9. உபனிஸ்ஸயபச்சயனித்³தே³ஸவண்ணனா

9. உபனிஸ்ஸயே தயோதி அனந்தராரம்மணபகதூபனிஸ்ஸயப்பபே⁴தே³ தயோ உபனிஸ்ஸயே. அனேகஸங்கா³ஹகதாயாதி அனேகேஸம் பச்சயத⁴ம்மானம் ஸங்க³ஹணதோ. ஏகந்தேனேவ ஹோந்தி சித்தனியமஹேதுபா⁴வேன பவத்தினியமதோ. யேஸு பதே³ஸூதி யேஸு குஸலாதி³பதே³ஸு. ஸங்க³ஹிதோதி ஸங்க³ஹம் க³தோ, குஸலாதி³பதே³ஸு யேஸம் பதா³னம்யேவ அனந்தரூபனிஸ்ஸயோ லப்³ப⁴தீதி அத்தோ². தேஸு ‘‘கேஸஞ்சீ’’தி ந வுத்தம். கஸ்மா? ந ஸக்கா வத்தும் ஏகந்தேனேவ உபலப்³ப⁴னதோ. தேஸூதி குஸலாகுஸலபதே³ஸு. ந ஹி குஸலோ அகுஸலஸ்ஸ அனந்தரூபனிஸ்ஸயோ ஹோதி, அகுஸலோ வா குஸலஸ்ஸ, ஆரம்மணபகதூபனிஸ்ஸயா பன அனேகந்திகா, தஸ்மா தத்த² ‘‘கேஸஞ்சீ’’தி வுத்தம். ஸித்³தா⁴னம் பச்சயத⁴ம்மானந்தி பச்சயபா⁴வேன புரிமனிப்ப²ன்னானம் குஸலாதீ³னம் குஸலஸ்ஸ அகுஸலஸ்ஸ வாதி அத்தோ². அகுஸலாதீ³ஹீதி யதா²ஸங்க்²யம் அகுஸலேன குஸலேன வா. அவிஸேஸேனாதி யதா²வுத்தவிஸேஸே நியமம் அக்³க³ஹேத்வா அகுஸலாதீ³ஸு அகுஸலகுஸலானம் ‘‘கேஸஞ்சீ’’திஆதி³னா.

அனாரம்மணத்தா ஆரம்மணூபனிஸ்ஸயம் புப்³பா³பரனியமேன அப்பவத்திதோ அனந்தரூபனிஸ்ஸயம் ந லப⁴தீதி யோஜனா. பகதஸ்ஸாதி நிப்பா²தி³தஸ்ஸ, உபஸேவிதஸ்ஸ வா. ந ஹி ரூபஸந்தானஸ்ஸ ஸத்³தா⁴தி³னிப்பா²த³னம் அத்தி², உதுபோ⁴ஜனாதி³உபஸேவனம் வா ஸம்ப⁴வதி. தேனாஹ ‘‘யதா² ஹி…பே… ரூபஸந்தானேனா’’தி. நனு ச ரூபஸந்தானே புப்³பே³னாபரம் விஸேஸோ லப்³ப⁴தி, ஸோ ச ந வினா ஸமானஜாதியேன காரணேனாதி ஸ்வாயம் பகதூபனிஸ்ஸயலாபோ⁴தி கதா³சி ஆஸங்கேய்யாதி ஆஹ ‘‘யஸ்மிஞ்சா’’திஆதி³. தத்த² தந்தி உதுபீ³ஜாதி³கம் கம்மாதி³ ச தேன ரூபேன புரிமனிப்ப²ன்னேன. உப்பாத³னம் ஸாபி⁴ஸந்தி⁴கம் த³ட்ட²ப்³ப³ம். அதி⁴பதீஸு புப்³பா³பி⁴ஸங்கா²ரோ விய பகப்பனம் ஸம்வித³ஹனம். பகரணம் வுத்தலக்க²ணேன காரணபா⁴வேன அவட்டா²னம், யதோ காரணவிஸேஸோ ‘‘பகதீ’’தி வுச்சதி. யதி³ ஏவம் கஸ்மா ரூபஸ்ஸேவ தம் படிக்கி²பீயதீதி ஆஹ ‘‘யதா² ச…பே… த³ட்ட²ப்³பா³’’தி. ஏவம்பி உதுபீ³ஜாதீ³னம் அங்குராதீ³ஸு கத²ம் பச்சயவிஸேஸபா⁴வோதி ஆஹ ‘‘உதுபீ³ஜாத³யோ பன…பே… பா⁴வதோ’’தி. உபனிஸ்ஸயோதி ச யஸ்மா ப³லவதாகாரணம் அதி⁴ப்பேதம், தஸ்மா ந ஏத்த² ஏகந்தேன புரிமனிப்ப²த்தி இச்சி²தப்³பா³. யதி³ ஏவம் பாளியம் கத²ம் புரிமக்³க³ஹணந்தி ஆஹ ‘‘புரிமபுரிமானம்யேவ பனா’’திஆதி³. தேபி வா பரிகப்பனவஸேன புரிமனிப்ப²ன்னாயேவ நாம ஹோந்தி. ந ஹி அஸம்விதி³தாகாரே வத்து²ஸ்மிம் பத்த²னாபவத்தீதி. தேனாஹ ‘‘தம்ஸமானலக்க²ணதாயா’’தி.

