6. ஆபத்தியா அப்படிகம்மே உக்கே²பனீயகம்மம்

56. தேன ஸமயேன பு³த்³தோ⁴ ப⁴க³வா கோஸம்பி³யம் விஹரதி கோ⁴ஸிதாராமே. தேன கோ² பன ஸமயேன ஆயஸ்மா ச²ன்னோ ஆபத்திம் ஆபஜ்ஜித்வா ந இச்ச²தி ஆபத்திம் படிகாதும். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா ச²ன்னோ ஆபத்திம் ஆபஜ்ஜித்வா ந இச்சி²ஸ்ஸதி ஆபத்திம் படிகாது’’ந்தி? அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, ச²ன்னோ பி⁴க்கு² ஆபத்திம் ஆபஜ்ஜித்வா ந இச்ச²தி ஆபத்திம் படிகாது’’ந்தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம்…பே… கத²ஞ்ஹி நாம ஸோ, பி⁴க்க²வே, மோக⁴புரிஸோ ஆபத்திம் ஆபஜ்ஜித்வா ந இச்சி²ஸ்ஸதி ஆபத்திம் படிகாதும். நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – தேன ஹி, பி⁴க்க²வே, ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் கரோது – அஸம்போ⁴க³ம் ஸங்கே⁴ன. ஏவஞ்ச பன, பி⁴க்க²வே, காதப்³ப³ம் – பட²மம் ச²ன்னோ பி⁴க்கு² சோதே³தப்³போ³, சோதே³த்வா ஸாரேதப்³போ³, ஸாரேத்வா ஆபத்திம் ஆரோபேதப்³போ³, ஆபத்திம் ஆரோபேத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் ச²ன்னோ பி⁴க்கு² ஆபத்திம் ஆபஜ்ஜித்வா ந இச்ச²தி ஆபத்திம் படிகாதும். யதி³ ஸங்க⁴ஸ்ஸ பத்தகல்லம், ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் கரேய்ய – அஸம்போ⁴க³ம் ஸங்கே⁴ன. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் ச²ன்னோ பி⁴க்கு² ஆபத்திம் ஆபஜ்ஜித்வா ந இச்ச²தி ஆபத்திம் படிகாதும். ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் கரோதி – அஸம்போ⁴க³ம் ஸங்கே⁴ன. யஸ்ஸாயஸ்மதோ க²மதி ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயஸ்ஸ கம்மஸ்ஸ கரணம் – அஸம்போ⁴க³ம் ஸங்கே⁴ன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அயம் ச²ன்னோ பி⁴க்கு² ஆபத்திம் ஆபஜ்ஜித்வா ந இச்ச²தி ஆபத்திம் படிகாதும். ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் கரோதி – அஸம்போ⁴க³ம் ஸங்கே⁴ன. யஸ்ஸாயஸ்மதோ க²மதி ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயஸ்ஸ கம்மஸ்ஸ கரணம் – அஸம்போ⁴க³ம் ஸங்கே⁴ன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘கதம் ஸங்கே⁴ன ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் – அஸம்போ⁴க³ம் ஸங்கே⁴ன. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீதி.

‘‘ஆவாஸபரம்பரஞ்ச, பி⁴க்க²வே, ஸம்ஸத² – ‘ச²ன்னோ பி⁴க்கு², ஸங்கே⁴ன ஆபத்தியா [ச²ன்னோ பி⁴க்கு² ஆபத்தியா (ஸீ. க.)] அப்படிகம்மே, உக்கே²பனீயகம்மகதோ – அஸம்போ⁴க³ம் ஸங்கே⁴னா’தி.

