7. பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மம்

65. [இத³ம் வத்து² பாசி. 417; ம. நி. 234 ஆத³யோ] தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அரிட்ட²ஸ்ஸ நாம பி⁴க்கு²னோ க³த்³த⁴பா³தி⁴புப்³ப³ஸ்ஸ [க³ந்த⁴பா³தி⁴புப்³ப³ஸ்ஸ (க.)] ஏவரூபம் பாபகம் தி³ட்டி²க³தம் உப்பன்னம் ஹோதி – ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயா’’தி. அஸ்ஸோஸும் கோ² ஸம்ப³ஹுலா பி⁴க்கூ² அரிட்ட²ஸ்ஸ நாம கிர பி⁴க்கு²னோ க³த்³த⁴பா³தி⁴புப்³ப³ஸ்ஸ ஏவரூபம் பாபகம் தி³ட்டி²க³தம் உப்பன்னம் – ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயா’’தி. அத² கோ² தே பி⁴க்கூ² யேன அரிட்டோ² பி⁴க்கு² க³த்³த⁴பா³தி⁴புப்³போ³ தேனுபஸங்கமிம்ஸு. உபஸங்கமித்வா அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் ஏதத³வோசும் – ‘‘ஸச்சம் கிர தே, ஆவுஸோ அரிட்ட², ஏவரூபம் பாபகம் தி³ட்டி²க³தம் உப்பன்னம் – ததா²ஹம் ப⁴க³வதா த⁴ம்மம் தே³ஸிதம் ஆஜானாமி யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயா’’தி? ‘‘ஏவம்ப்³யா கோ² அஹம், ஆவுஸோ, ப⁴க³வதா த⁴ம்மம் தே³ஸிதம் ஆஜானாமி, யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயா’’தி.

‘‘மாவுஸோ அரிட்ட², ஏவம் அவச. மா ப⁴க³வந்தம் அப்³பா⁴சிக்கி². ந ஹி ஸாது⁴ ப⁴க³வதோ அப்³ப⁴க்கா²னம் [அப்³பா⁴சிக்க²னம் (க.)]. ந ஹி ப⁴க³வா ஏவம் வதே³ய்ய. அனேகபரியாயேனாவுஸோ அரிட்ட², அந்தராயிகா த⁴ம்மா அந்தராயிகா வுத்தா ப⁴க³வதா. அலஞ்ச பன தே படிஸேவதோ அந்தராயாய. அப்பஸ்ஸாதா³ காமா வுத்தா ப⁴க³வதா, ப³ஹுது³க்கா² ப³ஹுபாயாஸா [ப³ஹூபாயாஸா (ஸீ. ஸ்யா.)], ஆதீ³னவோ ஏத்த² பி⁴ய்யோ. அட்டி²கங்கலூபமா காமா வுத்தா ப⁴க³வதா, ப³ஹுது³க்கா² ப³ஹூபாயாஸா, ஆதீ³னவோ ஏத்த² பி⁴ய்யோ. மம்ஸபேஸூபமா காமா வுத்தா ப⁴க³வதா…பே… திணுக்கூபமா காமா வுத்தா ப⁴க³வதா…பே… அங்கா³ரகாஸூபமா காமா வுத்தா ப⁴க³வதா… ஸுபினகூபமா காமா வுத்தா ப⁴க³வதா… யாசிதகூபமா காமா வுத்தா ப⁴க³வதா… ருக்க²ப²லூபமா காமா வுத்தா ப⁴க³வதா… அஸிஸூனூபமா காமா வுத்தா ப⁴க³வதா… ஸத்திஸூலூபமா காமா வுத்தா ப⁴க³வதா… ஸப்பஸிரூபமா காமா வுத்தா ப⁴க³வதா, ப³ஹுது³க்கா² ப³ஹூபாயாஸா, ஆதீ³னவோ ஏத்த² பி⁴ய்யோ’’தி.

