6. மஹாலிஸுத்தவண்ணனா

ப்³ராஹ்மணதூ³தவத்து²வண்ணனா

359. ஏவம் கூடத³ந்தஸுத்தம் ஸம்வண்ணேத்வா இதா³னி மஹாலிஸுத்தம் ஸம்வண்ணேந்தோ யதா²னுபுப்³ப³ம் ஸம்வண்ணனோகாஸஸ்ஸ பத்தபா⁴வம் விபா⁴வேதும், கூடத³ந்தஸுத்தஸ்ஸானந்தரம் ஸங்கீ³தஸ்ஸ ஸுத்தஸ்ஸ மஹாலிஸுத்தபா⁴வம் வா பகாஸேதும் ‘‘ஏவம் மே ஸுதம்…பே… வேஸாலியந்தி மஹாலிஸுத்த’’ந்தி ஆஹ. புனப்புனம் விஸாலபா⁴வூபக³மனதோதி ஏத்தா²யம் ஸங்கே²போ – பா³ராணஸிரஞ்ஞோ கிர அக்³க³மஹேஸியா மம்ஸபேஸிக³ப்³பே⁴ன த்³வே தா³ரகா நிப்³ப³த்தா தீ⁴தா ச புத்தோ ச, தேஸம் அஞ்ஞமஞ்ஞம் விவாஹேன ஸோளஸக்க²த்தும் புத்ததீ⁴துவஸேன த்³வே த்³வே தா³ரகா விஜாதா. ததோ தேஸம் தா³ரகானம் யதா²க்கமம் வட்³டே⁴ந்தானம் பச்சேகம் ஸபரிவாரானம் ஆராமுய்யானனிவாஸட்டா²னபரிவாரஸம்பத்திம் க³ஹேதும் அப்பஹோனகதாய நக³ரம் திக்க²த்தும் கா³வுதந்தரேன கா³வுதந்தரேன பரிக்கி²பிம்ஸு, ஏவம் தஸ்ஸ புனப்புனம் திபாகாரபரிக்கே²பேன விஸாலபா⁴வமுபக³தத்தா ‘‘வேஸாலீ’’த்வேவ நாமம் ஜாதம். தேன வுத்தம் ‘‘புனப்புனம் விஸாலபா⁴வூபக³மனதோ வேஸாலீதி லத்³த⁴னாமகே நக³ரே’’தி. வித்தா²ரகதா² சேத்த² மஹாஸீஹனாத³ஸுத்தவண்ணனாய, (ம. நி. அட்ட². 1.146) ரதனஸுத்தவண்ணனாய (கு². பா. அட்ட². வேஸாலிவத்து²; ஸு. நி. அட்ட². 1.ரதனஸுத்தவண்ணனா) ச க³ஹேதப்³பா³. ப³ஹினக³ரேதி நக³ரதோ ப³ஹி, ந அம்ப³பாலிவனம் விய அந்தோனக³ரஸ்மிம். ஸயம்ஜாதந்தி ஸயமேவ ஜாதம் அரோபிமம். மஹந்தபா⁴வேனாதி ருக்க²க³ச்சா²னம், டி²தோகாஸஸ்ஸ ச மஹந்தபா⁴வேன. தேனேவாஹ ‘‘ஹிமவந்தேன ஸத்³தி⁴ம் ஏகாப³த்³த⁴ம் ஹுத்வா’’தி. யம் பன வேனயிகானம் மதேன வினயட்ட²கதா²யம் வுத்தம் –

‘‘தத்த² மஹாவனம் நாம ஸயம்ஜாதம் அரோபிமம் ஸபரிச்சே²த³ம் மஹந்தம் வனம். கபிலவத்து²ஸாமந்தா பன மஹாவனம் ஹிமவந்தேன ஸஹ ஏகாப³த்³த⁴ம் அபரிச்சே²த³ம் ஹுத்வா மஹாஸமுத்³த³ம் ஆஹச்ச டி²தம், இத³ம் தாதி³ஸம் ந ஹோதீ’’தி (பாரா. அட்ட². 2.162).

தம் மஜ்ஜி²மபா⁴ணகஸம்யுத்தபா⁴ணகானம்பி ஸமானகதா². மஜ்ஜி²மட்ட²கதா²யஞ்ஹி (ம. நி. அட்ட². 2.352) ஸம்யுத்தட்ட²கதா²யஞ்ச (ஸம். நி. அட்ட². 1.37) ததே²வ வுத்தம். இத⁴ பன தீ³க⁴பா⁴ணகானம் மதேன ஏவம் வுத்தந்தி த³ட்ட²ப்³ப³ம். யதி³ ச ‘‘அஹுத்வா’’தி கத்த²சி பாடோ² தி³ஸ்ஸதி, ஏவம் ஸதி ஸப்³பே³ஸம்பி ஸமானவாதோ³ ஸியாதி. கூடாகா³ரஸாலாஸங்கே²பேனாதி ஹம்ஸமண்ட³லாகாரஸங்கா²தஹம்ஸவட்டகச்ச²ன்னேன கூடாகா³ரஸாலானியாமேன, ததா² கதத்தா பாஸாதோ³யேவ ‘‘கூடாகா³ரஸாலா’’தி வுத்தோ, தப்³போ³ஹாரேன பன ஸகலோபி ஸங்கா⁴ராமோதி வுத்தம் ஹோதி. வினயட்ட²கதா²யம் (பாரா. அட்ட². 2.162) து ஏவம் வுத்தம் –

‘‘கூடாகா³ரஸாலா பன மஹாவனம் நிஸ்ஸாய கதே ஆராமே கூடாகா³ரம் அந்தோகத்வா ஹம்ஸவட்டகச்ச²த³னேன கதா ஸப்³பா³காரஸம்பன்னா பு³த்³த⁴ஸ்ஸ ப⁴க³வதோ க³ந்த⁴குடி வேதி³தப்³பா³’’தி.

கோஸலேஸு ஜாதா, ப⁴வா, தே வா நிவாஸோ ஏதேஸந்தி கோஸலகா. ஏவம் மாக³த⁴கா. ஜனபத³வாசினோ ஹி பாயதோ புல்லிங்க³புது²வசனா. யஸ்ஸ அகரணே புக்³க³லோ மஹாஜானியோ ஹோதி, தம் கரணம் அரஹதீதி கரணீயந்தி வுச்சதி. தேனாஹ ‘‘அவஸ்ஸம் கத்தப்³ப³கம்மேனா’’தி. அகாதும்பி வட்டதி அஸதி ஸமவாயே, தஸ்மா ஸமவாயே ஸதி கத்தப்³ப³தோ தம் கிச்சந்தி வுச்சதீதி அதி⁴ப்பாயோ.

