5. அப்³பா⁴னாரஹவத்தம்

95. தேன கோ² பன ஸமயேன அப்³பா⁴னாரஹா பி⁴க்கூ² ஸாதி³யந்தி பகதத்தானம் பி⁴க்கூ²னம் அபி⁴வாத³னம் பச்சுட்டா²னம்…பே… நஹானே பிட்டி²பரிகம்மம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அப்³பா⁴னாரஹா பி⁴க்கூ² ஸாதி³யிஸ்ஸந்தி பகதத்தானம் பி⁴க்கூ²னம் அபி⁴வாத³னம் பச்சுட்டா²னம்…பே… நஹானே பிட்டி²பரிகம்ம’’ந்தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, அப்³பா⁴னாரஹா பி⁴க்கூ² ஸாதி³யந்தி பகதத்தானம் பி⁴க்கூ²னம் அபி⁴வாத³னம் பச்சுட்டா²னம்…பே… நஹானே பிட்டி²பரிகம்மந்தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம்…பே… கத²ஞ்ஹி நாம, பி⁴க்க²வே, அப்³பா⁴னாரஹா பி⁴க்கூ² ஸாதி³யிஸ்ஸந்தி பகதத்தானம் பி⁴க்கூ²னம் அபி⁴வாத³னம் பச்சுட்டா²னம்…பே… நஹானே பிட்டி²பரிகம்மம்! நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அப்³பா⁴னாரஹேன பி⁴க்கு²னா ஸாதி³தப்³ப³ம் பகதத்தானம் பி⁴க்கூ²னம் அபி⁴வாத³னம் பச்சுபட்டா²னம்…பே… நஹானே பிட்டி²பரிகம்மம். யோ ஸாதி³யேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அப்³பா⁴னாரஹானம் பி⁴க்கூ²னம் மிது² யதா²வுட்³ட⁴ம் அபி⁴வாத³னம் பச்சுட்டா²னம்…பே… நஹானே பிட்டி²பரிகம்மம். அனுஜானாமி, பி⁴க்க²வே, அப்³பா⁴னாரஹானம் பி⁴க்கூ²னம் பஞ்ச யதா²வுட்³ட⁴ம் – உபோஸத²ம், பவாரணம், வஸ்ஸிகஸாடிகம், ஓணோஜனம், ப⁴த்தம். தேன ஹி, பி⁴க்க²வே, அப்³பா⁴னாரஹானம் பி⁴க்கூ²னம் வத்தம் பஞ்ஞாபேஸ்ஸாமி யதா² அப்³பா⁴னாரஹேஹி பி⁴க்கூ²ஹி வத்திதப்³ப³ம்.

96. ‘‘அப்³பா⁴னாரஹேன, பி⁴க்க²வே, பி⁴க்கு²னா ஸம்மா வத்திதப்³ப³ம். தத்ராயம் ஸம்மாவத்தனா –

ந உபஸம்பாதே³தப்³ப³ம்…பே… (யதா² ஹேட்டா², ததா² வித்தா²ரேதப்³ப³ம்,) ந பி⁴க்கூ²ஹி ஸம்பயோஜேதப்³ப³ம்.

‘‘ந, பி⁴க்க²வே, அப்³பா⁴னாரஹேன பி⁴க்கு²னா பகதத்தஸ்ஸ பி⁴க்கு²னோ புரதோ க³ந்தப்³ப³ம், ந புரதோ நிஸீதி³தப்³ப³ம். யோ ஹோதி ஸங்க⁴ஸ்ஸ ஆஸனபரியந்தோ ஸேய்யாபரியந்தோ விஹாரபரியந்தோ ஸோ தஸ்ஸ பதா³தப்³போ³. தேன ச ஸோ ஸாதி³தப்³போ³.

‘‘ந, பி⁴க்க²வே, அப்³பா⁴னாரஹேன பி⁴க்கு²னா பகதத்தேன பி⁴க்கு²னா புரேஸமணேன வா பச்சா²ஸமணேன வா குலானி உபஸங்கமிதப்³பா³னி; ந ஆரஞ்ஞிகங்க³ம் ஸமாதா³தப்³ப³ம்; ந பிண்ட³பாதிகங்க³ம் ஸமாதா³தப்³ப³ம்; ந ச தப்பச்சயா பிண்ட³பாதோ நீஹராபேதப்³போ³ – மா மம் ஜானிம்ஸூதி.

‘‘ந, பி⁴க்க²வே, அப்³பா⁴னாரஹேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ ஆவாஸோ க³ந்தப்³போ³, அஞ்ஞத்ர பகதத்தேன, அஞ்ஞத்ர அந்தராயா.

‘‘ந, பி⁴க்க²வே, அப்³பா⁴னாரஹேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ அனாவாஸோ க³ந்தப்³போ³, அஞ்ஞத்ர பகதத்தேன, அஞ்ஞத்ர அந்தராயா…பே…. (யதா² ஹேட்டா², ததா² வித்தா²ரேதப்³பா³.)

‘‘க³ந்தப்³போ³, பி⁴க்க²வே, அப்³பா⁴னாரஹேன பி⁴க்கு²னா ஸபி⁴க்கு²கா ஆவாஸா…பே… அனாவாஸா…பே… ஆவாஸா வா அனாவாஸா வா ஸபி⁴க்கு²கோ ஆவாஸோ…பே… ஸபி⁴க்கு²கோ அனாவாஸோ…பே… ஸபி⁴க்கு²கோ ஆவாஸோ வா அனாவாஸோ வா, யத்த²ஸ்ஸு பி⁴க்கூ² ஸமானஸம்வாஸகா, யம் ஜஞ்ஞா ஸக்கோமி அஜ்ஜேவ க³ந்துந்தி.

