7. ஆவட்டஹாரவிப⁴ங்க³விபா⁴வனா

29. யேன யேன ஸம்வண்ணனாவிஸேஸபூ⁴தேன சதுப்³யூஹஹாரவிப⁴ங்கே³ன நேருத்தாத³யோ விப⁴த்தா, ஸோ…பே… சதுப்³யூஹஹாரவிப⁴ங்கோ³ பரிபுண்ணோ, ‘‘கதமோ ஆவட்டோ ஹாரவிப⁴ங்கோ³’’தி புச்சி²தப்³ப³த்தா தத்த² கதமோ ஆவட்டோ ஹாரோ’’திஆதி³ வுத்தம். தத்த² தத்தா²தி தேஸு நித்³தி³ட்டே²ஸு ஸோளஸஸு தே³ஸனாஹாராதீ³ஸு கதமோ ஸம்வண்ணனாவிஸேஸோ ஆவட்டோ ஹாரோ ஆவட்டஹாரவிப⁴ங்கோ³ நாமாதி புச்ச²தி. ‘‘ஏகம்ஹி பத³ட்டா²னே’’ந்திஆதி³னித்³தே³ஸஸ்ஸ இதா³னி மயா வுச்சமானோ ‘‘ஆரம்ப⁴தா²’’திஆதி³கோ வித்தா²ரஸம்வண்ணனாவிஸேஸோ ஆவட்டஹாரவிப⁴ங்கோ³ நாமாதி க³ஹிதோ. ‘‘தத்த² தே³ஸனாயம் ஏகஸ்மிம் பத³ட்டா²னே தே³ஸனாருள்ஹே ஸேஸகம் பத³ட்டா²னம் பரியேஸதி, பரியேஸித்வா கத²ம் படிபக்கே² ஆவட்டேதீ’’தி வத்தப்³ப³த்தா –

‘‘ஆரம்ப⁴த² நிக்கமத², யுஞ்ஜத² பு³த்³த⁴ஸாஸனே;

து⁴னாத² மச்சுனோ ஸேனம், நளாகா³ரம்வ குஞ்ஜரோ’’தி. –

கா³தா² வுத்தா. இத⁴ கா³தா²யம் ஏகஸ்மிம் பத³ட்டா²னே தே³ஸனாருள்ஹே ஸேஸகம் பத³ட்டா²னம் பரியேஸதீதி வுத்தம் ஹோதி. கா³தா²த்தோ² பன அட்ட²கதா²யம் (நேத்தி. அட்ட². 29) வுத்தோ.

‘‘ஆரம்ப⁴தா²’திஆதி³கா³தா²யம் கதரஸ்மிம் பத³ட்டா²னே தே³ஸனாருள்ஹே கதமம் ஸேஸகம் பத³ட்டா²னம் பரியேஸதீ’’தி வத்தப்³ப³த்தா ‘‘ஆரம்ப⁴த² நிக்கமதா²தி வீரியஸ்ஸ பத³ட்டா²ன’’ந்திஆதி³ வுத்தம். தத்த² ‘‘வீரியஸ்ஸ பத³ட்டா²ன’’ந்தி ஸாமஞ்ஞவஸேன வுத்தம்பி ஆரம்ப⁴தா⁴துஸங்கா²தம் வீரியம் நிக்கமதா⁴துஸங்கா²தஸ்ஸ வீரியஸ்ஸ பத³ட்டா²னம், நிக்கமதா⁴துஸங்கா²தம் வீரியம் பரக்கமதா⁴துஸங்கா²தஸ்ஸ வீரியஸ்ஸ பத³ட்டா²னம், பரக்கமதா⁴துஸங்கா²தம் வீரியம் ஸமத²பா⁴வனாஸஹிதஸ்ஸ வீரியஸ்ஸ பத³ட்டா²னந்திஆதி³னா பரியேஸிதப்³ப³ந்தி க³ஹேதப்³ப³ம். ‘‘யுஞ்ஜதா²’’தி இமினா வுத்தம் ஸமத²பா⁴வனாஸஹிதம் வீரியம் ‘‘பு³த்³த⁴ஸாஸனே’’தி இமினா வுத்தஸ்ஸ மஹக்³க³தஸமாதி⁴ஸ்ஸ பத³ட்டா²னம், தே³ஸனாருள்ஹம் ஸுகா²தி³கம் ஸேஸகம்பி பத³ட்டா²னம் பரியேஸிதப்³ப³ம். ‘‘து⁴னாத² மச்சுனோ ஸேன’’ந்தி பதே³ன க³ஹிதம் விபஸ்ஸனாஸஹிதம் வீரியம் கிலேஸது⁴னனே ஸமத்தா²ய பஞ்ஞாய பத³ட்டா²னம், தே³ஸனாருள்ஹம் ஸமாதி⁴ஆதி³கம் ஸேஸகம்பி பத³ட்டா²னம் பரியேஸிதப்³ப³ம்.

‘‘யதி³ ‘ஆரம்ப⁴தா²’திஆதி³கம் வுத்தம் வீரியம் ஸாமஞ்ஞபூ⁴தானம் வீரியஸமாதி⁴பஞ்ஞானம்யேவ பத³ட்டா²னம் ஸியா, ஏவம் ஸதி கத²ம் வட்டமூலம் சி²ந்தி³த்வா விவட்டம் பாபேஸ்ஸந்தீ’’தி வத்தப்³ப³த்தா புன ‘‘ஆரம்ப⁴த² நிக்கமதா²தி வீரியிந்த்³ரியஸ்ஸ பத³ட்டா²ன’’ந்திஆதி³ வுத்தம். ஆதி⁴பச்சகிச்சதாய யுத்தஸ்ஸாபி வீரியாதி⁴கஸ்ஸ பத³ட்டா²னத்தா ஆரப⁴ந்தா யோகா³வசரபுக்³க³லா வட்டமூலம் சி²ந்தி³த்வா விவட்டம் பாபேந்தீதி வுத்தம் ஹோதி. ‘‘ஆரம்ப⁴தா²’’திஆதி³கா பன யஸ்மா வீரியாரம்ப⁴வத்து²ஆதி³தே³ஸனா ஹோதி, தஸ்மா ஆரம்ப⁴வத்து²ஆதீ³னியேவ ஸம்வண்ணிதானி பத³ட்டா²னந்தி சோத³னம் மனஸி கத்வா ஆஹ ‘‘இமானி பத³ட்டா²னானி தே³ஸனா’’தி. ‘‘ஆரம்ப⁴தா²’’திஆதி³கா யதா²வுத்தபத³ட்டா²னானி தே³ஸனா ஹோதி, ந வீரியாரம்ப⁴வத்து²ஆதீ³னி, தஸ்மா பத³ட்டா²னம்யேவ ஸம்வண்ணிதந்தி த³ட்ட²ப்³ப³ம்.