360. யா பு³த்³தா⁴னம் உப்பஜ்ஜனாரஹா நானத்தஸஞ்ஞா, தாஸம் வஸேன ‘‘நானாரம்மணசாரதோ’’தி வுத்தம், நானாரம்மணப்பவத்திதோதி அத்தோ². ஸம்ப⁴வந்தஸ்ஸேவ ஹி படிஸேதோ⁴, ந அஸம்ப⁴வந்தஸ்ஸ. படிக்கம்மாதி நிவத்தேத்வா ததா² சித்தம் அனுப்பாதே³த்வா. ஸல்லீனோதி ஜா²னஸமாபத்தியா ஏகத்தாரம்மணம் அல்லீனோ. நிலீனோதி தஸ்ஸேவ வேவசனம். தேன வுத்தம் ‘‘ஏகீபா⁴வ’’ந்திஆதி³. ஸபரிவாரத்தா அனேகோபி ததா³ ஏகோ விய ப⁴வதீதி ஏகீபா⁴வோ, தம் ஏகீபா⁴வம். யேனாயஸ்மா நாகி³தோ, தம் ஸந்தா⁴ய ‘‘தஸ்மா டா²னா’’தி வுத்தம்.

ஓட்ட²த்³த⁴லிச்ச²விவத்து²வண்ணனா

361. அத்³தோ⁴ட்ட²தாயாதி உபட்³டோ⁴ட்ட²தாய. தஸ்ஸ கிர உத்தரோட்ட²ஸ்ஸ அப்பகதாய திரியம் பா²லேத்வா அத்³த⁴மபனீதம் விய கா²யதி சத்தாரோ த³ந்தே, த்³வே ச தா³டா² ந சா²தே³தி, தேன நம் ‘‘ஓட்ட²த்³தோ⁴’’தி வோஹரதி. கேசி பன ‘‘அதோ⁴-ஸத்³தே³ன பாட²ம் பரிகப்பேத்வா ஹேட்டா² ஓட்ட²ஸ்ஸ ஓலம்ப³கதாய ‘‘ஓட்டா²தோ⁴’’தி அத்த²ம் வத³ந்தி, தத³யுத்தமேவ ததா² பாட²ஸ்ஸ அதி³ஸ்ஸனதோ, ஆசரியேன (தீ³. நி. டீ. 1.361) ச அவண்ணிதத்தா. அயம் கிர உபோஸதி²கோ தா³யகோ தா³னபதி ஸத்³தோ⁴ பஸன்னோ பு³த்³த⁴மாமகோ த⁴ம்மஸங்க⁴மாமகோ. தேனாஹ ‘‘புரேப⁴த்த’’ந்திஆதி³. க²ந்த⁴கே, (மஹாவ. 289) மஹாபரினிப்³பா³னஸுத்தே (தீ³. நி. 2.161) ச ஆக³தனயேன ‘‘நீலபீதாதி³…பே… தாவதிம்ஸபரிஸஸப்படிபா⁴கா³யா’’தி வுத்தம். அயம் பன வேஸாலீ ப⁴க³வதோ காலே இத்³தா⁴ சேவ வேபுல்லப்பத்தா ச அஹோஸி. தத்த² ஹி ராஜூனமேவ ஸத்த ஸஹஸ்ஸானி, ஸத்த ஸதானி, ஸத்த ச ராஜானோ அஹேஸும், ததா² யுவராஜஸேனாபதிப⁴ண்டா³கா³ரிகபபு⁴தீனம்பி, பாஸாத³கூடாகா³ரஆராமபோக்க²ரணிஆத³யோபி தப்பரிமாணாயேவ, ப³ஹுஜனா, ஆகிண்ணமனுஸ்ஸா, ஸுபி⁴க்கா² ச. தேன வுத்தம் ‘‘மஹதியா லிச்ச²விபரிஸாயா’’தி. தஸ்ஸ பன குலஸ்ஸ ஆதி³பூ⁴தானம் யதா²வுத்தானம் மம்ஸபேஸியா நிப்³ப³த்ததா³ரகானம் தாபஸேன பாயிதம் யம் கீ²ரம் உத³ரம் பவிஸதி, ஸப்³ப³ம் தம் மணிபா⁴ஜனக³தம் விய தி³ஸ்ஸதி, சரிமகப⁴வே போ³தி⁴ஸத்தே குச்சி²க³தே போ³தி⁴ஸத்தமாது விய உத³ரச்ச²வியா அதிவிப்பஸன்னதாய தே நிச்ச²வீ அஹேஸும். அபரே பனாஹு ‘‘ஸிப்³பே³த்வா ட²பிதா விய நேஸம் அஞ்ஞமஞ்ஞம் லீனா ச²வி அஹோஸீ’’தி. ஏவம் தே நிச்ச²விதாய வா லீனச்ச²விதாய வா லிச்ச²வீதி பஞ்ஞாயிம்ஸு, நிருத்தினயேன சேத்த² பத³ஸித்³தி⁴, தப்³ப³ம்ஸே உப்பன்னா ஸப்³பே³பி லிச்ச²வயோ நாம ஜாதா. தேனாஹ ‘‘லிச்ச²விபரிஸாயா’’தி, லிச்ச²விராஜூனம், லிச்ச²விவம்ஸபூ⁴தாய வா பரிஸாயாதி அத்தோ². மஹந்தம் யஸம் லாதி க³ண்ஹாதீதி மஹாலி யதா² ‘‘ப⁴த்³தா³லீ’’தி. மூலனாமந்தி மாதாபிதூஹி கதனாமம்.

362. ஸாஸனே யுத்தபயுத்தோதி பா⁴வனமனுயுத்தோ. ஸப்³ப³த்த² ஸீஹஸமானவுத்தினோபி ப⁴க³வதோ பரிஸாய மஹத்தே ஸதி தத³ஜ்ஜா²ஸயானுரூபம் பவத்தியமானாய த⁴ம்மதே³ஸனாய விஸேஸோ ஹோதீதி ஆஹ ‘‘மஹந்தேன உஸ்ஸாஹேன த⁴ம்மம் தே³ஸேஸ்ஸதீ’’தி.

‘‘விஸ்ஸாஸிகோ’’தி வத்வா தமஸ்ஸ விஸ்ஸாஸிகபா⁴வம் விபா⁴வேதும் ‘‘அயஞ்ஹீ’’திஆதி³ வுத்தம். தூ²லஸரீரோதி வட²ரஸரீரோ. தே²ரஸ்ஸ கீ²ணாஸவபா⁴வதோ ‘‘ஆலஸியபா⁴வோ அப்பஹீனோ’’தி ந வத்தப்³போ³, வாஸனாலேஸம் பன உபாதா³ய ‘‘ஈஸகம் அப்பஹீனோ விய ஹோதீ’’தி வுத்தம். ந ஹி ஸாவகானம் பு³த்³தா⁴னமிவ ஸவாஸனா கிலேஸா பஹீயந்தி. யதா²வுத்தம் பாஸாத³மேவ ஸந்தா⁴ய ‘‘கூடாகா³ரமஹாகே³ஹா’’தி வுத்தம். பாசீனமுகா²தி பாசீனபமுகா².

