9. பரிவத்தனஹாரவிப⁴ங்க³விபா⁴வனா

35. யேன யேன ஸம்வண்ணாவிஸேஸபூ⁴தேன விப⁴த்திஹாரவிப⁴ங்கே³ன ஸுத்தே வுத்தா த⁴ம்மாத³யோ விப⁴த்தா, ஸோ ஸம்வண்ணாவிஸேஸபூ⁴தோ விப⁴ங்கோ³ பரிபுண்ணோ, ‘‘கதமோ பரிவத்தனஹாரவிப⁴ங்கோ³’’தி புச்சி²தப்³ப³த்தா ‘‘தத்த² கதமோ பரிவத்தனோ ஹாரோ’’திஆதி³ வுத்தம். தத்த² தத்தா²தி தேஸு நித்³தி³ட்டே²ஸு ஸோளஸஸு தே³ஸனாஹாராதீ³ஸு கதமோ ஸம்வண்ணனாவிஸேஸோ பரிவத்தனோ ஹாரோ பரிவத்தனஹாரவிப⁴ங்கோ³ நாமாதி புச்ச²தி. ‘‘குஸலாகுஸலே த⁴ம்மே’’திஆதி³னித்³தே³ஸஸ்ஸ இதா³னி மயா வுச்சமானோ ‘‘ஸம்மாதி³ட்டி²ஸ்ஸ புரிஸபுக்³க³லஸ்ஸா’’திஆதி³கோ வித்தா²ரஸம்வண்ணனாவிஸேஸோ பரிவத்தனோ ஹாரோ பரிவத்தனஹாரவிப⁴ங்கோ³ நாமாதி அத்தோ² க³ஹேதப்³போ³.

‘‘ஸம்வண்ணியமானே ஸுத்தே நித்³தி³ட்ட²ஸ்ஸ கதமஸ்ஸ பா⁴விதப்³ப³ஸ்ஸ குஸலஸ்ஸ கதமோ படிபக்கோ², கத²ம் பரிவத்தேதப்³போ³’’தி புச்சி²தப்³ப³த்தா இமஸ்ஸ பா⁴விதப்³ப³ஸ்ஸ குஸலஸ்ஸ அயம் படிபக்கோ², ஏவம் பஹாதப்³ப³பா⁴வவஸேன பரிவத்தேதப்³போ³தி த³ஸ்ஸேந்தோ ‘‘ஸம்மாதி³ட்டி²ஸ்ஸ புரிஸபுக்³க³லஸ்ஸா’’திஆதி³மாஹ. அட்ட²கதா²யம் பன –

‘‘தத்த² யஸ்மா ஸம்வண்ணியமானே ஸுத்தே யதா²னித்³தி³ட்டா²னம் குஸலாகுஸலத⁴ம்மானம் படிபக்க²பூ⁴தே அகுஸலகுஸலத⁴ம்மே பஹாதப்³ப³பா⁴வாதி³வஸேன நித்³தா⁴ரணம் படிபக்க²தோ பரிவத்தனம், தஸ்மா ‘ஸம்மாதி³ட்டி²ஸ்ஸ புரிஸபுக்³க³லஸ்ஸ மிச்சா²தி³ட்டி² நிஜ்ஜிண்ணா ப⁴வதீ’திஆதி³ ஆரத்³த⁴’’ந்தி (நேத்தி. அட்ட². 35) –