ஏவம் ‘‘ஆரம்ப⁴தா²’’திஆதி³தே³ஸனாய பத³ட்டா²னவஸேன அத்தோ² விப⁴த்தோ, அம்ஹேஹி ச ஞாதோ, ‘‘கத²ம் தஸ்ஸாயேவ தே³ஸனாய படிபக்க²வஸேன அத்தோ² விப⁴ஜிதப்³போ³’’தி வத்தப்³ப³த்தா ‘‘அயுஞ்ஜந்தானம் வா’’திஆதி³ வுத்தம். தத்த² யோகே³ பா⁴வனாயம் அயுஞ்ஜந்தானம் ஸத்தானம் அபரிபக்கஞாணானம் யோகே³ யோக³ஹேது வாஸனாபா⁴கி³யவஸேன ஆயதிம் ஜானனத்தா²ய ‘‘ஆரம்ப⁴தா²’’திஆதி³தே³ஸனா ஆரத்³தா⁴. யுஞ்ஜந்தானம் பரிபக்கஞாணானம் ஸத்தானம் ஆரம்பே⁴ ஆரம்ப⁴ஹேது தி³ட்டே²வ த⁴ம்மே பரிஜானனத்தா²ய ‘‘ஆரம்ப⁴தா²’’திஆதி³தே³ஸனா ஆரத்³தா⁴.

தத்த² தேஸு யுஞ்ஜந்தாயுஞ்ஜந்தேஸு பரிபக்காபரிபக்கஞாணேஸு யே அபரிபக்கஞாணா ஸத்தா ந யுஞ்ஜந்தி, தே அபரிபக்கஞாணா ஸத்தா பமாத³மூலகா ஹுத்வா யோகே³ பா⁴வனாயம் யேன பமாதே³ன ந யுஞ்ஜந்தி, ஸோ பமாதோ³ தண்ஹாமூலகோ பமாதோ³, அவிஜ்ஜாமூலகோ பமாதோ³தி து³ப்³பி³தோ⁴ ஹோதி. தத்த² தஸ்மிம் து³ப்³பி³தே⁴ பமாதே³ அஞ்ஞாணேன நிவுதோ அவிஜ்ஜாமூலகோ ஸத்தோ யேன பமாதே³ன ஞேய்யட்டா²னம் ‘‘இமே உப்பாத³வயத⁴ம்மா பஞ்சக்க²ந்தா⁴ ஞேய்யட்டா²னம் நாமா’’தி நப்பஜானாதி, அயம் அஞ்ஞாணஹேதுகோ பமாதோ³ அவிஜ்ஜாமூலகோ பமாதா³ நாம. யோ பமாதோ³ தண்ஹாமூலகோ, ஸோ பமாதோ³ திவிதோ⁴ அனுப்பன்னானம் போ⁴கா³னம் உப்பாதா³ய பரியேஸந்தோ தண்ஹிகோ ஸத்தோ யம் பமாத³ம் ஆபஜ்ஜதி, அயம் பமாதோ³ ச, உப்பன்னானம் போ⁴கா³னம் டி²தத்தா²ய ரக்க²ந்தோ தண்ஹிகோ ஸத்தோ ஆரக்க²னிமித்தம் யம் பமாத³ம் ஆபஜ்ஜதி, அயம் பமாதோ³ ச, டி²தம் போ⁴க³ம் பரிபு⁴ஞ்ஜந்தோ தண்ஹிகோ ஸத்தோ பரிபோ⁴க³னிமித்தம் யம் பமாத³ம் ஆபஜ்ஜதி, அயம் பமாதோ³ சாதி திவிதோ⁴ ஹோதி. இதி லோகே அயம் பமாதோ³ சதுப்³பி³தோ⁴ அவிஜ்ஜாபத³ட்டா²னோ ஏகவிதோ⁴ பமாதோ³, தண்ஹாபத³ட்டா²னோ திவிதோ⁴ பமாதோ³தி சதுப்³பி³தோ⁴ ஹோதி. தத்த² தாஸு அவிஜ்ஜாதண்ஹாஸு நாமகாயோ ப²ஸ்ஸாதி³னாமஸமூஹோ அவிஜ்ஜாய பத³ட்டா²னம், ரூபகாயோ பத²வீஆதி³ரூபஸமூஹோ தண்ஹாய பத³ட்டா²னம் ஹோதி. இத³ம் வுத்தம் ஹோதி – ஆரம்ப⁴தா⁴துனிக்கமதா⁴துஸங்கா²தஸ்ஸ வீரியஸ்ஸ படிபக்கோ² சதுப்³பி³தோ⁴ பமாதோ³ நித்³தா⁴ரேதப்³போ³, நித்³தா⁴ரேத்வா ஏகவித⁴ஸ்ஸ பமாத³ஸ்ஸ அவிஜ்ஜா பத³ட்டா²னம், திவித⁴ஸ்ஸ பமாத³ஸ்ஸ தண்ஹா பத³ட்டா²னம். அவிஜ்ஜாய நாமகாயோ பத³ட்டா²னம், தண்ஹாய ரூபகாயோ பத³ட்டா²னந்தி படிபக்கே² ஆவட்டேத்வா பத³ட்டா²னம் பரியேஸிதப்³ப³ந்தி.

‘‘கஸ்மா நாமகாயோ அவிஜ்ஜாய பத³ட்டா²னம் ப⁴வதி, ரூபகாயோ தண்ஹாய பத³ட்டா²னம் ப⁴வதீ’’தி புச்சி²தப்³ப³த்தா ‘‘தம் கிஸ்ஸ ஹேதூ’’தி புச்சி²த்வா ‘‘ரூபீஸு ப⁴வேஸு அஜ்ஜோ²ஸானம், அரூபீஸு ஸம்மோஹோ’’தி வுத்தம். ரூபீஸு ப⁴வேஸு ரூபத⁴ம்மேஸு அஹம்மமாதி³வஸேன அஜ்ஜோ²ஸானம் தண்ஹாபி⁴னிவேஸோ ஸத்தேஸு பதிட்டி²தோ யஸ்மா ஹோதி, தஸ்மா ரூபகாயோ தண்ஹாய பத³ட்டா²னம் ப⁴வதி. அனமதக்³கே³ ஹி ஸம்ஸாரே இத்தி²புரிஸா அஞ்ஞமஞ்ஞரூபாபி⁴ராமா ப⁴வந்தி. அரூபீஸு ப²ஸ்ஸாதீ³ஸு ஸுகு²மபா⁴வதோ ஸம்மோஹோ ஸத்தேஸு பதிட்டி²தோ யஸ்மா ஹோதி, தஸ்மா நாமகாயோ அவிஜ்ஜாய பத³ட்டா²னம் ப⁴வதீதி யோஜனா காதப்³பா³. இத³ம் வுத்தம் ஹோதி – ரூபகாயனாமகாயேஸு ஆரம்மணகரணவஸேன தண்ஹாய ச அவிஜ்ஜாய ச உப்பஜ்ஜனதோ ரூபகாயோ தண்ஹாய பத³ட்டா²னம், நாமகாயோ அவிஜ்ஜாய பத³ட்டா²னந்தி நீஹரிதப்³பா³வாதி.

‘‘கதமோ ரூபகாயோ, கதமோ நாமகாயோ’’தி புச்சி²தப்³ப³த்தா ‘‘தத்த² ரூபகாயோ ரூபக்க²ந்தோ⁴, நாமகாயோ சத்தாரோ அரூபினோ க²ந்தா⁴’’தி வுத்தம். தத்த² தேஸு ரூபகாயனாமகாயேஸு ரூபகாயோ ரூபஸமூஹோ நாம ரூபக்க²ந்தோ⁴ ஹோதி, நாமகாயோ நாமஸமூஹோ நாம சத்தாரோ அரூபினோ க²ந்தா⁴தி. இமே பஞ்சக்க²ந்தா⁴ அவிஜ்ஜாதண்ஹானம் ஆரம்மணத்தா ஸஉபாதா³னா ப⁴வேய்யும், ‘‘கதமேன உபாதா³னேன ஸஉபாதா³னா ப⁴வந்தீ’’தி புச்சி²தப்³ப³த்தா ததே²வ புச்சி²த்வா விஸ்ஸஜ்ஜேதும் ‘‘இமே பஞ்சக்க²ந்தா⁴ கதமேன உபாதா³னேன ஸஉபாதா³னா? தண்ஹாய ச அவிஜ்ஜாய சா’’தி வுத்தம். தத்த² உபாதா³னபூ⁴தாய தண்ஹாய ச உபாதா³னபூ⁴தாய அவிஜ்ஜாய ச இமே பஞ்சக்க²ந்தா⁴ ஸஉபாதா³னா நாம ப⁴வந்தீதி யோஜனா காதப்³பா³.

