3. பத்தவக்³கோ³

1. பத்தஸிக்கா²பத³வண்ணனா

598-602. பத்தவக்³க³ஸ்ஸ பட²மே ப⁴ண்ட³ந்தி விக்கேதப்³ப³ப⁴ண்ட³ம். யஸ்மா வண்ணஸத்³தோ³ ஸண்டா²னஜாதிரூபாயதனகாரணபமாணகு³ணபஸம்ஸாதீ³ஸு தி³ஸ்ஸதி. ‘‘மஹந்தம் ஸப்பராஜவண்ணம் அபி⁴னிம்மினித்வா’’திஆதீ³ஸு (ஸம். நி. 1.142) ஹி ஸண்டா²னம் வுச்சதி. ‘‘ப்³ராஹ்மணோவ ஸேட்டோ² வண்ணோ, ஹீனோ அஞ்ஞோ வண்ணோ’’திஆதீ³ஸு (ம. நி. 2.402) ஜாதி. ‘‘பரமாய வண்ணபோக்க²ரதாய ஸமன்னாக³தோ’’திஆதீ³ஸு (தீ³. நி. 1.303) ரூபாயதனம்.

‘‘ந ஹராமி ந ப⁴ஞ்ஜாமி, ஆரா ஸிங்கா⁴மி வாரிஜம்;

அத² கேன நு வண்ணேன, க³ந்த⁴த்தே²னோதி வுச்சதீ’’தி. (ஸம். நி. 1.234; ஜா. 1.6.116) –

ஆதீ³ஸு காரணம். ‘‘தயோ பத்தஸ்ஸ வண்ணா’’திஆதீ³ஸு (பாரா. 602) பமாணம். ‘‘கதா³ ஸஞ்ஞுள்ஹா பன தே க³ஹபதி இமே ஸமணஸ்ஸ கோ³தமஸ்ஸ வண்ணா’’திஆதீ³ஸு (ம. நி. 2.77) கு³ணோ. ‘‘வண்ணாரஹஸ்ஸ வண்ணம் பா⁴ஸதீ’’திஆதீ³ஸு (அ. நி. 4.3) பஸம்ஸா. தஸ்மா வுத்தம் ‘‘தயோ பத்தஸ்ஸ வண்ணாதி தீணி பத்தஸ்ஸ பமாணானீ’’தி.

அட்³ட⁴தேரஸபலா ஹோதீதி ஏத்த² ‘‘மாஸானம் அட்³ட⁴தேரஸபலானி க³ண்ஹாதீ’’தி வத³ந்தி. ‘‘மக³த⁴னாளி நாம ச²பஸதா நாளீ’’தி கேசி. ‘‘அட்ட²பஸதா’’தி அபரே. தத்த² புரிமானம் மதேன திபஸதாய நாளியா த்³வே நாளியோ ஏகா மக³த⁴னாளி ஹோதி, பச்சி²மானம் சதுபஸதாய நாளியா த்³வே நாளியோ ஏகா மக³த⁴னாளி. ஆசரியத⁴ம்மபாலத்தே²ரேன பன ‘‘பகதியா சதுமுட்டி²கம் குடு³வம், சதுகுடு³வம் நாளிகம், தாய நாளியா ஸோளஸ நாளியோ தோ³ணம், தம் பன மக³த⁴னாளியா த்³வாத³ஸ நாளியோ ஹோந்தீ’’தி வுத்தம், தஸ்மா தேன நயேன ‘‘மக³த⁴னாளி நாம பஞ்ச குடு³வானி ஏகஞ்ச முட்டி²ம் ஏகாய முட்டி²யா ததியஞ்ச பா⁴க³ம் க³ண்ஹாதீ’’தி வேதி³தப்³ப³ம்.

ஸப்³ப³ஸம்பா⁴ரஸங்க²தோதி ஜீரகாதி³ஸப்³ப³ஸம்பா⁴ரேஹி ஸங்க²தோ. ஆலோபஸ்ஸ ஆலோபஸ்ஸ அனுரூபந்தி ஏத்த² ‘‘ப்³யஞ்ஜனஸ்ஸ மத்தா நாம ஓத³னசதுத்தோ² பா⁴கோ³’’தி ப்³ரஹ்மாயுஸுத்தஸ்ஸ அட்ட²கதா²யம் (ம. நி. அட்ட². 2.387) வுத்தத்தா ஆலோபஸ்ஸ சதுத்த²பா⁴க³ப்பமாணம் ப்³யஞ்ஜனம் ஆலோபஸ்ஸ அனுரூபந்தி க³ஹேதப்³ப³ம். இத⁴ பன ஸூபஸ்ஸேவ ஓத³னசதுத்த²பா⁴க³ப்பமாணதம் த³ஸ்ஸேத்வா ஏதஸ்ஸ லக்க²ணே த³ஸ்ஸிதே இதரஸ்ஸபி த³ஸ்ஸிதமேவ ஹோதீதி ப்³யஞ்ஜனஸ்ஸ ததா² விஸேஸேத்வா பமாணம் ந த³ஸ்ஸிதம்.

மக³த⁴னாளியா உபட்³ட⁴ப்பமாணோ இத⁴ பத்தோ²தி ஆஹ ‘‘பத்தோ²த³னந்தி மக³த⁴னாளியா உபட்³ட⁴னாளிகோத³ன’’ந்தி. இமினா ச ‘‘பத்த²த்³வயம் மக³த⁴னாளீ’’தி த³ஸ்ஸிதம் ஹோதி. பத்தோ² ச ‘‘சதுபலோ குடு³வோ, சதுகுடு³வோ பத்தோ²’’தி இமினா லோகியவோஹாரேன வேதி³தப்³போ³. பா⁴ஜனபரிபோ⁴கே³னாதி உத³காஹரணாதி³னா பா⁴ஜனபரிபோ⁴கே³ன.

607. தோ⁴தேதி பரிபோ⁴கா³வஸானத³ஸ்ஸனத்த²ம் வுத்தம், ந பன தோ⁴தேயேவ து³க்கடம் ஆபஜ்ஜதி ததோ புரேதரம் பரிபோ⁴க³காலேயேவ ஆபஜ்ஜனதோ.

608. பஞ்சஹி த்³வீஹீதி இத³ம் ‘‘ஏத்தாவதா காளவண்ணதா ஸம்பஜ்ஜதீ’’தி த³ஸ்ஸனத்த²ம் வுத்தம். ‘‘யதி³ பன ஏகேனபி பாகேன காளவண்ணோ ஹோதி, அதி⁴ட்டா²னுபகோ³யேவா’’தி வத³ந்தி. ஹத்தா²னாக³தஸ்ஸபி அதி⁴ட்டா²தப்³ப³பா⁴வத³ஸ்ஸனத்த²ம் ‘‘யதி³ஹீ’’திஆதி³ வுத்தம். இமினா ச தூ³ரே டி²தம்பி அதி⁴ட்டா²தும் விகப்பேதுஞ்ச லப⁴தி, ட²பிதட்டா²னஸல்லக்க²ணஞ்ச ந பமாணந்தி வேதி³தப்³ப³ம். ஸுத்வா வாதி பத்தகாரகேன பேஸிதபி⁴க்கு²னா அனாணத்தோ கேவலம் தஸ்ஸ கதே²ந்தஸ்ஸ வசனமத்தம் ஸுத்வா. ந பமாணந்தி தேன அபேஸிதத்தா. ஸாமந்தவிஹாரேதி இத³ம் உபசாரமத்தம், ததோ தூ³ரே டி²தம்பி அதி⁴ட்டா²தும் வட்டதியேவ. ட²பிதட்டா²னம் ஸல்லக்கே²த்வாதி இத³ம்பி உபசாரமத்தம், பத்தஸல்லக்க²ணமேவேத்த² பமாணம். பத்தே வா சி²த்³த³ம் ஹோதீதி முக²வட்டிதோ ஹேட்டா² த்³வங்கு³லமத்தோகாஸதோ பட்டா²ய யத்த² கத்த²சி சி²த்³த³ம் ஹோதி. ஸேஸமேத்த² பட²மகதி²னே வுத்தனயமேவ.

பத்தஸிக்கா²பத³வண்ணனா நிட்டி²தா.

2. ஊனபஞ்சப³ந்த⁴னஸிக்கா²பத³வண்ணனா

610. து³தியஸிக்கா²பதே³ ஹத்தே²ஸு பிண்டா³ய சரதீதி பாளிபத³ஸ்ஸ ஹத்தே²ஸு லபி⁴தப்³ப³பிண்ட³த்தா²ய சரதீதி அத்தோ² வேதி³தப்³போ³.

612-613. ‘‘தஸ்ஸ ஸோ அபத்தோதி வசனதோ ஸோ பத்தோ அதி⁴ட்டா²னம்பி விஜஹதி அபத்தத்தா. அபத்தபா⁴வதோயேவ ஹி ‘பஞ்சப³ந்த⁴னம் பத்தம் சேதாபேதீ’தி பாளியம் ந வுத்த’’ந்தி தீஸுபி க³ண்டி²பதே³ஸு வுத்தம். கேசி பன ‘‘அபத்தோதி இத³ம் ‘அஞ்ஞம் பத்தம் விஞ்ஞாபேதும் வட்டதீ’தி த³ஸ்ஸனத்த²ம் வுத்தம், ஸோ பன பத்தோ அதி⁴ட்டா²னம் ந விஜஹதீ’’தி வத³ந்தி, தம் யுத்தம் விய தி³ஸ்ஸதி ‘‘யஸ்ஸ பஞ்ச ஏகாயேவ வா த³ஸங்கு³லா, ஸோ ப³த்³தோ⁴பி அப³த்³தோ⁴பி அபத்தோயேவா’’தி வக்க²மானத்தா. ந ஹி முக²வட்டியா பஞ்சஸு டா²னேஸு த்³வங்கு³லமத்தாஹி ராஜீஹி அதி⁴ட்டா²னம் விஜஹதீதி ஸக்கா வத்தும், ஏகாய பன ராஜியா த³ஸங்கு³லாய ஸசே தத்த² வுத்தப்பமாணோ சி²த்³தோ³ பஞ்ஞாயதி, சி²த்³தே³னேவ அதி⁴ட்டா²னவிஜஹனம் ஸியாதி யுத்தம் வத்தும். ப³ந்த⁴னோகாஸே ஸதி அஸதி வா ப³ந்த⁴னவிரஹிதோ பத்தோ அப³ந்த⁴னோதி வுத்தோ, ப³ந்த⁴னோகாஸவிரஹிதோயேவ பன அப³ந்த⁴னோகாஸோதி வுத்தோ.