வுத்தம். பஹாயகஸ்ஸ ஹி த⁴ம்மஸ்ஸ பஹாதப்³ப³பா⁴வவஸேன நித்³தா⁴ரணம், பஹாதப்³ப³ஸ்ஸ ச த⁴ம்மஸ்ஸ பஹாயகபா⁴வவஸேன நித்³தா⁴ரணம் படிபக்க²தோ பரிவத்தனம் நாம ஹோதி. தத்த² ஸம்மாதி³ட்டி²ஸ்ஸாதி ஸம்மா ஸுந்த³ரா பஸத்தா² தி³ட்டி² யஸ்ஸ புக்³க³லஸ்ஸாதி ஸம்மாதி³ட்டி². புக்³க³லபத³ட்டா²னா ஹி அயம் தே³ஸனா. தேன வுத்தம் ‘‘புரிஸபுக்³க³லஸ்ஸா’’தி. ஸா பன ஸம்மாதி³ட்டி² கம்மகம்மப²லாதி³ஸத்³த³ஹனவஸேன வா அனிச்சாதி³விபஸ்ஸனாவஸேன வா மக்³க³ஸம்மாத³ஸ்ஸனவஸேன வா பவத்தா நிரவஸேஸாவ க³ஹிதா. ‘‘யாய பா⁴விதாய ஸம்மாதி³ட்டி²யா பஹாதப்³பா³ மிச்சா²தி³ட்டி² நிஜ்ஜிண்ணா ப⁴வதி, யதி³ கேவலா மிச்சா²தி³ட்டி²யேவ நிஜ்ஜிண்ணா ப⁴வதி, ஏவம் ஸதி தத³வஸேஸா அகுஸலா த⁴ம்மா அஜிண்ணா

ப⁴வேய்யு’’ந்தி வத்தப்³ப³த்தா ‘‘யே சஸ்ஸ மிச்சா²தி³ட்டி²பச்சயா’’திஆதி³ வுத்தம். மிச்சா²தி³ட்டி²பச்சயா அனேகே பாபகா அகுஸலாயேவ த⁴ம்மா ச உப்பஜ்ஜேய்யும் உப்பஜ்ஜனாரஹா ப⁴வேய்யும், தே ச அகுஸலா த⁴ம்மா அஸ்ஸ ஸம்மாதி³ட்டி²ஸம்பன்னஸ்ஸ புரிஸபுக்³க³லஸ்ஸ நிஜ்ஜிண்ணா பஹாதப்³பா³ரஹா அனுப்பஜ்ஜனஸபா⁴வா ஹோந்தி. தேனாஹ ப⁴க³வா – ‘‘உபாதா³னனிரோதா⁴ ப⁴வனிரோதோ⁴’’தி (உதா³. 2; மஹாவ. 1).

‘‘யதி³ ஸம்மாதி³ட்டி²ஸ்ஸ புரிஸபுக்³க³லஸ்ஸ மிச்சா²தி³ட்டி², தப்பச்சயா அகுஸலத⁴ம்மாயேவ நிஜ்ஜிண்ணா ப⁴வந்தி, ஏவம் ஸதி ஸம்மாதி³ட்டி²பச்சயா குஸலா த⁴ம்மா ந ஸம்ப⁴வேய்யு’’ந்தி வத்தப்³ப³த்தா ‘‘ஸம்மாதி³ட்டி²பச்சயா சா’’திஆதி³ வுத்தம். அஸ்ஸ ஸம்மாதி³ட்டி²ஸம்பன்னஸ்ஸ புரிஸபுக்³க³லஸ்ஸ உப்பஜ்ஜனாரஹா ஸம்மாதி³ட்டி²பச்சயா அனேகே குஸலா ஸமத²விபஸ்ஸனா வா போ³தி⁴பக்கி²யா வா த⁴ம்மா ஸம்ப⁴வந்தி, உப்பன்னா ச தே த⁴ம்மா அஸ்ஸ ஸம்மாதி³ட்டி²ஸம்பன்னஸ்ஸ புரிஸபுக்³க³லஸ்ஸ ஸந்தானே புனப்புனம் பவத்தனவஸேன பா⁴வனாபாரிபூரிம் க³ச்ச²ந்தி.