அத⁴ம்மகம்மத்³வாத³ஸகம்

57. ‘‘தீஹி, பி⁴க்க²வே, அங்கே³ஹி ஸமன்னாக³தம், ஆபத்தியா அப்படிகம்மே, உக்கே²பனீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச. அஸம்முகா² கதம் ஹோதி, அப்படிபுச்சா² கதம் ஹோதி, அப்படிஞ்ஞாய கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம், ஆபத்தியா அப்படிகம்மே, உக்கே²பனீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தம், ஆபத்தியா அப்படிகம்மே, உக்கே²பனீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச. அனாபத்தியா கதம் ஹோதி, அதே³ஸனாகா³மினியா ஆபத்தியா கதம் ஹோதி, தே³ஸிதாய ஆபத்தியா கதம் ஹோதி…பே… அசோதே³த்வா கதம் ஹோதி, அஸாரேத்வா கதம் ஹோதி, ஆபத்திம் அனாரோபேத்வா கதம் ஹோதி…பே… அஸம்முகா² கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அப்படிபுச்சா² கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அப்படிஞ்ஞாய கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அனாபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அதே³ஸனாகா³மினியா ஆபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… தே³ஸிதாய ஆபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அசோதே³த்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அஸாரேத்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… ஆபத்திம் அனாரோபேத்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம், ஆபத்தியா அப்படிகம்மே, உக்கே²பனீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச.

ஆபத்தியா அப்படிகம்மே உக்கே²பனீயகம்மே

அத⁴ம்மகம்மத்³வாத³ஸகம் நிட்டி²தம்.

த⁴ம்மகம்மத்³வாத³ஸகம்

58. ‘‘தீஹி, பி⁴க்க²வே, அங்கே³ஹி ஸமன்னாக³தம், ஆபத்தியா அப்படிகம்மே, உக்கே²பனீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச. ஸம்முகா² கதம் ஹோதி, படிபுச்சா² கதம் ஹோதி, படிஞ்ஞாய கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம், ஆபத்தியா அப்படிகம்மே, உக்கே²பனீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தம், ஆபத்தியா அப்படிகம்மே, உக்கே²பனீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச. ஆபத்தியா கதம் ஹோதி, தே³ஸனாகா³மினியா ஆபத்தியா கதம் ஹோதி, அதே³ஸிதாய ஆபத்தியா கதம் ஹோதி…பே… சோதே³த்வா கதம் ஹோதி, ஸாரேத்வா கதம் ஹோதி, ஆபத்திம் ஆரோபேத்வா கதம் ஹோதி…பே… ஸம்முகா² கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… படிபுச்சா² கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… படிஞ்ஞாய கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… தே³ஸனாகா³மினியா ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… அதே³ஸிதாய ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… சோதே³த்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஸாரேத்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஆபத்திம் ஆரோபேத்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம், ஆபத்தியா அப்படிகம்மே, உக்கே²பனீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச.

ஆபத்தியா அப்படிகம்மே உக்கே²பனீயகம்மே

த⁴ம்மகம்மத்³வாத³ஸகம் நிட்டி²தம்.

ஆகங்க²மானச²க்கம்

59. [பரி. 323] ‘‘தீஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய. ப⁴ண்ட³னகாரகோ ஹோதி கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ; பா³லோ ஹோதி அப்³யத்தோ ஆபத்திப³ஹுலோ அனபதா³னோ; கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி – இமேஹி கோ², பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய. அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய. பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி – இமேஹி கோ², பி⁴க்க²வே, தீஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய.

‘‘திண்ணம், பி⁴க்க²வே, பி⁴க்கூ²னம், ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய. ஏகோ ப⁴ண்ட³னகாரகோ ஹோதி கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ; ஏகோ பா³லோ ஹோதி அப்³யத்தோ ஆபத்திப³ஹுலோ அனபதா³னோ; ஏகோ கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி – இமேஸம் கோ², பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய.

‘‘அபரேஸம்பி, பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய. ஏகோ அதி⁴ஸீலே ஸீலவிபன்னோ ஹோதி, ஏகோ அஜ்ஜா²சாரே ஆசாரவிபன்னோ ஹோதி, ஏகோ அதிதி³ட்டி²யா தி³ட்டி²விபன்னோ ஹோதி – இமேஸம் கோ², பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய.