ஏவம்பி கோ² அரிட்டோ² பி⁴க்கு² க³த்³த⁴பா³தி⁴புப்³போ³ தேஹி பி⁴க்கூ²ஹி வுச்சமானோ ததே²வ தம் பாபகம் தி³ட்டி²க³தம் தா²மஸா பராமாஸா அபி⁴னிவிஸ்ஸ வோஹரதி – ‘‘ஏவம்ப்³யா கோ² அஹம், ஆவுஸோ, ப⁴க³வதா த⁴ம்மம் தே³ஸிதம் ஆஜானாமி, யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயா’’தி. யதோ ச கோ² தே பி⁴க்கூ² நாஸக்கி²ம்ஸு அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் ஏதஸ்மா பாபகா தி³ட்டி²க³தா விவேசேதும், அத² கோ² தே பி⁴க்கூ² யேன ப⁴க³வா தேனுபஸங்கமிம்ஸு, உபஸங்கமித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் படிபுச்சி² – ‘‘ஸச்சம் கிர தே, அரிட்ட², ஏவரூபம் பாபகம் தி³ட்டி²க³தம் உப்பன்னம் – ததா²ஹம் ப⁴க³வதா த⁴ம்மம் தே³ஸிதம் ஆஜானாமி யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயா’’தி? ‘‘ஏவம்ப்³யா கோ² அஹம், ப⁴ந்தே, ப⁴க³வதா த⁴ம்மம் தே³ஸிதம் ஆஜானாமி, யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயா’’தி.

‘‘கஸ்ஸ நு கோ² நாம த்வம், மோக⁴புரிஸ, மயா ஏவம் த⁴ம்மம் தே³ஸிதம் ஆஜானாஸி? நனு மயா, மோக⁴புரிஸ, அனேகபரியாயேன அந்தராயிகா த⁴ம்மா அந்தராயிகா வுத்தா? அலஞ்ச பன தே படிஸேவதோ அந்தராயாய. அப்பஸ்ஸாதா³ காமா வுத்தா மயா, ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அட்டி²கங்கலூபமா காமா வுத்தா மயா, ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. மம்ஸபேஸூபமா காமா வுத்தா மயா…பே… திணுக்கூபமா காமா வுத்தா மயா… அங்கா³ரகாஸூபமா காமா வுத்தா மயா… ஸுபினகூபமா காமா வுத்தா மயா…பே… யாசிதகூபமா காமா வுத்தா மயா… ருக்க²ப²லூபமா காமா வுத்தா மயா… அஸிஸூனூபமா காமா வுத்தா மயா… ஸத்திஸூலூபமா காமா வுத்தா மயா… ஸப்பஸிரூபமா காமா வுத்தா மயா, ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அத² ச பன த்வம், மோக⁴புரிஸ, அத்தனா து³க்³க³ஹிதேன [து³க்³க³ஹிதேன தி³ட்டி²க³தேன (ஸ்யா.)] அம்ஹே சேவ அப்³பா⁴சிக்க²ஸி, அத்தானஞ்ச க²ணஸி, ப³ஹுஞ்ச அபுஞ்ஞம் பஸவஸி. தஞ்ஹி தே, மோக⁴புரிஸ, ப⁴விஸ்ஸதி தீ³க⁴ரத்தம் அஹிதாய து³க்கா²ய. நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – தேன ஹி, பி⁴க்க²வே, ஸங்கோ⁴ அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரோது – அஸம்போ⁴க³ம் ஸங்கே⁴ன. ஏவஞ்ச பன பி⁴க்க²வே காதப்³ப³ம் – பட²மம் அரிட்டோ² பி⁴க்கு² சோதே³தப்³போ³, சோதே³த்வா ஸாரேதப்³போ³, ஸாரேத்வா ஆபத்திம் ஆரோபேதப்³போ³, ஆபத்திம் ஆரோபேத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

