3. சத்தாலீஸகம்

160. தேன கோ² பன ஸமயேன அஞ்ஞதரோ பி⁴க்கு² பரிவஸந்தோ விப்³ப⁴மி. ஸோ புன பச்சாக³ந்த்வா பி⁴க்கூ² உபஸம்பத³ம் யாசி. ப⁴க³வதோ ஏதமத்த²ம் ஆரோசேஸும்.

‘‘இத⁴ பன, பி⁴க்க²வே, பி⁴க்கு² பரிவஸந்தோ விப்³ப⁴மதி. விப்³ப⁴ந்தகஸ்ஸ, பி⁴க்க²வே, பரிவாஸோ ந ருஹதி. ஸோ சே புன உபஸம்பஜ்ஜதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ², அவஸேஸோ பரிவஸிதப்³போ³.

‘‘இத⁴ பன, பி⁴க்க²வே, பி⁴க்கு² பரிவஸந்தோ ஸாமணேரோ ஹோதி. ஸாமணேரஸ்ஸ, பி⁴க்க²வே, பரிவாஸோ ந ருஹதி. ஸோ சே புன உபஸம்பஜ்ஜதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ², அவஸேஸோ பரிவஸிதப்³போ³.

‘‘இத⁴ பன, பி⁴க்க²வே, பி⁴க்கு² பரிவஸந்தோ உம்மத்தகோ ஹோதி. உம்மத்தகஸ்ஸ, பி⁴க்க²வே, பரிவாஸோ ந ருஹதி. ஸோ சே புன அனும்மத்தகோ ஹோதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ², அவஸேஸோ பரிவஸிதப்³போ³.

‘‘இத⁴ பன, பி⁴க்க²வே, பி⁴க்கு² பரிவஸந்தோ கி²த்தசித்தோ ஹோதி. கி²த்தசித்தஸ்ஸ, பி⁴க்க²வே, பரிவாஸோ ந ருஹதி. ஸோ சே புன அகி²த்தசித்தோ ஹோதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ புரிவுத்தோ² ஸுபரிவுத்தோ², அவஸேஸோ பரிவஸிதப்³போ³.

‘‘இத⁴ பன, பி⁴க்க²வே, பி⁴க்கு² பரிவஸந்தோ வேத³னாட்டோ ஹோதி. வேத³னாட்டஸ்ஸ, பி⁴க்க²வே, பரிவாஸோ ந ருஹதி. ஸோ சே புன அவேத³னாட்டோ ஹோதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ², அவஸேஸோ பரிவஸிதப்³போ³.

‘‘இத⁴ பன, பி⁴க்க²வே, பி⁴க்கு² பரிவஸந்தோ, ஆபத்தியா அத³ஸ்ஸனே, உக்கி²பிய்யதி [உக்கி²பியதி (ஸ்யா.), உக்கி²பீயதி (க.)]. உக்கி²த்தகஸ்ஸ, பி⁴க்க²வே, பரிவாஸோ ந ருஹதி. ஸோ சே புன ஓஸாரிய்யதி [ஓஸாரியதி (ஸ்யா.), ஓஸாரீயதி (க.)], தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ², அவஸேஸோ பரிவஸிதப்³போ³.

‘‘இத⁴ பன, பி⁴க்க²வே, பி⁴க்கு² பரிவஸந்தோ, ஆபத்தியா அப்படிகம்மே, உக்கி²பிய்யதி. உக்கி²த்தகஸ்ஸ, பி⁴க்க²வே, பரிவாஸோ ந ருஹதி. ஸோ சே புன ஓஸாரிய்யதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ², அவஸேஸோ பரிவஸிதப்³போ³.

‘‘இத⁴ பன, பி⁴க்க²வே, பி⁴க்கு² பரிவஸந்தோ, பாபிகாய தி³ட்டி²யா, அப்படினிஸ்ஸக்³கே³, உக்கி²பிய்யதி. உக்கி²த்தகஸ்ஸ, பி⁴க்க²வே, பரிவாஸோ ந ருஹதி. ஸோ சே புன ஓஸாரிய்யதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ², அவஸேஸோ பரிவஸிதப்³போ³.

161. ‘‘இத⁴ பன, பி⁴க்க²வே, பி⁴க்கு² மூலாயபடிகஸ்ஸனாரஹோ விப்³ப⁴மதி. விப்³ப⁴ந்தகஸ்ஸ, பி⁴க்க²வே, மூலாயபடிகஸ்ஸனா ந ருஹதி. ஸோ சே புன உபஸம்பஜ்ஜதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ². ஸோ பி⁴க்கு² மூலாய படிகஸ்ஸிதப்³போ³.

‘‘இத⁴ பன, பி⁴க்க²வே, பி⁴க்கு² மூலாயபடிகஸ்ஸனாரஹோ ஸாமணேரோ ஹோதி…பே… உம்மத்தகோ ஹோதி…பே… கி²த்தசித்தோ ஹோதி…பே… வேத³னாட்டோ ஹோதி…பே… ஆபத்தியா அத³ஸ்ஸனே உக்கி²பிய்யதி…பே… ஆபத்தியா அப்படிகம்மே உக்கி²பிய்யதி…பே… பாபிகாய தி³ட்டி²யா, அப்படினிஸ்ஸக்³கே³, உக்கி²பிய்யதி. உக்கி²த்தகஸ்ஸ, பி⁴க்க²வே, மூலாயபடிகஸ்ஸனா ந ருஹதி. ஸோ சே புன ஓஸாரிய்யதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ². ஸோ பி⁴க்கு² மூலாய படிகஸ்ஸிதப்³போ³.

