11. பஞ்ஞத்திஹாரவிப⁴ங்க³விபா⁴வனா

39. யேன யேன ஸம்வண்ணனாவிஸேஸபூ⁴தேன விப⁴ங்கே³ன வேவசனானி விப⁴த்தானி, ஸோ ஸம்வண்ணனாவிஸேஸபூ⁴தோ விப⁴ங்கோ³ பரிபுண்ணோ, ‘‘கதமோ பஞ்ஞத்திஹாரவிப⁴ங்கோ³’’தி புச்சி²தப்³ப³த்தா ‘‘தத்த² கதமோ பஞ்ஞத்திஹாரோ’’திஆதி³ வுத்தம். தத்த² தத்தா²தி தேஸு நித்³தி³ட்டே²ஸு ஸோளஸஸு தே³ஸனாஹாராதீ³ஸு கதமோ ஸம்வண்ணனாவிஸேஸோ பஞ்ஞத்திஹாரோ பஞ்ஞத்திஹாரவிப⁴ங்கோ³ நாமாதி புச்ச²தி. ‘‘ஏகம் ப⁴க³வா த⁴ம்மம் பஞ்ஞத்தீஹி விவிதா⁴ஹி தே³ஸேதீ’’திஆதி³னித்³தே³ஸஸ்ஸ இதா³னி மயா வுச்சமானோ ‘‘யா பகதிகதா²ய தே³ஸனா’’திஆதி³கோ வித்தா²ரஸம்வண்ணனாவிஸேஸோ பஞ்ஞத்திஹாரோ பஞ்ஞத்திஹாரவிப⁴ங்கோ³ நாமாதி க³ஹேதப்³போ³.

‘‘யாஹி விவிதா⁴ஹி பஞ்ஞத்தீஹி ஏகம் த⁴ம்மம் ப⁴க³வா தே³ஸேதி, கதமா தா விவிதா⁴ பஞ்ஞத்தியோ’’தி புச்சி²தப்³ப³த்தா ‘‘யா பகதிகதா²யா’’திஆதி³ வுத்தம். தத்த² பகதிகதா²யாதி அஸ்ஸாதா³தி³பத³த்த²விஸேஸம் அனித்³தா⁴ரேத்வா அத்த²ஸபா⁴வேன பவத்தாய கதா²ய ஸாது⁴கம் மனஸிகாரத⁴ம்மகதா²ய யா தே³ஸனா யதா²தி⁴ப்பேதமத்த²ம் வேனேய்யஸந்தானே நிக்கி²பதி பதிட்ட²பேதி பகாரேன ஞாபேதி, தஸ்மா நிக்கே²பபஞ்ஞத்தி, தாய பஞ்ஞத்தியா த⁴ம்மம் தே³ஸேதீதி அத்தோ². ‘‘யா பஞ்ஞத்தி ‘பகதிகதா²ய தே³ஸனா’தி வுத்தா, கதமா ஸா’’தி புச்சி²தப்³ப³த்தா ததா² புச்சி²த்வா வித்தா²ரதோ த³ஸ்ஸேதும் ‘‘கா ச பகதிகதா²ய தே³ஸனா’’திஆதி³ வுத்தம். அட்ட²கதா²யம் பன –‘‘இதி ‘பகதிகதா²ய தே³ஸனா’தி ஸங்கே²பேன வுத்தமத்த²ம் வித்தா²ரேன விப⁴ஜிதும் ‘கா ச பகதிகதா²ய தே³ஸனா’தி புச்சி²த்வா ‘சத்தாரி ஸச்சானீ’திஆதி³மாஹா’’தி (நேத்தி. அட்ட². 39) வுத்தம். தத்த² தே³ஸனாதே³ஸேதப்³ப³ஸ்ஸ பே⁴த³பா⁴வேபி அபே⁴தோ³பசாரேன ‘‘தே³ஸனா சத்தாரி ஸச்சானீ’’தி வுத்தம், சதுன்னம் ஸச்சானம் பஞ்ஞத்தி தே³ஸனா நாமாதி அத்தோ².

‘‘கத²ம் தம் ஸச்சபஞ்ஞத்திம் ப⁴க³வா ஆஹா’’தி புச்சி²தப்³ப³த்தா ‘‘யதா² ப⁴க³வா ஆஹா’’தி வுத்தம். யதா² யேன பகாரேன ப⁴க³வா யம் யம் பஞ்ஞத்திம் ஆஹ, ததா² தேன பகாரேன ஸா பஞ்ஞத்தி ஜானிதப்³பா³. ‘‘இத³ம் து³க்க²’’ந்தி யம் பஞ்ஞத்திம் ப⁴க³வா ஆஹ, அயம் ‘‘இத³ம் து³க்க²’’ந்தி பஞ்ஞத்தி பஞ்சன்னம் க²ந்தா⁴னம் நிக்கே²பபஞ்ஞத்தி, ச²ன்னம் தா⁴தூனம் நிக்கே²பபஞ்ஞத்தி, அட்டா²ரஸன்னம் தா⁴தூனம் நிக்கே²பபஞ்ஞத்தி, த்³வாத³ஸன்னம் ஆயதனானம் நிக்கே²பபஞ்ஞத்தி, த³ஸன்னம் இந்த்³ரியானம் நிக்கே²பபஞ்ஞத்தீதி யோஜனா காதப்³பா³. க²ந்த⁴தா⁴துஆயதனிந்த்³ரியானி ச லோகியானேவ. பீளனஸங்க²தஸந்தாபவிபரிணாமத்த²தாஸாமஞ்ஞேன ஏகத்தம் உபனேத்வா ‘‘இத³ம் து³க்க²’’ந்தி வுத்தா. த³ஸன்னம் இந்த்³ரியானந்தி சக்கு²ஸோதகா⁴னஜிவ்ஹாகாயஇத்தி²புரிஸஜீவிதமனவேத³னிந்த்³ரியானம் த³ஸன்னம். அனுப⁴வனலக்க²ணேன ஏகலக்க²ணத்தா வேத³னிந்த்³ரியம் ஏகந்தி க³ஹிதம், ஸத்³தி⁴ந்த்³ரியாதீ³னி பன மக்³க³பரியாபன்னத்தா ந க³ஹிதானி.