66. ‘‘ஸுணாது மே, ப⁴ந்தே, ஸங்கோ⁴. அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ ஏவரூபம் பாபகம் தி³ட்டி²க³தம் உப்பன்னம் – ததா²ஹம் ப⁴க³வதா த⁴ம்மம் தே³ஸிதம் ஆஜானாமி யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயாதி. ஸோ தம் தி³ட்டி²ம் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லம், ஸங்கோ⁴ அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய – அஸம்போ⁴க³ம் ஸங்கே⁴ன. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ ஏவரூபம் பாபகம் தி³ட்டி²க³தம் உப்பன்னம் – ததா²ஹம் ப⁴க³வதா த⁴ம்மம் தே³ஸிதம் ஆஜானாமி யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயாதி. ஸோ தம் தி³ட்டி²ம் ந படினிஸ்ஸஜ்ஜதி. ஸங்கோ⁴ அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரோதி – அஸம்போ⁴க³ம் ஸங்கே⁴ன. யஸ்ஸாயஸ்மதோ க²மதி அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயஸ்ஸ கம்மஸ்ஸ கரணம் – அஸம்போ⁴க³ம் ஸங்கே⁴ன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ ஏவரூபம் பாபகம் தி³ட்டி²க³தம் உப்பன்னம் – ததா²ஹம் ப⁴க³வதா த⁴ம்மம் தே³ஸிதம் ஆஜானாமி யதா² யேமே அந்தராயிகா த⁴ம்மா வுத்தா ப⁴க³வதா தே படிஸேவதோ நாலம் அந்தராயாயாதி. ஸோ தம் தி³ட்டி²ம் ந படினிஸ்ஸஜ்ஜதி. ஸங்கோ⁴ அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரோதி – அஸம்போ⁴க³ம் ஸங்கே⁴ன. யஸ்ஸாயஸ்மதோ க²மதி அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயஸ்ஸ கம்மஸ்ஸ கரணம் – அஸம்போ⁴க³ம் ஸங்கே⁴ன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘கதம் ஸங்கே⁴ன அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் – அஸம்போ⁴க³ம் ஸங்கே⁴ன. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீதி.

‘‘ஆவாஸபரம்பரஞ்ச, பி⁴க்க²வே, ஸம்ஸத² – ‘அரிட்டோ² பி⁴க்கு² க³த்³த⁴பா³தி⁴புப்³போ³, ஸங்கே⁴ன பாபிகாய [க³த்³த⁴பா³தி⁴புப்³போ³ பாபிகாய (ஸீ. க.)] தி³ட்டி²யா அப்படினிஸ்ஸக்³கே³, உக்கே²பனீயகம்மகதோ – அஸம்போ⁴க³ம் ஸங்கே⁴னா’’’தி.

அத⁴ம்மகம்மத்³வாத³ஸகம்

67. ‘‘தீஹி, பி⁴க்க²வே, அங்கே³ஹி ஸமன்னாக³தம், பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச. அஸம்முகா² கதம் ஹோதி, அப்படிபுச்சா² கதம் ஹோதி, அப்படிஞ்ஞாய கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம், பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தம், பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச. அனாபத்தியா கதம் ஹோதி, அதே³ஸனாகா³மினியா ஆபத்தியா கதம் ஹோதி, தே³ஸிதாய ஆபத்தியா கதம் ஹோதி…பே… அசோதே³த்வா கதம் ஹோதி, அஸாரேத்வா கதம் ஹோதி, ஆபத்திம் அனாரோபேத்வா கதம் ஹோதி…பே… அஸம்முகா² கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அப்படிபுச்சா² கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அப்படிஞ்ஞாய கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அனாபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அதே³ஸனாகா³மினியா ஆபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… தே³ஸிதாய ஆபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அசோதே³த்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அஸாரேத்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… ஆபத்திம் அனாரோபேத்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம், பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச.

பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மே

அத⁴ம்மகம்மத்³வாத³ஸகம் நிட்டி²தம்.

த⁴ம்மகம்மத்³வாத³ஸகம்

68. ‘‘தீஹி, பி⁴க்க²வே, அங்கே³ஹி ஸமன்னாக³தம், பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச. ஸம்முகா² கதம் ஹோதி, படிபுச்சா² கதம் ஹோதி, படிஞ்ஞாய கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம், பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தம், பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச. ஆபத்தியா கதம் ஹோதி, தே³ஸனாகா³மினியா ஆபத்தியா கதம் ஹோதி, அதே³ஸிதாய ஆபத்தியா கதம் ஹோதி…பே… சோதே³த்வா கதம் ஹோதி, ஸாரேத்வா கதம் ஹோதி, ஆபத்திம் ஆரோபேத்வா கதம் ஹோதி…பே… ஸம்முகா² கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… படிபுச்சா² கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… படிஞ்ஞாய கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… தே³ஸனாகா³மினியா ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… அதே³ஸிதாய ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… சோதே³த்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஸாரேத்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஆபத்திம் ஆரோபேத்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம், பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச.

பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மே

த⁴ம்மகம்மத்³வாத³ஸகம் நிட்டி²தம்.

ஆகங்க²மானச²க்கம்

69. [பரி. 323] ‘‘தீஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய. ப⁴ண்ட³னகாரகோ ஹோதி கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ; பா³லோ ஹோதி அப்³யத்தோ ஆபத்திப³ஹுலோ அனபதா³னோ; கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி – இமேஹி கோ², பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய. அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய. பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி – இமேஹி கோ², பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய.

‘‘திண்ணம், பி⁴க்க²வே, பி⁴க்கூ²னம், ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய. ஏகோ ப⁴ண்ட³னகாரகோ ஹோதி கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ; ஏகோ பா³லோ ஹோதி அப்³யத்தோ ஆபத்திப³ஹுலோ அனபதா³னோ; ஏகோ கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி – இமேஸம் கோ², பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய.

‘‘அபரேஸம்பி, பி⁴க்க²வே, திண்ணம் பி⁴க்கூ²னம், ஆகங்கமானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய. ஏகோ அதி⁴ஸீலே ஸீலவிபன்னோ ஹோதி, ஏகோ அஜ்ஜா²சாரே ஆசாரவிபன்னோ ஹோதி, ஏகோ அதிதி³ட்டி²யா தி³ட்டி²விபன்னோ ஹோதி – இமேஸம் கோ², பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய.

‘‘அபரேஸம்பி, பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கரேய்ய. ஏகோ பு³த்³த⁴ஸ்ஸ அவண்ணம் பா⁴ஸதி, ஏகோ த⁴ம்மஸ்ஸ அவண்ணம் பா⁴ஸதி, ஏகோ ஸங்க⁴ஸ்ஸ அவண்ணம் பா⁴ஸதி – இமேஸம் கோ², பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, பாபிகாய தி³ட்டி²யா அப்படினிஸ்ஸகே³, உக்கே²பனீயகம்மம் கரேய்ய.

பாபிகாய தி³ட்டி²யா அப்படினிஸ்ஸகே³ உக்கே²பனீயகம்மே

ஆகங்க²மானச²க்கம் நிட்டி²தம்.

தேசத்தாலீஸவத்தம்

70. ‘‘பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மகதேன, பி⁴க்க²வே, பி⁴க்கு²னா ஸம்மா வத்திதப்³ப³ம். தத்ராயம் ஸம்மாவத்தனா – ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³. யாய ஆபத்தியா ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கதம் ஹோதி ஸா ஆபத்தி ந ஆபஜ்ஜிதப்³பா³, அஞ்ஞா வா தாதி³ஸிகா, ததோ வா பாபிட்ட²தரா; கம்மம் ந க³ரஹிதப்³ப³ம், கம்மிகா ந க³ரஹிதப்³பா³…பே… ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயம் காதப்³ப³ம், ந அனுவாதோ³ பட்ட²பேதப்³போ³, ந ஓகாஸோ காரேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³’’ந்தி.

பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மே

தேசத்தாலீஸவத்தம் நிட்டி²தம்.

71. அத² கோ² ஸங்கோ⁴ அரிட்ட²ஸ்ஸ பி⁴க்கு²னோ க³த்³த⁴பா³தி⁴புப்³ப³ஸ்ஸ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் அகாஸி – அஸம்போ⁴க³ம் ஸங்கே⁴ன. ஸோ ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதோ விப்³ப⁴மி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அரிட்டோ² பி⁴க்கு² க³த்³த⁴பா³தி⁴புப்³போ³ ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதோ விப்³ப⁴மிஸ்ஸதீ’’தி? அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, அரிட்டோ² பி⁴க்கு² க³த்³த⁴பா³தி⁴புப்³போ³ ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதோ விப்³ப⁴மதீ’’தி [விப்³ப⁴மீதி (ஸீ. க.)]? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம்…பே… கத²ஞ்ஹி நாம ஸோ, பி⁴க்க²வே, மோக⁴புரிஸோ ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதோ விப்³ப⁴மிஸ்ஸதி? நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, ஸங்கோ⁴, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴து.

நப்படிப்பஸ்ஸம்பே⁴தப்³ப³தேசத்தாலீஸகம்

72. ‘‘பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் நப்படிப்பஸ்ஸம்பே⁴தப்³ப³ம். உபஸம்பாதே³தி, நிஸ்ஸயம் தே³தி, ஸாமணேரம் உபட்டா²பேதி, பி⁴க்கு²னோவாத³கஸம்முதிம் ஸாதி³யதி, ஸம்மதோபி பி⁴க்கு²னியோ ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸகே³, உக்கே²பனீயகம்மம் நப்படிப்பஸ்ஸம்பே⁴தப்³ப³ம்.

[பரி. 420] ‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் நப்படிப்பஸ்ஸம்பே⁴தப்³ப³ம். யாய ஆபத்தியா ஸங்கே⁴ன பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மம் கதம் ஹோதி தம் ஆபத்திம் ஆபஜ்ஜதி, அஞ்ஞம் வா தாதி³ஸிகம், ததோ வா பாபிட்ட²தரம்; கம்மம் க³ரஹதி, கம்மிகே க³ரஹதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் நப்படிப்பஸ்ஸம்பே⁴தப்³ப³ம்…பே….

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் நப்படிப்பஸ்ஸம்பே⁴தப்³ப³ம். பகதத்தஸ்ஸ பி⁴க்கு²னோ உபோஸத²ம் ட²பேதி, பவாரணம் ட²பேதி, ஸவசனீயம் கரோதி, அனுவாத³ம் பட்ட²பேதி, ஓகாஸம் காரேதி, சோதே³தி, ஸாரேதி, பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் நப்படிப்பஸ்ஸம்பே⁴தப்³ப³ம்.

பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மே

நப்படிப்பஸ்ஸம்பே⁴தப்³ப³தேசத்தாலீஸகம் நிட்டி²தம்.

படிப்பஸ்ஸம்பே⁴தப்³ப³தேசத்தாலீஸகம்

73. ‘‘பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴தப்³ப³ம். ந உபஸம்பாதே³தி, ந நிஸ்ஸயம் தே³தி, ந ஸாமணேரம் உபட்டா²பேதி, ந பி⁴க்கு²னோவாத³கஸம்முதிம் ஸாதி³யதி, ஸம்மதோபி பி⁴க்கு²னியோ ந ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴தப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴தப்³ப³ம். யாய ஆபத்தியா ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் கதம் ஹோதி தம் ஆபத்திம் ந ஆபஜ்ஜதி, அஞ்ஞம் வா தாதி³ஸிகம், ததோ வா பாபிட்ட²தரம்; கம்மம் ந க³ரஹதி, கம்மிகே ந க³ரஹதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴தப்³ப³ம்…பே….

