10. வேவசனஹாரவிப⁴ங்க³விபா⁴வனா

37. யேன யேன ஸம்வண்ணனாவிஸேஸபூ⁴தேன பவத்தனஹாரவிப⁴ங்கே³ன பரிவத்தேதப்³பா³ ஸுத்தத்தா² விப⁴த்தா, ஸோ ஸம்வண்ணனாவிஸேஸபூ⁴தோ பரிவத்தனஹாரவிப⁴ங்கோ³ பரிபுண்ணோ, ‘‘கதமோ வேவசனஹாரவிப⁴ங்கோ³’’தி புச்சி²தப்³ப³த்தா ‘‘தத்த² கதமோ வேவசனோ ஹாரோ’’திஆதி³ வுத்தம். தத்த² தத்தா²தி தேஸு நித்³தி³ட்டே²ஸு ஸோளஸஸு தே³ஸனாஹாராதீ³ஸு கதமோ ஸம்வண்ணனாவிஸேஸோ வேவசனோ ஹாரோ வேவசனஹாரவிப⁴ங்கோ³ நாமாதி புச்ச²தி. ‘‘வேவசனானி ப³ஹூனீ’’திஆதி³னித்³தே³ஸஸ்ஸ இதா³னி மயா வுச்சமானோ ‘‘ஏகம் ப⁴க³வா த⁴ம்ம’’ந்திஆதி³கோ வித்தா²ரஸம்வண்ணனாவிஸேஸோ வேவசனோ ஹாரோ வேவசனஹாரவிப⁴ங்கோ³ நாமாதி அத்தோ² க³ஹேதப்³போ³. ‘‘யானி வேவசனானி நித்³தா⁴ரிதானி, கதமானி தானி வேவசனானீ’’தி புச்சி²தப்³ப³த்தா ‘‘யதா² ஏக’’ந்திஆதி³ வுத்தம். ஏகம் விஞ்ஞாதப்³ப³ம் த⁴ம்மம் ஸபா⁴வத⁴ம்மம் பஞ்ஞாபேதப்³ப³ம் வா த⁴ம்மம் அஞ்ஞமஞ்ஞேஹி யதா² யேஹி பகாரேஹி சேவ வேவசனேஹி ச ப⁴க³வா நித்³தி³ஸதி, ததா²பகாரானி வேவசனானி விஞ்ஞாதப்³பா³னீதி அத்தோ². ‘‘தானி வேவசனானி கிந்தி ப⁴க³வா ஆஹா’’தி வத்தப்³ப³த்தா ‘‘யதா²ஹ ப⁴க³வா’’திஆதி³ வுத்தம். யதா² யம்யம்பகாரானி வேவசனானி –

‘‘ஆஸா ச பிஹா ச அபி⁴னந்த³னா ச, அனேகதா⁴தூஸு ஸரா பதிட்டி²தா;

அஞ்ஞாணமூலப்பப⁴வா பஜப்பிதா, ஸப்³பா³ மயா ப்³யந்திகதா ஸமூலிகா’’தி. –

ப⁴க³வா ஆஹ, தம்தம்பகாரானி வேவசனானி விஞ்ஞாதப்³பா³னீதி அத்தோ².

ஏகஸ்ஸேவ த⁴ம்மஸ்ஸ அனேகேஹி பரியாயபூ⁴தேஹி வேவசனேஹி நித்³தி³ஸனே ப²லம் அட்ட²கதா²யம் (நேத்தி. அட்ட². 37) ப³ஹுதா⁴ வுத்தம், தஸ்மா அம்ஹேஹி ந த³ஸ்ஸிதம். ‘‘கதமா ஆஸா, கதமா பிஹாதீ³’’தி புச்சி²தப்³ப³த்தா ‘‘ஆஸா நாம வுச்சதீ’’திஆதி³ வுத்தம். யா ப⁴விஸ்ஸஸ்ஸ அத்த²ஸ்ஸ ஆஸீஸனா அவஸ்ஸம் ஆக³மிஸ்ஸதீதி யா ஆஸா அஸ்ஸ ஆஸீஸந்தஸ்ஸ புக்³க³லஸ்ஸ உப்பஜ்ஜதி, தஸ்ஸ ஆஸீஸனா ‘‘ஆஸா நாமா’’தி வுச்சதி. வத்தமானஸ்ஸ யா பத்த²னா அஸ்ஸ பத்த²யந்தஸ்ஸ உப்பஜ்ஜதி, ஸேய்யதரம் வா அஞ்ஞம் தி³ஸ்வா ‘‘ஏதி³ஸோ அஹம் ப⁴வேய்ய’’ந்தி யா பிஹா அஸ்ஸ பிஹயந்தஸ்ஸ உப்பஜ்ஜதி, ஸா பத்த²னா ‘‘பிஹா நாமா’’தி வுச்சதி. அனாக³தத்த²ம் ஆரப்³ப⁴ பவத்தா தண்ஹா ‘‘ஆஸா’’தி வுச்சதி, அனாக³தபச்சுப்பன்னத்த²ம் ஆரப்³ப⁴ பவத்தா தண்ஹா ‘‘பிஹா’’தி வுச்சதி, ததா²பி தண்ஹாபா⁴வேன ஏகத்தா ஏகோ த⁴ம்மோவ அத்த²ஸ்ஸ இச்சி²தஸ்ஸ நிப்ப²த்தி அத்த²னிப்ப²த்தி, படிபாலேதி ஏதாய தண்ஹாயாதி படிபாலனா, அத்த²னிப்ப²த்தியா படிபாலனாதி அத்த²னிப்ப²த்திபடிபாலனா. யா தண்ஹா அஸ்ஸ பாலயந்தஸ்ஸ புக்³க³லஸ்ஸ உப்பஜ்ஜதி, ஸா தண்ஹா ‘‘அபி⁴னந்த³னா’’தி வுச்சதி.

