3. மானத்தாரஹவத்தம்

88. தேன கோ² பன ஸமயேன மானத்தாரஹா பி⁴க்கூ² ஸாதி³யந்தி பகதத்தானம் பி⁴க்கூ²னம் அபி⁴வாத³னம், பச்சுட்டா²னம், அஞ்ஜலிகம்மம், ஸாமீசிகம்மம், ஆஸனாபி⁴ஹாரம், ஸேய்யாபி⁴ஹாரம், பாதோ³த³கம் பாத³பீட²ம், பாத³கத²லிகம், பத்தசீவரபடிக்³க³ஹணம், நஹானே பிட்டி²பரிகம்மம். யே தே பி⁴க்கூ² அப்பிச்சா² …பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம மானத்தாரஹா பி⁴க்கூ² ஸாதி³யிஸ்ஸந்தி பகதத்தானம் பி⁴க்கூ²னம் அபி⁴வாத³னம், பச்சுட்டா²னம், அஞ்ஜலிகம்மம், ஸாமீசிகம்மம், ஆஸனாபி⁴ஹாரம், ஸேய்யாபி⁴ஹாரம், பாதோ³த³கம் பாத³பீட²ம், பாத³கத²லிகம், பத்தசீவரபடிக்³க³ஹணம், நஹானே பிட்டி²பரிகம்ம’’ந்தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, மானத்தாரஹா பி⁴க்கூ² ஸாதி³யந்தி பகதத்தானம் பி⁴க்கூ²னம் அபி⁴வாத³னம், பச்சுட்டா²னம்…பே… நஹானே பிட்டி²பரிகம்ம’’ந்தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம்…பே… கத²ஞ்ஹி நாம, பி⁴க்க²வே, மானத்தாரஹா பி⁴க்கூ² ஸாதி³யிஸ்ஸந்தி பகதத்தானம் பி⁴க்கூ²னம் அபி⁴வாத³னம்…பே… நஹானே பிட்டி²பரிகம்மம்! நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, மானத்தாரஹேன பி⁴க்கு²னா ஸாதி³தப்³ப³ம் பகதத்தானம் பி⁴க்கூ²னம் அபி⁴வாத³னம், பச்சுட்டா²னம்…பே… நஹானே பிட்டி²பரிகம்மம். யோ ஸாதி³யேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மானத்தாரஹானம் பி⁴க்கூ²னம் மிது² யதா²வுட்³ட⁴ம் அபி⁴வாத³னம், பச்சுட்டா²னம்…பே… நஹானே பிட்டி²பரிகம்மம். அனுஜானாமி, பி⁴க்க²வே, மானத்தாரஹானம் பி⁴க்கூ²னம் பஞ்ச யதா²வுட்³ட⁴ம் – உபோஸத²ம், பவாரணம், வஸ்ஸிகஸாடிகம், ஓணோஜனம், ப⁴த்தம். தேன ஹி, பி⁴க்க²வே, மானத்தாரஹானம் பி⁴க்கூ²னம் வத்தம் பஞ்ஞாபேஸ்ஸாமி யதா² மானத்தாரஹேஹி பி⁴க்கூ²ஹி வத்திதப்³ப³ம்.

89. ‘‘மானத்தாரஹேன, பி⁴க்க²வே, பி⁴க்கு²னா ஸம்மா வத்திதப்³ப³ம். தத்ராயம் ஸம்மாவத்தனா –

ந உபஸம்பாதே³தப்³ப³ம்…பே… (யதா² மூலாய படிகஸ்ஸனா, ததா² வித்தா²ரேதப்³ப³ம்.) ந பி⁴க்கூ²ஹி ஸம்பயோஜேதப்³ப³ம்.