ஸம்மாதி³ட்டி²யா படிபக்கா²னம் மிச்சா²தி³ட்டி²யா, தப்பச்சயானம் அகுஸலானம் த⁴ம்மானம் பரிவத்தனபா⁴வோ ஆசரியேன விப⁴த்தோ, அம்ஹேஹி ச ஞாதோ, ‘‘ஸம்மாஸங்கப்பஸ்ஸ த⁴ம்மஸ்ஸ படிபக்கோ² த⁴ம்மோ கத²ம் பரிவத்தேதப்³போ³’’தி வத்தப்³ப³த்தா ‘‘ஸம்மாஸங்கப்பஸ்ஸ புரிஸபுக்³க³லஸ்ஸா’’திஆதி³ வுத்தம். யோஜனத்த² ஆத³யோ வுத்தனயானுஸாரேன வேதி³தப்³பா³. ஸம்மா ஸுந்த³ரா பஸத்தா² வாசா யஸ்ஸ புக்³க³லஸ்ஸாதி ஸம்மாவாசோ, தஸ்ஸ ஸம்மாவாசஸ்ஸ. ‘‘புரிஸபுக்³க³லஸ்ஸா’’திஆதீ³னம் அத்தோ²பி வுத்தனயேன வேதி³தப்³போ³. அயம் பன விஸேஸத்தோ²ஸம்மா அவிபரீததோ விமுத்திஞாணத³ஸ்ஸனம் யஸ்ஸ புக்³க³லஸ்ஸாதி ஸம்மாவிமுத்திஞாணத³ஸ்ஸனோ, தஸ்ஸ ஸம்மாவிமுத்திஞாணத³ஸ்ஸனஸ்ஸ பச்சவேக்க²ணஞாணத³ஸ்ஸனஸம்பன்னஸ்ஸ புரிஸபுக்³க³லஸ்ஸ ‘‘அவிமுத்தாவ ஸமானா விமுத்தா மய’’ந்தி மிச்சா²பி⁴னிவேஸவஸேன பவத்தம் மிச்சா²விமுத்திஞாணத³ஸ்ஸனம் நிஜ்ஜிண்ணம் விக³தம் ப⁴வதி. ‘‘யே சஸ்ஸா’’திஆதீ³னம் அனுஸந்த்⁴யாதி³கோ வுத்தனயானுஸாரேன வேதி³தப்³போ³.

36. ‘‘ஸம்மாதி³ட்டி²ஸ்ஸாதிஆதி³னா ஸம்மாதி³ட்டி²ஆதீ³னம் குஸலானம் படிபக்கா² மிச்சா²தி³ட்டா²தி³காயேவ அகுஸலா பஹாதப்³ப³பா⁴வேன பரிவத்தேதப்³பா³’’தி புச்சி²தப்³ப³த்தா பாணாதிபாதாவேரமணிஆதீ³னம் குஸலானம் படிபக்கா² பாணாதிபாதாதி³காபி அகுஸலா பஹாதப்³ப³பா⁴வேன பரிவத்தேதப்³பா³தி த³ஸ்ஸேதும் ‘‘யஸ்ஸ வா பாணாதிபாதா படிவிரதஸ்ஸா’’திஆதி³ வுத்தம். அட்ட²கதா²யம் பன ‘‘ஏவம் ஸம்மாதி³ட்டி²ஆதி³முகே²ன மிச்சா²தி³ட்டி²ஆதி³ம் த³ஸ்ஸேத்வா புன பாணாதிபாதஅதி³ன்னாதா³னகாமேஸுமிச்சா²சாராதி³தோ வேரமணியாதீ³ஹி பாணாதிபாதாதீ³னம் பரிவத்தனம் த³ஸ்ஸேதும் ‘யஸ்ஸா’திஆதி³ ஆரத்³த⁴’’ந்தி (நேத்தி. அட்ட². 36) வுத்தம். தத³ங்கா³தி³வஸேனபஹீனோ ஹோதி. காலவாதி³ஸ்ஸாதி வதி³தப்³ப³காலே வதி³தப்³ப³ம் வத³தி ஸீலேனாதி காலவாதீ³, தஸ்ஸ.