‘‘கித்தகானி உபாதா³னானி தண்ஹா நாம ப⁴வந்தி, கித்தகானி உபாதா³னானி அவிஜ்ஜா நாம ப⁴வந்தீ’’தி புச்சி²தப்³ப³த்தா ‘‘தத்த² தண்ஹா த்³வே’’திஆதி³ வுத்தம். தத்தா²தி தாஸு தண்ஹாஅவிஜ்ஜாஸு. காமுபாதா³னஞ்ச ஸீலப்³ப³துபாதா³னஞ்ச த்³வே உபாதா³னானி தண்ஹா நாம ப⁴வந்தி. தண்ஹாவஸேன ஹி ‘‘மம ஸீலம், மம வத’’ந்தி பராமஸனம் ப⁴வதி. தி³ட்டு²பாதா³னஞ்ச அத்தவாது³பாதா³னஞ்ச த்³வே உபாதா³னானி அவிஜ்ஜா நாம ப⁴வந்தி. அவிஜ்ஜாவஸேன ஹி ஸஸ்ஸததி³ட்டி² சேவ அஹம்மமாதி³தி³ட்டி² ச ப⁴வந்தி. ‘‘இமேஹி சதூஹி உபாதா³னேஹி ஸஉபாதா³னக்க²ந்தா⁴ சதூஸு ஸச்சேஸு கித்தகம் ஸச்சம் நாமா’’தி புச்சி²தப்³ப³த்தா ‘‘இமேஹீ’’திஆதி³ வுத்தம். யே லோகியக்க²ந்தா⁴ ஸஉபாதா³னா க²ந்தா⁴ ப⁴வந்தி, உபாதா³னேன ஹி உபாதா³னானிபி ப⁴வந்தி, இத³ம் ஸஉபாதா³னக்க²ந்த⁴பஞ்சகம் து³க்க²ம் து³க்க²ஸச்சம் நாம. யானி சத்தாரி உபாதா³னானி து³க்க²காரணானி ப⁴வந்தி, அயம் உபாதா³னசதுக்கோ ஸமுத³யோ ஸமுத³யஸச்சம் நாம ப⁴வதி. பஞ்சக்க²ந்தா⁴தி ஸஉபாதா³னா பஞ்சக்க²ந்தா⁴ து³க்க²வத்து²பா⁴வதோ து³க்க²ம். தேஸந்தி ஸஉபாதா³னானம் பஞ்சக்க²ந்தா⁴னம். த⁴ம்மம் தே³ஸேதீதி ‘‘ஆரம்ப⁴தா²’’திஆதி³கம் த⁴ம்மம் வேனேய்யானுரூபம் ப⁴க³வா தே³ஸேதி. ஸாமஞ்ஞேன புப்³பே³ வுத்தம்பி அத்த²வஸேன விஸேஸம் த³ஸ்ஸேதும் புன ‘‘து³க்க²ஸ்ஸ பரிஞ்ஞாய, ஸமுத³யஸ்ஸ பஹானாயா’’தி வுத்தம்.

30. ஆரம்ப⁴படிபக்க²பூ⁴தபமாத³வஸேன புரிமஸச்சத்³வயம் ஆசரியேன நித்³தா⁴ரிதம், அம்ஹேஹி ச ஞாதம், ‘‘இதரஸச்சத்³வயம் கத²ம் நித்³தா⁴ரிதப்³ப³’’ந்தி வத்தப்³ப³த்தா தம் த்³வயம்பி பமாத³முகே²னேவ நித்³தா⁴ரிதப்³ப³ந்தி த³ஸ்ஸேதும் ‘‘தத்த² யோ திவிதோ⁴’’திஆதி³ வுத்தம். தத்த² தத்தா²தி தேஸு தண்ஹாமூலகஅவிஜ்ஜாமூலகேஸு பமாதே³ஸு. தஸ்ஸாதி திவித⁴ஸ்ஸ தண்ஹாமூலகஸ்ஸ பமாத³ஸ்ஸ. ஸம்படிவேதே⁴னாதி அஸ்ஸாதா³தீ³னம் பரிஜானனேன. ரக்க²ணாதி அத்தசித்தஸ்ஸ ரக்க²ணஸங்கா²தா. படிஸம்ஹரணாதி ‘‘தஸ்ஸா’’தி இமினா வுத்தஸ்ஸ பமாத³ஸ்ஸ படிபக்க²பூ⁴தேன அப்பமாதா³னனுயோகே³ன ஸம்ஹரணா யா கே²பனா அத்தி², அயம் பமாத³ஸ்ஸ படிபக்க²பூ⁴தேன அப்பமாதா³னுயோகே³ன பவத்தா கே²பனஸங்கா²தா பா⁴வனா ஸமதோ² நாமாதி பமாத³ஸ்ஸ படிபக்க²முகே²ன புன ஆவட்டேத்வா ஸமதோ² நித்³தா⁴ரிதோதி.

‘‘ஸோ ஸமதோ² கத²ம் கேன உபாயேன ப⁴வதீ’’தி புச்சி²தப்³ப³த்தா ததா² புச்சி²த்வா உபாயம் த³ஸ்ஸேதும் ‘‘ஸோ கத²’’ந்திஆதி³ வுத்தம். தத்த² கத²ந்தி கேன உபாயேன. ‘‘காமேந்தீதி காமா, காமீயந்தீதி வா காமா’’தி வுத்தானம் த்³வின்னம் காமானம் படிச்ச உப்பஜ்ஜமானம் அஸ்ஸாத³ஞ்ச, ‘‘அப்பஸ்ஸாதா³ காமா ப³ஹுது³க்கா²’’திஆதி³ (ம. நி. 1.235) வசனதோ அப்பஸ்ஸாத³னீயானம் காமானம் படிச்ச உப்பஜ்ஜமானம் ஆதீ³னவஞ்ச. காமானந்தி ச கம்மத்தே² ஸாமிவசனம். தேன வுத்தம் –‘‘காமே படிச்சா’’தி (நேத்தி. அட்ட². 30). ‘‘காமானமேதம் நிஸ்ஸரணம், யதி³த³ம் நேக்க²ம்ம’’ந்தி (இதிவு. 72) வசனதோ நிஸ்ஸரணந்தி இத⁴ பட²மஜ்ஜா²னம் அதி⁴ப்பேதம். வோகாரந்தி ஏத்த² வ-காரோ ஆக³மோ, ஓ-காரம் லாமகபா⁴வம். ஆனிஸம்ஸந்தி சதுபாரிஸுத்³தி⁴ஸீலாதி³கம். யதா³ ஜானாதி, ததா³ தேன உபாயேன ஸமதோ² ப⁴வதீதி அத்தோ².

