16. ஸமாரோபனஹாரவிப⁴ங்க³விபா⁴வனா

50. யேன யேன ஸம்வண்ணனாவிஸேஸபூ⁴தேன பரிக்கா²ரஹாரவிப⁴ங்கே³ன ஸுத்தத்தா²னம் ஹேதுபச்சயோ விப⁴த்தோ, ஸோ…பே… விப⁴ங்கோ³ பரிபுண்ணோ, ‘‘கதமோ ஸமாரோபனஹாரவிப⁴ங்கோ³’’தி புச்சி²தப்³ப³த்தா ‘‘தத்த² கதமோ ஸமாரோபனோ ஹாரோ’’திஆதி³ வுத்தம். தத்த² தேஸு நித்³தி³ட்டே²ஸு ஸோளஸஸு தே³ஸனாஹாராதீ³ஸு கதமோ ஸம்வண்ணனாவிஸேஸோ ஸமாரோபனோ ஹாரோ ஸமாரோபனஹாரவிப⁴ங்கோ³ நாமாதி புச்ச²தி. ‘‘யே த⁴ம்மா யம்மூலா’’திஆதி³னித்³தே³ஸஸ்ஸ இதா³னி மயா வுச்சமானோ ‘‘ஏகஸ்மிம் பத³ட்டா²னே யத்தகானி பத³ட்டா²னானி ஓதரந்தீ’’திஆதி³கோ வித்தா²ரஸம்வண்ணனாவிஸேஸோ ஸமாரோபனஹாரவிப⁴ங்கோ³ நாம.

‘‘கித்தகே பத³ட்டா²னே ஸுத்தே வுத்தே கித்தகானி பத³ட்டா²னானி ஸமாரோபயிதப்³பா³னீ’’தி புச்சி²தப்³ப³த்தா ‘‘ஏகஸ்மிம் பத³ட்டா²னே’’திஆதி³ வுத்தம். ஏகஸ்மிம் பத³ட்டா²னே ஸுத்தே வுத்தே ஸதி அவுத்தானி யத்தகானி பத³ட்டா²னானி ஓதரந்தி ஸமோஸரந்தி, ஸப்³பா³னி தானி அவுத்தானி பத³ட்டா²னானி ஸுத்தே வுத்தானி விய நித்³தா⁴ரணவஸேன ஆனேத்வா தே³ஸனாய ஆரோபயிதப்³பா³னி. ‘‘கானி விய ஸமாரோபயிதப்³பா³னீ’’தி வத்தப்³ப³த்தா ‘‘யதா² ஆவட்டே’’திஆதி³ வுத்தம். ஆவட்டே ஹாரே ஏகஸ்மிம் பத³ட்டா²னே ஸுத்தே வுத்தே ஸதி ஸுத்தே அவுத்தானி ப³ஹுகானி பத³ட்டா²னானி ஓதரந்தி, தானி ப³ஹுகானி பத³ட்டா²னானி பரியேஸிதப்³பா³னி யதா², ஏவம் ஸமாரோபனே ஹாரேபி ப³ஹுகானி பத³ட்டா²னானி தே³ஸனாய ஸமாரோபயிதப்³பா³னீதி அத்தோ².

‘‘கேவலம் பன பத³ட்டா²னவஸேனேவ ஸமாரோபனா காதப்³பா³ கிம், உதா³ஹு அஞ்ஞவஸேனாபி ஸமாரோபனா காதப்³பா³ கி’’ந்தி வத்தப்³ப³த்தா அஞ்ஞவஸேனாபி ஸமாரோபனா காதப்³பா³; தஸ்மா ஸமாரோபனா சதுப்³பி³தா⁴ காதப்³பா³தி த³ஸ்ஸேந்தோ ‘‘தத்த² ஸமாரோபனா சதுப்³பி³தா⁴’’திஆதி³மாஹ. தத்த² தத்தா²தி தாஸு ஸமாரோபயிதப்³ப³ஸமாரோபனாஸு பத³ட்டா²னம் பத³ட்டா²னஸமாரோபனா, வேவசனம் வேவசனஸமாரோபனா, பா⁴வனா பா⁴வனாஸமாரோபனா, பஹானம் பஹானஸமாரோபனா, இதி இமினா பபே⁴தே³ன ஸமாரோபனா சதுப்³பி³தா⁴ காதப்³பா³.