162. ‘‘இத⁴ பன, பி⁴க்க²வே, பி⁴க்கு² மானத்தாரஹோ விப்³ப⁴மதி. விப்³ப⁴ந்தகஸ்ஸ, பி⁴க்க²வே, மானத்ததா³னம் ந ருஹதி. ஸோ சே புன உபஸம்பஜ்ஜதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ². தஸ்ஸ பி⁴க்கு²னோ மானத்தம் தா³தப்³ப³ம்.

‘‘இத⁴ பன, பி⁴க்க²வே, பி⁴க்கு² மானத்தாரஹோ ஸாமணேரோ ஹோதி…பே… உம்மத்தகோ ஹோதி…பே… கி²த்தசித்தோ ஹோதி…பே… வேத³னாட்டோ ஹோதி…பே… ஆபத்தியா அத³ஸ்ஸனே, உக்கி²பிய்யதி…பே… ஆபத்தியா அப்படிகம்மே, உக்கி²பிய்யதி…பே… பாபிகாய தி³ட்டி²யா, அப்படினிஸ்ஸக்³கே³, உக்கி²பிய்யதி. உக்கி²த்தகஸ்ஸ, பி⁴க்க²வே, மானத்ததா³னம் ந ருஹதி. ஸோ சே புன ஓஸாரிய்யதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ². தஸ்ஸ பி⁴க்கு²னோ மானத்தம் தா³தப்³ப³ம்.

163. ‘‘இத⁴ பன, பி⁴க்க²வே, பி⁴க்கு² மானத்தம் சரந்தோ விப்³ப⁴மதி. விப்³ப⁴ந்தகஸ்ஸ, பி⁴க்க²வே, மானத்தசரியா ந ருஹதி. ஸோ சே புன உபஸம்பஜ்ஜதி தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ²; யம் மானத்தம் தி³ன்னம் ஸுதி³ன்னம், யம் மானத்தம் சிண்ணம் ஸுசிண்ணம், அவஸேஸம் சரிதப்³ப³ம்.

‘‘இத⁴ பன, பி⁴க்க²வே, பி⁴க்கு² மானத்தம் சரந்தோ ஸாமணேரோ ஹோதி…பே… உம்மத்தகோ ஹோதி…பே… கி²த்தசித்தோ ஹோதி…பே… வேத³னாட்டோ ஹோதி…பே… ஆபத்தியா அத³ஸ்ஸனே, உக்கி²பிய்யதி…பே… ஆபத்தியா அப்படிகம்மே, உக்கி²பிய்யதி…பே… பாபிகாய தி³ட்டி²யா, அப்படினிஸ்ஸக்³கே³, உக்கி²பிய்யதி. உக்கி²த்தகஸ்ஸ, பி⁴க்க²வே, மானத்தசரியா ந ருஹதி. ஸோ சே புன ஓஸாரிய்யதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ புரிவுத்தோ² ஸுபரிவுத்தோ²; யம் மானத்தம் தி³ன்னம் ஸுதி³ன்னம், யம் மானத்தம் சிண்ணம் ஸுசிண்ணம், அவஸேஸம் சரிதப்³ப³ம்.

164. ‘‘இத⁴ பன, பி⁴க்க²வே, பி⁴க்கு² அப்³பா⁴னாரஹோ விப்³ப⁴மதி. விப்³ப⁴ந்தகஸ்ஸ, பி⁴க்க²வே, அப்³பா⁴னம் ந ருஹதி. ஸோ சே புன உபஸம்பஜ்ஜதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ²; யம் மானத்தம் தி³ன்னம் ஸுதி³ன்னம், யம் மானத்தம் சிண்ணம் ஸுசிண்ணம். ஸோ பி⁴க்கு² அப்³பே⁴தப்³போ³.

‘‘இத⁴ பன, பி⁴க்க²வே, பி⁴க்கு² அப்³பா⁴னாரஹோ ஸாமணேரோ ஹோதி…பே… உம்மத்தகோ ஹோதி…பே…

கி²த்தசித்தோ ஹோதி…பே… வேத³னாட்டோ ஹோதி…பே… ஆபத்தியா அத³ஸ்ஸனே, உக்கி²பிய்யதி…பே… ஆபத்தியா அப்படிகம்மே, உக்கி²பிய்யதி…பே… பாபிகாய தி³ட்டி²யா, அப்படினிஸ்ஸக்³கே³, உக்கி²பிய்யதி. உக்கி²த்தகஸ்ஸ, பி⁴க்க²வே, அப்³பா⁴னம் ந ருஹதி. ஸோ சே புன ஓஸாரிய்யதி, தஸ்ஸ ததே³வ புரிமம் பரிவாஸதா³னம். யோ பரிவாஸோ தி³ன்னோ ஸுதி³ன்னோ, யோ பரிவுத்தோ² ஸுபரிவுத்தோ²; யம் மானத்தம் தி³ன்னம் ஸுதி³ன்னம், யம் மானத்தம் சிண்ணம் ஸுசிண்ணம். ஸோ பி⁴க்கு² அப்³பே⁴தப்³போ³.

சத்தாலீஸகம் ஸமத்தம்.