ஸமதோ² ஆசரியேன விப⁴த்தோ, அம்ஹேஹி ச ஞாதோ, ‘‘கதமா விபஸ்ஸனா’’தி புச்சி²தப்³ப³த்தா விபஸ்ஸனம் விப⁴ஜிதும் ‘‘தத்த² யா வீமம்ஸா’’திஆதி³ வுத்தம். அத² வா காமானம் அஸ்ஸாதா³த³யோ யதா³ ஜானாதி, ததா³ ஸமதோ² ப⁴வதீதி வுத்தோ, ‘‘தஸ்மிம் ஸமதே² ப⁴வமானே ஸதி கதமா ப⁴வதீ’’தி புச்சி²தப்³ப³த்தா ‘‘தத்த² யா வீமம்ஸா’’திஆதி³ வுத்தம். தத்த² தத்தா²தி தஸ்மிம் ஸமதே² ப⁴வமானே ஸதி அஸ்ஸாதா³தீ³னம் யா அனிச்சாதி³வீமம்ஸா உபபரிக்கா² பஞ்ஞா ப⁴வதி, அயம் வீமம்ஸா உபபரிக்கா² பஞ்ஞா விஸேஸேன பஸ்ஸனதோ விபஸ்ஸனா நாம. அத² வா திவித⁴ஸ்ஸ தண்ஹாமூலகஸ்ஸ பமாத³ஸ்ஸ ஸம்படிவேதே⁴ன ரக்க²ணா படிஸம்ஹரணா, அயம் ஸமதோ²தி ஆசரியேன வுத்தோ, ‘‘கதமா விபஸ்ஸனா’’தி புச்சி²தப்³ப³த்தா ‘‘தத்த² யா வீமம்ஸா’’திஆதி³ வுத்தம். தத்த² தத்தா²தி தஸ்மிம் யதா²வுத்தே ஸமதே² ஸதி யதா²வுத்தஸ்ஸ பமாத³ஸ்ஸ அனிச்சாதி³வஸேன யா வீமம்ஸா உபபரிக்கா² பஞ்ஞா உப்பன்னா, அயம் வீமம்ஸா உபபரிக்கா² பஞ்ஞா விஸேஸேன பஸ்ஸனதோ விபஸ்ஸனா நாம. வீமம்ஸாவ து³ப்³ப³லா, உபபரிக்கா² ப³லவதீதி விஸேஸோ.

ஸமதோ² சேவ விபஸ்ஸனா ச த்³வே த⁴ம்மா ஆசரியேன நித்³தா⁴ரிதா, ‘‘இமே நித்³தா⁴ரிதா த்³வே த⁴ம்மா கிம் க³ச்ச²ந்தீ’’தி வத்தப்³ப³த்தா ‘‘இமே த்³வே’’திஆதி³ வுத்தம். ஸமதோ² ஸமத²பா⁴வனாபாரிபூரிம் க³ச்ச²தி, விபஸ்ஸனா விபஸ்ஸனாபா⁴வனாபாரிபூரிம் க³ச்ச²தி. ‘‘இமேஸு த்³வீஸு த⁴ம்மேஸு பா⁴வியமானேஸு கதமே யோகா³வசரேன பஹீயந்தீ’’தி வத்தப்³ப³த்தா ‘‘இமேஸூ’’திஆதி³ வுத்தம். ஸமதே² த⁴ம்மே பா⁴வியமானே தண்ஹா யோகா³வசரேன பஹீயதி, விபஸ்ஸனாய பா⁴வியமானாய அவிஜ்ஜா யோகா³வசரேன பஹீயதீதி இமே த்³வே பஹாதப்³பா³ த⁴ம்மா பஹீயந்தி தண்ஹா சேவ அவிஜ்ஜா ச. ‘‘இமேஸு த்³வீஸு த⁴ம்மேஸு பஹீயமானேஸு கதமே த⁴ம்மா நிருஜ்ஜ²ந்தீ’’தி புச்சி²தப்³ப³த்தா உபாதா³னாத³யோபி நிருஜ்ஜ²ந்தீதி ஸகலவட்டது³க்க²னிரோத⁴ம் த³ஸ்ஸேந்தோ ‘‘இமேஸு த்³வீஸு த⁴ம்மேஸு பஹீனேஸூ’’திஆதி³மாஹ. தத்த² தண்ஹாய ஸமத²பா⁴வனாய பஹீயமானாய, அவிஜ்ஜாய விபஸ்ஸனாபா⁴வனாய பஹீயமானாய இமேஸு த்³வீஸு த⁴ம்மேஸு த்³வீஹி பா⁴வனாஹி பஹீனேஸு காமுபாதா³னாதீ³னி சத்தாரி உபாதா³னானி விக்க²ம்ப⁴னஸமுச்சே²த³வஸேன நிருஜ்ஜ²ந்தி, ந ப⁴ங்க³க்க²ணவஸேன.

ஏத்தா²ஹ – ‘‘தண்ஹானிரோதா⁴ உபாதா³னனிரோதோ⁴’’தி வுத்தத்தா ‘‘தண்ஹாய பஹீயமானாய உபாதா³னானி நிருஜ்ஜ²ந்தீ’’தி வசனம் யுத்தம் ஹோது, கத²ம் அவிஜ்ஜாய பஹீயமானாய உபாதா³னானி நிருஜ்ஜ²ந்தீதி? ‘‘தண்ஹானிரோதா⁴ உபாதா³னனிரோதோ⁴’’தி பாடே² அவிஜ்ஜாஸஹிததண்ஹானிரோதா⁴ உபாதா³னனிரோதோ⁴தி அத்த²ஸம்ப⁴வதோ. யதா² ஹி தண்ஹாஸஹிதாவ அவிஜ்ஜா ஸங்கா²ரானம் பச்சயோ, ஏவம் அவிஜ்ஜாஸஹிதாவ தண்ஹா உபாதா³னானம் பச்சயோ ஹோதீதி அவிஜ்ஜாஸஹிததண்ஹானிரோதா⁴ உபாதா³னனிரோதோ⁴தி அத்தோ² ஸம்ப⁴வதீதி க³ஹேதப்³போ³. விக்க²ம்ப⁴னஸமுச்சே²த³வஸேன உபாதா³னனிரோதா⁴ ததே²வ ப⁴வனிரோதோ⁴தி ஏஸ நயோ ஸேஸேஸுபி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴தி ஏத்தா²பி தண்ஹாஸஹிதஅவிஜ்ஜானிரோதா⁴ ஸங்கா²ரனிரோதோ⁴திஆதி³கோ க³ஹிதோதி த³ட்ட²ப்³போ³. இதீதி ஏவம் விஸபா⁴க³ஸபா⁴க³த⁴ம்மானம் ஆவட்டனவஸேன நித்³தா⁴ரிதானி ச புரிமகானி த்³வே ஸச்சானி ச, ஸமதோ² ச விபஸ்ஸனா ச இமே த்³வே த⁴ம்மா மக்³கோ³ ச மக்³க³ஸச்சஞ்ச, வட்டனிரோதோ⁴ வட்டனிரோத⁴ஸச்சஞ்ச நிப்³பா³னந்தி சத்தாரி ஸச்சானி நித்³தா⁴ரிதானி.

