6. தஸ்ஸபாபியஸிகா

205. தேன கோ² பன ஸமயேன உபவாளோ பி⁴க்கு² ஸங்க⁴மஜ்ஜே² ஆபத்தியா அனுயுஞ்ஜியமானோ அவஜானித்வா படிஜானாதி, படிஜானித்வா அவஜானாதி, அஞ்ஞேனஞ்ஞம் படிசரதி, ஸம்பஜானமுஸா பா⁴ஸதி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம உபவாளோ பி⁴க்கு² ஸங்க⁴மஜ்ஜே² ஆபத்தியா அனுயுஞ்ஜியமானோ அவஜானித்வா படிஜானிஸ்ஸதி, படிஜானித்வா அவஜானிஸ்ஸதி, அஞ்ஞேனஞ்ஞம் படிசரிஸ்ஸதி, ஸம்பஜானமுஸா பா⁴ஸிஸ்ஸதீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே…பே… ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – தேன ஹி, பி⁴க்க²வே, ஸங்கோ⁴ உபவாளஸ்ஸ பி⁴க்கு²னோ தஸ்ஸபாபியஸிகாகம்மம் கரோது. ஏவஞ்ச பன, பி⁴க்க²வே, காதப்³ப³ம். பட²மம் உபவாளோ பி⁴க்கு² சோதே³தப்³போ³, சோதே³த்வா ஸாரேதப்³போ³, ஸாரேத்வா ஆபத்திம் ஆரோபேதப்³போ³, ஆபத்திம் ஆரோபேத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

206. ‘‘ஸுணாது மே, ப⁴ந்தே, ஸங்கோ⁴. அயம் உபவாளோ பி⁴க்கு² ஸங்க⁴மஜ்ஜே² ஆபத்தியா அனுயுஞ்ஜியமானோ அவஜானித்வா படிஜானாதி, படிஜானித்வா அவஜானாதி, அஞ்ஞேனஞ்ஞம் படிசரதி, ஸம்பஜானமுஸா ‘பா⁴ஸதி. யதி³ ஸங்க⁴ஸ்ஸ பத்தகல்லம், ஸங்கோ⁴ உபவாளஸ்ஸ பி⁴க்கு²னோ தஸ்ஸபாபியஸிகாகம்மம் கரேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் உபவாளோ பி⁴க்கு² ஸங்க⁴மஜ்ஜே² ஆபத்தியா அனுயுஞ்ஜியமானோ அவஜானித்வா படிஜானாதி, படிஜானித்வா அவஜானாதி, அஞ்ஞேனஞ்ஞம் படிசரதி, ஸம்பஜானமுஸா பா⁴ஸதி. ஸங்கோ⁴ உபவாளஸ்ஸ பி⁴க்கு²னோ தஸ்ஸபாபியஸிகாகம்மம் கரோதி. யஸ்ஸாயஸ்மதோ க²மதி உபவாளஸ்ஸ பி⁴க்கு²னோ தஸ்ஸபாபியஸிகாகம்மஸ்ஸ கரணம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே….

‘‘கதம் ஸங்கே⁴ன உபவாளஸ்ஸ பி⁴க்கு²னோ தஸ்ஸபாபியஸிகாகம்மம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

207. ‘‘பஞ்சிமானி, பி⁴க்க²வே, த⁴ம்மிகானி தஸ்ஸபாபியஸிகாகம்மஸ்ஸ கரணானி. அஸுசி ச ஹோதி, அலஜ்ஜீ ச, ஸானுவாதோ³ ச, தஸ்ஸ ஸங்கோ⁴ தஸ்ஸபாபியஸிகாகம்மம் கரோதி த⁴ம்மேன, ஸமக்³கே³ன – இமானி கோ², பி⁴க்க²வே, பஞ்ச த⁴ம்மிகானி தஸ்ஸபாபியஸிகாகம்மஸ்ஸ கரணானி.

அத⁴ம்மகம்மத்³வாத³ஸகம்

208. ‘‘தீஹி, பி⁴க்க²வே, அங்கே³ஹி ஸமன்னாக³தம் தஸ்ஸபாபியஸிகாகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச. அஸம்முகா² கதம் ஹோதி, அப்படிபுச்சா²கதம் ஹோதி, அப்படிஞ்ஞாய கதம் ஹோதி…பே… அத⁴ம்மேன கதம் ஹோதி, வக்³கே³ன கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம் தஸ்ஸபாபியஸிகாகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச.