363. வினேய்யஜனானுபரோதே⁴ன பு³த்³தா⁴னம் ப⁴க³வந்தானம் படிஹாரியவிஜம்ப⁴னம் ஹோதீதி ஆஹ ‘‘அத² கோ²’’திஆதி³. க³ந்த⁴குடிதோ நிக்க²மனவேலாயஞ்ஹி ச²ப்³ப³ண்ணா பு³த்³த⁴ரஸ்மியோ ஆவேளாவேளா யமலா யமலா ஹுத்வா ஸவிஸேஸம் பப⁴ஸ்ஸரா வினிச்ச²ரிம்ஸு. தாஹி ‘‘ப⁴க³வா நிக்க²மதீ’’தி ஸமாரோசிதமிவ நிக்க²மனம் ஸஞ்ஜானிம்ஸு. தேன வுத்தம் ‘‘ஸம்ஸூசிதனிக்க²மனோ’’தி.

364. ‘‘அஜ்ஜா’’தி வுத்ததி³வஸதோ அதீதமனந்தரம் ஹிய்யோதி³வஸம் புரிமம் நாம, ததா² ‘‘ஹிய்யோ’’தி வுத்ததி³வஸதோ பரம் புரிமதரம் அதிஸயேன புரிமத்தா. இதி இமேஸு த்³வீஸு தி³வஸேஸு வவத்தி²தோ யதா²க்கமம் புரிமபுரிமதரபா⁴வோ. ஏவம் ஸந்தேபி யதே³த்த² ‘‘புரிமதர’’ந்தி வுத்தம், ததோ பபு⁴தி யம் யம் ஓரம், தம் தம் புரிமம். யம் யம் பரம், தம் தம் புரிமதரந்தி த³ஸ்ஸேந்தோ ‘‘ததோ பட்டா²யா’’திஆதி³மாஹ. ஓரபாரபா⁴வஸ்ஸ விய, ஹி தி³ஸாவிதி³ஸாபா⁴வஸ்ஸ விய ச புரிமபுரிமதரபா⁴வஸ்ஸ அபேக்கா²ஸித்³தி⁴. மூலதி³வஸதோதிஆதி³தி³வஸதோ. அக்³கே³தி உபயோக³த்தே² பு⁴ம்மவசனம், உபயோக³வசனஸ்ஸ வா ஏ-காராதே³ஸோதி த³ஸ்ஸேதி ‘‘அக்³க³’’ந்தி இமினா, பட²மந்தி அத்தோ². தம் பனேத்த² பரா அதீதா கோடியேவாதி ஆஹ ‘‘பரகோடிம் கத்வா’’தி. யம்-ஸத்³தோ³ பரிச்சே²தே³ நிபாதோ, தப்பயோகே³ன சாயம் ‘‘விஹராமீ’’தி வத்தமானபயோகோ³, அத்தோ² பன அதீதவஸேன வேதி³தப்³போ³தி த³ஸ்ஸேதும் ‘‘யாவ விஹாஸி’’ந்தி வுத்தம். தஸ்ஸாதி தி³வஸஸ்ஸ. பட²மவிகப்பே ‘‘விஹராமீ’’தி இமஸ்ஸ ‘‘யத³க்³கே³’’தி இமினா உஜுகம் தாவ ஸம்ப³ந்தி⁴த்வா பச்சா² ‘‘நசிரம் தீணி வஸ்ஸானீ’’தி பமாணவசனம் யோஜேதப்³ப³ம். து³தியவிகப்பே பன ‘‘நசிரம் தீணி வஸ்ஸானீ’’தி இமேஹிபி குடிலம் ஸம்ப³ந்தோ⁴ கத்தப்³போ³. நசிரந்தி சேதம் பா⁴வனபும்ஸகம், அச்சந்தஸஞ்ஞோக³ம் வா. தஞ்ஹி பமாணதோ விஸேஸேதும் ‘‘தீணி வஸ்ஸானீ’’தி வத³தி. தேனாஹ ‘‘நசிரம் விஹாஸிம் தீணியேவ வஸ்ஸானீ’’தி.

அயந்தி ஸுனக்க²த்தோ. பியஜாதிகானீதி இட்ட²ஸபா⁴வானி. ஸாதஜாதிகானீதி மது⁴ரஸபா⁴வானி. மது⁴ரஸதி³ஸதாய ஹி ‘‘மது⁴ர’’ந்தி மனோரமம் வுச்சதி. ஆரம்மணம் கரோந்தேன காமேன உபஸம்ஹிதானீதி காமூபஸம்ஹிதானி, காமனீயானி. தேனாஹ ‘‘காமஸ்ஸாத³யுத்தானீ’’தி, ஆரம்மணிகேன காமஸங்கா²தேன அஸ்ஸாதே³ன ஸஞ்ஞுத்தானி, காமஸங்கா²தஸ்ஸ வா அஸ்ஸாத³ஸ்ஸ யோக்³யானீதி அத்தோ². ஸரீரஸண்டா²னேதி ஸரீரபி³ம்பே³, ஆதா⁴ரே சேதம் பு⁴ம்மம். தஸ்மா ஸத்³தே³னாதி தம் நிஸ்ஸாய ததோ உப்பன்னேன ஸத்³தே³னாதி அத்தோ². அபிச வினா பாட²ஸேஸம் ப⁴விதப்³ப³பதே³னேவ ஸம்ப³ந்தி⁴தப்³ப³ம். மது⁴ரேனாதி இட்டே²ன ஸாதேன. கண்ணஸக்க²லியந்தி கண்ணபட்டிகாயம்.

ஏத்தாவதாதி தி³ப்³ப³ஸோதஞாணபரிகம்மஸ்ஸ அகத²னமத்தேன. ‘‘அத்தனா ஞாதம்பி ந கதே²தி, கிம் இமஸ்ஸ ஸாஸனே அதி⁴ட்டா²னேனா’’தி குஜ்ஜ²ந்தோ ப⁴க³வதி ஆகா⁴தம் ப³ந்தி⁴த்வா, ஸஹ குஜ்ஜ²னேனேவ சேஸ ஜா²னாபி⁴ஞ்ஞா பரிஹாயி. சிந்தேஸீதி ‘‘கஸ்மா நு கோ² ஸோ மய்ஹம் தம் பரிகம்மம் ந கதே²ஸீ’’தி பரிவிசாரேந்தோ அயோனிஸோ உம்முஜ்ஜனவஸேன சிந்தேஸி. அனுக்கமேனாதி பாதி²கஸுத்தே, (தீ³. நி. 3.3 ஆத³யோ) மஹாஸீஹனாத³ஸுத்தே (தீ³. நி. 1.381) ச ஆக³தனயேன தம் தம் அயுத்தமேவ சிந்தேந்தோ, பா⁴ஸந்தோ, கரோந்தோ ச அனுக்கமேன ப⁴க³வதி ப³த்³தா⁴கா⁴ததாய ஸாஸனே பதிட்ட²ம் அலப⁴ந்தோ கி³ஹிபா⁴வம் பத்வா தமத்த²ம் கதே²தி.