‘‘தாஸு சதுப்³பி³தா⁴ஸு ஸமாரோபனாஸு கதமா பத³ட்டா²னஸமாரோபனா’’தி புச்சி²தப்³ப³த்தா ததா² புச்சி²த்வா பத³ட்டா²னஸமாரோபனம் த³ஸ்ஸேதும் ‘‘தத்த² கதமா’’திஆதி³ வுத்தம். ஸுத்தே வுத்தேன பத³ட்டா²னேன ஸுத்தே அவுத்தானம் பத³ட்டா²னானம் ஸமாரோபனா கதமாதி புச்ச²தி.

ஸப்³ப³பாபஸ்ஸ அகுஸலஸ்ஸ யம் அகரணம் அகரணஹேது ஸாஸனம் அத்தி², ஏதம் ஸாஸனம் பு³த்³தா⁴னம் ஸாஸனம் ஓவாதோ³ ஹோதி, அத² வா அகரணம் அகரணத்தா²ய யம் ஸாஸனம் அத்தி², ஏதம் பு³த்³தா⁴னம் ஸாஸனம் ஓவாதோ³ ஹோதி, ந யஸ்ஸ கஸ்ஸசி ஸாஸனந்தி அத்தோ². அகரணந்தி ஹி ஸம்பதா³னத்தே² பவத்தம் பச்சத்தவசனம் யதா² ‘‘கிஸ்ஸ அத்தா²ய கிமத்த²’’ந்தி. குஸலஸ்ஸ ஸம்பதா³ ஸம்பதா³ய யம் ஸாஸனம் அத்தி², ஏதம் பு³த்³தா⁴னம் ஸாஸனம். ஸசித்தபரியோதா³பனம் ஸசித்தபரியோதா³பனத்த²ம் யம் ஸாஸனம் அத்தி², ஏதம் பு³த்³தா⁴னம் ஸாஸனம் ஹோதி.

இதி ஏவம்பகாரேன வுத்தஸ்ஸ தஸ்ஸ ஸாஸனஸ்ஸ கிம் பத³ட்டா²னந்தி விஸேஸஸ்ஸ விஸேஸபத³ட்டா²னம் புன புச்ச²தி. இத³ம் ஸுசரிதத்தயம் ஸாஸனஸ்ஸ ஓவாத³ஸ்ஸ பத³ட்டா²னம் ஸுசரிதத்தயேன ஹேதுனா ஸாஸனத்தாதி த³ட்ட²ப்³ப³ம் யதா² ‘‘அன்னேன வஸதீ’’திஆதி³. ‘‘ஸுசரிதத்தயே பத³ட்டா²னே வுத்தே கதமம் பத³ட்டா²னம் ஸமாரோபயிதப்³ப³’’ந்தி புச்சி²தப்³ப³த்தா ‘‘தத்த² யம் காயிகஞ்சா’’திஆதி³ வுத்தம். இத³ம் க²ந்த⁴த்தயம் ஸாஸனஸ்ஸ பத³ட்டா²னம் ஸமாரோபயிதப்³ப³ம், ‘‘க²ந்த⁴த்தயே பத³ட்டா²னே ஸமாரோபயிதே கதமம் ஸமாரோபயிதப்³ப³’’ந்தி புச்சி²தப்³ப³த்தா ‘‘தத்த² ஸீலக்க²ந்தோ⁴ சா’’திஆதி³ வுத்தம். இத³ம் ஸமத²விபஸ்ஸனாத்³வயம் ஸாஸனஸ்ஸ பத³ட்டா²னம் ஸமாரோபயிதப்³ப³ம். ‘‘ஸமத²விபஸ்ஸனாத்³வயே பத³ட்டா²னே ஸமாரோபயிதே கதமம் பத³ட்டா²னம் ஸமாரோபயிதப்³ப³’’ந்தி புச்சி²தப்³ப³த்தா ‘‘தத்த² ஸமத²ஸ்ஸ ப²ல’’ந்திஆதி³ வுத்தம். இத³ம் ப²லத்³வயம் ஸாஸனஸ்ஸ பத³ட்டா²னம் ஸமாரோபயிதப்³ப³ம்.