‘‘அபரேஸம்பி, பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய. ஏகோ பு³த்³த⁴ஸ்ஸ அவண்ணம் பா⁴ஸதி, ஏகோ த⁴ம்மஸ்ஸ அவண்ணம் பா⁴ஸதி, ஏகோ ஸங்க⁴ஸ்ஸ அவண்ணம் பா⁴ஸதி – இமேஸம் கோ², பி⁴க்க²வே, திண்ணம் பி⁴க்கூ²னம், ஆகங்க²மானோ ஸங்கோ⁴, ஆபத்தியா அப்படிகம்மே, உக்கே²பனீயகம்மம் கரேய்ய.

ஆபத்தியா அப்படிகம்மே உக்கே²பனீயகம்மே

ஆகங்க²மானச²க்கம் நிட்டி²தம்.

தேசத்தாலீஸவத்தம்

60. ‘‘ஆபத்தியா அப்படிகம்மே உக்கே²பனீயகம்மகதேன, பி⁴க்க²வே, பி⁴க்கு²னா ஸம்மா வத்திதப்³ப³ம். தத்ராயம் ஸம்மாவத்தனா – ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³. யாய ஆபத்தியா ஸங்கே⁴ன, ஆபத்தியா அப்படிகம்மே, உக்கே²பனீயகம்மம் கதம் ஹோதி ஸா ஆபத்தி ந ஆபஜ்ஜிதப்³பா³, அஞ்ஞா வா தாதி³ஸிகா, ததோ வா பாபிட்ட²தரா; கம்மம் ந க³ரஹிதப்³ப³ம், கம்மிகா ந க³ரஹிதப்³பா³. ந பகதத்தஸ்ஸ பி⁴க்கு²னோ அபி⁴வாத³னம், பச்சுட்டா²னம், அஞ்ஜலிகம்மம், ஸாமீசிகம்மம், ஆஸனாபி⁴ஹாரோ, ஸேய்யாபி⁴ஹாரோ, பாதோ³த³கம் பாத³பீட²ம், பாத³கத²லிகம், பத்தசீவரப்படிக்³க³ஹணம், நஹானே பிட்டி²பரிகம்மம் ஸாதி³தப்³ப³ம். ந பகதத்தோ பி⁴க்கு² ஸீலவிபத்தியா அனுத்³த⁴ம்ஸேதப்³போ³, ந ஆசாரவிபத்தியா அனுத்³த⁴ம்ஸேதப்³போ³, ந தி³ட்டி²விபத்தியா அனுத்³த⁴ம்ஸேதப்³போ³, ந ஆஜீவவிபத்தியா அனுத்³த⁴ம்ஸேதப்³போ³, ந பி⁴க்கு² பி⁴க்கூ²ஹி பே⁴தே³தப்³போ³. ந கி³ஹித்³த⁴ஜோ தா⁴ரேதப்³போ³, ந தித்தி²யத்³த⁴ஜோ தா⁴ரேதப்³போ³, ந தித்தி²யா ஸேவிதப்³பா³; பி⁴க்கூ² ஸேவிதப்³பா³, பி⁴க்கு²ஸிக்கா²ய ஸிக்கி²தப்³ப³ம். ந பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம், பகதத்தம் பி⁴க்கு²ம் தி³ஸ்வா ஆஸனா வுட்டா²தப்³ப³ம், ந பகதத்தோ பி⁴க்கு² ஆஸாதே³தப்³போ³ அந்தோ வா ப³ஹி வா. ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயம் காதப்³ப³ம், ந அனுவாதோ³ பட்ட²பேதப்³போ³, ந ஓகாஸோ காரேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³’’ந்தி.

ஆபத்தியா அப்படிகம்மே உக்கே²பனீயகம்மே

தேசத்தாலீஸவத்தம் நிட்டி²தம்.