திபுஸுத்தகேன வா ப³ந்தி⁴த்வாதி ஏத்த² ‘‘ப³ந்தி⁴தப்³போ³’’தி பாடோ² க³ஹேதப்³போ³. புராணபோத்த²கேபி ஹி அயமேவ பாடோ² தி³ஸ்ஸதி. ஸுத்³தே⁴ஹி…பே… ந வட்டதீதி இத³ம் உண்ஹபோ⁴ஜனே பக்கி²த்தே விலீயமானத்தா வுத்தம். பா²ணிதம் ஜா²பேத்வா பாஸாணசுண்ணேன ப³ந்தி⁴தும் வட்டதீதி பாஸாணசுண்ணேன ஸத்³தி⁴ம் பா²ணிதம் பசித்வா ததா²பக்கேன பாஸாணசுண்ணேன ப³ந்தி⁴தும் வட்டதி.

615. அனுகம்பாய ந க³ண்ஹந்தஸ்ஸ து³க்கடந்தி வுத்தத்தா யஸ்ஸ ஸோ பத்தோ ந ருச்சதி, தஸ்ஸபி அக³ண்ஹந்தஸ்ஸ அனாபத்தி. தேனேவ மாதிகாட்ட²கதா²யம் (கங்கா². அட்ட². ஊனபஞ்சப³ந்த⁴னஸீக்கா²பத³வண்ணனா) வுத்தம் ‘‘ஸசே தே²ரஸ்ஸ பத்தோ ந ருச்சதி, அப்பிச்ச²தாய வா ந க³ண்ஹாதி, வட்டதீ’’தி. பத்தபரியந்தோதி பரியந்தபத்தோ, அவஸானபத்தோதி அத்தோ². ‘‘ஸங்க⁴மஜ்ஜே² பத்தம் கா³ஹாபேந்தேன அலஜ்ஜிம் அகா³ஹாபேதும் வட்டதீ’’தி வத³ந்தி. ‘‘அனுஜானாமி பி⁴க்க²வே ஆதா⁴ரகந்தி வுத்தத்தா பீடா²தீ³ஸு யத்த² கத்த²சி ஆதா⁴ரம் ட²பேத்வா தத்த² பத்தம் ட²பேதும் வட்டதி ஆதா⁴ரட²பனோகாஸஸ்ஸ அனியமிதத்தா’’தி வத³ந்தி. அபரிபோ⁴கே³னாதி அயுத்தபரிபோ⁴கே³ன.

616. பாளியம் ‘‘அப³ந்த⁴னேன பத்தேன அப³ந்த⁴னம் பத்தம். ஏகப³ந்த⁴னம் பத்தம்… த்³விப³ந்த⁴னம் பத்தம்… திப³ந்த⁴னம்… சதுப³ந்த⁴னம்… அப³ந்த⁴னோகாஸம்… ஏக… த்³வி… தி… சதுப³ந்த⁴னோகாஸம் பத்தம் சேதாபேதீ’’தி ஏவம் ஏகேகேன பத்தேன த³ஸதா⁴ த³ஸவித⁴ம் பத்தம் சேதாபனவஸேன ஏகனிஸ்ஸக்³கி³யபாசித்தியஸதம் வுத்தம். இமஸ்மிம் ஸிக்கா²பதே³ பமாணயுத்தம் அக்³க³ஹிதகாளவண்ணம்பி பத்தம் விஞ்ஞாபேந்தஸ்ஸ ஆபத்தியேவாதி த³ட்ட²ப்³ப³ம். அதி⁴ட்டா²னுபக³பத்தஸ்ஸ ஊனபஞ்சப³ந்த⁴னதா, அத்துத்³தே³ஸிகதா, அகதவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி.

ஊனபஞ்சப³ந்த⁴னஸிக்கா²பத³வண்ணனா நிட்டி²தா.

3. பே⁴ஸஜ்ஜஸிக்கா²பத³வண்ணனா

622. ததியஸிக்கா²பதே³ யேஸம் மம்ஸம் கப்பதீதி இத³ம் நிஸ்ஸக்³கி³யவத்து²த³ஸ்ஸனத்த²ம் வுத்தம், ந பன யேஸம் மம்ஸம் ந கப்பதி, தேஸம் ஸப்பிஆதீ³னி ந கப்பந்தீதி த³ஸ்ஸனத்த²ம். மனுஸ்ஸகீ²ராதீ³னிபி ஹி நோ ந கப்பந்தி, குதோ ஸஸஸ்ஸ ஸப்பீதி ஆஹ ‘‘யேஸஞ்ஹி கீ²ரம் அத்தி², ஸப்பிபி தேஸம் அத்தி²யேவா’’தி. ‘‘இத³ஞ்ச யேபு⁴ய்யேன வுத்த’’ந்தி வத³ந்தி. உக்³க³ஹிதகம் கத்வா நிக்கி²த்தந்தி அப்படிக்³க³ஹிதம் ஸயமேவ க³ஹேத்வா நிக்கி²த்தம். ஸயம்கதம் நிராமிஸமேவ வட்டதீதி தத³ஹுபுரேப⁴த்தமேவ ஸந்தா⁴ய வுத்தம். அத² ஸயம்கதம் நிராமிஸம் பு⁴ஞ்ஜந்தஸ்ஸ கஸ்மா ஸாமம்பாகோ ந ஹோதீதி ஆஹ – ‘‘நவனீதம் தாபேந்தஸ்ஸ ஹி ஸாமம்பாகோ ந ஹோதீ’’தி. ஸவத்து²கபடிக்³க³ஹிதஸ்ஸ வத்து²க³திகத்தா ஆஹ – ‘‘ஸவத்து²கஸ்ஸ படிக்³க³ஹிதத்தா’’தி. பச்சா²ப⁴த்தம் படிக்³க³ஹிதேஹீதி பச்சா²ப⁴த்தம் படிக்³க³ஹிதகீ²ரத³தீ⁴ஹி. புரேப⁴த்தம்பி ச உக்³க³ஹிதகேஹி கதம் அப்³ப⁴ஞ்ஜனாதீ³ஸு உபனேதப்³ப³ந்தி ஸம்ப³ந்தோ⁴. உப⁴யேஸம்பீதி பச்சா²ப⁴த்தம் படிக்³க³ஹிதகீ²ரத³தீ⁴ஹி ச புரேப⁴த்தம் உக்³க³ஹிதகேஹி ச கதானம். ஏஸேவ நயோதி நிஸ்ஸக்³கி³யம் ஹோதீதி அத்தோ². அகப்பியமம்ஸஸப்பிம்ஹீதி அகப்பியமம்ஸஸத்தானம் ஸப்பிம்ஹி. காரணபதிரூபகம் வத்வாதி ஸஜாதியானம் ஸப்பிபா⁴வதோதி காரணபதிரூபகம் வத்வா.

ஸப்பினயேனேவ வேதி³தப்³ப³ந்தி நிராமிஸமேவ ஸத்தாஹம் வட்டதீதி அத்தோ². ஏத்தா²தி நவனீதே. தோ⁴தம் வட்டதீதி அதோ⁴தம் சே, ஸவத்து²கபடிக்³க³ஹிதம் ஹோதி, தஸ்மா தோ⁴தம் படிக்³க³ஹேத்வா ஸத்தாஹம் நிக்கி²பிதும் வட்டதீதி தே²ரானம் அதி⁴ப்பாயோ. தக்கதோ உத்³த⁴டமத்தமேவ கா²தி³ம்ஸூதி ஏத்த² தக்கதோ உத்³த⁴டமத்தம் அதோ⁴தம்பி படிக்³க³ஹேத்வா பரிபு⁴ஞ்ஜந்தா தோ⁴வித்வா பசித்வா வா பரிபு⁴ஞ்ஜிம்ஸூதி ஏவமத்தோ² க³ஹேதப்³போ³. தே²ரஸ்ஸ ஹி த³தி⁴கு³ளிகாதி³ஸஹிதம்பி படிக்³க³ஹிதம் பச்சா² தோ⁴வித்வா பசித்வா வா பரிபு⁴ஞ்ஜந்தஸ்ஸ ஸவத்து²கபடிக்³க³ஹணே தோ³ஸோ நத்தீ²தி அதி⁴ப்பாயோ, தேனேவ தே²ரஸ்ஸ அதி⁴ப்பாயம் த³ஸ்ஸேந்தேன ‘‘தஸ்மா நவனீதம் பரிபு⁴ஞ்ஜந்தேன…பே… அயமேத்த² அதி⁴ப்பாயோ’’தி வுத்தம். கேசி பன ‘‘தக்கதோ உத்³த⁴டமத்தமேவ கா²தி³ம்ஸூ’’தி வசனஸ்ஸ அதி⁴ப்பாயம் அஜானந்தா ‘‘தக்கதோ உத்³த⁴டமத்தம் அதோ⁴தம்பி த³தி⁴கு³ளிகாதி³ஸஹிதம் விகாலேபி பரிபு⁴ஞ்ஜிதும் வட்டதீ’’தி வத³ந்தி, தம் ந க³ஹேதப்³ப³ம். ந ஹி த³தி⁴கு³ளிகாதி³ஆமிஸேன ஸம்ஸட்ட²ரஸம் நவனீதம் பரிபு⁴ஞ்ஜிதும் வட்டதீதி ஸக்கா வத்தும். நவனீதம் பரிபு⁴ஞ்ஜந்தேனாதி அதோ⁴வித்வா படிக்³க³ஹிதனவனீதம் பரிபு⁴ஞ்ஜந்தேன. த³தி⁴ ஏவ த³தி⁴க³தம் யதா² ‘‘கூ³த²க³தம் முத்தக³த’’ந்தி (ம. நி. 2.119). க²யம் க³மிஸ்ஸதீதி வசனதோ கீ²ரம் பக்கி²பித்வா பக்கஸப்பிஆதி³பி விகாலே கப்பதீதி வேதி³தப்³ப³ம். குக்குச்சாயந்தி குக்குச்சகாதி இமினா அத்தனாபி தத்த² குக்குச்சஸப்³பா⁴வம் தீ³பேதி. தேனேவ மாதிகாட்ட²கதா²யம் (கங்கா². அட்ட². பே⁴ஸஜ்ஜஸிக்கா²பத³வண்ணனா) ‘‘நிப்³ப³ட்டிதஸப்பி வா நவனீதம் வா பசிதும் வட்டதீ’’தி வுத்தம். தானி படிக்³க³ஹேத்வாதி தானி கீ²ரத³தீ⁴னி படிக்³க³ஹேத்வா.