‘‘வீரியபடிபக்க²பூ⁴தஸ்ஸ பமாதா³தி³த⁴ம்மஸ்ஸ வஸேன வா ஸபா⁴க³பூ⁴தஸ்ஸ பமாதா³தி³த⁴ம்மஸ்ஸ வஸேன வா ஆவட்டேத்வா சதுன்னம் ஸச்சானம் நித்³தா⁴ரிதப்³ப³பா⁴வோ அம்ஹேஹி கேன ஸத்³த³ஹிதப்³போ³’’தி வத்தப்³ப³த்தா ‘‘தேனாஹா’’திஆதி³ வுத்தம். தேன ததா² நித்³தா⁴ரிதப்³ப³பா⁴வேன ப⁴க³வா ‘‘ஆரம்ப⁴த² நிக்கமதா²’’திஆதி³கா³தா²வசனம் ஆஹ, தேன ‘‘ஆரம்ப⁴த² நிக்கமதா²’’திஆதி³கா³தா²வசனேன ததா² சதுன்னம் ஸச்சானம் நித்³தா⁴ரிதப்³ப³பா⁴வோ தும்ஹேஹி ஸத்³த³ஹிதப்³போ³தி வுத்தம் ஹோதி.

‘‘ஆரம்ப⁴த² நிக்கமதா²’திஆதி³னா வோதா³னபக்க²ம்யேவ நிக்கி²பித்வா தஸ்ஸேவ வோதா³னபக்க²ஸ்ஸ விஸபா⁴க³த⁴ம்மஸபா⁴க³த⁴ம்மவஸேனேவ ஆவட்டேத்வா சதுஸச்சனித்³தா⁴ரணம் காதப்³ப³’’ந்தி புச்சி²தப்³ப³த்தா ஸம்கிலேஸபக்க²ம்பி நிக்கி²பித்வா தஸ்ஸேவ ஸம்கிலேஸஸ்ஸ விஸபா⁴க³த⁴ம்மஸபா⁴க³த⁴ம்மவஸேனபி ஆவட்டேத்வா சதுஸச்சனித்³தா⁴ரணம் த³ஸ்ஸேந்தோ ‘‘யதா²பி மூலே’’திஆதி³கா³தா²வசனமாஹ. அட்ட²கதா²யம் பன –

‘‘ஏவம் வோதா³னபக்க²ம் நிக்கி²பித்வா தஸ்ஸ விஸபா⁴க³த⁴ம்மவஸேன, ஸபா⁴க³த⁴ம்மவஸேன ச ஆவட்டனம் த³ஸ்ஸேத்வா இதா³னி ஸம்கிலேஸபக்க²ம் நிக்கி²பித்வா தஸ்ஸ விஸபா⁴க³த⁴ம்மவஸேன, ஸபா⁴க³த⁴ம்மவஸேன ச ஆவட்டனம் த³ஸ்ஸேதும் ‘யதா²பி மூலே’தி கா³த²மாஹா’’தி (நேத்தி. அட்ட². 30) –

வுத்தம். கா³தா²த்தோ²பி அட்ட²கதா²யம் வுத்தோ. ததா²பி யதிபோதானம் அத்தா²ய அட்ட²கதா²னுஸாரேனேவ கத²யிஸ்ஸாம.

ஸமூஹோ ருக்கோ² மூலதி பதிட்டா²தி ஏதேன அவயவேன பூ⁴மிபா⁴கே³ டி²தேனாதி மூலம், கிம் தம்? பூ⁴மிபா⁴கே³ டி²தோ மூலஸங்கா²தோ ருக்கா²வயவோ, தஸ்மிம் மூலே. நத்தி² உபத்³த³வோ ப²ரஸுசே²தா³தி³அந்தராயோ அஸ்ஸ மூலஸ்ஸாதி அனுபத்³த³வோ. த³ள்ஹேதி உபத்³த³வாபா⁴வேன ஸபா⁴வதோ தி²ரே ஸதி. சி²ந்தீ³யதீதி சி²ன்னோ, கோ ஸோ? பூ⁴மியம் பதிட்டி²தமூலஸஹிதோ ருக்கா²வயவோ, ந சி²ந்தி³த்வா க³ஹிதோ ருக்கா²வயவோ. ருஹதி வட்³ட⁴தீதி ருக்கோ². ஸோ ச பூ⁴மியம் பதிட்டி²தமூலஸஹிதோ ருக்கா²வயவோ ருக்கோ²தி வுத்தோ யதா² ‘‘ஸமுத்³தோ³ தி³ட்டோ²’’தி. புனரேவ ரூஹதீதி புன அங்குருப்பாத³னம் ஸந்தா⁴ய வுத்தம். தண்ஹானுஸயேதி அத்தபா⁴வஸங்கா²தஸ்ஸ ருக்க²ஸ்ஸ மூலே. அனூஹதேதி அரஹத்தமக்³க³ஞாணேன அனுபச்சி²ன்னே ஸதி இத³ம் அத்தபா⁴வஸங்கா²தம் து³க்க²ம் து³க்க²ஹேது புனப்புனம் அப்³போ³ச்சி²ன்னம் நிப்³ப³த்ததி ந நிருஜ்ஜ²தியேவாதி கா³தா²த்தோ².

‘‘இத⁴ கா³தா²யம் யோ தண்ஹானுஸயோ அனூஹதபா⁴வேன து³க்க²ஸ்ஸ நிப்³ப³த்தனஸ்ஸ மூலந்தி வுத்தோ, அயம் தண்ஹானுஸயோ கதமஸ்ஸா தண்ஹாய அனுஸயோ’’தி புச்ச²தி, ‘‘தண்ஹாய காமதண்ஹாதி³வஸேன ப³ஹுவித⁴த்தா ப⁴வதண்ஹாய அனுஸயோ’’தி விஸ்ஸஜ்ஜேதி ப⁴வஸ்ஸாத³தண்ஹாபா⁴வதோ. யோ அனுஸயோ ஏதஸ்ஸ ப⁴வதண்ஹாஸங்கா²தஸ்ஸ த⁴ம்மஸ்ஸ பச்சயோ ஹோதி, அயம் அனுஸயோ அவிஜ்ஜாநுஸயோ ஹோதி. ‘‘அனுஸயோ ப³ஹுவிதோ⁴, கஸ்மா அவிஜ்ஜானுஸயோதி ஸத்³த³ஹிதப்³போ³’’தி வத்தப்³ப³த்தா ‘‘அவிஜ்ஜாபச்சயா ஹி ப⁴வதண்ஹா’’தி வுத்தம். அவிஜ்ஜாய ப⁴வதண்ஹாய பச்சயத்தா அவிஜ்ஜானுஸயோ ஸத்³த³ஹிதப்³போ³. அவிஜ்ஜாய ஹி ப⁴வேஸு ஆதீ³னவஸ்ஸ அத³ஸ்ஸனவஸேன ப⁴வஸ்ஸாத³தண்ஹா ப⁴வதீதி. இமே த்³வே கிலேஸாதிஆதி³ம்ஹி ஹேட்டா² வுத்தனயானுஸாரேன சத்தாரி ஸச்சானி நித்³தா⁴ரேத்வா விஸபா⁴க³ஸபா⁴க³த⁴ம்மாவட்டனம் விஞ்ஞாதப்³ப³ம், ஸமத²விபஸ்ஸனா பன மக்³க³ஸம்பயுத்தாவ க³ஹேதப்³பா³.