ஏகம்ஸபா⁴விதஸமாதி⁴வண்ணனா

366-371. ஏகம்ஸாயாதி தத³த்தே² சதுத்தீ²வசனம், ஏகம்ஸத்த²ந்தி அத்தோ². அம்ஸஸத்³தோ³ சேத்த² கோட்டா²ஸபரியாயோ, ஸோ ச அதி⁴காரதோ தி³ப்³ப³ரூபத³ஸ்ஸனதி³ப்³ப³ஸத்³த³ஸவனவஸேன வேதி³தப்³போ³தி ஆஹ ‘‘ஏககோட்டா²ஸாயா’’திஆதி³. வா-ஸத்³தோ³ சேத்த² விகப்பனே ஏகம்ஸஸ்ஸேவாதி⁴ப்பேதத்தா. அனுதி³ஸாயாதி புரத்தி²மத³க்கி²ணாதி³பே⁴தா³ய சதுப்³பி³தா⁴ய அனுதி³ஸாய. உப⁴யகோட்டா²ஸாயாதி தி³ப்³ப³ரூபத³ஸ்ஸனத்த²ம், தி³ப்³ப³ஸத்³த³ஸவனத்த²ஞ்ச. பா⁴விதோதி யதா² தி³ப்³ப³சக்கு²ஞாணம், தி³ப்³ப³ஸோதஞாணஞ்ச ஸமதி⁴க³தம் ஹோதி, ஏவம் பா⁴விதோ. தயித³ம் விஸும் விஸும் பரிகம்மகரணேன இஜ்ஜ²ந்தீஸு வத்தப்³ப³ம் நத்தி², ஏகஜ்ஜ²ம் இஜ்ஜ²ந்தீஸுபி கமேனேவ கிச்சஸித்³தி⁴ ப⁴வதி ஏகஜ்ஜ²ம் கிச்சஸித்³தி⁴யா அஸம்ப⁴வதோ. பாளியம்பி ஹி ‘‘தி³ப்³பா³னஞ்ச ரூபானம் த³ஸ்ஸனாய, தி³ப்³பா³னஞ்ச ஸத்³தா³னம் ஸவனாயா’’தி இத³ம் ஏகஸ்ஸ உப⁴யஸமத்த²தாஸந்த³ஸ்ஸனமேவ, ந ஏகஜ்ஜ²ம் கிச்சஸித்³தி⁴ஸம்ப⁴வஸந்த³ஸ்ஸனம். ‘‘ஏகம்ஸபா⁴விதோ ஸமாதி⁴ ஹேதூ’’தி இமினா ஸுனக்க²த்தோ தி³ப்³ப³சக்கு²ஞாணாய ஏவ பரிகம்மஸ்ஸ கதத்தா விஜ்ஜமானம்பி தி³ப்³ப³ஸத்³த³ம் நாஸ்ஸோஸீதி த³ஸ்ஸேதி.

372. தி³ப்³ப³சக்கு²ஞாணதோ தி³ப்³ப³ஸோதஞாணமேவ ஸேட்ட²ந்தி மஞ்ஞமானோ மஹாலி ஏதமத்த²ம் புச்ச²தீதி ஆஹ ‘‘இத³ம் தி³ப்³ப³ஸோதேன…பே… மஞ்ஞே’’தி. அபண்ணகந்தி அவிரஜ்ஜ²னகம், அனவஜ்ஜம் வா. ஸமாதி⁴யேவ பா⁴வேதப்³ப³ட்டே²ன ஸமாதி⁴பா⁴வனா. ‘‘தி³ப்³ப³ஸோதஞாணம் ஸேட்ட²’’ந்தி மஞ்ஞமானேன ச தேன தி³ப்³ப³சக்கு²ஞாணம்பி தி³ப்³ப³ஸோதேனேவ ஸஹ க³ஹேத்வா ‘‘ஏதாஸம் நூன ப⁴ந்தே’’திஆதி³னா புது²வசனேன புச்சி²தந்தி த³ஸ்ஸேதும் ‘‘உப⁴யம்ஸபா⁴விதானம் ஸமாதீ⁴ன’’ந்தி வுத்தம். பா³ஹிரா ஏதா ஸமாதி⁴பா⁴வனா அனிய்யானிகத்தா. தா ஹி இதோ பா³ஹிரகானம்பி இஜ்ஜ²ந்தி. ந அஜ்ஜ²த்திகா ப⁴க³வதா ஸாமுக்கம்ஸிகபா⁴வேன அப்பவேதி³தத்தா. ந ஹி தே ஸச்சானி விய ஸாமுக்கம்ஸிகா. யத³த்த²ந்தி யேஸம் அத்தா²ய, அபே⁴தே³பி பே⁴த³வசனமேதம், யஸ்ஸ வா விஸேஸனபூ⁴தஸ்ஸ அத்தா²ய. தேதி அரியப²லத⁴ம்மே. ‘‘த’’ந்திபி அது⁴னா பாடோ². தே ஹி ஸச்சி²காதப்³பா³, ‘‘அத்தி² கோ² மஹாலி அஞ்ஞேவ த⁴ம்மா…பே… யேஸம் ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தீ’’தி ஸச்சி²காதப்³ப³த⁴ம்மா ச இத⁴ வுத்தா.

சதுஅரியப²லவண்ணனா

373. ஸம்யோஜேந்தீதி ப³ந்தே⁴ந்தி. தஸ்மாதி யஸ்மா வட்டது³க்க²ப⁴யே ஸம்யோஜனதோ தத்த² ஸத்தே ஸம்யோஜேந்தி நாம, தஸ்மா. கத்த²சி ‘‘வட்டது³க்க²மயே ரதே²’’தி பாடோ², ந போராணோ ததா² ஆசரியேன அவண்ணிதத்தா. மக்³க³ஸோதம் ஆபன்னோ, ந பஸாதா³தி³ஸோதம். ‘‘ஸோதோதி பி⁴க்க²வே அரியமக்³க³ஸ்ஸேதம் அதி⁴வசன’’ந்தி ஹி வுத்தம். ஆபன்னோதி ச ஆதி³தோ பத்தோதி அத்தோ² ஆ-உபஸக்³க³ஸ்ஸ ஆதி³கம்மனி பவத்தனதோ, இத³ம் பன ப²லட்ட²வஸேன வத³தி. அதீதகாலவசனஞ்ஹேதம், மக்³க³க்க²ணே பன மக்³க³ஸோதம் ஆபஜ்ஜதி நாம. தேனேவாஹ த³க்கி²ணவிப⁴ங்கே³ ‘‘ஸோதாபன்னே தா³னம் தே³தி, ஸோதாபத்திப²லஸச்சி²கிரியாய படிபன்னே தா³னம் தே³தீ’’தி (ம. நி. 3.379) அபதனத⁴ம்மோதி அனுபபஜ்ஜனஸபா⁴வோ. த⁴ம்மனியாமேனாதி உபரிமக்³க³த⁴ம்மனியாமேன. ஹேட்டி²மந்தேன ஸத்தமப⁴வதோ உபரி அனுபபஜ்ஜனத⁴ம்மதாய வா நியதோதி அட்ட²கதா²முத்தகனயோ. பரம் அயனம் பராக³தி அஸ்ஸ அத்தீ²தி அத்தோ². அனேனாதி புன ததியஸமாஸவசனம், வா-ஸத்³தோ³ சேத்த² லுத்தனித்³தி³ட்டோ².