‘‘யா அத்த²னிப்ப²த்தி தண்ஹாய படிபாலேதப்³பா³, கதமா ஸா அத்த²னிப்ப²த்தீ’’தி புச்சி²தப்³ப³த்தா தம் அத்த²னிப்ப²த்திம் ஸத்ததோ வா ஸங்கா²ரதோ வா விப⁴ஜித்வா த³ஸ்ஸேந்தோ ‘‘பியம் வா ஞாதிம், பியம் வா த⁴ம்ம’’ந்திஆதி³மாஹ. தத்த² ‘‘ஞாதி’’ந்தி இமினா மித்தப³ந்த⁴வாத³யோபி க³ஹிதா. த⁴ம்மம் பன பியரூபாரம்மணாதி³கம் ச²ப்³பி³த⁴ம்பி யாய தண்ஹாய தண்ஹிகோ அபி⁴னந்த³தி, ஸா தண்ஹா ‘‘அபி⁴னந்த³னா நாமா’’தி வுச்சதி. படிக்கூலம் ஞாதிம் வா த⁴ம்மம் வா விபல்லாஸவஸேன அப்படிக்கூலம் ஞாதிம் வா த⁴ம்மம் வா ஸபா⁴வவஸேன அப்படிக்கூலதோ யாய தண்ஹாய தண்ஹிகோ அபி⁴னந்த³தி, ஸா தண்ஹா வா ‘‘அபி⁴னந்த³னா நாமா’’தி வுச்சதீதி யோஜேத்வா அத்தோ² க³ஹேதப்³போ³.

‘‘யாஸு அனேகாஸு தா⁴தூஸு வுத்தப்பகாரா தண்ஹா ‘ஸரா’தி ப⁴க³வதா வுத்தா, கதமா தா தா⁴துயோ’’தி புச்சி²தப்³ப³த்தா தா தா⁴துயோ ஸரூபதோ த³ஸ்ஸேதும் ‘‘சக்கு²தா⁴தூ’’திஆதி³ வுத்தம்.

‘‘தாஸு தா⁴தூஸு கதமாய தா⁴துயா கதமா ஸரா பதிட்டி²தா பவத்தா’’தி புச்சி²தப்³ப³த்தா இமாய தா⁴துயா அயம் ஸரா பதிட்டி²தா பவத்தாதி நியமேத்வா த³ஸ்ஸேதும் ‘‘ஸராதி கேசி ரூபாதி⁴முத்தா’’திஆதி³ வுத்தம். தத்த² கேசீதி ஸராஸங்கா²தாய ரூபதண்ஹாய தண்ஹிகா புக்³க³லா. ரூபாதி⁴முத்தாதி ரூபதா⁴துஸங்கா²தே ஆரம்மணே அதி⁴முத்தா அஜ்ஜோ²ஸிதா. இமினா பதே³ன ரூபதண்ஹாஸங்கா²தா ஸரா ரூபதா⁴துயா பதிட்டி²தா பவத்தாதி க³ஹிதா, ‘‘கேசி ஸத்³தா³தி⁴முத்தா’’திஆதீ³ஹிபி ஸத்³த³தண்ஹாஸங்கா²தாத³யோ ஸரா ஸத்³த³தா⁴துயாதீ³ஸு பதிட்டி²தா பவத்தா ஸராவ க³ஹிதா. கேசி த⁴ம்மாதி⁴முத்தாதி ஏத்த² த⁴ம்மக்³க³ஹணேன சக்கு²தா⁴துஸோததா⁴துகா⁴னதா⁴துஜிவ்ஹாதா⁴துகாயதா⁴துஸத்தவிஞ்ஞாணதா⁴துத⁴ம்மதா⁴துயோ க³ஹிதா, தஸ்மா அட்டா²ரஸ தா⁴துயோ பதிட்டா²னபா⁴வேன க³ஹிதாபி ச²ப்³பி³தா⁴வ க³ஹிதாதி த³ட்ட²ப்³பா³. ‘‘ரூபாதி⁴முத்தாதீ³ஸு கித்தகானி பதா³னி தண்ஹாபக்கே² தண்ஹாய வேவசனா’’தி புச்சி²தப்³ப³த்தா ஏதாதி³ஸானி ஏத்தகானி பதா³னி தண்ஹாபக்கே² தண்ஹாவேவசனானீதி நியமேத்வா த³ஸ்ஸேதும் ‘‘தத்த² யானி ச² கே³ஹஸிதானீ’’திஆதி³ வுத்தம். தத்தா²தி தேஸு ச²ஸு ரூபாதீ³ஸு. ச² கே³ஹஸிதானி தோ³மனஸ்ஸானீதி ச²ஸு ரூபாதீ³ஸு பவத்தம் தண்ஹாபேமம் நிஸ்ஸாய பவத்தானி ச² தோ³மனஸ்ஸானி. ஏஸ நயோ ஸேஸேஸுபி. ‘‘ச² உபேக்கா² கே³ஹஸிதாபி ப⁴க³வதா வுத்தா, கஸ்மா ந க³ஹிதா’’தி வத்தப்³ப³த்தா ‘‘யா ச² உபேக்கா² கே³ஹஸிதா, அயம் தி³ட்டி²பக்கோ²’’தி வுத்தம், தி³ட்டி²பக்க²த்தா ந க³ஹிதாதி அத்தோ².