61. அத² கோ² ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் அகாஸி – அஸம்போ⁴க³ம் ஸங்கே⁴ன. ஸோ ஸங்கே⁴ன, ஆபத்தியா அப்படிகம்மே, உக்கே²பனீயகம்மகதோ தம்ஹா ஆவாஸா அஞ்ஞம் ஆவாஸம் அக³மாஸி. தத்த² பி⁴க்கூ² நேவ அபி⁴வாதே³ஸும், ந பச்சுட்டே²ஸும், ந அஞ்ஜலிகம்மம் ந ஸாமீசிகம்மம் அகம்ஸு, ந ஸக்கரிம்ஸு, ந க³ரும் கரிம்ஸு, ந மானேஸும், ந பூஜேஸும். ஸோ பி⁴க்கூ²ஹி அஸக்கரியமானோ அக³ருகரியமானோ அமானியமானோ அபூஜியமானோ அஸக்காரபகதோ தம்ஹாபி ஆவாஸா அஞ்ஞம் ஆவாஸம் அக³மாஸி. தத்த²பி பி⁴க்கூ² நேவ அபி⁴வாதே³ஸும், ந பச்சுட்டே²ஸும், ந அஞ்ஜலிகம்மம் ந ஸாமீசிகம்மம் அகம்ஸு, ந ஸக்கரிம்ஸு, ந க³ரும் கரிம்ஸு, ந மானேஸும், ந பூஜேஸும். ஸோ பி⁴க்கூ²ஹி அஸக்கரியமானோ அக³ருகரியமானோ அமானியமானோ அபூஜியமானோ அஸக்காரபகதோ தம்ஹாபி ஆவாஸா அஞ்ஞம் ஆவாஸம் அக³மாஸி. தத்த²பி பி⁴க்கூ² நேவ அபி⁴வாதே³ஸும், ந பச்சுட்டே²ஸும், ந அஞ்ஜலிகம்மம் ந ஸாமீசிகம்மம் அகம்ஸு, ந ஸக்கரிம்ஸு, ந க³ரும் கரிம்ஸு, ந மானேஸும், ந பூஜேஸும். ஸோ பி⁴க்கூ²ஹி அஸக்கரியமானோ அக³ருகரியமானோ அமானியமானோ அபூஜியமானோ அஸக்காரபகதோ புனதே³வ கோஸம்பி³ம் பச்சாக³ஞ்சி². ஸோ ஸம்மா வத்ததி, லோமம் பாதேதி, நேத்தா²ரம் வத்ததி, பி⁴க்கூ² உபஸங்கமித்வா ஏவம் வதே³தி – ‘‘அஹம், ஆவுஸோ, ஸங்கே⁴ன, ஆபத்தியா அப்படிகம்மே, உக்கே²பனீயகம்மகதோ ஸம்மா வத்தாமி, லோமம் பாதேமி, நேத்தா²ரம் வத்தாமி. கத²ம் நு கோ² மயா படிபஜ்ஜிதப்³ப³’’ந்தி? பி⁴க்கூ² ப⁴க³வதோ ஏதமத்த²ம் ஆரோசேஸும்…பே…. ‘‘தேன ஹி, பி⁴க்க²வே, ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴து.

நப்படிப்பஸ்ஸம்பே⁴தப்³ப³தேசத்தாலீஸகம்

62. ‘‘பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் நப்படிப்பஸ்ஸம்பே⁴தப்³ப³ம். உபஸம்பாதே³தி, நிஸ்ஸயம் தே³தி, ஸாமணேரம் உபட்டா²பேதி, பி⁴க்கு²னோவாத³கஸம்முதிம் ஸாதி³யதி, ஸம்மதோபி பி⁴க்கு²னியோ ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் நப்படிப்பஸ்ஸம்பே⁴தப்³ப³ம்.