கப³ளீகாரேதி டா²னூபசாரேன வோஹரிதே ஓஜாஸங்கா²தே ஆஹாரே, ராகோ³ அரியமக்³கே³ன அப்பஹாதப்³ப³த்தா அனுஸயவஸேன, ஆஸாவஸேன வா பத்த²னாவஸேன வா அத்தி² நந்தீ³. அத்தி² தண்ஹாதி ஏத்தா²பி ஏஸேவ நயோ. பதிட்டி²தம் விருள்ஹந்தி படிஸந்தி⁴ஆகட்³ட⁴னஸமத்த²தாபத்தியா பதிட்டி²தத்தா பதிட்டி²தஞ்சேவ விருள்ஹஞ்சாதி க³ஹேதப்³ப³ம். ஸங்கா²ரானந்தி புனப்³ப⁴வனிப்³ப³த்தகஸ்ஸ ப⁴வஸ்ஸ அபி⁴னிப்³ப³த்திஹேதுகானம் ஸங்கா²ரானம். ஜாதிஜராமரணந்தி அபி⁴னிப்³ப³த்தனலக்க²ணா ஜாதி, ந உப்பாதோ³வ, பரிபாகலக்க²ணா ஜரா, ந டி²தியேவ, பே⁴த³னலக்க²ணம் மரணம், ந ப⁴ங்க³மேவ. தேன வுத்தம் ‘‘ஸஸோகம் ஸத³ரம் ஸஉபாயாஸ’’ந்தி.

‘‘ப²ஸ்ஸே சே, பி⁴க்க²வே, ஆஹாரே…பே… மனோஸஞ்சேதனாய சே, பி⁴க்க²வே, ஆஹாரே…பே… விஞ்ஞாணே சே, பி⁴க்க²வே, ஆஹாரே அத்தி² ராகோ³…பே… வதா³மீ’’தி அயம் பஞ்ஞத்தி து³க்க²ஸ்ஸ ச ஸமுத³யஸ்ஸ ச பப⁴வஸ்ஸ பஞ்ஞாபனதோ பப⁴வபஞ்ஞத்தி நாம.

வட்டவஸேன பஞ்ஞத்திபே⁴தோ³ ஆசரியேன விப⁴த்தோ, அம்ஹேஹி ச ஞாதோ, ‘‘கத²ம் விவட்டவஸேன பஞ்ஞத்திபே⁴தோ³ விப⁴த்தோ’’தி வத்தப்³ப³த்தா ‘‘கப³ளீகாரே சே, பி⁴க்க²வே, ஆஹாரே நத்தி² ராகோ³’’திஆதி³ வுத்தம். ‘‘கப³ளீகாரே…பே… அனுபாயாஸந்தி வதா³மீ’’தி அயம் பஞ்ஞத்தி து³க்க²ஸ்ஸ பரிஞ்ஞாய ச பஞ்ஞாபனதோ பரிஞ்ஞாபஞ்ஞத்தி நாம, ஸமுத³யஸ்ஸ பஹானஸ்ஸ ச பஞ்ஞாபனதோ பஹானபஞ்ஞத்தி நாம, மக்³க³ஸ்ஸ பா⁴வனாய ச பஞ்ஞாபனதோ பா⁴வனாபஞ்ஞத்தி நாம, நிரோத⁴ஸ்ஸ ஸச்சி²கிரியாய ச பஞ்ஞாபனதோ ஸச்சி²கிரியாபஞ்ஞத்தி நாம.

40. விவட்டவஸேன பஞ்ஞத்திபே⁴தோ³ ஆசரியேன விப⁴த்தோ, அம்ஹேஹி ச ஞாதோ, ‘‘கத²ம் ஸம்மஸனவஸேன பஞ்ஞத்திபே⁴தோ³ விப⁴த்தோ’’தி வத்தப்³ப³த்தா ‘‘ஸமாதி⁴ம், பி⁴க்க²வே, பா⁴வேதா²’’திஆதி³ வுத்தம். ‘‘ஸமாதி⁴ம், பி⁴க்க²வே, பா⁴வேத²…பே… யதா²பூ⁴தம் பஜானாதீ’’தி அயம் பஞ்ஞத்தி மக்³க³ஸ்ஸ பா⁴வனாய ச பஞ்ஞாபனதோ பா⁴வனாபஞ்ஞத்தி நாம, து³க்க²ஸ்ஸ பரிஞ்ஞாய ச பஞ்ஞாபனதோ பரிஞ்ஞாபஞ்ஞத்தி நாம, ஸமுத³யஸ்ஸ பஹானஸ்ஸ ச பஞ்ஞாபனதோ பஹானபஞ்ஞத்தி நாம, நிரோத⁴ஸ்ஸ ஸச்சி²கிரியாய ச பஞ்ஞாபனதோ ஸச்சி²கிரியாபஞ்ஞத்தி நாம.

ஸம்மஸனவஸேன பஞ்ஞத்திபே⁴தோ³ ஆசரியேன விப⁴த்தோ, அம்ஹேஹி ச ஞாதோ, ‘‘கத²ம் உபாதா³னக்க²ந்த⁴வஸேன பஞ்ஞத்திபே⁴தோ³ விப⁴த்தோ’’தி வத்தப்³ப³த்தா ‘‘ரூபம், ராத⁴, விகிரதா²’’திஆதி³ வுத்தம். ‘‘ரூபம், ராத⁴, விகிரத²…பே… நிப்³பா³ன’’ந்தி அயம் பஞ்ஞத்தி தண்ஹாஸங்கா²தஸ்ஸ ரோத⁴ஸ்ஸ நிரோத⁴ஸ்ஸ ச பஞ்ஞாபனதோ நிரோத⁴பஞ்ஞத்தி நாம, அஸ்ஸாத³ஸ்ஸ நிப்³பி³தா³ய ச பஞ்ஞாபனதோ நிப்³பி³தா³பஞ்ஞத்தி நாம, து³க்க²ஸ்ஸ பரிஞ்ஞாய ச பஞ்ஞாபனதோ பரிஞ்ஞாபஞ்ஞத்தி நாம, ஸமுத³யஸ்ஸ பஹானஸ்ஸ ச பஞ்ஞாபனதோ பஹானபஞ்ஞத்தி நாம, மக்³க³ஸ்ஸ பா⁴வனாய ச பஞ்ஞாபனதோ பா⁴வனாபஞ்ஞத்தி நாம, நிரோத⁴ஸ்ஸ ஸச்சி²கிரியாய ச பஞ்ஞாபனதோ ஸச்சி²கிரியாபஞ்ஞத்தி நாம.