படிக்³க³ஹேத்வா ட²பிதபே⁴ஸஜ்ஜேஹீதி படிக்³க³ஹேத்வா ட²பிதயாவஜீவிகபே⁴ஸஜ்ஜேஹி. வுத்தனயேன யதா² தண்டு³லாதீ³னி ந பச்சந்தி, ததா² லஜ்ஜீயேவ ஸம்பாதே³த்வா தே³தீதி லஜ்ஜீஸாமணேரக்³க³ஹணம், அபிச அலஜ்ஜினா அஜ்ஜோ²ஹரிதப்³ப³ம் யம் கிஞ்சி அபி⁴ஸங்க²ராபேதும் ந வட்டதி, தஸ்மாபி ஏவமாஹ. திலே படிக்³க³ஹேத்வா கததேலந்தி அத்தனா ப⁴ஜ்ஜனாதீ³னி அகத்வா க³ஹிததேலம். தேனேவ ‘‘ஸாமிஸம்பி வட்டதீ’’தி வுத்தம். நிப்³ப³ட்டிதத்தாதி யாவகாலிகவத்து²தோ விவேசிதத்தா. உப⁴யம்பீதி அத்தனா ச பரேன ச கதம். யாவ அருணஸ்ஸ உக்³க³மனா திட்ட²தி, நிஸ்ஸக்³கி³யந்தி ஸத்தமதி³வஸே கததேலம் ஸசே யாவ அருணுக்³க³மனா திட்ட²தி, நிஸ்ஸக்³கி³யம்.

623. அச்ச²வஸந்தி து³க்கடவத்து²னோ வஸாய அனுஞ்ஞாதத்தா தம்ஸதி³ஸானம் து³க்கடவத்தூ²னம்யேவ அகப்பியமம்ஸஸத்தானம் வஸா அனுஞ்ஞாதா, ந து²ல்லச்சயவத்தூ²னம் மனுஸ்ஸானம் வஸாதி ஆஹ ‘‘ட²பேத்வா மனுஸ்ஸவஸ’’ந்தி. ஸம்ஸட்ட²ந்தி பரிஸ்ஸாவிதம். ‘‘காலே படிக்³க³ஹிதம் விகாலே அனுபஸம்பன்னேனபி நிப்பக்கம் ஸம்ஸட்ட²ஞ்ச பரிபு⁴ஞ்ஜந்தஸ்ஸ த்³வேபி து³க்கடானி ஹோந்தியேவா’’தி வத³ந்தி. யஸ்மா கீ²ரத³தி⁴ஆதீ³னி பக்கி²பித்வா தேலம் பசந்தி, தஸ்மா கஸடம் ந வட்டதி, தேலமேவ வட்டதி. தேன வுத்தம் ‘‘பக்கதேலகஸடே விய குக்குச்சாயதீ’’தி. ‘‘ஸசே வஸாய ஸத்³தி⁴ம் பக்கத்தா ந வட்டதி, இத³ம் கஸ்மா வட்டதீ’’தி புச்ச²ந்தா ‘‘ப⁴ந்தே’’திஆதி³மாஹம்ஸு. ஏதம் வட்டதீதி நனு ஏதம் த³தி⁴கு³ளிகாதீ³ஹி பக்கம் நவனீதம் வட்டதீதி அத்தோ².

‘‘மது⁴கரீஹி நாம மது⁴மக்கி²காஹீதி அயம் கு²த்³த³கமக்கி²கானம் ப⁴மரமக்கி²கானஞ்ச ஸாமஞ்ஞனித்³தே³ஸோ’’தி தீஸுபி க³ண்டி²பதே³ஸு வுத்தம். கேசி பன ‘‘த³ண்ட³கேஸு மது⁴கரா மது⁴கரீ மக்கி²கா நாமா’’தி வத்வா ‘‘தாஹி மது⁴கரீஆதீ³ஹி தீஹி மக்கி²காஹி கதம் மது⁴ நாமா’’தி வத³ந்தி. ப⁴மரமக்கி²காஹீதி மஹாப⁴மரமக்கி²காஹி. ஸிலேஸஸதி³ஸந்தி க⁴னபக்கம் வுத்தம். இதரந்தி தனுகமது⁴. மது⁴படலந்தி மது⁴ரஹிதம் கேவலம் மது⁴படலம். ‘‘ஸசே மது⁴ஸஹிதம் படலம் படிக்³க³ஹேத்வா நிக்கி²பந்தி, படலஸ்ஸ பா⁴ஜனட்டா²னியத்தா மது⁴னோ வஸேன ஸத்தாஹாதிக்கமே நிஸ்ஸக்³கி³யம் ஹோதீ’’தி வத³ந்தி, ‘‘மது⁴மக்கி²தம் பன மது⁴க³திகமேவா’’தி இமினா தம் ந ஸமேதி.

‘‘பா²ணிதம் நாம உச்சு²ம்ஹா நிப்³ப³த்த’’ந்தி பாளியம் அவிஸேஸேன வுத்தத்தா அட்ட²கதா²யஞ்ச ‘‘உச்சு²ரஸம் உபாதா³ய…பே… அவத்து²கா உச்சு²விகதி ‘பா²ணித’ந்தி வேதி³தப்³பா³’’தி வசனதோ உச்சு²ரஸோபி நிக்கஸடோ ஸத்தாஹகாலிகோதி வேதி³தப்³போ³. கேனசி பன ‘‘மது⁴ம்ஹி சத்தாரோ காலிகா யதா²ஸம்ப⁴வம் யோஜேதப்³பா³, உச்சு²ம்ஹி சா’’தி வத்வா ‘‘ஸமக்கி²கண்ட³ஸேளகம் யாவகாலிகம், அனேளகம் உத³கஸம்பி⁴ன்னம் யாமகாலிகம், அஸம்பி⁴ன்னம் ஸத்தாஹகாலிகம், மது⁴ஸித்த²ம் பரிஸுத்³த⁴ம் யாவஜீவிகம், ததா² உச்சு² வா ரஸோ வா ஸகஸடோ யாவகாலிகோ, நிக்கஸடோ உத³கஸம்பி⁴ன்னோ யாமகாலிகோ, அஸம்பி⁴ன்னோ ஸத்தாஹகாலிகோ, ஸுத்³த⁴கஸடம் யாவஜீவிக’’ந்தி ச வத்வா உத்தரிபி ப³ஹுதா⁴ பபஞ்சிதம். தத்த² ‘‘உத³கஸம்பி⁴ன்னம் மது⁴ வா உச்சு²ரஸோ வா உத³கஸம்பி⁴ன்னோ யாமகாலிகோ’’தி இத³ம் நேவ பாளியம், ந அட்ட²கதா²யம் தி³ஸ்ஸதி. ‘‘யாவகாலிகம் ஸமானம் க³ருதரம்பி முத்³தி³காஜாதிரஸம் அத்தனா ஸம்ஸட்ட²ம் லஹுகம் யாமகாலிகபா⁴வம் உபனேந்தம் உத³கம் லஹுதரம் ஸத்தாஹகாலிகம் அத்தனா ஸம்ஸட்ட²ம் க³ருதரம் யாமகாலிகபா⁴வம் உபனேதீ’’தி ஏத்த² காரணம் ஸோயேவ புச்சி²தப்³போ³, ஸப்³ப³த்த² பாளியம் அட்ட²கதா²யஞ்ச உத³கஸம்பே⁴தே³ன க³ருதரஸ்ஸபி லஹுபா⁴வோபக³மனம்யேவ த³ஸ்ஸிதம். பாளியம்பி ஹி ‘‘அனுஜானாமி, பி⁴க்க²வே, கி³லானஸ்ஸ கு³ளம், அகி³லானஸ்ஸ கு³ளோத³க’’ந்தி (மஹாவ. 284) வத³ந்தேன அகி³லானேன பரிபு⁴ஞ்ஜிதும் அயுத்தோபி கு³ளோ உத³கஸம்பி⁴ன்னோ அகி³லானஸ்ஸபி வட்டதீதி அனுஞ்ஞாதோ.