‘‘ந, பி⁴க்க²வே, மானத்தாரஹேன பி⁴க்கு²னா பகதத்தஸ்ஸ பி⁴க்கு²னோ புரதோ க³ந்தப்³ப³ம், ந புரதோ நிஸீதி³தப்³ப³ம். யோ ஹோதி ஸங்க⁴ஸ்ஸ ஆஸனபரியந்தோ ஸேய்யாபரியந்தோ விஹாரபரியந்தோ ஸோ தஸ்ஸ பதா³தப்³போ³. தேன ச ஸோ ஸாதி³தப்³போ³.

‘‘ந, பி⁴க்க²வே, மானத்தாரஹேன பி⁴க்கு²னா பகதத்தேன பி⁴க்கு²னா புரேஸமணேன வா பச்சா²ஸமணேன வா குலானி உபஸங்கமிதப்³பா³னி, ந ஆரஞ்ஞிகங்க³ம் ஸமாதா³தப்³ப³ம், ந பிண்ட³பாதிகங்க³ம் ஸமாதா³தப்³ப³ம், ந ச தப்பச்சயா பிண்ட³பாதோ நீஹராபேதப்³போ³ – மா மம் ஜானிம்ஸூதி.

‘‘ந, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ ஆவாஸோ க³ந்தப்³போ³, அஞ்ஞத்ர பகதத்தேன, அஞ்ஞத்ர அந்தராயா.

‘‘ந, பி⁴க்க²வே, மனத்தாரஹேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ அனாவாஸோ க³ந்தப்³போ³, அஞ்ஞத்ர பகதத்தேன, அஞ்ஞத்ர அந்தராயா.

‘‘ந, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ ஆவாஸோ வா அனாவாஸோ வா க³ந்தப்³போ³, அஞ்ஞத்ர பகதத்தேன, அஞ்ஞத்ர அந்தராயா.

‘‘ந, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா அனாவாஸா அபி⁴க்கு²கோ ஆவாஸோ க³ந்தப்³போ³…பே… அபி⁴க்கு²கோ அனாவாஸோ க³ந்தப்³போ³…பே… அபி⁴க்கு²கோ ஆவாஸோ வா அனாவாஸோ வா க³ந்தப்³போ³, அஞ்ஞத்ர பகதத்தேன, அஞ்ஞத்ர அந்தராயா.

‘‘ந, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா ஆவாஸா வா அனாவாஸா வா அபி⁴க்கு²கோ ஆவாஸோ க³ந்தப்³போ³…பே… அபி⁴க்கு²கோ அனாவாஸோ க³ந்தப்³போ³…பே… அபி⁴க்கு²கோ ஆவாஸோ வா அனாவாஸோ வா க³ந்தப்³போ³, அஞ்ஞத்ர பகதத்தேன, அஞ்ஞத்ர அந்தராயா.

‘‘ந, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ ஆவாஸோ க³ந்தப்³போ³…பே… ஸபி⁴க்கு²கோ அனாவாஸோ க³ந்தப்³போ³…பே… ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³, யத்த²ஸ்ஸு பி⁴க்கூ² நானாஸம்வாஸகா, அஞ்ஞத்ர பகதத்தேன, அஞ்ஞத்ர அந்தராயா.

‘‘ந, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ ஆவாஸோ க³ந்தப்³போ³…பே… ஸபி⁴க்கு²கோ அனாவாஸோ க³ந்தப்³போ³ …பே… ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³, யத்த²ஸ்ஸு பி⁴க்கூ² நானாஸம்வாஸகா, அஞ்ஞத்ர பகதத்தேன, அஞ்ஞத்ர அந்தராயா.

‘‘ந, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ ஆவாஸோ க³ந்தப்³போ³…பே… ஸபி⁴க்கு²கோ அனாவாஸோ க³ந்தப்³போ³…பே… ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³, யத்த²ஸ்ஸு பி⁴க்கூ² நானாஸம்வாஸகா, அஞ்ஞத்ர பகதத்தேன, அஞ்ஞத்ர அந்தராயா.

