10. வேவசனஹாரஸம்பாதவிபா⁴வனா

72. யேன யேன பரிவத்தனஹாரஸம்பாதேன ஸுத்தப்பதே³ஸத்தா² பரிவத்தேதப்³பா³, ஸோ பரிவத்தனோ ஹாரஸம்பாதோதி பரிபுண்ணோ, ‘‘கதமோ வேவசனோ ஹாரஸம்பாதோ’’தி புச்சி²தப்³ப³த்தா ‘‘தத்த² கதமோ வேவசனோ ஹாரஸம்பாதோ’’திஆதி³ வுத்தம்.

‘‘கதமேஸம் ஸுத்தப்பதே³ஸத்தா²னம், ஸுத்தபதா³னம் வா கதமானி வேவசனானீ’’தி புச்சி²தப்³ப³த்தா ‘‘தஸ்மா’’திஆதி³ வுத்தம். யா ‘‘தஸ்மா…பே… கோ³சரோ’’தி கா³தா² வுத்தா, தாய கா³தா²ய ‘‘ரக்கி²தசித்தஸ்ஸா’’தி பதே³ன வுத்தஸ்ஸ சித்தஸ்ஸ, ‘‘ரக்கி²தசித்தஸ்ஸா’’தி ஏத்த² சித்தஸ்ஸ பத³ஸ்ஸ வா ‘‘சித்தம்…பே… விஜானிதத்த’’ந்தி யம் வசனம் வுத்தம், இத³ம் வசனம் வேவசனம், ‘‘மானஸம் ஹத³ய’’ந்திஆதி³வசனம்பி (த⁴. ஸ. 17, 63) சித்தஸ்ஸ வேவசனம். ‘‘ஸம்மாஸங்கப்பகோ³சரோ’’தி ஏத்த² ஸம்மாஸங்கப்பஸ்ஸ ‘‘நேக்க²ம்மஸங்கப்போ அப்³யாபாத³ஸங்கப்போ அவிஹிம்ஸாஸங்கப்போ’’தி யம் வசனம் வுத்தம், இத³ம் வசனம் வேவசனம், ‘‘தக்கோ விதக்கோ’’திஆதி³ (த⁴. ஸ. 7) வசனம்பி ஸம்மாஸங்கப்பஸ்ஸ வேவசனம். ‘‘ஸம்மாதி³ட்டி²புரேக்கா²ரோ’’தி ஏத்த² ஸம்மாதி³ட்டி²பத³ஸ்ஸ ‘‘ஸம்மாதி³ட்டி² நாம பஞ்ஞாஸத்த²ம் பஞ்ஞாக²க்³கோ³ பஞ்ஞாரதனம் பஞ்ஞாபதோதோ³ பஞ்ஞாபாஸாதோ³’’தி யம் வசனம் வுத்தம், இத³ம் வசனம் வேவசனம், ‘‘பஞ்ஞா பஜானனா விசயோ’’திஆதி³ (த⁴. ஸ. 16) வசனம்பி ஸம்மாதி³ட்டி²பத³ஸ்ஸ வேவசனம். ‘‘தி²னம் தி²யனா தி²யிதத்தம் சித்தஸ்ஸ, சித்தஸ்ஸ அகல்லதா அகம்மஞ்ஞதா ஓனாஹோ பரியோனாஹோ அந்தோஸங்கோசோ’’தி (த⁴. ஸ. 1162-1163) யம் வசனம் வுத்தம், இத³ம் வசனம் தி²னஸ்ஸ வேவசனம். ‘‘காயஸ்ஸ அகல்லதா அகம்மஞ்ஞதா காயாலஸியம் ஸோப்பம் ஸுபனா ஸுப்பிதத்த’’ந்தி (த⁴. ஸ. 1163) யம் வசனம் வுத்தம், இத³ம் வசனம் மித்³த⁴ஸ்ஸ வேவசனம். ‘‘பி⁴க்க²கோ பி⁴க்கூ²’’திஆதி³கம் (பாரா. 45; விப⁴. 510) யம் வசனம் வுத்தம், இத³ம் வசனம் பி⁴க்கு²பத³ஸ்ஸ வேவசனம். ‘‘து³க்³க³தி அபாயோ வினிபாதோ வட்டது³க்க²ம் ஸம்ஸாரோ’’திஆதி³கம் யம் வசனம் வுத்தம், இத³ம் வசனம் து³க்³க³திபத³ஸ்ஸ வேவசனம். இதி வேவசனானி நீஹரிதானி.

‘‘ஏத்தகோவ வேவசனஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ வேவசனோ ஹாரஸம்பாதோ’’தி வுத்தம். யேன யேன ஸம்வண்ணனாவிஸேஸபூ⁴தேன வேவசனஹாரஸம்பாதேன வேவசனானி நீஹரிதானி, ஸோ ஸோ ஸம்வண்ணனாவிஸேஸபூ⁴தோ வேவசனஹாரஸம்பாதோ நியுத்தோ யதா²ஸம்ப⁴வம் நீஹரித்வா யுஜ்ஜிதப்³போ³தி அத்தோ² க³ஹிதோதி.

இதி வேவசனஹாரஸம்பாதே ஸத்திப³லானுரூபா ரசிதா

விபா⁴வனா நிட்டி²தா.

பண்டி³தேஹி பன…பே… க³ஹேதப்³போ³தி.