யம்பி ச ‘‘உச்சு² சே யாவகாலிகோ, உச்சு²ரஸோ சே யாமகாலிகோ, பா²ணிதம் சே ஸத்தாஹகாலிகம், தசோ சே யாவஜீவிகோ’’தி அட்ட²கதா²வசனம் த³ஸ்ஸேத்வா ‘‘உச்சு²ரஸோ உத³கஸம்பி⁴ன்னோ யாமகாலிகோ’’தி அஞ்ஞேன கேனசி வுத்தம், தம்பி ததா²வித⁴ஸ்ஸ அட்ட²கதா²வசனஸ்ஸ இமிஸ்ஸா ஸமந்தபாஸாதி³காய வினயட்ட²கதா²ய அபா⁴வதோ ந ஸாரதோ பச்சேதப்³ப³ம். ததோயேவ ச ‘‘உச்சு²ரஸோ உத³கேன ஸம்பி⁴ன்னோபி அஸம்பி⁴ன்னோபி ஸத்தாஹகாலிகோயேவா’’தி கேசி ஆசரியா வத³ந்தி. பே⁴ஸஜ்ஜக்க²ந்த⁴கே ச ‘‘அனுஜானாமி, பி⁴க்க²வே, உச்சு²ரஸ’’ந்தி (மஹாவ. 300) ஏத்த² தீஸுபி க³ண்டி²பதே³ஸு அவிஸேஸேன வுத்தம் ‘‘உச்சு²ரஸோ ஸத்தாஹகாலிகோ’’தி.

ஸயம்கதம் நிராமிஸமேவ வட்டதீதி ஏத்த² அபரிஸ்ஸாவிதம் படிக்³க³ஹிதம்பி கரணஸமயே பரிஸ்ஸாவேத்வா கஸடம் அபனேத்வாவ அத்தனா கதந்தி க³ஹேதப்³ப³ம். ஜா²மஉச்சு²பா²ணிதந்தி அக்³கி³னா த³ட்³டே⁴ உச்சு²கே²த்தே ஜா²மஉச்சு²னா கதபா²ணிதம். கோட்டிதஉச்சு²பா²ணிதந்தி கு²த்³தா³னுகு²த்³த³கம் சி²ந்தி³த்வா கோட்டேத்வா நிப்பீளேத்வா பக்கம் யேபு⁴ய்யேன ச ஸகஸடம் பா²ணிதம். தாதி³ஸஸ்ஸ ச கஸடஸ்ஸ அப்³போ³ஹாரிகத்தா ‘‘தம் யுத்த’’ந்தி வுத்தம். ஸீதுத³கேன கதந்தி மது⁴கபுப்பா²னி ஸீதோத³கே பக்கி²பித்வா மத்³தி³த்வா புப்ப²ரஸே உத³கக³தே ஸதி தம் உத³கம் க³ஹேத்வா பசித்வா கதபா²ணிதம். கீ²ரம் பக்கி²பித்வா கதம் மது⁴கபா²ணிதம் யாவகாலிகந்தி ஏத்த² கீ²ரம் பக்கி²பித்வா பக்கதேலம் கஸ்மா விகாலே வட்டதீதி சே? தேலே பக்கி²த்தகீ²ரம் தேலமேவ ஹோதி, அஞ்ஞம் பன கீ²ரம் பக்கி²பித்வா கதம் கீ²ரபா⁴வம் க³ண்ஹாதீதி இத³மேத்த² காரணம். யதி³ ஏவம் க²ண்ட³ஸக்க²ரம்பி கீ²ரம் பக்கி²பித்வா கரோந்தி, தம் கஸ்மா வட்டதீதி ஆஹ ‘‘க²ண்ட³ஸக்க²ரம் பனா’’திஆதி³. தத்த² கீ²ரஜல்லிகந்தி கீ²ரபே²ணம்.

பே⁴ஸஜ்ஜோதி³ஸ்ஸம் த³ஸ்ஸேந்தேன ‘‘ஸத்தவித⁴ஞ்ஹி ஓதி³ஸ்ஸம் நாமா’’திஆதி³னா இதரானிபி அத்து²த்³தா⁴ரவஸேன வுத்தானி. விகடானீதி அபகதிபே⁴ஸஜ்ஜத்தா விகடானி, விரூபானீதி அத்தோ². து³க்கடவத்தூ²னம்பி அகப்பியமம்ஸானம் வஸாய அனுஞ்ஞாதத்தா ‘‘வஸோதி³ஸ்ஸ’’ந்தி வுத்தம். ஓளாரிகானம்பி ஆஹாரத்த²ம் ப²ரிதும் ஸமத்தா²னம் ஸப்பிஆதீ³னம் பே⁴ஸஜ்ஜனாமேன அனுஞ்ஞாதத்தா ‘‘பே⁴ஸஜ்ஜோதி³ஸ்ஸ’’ந்தி வுத்தம். ‘‘பச்சா²ப⁴த்ததோ பட்டா²ய ஸதி பச்சயேதி வுத்தத்தா படிக்³க³ஹிதபே⁴ஸஜ்ஜானி து³தியதி³வஸதோ பட்டா²ய புரேப⁴த்தம்பி ஸதி பச்சயே பரிபு⁴ஞ்ஜிதப்³பா³னி, ந ஆஹாரத்த²ம் பே⁴ஸஜ்ஜத்தா²ய படிக்³க³ஹிதத்தா’’தி வத³ந்தி.

624. த்³வாரவாதபானகவாடேஸூதி மஹாத்³வாரஸ்ஸ வாதபானானஞ்ச கவாடப²லகேஸு. கஸாவே பக்கி²த்தானி தானி அத்தனோ ஸபா⁴வம் பரிச்சஜந்தி, தஸ்மா ‘‘மக்கே²தப்³பா³னீ’’தி வுத்தம், கு⁴ணபாணகாதி³பரிஹாரத்த²ம் மக்கே²தப்³பா³னீதி அத்தோ². அதி⁴ட்டே²தீதி ‘‘இதா³னி மய்ஹம் அஜ்ஜோ²ஹரணீயம் ந ப⁴விஸ்ஸதி, பா³ஹிரபரிபோ⁴க³த்தா²ய க³மிஸ்ஸதீ’’தி சித்தம் உப்பாதே³தீதி அத்தோ². தேனேவாஹ – ‘‘ஸப்பிஞ்ச தேலஞ்ச வஸஞ்ச முத்³த⁴னி தேலம் வா அப்³ப⁴ஞ்ஜனம் வா’’திஆதி³. ‘‘ஏவம் அதி⁴ட்டி²தஞ்ச படிக்³க³ஹணம் விஜஹதீ’’தி வத³ந்தி.

625. ஸசே த்³வின்னம் ஸந்தகம் ஏகேன படிக்³க³ஹிதம் அவிப⁴த்தம் ஹோதி, பரிபு⁴ஞ்ஜிதும் பன ந வட்டதீதி ஏத்த² மஜ்ஜே² பாடோ² பரிஹீனோ, ஏவம் பனேத்த² பாடோ² வேதி³தப்³போ³ ‘‘ஸசே த்³வின்னம் ஸந்தகம் ஏகேன படிக்³க³ஹிதம் அவிப⁴த்தம் ஹோதி, ஸத்தாஹாதிக்கமே த்³வின்னம்பி அனாபத்தி, பரிபு⁴ஞ்ஜிதும் பன ந வட்டதீ’’தி. அஞ்ஞதா² பன ஸத்³த³ப்பயோகோ³பி ந ஸங்க³ச்ச²தி. க³ண்டி²பதே³பி ச அயமேவ பாடோ² த³ஸ்ஸிதோ. தத்த² த்³வின்னம்பி அனாபத்தீதி யதா² அஞ்ஞஸ்ஸ ஸந்தகம் ஏகேன படிக்³க³ஹிதம் ஸத்தாஹாதிக்கமேன நிஸ்ஸக்³கி³யம் ந ஹோதி பரஸந்தகபா⁴வதோ, ஏவமித³ம்பி அவிப⁴த்தத்தா உப⁴யஸாதா⁴ரணம்பி அவினிப்³போ⁴க³பா⁴வதோ நிஸ்ஸக்³கி³யம் ந ஹோதீதி அதி⁴ப்பாயோ. பரிபு⁴ஞ்ஜிதும் பன ந வட்டதீதி பி⁴க்கு²னா படிக்³க³ஹிதத்தா ஸத்தாஹாதிக்கமே யஸ்ஸ கஸ்ஸசி பி⁴க்கு²னோ பரிபு⁴ஞ்ஜிதும் ந வட்டதி படிக்³க³ஹிதஸப்பிஆதீ³னம் பரிபோ⁴க³ஸ்ஸ ஸத்தாஹேனேவ பரிச்சி²ன்னத்தா. ‘‘தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னீ’’தி ஹி வுத்தம். க³ண்டி²பதே³ஸு பன தீஸுபி இத⁴ பாட²ஸ்ஸ பரிஹீனபா⁴வம் அஸல்லக்கே²த்வா ‘‘பரிபு⁴ஞ்ஜிதும் பன ந வட்டதீதி இத³ம் அந்தோஸத்தாஹே பரிபோ⁴க³ம் ஸந்தா⁴ய வுத்தந்தி ஸஞ்ஞாய விஸ்ஸாஸக்³கா³ஹாபா⁴வதோ பரிபு⁴ஞ்ஜிதும் ந வட்டதீ’’தி ஏவமத்தோ² வுத்தோ, ஸோ ந க³ஹேதப்³போ³.