‘‘ரூபவேத³னாஸஞ்ஞாஸங்கா²ரவிஞ்ஞாணானி விகிரந்தோ வித்³த⁴ம்ஸேந்தோ விகீளனியம் கரோந்தோ பஞ்ஞாய தண்ஹாக்க²யாய படிபஜ்ஜந்தோ கிம் பஜானாதீ’’தி புச்சி²தப்³ப³த்தா ‘‘ஸோ ‘இத³ம் து³க்க²’ந்தி யதா²பூ⁴தம் பஜானாதீ’’திஆதி³ வுத்தம். ‘‘ஸோ ‘இத³ம் து³க்க²’ந்தி யதா²பூ⁴தம் பஜானாதீதி…பே… நிரோத⁴கா³மினிபடிபதா³தி யதா²பூ⁴தம் பஜானாதீ’’தி அயம் பஞ்ஞத்தி ஸச்சானம் படிவேத⁴ஸ்ஸ பஞ்ஞாபனதோ படிவேத⁴பஞ்ஞத்தி நாம, த³ஸ்ஸனபூ⁴மியா நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம, மக்³க³ஸ்ஸ பா⁴வனாய ச பஞ்ஞாபனதோ பா⁴வனாபஞ்ஞத்தி நாம, ஸோதாபத்திப²லஸ்ஸ ஸச்சி²கிரியாய ச பஞ்ஞாபனதோ ஸச்சி²கிரியாபஞ்ஞத்தி நாம. ‘‘ஸோ ‘இமே ஆஸவா’தி யதா²பூ⁴தம் பஜானாதி…பே… ‘ஆஸவா அஸேஸம் நிருஜ்ஜ²ந்தீ’தி யதா²பூ⁴தம் பஜானாதீ’’தி அயம் பஞ்ஞத்தி க²யேஞாணஸ்ஸ உப்பாத³ஸ்ஸ ச பஞ்ஞாபனதோ உப்பாத³பஞ்ஞத்தி நாம, அனுப்பாதே³ஞாணஸ்ஸ ஓகாஸஸ்ஸ ச பஞ்ஞாபனதோ ஓகாஸபஞ்ஞத்தி நாம, மக்³க³ஸ்ஸ பா⁴வனாய ச பஞ்ஞாபனதோ பா⁴வனாபஞ்ஞத்தி நாம, து³க்க²ஸ்ஸ பரிஞ்ஞாய ச பஞ்ஞாபனதோ பரிஞ்ஞாபஞ்ஞத்தி நாம, ஸமுத³யஸ்ஸ பஹானஸ்ஸ ச பஞ்ஞாபனதோ பஹானபஞ்ஞத்தி நாம, வீரியிந்த்³ரியஸ்ஸ ஆரம்ப⁴ஸ்ஸ ச பஞ்ஞாபனதோ ஆரம்ப⁴பஞ்ஞத்தி நாம, ஆஸாடிகானம் ஆஹடனாய ச பஞ்ஞாபனதோ ஆஹடனாபஞ்ஞத்தி நாம, பா⁴வனாபூ⁴மியா நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம, பாபகானம் அகுஸலானம் த⁴ம்மானம் அபி⁴னிகா⁴தஸ்ஸ ச பஞ்ஞாபனதோ அபி⁴னிகா⁴தபஞ்ஞத்தி நாம.

41. வட்டவஸேன வா விவட்டவஸேன வா த⁴ம்மஸம்மஸனவஸேன வா உபாதா³னக்க²ந்த⁴வஸேன வா பஜானனவஸேன வா ஸச்சேஸு நானாவிதோ⁴ பஞ்ஞத்திபே⁴தோ³ ஆசரியேன விப⁴த்தோ, அம்ஹேஹி ச ஞாதோ, ‘‘கத²ம் தேபரிவட்டவஸேன ஸச்சேஸு பஞ்ஞத்திபே⁴தோ³ விப⁴த்தோ’’தி வத்தப்³ப³த்தா தேபரிவட்டவஸேன ஸச்சேஸு பஞ்ஞத்திபே⁴த³ம் த³ஸ்ஸேதும் ‘‘இத³ம் து³க்க²ந்தி மே, பி⁴க்க²வே’’திஆதி³ ஆரத்³த⁴ம். அட்ட²கதா²யம் பன – ‘‘ஏவம் வட்டவிவட்டமுகே²ன ஸம்மஸனஉபாதா³னக்க²ந்த⁴முகே²னேவ ஸச்சேஸு பஞ்ஞத்திவிபா⁴க³ம் த³ஸ்ஸேத்வா இதா³னி தேபரிவட்டவஸேன த³ஸ்ஸேதும் ‘இத³ம் து³க்க²ந்தி மே பி⁴க்க²வே’திஆதி³ ஆரத்³த⁴’’ந்தி (நேத்தி. அட்ட². 41) வுத்தம். தத்த² புப்³பே³ பரிஜானனதோ பட்டா²ய. அனனுஸ்ஸுதேஸூதி பரிஜானனவஸேன அனனுஸ்ஸுதேஸு சதூஸு ஸச்சத⁴ம்மேஸு. சக்கு²ந்தி பட²மம் நிப்³பா³னத³ஸ்ஸனட்டே²ன சக்கு² நாம. யதா²ஸபா⁴வதோ கிச்சபரிஜானனட்டே²ன ஸச்சி²கிரியபரிஜானனட்டே²ன ஞாணம் நாம. யதா²ஸபா⁴வதோ கிச்சபரிஜானனாதீ³னம் படிவிஜ்ஜி²த்வா பஜானனட்டே²ன பஞ்ஞா நாம. ததா² விதி³தகரணட்டே²ன விஜ்ஜா நாம. ஆலோகோபா⁴ஸகரணட்டே²ன ஆலோகோ நாம. இத³ம் சக்கா²தி³கம் ஸப்³ப³ம் பஞ்ஞாவேவசனமேவ. ‘‘இத³ம் து³க்க²ந்தி மே பி⁴க்க²வே…பே… உத³பாதீ³’’தி அயம் பஞ்ஞத்தி ஸச்சானம் தே³ஸனாய பஞ்ஞாபனதோ தே³ஸனாபஞ்ஞத்தி நாம, ஸுதமயியா பஞ்ஞாய நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம, அனஞ்ஞாதஞ்ஞஸ்ஸாமீதிந்த்³ரியஸ்ஸ ஸச்சி²கிரியாய ச பஞ்ஞாபனதோ ஸச்சி²கிரியாபஞ்ஞத்தி நாம, த⁴ம்மசக்கஸ்ஸ பவத்தனாய ச பஞ்ஞாபனதோ பவத்தனாபஞ்ஞத்தி நாம.

