா³ஹாபகம் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸேனாஸனக்³கா³ஹாபகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² ஸேனாஸனக்³கா³ஹாபகோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

318. அத² கோ² ஸேனாஸனக்³கா³ஹாபகானம் பி⁴க்கூ²னம் ஏதத³ஹோஸி – ‘‘கத²ம் நு கோ² ஸேனாஸனம் கா³ஹேதப்³ப³’’ந்தி? ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பட²மம் பி⁴க்கூ² க³ணேதும், பி⁴க்கூ² க³ணேத்வா ஸேய்யா க³ணேதும், ஸேய்யா க³ணேத்வா ஸேய்யக்³கே³ன கா³ஹேது’’ந்தி. ஸேய்யக்³கே³ன கா³ஹேந்தா ஸேய்யா உஸ்ஸாரயிம்ஸு…பே… ‘‘அனுஜானாமி, பி⁴க்க²வே, விஹாரக்³கே³ன கா³ஹேது’’ந்தி. விஹாரக்³கே³ன கா³ஹேந்தா விஹாரா உஸ்ஸாரயிம்ஸு…பே… ‘‘அனுஜானாமி, பி⁴க்க²வே, பரிவேணக்³கே³ன கா³ஹேது’’ந்தி. பரிவேணக்³கே³ன கா³ஹேந்தா பரிவேணா உஸ்ஸாரயிம்ஸு…பே… ‘‘அனுஜானாமி, பி⁴க்க²வே, அனுபா⁴க³ம்பி தா³தும். க³ஹிதே அனுபா⁴கே³ அஞ்ஞோ பி⁴க்கு² ஆக³ச்ச²தி, ந அகாமா தா³தப்³போ³’’தி.

தேன கோ² பன ஸமயேன பி⁴க்கூ² நிஸ்ஸீமே டி²தஸ்ஸ ஸேனாஸனம் கா³ஹேந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, நிஸ்ஸீமே டி²தஸ்ஸ ஸேனாஸனம் கா³ஹேதப்³ப³ம். யோ கா³ஹேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² ஸேனாஸனம் க³ஹேத்வா ஸப்³ப³காலம் படிபா³ஹந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ஸேனாஸனம் க³ஹேத்வா ஸப்³ப³காலம் படிபா³ஹேதப்³ப³ம். யோ படிபா³ஹேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, வஸ்ஸானம் தேமாஸம் படிபா³ஹிதும், உதுகாலம் பன ந படிபா³ஹிது’’ந்தி.

அத² கோ² பி⁴க்கூ²னம் ஏதத³ஹோஸி – ‘‘கதி நு கோ² ஸேனாஸனக்³கா³ஹா’’தி? ப⁴க³வதோ ஏதமத்த²ம் ஆரோசேஸும். ‘‘தயோ மே, பி⁴க்க²வே, ஸேனாஸனக்³கா³ஹா – புரிமகோ, பச்சி²மகோ, அந்தராமுத்தகோ. அபரஜ்ஜுக³தாய ஆஸாள்ஹியா புரிமகோ கா³ஹேதப்³போ³. மாஸக³தாய ஆஸாள்ஹியா பச்சி²மகோ கா³ஹேதப்³போ³. அபரஜ்ஜுக³தாய பவாரணாய ஆயதிம் வஸ்ஸாவாஸத்தா²ய அந்தராமுத்தகோ கா³ஹேதப்³போ³. இமே கோ², பி⁴க்க²வே, தயோ ஸேனாஸனக்³கா³ஹா’’தி.

து³தியபா⁴ணவாரோ நிட்டி²தோ.