38. ‘‘கத²ம் வுத்தப்பகாரா தண்ஹா ஏவ க³ஹிதா’’தி வத்தப்³ப³த்தா ‘‘ஸாயேவ பத்த²னாகாரேனா’’திஆதி³ வுத்தம். ஸா வுத்தப்பகாரா ஏவ தண்ஹா பத்த²னாகாரேன பவத்தனதோ ஆஸாதி³பரியாயேன வுத்தா, ரூபாதி³ஆரம்மணத⁴ம்மேஸு நந்த³னதோ ‘‘த⁴ம்மனந்தீ³’’தி பரியாயேன வுத்தா, ரூபாதி³ஆரம்மணத⁴ம்மேஸு கி³லித்வா பரினிட்ட²பேதி விய அஜ்ஜோ²ஸாய திட்ட²னதோ ‘‘த⁴ம்மஜ்ஜோ²ஸான’’ந்தி பரியாயேன வுத்தா, தஸ்மா தண்ஹாய வேவசனானி ஹோந்தி.

தண்ஹாய வேவசனானி ஆசரியேன நித்³தி³ட்டா²னி, அம்ஹேஹி ச ஞாதானி, ‘‘கதமானி சித்தஸ்ஸ வேவசனானீ’’தி புச்சி²தப்³ப³த்தா ‘‘சித்தம் மனோ’’திஆதி³ வுத்தம். ‘‘ஆரம்மணம் சிந்தேதீதி சித்தம். மனதி ஜானாதீதி மனோ. விஜானாதீதி விஞ்ஞாண’’ந்திஆதி³னா அத்தோ² பகரணேஸு (த⁴. ஸ. அட்ட². 5) வுத்தோவ, தஸ்மா அம்ஹேஹி ந வித்தா²ரிதோ. வேவசனானியேவ இமானி இமஸ்ஸ வேவசனானீதி ஏத்தகானியேவ கத²யிஸ்ஸாம. ‘‘பஞ்ஞிந்த்³ரியம் பஞ்ஞாப³ல’’ந்திஆதீ³னி பஞ்ஞாவேவசனானி.

‘‘அரஹம் ஸம்மாஸம்பு³த்³தோ⁴’’திஆதீ³னி பு³த்³த⁴ஸ்ஸ வேவசனானி. ‘‘தானி கத்த² தே³ஸிதானீ’’தி புச்சி²தப்³ப³த்தா ‘‘யதா² ச பு³த்³தா⁴னுஸ்ஸதியம் வுத்த’’ந்திஆதி³ வுத்தம். பு³த்³தா⁴னுஸ்ஸதிதே³ஸனாயம் யதா² ச யம்யம்பகாரம் வேவசனம் ப⁴க³வதா ‘‘இதிபி ஸோ ப⁴க³வா அரஹம்…பே… ப⁴க³வதோ’’தி வுத்தம், ஏதம்பகாரம் வேவசனம் பு³த்³தா⁴னுஸ்ஸதியா வேவசனம் பு³த்³த⁴ஸ்ஸ வேவசனந்தி த³ட்ட²ப்³ப³ம். ‘‘யதா² ச த⁴ம்மானுஸ்ஸதியம் வுத்த’’ந்திஆதீ³ஸுபி ஏவமேவ யோஜனா காதப்³பா³.

‘‘தேனாஹா’’திஆத்³யானுஸந்த்⁴யாதி³அத்தோ² சேவ ‘‘நியுத்தோ வேவசனோ ஹாரோ’’திஆனுஸந்த்⁴யாதி³அத்தோ² ச வுத்தனயானுஸாரேன வேதி³தப்³போ³.

இதி வேவசனஹாரவிப⁴ங்கே³ ஸத்திப³லானுரூபா ரசிதா

விபா⁴வனா நிட்டி²தா.

பண்டி³தேஹி பன அட்ட²கதா²டீகானுஸாரேன க³ம்பீ⁴ரத்தோ² வித்தா²ரதோ விப⁴ஜித்வா க³ஹேதப்³போ³தி.