‘‘ஸப்³ப³பாபஸ்ஸா’’திஆதி³கஸ்ஸ அனுஸந்த்⁴யத்தோ² அட்ட²கதா²யம் (நேத்தி. அட்ட². 30) வுத்தோ. ஸப்³ப³பாபஸ்ஸாதி கம்மபத²பா⁴வப்பத்தாபத்தஸ்ஸ நிரவஸேஸஸ்ஸ அகுஸலஸ்ஸ. அகரணந்தி ஸபரஸந்தானேஸு அனுப்பாத³னம். குஸலஸ்ஸாதி கம்மபத²பா⁴வப்பத்தாபத்தஸ்ஸ தேபூ⁴மககுஸலஸ்ஸ சேவ லோகுத்தரகுஸலஸ்ஸ ச. உபஸம்பதா³தி ஸந்தானே உப்பாத³னவஸேன ஸம்பதா³. ஸஸ்ஸ அத்தனோ சித்தந்தி ஸசித்தம், ஸசித்தஸ்ஸ பரியோதா³பனம் வோதா³னம் அரஹத்தப²லுப்பத்தியாதி ஸசித்தபரியோதா³பனம். அரஹத்தமக்³கு³ப்பாதோ³ பன ‘‘குஸலஸ்ஸ உபஸம்பதா³’’தி பதே³ன க³ஹிதோ. ஏதம் அகரணாதி³த்தயதீ³பனம் பு³த்³தா⁴னம் ஸம்மாஸம்பு³த்³தா⁴னம் ஸாஸனம் ஓவாதோ³தி கா³தா²த்தோ².

கா³தா²யம் யஸ்ஸ பாபஸ்ஸ அகரணம் வுத்தம், தம் பாபம் து³ச்சரிதகம்மபத²வஸேன விப⁴ஜிதும் ‘‘ஸப்³ப³பாபம் நாமா’’திஆதி³ வுத்தம். தோ³ஸஸமுட்டா²னந்தி யேபு⁴ய்யவஸேன வுத்தம், லோப⁴ஸமுட்டா²னம்பி ப⁴வதி. லோப⁴ஸமுட்டா²னந்திபி யேபு⁴ய்யவஸேன வுத்தம், தோ³ஸஸமுட்டா²னம்பி ப⁴வதி. மோஹஸமுட்டா²னம்பி ததே²வ வுத்தம். லோப⁴ஸமுட்டா²னதோ³ஸஸமுட்டா²னம்பி ஸம்ப⁴வதீதி த³ட்ட²ப்³ப³ம். ஸப்³ப³பாபோ து³ச்சரிதகம்மபத²ப்பபே⁴தே³ன விப⁴த்தோ, ‘‘ஏத்தகேனேவ விப⁴ஜிதப்³போ³, உதா³ஹு அஞ்ஞேன விப⁴ஜிதப்³போ³’’தி புச்சி²தப்³ப³த்தா அஞ்ஞேன அகுஸலமூலஅக³திக³மனபே⁴தே³னபி விப⁴ஜிதும் ‘‘யா அபி⁴ஜ்ஜா²’’திஆதி³ வுத்தம். அட்ட²கதா²யம் பன ‘‘ஏவம் து³ச்சரிதஅகுஸலகம்மபத²கம்மவிபா⁴கே³ன ‘ஸப்³ப³பாப’ந்தி ஏத்த² வுத்தபாபம் விப⁴ஜித்வா இதா³னிஸ்ஸ அகுஸலமூலவஸேன அக³திக³மனவிபா⁴க³ம்பி த³ஸ்ஸேதும் ‘அகுஸலமூல’ந்திஆதி³ வுத்த’’ந்தி (நேத்தி. அட்ட². 30) அனுஸந்த்⁴யத்தோ² வுத்தோ. மோஹவஸேன ஸபா⁴வம் அஜானந்தஸ்ஸ ப⁴யஸம்ப⁴வதோ யம் ப⁴யா ச மோஹா ச அக³திம் க³ச்ச²தி, இத³ம் மோஹஸமுட்டா²னந்தி வுத்தம்.

ஸப்³ப³பாபோ ஆசரியேன விப⁴த்தோ, அம்ஹேஹி ச ஞாதோ, ‘‘கதமம் ஸப்³ப³பாபஸ்ஸ அகரண’’ந்தி புச்சி²தப்³ப³த்தா தத்த² லோபோ⁴ அஸுபா⁴யா’’திஆதி³ வுத்தம். அட்ட²கதா²யம் பன –

‘‘ஏத்தாவதா ‘ஸப்³ப³பாபஸ்ஸ அகரண’ந்தி ஏத்த² பாபம் த³ஸ்ஸேத்வா இதா³னி தஸ்ஸ அகரணம் த³ஸ்ஸேந்தோ ‘லோபோ⁴…பே… பஞ்ஞாயா’தி தீஹி குஸலமூலேஹி திண்ணம் அகுஸலமூலானம் பஹானவஸேன ஸப்³ப³பாபஸ்ஸ அகரணம் அனுப்பாத³னமாஹா’’தி (நேத்தி. அட்ட². 30) –

வுத்தம். ஸுபா⁴தி⁴முத்தவஸேன பவத்தோ லோபோ⁴ அஸுபா⁴ய அஸுப⁴பா⁴வனாய ததா²பவத்தேன அலோபே⁴ன தத³ங்க³விக்க²ம்ப⁴னப்பஹானேன பஹீயதி, ஸத்தேஸு குஜ்ஜ²னது³ஸ்ஸனவஸேன பவத்தோ தோ³ஸோ மேத்தாய மேத்தாபா⁴வனாய ததா²பவத்தேன அதோ³ஸேன ச தத³ங்க³விக்க²ம்ப⁴னப்பஹானேன பஹீயதி, ஸத்தேஸு சேவ ஸங்கா²ரேஸு ச முய்ஹனவஸேன பவத்தோ மோஹோ பஞ்ஞாய விசாரணபஞ்ஞாய ச பா⁴வனாமக்³க³பஞ்ஞாய ச தத³ங்க³விக்க²ம்ப⁴னஸமுச்சே²த³ப்பஹானேன பஹீயதி.

‘‘யதி³ தீஹி குஸலமூலேஹேவ அகுஸலமூலானி பஹீயந்தி, ஏவம் ஸதி உபேக்கா²கருணாமுதி³தா நிரத்த²கா ப⁴வேய்யு’’ந்தி வத்தப்³ப³த்தா ‘‘ததா² லோபோ⁴ உபேக்கா²யா’’திஆதி³ வுத்தம். உபேக்கா²யாதி ‘‘ஸப்³பே³ ஸத்தா கம்மஸ்ஸகா’’திஆதி³னா பா⁴விதாய உபேக்கா²ய. முதி³தா அரதிம் வூபஸமேத்வா அரதியா மூலபூ⁴தம் மோஹம்பி பஜஹதீதி மனஸி கத்வா ‘‘மோஹோ முதி³தாய பஹானம் அப்³ப⁴த்த²ம் க³ச்ச²தீ’’தி வுத்தம். ‘‘அகுஸலமூலானம் குஸலமூலாதீ³ஹி பஹாதப்³ப³த்தம் கேன அம்ஹேஹி ஸத்³த³ஹிதப்³ப³’’ந்தி வத்தப்³ப³த்தா ‘‘தேனாஹா’’திஆதி³ வுத்தம். தேன ததா² பஹாதப்³ப³த்தேன ப⁴க³வா ‘‘ஸப்³ப³பாபஸ்ஸ அகரண’’ந்தி வசனம் ஆஹ, தேன ‘‘ஸப்³ப³பாபஸ்ஸ அகரண’’ந்தி வசனேன ததா² பஹாதப்³ப³த்தம் தும்ஹேஹி ஸத்³த³ஹிதப்³ப³ந்தி வுத்தம் ஹோதி.