[பரி. 420] ‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் நப்படிப்பஸ்ஸம்பே⁴தப்³ப³ம். யாய ஆபத்தியா ஸங்கே⁴ன, ஆபத்தியா அப்படிகம்மே, உக்கே²பனீயகம்மம் கதம் ஹோதி தம் ஆபத்திம் ஆபஜ்ஜதி, அஞ்ஞம் வா தாதி³ஸிகம், ததோ வா பாபிட்ட²தரம்; கம்மம் க³ரஹதி, கம்மிகே க³ரஹதி…பே… பகதத்தஸ்ஸ பி⁴க்கு²னோ அபி⁴வாத³னம், பச்சுட்டா²னம், அஞ்ஜலிகம்மம், ஸாமீசிகம்மம், ஆஸனாபி⁴ஹாரம் ஸாதி³யதி…பே… பகதத்தஸ்ஸ பி⁴க்கு²னோ ஸேய்யாபி⁴ஹாரம், பாதோ³த³கம் பாத³பீட²ம், பாத³கத²லிகம், பத்தசீவரப்படிக்³க³ஹணம், நஹானே பிட்டி²பரிகம்மம் ஸாதி³யதி…பே… பகதத்தம் பி⁴க்கு²ம் ஸீலவிபத்தியா அனுத்³த⁴ம்ஸேதி, ஆசாரவிபத்தியா அனுத்³த⁴ம்ஸேதி, தி³ட்டி²விபத்தியா அனுத்³த⁴ம்ஸேதி, ஆஜீவவிபத்தியா அனுத்³த⁴ம்ஸேதி, பி⁴க்கு²ம் பி⁴க்கூ²ஹி பே⁴தே³தி…பே… கி³ஹித்³த⁴ஜம் தா⁴ரேதி, தித்தி²யத்³த⁴ஜம் தா⁴ரேதி, தித்தி²யே ஸேவதி, பி⁴க்கூ² ந ஸேவதி, பி⁴க்கு²ஸிக்கா²ய ந ஸிக்க²தி…பே… பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வஸதி, ஏகச்ச²ன்னே அனாவாஸே வஸதி, ஏகச்ச²ன்னே ஆவாஸே வா அனாவாஸே வா வஸதி, பகதத்தம் பி⁴க்கு²ம் தி³ஸ்வா ஆஸனா ந வுட்டா²தி, பகதத்தம் பி⁴க்கு²ம் ஆஸாதே³தி அந்தோ வா ப³ஹி வா – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் நப்படிப்பஸ்ஸம்பே⁴தப்³ப³ம்.

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் நப்படிப்பஸ்ஸம்பே⁴தப்³ப³ம். பகதத்தஸ்ஸ பி⁴க்கு²னோ உபோஸத²ம் ட²பேதி, பவாரணம் ட²பேதி, ஸவசனீயம் கரோதி, அனுவாத³ம் பட்ட²பேதி, ஓகாஸம் காரேதி, சோதே³தி, ஸாரேதி, பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் நப்படிப்பஸ்ஸம்பே⁴தப்³ப³ம்.

ஆபத்தியா அப்படிகம்மே உக்கே²பனீயகம்மே

நப்படிப்பஸ்ஸம்பே⁴தப்³ப³தேசத்தாலீஸகம் நிட்டி²தம்.