‘‘தம் கோ² பனித³ம் து³க்க²ம் பரிஞ்ஞேய்யம்…பே… உத³பாதீ³’’தி அயம் பஞ்ஞத்தி மக்³க³ஸ்ஸ பா⁴வனாய பஞ்ஞாபனதோ பா⁴வனாபஞ்ஞத்தி நாம, சிந்தாமயியா பஞ்ஞாய நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம, அஞ்ஞிந்த்³ரியஸ்ஸ ஸச்சி²கிரியாய ச பஞ்ஞாபனதோ ஸச்சி²கிரியாபஞ்ஞத்தி நாம.

‘‘தம் கோ² பனித³ம் து³க்க²ம் பரிஞ்ஞாதம்…பே… உத³பாதீ³’’தி அயம் பஞ்ஞத்தி மக்³க³ஸ்ஸ பா⁴வனாய பஞ்ஞாபனதோ பா⁴வனாபஞ்ஞத்தி நாம, பா⁴வனாமயியா பஞ்ஞாய நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம, அஞ்ஞாதாவினோ இந்த்³ரியஸ்ஸ ஸச்சி²கிரியாய ச பஞ்ஞாபனதோ ஸச்சி²கிரியாபஞ்ஞத்தி நாம, த⁴ம்மசக்கஸ்ஸ பவத்தனாய ச பஞ்ஞாபனதோ பவத்தனாபஞ்ஞத்தி நாம.

தேபரிவட்டவஸேன ஸச்சேஸு நானாவிதோ⁴ பஞ்ஞத்திபே⁴தோ³ ஆசரியேன விப⁴த்தோ, அம்ஹேஹி ச ஞாதோ, ‘‘கத²ம் குஸலாகுஸலாதி³வஸேன தே³ஸிதத⁴ம்மஸ்ஸ பஞ்ஞத்திபே⁴தோ³ விப⁴த்தோ’’தி வத்தப்³ப³த்தா ‘‘துலமதுலஞ்ச ஸம்ப⁴வ’’ந்திஆதி³ வுத்தம். அத² வா த⁴ம்மசக்கஸுத்தே பஞ்ஞத்திபே⁴தோ³ ஆசரியேன விப⁴த்தோ, அம்ஹேஹி ச ஞாதோ, ‘‘துலமதுலஞ்சாதிஆதி³கா³தா²ய கத²ம் பஞ்ஞத்திபே⁴தோ³ விப⁴த்தோ’’தி வத்தப்³ப³த்தா ‘‘துலமதுலஞ்சா’’திஆதி³ வுத்தம். துலீயதி பரிச்சி²ஜ்ஜீயதீதி துலம், காமாவசரகம்மம், நத்தி² துலம் ஸதி³ஸம் அஞ்ஞம் லோகியகம்மம் அஸ்ஸ மஹக்³க³தகம்மஸ்ஸாதி அதுலம், ரூபாரூபாவசரகம்மம். புனப்³ப⁴வம் ஸம்ப⁴வதி ஏதேன ஸங்கா²ரேனாதி ஸம்ப⁴வோ, தம் ஸம்ப⁴வம். புனப்³ப⁴வம் ஸங்க²ரோதீதி ப⁴வஸங்கா²ரோ. அஜ்ஜ²த்தே விபஸ்ஸனாவஸேன ரமதீதி அஜ்ஜ²த்தரதோ. ஸமத²வஸேன ஸமாதி⁴யதீதி ஸமாஹிதோ. அத்தனி ஸம்ப⁴வதீதி அத்தஸம்ப⁴வோ, தம் அத்தஸம்ப⁴வம். முனி ஸம்பு³த்³தோ⁴ ஸம்ப⁴வம் ப⁴வஸங்கா²ரம் துலஞ்ச அதுலஞ்ச அவஸ்ஸஜி, அஜ்ஜ²த்தரதோ ஸமாஹிதோ கவசம் அபி⁴ந்தி³ இவ, ஏவம் அத்தஸம்ப⁴வம் அபி⁴ந்தி³ பதா³லயீதி யோஜனா காதப்³பா³. அத² வா முனி ஸம்பு³த்³தோ⁴ ‘‘பஞ்சக்க²ந்தா⁴ அனிச்சா து³க்கா² அனத்தா விபரிணாமத⁴ம்மா, நிப்³பா³னம் பன நிச்சம் ஸுக²ம் அஸங்க²தம் அவிபரிணாமத⁴ம்ம’’ந்தி துலம் துலயந்தோ அதுலம் நிப்³பா³னம் தி³ஸ்வா ஸம்ப⁴வம் ப⁴வஸங்கா²ரம் அரியமக்³கே³ன அவஸ்ஸஜி. கத²ம் அவஸ்ஸஜி? ஸோ ஹி முனி விபஸ்ஸனாவஸேன அஜ்ஜ²த்தரதோ ச ஹுத்வா, ஸமத²வஸேன உபசாரப்பனாஸு ஸமாஹிதோ ச ஹுத்வா கவசம் அபி⁴ந்தி³ இவ, ஏவம் அத்தஸம்ப⁴வம் அத்தனி ஸஞ்ஜாதம் கிலேஸம் அபி⁴ந்தி³ பதா³லயி, கிலேஸாபா⁴வேன கம்மஞ்ச ஜஹீதி கா³தா²த்தோ² க³ஹேதப்³போ³.