த⁴ம்மகம்மத்³வாத³ஸகம்

209. ‘‘தீஹி, பி⁴க்க²வே, அங்கே³ஹி ஸமன்னாக³தம் தஸ்ஸபாபியஸிகாகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச. ஸம்முகா² கதம் ஹோதி, படிபுச்சா²கதம் ஹோதி, படிஞ்ஞாய கதம் ஹோதி…பே… த⁴ம்மேன கதம் ஹோதி, ஸமக்³கே³ன கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம் தஸ்ஸபாபியஸிகாகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச.

ஆகங்க²மானச²க்கம்

210. ‘‘தீஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ தஸ்ஸபாபியஸிகாகம்மம் கரேய்ய. ப⁴ண்ட³னகாரகோ ஹோதி கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ; பா³லோ ஹோதி அப்³யத்தோ ஆபத்திப³ஹுலோ அனபதா³னோ; கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி – இமேஹி கோ², பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ தஸ்ஸபாபியஸிகாகம்மம் கரேய்ய.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ தஸ்ஸபாபியஸிகாகம்மம் கரேய்ய. அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி – இமேஹி கோ², பி⁴க்க²வே…பே….

‘‘அபரேஹிபி, பி⁴க்க²வே…பே… பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி – இமேஹி கோ², பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ தஸ்ஸபாபியஸிகாகம்மம் கரேய்ய.

‘‘திண்ணம், பி⁴க்க²வே, பி⁴க்கூ²னம் ஆகங்க²மானோ ஸங்கோ⁴ தஸ்ஸபாபியஸிகாகம்மம் கரேய்ய. ஏகோ ப⁴ண்ட³னகாரகோ ஹோதி…பே… ஸங்கே⁴ அதி⁴கரணகாரகோ; ஏகோ பா³லோ ஹோதி அப்³யத்தோ ஆபத்திப³ஹுலோ அனபதா³னோ; ஏகோ கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி – இமேஸம் கோ², பி⁴க்க²வே, திண்ணம் பி⁴க்கூ²னம் ஆகங்க²மானோ ஸங்கோ⁴ தஸ்ஸபாபியஸிகாகம்மம் கரேய்ய.

‘‘அபரேஸம்பி, பி⁴க்க²வே, திண்ணம் பி⁴க்கூ²னம் ஆகங்க²மானோ ஸங்கோ⁴ தஸ்ஸபாபியஸிகாகம்மம் கரேய்ய. ஏகோ அதி⁴ஸீலே ஸீலவிபன்னோ ஹோதி, ஏகோ அஜ்ஜா²சாரே ஆசாரவிபன்னோ ஹோதி, ஏகோ அதிதி³ட்டி²யா தி³ட்டி²விபன்னோ ஹோதி – இமேஸம் கோ², பி⁴க்க²வே…பே….

‘‘அபரேஸம்பி, பி⁴க்க²வே…பே… ஏகோ பு³த்³த⁴ஸ்ஸ அவண்ணம் பா⁴ஸதி, ஏகோ த⁴ம்மஸ்ஸ அவண்ணம் பா⁴ஸதி, ஏகோ ஸங்க⁴ஸ்ஸ அவண்ணம் பா⁴ஸதி – இமேஸம் கோ², பி⁴க்க²வே, திண்ணம் பி⁴க்கூ²னம் ஆகங்க²மானோ ஸங்கோ⁴ தஸ்ஸபாபியஸிகாகம்மம் கரேய்ய.

அட்டா²ரஸவத்தம்

211. ‘‘தஸ்ஸபாபியஸிகாகம்மகதேன, பி⁴க்க²வே, பி⁴க்கு²னா ஸம்மா வத்திதப்³ப³ம். தத்ராயம் ஸம்மாவத்தனா –

ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³…பே… ந பி⁴க்கூ²ஹி ஸம்பயோஜேதப்³ப³’’ந்தி. அத² கோ² ஸங்கோ⁴ உபவாளஸ்ஸ பி⁴க்கு²னோ தஸ்ஸபாபியஸிகாகம்மம் அகாஸி.