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴தப்³ப³ம். ந பகதத்தஸ்ஸ பி⁴க்கு²னோ உபோஸத²ம் ட²பேதி, ந பவாரணம் ட²பேதி, ந ஸவசனீயம் கரோதி, ந அனுவாத³ம் பட்ட²பேதி, ந ஓகாஸம் காரேதி, ந சோதே³தி, ந ஸாரேதி, ந பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴தப்³ப³ம்’’.

பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மே

படிப்பஸ்ஸம்பே⁴தப்³ப³தேசத்தாலீஸகம் நிட்டி²தம்.

74. ‘‘ஏவஞ்ச பன, பி⁴க்க²வே, படிப்பஸ்ஸம்பே⁴தப்³ப³ம். தேன, பி⁴க்க²வே, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ப⁴ந்தே, ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதோ ஸம்மா வத்தாமி, லோமம் பாதேமி, நேத்தா²ரம் வத்தாமி, பாபிகாய தி³ட்டி²யா அப்படினிஸ்ஸக்³கே³, உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ம் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, பாபிகாய தி³ட்டி²யா அப்படினிஸ்ஸக்³கே³, உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, பாபிகாய தி³ட்டி²யா அப்படினிஸ்ஸக்³கே³, உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸங்கே⁴ன, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, பாபிகாய தி³ட்டி²யா அப்படினிஸ்ஸக்³கே³ உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம் படிப்பஸ்ஸம்பே⁴தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘படிப்பஸ்ஸத்³த⁴ம் ஸங்கே⁴ன இத்த²ன்னாமஸ்ஸ பி⁴க்கு²னோ, பாபிகாய தி³ட்டி²யா அப்படினிஸ்ஸக்³கே³, உக்கே²பனீயகம்மம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மம் நிட்டி²தம் ஸத்தமம்.

கம்மக்க²ந்த⁴கோ பட²மோ.

இமம்ஹி க²ந்த⁴கே வத்தூ² ஸத்த.

தஸ்ஸுத்³தா³னம் –

பண்டு³லோஹிதகா பி⁴க்கூ², ஸயம் ப⁴ண்ட³னகாரகா;

தாதி³ஸே உபஸங்கம்ம, உஸ்ஸஹிம்ஸு ச ப⁴ண்ட³னே.

அனுப்பன்னாபி ஜாயந்தி [அனுப்பன்னானி ஜாயந்தி (ஸீ. ஸ்யா.)], உப்பன்னானிபி வட்³ட⁴ரே [உப்பன்னானி பவட்³ட⁴ரே (ஸீ.), உப்பன்னாபி பவட்³ட⁴ந்தி (க.)];

அப்பிச்சா² பேஸலா பி⁴க்கூ², உஜ்ஜா²யந்தி பத³ஸ்ஸதோ [பரீஸதோ (ஸ்யா.), பரஸ்ஸதோ (ஸீ.)].

ஸத்³த⁴ம்மட்டி²திகோ பு³த்³தோ⁴, ஸயம்பூ⁴ அக்³க³புக்³க³லோ;

ஆணாபேஸி தஜ்ஜனீயகம்மம் ஸாவத்தி²யம் ஜினோ.

அஸம்முகா²ப்படிபுச்சா²ப்படிஞ்ஞாய கதஞ்ச யம்;

அனாபத்தி அதே³ஸனே, தே³ஸிதாய கதஞ்ச யம்.

அசோதே³த்வா அஸாரேத்வா, அனாரோபேத்வா ச யம் கதம்;

அஸம்முகா² அத⁴ம்மேன, வக்³கே³ன சாபி [வக்³கே³னாபி ச (ஸீ. ஸ்யா.)] யம் கதம்.