‘‘துலமதுலஞ்ச ஸம்ப⁴வ’’ந்தி பஞ்ஞத்தி ஸப்³ப³த⁴ம்மானம் அபி⁴ஞ்ஞாய பஞ்ஞாபனதோ அபி⁴ஞ்ஞாபஞ்ஞத்தி நாம, த⁴ம்மபடிஸம்பி⁴தா³ய நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம, ‘‘ப⁴வஸங்கா²ரமவஸ்ஸஜி முனீ’’தி பஞ்ஞத்தி ஸமுத³யஸ்ஸ பரிச்சாக³ஸ்ஸ ச பஞ்ஞாபனதோ பரிச்சாக³பஞ்ஞத்தி நாம, து³க்க²ஸ்ஸ பரிஞ்ஞாய ச பஞ்ஞாபனதோ பரிஞ்ஞாபஞ்ஞத்தி நாம, ‘‘அஜ்ஜ²த்தரதோ ஸமாஹிதோ’’தி பஞ்ஞத்தி காயக³தாய ஸதியா பா⁴வனாய ச பஞ்ஞாபனதோ பா⁴வனாபஞ்ஞத்தி நாம, சித்தேகக்³க³தாய டி²தியா ச பஞ்ஞாபனதோ டி²திபஞ்ஞத்தி நாம, ‘‘அபி⁴ந்தி³ கவசமிவத்தஸம்ப⁴வ’’ந்தி பஞ்ஞத்தி சித்தஸ்ஸ அபி⁴னிப்³பி³தா³ய ச பஞ்ஞாபனதோ அபி⁴னிப்³பி³தா³பஞ்ஞத்தி நாம, ஸப்³ப³ஞ்ஞுதாய உபாதா³னஸ்ஸ ச பஞ்ஞாபனதோ உபாதா³னபஞ்ஞத்தி நாம, அவிஜ்ஜாண்ட³கோஸானம் பதா³லனாய ச பஞ்ஞாபனதோ பதா³லபஞ்ஞத்தி நாம, ‘‘யதா²வுத்தோ பஞ்ஞத்திப்பபே⁴தோ³ கேன ஸத்³த³ஹிதப்³போ³’’தி வத்தப்³ப³த்தா ‘‘தேனாஹா’’திஆதி³ வுத்தம். ததா²வுத்தஸ்ஸ பஞ்ஞத்திப்பபே⁴த³ஸ்ஸ ஸம்ப⁴வதோ ப⁴க³வா யம் ‘‘துலமதுல’’ந்திஆதி³கா³த²மாஹ, ததா²ஸம்ப⁴வதோ யதா²வுத்தாய கா³தா²ய யதா²வுத்தோ பஞ்ஞத்திப்பபே⁴தோ³ ஸத்³த³ஹிதப்³போ³தி.

‘‘துலமதுலஞ்சா’’திஆதி³கா³தா²யம் பஞ்ஞத்திப்பபே⁴தோ³ ஆசரியேன விப⁴த்தோ, அம்ஹேஹி ச ஞாதோ.

‘யோ து³க்க²மத்³த³க்கி² யதோனிதா³னம், காமேஸு ஸோ ஜந்து கத²ம் நமேய்ய;

காமா ஹி லோகே ஸங்கோ³தி ஞத்வா, தேஸம் ஸதீமா வினயாய ஸிக்கே²’தி. –

கா³தா²யம் பன கத²ம் பஞ்ஞத்திபே⁴தோ³ விப⁴த்தோ’’தி வத்தப்³ப³த்தா ‘‘யோ து³க்க²மத்³த³க்கீ²’’திஆதி³ வுத்தம். யோ ஆரத்³த⁴விபஸ்ஸகோ ஜந்து யதோனிதா³னம் ஸப்³ப³ம் தேபூ⁴மகம் ஹேதுப²லம் து³க்க²ம் அத்³த³க்கி², ஸோ ஆரத்³த⁴விபஸ்ஸகோ ஜந்து காமேஸு கத²ம் நமேய்ய நமேதும் நாரஹதி. காமா லோகே ‘‘ஸங்கோ³’’தி ஹி யஸ்மா பஸ்ஸிதப்³பா³, தஸ்மா நமேதும் நாரஹதி, இதி ஏதம் து³க்க²பா⁴வம் து³க்க²ஹேதுபா⁴வம் ஞத்வா தேஸம் காமானம் வினயாய வூபஸமாய ஸதிமா காயக³தாஸதிஸம்பன்னோ தீணி ஸிக்கா²னி ஸிக்கே² ஸிக்கே²ய்யாதி கா³தா²த்தோ² ஸங்கே²பேன விஞ்ஞாதப்³போ³. அட்ட²கதா²யம் (நேத்தி. அட்ட². 41) பன வித்தா²ரேன ஸம்வண்ணிதோ.