ஆவுஸோ, இமம் தேலம் ஸத்தாஹமத்தம் பரிபு⁴ஞ்ஜ த்வந்தி இமினா யேன படிக்³க³ஹிதம், தேன அந்தோஸத்தாஹேயேவ பரஸ்ஸ விஸ்ஸஜ்ஜிதபா⁴வம் த³ஸ்ஸேதி. கஸ்ஸ ஆபத்தீதி பட²மம் தாவ உபி⁴ன்னம் ஸாதா⁴ரணத்தா அனாபத்தி வுத்தா. இதா³னி பன ஏகேன இதரஸ்ஸ விஸ்ஸட்ட²பா⁴வதோ உப⁴யஸாதா⁴ரணதா நத்தீ²தி விப⁴த்தஸதி³ஸம் ஹுத்வா டி²தம், தஸ்மா ஏத்த² படிக்³க³ஹிதஸ்ஸ ஸத்தாஹாதிக்கமே ஏகஸ்ஸ ஆபத்தியா ப⁴விதப்³ப³ந்தி மஞ்ஞமானோ ‘‘கிம் படிக்³க³ஹணபச்சயா படிக்³கா³ஹகஸ்ஸ ஆபத்தி, உதா³ஹு யஸ்ஸ ஸந்தகம் ஜாதம், தஸ்ஸா’’தி புச்ச²தி. நிஸ்ஸட்ட²பா⁴வதோயேவ ச இத⁴ ‘‘அவிப⁴த்தபா⁴வதோ’’தி காரணம் அவத்வா ‘‘யேன படிக்³க³ஹிதம், தேன விஸ்ஸஜ்ஜிதத்தா’’தி வுத்தம். இத³ஞ்ச விஸ்ஸட்ட²பா⁴வதோ உப⁴யஸாதா⁴ரணதம் பஹாய ஏகஸ்ஸ ஸந்தகம் ஹோந்தம்பி யேன படிக்³க³ஹிதம், ததோ அஞ்ஞஸ்ஸ ஸந்தகம் ஜாதம், தஸ்மா பரஸந்தகபடிக்³க³ஹணே விய படிக்³கா³ஹகஸ்ஸ படிக்³க³ஹணபச்சயா நத்தி² ஆபத்தீதி த³ஸ்ஸனத்த²ம் வுத்தம், ந பன ‘‘யேன படிக்³க³ஹிதம், தேன விஸ்ஸஜ்ஜிதத்தா’’தி வசனதோ அவிஸ்ஸஜ்ஜிதே ஸதி அவிப⁴த்தேபி ஸத்தாஹாதிக்கமே ஆபத்தீதி த³ஸ்ஸனத்த²ம் அவிஸ்ஸஜ்ஜிதே அவிப⁴த்தபா⁴வதோயேவ அனாபத்தியா ஸித்³த⁴த்தா. ஸசே பன இதரோ யேன படிக்³க³ஹிதம், தஸ்ஸேவ அந்தோஸத்தாஹே அத்தனோ பா⁴க³ம்பி விஸ்ஸஜ்ஜேதி, ஸத்தாஹாதிக்கமே ஸியா ஆபத்தி யேன படிக்³க³ஹிதம், தஸ்ஸேவ ஸந்தகபா⁴வமாபன்னத்தா இதரஸ்ஸ அப்படிக்³க³ஹிதத்தா. இமினா தஸ்ஸ ஸந்தகபா⁴வேபி அஞ்ஞேன படிக்³க³ஹிதஸகஸந்தகே விய தேன அப்படிக்³க³ஹிதபா⁴வதோ அனாபத்தீதி தீ³பேதி. இத³ம் பன அதி⁴ப்பாயம் அஜானித்வா இதோ அஞ்ஞதா² க³ண்டி²பத³காராதீ³ஹி பபஞ்சிதம், ந தம் ஸாரதோ பச்சேதப்³ப³ம்.

அபரிபோ⁴க³ம் ஹோதீதி கஸ்ஸசி அமனுஞ்ஞஸ்ஸ பதிதத்தா பரிபோ⁴கா³ரஹம் ந ஹோதி. யேன சித்தேனாதி யேன பரிச்சஜிதுகாமதாசித்தேன. ‘‘அந்தோஸத்தாஹே’’தி அதி⁴காரத்தா ‘‘அந்தோஸத்தாஹே அனபேக்கோ² த³த்வா படிலபி⁴த்வா பரிபு⁴ஞ்ஜதீ’’தி இமம் ஸம்ப³ந்த⁴ம் ஸந்தா⁴ய மஹாஸுமத்தே²ரேன ‘‘ஏவம் அந்தோஸத்தாஹே த³த்வா’’திஆதி³ வுத்தம். மஹாபது³மத்தே²ரோ பன யதி³ ஏவம் ‘‘விஸ்ஸஜ்ஜேதீ’’தி இமினாவ தம் ஸித்³த⁴ம், ஸத்தாஹாதிக்கந்தம் பன நிஸ்ஸட்ட²ம் படிலபி⁴த்வா பரிபு⁴ஞ்ஜிதும் ந வட்டதி, தஸ்மா தஸ்ஸ பரிபோ⁴க³முக²த³ஸ்ஸனமித³ந்தி ஆஹ – ‘‘நயித³ம் யாசிதப்³ப³’’ந்திஆதி³. அஞ்ஞேன பி⁴க்கு²னாதி ஏத்த² ஸுத்³த⁴சித்தேன தி³ன்னத்தா ஸயம்பி ஆஹராபேத்வா பரிபு⁴ஞ்ஜிதும் வட்டதியேவ. ஸப்பிஆதீ³னம் படிக்³க³ஹிதபா⁴வோ, அத்தனோ ஸந்தகதா, ஸத்தாஹாதிக்கமோதி இமானேத்த² தீணி அங்கா³னி.

பே⁴ஸஜ்ஜஸிக்கா²பத³வண்ணனா நிட்டி²தா.

4. வஸ்ஸிகஸாடிகஸிக்கா²பத³வண்ணனா

627. சதுத்தே² ஸிப்³ப³னரஜனகப்பபரியோஸானேன நிட்டா²பேத்வாதி ஸூசிகம்மனிட்டா²னேன ஸகிம்பி வண்ணபே⁴த³மத்தரஜனேன கப்பபி³ந்து³கரணேன ச நிட்டா²பேத்வா. ஸமயேதி வஸ்ஸானஸமயே.

628. குச்சி²ஸமயோதி அந்தோஸமயோ. ‘‘அயமேகோ அட்³ட⁴மாஸோ பரியேஸனக்கே²த்தஞ்சேவ கரணக்கே²த்தஞ்ச. ஏதஸ்மிஞ்ஹி அந்தரே வஸ்ஸிகஸாடிகம் அலத்³த⁴ம் பரியேஸிதும் லத்³த⁴ம் காதுஞ்ச வட்டதி, நிவாஸேதும் அதி⁴ட்டா²துஞ்ச ந வட்டதீ’’தி போத்த²கேஸு பாடோ² தி³ஸ்ஸதி, ஸோ அபாடோ². ஏவம் பனேத்த² பாடே²ன ப⁴விதப்³ப³ம் ‘‘அயமேகோ அட்³ட⁴மாஸோ பரியேஸனக்கே²த்தம். ஏதஸ்மிஞ்ஹி அந்தரே வஸ்ஸிகஸாடிகம் அலத்³த⁴ம் பரியேஸிதும் வட்டதி, லத்³த⁴ம் காதும் நிவாஸேதும் அதி⁴ட்டா²துஞ்ச ந வட்டதீ’’தி. ந ஹி கி³ம்ஹானம் பச்சி²மமாஸஸ்ஸ பட²மோ அட்³ட⁴மாஸோ கரணக்கே²த்தம் ஹோதி. ‘‘அட்³ட⁴மாஸோ ஸேஸோ கி³ம்ஹானந்தி கத்வா நிவாஸேதப்³ப³’’ந்தி வசனதோ பன கி³ம்ஹானம் பச்சி²மமாஸஸ்ஸ பச்சி²மோ அட்³ட⁴மாஸோ கரணக்கே²த்தஞ்சேவ நிவாஸனக்கே²த்தஞ்ச ஹோதி. தேனேவ மாதிகாட்ட²கதா²யம் (கங்கா². அட்ட². வஹிஸகஸாடிகஸிக்கா²பத³வண்ணனா) ‘‘கி³ம்ஹானம் பச்சி²மோ மாஸோ பரியேஸனக்கே²த்தம், பச்சி²மோ அட்³ட⁴மாஸோ கரணனிவாஸனக்கே²த்தம்பீ’’தி வுத்தம். தஸ்மா பாளியா மாதிகாட்ட²கதா²ய ச அவிரோத⁴ம் இச்ச²ந்தேன வுத்தனயேனேவ பாடோ² க³ஹேதப்³போ³.

‘‘விஞ்ஞத்திம் கத்வா நிப்பா²தே³ந்தஸ்ஸ அஞ்ஞாதகவிஞ்ஞத்திஸிக்கா²பதே³ன அனாபத்தீ’’தி வத³ந்தேன ‘‘பிட்டி²ஸமயத்தா இமினா ஸிக்கா²பதே³ன ஆபத்தீ’’தி தீ³பிதா ஹோதி. ந ஹி ஞாதகபவாரிதட்டா²னதோ பிட்டி²ஸமயே ஸதுப்பாத³கரணமத்தேனபி ஸம்ப⁴வந்தீ ஆபத்தி ததோ க³ருகதராய விஞ்ஞத்தியா ந ஹோதீதி ஸக்கா வத்தும். தேனேவ ப⁴த³ந்தபு³த்³த⁴த³த்தாசரியேன வுத்தம் –

‘‘கத்வா பன ஸதுப்பாத³ம், வஸ்ஸிகஸாடிசீவரம்;

நிப்பா²தே³ந்தஸ்ஸ பி⁴க்கு²ஸ்ஸ, ஸமயே பிட்டி²ஸம்மதே.

‘‘ஹோதி நிஸ்ஸக்³கி³யாபத்தி, ஞாதகாஞாதகாதி³னோ;

தேஸுயேவ ச விஞ்ஞத்திம், கத்வா நிப்பா²த³னே ததா²’’தி.

கேனஸ்ஸ ஹோதி ஆபத்தீதி அஸ்ஸ மாதரம் சீவரம் யாசந்தஸ்ஸ கேன ஸிக்கா²பதே³ன ஆபத்தீதி புச்ச²தி. ‘‘பரிணதம் விஞ்ஞாபேந்தஸ்ஸ பரிணாமனஸிக்கா²பதே³ன ஆபத்தீ’’தி சோத³னாபா⁴வம் த³ஸ்ஸேதி நோ ச ஸங்கே⁴ பரிணதந்தி. அத² அஞ்ஞாதகவிஞ்ஞத்திஸிக்கா²பதே³னாதி சே, ஏதம்பி நத்தீ²தி ஆஹ ‘‘அனாபத்தி ச ஞாதகே’’தி. ‘‘ஞாதகே விஞ்ஞாபேந்தஸ்ஸா’’தி பாட²ஸேஸோ. இமமத்த²ம் ஸந்தா⁴யாதி பிட்டி²ஸமயே வஸ்ஸிகஸாடிகத்த²ம் ஞாதகபவாரிதட்டா²னே ஸதுப்பாத³கரணேன ஆபத்திம், அஞ்ஞாதகவிஞ்ஞத்திஸிக்கா²பதே³ன அனாபத்திஞ்ச ஸந்தா⁴ய.