ஸாஸனஸ்ஸ பத³ட்டா²னானி ஸமாரோபயிதப்³பா³னீதி ஆசரியேன நித்³தா⁴ரேத்வா விப⁴த்தானி, அம்ஹேஹி ச ஞாதானி, ‘‘இதா³னி கதமஸ்ஸ கதமம் பத³ட்டா²னம் ஸமாரோபயிதப்³ப³’’ந்தி புச்சி²தப்³ப³த்தா ‘‘வனம் வனத²ஸ்ஸா’’திஆதி³ வுத்தம். இத³ம் காமகு³ணபஞ்சகம் வனம் தண்ஹாபூ⁴தஸ்ஸ வனத²ஸ்ஸ பத³ட்டா²னம் தண்ஹாவத்து²பா⁴வதோ, ‘‘இத்தீ²’’தி வா ‘‘புரிஸோ’’தி வா நிமித்தக்³கா³ஹஸங்கா²தம் இத³ம் வனம் ‘‘அஹோ சக்கு², அஹோ ஸோதம், அஹோ கா⁴னம், அஹோ ஜிவ்ஹா, அஹோ காயோ’’தி தேஸம் தேஸம் அங்க³பச்சங்கா³னம் அனுப்³யஞ்ஜனக்³கா³ஹஸங்கா²தஸ்ஸ வனத²ஸ்ஸ பத³ட்டா²னம் ஸமாரோபயிதப்³ப³ம். அபரிஞ்ஞாதம் த்³வாத³ஸாயதனஸங்கா²தம் இத³ம் வனம் ஸம்யோஜனஸங்கா²தஸ்ஸ வனத²ஸ்ஸ பத³ட்டா²னம் ஸமாரோபயிதப்³ப³ம், ஆயதனம் படிச்ச ஸம்யோஜனுப்பஜ்ஜனதோ அனுஸயஸங்கா²தம் இத³ம் வனம் பரியுட்டா²னஸங்கா²தஸ்ஸ வனத²ஸ்ஸ பத³ட்டா²னம் ஸமாரோபயிதப்³ப³ம். ‘‘பஞ்சகாமகு³ணாதீ³னம் வனபா⁴வோ ச தண்ஹாதீ³னம் வனத²பா⁴வோ ச கேன அம்ஹேஹி ஸத்³த³ஹிதப்³போ³’’தி வத்தப்³ப³த்தா ‘‘தேனாஹ ப⁴க³வா’’திஆதி³ வுத்தம். தேன பஞ்சகாமகு³ணாதீ³னம் வனபா⁴வேன ச தண்ஹாதீ³னம் வனத²பா⁴வேன ச ப⁴க³வா ‘‘சே²த்வா வனஞ்ச வனத²ஞ்சா’’தி யம் வசனம் ஆஹ, தேன ப⁴க³வதோ வசனேன வசனானுஸாரேன ஸத்³த³ஹிதப்³போ³தி. அயந்தி அயம் ‘‘ஏகஸ்மிம் பத³ட்டா²னே’’திஆதி³ஸம்வண்ணனா. பத³ட்டா²னேனாதி ஏகேகேன பத³ட்டா²னேன. ஸமாரோபனாதி தத³ஞ்ஞபத³ட்டா²னானம் ஸமாரோபனா. ஸமாரோபேந்தி ஸமாரோபயிதப்³பா³னி ஏதாய ஸம்வண்ணனாயாதி ஸமாரோபனாதி விக்³க³ஹோதி. (1)