31. ‘‘ஏத்தாவதா ச ஸப்³ப³பாபோ விப⁴த்தோ, தஸ்ஸ அகரணஞ்ச விப⁴த்தம் ஸியா, ஏவம் ஸதி அட்ட²மிச்ச²த்தானம் அகரணம் அனிவாரிதம் ஸியா’’தி வத்தப்³ப³த்தா ‘‘ஸப்³ப³பாபம் நாம அட்ட² மிச்ச²த்தானீ’’திஆதி³ வுத்தம். மிச்சா²ஸதீதி அனிச்சாதீ³ஸு ‘‘நிச்ச’’ந்தி அனுஸ்ஸரணசிந்தனாதி³வஸேன பவத்தஅகுஸலப்பவத்தி.

ஸப்³ப³பாபஸ்ஸ அகரணம் ப³ஹுதா⁴ ஆசரியேன விப⁴த்தம், அம்ஹேஹி ச விஞ்ஞாதம், ‘‘கத²ம் குஸலஸ்ஸ ஸம்பதா³ விப⁴ஜிதப்³பா³ விஞ்ஞாதப்³பா³’’தி வத்தப்³ப³த்தா குஸலஸ்ஸ ஸம்பத³ம் விப⁴ஜித்வா த³ஸ்ஸேந்தோ ‘‘அட்ட²ஸு மிச்ச²த்தேஸு பஹீனேஸூ’’திஆதி³மாஹ. அட்ட² ஸம்மத்தானீதி ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதீ⁴தி அட்ட²ஸம்மத்தானி விஸபா⁴க³பரிவத்தனத⁴ம்மவஸேன ஸம்பஜ்ஜந்தி. அதீதஸ்ஸாதி அதீதேன ஸம்மாஸம்பு³த்³தே⁴ன தே³ஸிதஸ்ஸ. விபஸ்ஸினோ ஹி ப⁴க³வதோ அயம் பாதிமோக்கு²த்³தே³ஸகா³தா². சித்தே பரியோதா³பிதேதி சித்தபடிப³த்³தா⁴ பஞ்சக்க²ந்தா⁴பி பரியோதா³பிதா ப⁴வந்தி. ‘‘சித்தபரியோதா³பிதேன பஞ்சன்னம் க²ந்தா⁴னம் பரியோதா³பிதபா⁴வோ கத²ம் அம்ஹேஹி ஸத்³த³ஹிதப்³போ³’’தி வத்தப்³ப³த்தா ‘‘ஏவஞ்ஹீ’’திஆதி³ வுத்தம். ஏவம் வுத்தப்பகாரேன ப⁴க³வா யம் ‘‘சேதோவிஸுத்³த⁴த்த²ம் பி⁴க்க²வே ததா²க³தே ப்³ரஹ்மசரியம் வுஸ்ஸதீ’’தி வசனம் ஆஹ, தேன ‘‘சேதோ…பே… வுஸ்ஸதீ’’தி வசனேன தும்ஹேஹி ஸத்³த³ஹிதப்³போ³தி வுத்தம் ஹோதி. ‘‘பரியோதா³பனா கதிவிதா⁴ ப⁴வந்தீ’’தி வத்தப்³ப³த்தா ‘‘து³விதா⁴ ஹீ’’திஆதி³ வுத்தம். ஸமத²விபஸ்ஸனாய நீவரணப்பஹானஞ்ச அரியமக்³க³பா⁴வனாய அனுஸயஸமுக்³கா⁴தோ சாதி பரியோதா³பனஸ்ஸ து³வித⁴த்தா பஞ்சக்க²ந்தா⁴ பரியோதா³பிதா ப⁴வந்தீதி அத்தோ². பஹீனனீவரணானுஸயா ஹி புக்³க³லா பஸாத³னீயவண்ணா ஹோந்தி.

‘‘பரியோதா³பனஸ்ஸ கித்திகா பூ⁴மியோ’’தி புச்சி²தப்³ப³த்தா ‘‘த்³வே பரியோதா³பனபூ⁴மியோ’’திஆதி³ வுத்தம். ‘‘‘ஸப்³ப³பாபஸ்ஸ அகரண’ந்திஆதி³கா³தா²ய தே³ஸிதேஸு த⁴ம்மேஸு கதமம் து³க்க²ஸச்சம், கதமம் ஸமுத³யஸச்சம், கதமம் மக்³க³ஸச்சம், கதமம் நிரோத⁴ஸச்ச’’ந்தி புச்சி²தப்³ப³த்தா ‘‘தத்த² யம் படிவேதே⁴னா’’திஆதி³ வுத்தம். தத்தா²தி கா³தா²ய தே³ஸிதேஸு த⁴ம்மேஸு யம் க²ந்த⁴பஞ்சகம் படிவேதே⁴ன பரிஞ்ஞாபி⁴ஸமயேன பரியோதா³பேதி, இத³ம் க²ந்த⁴பஞ்சகம் து³க்க²ம் து³க்க²ஸச்சம் ப⁴வே. யதோ தண்ஹாஸம்கிலேஸதோ க²ந்த⁴பஞ்சகம் பரியோதா³பேதி, அயம் தண்ஹாஸம்கிலேஸோ ஸமுத³யோ ஸமுத³யஸச்சம். யேன அரியமக்³க³ங்கே³ன பரியோதா³பேதி, அயம் அரியமக்³கோ³ மக்³க³ஸச்சம். யம் அஸங்க²ததா⁴தும் அதி⁴க³தேன புக்³க³லேன பரியோதா³பிதம், அயம் அஸங்க²ததா⁴துத⁴ம்மோ நிரோதோ⁴ நிரோத⁴ஸச்சம் ப⁴வே. இமானி சத்தாரி ஸச்சானி கா³தா²ய தே³ஸிதத⁴ம்மானம் ஸபா⁴க³விஸபா⁴க³த⁴ம்மாவட்டனவஸேன நித்³தா⁴ரிதானி. ‘‘தேனாஹா’’திஆதி³கஸ்ஸ அத்தோ² ஹேட்டா² வுத்தனயேன வேதி³தப்³போ³.

‘‘ஸப்³ப³பாபஸ்ஸ அகரண’’ந்திஆதி³கா³தா²ய தே³ஸிதானம் த⁴ம்மானம் ஸபா⁴க³விஸபா⁴க³த⁴ம்மாவட்டனவஸேன சத்தாரி ஸச்சானி ஆசரியேன நித்³தா⁴ரிதானி, அம்ஹேஹி ச விஞ்ஞாதானி.