அஞ்ஞாதகஅப்பவாரிதட்டா²னதோ…பே… து³க்கடந்தி இத³ம் வஸ்ஸிகஸாடிகம் அதி³ன்னபுப்³பே³ ஸந்தா⁴ய வுத்தம். தேனேவேத்த² வத்தபே⁴தே³ து³க்கடம் வுத்தம், தி³ன்னபுப்³பே³ஸு பன வத்தபே⁴தோ³ நத்தி². தேனேவாஹ – ‘‘யே மனுஸ்ஸா…பே… வத்தபே⁴தோ³ நத்தீ²’’தி. இத³ந்தி யதா²வுத்தனிஸ்ஸக்³கி³யபாசித்தியம். விஞ்ஞத்திம் கத்வா நிப்பா²தே³ந்தஸ்ஸாதி அஞ்ஞாதகஅப்பவாரிதட்டா²னதோ விஞ்ஞத்திம் கத்வா நிப்பா²தே³ந்தஸ்ஸ. பகதியா வஸ்ஸிகஸாடிகதா³யகா நாம ஸங்க⁴வஸேன வா புக்³க³லவஸேன வா அபவாரேத்வா அனுஸம்வச்ச²ரம் வஸ்ஸிகஸாடிகானம் தா³யகா. அஞ்ஞாதகவிஞ்ஞத்திஸிக்கா²பதே³ன அனாபத்தீதி ஏத்த² இமினாபி ஸிக்கா²பதே³ன அனாபத்தீதி வேதி³தப்³ப³ம். குச்சி²ஸமயே ஹி அத்தனோ ஞாதகபவாரிதட்டா²னதோ ‘‘தே³த² மே வஸ்ஸிகஸாடிக’’ந்திஆதி³னா விஞ்ஞாபேந்தஸ்ஸபி அனாபத்தி. தேனேவாஹ – ‘‘ந வத்தப்³பா³ தே³த² மேதி இத³ஞ்ஹி பரியேஸனகாலே அஞ்ஞாதகஅப்பவாரிதே ஏவ ஸந்தா⁴ய வுத்த’’ந்தி. மாதிகாட்ட²கதா²யஞ்ஹி (கங்கா². அட்ட². வஸ்ஸிகஸாடிகஸிக்கா²பத³வண்ணனா) வுத்தம் ‘‘அத்தனோ ஞாதகபவாரிதட்டா²னதோ பன ‘தே³த² மே வஸ்ஸிகஸாடிகசீவர’ந்திஆதி³காய விஞ்ஞத்தியாபி பரியேஸிதப்³ப³’’ந்தி.

629. ‘‘ஆகாஸதோ பதிதஉத³கேனேவாதி வசனதோ ச²த³னகோடியா பதிதஉத³கேன நஹாயந்தஸ்ஸ அனாபத்தீ’’தி தீஸுபி க³ண்டி²பதே³ஸு வுத்தம்.

630. ச² மாஸே பரிஹாரம் லப⁴தீதி ஏதேன அந்தோவஸ்ஸேபி யாவ வஸ்ஸானஸ்ஸ பச்சி²மதி³வஸா அகதா பரிஹாரம் லப⁴தீதி தீ³பிதம் ஹோதி. யஸ்மா மூலசீவரம் கரோந்தேன ஹேமந்தஸ்ஸ பச்சி²முபோஸத²தி³வஸேயேவ காதப்³ப³ம், தஸ்மா கி³ம்ஹானதோ ஏகூனதிம்ஸதி³வஸே பரிஹாரம் லப⁴தி, ஏவம் ஸந்தேபி அப்பகம் ஊனமதி⁴கம் வா க³ணனூபக³ம் ந ஹோதீதி கத்வா ‘‘ததோ பரம்பி…பே… ஏகமாஸ’’ந்தி வுத்தம். ஏகாஹத்³வீஹாதி³வஸேன…பே… லத்³தா⁴ சேவ நிட்டி²தா சாதி இமினா ஏகாஹானாக³தாய வஸ்ஸூபனாயிகாய லத்³தா⁴ சேவ நிட்டி²தா ச, த்³வீஹானாக³தாய…பே… த³ஸாஹானாக³தாய வஸ்ஸூபனாயிகாய லத்³தா⁴ சேவ நிட்டி²தா ச, அந்தோவஸ்ஸே வா லத்³தா⁴ சேவ நிட்டி²தா சாதி அயமத்தோ² த³ஸ்ஸிதோ. தத்த² ஆஸாள்ஹிமாஸஸ்ஸ ஜுண்ஹபக்க²புண்ணமியம் லத்³தா⁴ சேவ நிட்டி²தா ச வஸ்ஸிகஸாடிகா ‘‘ஏகாஹானாக³தாய வஸ்ஸூபனாயிகாய லத்³தா⁴ சேவ நிட்டி²தா சா’’தி வுச்சதி. ஏதேனேவ நயேன ஜுண்ஹபக்க²ஸ்ஸ ச²ட்டி²யம் லத்³தா⁴ சேவ நிட்டி²தா ச ‘‘த³ஸாஹானாக³தாய வஸ்ஸூபனாயிகாய லத்³தா⁴ சேவ நிட்டி²தா சா’’தி வுச்சதி. யாவ பட²மகத்திகதேமாஸபுண்ணமீ, தாவ அந்தோதேமாஸே லத்³தா⁴ சேவ நிட்டி²தா ச ‘‘அந்தோவஸ்ஸே லத்³தா⁴ சேவ நிட்டி²தா சா’’தி வுச்சதி. பட²மகத்திகதேமாஸபுண்ணமிதோ பரஞ்ஹி லத்³தா⁴ சேவ நிட்டி²தா ச யாவ சீவரகாலோ நாதிக்கமதி, தாவ அனதி⁴ட்ட²ஹித்வா ட²பேதும் வட்டதீதி ந தத்ராயம் விசாரணா ஸம்ப⁴வதி.

தஸ்மிம்யேவ அந்தோத³ஸாஹே அதி⁴ட்டா²தப்³பா³தி அவிஸேஸேன வுத்தேபி வஸ்ஸானதோ புப்³பே³ ஏகாஹத்³வீஹாதி³வஸேன அனாக³தாய வஸ்ஸூபனாயிகாய லத்³தா⁴ தேஹி தி³வஸேஹி ஸத்³தி⁴ம் த³ஸாஹம் அனதிக்கமந்தேன வஸ்ஸூபனாயிகதி³வஸதோ பட்டா²ய அதி⁴ட்டா²னக்கே²த்தம் ஸம்பத்தாயேவ அதி⁴ட்டா²தப்³பா³, ந ததோ புப்³பே³ அதி⁴ட்டா²னஸ்ஸ அகே²த்தத்தா. அந்தோவஸ்ஸே பன லத்³தா⁴ தஸ்மிம்யேவ அந்தோவஸ்ஸே லத்³த⁴தி³வஸதோ பட்டா²ய த³ஸாஹம் அனதிக்காமேத்வா அதி⁴ட்டா²தப்³பா³.

நனு ச வஸ்ஸானதோ புப்³பே³ அனதி⁴ட்ட²ஹித்வா த³ஸாஹம் அதிக்காமேதும் வட்டதியேவ, தஸ்மா அதி⁴ட்டா²னஸ்ஸ அகே²த்தபூ⁴தேபி தி³வஸே க³ஹேத்வா ‘‘அந்தோத³ஸாஹே அதி⁴ட்டா²தப்³ப³’’ந்தி கஸ்மா வுத்தம்? யதா² ‘‘அந்தோவஸ்ஸே லத்³தா⁴பி யாவ ந நிட்டா²தி, தாவ அனதி⁴ட்ட²ஹித்வா த³ஸாஹம் அதிக்காமேதும் வட்டதீ’’தி அகதாய அனதி⁴ட்டா²னக்கே²த்தஸதி³ஸாபி அதிக்கந்ததி³வஸா த³ஸாஹம் அதிக்காமேத்வா நிட்டி²தாய க³ணனூபகா³ ஹோந்தீதி நிட்டி²ததி³வஸேயேவ அதி⁴ட்டா²தப்³பா³, ஏவமிதா⁴பி வஸ்ஸானதோ புப்³பே³ அனதி⁴ட்டா²னக்கே²த்தபூ⁴தாபி தி³வஸா லத்³த⁴தி³வஸதோ பட்டா²ய க³ணனூபகா³ ஹோந்தீதி த³ஸ்ஸனத்த²ம் வுத்தம். யதி³ ஏவம் ‘‘தஸ்மிம்யேவ அந்தோத³ஸாஹே’’தி அவிஸேஸேன வுத்தத்தா த³ஸாஹானாக³தாய வஸ்ஸூபனாயிகாய ச²ட்டி²யம் லத்³தா⁴ புண்ணமியம் அதி⁴ட்டா²தப்³பா³தி ஆபஜ்ஜதீதி? நாபஜ்ஜதி ‘‘சாதுமாஸம் அதி⁴ட்டா²து’’ந்தி வசனேனேவ படிக்கி²த்தத்தா. ஏவம் ஸந்தே ‘‘த³ஸாஹானாக³தாயா’’தி இமினா கிம் பயோஜனந்தி சே? வஸ்ஸானதோ புப்³பே³யேவ த³ஸாஹே அதிக்கந்தே வஸ்ஸூபனாயிகதி³வஸே நிட்டி²தா தத³ஹேவ அதி⁴ட்டா²தப்³பா³தி த³ஸ்ஸனத்த²ம் வுத்தந்தி இத³மேத்த² பயோஜனம். தேனேவாஹ – ‘‘த³ஸாஹாதிக்கமே நிட்டி²தா தத³ஹேவ அதி⁴ட்டா²தப்³பா³’’தி.