தனுத்தம் நாம பவத்தியா மந்த³தா, விரளதா சாதி வுத்தம் ‘‘தனுத்தா’’திஆதி³. கரஹசீதி நிபாதமத்தம், பரியாயவசனம் வா. ‘‘ஓரேன சே மாஸோ ஸேஸோ கி³ம்ஹானந்தி வஸ்ஸிகஸாடிகசீவரம் பரியேஸேய்யா’’திஆதீ³ஸு (பாரா. 627) விய ஓர-ஸத்³தோ³ ந அதிரேகத்தோ²தி ஆஹ ‘‘ஹேட்டா²பா⁴கி³யான’’ந்தி, ஹேட்டா²பா⁴க³ஸ்ஸ காமப⁴வஸ்ஸ பச்சயபா⁴வேன ஹிதானந்தி அத்தோ². ‘‘ஸுத்³தா⁴வாஸபூ⁴மிய’’ந்தி தேஸம் உபபத்திட்டா²னத³ஸ்ஸனம். ஓபபாதிகோதி உபபாதிகோ உபபாதனே ஸாது⁴காரீ. தேனாஹ ‘‘ஸேஸயோனிபடிக்கே²பவசனமேத’’ந்தி பரினிப்³பா³னத⁴ம்மோதி அனுபாதி³ஸேஸாய நிப்³பா³னதா⁴துயா பரினிப்³பா³னஸபா⁴வோ. விமுச்சதீதி விமுத்தி, சித்தமேவ விமுத்தி சேதோவிமுத்தீதி வுத்தம் ‘‘சித்தவிஸுத்³தி⁴’’ந்திஆதி³. சித்தஸீஸேன சேத்த² ஸமாதி⁴ க³ஹிதோ ‘‘ஸீலே பதிட்டா²ய நரோ ஸபஞ்ஞோ, சித்தம் பஞ்ஞஞ்ச பா⁴வய’’ந்திஆதீ³ஸு (ஸம். நி. 1.23, 192; பேடகோ. 22; மி. ப. 1.1.9) விய. பஞ்ஞாவிமுத்திந்தி ஏத்தா²பி ஏஸேவ நயோ. தேனாஹ ‘‘அரஹத்தப²லபஞ்ஞாவ பஞ்ஞாவிமுத்தீ’’தி. ஸாமந்தி அத்தனாவ, அபரப்பச்சயேனாதி அத்தோ². ‘‘அபி⁴ஜானித்வா’’தி இமினா த்வாதி³பச்சயகாரியஸ்ஸ ய-காரஸ்ஸ லோபோ த³ஸ்ஸிதோ. ‘‘அபி⁴ஞ்ஞாயா’’தி இமினா பன நா-வசனகாரியஸ்ஸாதி த³ட்ட²ப்³ப³ம். ஸச்சீ²தி பச்சக்க²த்தே² நேபாதிகம். பச்சக்க²கரணம் நாம அனுஸ்ஸவாகாரபரிவிதக்காதி³கே முஞ்சித்வா ஸரூபதோ ஆரம்மணகரணம்.

அரியஅட்ட²ங்கி³கமக்³க³வண்ணனா

374-5. உப்பதித்வாதி ஆகாஸமக்³கே³ன டே³த்வா. படிபஜ்ஜதி அரியாஸாவகோ நிப்³பா³னம், அரியப²லஞ்ச ஏதாயாதி படிபதா³, ஸா ச தஸ்ஸ புப்³ப³பா⁴கோ³ ஏவாதி அரியமக்³கோ³ புப்³ப³பா⁴க³படிபதா³னாமேன இத⁴ வுத்தோ. ஆததவிததாதி³வஸேன பஞ்சங்கி³கம். தி³ஸாவிதி³ஸானிவிட்ட²பதே³ஸேன அட்ட²ங்கி³கோ. அட்ட²ங்க³தோ முத்தோ அஞ்ஞோ கோசி அட்ட²ங்கி³கோ நாம மக்³கோ³ நத்தீ²தி ஆஹ ‘‘அட்ட²ங்க³மத்தோயேவா’’திஆதி³னா. ந ஹி அவயவவினிமுத்தோ ஸமுதா³யோ நாம கோசி அத்தீ²தி. தஸ்மா ‘‘அட்ட² அங்கா³னி அஸ்ஸாதி அஞ்ஞபத³த்த²ஸமாஸம் அகத்வா ‘அட்ட² அங்கா³னி அட்ட²ங்கா³னி, தானி அஸ்ஸ ஸந்தீதி அட்ட²ங்கி³கோ’தி ஸமாஸக³ப்³ப⁴தத்³தி⁴தவஸேன பத³ஸித்³தி⁴ காதப்³பா³’’தி (தீ³. நி. டீ. 1.374, 375) ஆசரியேன வுத்தம், அதி⁴ப்பாயோ சேத்த² சிந்தேதப்³போ³. அஞ்ஞபத³த்த²ஸமாஸே ஹி கதே ந ஸக்கா அட்ட²ங்க³அட்ட²ங்கி³கானம் பே⁴தோ³ அஞ்ஞமஞ்ஞம் விபரியாயம் கத்வாபி நியமேதும் ப்³யாஸே உப⁴யபத³த்த²பரபா⁴வேன ஸஹேவ ஸங்க்²யாபரிச்சே²தே³ன அத்தா²பத்திதோ. ஸமாஸக³ப்³பே⁴ பன தத்³தி⁴தே கதே ஸக்கா ஏவ தேஸம் பே⁴தோ³ அஞ்ஞமஞ்ஞம் விபரியாயம் கத்வா நியமேதும் ஸமாஸே உத்தரபத³த்த²பரபா⁴வேன வினாவ ஸங்க்²யாபரிச்சே²தே³ன அத்தா²பத்திதோ. ஏகத்தி²பா⁴வலக்க²ணோ ஹி ஸமாஸோதி. த⁴ம்மதா³யாத³ஸுத்தந்தடீகாயம் பன ஆசரியேனேவ ஏவம் வுத்தம் ‘‘யஸ்மா மக்³க³ங்க³ஸமுதா³யே மக்³க³வோஹாரோ ஹோதி, ஸமுதா³யோ ச ஸமுதா³யீஹி ஸமன்னாக³தோ, தஸ்மா அத்தனோ அவயவபூ⁴தானி அட்ட² அங்கா³னி ஏதஸ்ஸ ஸந்தீதி அட்ட²ங்கி³கோ’’தி. பட²மனயே சேத்த² அங்கி³னா அங்க³ஸ்ஸ அட்ட²ங்கி³கபா⁴வோ வுத்தோ, து³தியனயே பன அங்கே³ன அங்கி³னோதி அயமேதேஸம் விஸேஸோ.