அப்படிபுச்சா² அத⁴ம்மேன, புன வக்³கே³ன [வக்³கே³னாபி ச (ஸீ. ஸ்யா.)] யம் கதம்;

அப்படிஞ்ஞாய அத⁴ம்மேன, வக்³கே³ன சாபி [வக்³கே³னாபி ச (ஸீ. ஸ்யா.)] யம் கதம்.

அனாபத்தி [அனாபத்தியா (ஸீ. ஸ்யா.)] அத⁴ம்மேன, வக்³கே³ன

சாபி [வக்³கே³னாபி ச (ஸீ. ஸ்யா.)] யம் கதம்.

அதே³ஸனாகா³மினியா, அத⁴ம்மவக்³க³மேவ ச.

தே³ஸிதாய அத⁴ம்மேன, வக்³கே³னாபி ததே²வ ச;

அசோதே³த்வா அத⁴ம்மேன, வக்³கே³னாபி ததே²வ ச.

அஸாரேத்வா அத⁴ம்மேன, வக்³கே³னாபி ததே²வ ச;

அனாரோபேத்வா அத⁴ம்மேன, வக்³கே³னாபி ததே²வ ச.

கண்ஹவாரனயேனேவ, ஸுக்கவாரம் விஜானியா;

ஸங்கோ⁴ ஆகங்க²மானோ ச யஸ்ஸ தஜ்ஜனியம் கரே.

ப⁴ண்ட³னம் பா³லோ ஸம்ஸட்டோ², அதி⁴ஸீலே அஜ்ஜா²சாரே;

அதிதி³ட்டி²விபன்னஸ்ஸ, ஸங்கோ⁴ தஜ்ஜனியம் கரே.

பு³த்³த⁴த⁴ம்மஸ்ஸ ஸங்க⁴ஸ்ஸ, அவண்ணம் யோ ச பா⁴ஸதி;

திண்ணன்னம்பி ச பி⁴க்கூ²னம், ஸங்கோ⁴ தஜ்ஜனியம் கரே.

ப⁴ண்ட³னம் காரகோ ஏகோ, பா³லோ ஸம்ஸக்³க³னிஸ்ஸிதோ;

அதி⁴ஸீலே அஜ்ஜா²சாரே, ததே²வ அதிதி³ட்டி²யா.

பு³த்³த⁴த⁴ம்மஸ்ஸ ஸங்க⁴ஸ்ஸ, அவண்ணம் யோ ச பா⁴ஸதி;

தஜ்ஜனீயகம்மகதோ, ஏவம் ஸம்மானுவத்தனா.

உபஸம்பத³னிஸ்ஸயா, ஸாமணேரம் உபட்ட²னா;

ஓவாத³ஸம்மதேனாபி, ந கரே தஜ்ஜனீகதோ.

நாபஜ்ஜே தஞ்ச ஆபத்திம், தாதி³ஸஞ்ச ததோ பரம்;

கம்மஞ்ச கம்மிகே சாபி, ந க³ரஹே ததா²விதோ⁴.

உபோஸத²ம் பவாரணம், பகதத்தஸ்ஸ நட்ட²பே;

ஸவசனிம் [ந ஸவசனியம் (ஸீ. ஸ்யா.)] அனுவாதோ³, ஓகாஸோ சோத³னேன ச.

ஸாரணம் ஸம்பயோக³ஞ்ச, ந கரேய்ய ததா²விதோ⁴;

உபஸம்பத³னிஸ்ஸயா, ஸாமணேரம் உபட்ட²னா.

ஓவாத³ஸம்மதேனாபி, பஞ்சஹங்கே³ஹி [பஞ்சஅங்கோ³ (க.)] ந ஸம்மதி;

தஞ்சாபஜ்ஜதி ஆபத்திம், தாதி³ஸஞ்ச ததோ பரம்.