த⁴ம்மேதி புக்³க³லஸேனாஸனபஞ்ஞத்தீனம் உபாதா³னபூ⁴தே த⁴ம்மே. அயம் நயோதி பஞ்ஞத்திமுகே²ன பஞ்ஞபேதப்³பா³ தது³பாதா³னபூ⁴தா த⁴ம்மா க³ய்ஹந்தீதி யதா²வுத்தோ நயோ. ஏத்தே²வாதி ‘‘ஸேனாஸனம்பி உபனிஸ்ஸயபச்சயேன பச்சயோ’’தி ஏதஸ்மிம்யேவ வசனே. கத²ம் பச்சுப்பன்னஸ்ஸ பகதூபனிஸ்ஸயபா⁴வோதி சோத³னாய ‘‘வக்க²தீ’’திஆதி³னா ஆக³மம் த³ஸ்ஸேத்வா யுத்திம் த³ஸ்ஸேதும் ‘‘பச்சுப்பன்னானம்பிச தாதி³ஸானம் புப்³பே³ பகதத்தா’’தி வுத்தம். தாதி³ஸானந்தி யாதி³ஸா உதுஆத³யோ பச்சுபட்டி²தா, தாதி³ஸானம் ததோ புப்³பே³ புரேதரம் பகதத்தா பகதூபனிஸ்ஸயயோக்³யதாய ஆபாதி³தத்தா.

கஸிணாதீ³னம்பி ஆரம்மணூபனிஸ்ஸயதா ஸம்ப⁴வதீதி கத்வா வுத்தம் ‘‘இமினா அதி⁴ப்பாயேன ‘ஏகச்சாயா’தி ஆஹா’’தி. ததா² ஹி ‘‘கஸிணமண்ட³லம் தி³ஸ்வா’’திஆதி³னா தஸ்ஸ உபனிஸ்ஸயபா⁴வோ அட்ட²கதா²யம் வுத்தோ.