இதா³னி அட்ட²ங்கி³கமக்³கே³ லக்க²ணதோ, கிச்சக²ணாரம்மணபே⁴த³கமதோ ச வினிச்ச²யம் த³ஸ்ஸேந்தோ ‘‘தத்தா²’’திஆதி³மாஹ. ஸம்மாத³ஸ்ஸனலக்க²ணாதி அவிபரீதம் யாதா²வதோ சதுன்னமரியஸச்சானம் பச்சக்க²மேவ த³ஸ்ஸனஸபா⁴வா. ஸம்மா அபி⁴னிரோபனலக்க²ணோதி நிப்³பா³னாரம்மணே சித்தஸ்ஸ அவிபரீதமபி⁴னிரோபனஸபா⁴வோ. ஸம்மா பரிக்³க³ஹணலக்க²ணாதி சதுரங்க³ஸமன்னாக³தா வாசா ஜனே ஸங்க³ண்ஹாதீதி தப்³பி³பக்க²தோ விரதிஸபா⁴வா ஸம்மாவாசா பே⁴த³கரமிச்சா²வாசப்பஹானேன ஜனே, ஸம்பயுத்தத⁴ம்மே ச பரிக்³க³ண்ஹனகிச்சவதீ ஹோதி, ஏவம் அவிபரீதம் பரிக்³க³ஹணஸபா⁴வா. ஸம்மா ஸமுட்டா²பனலக்க²ணோதி யதா² சீவரகம்மாதி³கோ கம்மந்தோ ஏகம் காதப்³ப³ம் ஸமுட்டா²பேதி, தம்தம்கிரியானிப்பா²த³கோ வா சேதனாஸங்கா²தோ கம்மந்தோ ஹத்த²பாத³சலனாதி³கம் கிரியம் ஸமுட்டா²பேதி, ஏவம் ஸாவஜ்ஜகத்தப்³ப³கிரியாஸமுட்டா²பகமிச்சா²கம்மந்தப்பஹானேன ஸம்மாகம்மந்தோ நிரவஜ்ஜஸமுட்டா²பனகிச்சவா ஹோதி, ஸம்பயுத்தே ச ஸமுட்டா²பேந்தோ ஏவ பவத்ததீதி அவிபரீதம் ஸமுட்டா²பனஸபா⁴வோ. ஸம்மா வோதா³பனலக்க²ணோதி காயவாசானம், க²ந்த⁴ஸந்தானஸ்ஸ ச ஸம்கிலேஸபூ⁴தமிச்சா²ஜீவப்பஹானேன அவிபரீதம் வோதா³பனஸபா⁴வோ. ஸம்மா பக்³க³ஹலக்க²ணோதி ஸஸம்பயுத்தத⁴ம்மஸ்ஸ சித்தஸ்ஸ ஸம்கிலேஸபக்கே² பதிதுமத³த்வா அவிபரீதம் பக்³க³ஹணஸபா⁴வோ. ஸம்மா உபட்டா²னலக்க²ணாதி தாதி³பா⁴வலக்க²ணேன அவிபரீதம் தத்த² உபட்டா²னஸபா⁴வோ. ஸம்மா ஸமாதா⁴னலக்க²ணோதி விக்கே²பவித்³த⁴ம்ஸனேன அவிபரீதம் சித்தஸ்ஸ ஸமாத³ஹனஸபா⁴வோ.

ஸஹஜேகட்ட²தாய தி³ட்டே²கட்டா² அவிஜ்ஜாத³யோ மிச்சா²தி³ட்டி²தோ அஞ்ஞே அத்தனோ பச்சனீககிலேஸா நாம. பஸ்ஸதீதி பகாஸேதி கிச்சபடிவேதே⁴ன படிவிஜ்ஜ²தி. தேனாஹ ‘‘தப்படி…பே… அஸம்மோஹதோ’’தி. இத³ஞ்ஹி தஸ்ஸா பஸ்ஸனாகாரத³ஸ்ஸனம். தேனேவ ஹி ஸம்மாதி³ட்டி²ஸங்கா²தேன அங்கே³ன தத்த² பச்சவேக்க²ணா பவத்ததி. புரிமானி த்³வே கிச்சானி ஸப்³பே³ஸமேவ ஸாதா⁴ரணானீதி ஆஹ ‘‘ஸம்மாஸங்கப்பாத³யோபீ’’திஆதி³. ‘‘ததே²வா’’தி இமினா ‘‘அத்தனோ பச்சனீககிலேஸேஹி ஸத்³தி⁴’’ந்தி இத³மனுகட்³ட⁴தி.

புப்³ப³பா⁴கே³தி உபசாரக்க²ணே. உபசாரபா⁴வனாவஸேன அனேகவாரம் பவத்தசித்தக்க²ணிகத்தா நானக்க²ணா. அனிச்சாதி³லக்க²ணவிஸயத்தா நானாரம்மணா. மக்³க³ஸ்ஸ ஏகசித்தக்க²ணிகத்தா ஏகக்க²ணா. நிப்³பா³னாரம்மணத்தா ஏகாரம்மணா. கிச்சதோதி புப்³ப³பா⁴கே³ து³க்கா²தி³ஞாணேஹி கத்தப்³பே³ன இத⁴ ஸாதிஸயம் நிப்³ப³த்தேன கிச்சேன, இமஸ்ஸேவ வா ஞாணஸ்ஸ து³க்கா²தி³ப்பகாஸனகிச்சேன. சத்தாரி நாமானி லப⁴தி சதூஸு ஸச்சேஸு காதப்³ப³கிச்ச நிப்³ப³த்திதோ.தீணி நாமானி லப⁴தி காமஸங்கப்பாதி³ப்பஹானனிப்³ப³த்திதோ. ஸிக்கா²பத³விப⁴ங்கே³ ‘‘விரதிசேதனா, ஸப்³பே³ ஸம்பயுத்தத⁴ம்மா ச ஸிக்கா²பதா³னீ’’தி (விப⁴. 704) வுச்சந்தி. தத்த² பன பதா⁴னானம் விரதிசேதனானம் வஸேன ‘‘விரதியோபி ஹோந்தி சேதனாயோபீ’’தி வுத்தம், முஸாவாதா³தீ³ஹி விரமணகாலே வா விரதியோ, ஸுபா⁴ஸிதாதி³வாசாபா⁴ஸனாதி³காலே சேதனாயோ ஹோந்தீதி யோஜேதப்³பா³. சேதனானம் அமக்³க³ங்க³த்தா ‘‘மக்³க³க்க²ணே பன விரதியோவா’’தி ஆஹ. ஏகஸ்ஸேவ ஞாணஸ்ஸ து³க்கா²தி³ஞாணதா விய, ஏகாயேவ விரதியா முஸாவாதா³தி³விரதிபா⁴வோ விய ச ஏகாய ஏவ சேதனாய ஸம்மாவாசாதி³கிச்சத்தயஸாத⁴னாஸம்ப⁴வேன ஸம்மாவாசாதி³பா⁴வாஸித்³தி⁴தோ, தம்ஸித்³தி⁴யஞ்ச அங்க³த்தயத்தாஸித்³தி⁴தோ ச ஏவம் வுத்தந்திபி த³ட்ட²ப்³ப³ம். இமினா சேதாஸம் து³வித⁴தம், அபே⁴த³தஞ்ச த³ஸ்ஸேதி. ஸம்மப்பதா⁴னஸதிபட்டா²னவஸேனாதி சதுஸம்மப்பதா⁴னசதுஸதிபட்டா²னபா⁴வவஸேன.