51. பத³ட்டா²னேன ஸமாரோபனா ஆசரியேன நித்³தி³ட்டா², அம்ஹேஹி ச ஞாதா, ‘‘கதமா வேவசனேன ஸமாரோபனா’’தி புச்சி²தப்³ப³த்தா ‘‘தத்த² கதமா வேவசனேனா’’திஆதி³ வுத்தம். தத்தா²தி தாஸு சதூஸு பத³ட்டா²னஸமாரோபனாதீ³ஸு ஸமாரோபனாஸு வேவசனேன ஏகேகேன ரோதத³ஞ்ஞவேவசனானம் ஸமாரோபனா கதமாதி புச்ச²தி. ‘‘ராக³விராகா³’’தி ச ‘‘சேதோவிமுத்தீ’’தி ச ‘‘ஸேக்க²ப²ல’’ந்தி ச இத³ம் வசனத்தயம் அனாகா³மிப²லத்த²த்தா அனாகா³மிப²லஸ்ஸ வேவசனம். ‘‘அவிஜ்ஜாவிராகா³’’தி ச ‘‘பஞ்ஞாவிமுத்தீ’’தி ச ‘‘அஸேக்க²ப²ல’’ந்தி ச இத³ம் வசனத்தயம் அரஹத்தப²லத்த²த்தா அரஹத்தப²லஸ்ஸ வேவசனம். இமினா நயேன ஸேஸேஸு யோஜனா காதப்³பா³. (2)

வேவசனேன ஸமாரோபனா ஆசரியேன நித்³தி³ட்டா², அம்ஹேஹி ச ஞாதா, ‘‘கதமா பா⁴வனாய ஸமாரோபனா’’தி புச்சி²தப்³ப³த்தா ‘‘தத்த² கதமா பா⁴வனாயா’’திஆதி³ வுத்தம். தத்தா²தி தாஸு சதூஸு பத³ட்டா²னஸமாரோபனாதீ³ஸு கதமாய தே³ஸிதாய பா⁴வனாய கதமேஸானம் அதே³ஸிதானம் பா⁴வனாரோபனா கதமாதி புச்ச²தி. யதா² யேன பகாரேன யம் பா⁴வனம் ப⁴க³வா ‘‘தஸ்மாதிஹ, த்வம் பி⁴க்கு², காயே காயானுபஸ்ஸீ விஹரதி, ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸ’’ந்தி (ஸம். நி. 5.369, 371, 395, 415) ஆஹ, ததா² தேன பகாரேன தாய பா⁴வனாய தத³ஞ்ஞபா⁴வனாபி ஸமாரோபயிதப்³பா³தி அத்தோ².