‘‘யதா²வுத்தப்பகாரேனேவ பரிவத்தேதப்³பா³’’தி புச்சி²தப்³ப³த்தா அஞ்ஞேன பகாரேனபி பரிவத்தேதப்³பா³தி த³ஸ்ஸேதும் ‘‘யே ச கோ² கேசீ’’திஆதி³ வுத்தம். அட்ட²கதா²யம் பன ‘‘யே ச கோ² கேசீதிஆதி³னா ஸம்மாதி³ட்டி²ஆதி³முகே²னேவ மிச்சா²தி³ட்டி²ஆதீ³ஹி ஏவ பரிவத்தனம் பகாரந்தரேன த³ஸ்ஸேதீ’’தி (நேத்தி. அட்ட². 36) வுத்தம். தத்த² கேசி மிச்சா²தி³ட்டி²கமிச்சா²ஸங்கப்பாதி³காயேவ புக்³க³லா பரேஸம் அரியானம் அரியம் அட்ட²ங்கி³கம் மக்³க³ம் க³ரஹந்தி. ஸந்தி³ட்டி²கா ஸந்தி³ட்டே² நியுத்தா, ஸஹத⁴ம்மிகா ஸஹ த⁴ம்மேன காரணேன யே வத்தந்தி ஸஹத⁴ம்மிகா. கா³ரய்ஹா க³ரஹிதப்³பா³காரே யுத்தா. வாதா³ ச அனுவாதா³ ச வாதா³னுவாதா³, தே ப⁴வந்தோ ஸம்மாதி³ட்டி²ஞ்ச த⁴ம்மம் க³ரஹந்தி. தேன க³ரஹணேன. புஜ்ஜா பூஜிதப்³பா³ ச ந ப⁴வந்தி, பாஸம்ஸா பஸம்ஸிதப்³பா³ ச ந ப⁴வந்தி. ஏவந்திஆதீ³ஸு ஸம்மாஸங்கப்பம் வா ஸம்மாவாசாதி³கம் வா விஸும் விஸும் ஸம்மாஸங்கப்பஞ்ச தே ப⁴வந்தோ த⁴ம்மம் க³ரஹந்தி. தேன ஹி யே மிச்சா²ஸங்கப்பிகா, தே ப⁴வந்தோ ந புஜ்ஜா ச பாஸம்ஸா ச…பே… ஸம்மாவிமுத்திஞ்ச தே ப⁴வந்தோ த⁴ம்மம் க³ரஹந்தி. தேன ஹி யே மிச்சா²தி³ட்டி²வாசிகா, தே ப⁴வந்தோ ந புஜ்ஜா ச பாஸம்ஸா ச. ஸம்மாவிமுத்திஞாணத³ஸ்ஸனஞ்ச தே ப⁴வந்தோ த⁴ம்மம் க³ரஹந்தி. தேன ஹி யே மிச்சா²விமுத்திகா, தே ப⁴வந்தோ ந புஜ்ஜா ச பாஸம்ஸா ச. ஸம்மாவிமுத்திஞாணத³ஸ்ஸனஞ்ச தே ப⁴வந்தோ த⁴ம்மம் க³ரஹந்தி. தேன ஹி யே மிச்சா²விமுத்திஞாணத³ஸ்ஸனிகா, தே ப⁴வந்தோ ந புஜ்ஜா ச பாஸம்ஸா சாதி யோஜனா காதப்³பா³. ‘‘மிச்சா²விமுத்திஞாணத³ஸ்ஸனா’’திபி பாடோ² அத்தி².

‘‘அரியமக்³க³ஸம்மாதி³ட்டா²தீ³னம் க³ரஹவஸேனேவ மிச்சா²தி³ட்டா²த³யோ ச பரிவத்தேதப்³பா³, நாவஸேஸானம் பஸம்ஸாவஸேனா’’தி வத்தப்³ப³த்தா காமாதீ³னம் பஸம்ஸாவஸேனபி காமானம் படிபக்கா² வேரமணியாத³யோபி பரிவத்தேதப்³பா³தி த³ஸ்ஸேதும் ‘‘யே ச கோ² கேசி ஏவமாஹம்ஸூ’’திஆதி³ வுத்தம். தத்த² பு⁴ஞ்ஜிதப்³பா³ காமா, பரிபு⁴ஞ்ஜிதப்³பா³ காமா, ஆஸேவிதப்³பா³ காமா, நிஸேவிதப்³பா³ காமாதி ஏத்த² காமீயந்தேதி காமாதி கம்மஸாத⁴னவஸேன வத்து²காமா க³ஹிதா, நாதிபணீதா காமா பு⁴ஞ்ஜிதப்³பா³, அதிபணீதா காமா பரி ஸமந்ததோ பு⁴ஞ்ஜிதப்³பா³. அதிபணீததரா காமா ஆ பு⁴ஸோ ஸேவிதப்³பா³, நியதா ஸேவிதப்³பா³. பா⁴வயிதப்³பா³ காமா, ப³ஹுலீகாதப்³பா³ காமாதி ஏத்த² பன காமேந்தீதி காமாதி கத்துஸாத⁴னவஸேன கிலேஸகாமா க³ஹிதா, புனப்புனம் உப்பாத³னவஸேன பா⁴வயிதப்³பா³ வட்³டா⁴பேதப்³பா³ பவத்தேதப்³பா³ கிலேஸகாமா, ப³ஹூனம் புனப்புனம் உப்பாத³னவஸேன காதப்³பா³ வட்³டா⁴பேதப்³பா³ கிலேஸகாமாதி யே ச காமவஸிகா புது²ஜ்ஜனா கேசி ஏவமாஹம்ஸு தேஸம் காமவஸிகானம் புது²ஜ்ஜனானம் கேஸஞ்சி தாதி³ஸேஹி காமேஹி வேரமணீ குஸலசேதனா படிபக்க²வஸேன அத⁴ம்மோ அஸேவிதப்³போ³ நாம ஆபஜ்ஜேய்யாதி அதி⁴ப்பாயோ க³ஹேதப்³போ³.