‘‘யோ து³க்க²’’ந்தி பஞ்ஞத்தி து³க்க²ஸ்ஸ வேவசனஸ்ஸ ச பரிஞ்ஞாய ச பஞ்ஞாபனதோ வேவசனபஞ்ஞத்தி, பரிஞ்ஞாபஞ்ஞத்தி ச ஹோதி. ‘‘யதோனிதா³ன’’ந்தி பஞ்ஞத்தி ஸமுத³யஸ்ஸ பப⁴வஸ்ஸ ச பஹானஸ்ஸ ச பஞ்ஞாபனதோ பப⁴வபஞ்ஞத்தி சேவ பஹானபஞ்ஞத்தி ச ஹோதி. ‘‘அத்³த³க்கீ²’’தி பஞ்ஞத்தி ஞாணசக்கு²ஸ்ஸ வேவசனஸ்ஸ ச படிவேத⁴ஸ்ஸ ச பஞ்ஞாபனதோ வேவசனபஞ்ஞத்தி சேவ படிவேத⁴பஞ்ஞத்தி ச ஹோதி. ‘‘காமேஸு ஸோ ஜந்து கத²ம் நமேய்யா’’தி பஞ்ஞத்தி காமதண்ஹாய வேவசனஸ்ஸ ச அனபி⁴னிவிஸஸ்ஸ ச பஞ்ஞாபனதோ வேவசனபஞ்ஞத்தி சேவ அனபி⁴னிவேஸபஞ்ஞத்தி ச ஹோதி. ‘‘காமா ஹி லோகே ஸங்கோ³தி ஞத்வா’’தி பஞ்ஞத்தி காமானம் பச்சத்தி²கதோ த³ஸ்ஸனஸ்ஸ ச பஞ்ஞாபனதோ த³ஸ்ஸனபஞ்ஞத்தி நாம. காமா ஹி அனத்த²ஜானனதோ பச்சத்தி²கஸதி³ஸா.

‘‘கீதி³ஸா ஹுத்வா அனத்த²ஜனகா’’தி புச்சி²தப்³ப³த்தா ‘‘காமா ஹீ’’திஆதி³ வுத்தம். காமா ராக³க்³கி³ஆதீ³ஹி அந்தோத³ய்ஹனதோ அங்கா³ரகாஸூபமா ச, பூதிபா⁴வாபஜ்ஜனதோ மம்ஸபேஸூபமா ச, ப³ஹி அஞ்ஞேன த³ய்ஹனதோ பாவககப்பா ஜலிதக்³கி³க்க²ந்தூ⁴பமா ச, பதிட்டா²னாபா⁴வதோ பபாதூபமா ச, விஸஸதி³ஸேஹி தோ³ஸாதீ³ஹி பரஹிம்ஸனதோ உரகோ³பமா ச. ‘‘தேஸம் ஸதீமா’’தி பஞ்ஞத்தி பஹானாய அபசயஸ்ஸ ச பஞ்ஞாபனதோ அபசயபஞ்ஞத்தி நாம, காயக³தாய ஸதியா நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம, மக்³க³ஸ்ஸ பா⁴வனாய ச பஞ்ஞாபனதோ பா⁴வனாபஞ்ஞத்தி நாம. ‘‘வினயாய ஸிக்கே²’’தி பஞ்ஞத்திராக³வினயஸ்ஸ தோ³ஸவினயஸ்ஸ மோஹவினயஸ்ஸ படிவேத⁴ஸ்ஸ ச பஞ்ஞாபனதோ படிவேத⁴பஞ்ஞத்தி நாம. ‘‘ஜந்தூ’’தி பஞ்ஞத்தி யோகி³ஸ்ஸ வேவசனஸ்ஸ ச பஞ்ஞாபனதோ வேவசனபஞ்ஞத்தி நாம.

‘‘ஜந்தூதி ஸாமஞ்ஞஸத்தவாசகோ ஸத்³தோ³ கஸ்மா யோகி³வாசகோதி விஞ்ஞாதப்³போ³’’தி வத்தப்³ப³த்தா ‘‘யதா³ ஹீ’’திஆதி³ வுத்தம். யோகீ³ யதா³ யஸ்மிம் காலே காமா ஸங்கோ³தி பஜானாதி, ததா³ தஸ்மிம் காலே ஸோ யோகீ³ காமானம் அனுப்பாதா³ய குஸலே த⁴ம்மே காயக³தாஸதிஆதீ³ஹி உப்பாத³யதி, ஸோ குஸலே த⁴ம்மே உப்பாதே³ந்தோ யோகீ³ அனுப்பன்னானம் குஸலானம் த⁴ம்மானம் உப்பாதா³ய வாயமதி குஸலவீரியம் கரோதி, தஸ்மா யோகீ³வாசகோ ஜந்துஸத்³தோ³தி விஞ்ஞாதப்³போ³. ‘‘ஜந்தூ’’தி அயம் பஞ்ஞத்தி அப்பத்தஸ்ஸ குஸலஸ்ஸ ஜா²னத⁴ம்மாதி³கஸ்ஸ பத்தியா வாயாமஸ்ஸ ச பஞ்ஞாபனதோ வாயாமபஞ்ஞத்தி நாம, ஓரமத்திகாய அஸந்துட்டி²யா நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம. ‘‘ஸோ அனுப்பன்னானம் குஸலானம் த⁴ம்மானம் உப்பாதா³ய வாயமதீ’’தி அயம் பஞ்ஞத்தி வாயாமபஞ்ஞத்தி, ‘‘ஹேதுஸோ உப்பன்னானம் குஸலானம் த⁴ம்மானம் டி²தியா வாயமதீதி பஞ்ஞத்தி கதமா பஞ்ஞத்தீ’’தி புச்சி²தப்³ப³த்தா ‘‘தத்த² ஸோ உப்பன்னான’’ந்திஆதி³ வுத்தம். தத்த² தஸ்மிம் ‘‘அனுப்பன்னான’’ந்திஆதி³ம்ஹி. ‘‘ஸோ உப்பன்னானம் குஸலானம் த⁴ம்மானம் டி²தியா வாயமதீ’’தி அயம் பஞ்ஞத்தி பா⁴வனாய அப்பமாத³ஸ்ஸ ச பஞ்ஞாபனதோ அப்பமாத³பஞ்ஞத்தி நாம, வீரியிந்த்³ரியஸ்ஸ நிக்கே²பஸ்ஸ ச பஞ்ஞாபனதோ நிக்கே²பபஞ்ஞத்தி நாம, குஸலானம் த⁴ம்மானம் ஆரக்க²ஸ்ஸ ச பஞ்ஞாபனதோ ஆரக்க²பஞ்ஞத்தி நாம, அதி⁴சித்தஸிக்கா²ய டி²தியா ச பஞ்ஞாபனதோ டி²திபஞ்ஞத்தி நாம. ‘‘கேன யதா²வுத்தப்பகாரோ பஞ்ஞத்திப்பபே⁴தோ³ ஸத்³த³ஹிதப்³போ³’’தி வத்தப்³ப³த்தா ‘‘தேனாஹா’’திஆதி³ வுத்தம்.