‘‘தஸ்மாதிஹா’’திஆதி³பாடே² ‘‘கிம் பா⁴வனம் ப⁴க³வா ஆஹா’’தி புச்சி²தப்³ப³த்தா ‘‘ஆதாபீ’’திஆதி³ வுத்தம். ‘‘ஆதாபீ’’தி வசனேன வீரியிந்த்³ரியம் ப⁴க³வா ஆஹ. ‘‘ஸம்பஜானோ’’தி வசனேன பஞ்ஞிந்த்³ரியம் ப⁴க³வா ஆஹ. ‘‘ஸதிமா’’தி வசனேன ஸதிந்த்³ரியம் ஆஹ. ‘‘வினேய்ய லோகே அபி⁴ஜ்ஜா²தோ³மனஸ்ஸ’’ந்தி வசனேன ஸமாதி⁴ந்த்³ரியம் ஆஹ. ‘‘ஏவம் வுத்தே கதமா பா⁴வனா ஸமாரோபயிதப்³பா³’’தி புச்சி²தப்³ப³த்தா ‘‘ஏவம் காயே காயானுபஸ்ஸினோ விஹரதோ சத்தாரோ ஸதிபட்டா²னா பா⁴வனாபாரிபூரிம் க³ச்ச²ந்தீ’’தி வுத்தம். ஏவம் வுத்தாய வீரியிந்த்³ரியாதி³பா⁴வனாய சத்தாரோ ஸதிபட்டா²னா ஸமாரோபயிதப்³பா³தி அத்தோ². கேன காரணேன பா⁴வனாபாரிபூரிம் க³ச்ச²ந்தீதி புச்ச²தி. சதுன்னம் இந்த்³ரியானம் இந்த்³ரியபா⁴வேன, பா⁴வேதப்³ப³பா⁴வேன வா ஏகலக்க²ணத்தா பா⁴வனாபாரிபூரிம் க³ச்ச²ந்தீதி விஸ்ஸஜ்ஜேதி. ‘‘தேஸு ஸமாரோபிதேஸு கதமே ஸமாரோபயிதப்³பா³’’தி புச்சி²தப்³ப³த்தா ‘‘சதூஸூ’’திஆதி³ வுத்தம். சதூஸு ஸதிபட்டா²னேஸு பா⁴வியமானேஸு ஸமாரோபயிதப்³பே³ஸு சத்தாரோ ஸம்மப்பதா⁴னா பா⁴வனாபாரிபூரிம் க³ச்ச²ந்தீதி ஸமாரோபயிதப்³பா³தி அத்தோ². ஸேஸேஸுபி ஏவமேவ ஸமாரோபயிதப்³பா³.

பா⁴வனாய ஸமாரோபனா ஆசரியேன விப⁴த்தா, அம்ஹேஹி ச ஞாதா, ‘‘கதமா பஹானேன ஸமாரோபனா’’தி புச்சி²தப்³ப³த்தா ‘‘தத்த² கதமா’’திஆதி³ வுத்தம். தத்தா²தி தாஸு சதூஸு பத³ட்டா²னஸமாரோபனாதீ³ஸு கதமேன தே³ஸிதேன பஹானேன கதமேஸம் அதே³ஸிதானம் பஹானானம் கதமா ஸமாரோபனாதி புச்ச²தி. ‘‘காயே காயானுபஸ்ஸீ விஹரந்தோ அஸுபே⁴ ‘ஸுப⁴’ந்தி விபல்லாஸம் பஜஹதீ’’தி தே³ஸிதேன ‘‘ஸுப⁴’’ந்தி விபல்லாஸப்பஹானேன கப³ளீகாராஹாரபரிஞ்ஞாய பரிப³ந்த⁴கிலேஸகாமுபாதா³னப்பஹானாத³யோபி ஸமாரோபயிதப்³பா³.

‘‘வேத³னாஸு வேத³னானுபஸ்ஸீ விஹரந்தோ து³க்கே² ‘ஸுக²’ந்தி விபல்லாஸம் பஜஹதீ’’தி தே³ஸிதேன ‘‘ஸுக²’’ந்தி விபல்லாஸப்பஹானேன ப²ஸ்ஸாஹாரபரிஞ்ஞாய பரிப³ந்த⁴கிலேஸப⁴வுபாதா³னப்பஹானாத³யோபி ஸமாரோபயிதப்³பா³.

‘‘சித்தே சித்தானுபஸ்ஸீ விஹரந்தோ அனிச்சே ‘நிச்ச’ந்தி விபல்லாஸம் பஜஹதீ’’தி தே³ஸிதேன ‘‘நிச்ச’’ந்தி விபல்லாஸப்பஹானேன விஞ்ஞாணாஹாரபரிஞ்ஞாய பரிப³ந்த⁴கிலேஸதி³ட்டு²பாதா³னப்பஹானாத³யோபி ஸமாரோபயிதப்³பா³.