‘‘‘த⁴ம்மோ ஹவே ரக்க²தி த⁴ம்மசாரிம், ச²த்தம் மஹந்தம் யத² வஸ்ஸகாலே;

ஏஸானிஸம்ஸோ த⁴ம்மே ஸுசிண்ணே, ந து³க்³க³திம் க³ச்ச²தி த⁴ம்மசாரீ’தி –

கா³தா²ய தே³ஸிதானம் த⁴ம்மானம் விஸபா⁴க³ஸபா⁴க³த⁴ம்மானம் ஆவட்டனவஸேன கத²ம் சத்தாரி ஸச்சானி நித்³தா⁴ரிதானீ’’தி வத்தப்³ப³த்தா ‘‘த⁴ம்மோ ஹவே’’திஆதி³மாஹ. தாய கா³தா²ய தே³ஸிதே த⁴ம்மே விப⁴ஜித்வா த³ஸ்ஸேந்தோ ‘‘த⁴ம்மோ நாமா’’திஆதி³மாஹ. தத்த² த⁴ம்மோ நாமாதி புஞ்ஞத⁴ம்மோ நாம. இந்த்³ரியஸம்வரோதி மனச்ச²ட்டி²ந்த்³ரியஸம்வரஸீலாதி³கோ ஸப்³போ³ ஸம்வரோ. தேன வுத்தம் –‘‘இந்த்³ரியஸம்வரஸீஸேன சேத்த² ஸப்³ப³ம்பி ஸீலம் க³ஹிதந்தி த³ட்ட²ப்³ப³’’ந்தி (நேத்தி. அட்ட². 31). சத்தாரோ அபாயா து³க்கடகம்மகாரீனம் க³திபூ⁴தத்தா து³க்³க³தி. ஸப்³பா³ உபபத்தியோ பன து³க்க²து³க்க²ஸங்கா²ரது³க்க²விபரிணாமது³க்க²ஸமங்கீ³னம் க³திபூ⁴தத்தா து³க்³க³தி நாம.

‘‘தஸ்மிம் து³விதே⁴ த⁴ம்மே இந்த்³ரியஸம்வரத⁴ம்மோ கத்த² டி²தோ, கத²ம் ஸுசிண்ணோ, குதோ ரக்க²தீ’’தி புச்சி²தப்³ப³த்தா ‘‘தத்த² யா ஸம்வரஸீலே’’திஆதி³ வுத்தம். தத்தா²தி தஸ்மிம் து³விதே⁴ த⁴ம்மே. ஸம்வரஸீலே டி²தா யா அக²ண்ட³காரிதா ஹோதி, அயம் அக²ண்ட³வஸேன காதப்³போ³ ஸம்வரஸீலே டி²தோ ஸுட்டு² ஆசிண்ணபரிசிண்ணோ புஞ்ஞத⁴ம்மோ சதூஹி அபாயேஹி அத்தனோ ஆதா⁴ரம் அத்தானம் ரக்க²ந்தம் புக்³க³லம் ஏகந்திகபா⁴வேன ரக்க²தி, அனேகந்திகபா⁴வேன பன ரக்கி²தமத்தோ புஞ்ஞத⁴ம்மோபி ரக்க²தீதி அத்தோ² க³ஹேதப்³போ³. அபாயேஹீதி ச பதா⁴னவஸேன வுத்தம், ரோகா³தி³அந்தராயதோபி ரக்க²தி. ரோகா³தி³அந்தராயோ வா அயதோ அபக³தத்தா அபாயந்தோக³தோ⁴தி த³ட்ட²ப்³போ³.

‘‘ததா² ரக்க²தீதி கேன அம்ஹேஹி ஸத்³த³ஹிதப்³போ³’’தி வத்தப்³ப³த்தா ‘‘ஏவம் ப⁴க³வா’’திஆதி³ வுத்தம். ஏவம் வுத்தப்பகாரேன லக்க²ணபகாரத³ஸ்ஸனம் ப⁴க³வா ‘‘த்³வேமா, பி⁴க்க²வே, ஸீலவதோ க³தியோ தே³வா ச மனுஸ்ஸா சா’’தி யம் வசனம் ஆஹ, தேன ‘‘த்³வேமா…பே… மனுஸ்ஸா சா’’தி வசனேன தும்ஹேஹி ஸத்³த³ஹிதப்³போ³தி வுத்தம் ஹோதி. ‘‘ஸம்வரஸீலே டி²தஸ்ஸ அக²ண்ட³காதப்³ப³ஸ்ஸ ஸுசிண்ணஸ்ஸ புஞ்ஞத⁴ம்மஸ்ஸ அபாயேஹி ரக்க²ணே ஏகந்திகபா⁴வோ கேன ஸுத்தேன தீ³பேதப்³போ³’’தி வத்தப்³ப³த்தா ‘‘ஏவஞ்ச நாளந்தா³ய’’ந்திஆதி³ வுத்தம். தத்த² ஏவஞ்சாதி இமினா இதா³னி வுச்சமானேன பகாரேனபி வுத்தப்பகாரோ அத்தோ² வேதி³தப்³போ³. நாளந்தா³யந்தி நாளந்த³னாமகே நிக³மே நிஸின்னோ அஸிப³ந்த⁴கனாமஸ்ஸ புத்தோ கா³மணி கா³மஜேட்ட²கோ ப⁴க³வந்தம் ஏதம் வுச்சமானம் ‘‘ப்³ராஹ்மணா, ப⁴ந்தே’’திஆதி³வசனம் அவோச.

ப்³ராஹ்மணாதி பா³ஹிரகா ப்³ராஹ்மணா. ப⁴ந்தேதி ப⁴க³வந்தம் கா³மணி ஆலபதி. பச்சா²பூ⁴மகாதி பச்சி²மதி³ஸாய நிஸின்னகா. உய்யாபேந்தீதி மனுஸ்ஸலோகதோ உத்³த⁴ம் தே³வலோகம் யாபேந்தி பாபேந்தி.

இத⁴ஸ்ஸாதி இத⁴லோகே அஸ்ஸ ப⁴வேய்ய. புரிஸோ பாணாதிபாதீ…பே… மிச்சா²தி³ட்டி²கோ அஸ்ஸ ப⁴வேய்யாதி யோஜனா. ஸேஸம் பாளிதோ சேவ வுத்தானுஸாரேன ச ஞேய்யம்.

32. ‘‘விஸபா⁴க³த⁴ம்மஸபா⁴க³த⁴ம்மாவட்டனவஸேன சதுன்னம் ஸச்சானம் நித்³தா⁴ரிதபா⁴வோ கேன அம்ஹேஹி ஸத்³த³ஹிதப்³போ³’’தி வத்தப்³ப³த்தா ‘‘தேனாஹ மஹாகச்சானோ ஏகம்ஹி பத³ட்டா²னே’’தி வுத்தம்.

‘‘ஏத்தாவதா ச ஆவட்டோ ஹாரோ பரிபுண்ணோ, அஞ்ஞோ நியுத்தோ நத்தீ²’’தி வத்தப்³ப³த்தா ‘‘நியுத்தோ ஆவட்டோ ஹாரோ’’தி வுத்தம். யஸ்ஸம் யஸ்ஸம் பாளியம் யோ யோ ஆவட்டோ ஹாரோ யதா²லாப⁴வஸேன யோஜிதோ, தஸ்ஸம் தஸ்ஸம் பாளியம் ஸோ ஸோ ஆவட்டோ ஹாரோ ததா² நித்³தா⁴ரேத்வா யுத்தோ யோஜிதோதி அத்தோ² த³ட்ட²ப்³போ³.

இதி ஆவட்டஹாரவிப⁴ங்கே³ ஸத்திப³லானுரூபா ரசிதா

விபா⁴வனா நிட்டி²தா.

பண்டி³தேஹி பன அட்ட²கதா²டீகானுஸாரேனேவ க³ம்பீ⁴ரத்தோ² வித்தா²ரதோ விப⁴ஜித்வா க³ஹேதப்³போ³தி.