யதி³பி ஸமாதி⁴உபகாரகானம் அபி⁴னிரோபனா நுமஜ்ஜனஸம்பியாயனு பப்³ரூஹனஸந்தானம் விதக்கவிசாரபீதிஸுகோ²பேக்கா²னம் வஸேன சதூஹி ஜா²னேஹி ஸம்மாஸமாதி⁴ விப⁴த்தோ, ததா²பி வாயாமோ விய அனுப்பன்னாகுஸலானுப்பாத³னாதி³சதுவாயாமகிச்சம், ஸதி விய ச அஸுபா⁴ஸுகா²னிச்சானத்தபூ⁴தேஸு காயாதீ³ஸு ஸுபா⁴தி³ஸஞ்ஞாபஹானசதுஸதிகிச்சம் ஏகோவ ஸமாதி⁴ சதுக்கஜ்ஜா²னஸமாதி⁴கிச்சம் ந ஸாதே⁴தி. தஸ்மா புப்³ப³பா⁴கே³பி பட²மஜ்ஜா²னஸமாதி⁴ பட²மஜ்ஜா²னஸமாதி⁴ ஏவ. ததா² மக்³க³க்க²ணேபி புப்³ப³பா⁴கே³பி து³தியஜ்ஜா²னஸமாதி⁴ து³தியஜ்ஜா²னஸமாதி⁴ ஏவ. ததா² மக்³க³க்க²ணேபி புப்³ப³பா⁴கே³பி ததியஜ்ஜா²னஸமாதி⁴ ததியஜ்ஜா²னஸமாதி⁴ ஏவ. ததா² மக்³க³க்க²ணேபி புப்³ப³பா⁴கே³பி சதுத்த²ஜ்ஜா²னஸமாதி⁴ சதுத்த²ஜ்ஜா²னஸமாதி⁴ ஏவ. ததா² மக்³க³க்க²ணேபீதி ஆஹ ‘‘புப்³ப³பா⁴கே³பி மக்³க³க்க²ணேபி ஸம்மாஸமாதி⁴யேவா’’தி.

தஸ்மாதி பஞ்ஞாபஜ்ஜோதத்தா அவிஜ்ஜாந்த⁴காரம் வித⁴மித்வா பஞ்ஞாஸத்த²த்தா கிலேஸசோரே கா⁴தேந்தோதி யதா²ரஹம் யோஜேதப்³ப³ம். யஸ்மா பன அனாதி³மதி ஸம்ஸாரே இமினா யோகி³னா கதா³சிபி அஸமுக்³கா⁴டிதபுப்³போ³ கிலேஸக³ணோ, தஸ்ஸ ஸமுக்³கா⁴டகோ ச அரியமக்³கோ³. அயஞ்சேத்த² ஸம்மாதி³ட்டி² பரிஞ்ஞாபி⁴ஸமயாதி³வஸேன பவத்தியா புப்³ப³ங்க³மா ஹோதி ப³ஹூபகாரா, தஸ்மா. ததே³வ ப³ஹூபகாரதம் காரணபா⁴வேன த³ஸ்ஸேதும் ‘‘யோகி³னோ ப³ஹூபகாரத்தா’’தி வுத்தம்.

தஸ்ஸாதி ஸம்மாதி³ட்டி²யா. ‘‘ப³ஹூபகாரோ’’தி வத்வா தம் ப³ஹூபகாரதம் உபமாய விபா⁴வேந்தோ ‘‘யதா² ஹீ’’திஆதி³மாஹ. அயம் தம்ப³கம்ஸாதி³மயத்தா கூடோ. தம்பரிஹரணதோ மஹாஸாரதாய சே²கோ. ஏவந்தி யதா² ஹேரஞ்ஞிகஸ்ஸ சக்கு²னா தி³ஸ்வா கஹாபணவிபா⁴க³ஜானனே கிரியாஸாத⁴கதமபா⁴வேன கரணந்தரம் ப³ஹுகாரம் யதி³த³ம் ஹத்தோ², ஏவம் யோகி³னோ பஞ்ஞாய ஓலோகேத்வா த⁴ம்மவிபா⁴க³ஜானனே புப்³ப³சாரீபா⁴வேன த⁴ம்மந்தரம் ப³ஹுகாரம் யதி³த³ம் விதக்கோ விதக்கேத்வாவ பஞ்ஞாய தத³வபோ³த⁴தோ. தஸ்மா ஸம்மாஸங்கப்போ ஸம்மாதி³ட்டி²யா ப³ஹுகாரோதி அதி⁴ப்பாயோ. து³தியஉபமாயம் ஏவந்தி யதா² தச்ச²கோ பரேன பரிவத்தேத்வா பரிவத்தேத்வா தி³ன்னம் த³ப்³ப³ஸம்பா⁴ரம் வாஸியா தச்சே²த்வா கே³ஹாதி³கரணகம்மே உபனேதி, ஏவம் யோகீ³ விதக்கேன லக்க²ணாதி³தோ விதக்கேத்வா தி³ன்னத⁴ம்மே யாதா²வதோ பரிச்சி²ந்தி³த்வா பரிஞ்ஞாபி⁴ஸமயாதி³கம்மே உபனேதீதி யோஜனா. வசீபே⁴த³ஸ்ஸ உபகாரகோ விதக்கோ ஸாவஜ்ஜானவஜ்ஜவசீபே⁴தே³ நிவத்தனபவத்தனகராய ஸம்மாவாசாயபி உபகாரகோவாதி ஆஹ ‘‘ஸ்வாய’’ந்திஆதி³. ‘‘யதா²ஹா’’திஆதி³னா த⁴ம்மதி³ன்னாய பி⁴க்கு²னியா விஸாக²ஸ்ஸ நாம க³ஹபதினோ வுத்தம் சூளவேத³ல்லஸுத்தபத³ம் (ம. நி. 1.464) ஸாத⁴கபா⁴வேன த³ஸ்ஸேதி. பி⁴ந்த³தீதி நிச்சா²ரேதி.