‘‘ந, பி⁴க்க²வே, அப்³பா⁴னாரஹேன பி⁴க்கு²னா பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம்; பகதத்தம் பி⁴க்கு²ம் தி³ஸ்வா ஆஸனா வுட்டா²தப்³ப³ம், பகதத்தோ பி⁴க்கு² ஆஸனேன நிமந்தேதப்³போ³; ந பகதத்தேன பி⁴க்கு²னா ஸத்³தி⁴ம் ஏகாஸனே நிஸீதி³தப்³ப³ம், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ம், ந ச²மாயம் நிஸின்னே ஆஸனே நிஸீதி³தப்³ப³ம்; ந ஏகசங்கமே சங்கமிதப்³ப³ம், ந நீசே சங்கமே சங்கமந்தே உச்சே சங்கமே சங்கமிதப்³ப³ம், ந ச²மாயம் சங்கமந்தே சங்கமே சங்கமிதப்³ப³ம்.

‘‘ந, பி⁴க்க²வே, அப்³பா⁴னாரஹேன பி⁴க்கு²னா பாரிவாஸிகேன பி⁴க்கு²னா ஸத்³தி⁴ம்…பே… மூலாயபடிகஸ்ஸனாரஹேன பி⁴க்கு²னா ஸத்³தி⁴ம்…பே… மானத்தாரஹேன பி⁴க்கு²னா ஸத்³தி⁴ம்…பே… மானத்தசாரிகேன பி⁴க்கு²னா ஸத்³தி⁴ம்…பே… அப்³பா⁴னாரஹேன வுட்³ட⁴தரேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம்; ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம்; ந ஏகாஸனே நிஸீதி³தப்³ப³ம், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ம், ந ச²மாயம் நிஸின்னே ஆஸனே நிஸீதி³தப்³ப³ம்; ந ஏகசங்கமே சங்கமிதப்³ப³ம், ந நீசே சங்கமே சங்கமந்தே உச்சே சங்கமே சங்கமிதப்³ப³ம், ந ச²மாயம் சங்கமந்தே சங்கமே சங்கமிதப்³ப³ம்.

[மஹாவ. 393] ‘‘அப்³பா⁴னாரஹசதுத்தோ² சே, பி⁴க்க²வே, பரிவாஸம் த³தே³ய்ய, மூலாய படிகஸ்ஸேய்ய, மானத்தம் த³தே³ய்ய, தம்வீஸோ அப்³பே⁴ய்ய, அகம்மம், ந ச கரணீய’’ந்தி.

அப்³பா⁴னாரஹவத்தம் நிட்டி²தம்.

பாரிவாஸிகக்க²ந்த⁴கோ து³தியோ.

இமம்ஹி க²ந்த⁴கே வத்தூ² பஞ்ச.

தஸ்ஸுத்³தா³னம் –

பாரிவாஸிகா ஸாதே³ந்தி, பகதத்தான பி⁴க்கு²னம்;

அபி⁴வாத³னம் பச்சுட்டா²னம், அஞ்ஜலிஞ்ச ஸாமீசியம்.

ஆஸனம் ஸேய்யாபி⁴ஹாரம், பாதோ³ பீட²ம் கத²லிகம்;

பத்தம் நஹானே பரிகம்மம், உஜ்ஜா²யந்தி ச பேஸலா.

து³க்கடம் ஸாதி³யந்தஸ்ஸ, மிது² பஞ்ச யதா²வுட்³ட⁴ம் [புனாபரே (க.)];

உபோஸத²ம் பவாரணம், வஸ்ஸிகோணோஜபோ⁴ஜனம்.

ஸம்மா ச வத்தனா தத்த², பகதத்தஸ்ஸ க³ச்ச²ந்தம்;

யோ ச ஹோதி பரியந்தோ, புரே பச்சா² ததே²வ ச [ந புரே பச்சா²ஸமணேன (ஸீ. ஸ்யா.)].

ஆரஞ்ஞபிண்ட³னீஹாரோ, ஆக³ந்துகே உபோஸதே²;

பவாரணாய தூ³தேன, க³ந்தப்³போ³ ச ஸபி⁴க்கு²கோ.

ஏகச்ச²ன்னே ச வுட்டா²னம், ததே²வ ச நிமந்தயே;

ஆஸனே நீசே சங்கமே, ச²மாயம் சங்கமேன ச.

வுட்³ட⁴தரேன அகம்மம், ரத்திச்சே²தா³ ச ஸோத⁴னா;

நிக்கி²பனம் ஸமாதா³னம், வத்தம்வ பாரிவாஸிகே [ரத்தி வா பாரிவாஸிகே (க.), ஞாதப்³ப³ம் பாரிவாஸிகா (ஸீ. ஸ்யா.)].

மூலாய மானத்தாரஹா, ததா² மானத்தசாரிகா;

அப்³பா⁴னாரஹே நயோ சாபி, ஸம்பே⁴த³ம் நயதோ [ஸம்பே⁴த³னயதோ (ஸ்யா.)] புன.

பாரிவாஸிகேஸு தயோ, சது மானத்தசாரிகே;

ந ஸமேந்தி ரத்திச்சே²தே³ஸு [ரத்திச்சே²தே³ (இதிபி), ரத்திச்சே²தா³ (ஸ்யா.)], மானத்தேஸு ச தே³வஸி;

த்³வே கம்மா ஸதி³ஸா ஸேஸா, தயோ கம்மா ஸமாஸமாதி [ஸமா மதாதி (ஸீ.)].

பாரிவாஸிகக்க²ந்த⁴கம் நிட்டி²தம்.