கம்மஞ்ச கம்மிகே சாபி, க³ரஹந்தோ ந ஸம்மதி;

உபோஸத²ம் பவாரணம், ஸவசனீயா ச நோவாதோ³.

ஓகாஸோ சோத³னஞ்சேவ, ஸாரணா ஸம்பயோஜனா;

இமேஹட்ட²ங்கே³ஹி யோ யுத்தோ, தஜ்ஜனானுபஸம்மதி.

கண்ஹவாரனயேனேவ, ஸுக்கவாரம் விஜானியா;

பா³லோ ஆபத்திப³ஹுலோ, ஸம்ஸட்டோ²பி ச ஸேய்யஸோ.

நியஸ்ஸகம்மம் ஸம்பு³த்³தோ⁴, ஆணாபேஸி மஹாமுனி;

கீடாகி³ரிஸ்மிம் த்³வே பி⁴க்கூ², அஸ்ஸஜிபுனப்³ப³ஸுகா.

அனாசாரஞ்ச விவித⁴ம், ஆசரிம்ஸு அஸஞ்ஞதா;

பப்³பா³ஜனீயம் ஸம்பு³த்³தோ⁴, கம்மம் ஸாவத்தி²யம் ஜினோ;

மச்சி²காஸண்டே³ ஸுத⁴ம்மோ, சித்தஸ்ஸாவாஸிகோ அஹு.

ஜாதிவாதே³ன கு²ம்ஸேதி, ஸுத⁴ம்மோ சித்துபாஸகம்;

படிஸாரணீயகம்மம், ஆணாபேஸி ததா²க³தோ.

கோஸம்பி³யம் ச²ன்னம் பி⁴க்கு²ம், நிச்ச²ந்தாபத்திம் பஸ்ஸிதும்;

அத³ஸ்ஸனே உக்கி²பிதும், ஆணாபேஸி ஜினுத்தமோ.

ச²ன்னோ தம்யேவ ஆபத்திம், படிகாதும் ந இச்ச²தி;

உக்கே²பனாப்படிகம்மே, ஆணாபேஸி வினாயகோ.

பாபதி³ட்டி² அரிட்ட²ஸ்ஸ, ஆஸி அஞ்ஞாணனிஸ்ஸிதா;

தி³ட்டி²யாப்படினிஸ்ஸக்³கே³ [தி³ட்டி²அப்படினிஸ்ஸக்³கே³ (க.)], உக்கே²பம் ஜினபா⁴ஸிதம்.

நியஸ்ஸகம்மம் பப்³ப³ஜ்ஜம் [பப்³பா³ஜம் (க.)], ததே²வ படிஸாரணீ;

அத³ஸ்ஸனாப்படிகம்மே, அனிஸ்ஸக்³கே³ ச தி³ட்டி²யா.

த³வானாசாரூபகா⁴தி, மிச்சா²ஆஜீவமேவ ச;

பப்³பா³ஜனீயகம்மம்ஹி, அதிரேகபதா³ இமே.

அலாபா⁴வண்ணா த்³வே பஞ்ச, த்³வே பஞ்சகாதி நாமகா [த்³வே பஞ்சகோதி நாமகோ (க.)];

படிஸாரணீயகம்மம்ஹி, அதிரேகபதா³ இமே.

தஜ்ஜனீயம் நியஸ்ஸஞ்ச, து³வே கம்மாபி ஸாதி³ஸா [கம்மேஸு ஸதி³ஸம் (க.)];

பப்³ப³ஜ்ஜா [பப்³பா³ஜா (க.)] படிஸாரீ ச, அத்தி² பதா³திரித்ததா.

தயோ உக்கே²பனா கம்மா, ஸதி³ஸா தே விப⁴த்திதோ;

தஜ்ஜனீயனயேனாபி, ஸேஸகம்மம் விஜானியாதி.

கம்மக்க²ந்த⁴கம் நிட்டி²தம்.