‘‘யோ து³க்க²மத்³த³க்கி² யதோனிதா³ன’’ந்திஆதி³கா³தா²ய பஞ்ஞத்திப்பபே⁴தோ³ ஆசரியேன விப⁴த்தோ, அம்ஹேஹி ச ஞாதோ.

‘‘மோஹஸம்ப³ந்த⁴னோ லோகோ, ப⁴ப்³ப³ரூபோவ தி³ஸ்ஸதி;

உபதி⁴ப³ந்த⁴னோ பா³லோ, தமஸா பரிவாரிதோ;

அஸ்ஸிரீ விய கா²யதி, பஸ்ஸதோ நத்தி² கிஞ்சனந்தி. –

கா³தா²யம் பன கத²ம் பஞ்ஞத்திப்பபே⁴தோ³ விப⁴த்தோ’’தி வத்தப்³ப³த்தா ‘‘மோஹஸம்ப³ந்த⁴னோ’’திஆதி³ வுத்தம். தத்த² மோஹஸம்ப³ந்த⁴னோதி மோஹஹேதுகேஹி ஸம்யோஜனேஹி ஸம்ப³ந்தோ⁴. லோகோதி அப்பஹீனஸம்யோஜனோ ஸத்தலோகோ. ப⁴ப்³ப³ரூபோவ தி³ஸ்ஸதீதி அப⁴ப்³போ³பி அத்தா ப⁴ப்³ப³ரூபோவ ப⁴ப்³ப³ஜாதிகோ விய பா³லானம் அவிபஸ்ஸகானம் தி³ஸ்ஸதி. உபதி⁴ப³ந்த⁴னோதி கிலேஸூபதீ⁴ஹி ப³ந்தி⁴தப்³போ³. யு-பச்சயோ ஹி கம்மத்தே² விஹிதோ. உபதீ⁴ஸு வா கிலேஸானம் ப³ந்த⁴னம் யஸ்ஸ பா³லஸ்ஸாதி உபதி⁴ப³ந்த⁴னோ. த்³வே அவட்³டி⁴யோ லாதி க³ண்ஹாதீதி பா³லோ. தமஸா ஸம்மோஹேன பரிவாரிதோ படிச்சா²தி³தோ பண்டி³தானம் விபஸ்ஸகானம் அஸ்ஸிரீ விய ஸிரீவிரஹிதோ விய கா²யதி உபட்டா²தி. பஸ்ஸதோ பஞ்ஞாசக்கு²னா பஸ்ஸந்தஸ்ஸ பண்டி³தஸ்ஸ கிஞ்சனம் நத்தீ²தி ஸங்கே²பத்தோ² த³ட்ட²ப்³போ³.

‘‘மோஹஸம்ப³ந்த⁴னோ லோகோ’’தி பஞ்ஞத்தி மோஹஸீஸேன க³ஹிதானம் விபல்லாஸானம் தே³ஸனாய பஞ்ஞாபனதோ தே³ஸனாபஞ்ஞத்தி நாம. ‘‘ப⁴ப்³ப³ரூபோவ தி³ஸ்ஸதீ’’தி பஞ்ஞத்தி லோகஸ்ஸ விபரீதஸ்ஸ விபரீதாகாரேன உபட்ட²ஹந்தஸ்ஸ பஞ்ஞாபனதோ விபரீதபஞ்ஞத்தி நாம. ‘‘உபதி⁴ப³ந்த⁴னோ பா³லோ’’தி பஞ்ஞத்தி பாபகானம் இச்சா²வசரானம் பப⁴வஸ்ஸ பஞ்ஞாபனதோ பப⁴வபஞ்ஞத்தி நாம. ‘‘உபதி⁴ப³ந்த⁴னோ பா³லோ’’தி பஞ்ஞத்தி பரியுட்டா²னானம் அகுஸலானம் த⁴ம்மானம் ப³ந்த⁴னகிச்சஸ்ஸ பஞ்ஞாபனதோ கிச்சபஞ்ஞத்தி நாம. ‘‘உபதி⁴ப³ந்த⁴னோ பா³லோ’’தி பஞ்ஞத்தி கிலேஸானம் ப³ந்த⁴னப³லமூஹனப³லானம் பஞ்ஞாபனதோ ப³லபஞ்ஞத்தி நாம. ‘‘உபதி⁴ப³ந்த⁴னோ பா³லோ’’தி பஞ்ஞத்தி ஸங்கா²ரானம் விருஹனாய பஞ்ஞாபனதோ விருஹனாபஞ்ஞத்தி நாம. ‘‘தமஸா பரிவாரிதோ’’தி பஞ்ஞத்தி அவிஜ்ஜந்த⁴காரஸ்ஸ தே³ஸனாய பஞ்ஞாபனதோ தே³ஸனாபஞ்ஞத்தி நாம, அவிஜ்ஜந்த⁴காரஸ்ஸ வேவசனஸ்ஸ ச பஞ்ஞாபனதோ வேவசனபஞ்ஞத்தி நாம. ‘‘அஸ்ஸிரீ விய கா²யதீ’’தி பஞ்ஞத்தி தி³ப்³ப³சக்கு²ஸ்ஸ த³ஸ்ஸனகிரியாய பஞ்ஞாபனதோ த³ஸ்ஸனபஞ்ஞத்தி நாம. ‘‘அஸ்ஸிரீ விய கா²யதீ’’தி பஞ்ஞத்தி பஞ்ஞாசக்கு²ஸ்ஸ நிக்கே²பஸ்ஸ பஞ்ஞாபனதோ நிக்கே²பபஞ்ஞத்தி நாம. ‘‘பஸ்ஸதோ நத்தி² கிஞ்சன’’ந்தி பஞ்ஞத்தி ஸத்தானம் அரியானம் படிவேத⁴ஸ்ஸ பஞ்ஞாபனதோ படிவேத⁴பஞ்ஞத்தி நாம.