அந்தத்³வயவஸேன பரிவத்தனம் த³ஸ்ஸேதும் ‘‘யே வா பன கேசீ’’திஆதி³ வுத்தம். அத்தகிலமதா²னுயோகோ³ த⁴ம்மோதி நிய்யானிகோதி யே வா பன பஞ்சாதபாதி³படிபன்னகா தத்தி²யா ஏவமாஹம்ஸு, தேஸம் பஞ்சாதபாதி³படிபன்னகானம் நிய்யானிகோ த⁴ம்மோ மஜ்ஜி²மாபடிபதா³ஸங்கா²தோ விபஸ்ஸனாஸஹிதோ அரியமக்³கோ³ அத⁴ம்மோ அனிய்யானிகோ அபா⁴வேதப்³போ³ நாம ஆபஜ்ஜேய்யாதி. ஸுக²து³க்க²வஸேனபி பரிவத்தனம் த³ஸ்ஸேதும் ‘‘யே ச கோ²’’திஆதி³ வுத்தம். ‘‘பாபம் நிஜ்ஜராபேஸ்ஸாமா’’தி அத்தஹிம்ஸனாதி³வஸேன படிபன்னகானம் பவத்தோ ஸரீரதாபனோ து³க்கோ² த⁴ம்மோ நிய்யானிகோதி.

யே ச ததா²படிபன்னகா கேசி ஏவமாஹம்ஸு, தேஸம் ததா²படிபன்னகானம் அனவஜ்ஜபச்சயபரிபோ⁴க³வஸேன பவத்தோ ஸரீரது³க்கூ²பஸமோ ஸுகோ² த⁴ம்மோ அத⁴ம்மோ அப்பவத்தேதப்³போ³ ஆபஜ்ஜேய்யாதி.

அந்தத்³வயாதி³வஸேன பரிவத்தனம் ஆசரியேன விப⁴த்தம், அம்ஹேஹி ச ஞாதம், ‘‘கத²ம் அஸுப⁴ஸஞ்ஞாதி³வஸேன பரிவத்தேதப்³போ³’’தி புச்சி²தப்³ப³த்தா ஏவம் அஸுப⁴ஸஞ்ஞாதி³வஸேன ஸுப⁴ஸஞ்ஞாதி³கா பரிவத்தேதப்³பா³தி த³ஸ்ஸேதும் ‘‘யதா² வா பனா’’திஆதி³ வுத்தம். அட்ட²கதா²யம் பன ‘‘இதா³னி அஸுப⁴ஸஞ்ஞாதி³முகே²ன ஸுப⁴ஸஞ்ஞாதி³பரிவத்தனம் த³ஸ்ஸேதும் ‘யதா² வா பனா’திஆதி³ வுத்த’’ந்தி (நேத்தி. அட்ட². 36) வுத்தம். ஸப்³ப³ஸங்கா²ரேஸூதி தேபூ⁴மகஸங்கா²ரேஸு. ஆரத்³த⁴விபஸ்ஸகஸ்ஸ ஹி தேபூ⁴மகா த⁴ம்மா கிலேஸாஸுசிபக்³க⁴ரணகத்தா அஸுப⁴தோ உபட்ட²ஹந்தி.