த³ஸாஹே அப்பஹோந்தே சீவரகாலம் நாதிக்கமேதப்³பா³தி தேமாஸப்³ப⁴ந்தரே த³ஸாஹே அப்பஹோந்தே லத்³தா⁴ சேவ நிட்டி²தா ச சீவரகாலம் நாதிக்கமேதப்³பா³தி அத்தோ². இத³ம் வுத்தம் ஹோதி ‘‘பட²மகத்திகதேமாஸபுண்ணமிதோ புப்³பே³ ஸத்தமிதோ பட்டா²ய லத்³தா⁴ சேவ நிட்டி²தா ச வஸ்ஸிகஸாடிகா த³ஸாஹே அனதிக்கந்தேயேவ சீவரகாலம் ஓதிண்ணத்தா தத்த² அனதி⁴ட்ட²ஹித்வாபி ட²பேதும் வட்டதீ’’தி. இமினா ச இமம் தீ³பேதி – அகதா சே வஸ்ஸிகஸாடிகா, வஸ்ஸானம் சாதுமாஸம் அகதத்தாயேவ பரிஹாரம் லப⁴தி, கதாய பன த³ஸாஹபரமஸிக்கா²பத³ம் அவிகோபேத்வா பரிஹாரோ வத்தப்³போ³தி.

யதா³ வா ததா³ வா அதி⁴ட்டா²தும் வட்டதீதி சாதுமாஸப்³ப⁴ந்தரே த³ஸாஹே அதிக்கந்தேபி நத்தி² தோ³ஸோதி அதி⁴ப்பாயோ. ‘‘கதா³ அதி⁴ட்டா²தப்³பா³…பே… யதி³ நப்பஹோதி, யாவ கத்திகபுண்ணமா பரிஹாரம் லப⁴தீ’’தி இமினாபி குருந்தி³வசனேன அகதாய வஸ்ஸிகஸாடிகாய சாதுமாஸம் பரிஹாரோ, கதாய த³ஸாஹமேவ பரிஹாரோதி அயமத்தோ² தீ³பிதோயேவாதி ஆஹ ‘‘அபிசா’’திஆதி³.

பாளியம் அச்சி²ன்னசீவரஸ்ஸ நட்ட²சீவரஸ்ஸாதிஆதி³னா நிஸ்ஸக்³கி³யேன அனாபத்தி வுத்தா, உதா³ஹு நக்³க³ஸ்ஸ நஹாயதோ து³க்கடேன அனாபத்தி வுத்தாதி? கிமேத்த² புச்சி²தப்³ப³ம். ஸப்³ப³ஸிக்கா²பதே³ஸு ஹி யத்த² யத்த² மூலஸிக்கா²பதே³ன ஆபத்திப்பஸங்கோ³, தத்த² தத்த² அனாபத்தித³ஸ்ஸனத்த²ம் அனாபத்திவாரோ ஆரபீ⁴யதீதி இதா⁴பி நிஸ்ஸக்³கி³யேன அனாபத்தித³ஸ்ஸனத்த²ந்தி யுத்தம் வத்தும். ந ஹி மூலாபத்தியா அனாபத்திம் அத³ஸ்ஸேத்வா அந்தரா வுத்தாய ஏவ ஆபத்தியா அனாபத்தித³ஸ்ஸனத்த²ம் அனாபத்திவாரோ ஆரபீ⁴யதீதி. தேனேவ தீஸுபி க³ண்டி²பதே³ஸு இத³ம் வுத்தம் ‘‘அச்சி²ன்னசீவரஸ்ஸ நட்ட²சீவரஸ்ஸ சாதி ஏத்த² அச்சி²ன்னஸேஸசீவரஸ்ஸ நட்ட²ஸேஸசீவரஸ்ஸ ச அஸமயே நிவாஸேந்தஸ்ஸ பரியேஸந்தஸ்ஸ ச அனாபத்தி. ஆபதா³ஸூதி ஏத்த² அனிவத்த²ம் சோரா ஹரந்தீதி அஸமயே நிவாஸேந்தஸ்ஸ அனாபத்தீ’’தி. மாதிகாட்ட²கதா²யம்பி (கங்கா². அட்ட². வஸ்ஸிகஸாடிகஸிக்கா²பத³வண்ணனா) வுத்தம் ‘‘அச்சி²ன்னசீவரஸ்ஸ வா நட்ட²சீவரஸ்ஸ வா அனிவத்த²ம் சோரா ஹரந்தீதி ஏவம் ஆபதா³ஸு வா நிவாஸயதோ உம்மத்தகாதீ³னஞ்ச அனாபத்தீ’’தி. அட்ட²கதா²யம் பன நக்³க³ஸ்ஸ நஹாயதோ து³க்கடேனேவ அனாபத்திம் ஸந்தா⁴ய ‘‘அச்சி²ன்னசீவரஸ்ஸாதி ஏதம் வஸ்ஸிகஸாடிகமேவ ஸந்தா⁴ய வுத்தம். தேஸஞ்ஹி நக்³கா³னம் காயோவஸ்ஸாபனே அனாபத்தி. ஏத்த² ச மஹக்³க⁴வஸ்ஸிகஸாடிகம் நிவாஸேத்வா நஹாயந்தஸ்ஸ சோருபத்³த³வோ ஆபதா³ நாமா’’தி யம் வுத்தம், தத்த² காரணம் பரியேஸிதப்³ப³ம்.

அத² உப⁴யேனபி அனாபத்தித³ஸ்ஸனத்த²ம் ‘‘அச்சி²ன்னசீவரஸ்ஸா’’திஆதி³ ஆரத்³த⁴ந்தி ஏவமதி⁴ப்பாயோ ஸியா, ஏவம்பி ‘‘அச்சி²ன்னசீவரஸ்ஸாதி ஏதம் வஸ்ஸிகஸாடிகமேவ ஸந்தா⁴ய வுத்த’’ந்திஆதி³னா விஸேஸேத்வா ந வத்தப்³ப³ம். ஏவஞ்ஹி வத்தப்³ப³ம் ஸியா ‘‘அச்சி²ன்னஸேஸசீவரஸ்ஸ நட்ட²ஸேஸசீவரஸ்ஸ வா அஸமயே நிவாஸேந்தஸ்ஸ பரியேஸந்தஸ்ஸ ச நிஸ்ஸக்³கி³யேன அனாபத்தி, அச்சி²ன்னவஸ்ஸிகஸாடிகஸ்ஸ நட்ட²வஸ்ஸிகஸாடிகஸ்ஸ வா நக்³க³ஸ்ஸ நஹாயதோ து³க்கடேன அனாபத்தி, ஆபதா³ஸு அனிவத்த²ம் சோரா ஹரந்தீதி அஸமயே நிவாஸயதோ நிஸ்ஸக்³கி³யேன அனாபத்தி, மஹக்³க⁴வஸ்ஸிகஸாடிகம் நிவாஸேத்வா நஹாயந்தஸ்ஸ சோரா ஹரந்தி, நக்³க³ஸ்ஸ நஹாயதோ து³க்கடேன அனாபத்தீ’’தி. ஸேஸமேத்த² உத்தானமேவ.

அங்கே³ஸு பன வஸ்ஸிகஸாடிகாய அத்துத்³தே³ஸிகதா, அஸமயே பரியேஸனதா, தாய ச படிலாபோ⁴தி இமானி தாவ பரியேஸனாபத்தியா தீணி அங்கா³னி. ஸசீவரதா, ஆபதா³பா⁴வோ, வஸ்ஸிகஸாடிகாய ஸகபா⁴வோ, அஸமயே நிவாஸனந்தி இமானி நிவாஸனாபத்தியா சத்தாரி அங்கா³னி.

வஸ்ஸிகஸாடிகஸிக்கா²பத³வண்ணனா நிட்டி²தா.

5. சீவரஅச்சி²ந்த³னஸிக்கா²பத³வண்ணனா

631. பஞ்சமே யம்பி த்யாஹந்தி ஏத்த² யந்தி காரணவசனம், தஸ்மா ஏவமேத்த² ஸம்ப³ந்தோ⁴ வேதி³தப்³போ³ – மயா ஸத்³தி⁴ம் ஜனபத³சாரிகம் பக்கமிஸ்ஸதீதி யம் காரணம் நிஸ்ஸாய அஹம் தே, ஆவுஸோ, சீவரம் அதா³ஸிம், தம் ந கரோஸீதி குபிதோ அனத்தமனோ அச்சி²ந்தீ³தி. யந்தி வா சீவரம் பராமஸதி, தத்த² ‘‘மயா ஸத்³தி⁴ம் ஜனபத³சாரிகம் பக்கமிஸ்ஸதீதி யம்பி தே அஹம் சீவரம் அதா³ஸிம், தம் சீவரம் க³ண்ஹிஸ்ஸாமீதி குபிதோ அனத்தமனோ அச்சி²ந்தீ³’’தி ஸம்ப³ந்தி⁴தப்³ப³ம்.

633. ஆணத்தோ ப³ஹூனி க³ண்ஹாதி, ஏகம் பாசித்தியந்தி ‘‘சீவரம் க³ண்ஹா’’தி ஆணத்தியா ஏகசீவரவிஸயத்தா ஏகமேவ பாசித்தியம். வாசாய வாசாய து³க்கடந்தி ஏத்த² அச்சி²ன்னேஸு வத்து²க³ணனாய பாசித்தியானி. ஏகவாசாய ஸம்ப³ஹுலா ஆபத்தியோதி இத³ம் அச்சி²ன்னேஸு வத்து²க³ணனாய ஆபஜ்ஜிதப்³ப³ம் பாசித்தியாபத்திம் ஸந்தா⁴ய வுத்தம். ஆணத்தியா ஆபஜ்ஜிதப்³ப³ம் பன து³க்கடம் ஏகமேவ.