‘‘கதமம் கிஞ்சன’’ந்தி புச்சி²தப்³ப³த்தா ‘‘ராகோ³ கிஞ்சன’’ந்திஆதி³ வுத்தம். ‘‘யதா²வுத்தோ பஞ்ஞத்திப்பபே⁴தோ³ கத²ம் அம்ஹேஹி ஸத்³த³ஹிதப்³போ³’’தி வத்தப்³ப³த்தா ‘‘தேனாஹா’’திஆதி³ வுத்தம். யதா²வுத்தஸ்ஸ பஞ்ஞத்திப்பபே⁴த³ஸ்ஸ ஸம்ப⁴வதோ ப⁴க³வா யம் ‘‘மோஹஸம்ப³ந்த⁴னோ’’திஆதி³மாஹ, ததா²ஸம்ப⁴வதோ தாய கா³தா²ய யதா²வுத்தோ பஞ்ஞத்திப்பபே⁴தோ³ கா³தா²னுஸாரேன ஸத்³த³ஹிதப்³போ³.

‘‘மோஹஸம்ப³ந்த⁴னோ லோகோ’’திஆதி³கா³தா²ய பஞ்ஞத்திப்பபே⁴தோ³ ஆசரியேன விப⁴த்தோ, அம்ஹேஹி ச ஞாதோ, ‘‘அத்தி², பி⁴க்க²வே, அஜாத’ந்திஆதி³பாட²ஸ்ஸ பஞ்ஞத்திப்பபே⁴தோ³ கத²ம் விப⁴த்தோ’’தி புச்சி²தப்³ப³த்தா ‘‘அத்தி² பி⁴க்க²வே’’திஆதி³பாளிமாஹ. ‘‘ஸா பன பாளி கிமத்த²ம் ப⁴க³வதா வுத்தா’’தி சே புச்சே²ய்ய? பரமத்த²தோ அவிஜ்ஜமானத்தா நிப்³பா³னம் நத்தி², தஸ்மா ‘‘அத்தி² நிப்³பா³ன’’ந்தி வசனம் ஸஸவிஸாணவசனம் விய அனத்த²ம், வோஹாரமத்தமேதந்தி வத³ந்தானம் மிச்சா²வாத³ம் ப⁴ஞ்ஜிதும் ப⁴க³வதா வுத்தாதி த³ட்ட²ப்³பா³.

குதோசிபி அஜாதத்தா அபூ⁴தத்தா அஜாதம் அபூ⁴தம். பச்சயேஹி அகதத்தா அகதம். ஸங்க²தாபா⁴வதோ அஸங்க²தம் நிப்³பா³னம் அத்தி². ஏதம் அஜாதாதி³கம் நிப்³பா³னம் நோ சே அப⁴விஸ்ஸ, ஏவம் ஸதி நிஸ்ஸரணம் ந பஞ்ஞாயேத², நிப்³பா³னஸ்ஸ ச அரியமக்³க³ப²லானம் ஆரம்மணத்தா, மக்³க³ப²லானஞ்ச கிலேஸானம் ஸமுச்சி²ந்த³னதோ படிப்பஸ்ஸம்ப⁴னதோ, ஸமுச்சி²ந்த³னேன ச திவித⁴ஸ்ஸ வட்டஸ்ஸ அபவட்டனதோ அஜாதாதி³கம் நிப்³பா³னம் அத்தி²யேவாதி த³ட்ட²ப்³ப³ம்.

‘‘அத்தி², பி⁴க்க²வே, அஜாதம்…பே… அஸங்க²த’’ந்தி அயம் பஞ்ஞத்தி நிப்³பா³னஸ்ஸ தே³ஸனாபஞ்ஞத்தி ச நிப்³பா³னஸ்ஸ வேவசனபஞ்ஞத்தி ச ஹோதி. ‘‘நயித⁴ ஜாதஸ்ஸ…பே… பஞ்ஞாயேதா²’’தி அயம் பஞ்ஞத்தி ஸங்க²தஸ்ஸ வேவசனபஞ்ஞத்தி ச ஸங்க²தஸ்ஸ உபனயனபஞ்ஞத்தி ச ஹோதி. ‘‘யஸ்மா ச…பே… அஸங்க²த’’ந்தி அயம் பஞ்ஞத்தி நிப்³பா³னஸ்ஸ வேவசனபஞ்ஞத்தி ச நிப்³பா³னஸ்ஸ ஜோதனாபஞ்ஞத்தி ச ஹோதி. ‘‘யஸ்மா ஜாதஸ்ஸ…பே… பஞ்ஞாயதீ’’தி அயம் பஞ்ஞத்தி நிப்³பா³னஸ்ஸ வேவசனபஞ்ஞத்தி ச மக்³க³ஸ்ஸ ஸம்ஸாரதோ நிய்யானிகபஞ்ஞத்தி ச நிஸ்ஸரணபஞ்ஞத்தி ச ஹோதீதி பஞ்ஞத்திவிஸேஸோ பண்டி³தேஹி நித்³தா⁴ரேத்வா க³ஹேதப்³போ³.

‘‘யதா²வுத்தோ நிப்³பா³னஸ்ஸ பஞ்ஞத்திப்பபே⁴தோ³ கேன ஸத்³த³ஹிதப்³போ³’’தி வத்தப்³ப³த்தா ‘‘தேனாஹ ப⁴க³வா’’திஆதி³ வுத்தம். ‘‘தேனாஹ ஆயஸ்மா’’திஆத்³யானுஸந்த்⁴யாதி³அத்தோ² சேவ ‘‘நியுத்தோ பஞ்ஞத்திஹாரோ’’தி அனுஸந்த்⁴யாதி³அத்தோ² ச வுத்தனயானுஸாரேன வேதி³தப்³போ³.

இதி பஞ்ஞத்திஹாரவிப⁴ங்கே³ ஸத்திப³லானுரூபா ரசிதா

விபா⁴வனா நிட்டி²தா.

பண்டி³தேஹி பன அட்ட²கதா²டீகானுஸாரேன க³ம்பீ⁴ரத்தோ² வித்தா²ரதோ விப⁴ஜித்வா க³ஹேதப்³போ³தி.