அரூபாவசரகுஸலம்பி உபனிஸ்ஸயோ ஹோதி, பகே³வ காமாவசரரூபாவசரகுஸலந்தி அதி⁴ப்பாயோ. தம் பன யதா² உபனிஸ்ஸயோ ஹோதி, தம் த³ஸ்ஸேதும் ‘‘யஸ்மிம் கஸிணாதி³ம்ஹீ’’திஆதி³ வுத்தம். அனுப்பன்னஜா²னுப்பாத³னேதி ரூபாவசரஜ்ஜா²னம் ஸந்தா⁴யாஹ, அரூபாவசரஜ்ஜா²னே பன வத்தப்³ப³மேவ நத்தி². தது³ப்பாத³ககுஸலானந்தி தஸ்ஸ ரூபாவசரவிபாகஸ்ஸ உப்பாத³ககுஸலானம், ரூபாவசரகுஸலானந்தி அத்தோ². படிஸந்தி⁴னியாமகஸ்ஸாதி ரூபாவசரபடிஸந்தி⁴னியாமகஸ்ஸ. சுதிதோதி ரூபாவசரபடிஸந்தி⁴யா அனந்தரபச்சயபூ⁴தாய சுதியா. புரிமஜவனஸ்ஸ வஸேனாதி சுதியா ஆஸன்னஜவனபா⁴வேன. ரூபாவசரகுஸலம் அரூபாவசரவிபாகஸ்ஸாதி ஏத்தா²பி ‘‘தது³ப்பாத³ககுஸலான’’ந்திஆதி³னா ஆனேத்வா யோஜேதப்³ப³ம். யதா² ச ‘‘ரூபாவசரகுஸலம் அரூபாவசரவிபாகஸ்ஸ உபனிஸ்ஸயோ’’தி வுத்தம், ஏவம் ‘‘காமாவசரகுஸலம்பி தது³ப்பாத³ககுஸலான’’ந்திஆதி³னா யோஜேதப்³ப³ம். லோகுத்தரவிபாகஸ்ஸ தேபூ⁴மககுஸலானம்பி பாத³காதி³வஸேன உபனிஸ்ஸயபா⁴வோ பாகடோயேவ, ததா² தம்தம்பூ⁴மககுஸலானம் தம்தம்பூ⁴மககிரியானம், காமாவசரகுஸலஸ்ஸ ரூபாரூபாவசரகிரியானம், ரூபாவசரகுஸலஸ்ஸ அரூபாவசரகிரியாய உபனிஸ்ஸயபா⁴வோதி இமமத்த²ம் த³ஸ்ஸேந்தோ ‘‘ஏவம் பச்சேகம்…பே… வேதி³தப்³போ³’’தி ஆஹ. ‘‘ஸத்³த⁴ம் உபனிஸ்ஸாய தா³னம் தே³தீ’’திஆதி³னா பகதூபனிஸ்ஸயோ உத்³தே³ஸவஸேனேவ பாடோ² ஆக³தோ, ந விப⁴ஜனவஸேனாதி ஆஹ ‘‘பாளியம்பி…பே… விஸ்ஸஜ்ஜிதோ’’தி. குஸலத்திகாதீ³ஸு அனுலோமாதி³பே⁴த³பி⁴ன்னத்தா பஞ்ஹாவாரேஸூதி ப³ஹுவசனனித்³தே³ஸோ.

லோகுத்தரனிப்³ப³த்தனம் உபனிஸ்ஸாய பரஸ்ஸ ஸினேஹுப்பாத³னே லோகுத்தரத⁴ம்மா உபனிஸ்ஸயோ விய ஹோந்தீதி அயமேத்த² லேஸோ, பா⁴வினோ பன லோகுத்தரஸ்ஸ அகுஸலானம் உபனிஸ்ஸயதா ஸம்ப⁴வதீதி ஆஹ ‘‘ந இத³ம் ஸாரதோ த³ட்ட²ப்³ப³ந்தி அதி⁴ப்பாயோ’’தி. ரூபாவசராதி³குஸலானந்தி ரூபாரூபாவசரலோகுத்தரகுஸலானம் உப்பாதி³யமானஸ்ஸ ரூபாவசரகுஸலஸ்ஸாதி யோஜனா. ரூபாவசரகிரியஸ்ஸ ச அரூபாவசரவிபாகோ உபனிஸ்ஸயோ கத²ந்தி ஆஹ ‘‘புப்³பே³ நிவுத்தா²தீ³ஸு…பே… அரஹதோ’’தி. தம் தம் விபாகம் பத்தே²ந்தோ தஸ்ஸ தஸ்ஸ விபாகஸ்ஸ ஹேதுபூ⁴தம் குஸலம் நிப்³ப³த்தேதீதி விபாகானம் குஸலூபனிஸ்ஸயதாதி ஆஹ ‘‘சதுபூ⁴மகா…பே… உபனிஸ்ஸயோ’’தி. லோகியகுஸலானம் பன லோகுத்தரவிபாகா உபனிஸ்ஸயோ ந ஹோந்தீதி த³ஸ்ஸேந்தோ ‘‘யதி³பீ’’திஆதி³மாஹ. தேனேவ ஹி ‘‘ததா² தேபூ⁴மகவிபாகோ’’தி தேபூ⁴மகக்³க³ஹணம் கதம். தத்த² தேனாதி அனாகா³மினா. தந்தி அரஹத்தப²லம். தஸ்மாதி அதி³ட்ட²புப்³ப³த்தா. தானி வியாதி ஸோதாபத்திப²லானி விய. தேஸந்தி புது²ஜ்ஜனாதீ³னம். இமஸ்ஸாதி அனாகா³மினோ. இத³ம் வுத்தம் ஹோதி – யதா² புது²ஜ்ஜனாதீ³னம் ஸந்தானே ஜா²னாதீ³னம் ஸோதாபத்திப²லாதீ³னம் ந உபனிஸ்ஸயபச்சயோ அனுபலத்³த⁴புப்³ப³த்தா, ஏவம் அனாகா³மினோ ஜா²னாதீ³னம் அக்³க³ப²லம் உபனிஸ்ஸயபச்சயோ அதி³ட்ட²புப்³ப³த்தா. தேனாஹ ‘‘உபலத்³த⁴புப்³ப³ஸதி³ஸமேவ ஹி அனாக³தம்பி உபனிஸ்ஸயோ’’தி. அட்ட²கதா²யம் பன ஹேட்டி²மப²லானம் குஸலூபனிஸ்ஸயதா வுத்தா ஏவ.