‘‘யதி³ ஸரூபதோயேவ இமேஸம் இமே படிபக்கா²தி அபரிவத்தேதப்³பா³ ஸியும், ஏவம் ஸதி நிரவஸேஸா ச படிபக்கா² ந ஸக்கா பரிவத்தேதும், கத²ம் ஸக்கா பரிவத்தேது’’ந்தி வத்தப்³ப³த்தா பரிவத்தனலக்க²ணம் த³ஸ்ஸேந்தோ ‘‘யம் யம் வா பனா’’திஆதி³மாஹ. தத்த² குஸலம் வா அகுஸலம் வா யம் யம் த⁴ம்மம் பரிவத்தேதுகாமோ ஆசரியோ சித்தேன ரோசயதி தி³ட்டி²யா உபக³ச்ச²தி, குஸலஸ்ஸ வா அகுஸலஸ்ஸ வா தஸ்ஸ தஸ்ஸ ருசிகஸ்ஸ உபக³தஸ்ஸ த⁴ம்மஸ்ஸ யோ படிபக்கோ², ஸோ படிபக்க²த⁴ம்மோ அஸத்³த⁴ம்மோ அஸ்ஸ த⁴ம்மஸ்ஸ அனிட்ட²தோ பச்சனீகதோ அஜ்ஜா²பன்னோ பரிஞ்ஞாதோ. இட்ட²ம் வா அனிட்ட²ம் வா யம் யம் த⁴ம்மம் பரிவத்தேதுகாமோ ஆசரியோ சித்தேன ரோசயதி தி³ட்டி²யா உபக³ச்ச²தி, இட்ட²ஸ்ஸ வா அனிட்ட²ஸ்ஸ வா தஸ்ஸ தஸ்ஸ ருசிகஸ்ஸ த⁴ம்மஸ்ஸ யோ படிபக்கோ², ஸோ படிபக்க²த⁴ம்மோ அஸ்ஸ த⁴ம்மஸ்ஸ அனிட்ட²தோ பச்சனீகத⁴ம்மதோ அஜ்ஜா²பன்னோ பரிஞ்ஞாதோ ப⁴வதீதி பரிவத்தேதுகாமேன இச்சி²தப்³ப³த⁴ம்மானுரூபபடிபக்க²வஸேன பரிவத்தனம் காதப்³ப³ந்தி பரிவத்தனே படிபக்க²லக்க²ணம் வுத்தம். தேன அட்ட²கதா²யம் வுத்தம் – ‘‘படிபக்க²ஸ்ஸ லக்க²ணம் விபா⁴வேதீ’’தி.

‘‘ஏவம் வுத்தப்பகாரம் பரிவத்தனம் அம்ஹேஹி கத²ம் ஸத்³த³ஹிதப்³ப³’’ந்தி வத்தப்³ப³தா ‘‘தேனாஹா’’திஆதி³ வுத்தம்.

‘‘ஏத்தாவதா பரிவத்தோ ஹாரோ பரிபுண்ணோ, அஞ்ஞோ நியுத்தோ நத்தீ²’’தி வத்தப்³ப³த்தா ‘‘நியுத்தோ பரிவத்தனோ ஹாரோ’’தி வுத்தம். யஸ்மிம் ஸுத்தே குஸலாகுஸலே நித்³தி³ட்டே² படிபக்க²வஸேன நீஹரித்வா யதா²ஸம்ப⁴வம் யோ யோ பரிவத்தனோ ஹாரோ நியுத்தோ, தஸ்மிம் ஸுத்தே நித்³தி³ட்டே² படிபக்க²வஸேன நீஹரித்வா ஸோ ஸோ பரிவத்தனோ ஹாரோ நியுத்தோ நித்³தா⁴ரேத்வா யுத்தோ யோஜிதோதி அத்தோ² க³ஹேதப்³போ³தி.

இதி பரிவத்தனஹாரவிப⁴ங்கே³ ஸத்திப³லானுரூபா ரசிதா

விபா⁴வனா நிட்டி²தா.

பண்டி³தேஹி பன அட்ட²கதா²டீகானுஸாரேன க³ம்பீ⁴ரத்தோ² வித்தா²ரதோ விப⁴ஜித்வா க³ஹேதப்³போ³தி.