11. பஞ்ஞத்திஹாரஸம்பாதவிபா⁴வனா

73. யேன யேன வேவசனஹாரஸம்பாதேன வேவசனானி நித்³தா⁴ரிதானி, ஸோ வேவசனஹாரஸம்பாதோ பரிபுண்ணோ, ‘‘கதமோ பஞ்ஞத்திஹாரஸம்பாதோ’’தி புச்சி²தப்³ப³த்தா ‘‘தத்த² கதமோ பஞ்ஞத்திஹாரஸம்பாதோ’’திஆதி³ வுத்தம்.

‘‘கதமா ஸுத்தப்பதே³ஸபூ⁴தா பஞ்ஞத்தி கதமேஸம் த⁴ம்மானம் பஞ்ஞத்தீ’’தி புச்சி²தப்³ப³த்தா ‘‘தஸ்மா’’திஆதி³ வுத்தம். ‘‘தஸ்மா ரக்கி²தசித்தஸ்ஸா’’தி பஞ்ஞத்தி ஸதியா பத³ட்டா²னஸ்ஸ ரக்கி²தப்³ப³ஸ்ஸ சித்தஸ்ஸ பஞ்ஞாபனதோ ஸதியா பத³ட்டா²னபஞ்ஞத்தி நாம. ஸதியா ஹி ரக்கி²தப்³ப³ம் சித்தம் ஸதியா பத³ட்டா²னம் அதி⁴ட்டா²னம் நாம. தேனாஹ அட்ட²கதா²யம் – ‘‘அதி⁴ட்ட²ஹித்வா ரக்க²ந்தியா ஸதியா ரக்கி²யமானம் சித்தம் தஸ்ஸா அதி⁴ட்டா²னம் விய ஹோதீ’’தி. ‘‘ஸம்மாஸங்கப்பகோ³சரோ’’தி பஞ்ஞத்தி ஸமத²ஸ்ஸ பா⁴வனாய பஞ்ஞாபனதோ ஸமத²ஸ்ஸ பா⁴வனாபஞ்ஞத்தி நாம. ‘‘ஸம்மாதி³ட்டி²புரேக்கா²ரோ, ஞத்வான உத³யப்³ப³ய’’ந்தி பஞ்ஞத்தி த³ஸ்ஸனபூ⁴மியா நிக்கே²பஸ்ஸ பஞ்ஞாபனதோ நிக்கே²பபஞ்ஞத்தி நாம. ‘‘தி²னமித்³தா⁴பி⁴பூ⁴ பி⁴க்கூ²’’தி ஸமுத³யஸ்ஸ அனவஸேஸப்பஹானஸ்ஸ பஞ்ஞாபனதோ அனவஸேஸப்பஹானபஞ்ஞத்தி நாம. ‘‘ஸப்³பா³ து³க்³க³தியோ ஜஹே’’தி பஞ்ஞத்தி மக்³க³ஸ்ஸ அரியமக்³க³ஸ்ஸ பா⁴வனாய பஞ்ஞாபனதோ பா⁴வனாபஞ்ஞத்தி நாம.

‘‘ஏத்தகோவ பஞ்ஞத்திஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ பஞ்ஞத்திஹாரஸம்பாதோ’’தி வுத்தம். யேன யேன ஸம்வண்ணனாவிஸேஸபூ⁴தேன பஞ்ஞத்திஹாரஸம்பாதேன பஞ்ஞத்திப்பபே⁴தா³ நித்³தா⁴ரிதா, ஸோ ஸோ ஸம்வண்ணனாவிஸேஸபூ⁴தோ பஞ்ஞத்திஹாரஸம்பாதோ நியுத்தோ யதா²ரஹம் நித்³தா⁴ரேத்வா யுஜ்ஜிதப்³போ³தி அத்தோ² க³ஹேதப்³போ³தி.

இதி பஞ்ஞத்திஹாரஸம்பாதே ஸத்திப³லானுரூபா ரசிதா

விபா⁴வனா நிட்டி²தா.

பண்டி³தேஹி பன…பே… க³ஹேதப்³போ³தி.