‘‘க³ந்தப்³போ³, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ ஆவாஸோ…பே… ஸபி⁴க்கு²கோ அனாவாஸோ…பே… ஸபி⁴க்கு²கோ ஆவாஸோ வா அனாவாஸோ வா, யத்த²ஸ்ஸு பி⁴க்கூ² ஸமானஸம்வாஸகா, யம் ஜஞ்ஞா ஸக்கோமி அஜ்ஜேவ க³ந்துந்தி.

‘‘க³ந்தப்³போ³, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ ஆவாஸோ…பே… ஸபி⁴க்கு²கோ அனாவாஸோ…பே… ஸபி⁴க்கு²கோ ஆவாஸோ வா அனாவாஸோ வா, யத்த²ஸ்ஸு பி⁴க்கூ² ஸமானஸம்வாஸகா, யம் ஜஞ்ஞா ஸக்கோமி அஜ்ஜேவ க³ந்துந்தி.

‘‘க³ந்தப்³போ³, பி⁴க்க²வே, மானத்தாரஹேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ ஆவாஸோ…பே… ஸபி⁴க்கு²கோ அனாவாஸோ…பே… ஸபி⁴க்கு²கோ ஆவாஸோ வா அனாவாஸோ வா, யத்த²ஸ்ஸு பி⁴க்கூ² ஸமானஸம்வாஸகா, யம் ஜஞ்ஞா ஸக்கோமி அஜ்ஜேவ க³ந்துந்தி.

‘‘ந, பி⁴க்க²வே, மானத்தாரஹேன பி⁴க்கு²னா பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம். பகதத்தம் பி⁴க்கு²ம் தி³ஸ்வா ஆஸனா வுட்டா²தப்³ப³ம். பகதத்தோ பி⁴க்கு² ஆஸனேன நிமந்தேதப்³போ³. ந பகதத்தேன பி⁴க்கு²னா ஸத்³தி⁴ம் ஏகாஸனே நிஸீதி³தப்³ப³ம், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ம், ந ச²மாயம் நிஸின்னே ஆஸனே நிஸீதி³தப்³ப³ம்; ந ஏகசங்கமே சங்கமிதப்³ப³ம், ந நீசே சங்கமே சங்கமந்தே உச்சே சங்கமே சங்கமிதப்³ப³ம், ந ச²மாயம் சங்கமந்தே சங்கமே சங்கமிதப்³ப³ம்.

‘‘ந, பி⁴க்க²வே, மானத்தாரஹேன பி⁴க்கு²னா பாரிவாஸிகேன பி⁴க்கு²னா ஸத்³தி⁴ம்…பே… மூலாயபடிகஸ்ஸனாரஹேன பி⁴க்கு²னா ஸத்³தி⁴ம்…பே… மானத்தாரஹேன வுட்³ட⁴தரேன பி⁴க்கு²னா ஸத்³தி⁴ம்…பே… மானத்தசாரிகேன பி⁴க்கு²னா ஸத்³தி⁴ம்…பே… அப்³பா⁴னாரஹேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம்; ந ஏகாஸனே நிஸீதி³தப்³ப³ம், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ம், ந ச²மாயம் நிஸின்னே ஆஸனே நிஸீதி³தப்³ப³ம்; ந ஏகசங்கமே சங்கமிதப்³ப³ம், ந நீசே சங்கமே சங்கமந்தே உச்சே சங்கமே சங்கமிதப்³ப³ம், ந ச²மாயம் சங்கமந்தே சங்கமே சங்கமிதப்³ப³ம்.

[மஹாவ. 393] ‘‘மானத்தாரஹசதுத்தோ² சே, பி⁴க்க²வே, பரிவாஸம் த³தே³ய்ய, மூலாய படிகஸ்ஸேய்ய, மானத்தம் த³தே³ய்ய, தம்வீஸோ அப்³பே⁴ய்ய, அகம்மம், ந ச கரணீய’’ந்தி.

மானத்தாரஹவத்தம் நிட்டி²தம்.