‘‘த⁴ம்மேஸு த⁴ம்மானுபஸ்ஸீ விஹரந்தோ அனத்தனி ‘அத்தா’தி விபல்லாஸம் பஜஹதீ’’தி தே³ஸிதேன ‘‘அத்தா’’தி விபல்லாஸப்பஹானேன மனோஸஞ்சேதனாஹாரபரிஞ்ஞாய? மனோஸஞ்சேதனாஹாரபரிஞ்ஞாய பரிப³ந்த⁴கிலேஸஅத்தவாது³பாதா³னப்பஹானாத³யோபி ஸமாரோபயிதப்³பா³தி அதி⁴ப்பாயோ. (4)

பஹானஹாரோ பன லக்க²ணஹாரவிப⁴ங்க³வண்ணனாயம் வுத்தோயேவாதி இத⁴ ந வதா³ம.

‘‘ஸுத்தே தே³ஸிதேன ஏகேகேன பத³ட்டா²னாதி³கேன அதே³ஸிதானம் பத³ட்டா²னாதீ³னம் ஸமாரோபனபா⁴வோ கேன அம்ஹேஹி விஜானிதப்³போ³ ஸத்³த³ஹிதப்³போ³’’தி வத்தப்³ப³த்தா ‘‘தேனாஹ ஆயஸ்மா’’திஆதி³மாஹ. தேன ததா² ஸமாரோபனபா⁴வேன ஆயஸ்மா மஹாகச்சானோ –

‘‘யே த⁴ம்மா யம்மூலா, யே சேகத்தா² பகாஸிதா முனினா;

தே ஸமாரோபயிதப்³பா³, ஏஸ ஸமாரோபனோ ஹாரோ’’தி –

யம் வசனம் ஆஹ, தேன வசனேன வசனானுஸாரேன ததா² ஸமாரோபனபா⁴வோ தும்ஹேஹி விஜானிதப்³போ³ ஸத்³த³ஹிதப்³போ³தி வுத்தம் ஹோதி.

‘‘கிம் பன ஏத்தாவதா ஸமாரோபனோ ஹாரோ பரிபுண்ணோ, அஞ்ஞோ நியுத்தோ நத்தீ²’’தி வத்தப்³ப³த்தா ‘‘நியுத்தோ ஸமாரோபனோ ஹாரோ’’தி வுத்தம். ஸுத்தே தே³ஸிதேன நயேன பத³ட்டா²னாதி³கேன அதே³ஸிதானி பத³ட்டா²னானி ஸமாரோபயிதப்³பா³னி ப⁴வந்தி, தேன தேன பத³ட்டா²னாதி³கேன அதே³ஸிதானம் பத³ட்டா²னாதீ³னம் ஸமாரோபனோ ஹாரோ நியுத்தோ நித்³தா⁴ரேத்வா யுஞ்ஜிதப்³போ³தி அத்தோ² த³ட்ட²ப்³போ³.

இதி ஸமாரோபனஹாரவிப⁴ங்கே³ ஸத்திப³லானுரூபா ரசிதா

விபா⁴வனா நிட்டி²தா.

பண்டி³தேஹி பன அட்ட²கதா²டீகானுஸாரேன க³ம்பீ⁴ரத்தோ² வித்தா²ரதோ விப⁴ஜித்வா க³ஹேதப்³போ³.

இமே யதா²வுத்தா ஸோளஸ ஸம்வண்ணனாவிஸேஸா ஸம்வண்ணேதப்³ப³த்தே²ஸு அஞ்ஞாணஸம்ஸயானம் ஹரணதோ அபனயனதோ ஹாரா நாமாதி.

நிட்டி²தா ஹாரவிப⁴ங்க³வாரவிபா⁴வனா.