யதா² விபாகா குஸலானம், ஏவம் கிரியாபி தேஸம் உபனிஸ்ஸயோ ஹோதீதி தம் நயம் த³ஸ்ஸேதும் ‘‘கிரியம் அத்த²படிஸம்பி⁴தா³தி³’’ந்திஆதி³ வுத்தம். யோனிஸோமனஸிகாரே வத்தப்³ப³மேவ நத்தீ²தி சதுபூ⁴மககுஸலஸ்ஸபி யோனிஸோமனஸிகாரோ உபனிஸ்ஸயோ ஹோதீதி ஏத்த² வத்தப்³ப³மேவ நத்தி², தத³த்த²ம் யோனிஸோமனஸிகாரம் பவத்தேந்தஸ்ஸாதி அத்தோ². தந்தி யோனிஸோமனஸிகாரம். அகுஸலஸ்ஸ ச சதுபூ⁴மகவிபாகஸ்ஸ உபனிஸ்ஸயோ யோனிஸோமனஸிகாரோதி யோஜனா. ஏவம் கிரியஸ்ஸபீதி யதா² குஸலஸ்ஸ யோனிஸோமனஸிகாரஸ்ஸ வஸேன உபனிஸ்ஸயோ வுத்தோ, ஏவம் கிரியஸ்ஸபி யோனிஸோமனஸிகாரஸ்ஸ வஸேன யோஜேதப்³ப³ந்தி அத்தோ². ஸோ ஹி தம் உபனிஸ்ஸாய ராகா³தி³உப்பாத³னே அகுஸலஸ்ஸ வுத்தனயேன குஸலாகுஸலூபனிஸ்ஸயபா⁴வமுகே²ன சதுபூ⁴மகவிபாகஸ்ஸ உபனிஸ்ஸயோ ஹோதியேவ. யதி³ கிரியஸங்கா²தோ…பே… ஹோதியேவ, அத² கஸ்மா பகதூபனிஸ்ஸயவிப⁴ஜனே கிரியா ந க³ஹிதா, உதுபோ⁴ஜனஸேனாஸனானியேவ க³ஹிதானீதி ஆஹ ‘‘நேவவிபாகனவிபாகத⁴ம்மத⁴ம்மேஸு…பே… நயத³ஸ்ஸனமத்தமேவா’’தி. ஏவமாதி³கந்தி ஆதி³-ஸத்³தே³ன ‘‘குஸலம் த⁴ம்மம் ஸஹஜாதோ அப்³யாகதோ த⁴ம்மோ உப்பஜ்ஜதி ந உபனிஸ்ஸயபச்சயா’’தி ஏவமாதி³கம் ஸங்க³ண்ஹாதி. உபனிஸ்ஸயபரியாயோ உபனிஸஸத்³தோ³தி கத்வா வுத்தம் ‘‘விஞ்ஞாணூபனிஸம் நாமரூபம், நாமரூபூபனிஸஞ்ச ஸளாயதனந்திஆதி³கேனா’’தி. ஏத்த² ஹி விஞ்ஞாணஸ்ஸ நாமரூபானம் ப²ஸ்ஸரூபாதீ³னம் சக்கா²யதனாதீ³னஞ்ச உபனிஸ்ஸயபா⁴வோ வுத்தோதி.

உபனிஸ்ஸயபச்சயனித்³தே³ஸவண்ணனா நிட்டி²தா.