வசீபே⁴த³னியாமிகா வாசா காயிககிரியானியாமகஸ்ஸ கம்மந்தஸ்ஸ உபகாரிகாதி தத³த்த²ம் லோகதோ பாகடம் காதும் ‘‘யஸ்மா பனா’’திஆதி³ வுத்தம். உப⁴யம் ஸுசரிதந்தி காயஸுசரிதம், வசீஸுசரிதஞ்ச. ஆஜீவட்ட²மகஸீலம் நாம சதுப்³பி³த⁴வசீஸுசரிததிவித⁴காயஸுசரிதேஹி ஸத்³தி⁴ம் ஸம்மாஆஜீவம் அட்ட²மம் கத்வா வுத்தம் ஆதி³ப்³ரஹ்மசரியகஸீலம். யஞ்ஹி ஸந்தா⁴ய வுத்தம் ‘‘புப்³பே³வ கோ² பனஸ்ஸ காயகம்மம் வசீகம்மம் ஆஜீவோ ஸுபரிஸுத்³தோ⁴ ஹோதீ’’தி. தது³ப⁴யானந்தரந்தி து³ச்சரிதத்³வயப்பஹாயகஸ்ஸ ஸுசரிதத்³வயபாரிபூரிஹேதுபூ⁴தஸ்ஸ ஸம்மாவாசாஸம்மாகம்மந்தத்³வயஸ்ஸ அனந்தரம். ஸுத்தபமத்தேனாதி அப்போஸ்ஸுக்கம் ஸுத்தேன, பமத்தேன ச. இத³ம் வீரியந்தி சதுப்³பி³த⁴ம் ஸம்மப்பதா⁴னவீரியம். காயாதீ³ஸூதி காயவேத³னாசித்தத⁴ம்மேஸு. இந்த்³ரியஸமதாத³யோ ஸமாதி⁴ஸ்ஸ உபகாரகா. தப்³பி³து⁴ரா த⁴ம்மா அனுபகாரகா. க³தியோதி நிப்ப²த்தியோ, கிச்சாதி³ஸபா⁴வே வா. ஸமன்வேஸித்வாதி உபதா⁴ரேத்வா, ஹேதும்ஹி சாயம் த்வாபச்சயோ.

த்³வேபப்³ப³ஜிதவத்து²வண்ணனா

376-7. கஸ்மா ஆரத்³த⁴ந்தி அனுஸந்தி⁴காரணம் புச்சி²த்வா தம் விஸ்ஸஜ்ஜேதும் ‘‘அயம் கிரா’’திஆதி³ வுத்தம் தேன அஜ்ஜா²ஸயானுஸந்தி⁴வஸேனாயம் உபரி தே³ஸனா பவத்தாதி த³ஸ்ஸேதி. தேனாதி ததா²லத்³தி⁴கத்தா. அஸ்ஸாதி லிச்ச²விரஞ்ஞோ. தே³ஸனாயந்தி ஸண்ஹஸுகு²மாய ஸுஞ்ஞதபடிஸஞ்ஞுத்தாய யதா²தே³ஸிததே³ஸனாய. நாதி⁴முச்சதீதி ந ஸத்³த³ஹதி ந பஸீத³தி. தந்தித⁴ம்மம் நாம கதே²ந்தோதி யேஸம் அத்தா²ய த⁴ம்மோ கதீ²யதி, தத்த² தேஸம் அஸதிபி மக்³க³படிவேதே⁴ கேவலம் ஸாஸனே பவேணீபூ⁴தம், பரியத்திபூ⁴தம் வா தந்தித⁴ம்மம் கத்வா கதே²ந்தோ, தேன ததா³ தேஸம் மக்³க³படிவேதா⁴பா⁴வம் த³ஸ்ஸேதி. ஏவரூபஸ்ஸாதி ஸம்மாஸம்பு³த்³த⁴த்தா அவிபரீததே³ஸனதாய ஏவம்பாகடத⁴ம்மகாயஸ்ஸ ஸத்து²னோ. அஸ்ஸாதி பட²மஜ்ஜா²னாதி³ஸமதி⁴க³மேன ஸமாஹிதசித்தஸ்ஸ குலபுத்தஸ்ஸ ஏதம் ‘‘தம் ஜீவ’’ந்திஆதி³னா உச்சே²தா³தி³க³ஹணம் அபி நு யுத்தந்தி புச்ச²தி, லத்³தி⁴யா பன ஜா²னாதி⁴க³மமத்தேன ந தாவ விவேசிதத்தா ‘‘யுத்தமஸ்ஸேத’’ந்தி தேஹி வுத்தே ஜா²னலாபி⁴னோபேதம் க³ஹணம் அயுத்தமேவாதி தம் உச்சே²த³வாத³ம், ஸஸ்ஸதவாத³ம் வா ‘‘அஹம் கோ²…பே… ந வதா³மீ’’திஆதி³னா படிக்கி²பித்வாதி ஸாதி⁴ப்பாயத்தோ². ஏதந்தி பட²மஜ்ஜா²னாதி³கம். ஏவந்தி யதா²வுத்தனயேன. அத² ச பனாதி ஏவம் ஜானனதோ, பஸ்ஸனதோ ச. காமம் விபஸ்ஸகாதி³த³ஸ்ஸனம்பி பாளியம் கதம், அரஹத்தகூடேன பன தே³ஸனா நிட்டா²பிதாதி த³ஸ்ஸேதும் ‘‘உத்தரி கீ²ணாஸவம் த³ஸ்ஸேத்வா’’தி வுத்தம். தே ஹி த்³வே பப்³ப³ஜிதா விபஸ்ஸகதோ பட்டா²ய ‘‘ந கல்லம் தஸ்ஸேதம் வசனாயா’’தி அவோசும். இமஸ்ஸாதி கீ²ணாஸவஸ்ஸ. கிஞ்சாபி ‘‘அத்தமனா அஹேஸு’’ந்தி பாளியம் ந வுத்தம், ‘‘ந கல்ல’’ந்திஆதி³னா பன விஸ்ஸஜ்ஜனாவசனேனேவ தேஸம் அத்தமனதா வேதி³தப்³பா³தி ஆஹ ‘‘தே மமா’’திஆதி³. தத்த² யஸ்மா கீ²ணாஸவோ விக³தஸம்மோஹோ திண்ணவிசிகிச்சோ², தஸ்மா தஸ்ஸ ததா² வத்துமயுத்தந்தி உப்பன்னனிச்ச²யதாய தம் மம வசனம் ஸுத்வா அத்தமனா அஹேஸுந்தி அத்தோ². ஸோபி கோ² லிச்ச²வி ராஜா தே விய ததா²ஸஞ்ஜாதனிச்ச²யத்தா அத்தமனோ அஹோஸி. தேனாஹ ‘‘ஏவம் வுத்தே ஸோபி அத்தமனோ அஹோஸீ’’தி. யம் பனேத்த² அத்த²தோ அவிப⁴த்தம், தம் ஸுவிஞ்ஞேய்யமேவ.

இதி ஸுமங்க³லவிலாஸினியா தீ³க⁴னிகாயட்ட²கதா²ய பரமஸுகு²மக³ம்பீ⁴ரது³ரனுபோ³த⁴த்த²பரிதீ³பனாய ஸுவிமலவிபுலபஞ்ஞாவேய்யத்தியஜனனாய ஸாது⁴விலாஸினியா நாம லீனத்த²பகாஸனியா மஹாலிஸுத்தவண்ணனாய லீனத்த²பகாஸனா.

மஹாலிஸுத்தவண்ணனா நிட்டி²தா.