படிப்பஸ்ஸம்பே⁴தப்³ப³தேசத்தாலீஸகம்

63. ‘‘பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴தப்³ப³ம். ந உபஸம்பாதே³தி, ந நிஸ்ஸயம் தே³தி, ந ஸாமணேரம் உபட்டா²பேதி, ந பி⁴க்கு²னோவாத³கஸம்முதிம் ஸாதி³யதி, ஸம்மதோபி பி⁴க்கு²னியோ ந ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴தப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴தப்³ப³ம். யாய ஆபத்தியா ஸங்கே⁴ன, ஆபத்தியா அப்படிகம்மே, உக்கே²பனீயகம்மம் கதம் ஹோதி தம் ஆபத்திம் ந ஆபஜ்ஜதி, அஞ்ஞம் வா தாதி³ஸிகம், ததோ வா பாபிட்ட²தரம்; கம்மம் ந க³ரஹதி, கம்மிகே ந க³ரஹதி…பே… ந பகதத்தஸ்ஸ பி⁴க்கு²னோ அபி⁴வாத³னம், பச்சுட்டா²னம், அஞ்ஜலிகம்மம், ஸாமீசிகம்மம், ஆஸனாபி⁴ஹாரம் ஸாதி³யதி…பே… ந பகதத்தஸ்ஸ பி⁴க்கு²னோ ஸேய்யாபி⁴ஹாரம், பாதோ³த³கம் பாத³பீட²ம், பாத³கத²லிகம், பத்தசீவரப்படிக்³க³ஹணம், நஹானே பிட்டி²பரிகம்மம் ஸாதி³யதி…பே… ந பகதத்தம் பி⁴க்கு²ம் ஸீலவிபத்தியா அனுத்³த⁴ம்ஸேதி, ந ஆசாரவிபத்தியா அனுத்³த⁴ம்ஸேதி, ந தி³ட்டி²விபத்தியா அனுத்³த⁴ம்ஸேதி, ந ஆஜீவவிபத்தியா அனுத்³த⁴ம்ஸேதி, ந பி⁴க்கு²ம் பி⁴க்கூ²ஹி பே⁴தே³தி…பே… ந கி³ஹித்³த⁴ஜம் தா⁴ரேதி, ந தித்தி²யத்³த⁴ஜம் தா⁴ரேதி, ந தித்தி²யே ஸேவதி, பி⁴க்கூ² ஸேவதி, பி⁴க்கு²ஸிக்கா²ய ஸிக்க²தி…பே… ந பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வஸதி, ந ஏகச்ச²ன்னே அனாவாஸே வஸதி, ந ஏகச்ச²ன்னே ஆவாஸே வா அனாவாஸே வா வஸதி, பகதத்தம் பி⁴க்கு²ம் தி³ஸ்வா ஆஸனா வுட்டா²தி, ந பகதத்தம் பி⁴க்கு²ம் ஆஸாதே³தி அந்தோ வா ப³ஹி வா – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴தப்³ப³ம்.

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴தப்³ப³ம். ந பகதத்தஸ்ஸ பி⁴க்கு²னோ உபோஸத²ம் ட²பேதி, ந பவாரணம் ட²பேதி, ந ஸவசனீயம் கரோதி, ந அனுவாத³ம் பட்ட²பேதி, ந ஓகாஸம் காரேதி, ந சோதே³தி, ந ஸாரேதி, ந பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴தப்³ப³ம்.

ஆபத்தியா அப்படிகம்மே உக்கே²பனீயகம்மே

படிப்பஸ்ஸம்பே⁴தப்³ப³தேசத்தாலீஸகம் நிட்டி²தம்.

64. ‘‘ஏவஞ்ச பன, பி⁴க்க²வே, படிப்பஸ்ஸம்பே⁴தப்³ப³ம். தேன பி⁴க்க²வே, ச²ன்னேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ப⁴ந்தே, ஸங்கே⁴ன, ஆபத்தியா அப்படிகம்மே, உக்கே²பனீயகம்மகதோ ஸம்மா வத்தாமி, லோமம் பாதேமி, நேத்தா²ரம் வத்தாமி, ஆபத்தியா அப்படிகம்மே உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ம் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் ச²ன்னோ பி⁴க்கு² ஸங்கே⁴ன, ஆபத்தியா அப்படிகம்மே, உக்கே²பனீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, ஆபத்தியா அப்படிகம்மே உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் ச²ன்னோ பி⁴க்கு² ஸங்கே⁴ன, ஆபத்தியா அப்படிகம்மே, உக்கே²பனீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, ஆபத்தியா அப்படிகம்மே உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴தி. யஸ்ஸாயஸ்மதோ க²மதி ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அயம் ச²ன்னோ பி⁴க்கு² ஸங்கே⁴ன, ஆபத்தியா அப்படிகம்மே, உக்கே²பனீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, ஆபத்தியா அப்படிகம்மே, உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம் படிப்பஸ்ஸம்பே⁴தி. யஸ்ஸாயஸ்மதோ க²மதி ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘படிப்பஸ்ஸத்³த⁴ம் ஸங்கே⁴ன ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஆபத்தியா அப்படிகம்மே உக்கே²பனீயகம்மம் நிட்டி²தம் ச²ட்ட²ம்.