634. ஏவந்தி இமினா ‘‘வத்து²க³ணனாய து³க்கடானீ’’தி இத³ம் பராமஸதி. ஏஸேவ நயோதி ஸிதி²லம் கா³ள்ஹஞ்ச பக்கி²த்தாஸு ஆபத்தியா ப³ஹுத்தம் ஏகத்தஞ்ச அதிதி³ஸ்ஸதி.

635. ஆவுஸோ, மயந்திஆதீ³ஸு க³ண்ஹிதுகாமதாய ஏவம் வுத்தேபி தேனேவ தி³ன்னத்தா அனாபத்தி. அம்ஹாகம் ஸந்திகே உபஜ்ஜ²ம் க³ண்ஹிஸ்ஸதீதி இத³ம் ஸாமணேரஸ்ஸபி தா³னம் தீ³பேதி. தஸ்மா கிஞ்சாபி பாளியம் ‘‘பி⁴க்கு²ஸ்ஸ ஸாமம் சீவரம் த³த்வா’’தி வுத்தம், ததா²பி அனுபஸம்பன்னகாலே த³த்வாபி உபஸம்பன்னகாலே அச்சி²ந்த³ந்தஸ்ஸ பாசித்தியமேவாதி வேதி³தப்³ப³ம். அச்சி²ந்த³னஸமயே உபஸம்பன்னபா⁴வோயேவ ஹேத்த² பமாணம். தே³தீதி துட்டோ² வா குபிதோ வா தே³தி. ருந்த⁴தா²தி நிவாரேத². ஏவம் பன தா³தும் ந வட்டதீதி ஏத்த² ஏவம் தி³ன்னம் ந தாவ தஸ்ஸ ஸந்தகந்தி அனதி⁴ட்ட²ஹித்வாவ பரிபு⁴ஞ்ஜிதப்³ப³ந்தி வேதி³தப்³ப³ம். ஆஹராபேதும் பன வட்டதீதி ஏவம் தி³ன்னம் ப⁴திஸதி³ஸத்தா ஆஹராபேதும் வட்டதி. சஜித்வா தி³ன்னந்தி வுத்தனயேன அத³த்வா அனபேக்கே²ன ஹுத்வா தஸ்ஸேவ தி³ன்னம். ப⁴ண்ட³க்³கே⁴ன காரேதப்³போ³தி ஸகஸஞ்ஞாய வினா க³ண்ஹந்தோ ப⁴ண்ட³ம் அக்³கா⁴பேத்வா ஆபத்தியா காரேதப்³போ³. விகப்பனுபக³பச்சி²மசீவரதா, ஸாமம் தி³ன்னதா, ஸகஸஞ்ஞிதா, உபஸம்பன்னதா, கோத⁴வஸேன அச்சி²ந்த³னம் அச்சி²ந்தா³பனம் வாதி இமானேத்த² பஞ்ச அங்கா³னி.

சீவரஅச்சி²ந்த³னஸிக்கா²பத³வண்ணனா நிட்டி²தா.

6. ஸுத்தவிஞ்ஞத்திஸிக்கா²பத³வண்ணனா

636. ச²ட்டே² பாளியம் சீவரகாரஸமயேதி இமினா வஸ்ஸம்வுத்த²பி⁴க்கூ²னம் சீவரகம்மஸமயத்தா சீவரமாஸோ வுத்தோ, அத²ஞ்ஞோபி பன சீவரகம்மகாலோ சீவரகாரஸமயோதி வத்தும் வட்டதி.

638. பஞ்சஹிபி மிஸ்ஸேத்வாதி கோ²மாதீ³ஹி பஞ்சஹி மிஸ்ஸேத்வா. வீதவீதட்டா²னம் யத்த² ஸம்ஹரித்வா ட²பேந்தி, தஸ்ஸ துரீதி அதி⁴வசனம். ஸுத்தம் பவேஸேத்வா யேன ஆகோடேந்தா க⁴னபா⁴வம் ஸம்பாதே³ந்தி, தம் வேமந்தி வுச்சதி. யம் யந்தி யம் யம் பயோக³ம். தந்தூனம் அத்தனோ ஸந்தகத்தா வீதவீதட்டா²னம் படிலத்³த⁴மேவ ஹோதீதி ஆஹ ‘‘தீ³க⁴தோ…பே… வீதே நிஸ்ஸக்³கி³யம் பாசித்திய’’ந்தி. பாளியம்பி ஹி இமினாவ அதி⁴ப்பாயேன ‘‘படிலாபே⁴ன நிஸ்ஸக்³கி³ய’’ந்தி வுத்தம், தஸ்மா யாவ சீவரம் வட்³ட⁴தி, தாவ இமினா பமாணேன ஆபத்தியோ வட்³ட⁴ந்தி.

ஸேஸோ கப்பியோதி ஏத்த² ஹத்த²கம்மயாசனவஸேன. புப்³பே³ வுத்தனயேன நிஸ்ஸக்³கி³யந்தி தீ³க⁴ஸோ வித³த்தி²மத்தே திரியம் ஹத்த²மத்தே ச வீதே நிஸ்ஸக்³கி³யம். தேனேவாதி அகப்பியதந்தவாயேன. ததே²வ து³க்கடந்தி பரிச்சே²தே³ பரிச்சே²தே³ து³க்கடம். கேதா³ரப³த்³தா⁴தீ³ஹீதி ஆதி³-ஸத்³தே³ன அச்சி²மண்ட³லப³த்³தா⁴தி³ க³ஹிதம். தந்தே டி²தம்யேவ அதி⁴ட்டா²தப்³ப³ந்தி ஏத்த² ‘‘பச்சா² வீதட்டா²னம் அதி⁴ட்டி²தக³திகமேவ ஹோதி, புன அதி⁴ட்டா²னகிச்சம் நத்தி². ஸசே பன பரிச்சே²த³ம் த³ஸ்ஸேத்வா அந்தரந்தரா அவீதம் ஹோதி, புன அதி⁴ட்டா²தப்³ப³’’ந்தி வத³ந்தி. ஏஸேவ நயோதி விகப்பனுபக³ப்பமாணமத்தே வீதே தந்தே டி²தம்யேவ அதி⁴ட்டா²தப்³ப³ந்தி அத்தோ². சீவரத்தா²ய விஞ்ஞாபிதஸுத்தம், அத்துத்³தே³ஸிகதா, அகப்பியதந்தவாயேன வாயாபனந்தி இமானேத்த² தீணி அங்கா³னி.

மாதிகாட்ட²கதா²யம் (கங்கா². அட்ட². ஸுத்தவிஞ்ஞத்திஸிக்கா²பத³வண்ணனா) பன வாயாபேய்யாதி ஏத்த² ‘‘சீவரம் மே, ஆவுஸோ, வாயதா²தி அகப்பியவிஞ்ஞத்தியா வாயாபேய்யா’’தி அத்த²ம் வத்வா அங்கே³ஸுபி ‘‘அகப்பியதந்தவாயேன அகப்பியவிஞ்ஞத்தியா வாயாபன’’ந்தி விஸேஸேத்வா வுத்தம், ததா²வித⁴ம் பன விஸேஸவசனம் நேவ பாளியம், ந அட்ட²கதா²யம் உபலப்³ப⁴தி. பாளியம்பி ‘‘ஞாதகானம் பவாரிதான’’ந்தி ஏத்தகமேவ அனாபத்திவாரே வுத்தம், அட்ட²கதா²யஞ்ச ஸுத்ததந்தவாயானமேவ கப்பியாகப்பியபா⁴வேன ப³ஹுதா⁴ நயோ த³ஸ்ஸிதோ, ந கப்பியாகப்பியவிஞ்ஞத்திவஸேனாதி. ‘‘அகப்பியவிஞ்ஞத்தியா வாயாபேய்யா’’தி ச விஸேஸேத்வா வத³ந்தேன அயம் நாம கப்பியவிஞ்ஞத்தீதி விஸும் ந த³ஸ்ஸிதம், தஸ்மா வீமம்ஸித்வா க³ஹேதப்³ப³ம்.

ஸுத்தவிஞ்ஞத்திஸிக்கா²பத³வண்ணனா நிட்டி²தா.

7. மஹாபேஸகாரஸிக்கா²பத³வண்ணனா

642. ஸத்தமே கிஞ்சிமத்தம் அனுபத³ஜ்ஜேய்யாதி இத³ம் தஸ்ஸ கத்தப்³பா³காரமத்தத³ஸ்ஸனம், தா³னம் பனேத்த² அங்க³ம் ந ஹோதி ஸுத்தவட்³ட⁴னவஸேனேவ ஆபஜ்ஜிதப்³ப³த்தா. தேனேவ பத³பா⁴ஜனேபி ‘‘தஸ்ஸ வசனேன ஆயதம் வா வித்த²தம் வா அப்பிதம் வா கரோதி, பயோகே³ து³க்கடம், படிலாபே⁴ன நிஸ்ஸக்³கி³ய’’ந்தி ஸுத்தவட்³ட⁴னாகாரமேவ த³ஸ்ஸேத்வா ஆபத்தி வுத்தா. மாதிகாட்ட²கதா²யம்பி (கங்கா². அட்ட². மஹாபேஸகாரஸிக்கா²பத³வண்ணனா) வுத்தம் ‘‘ந பி⁴க்கு²னோ பிண்ட³பாததா³னமத்தேன தம் நிஸ்ஸக்³கி³யம் ஹோதி. ஸசே பன தே தஸ்ஸ வசனேன சீவரஸாமிகானம் ஹத்த²தோ ஸுத்தம் க³ஹேத்வா ஈஸகம்பி ஆயதம் வா வித்த²தம் வா அப்பிதம் வா கரோந்தி, அத² தேஸம் பயோகே³ பி⁴க்கு²னோ து³க்கடம், படிலாபே⁴ன நிஸ்ஸக்³கி³யம் ஹோதீ’’தி. ஆயதாதீ³ஸு ஸத்தஸு ஆகாரேஸு ஆதி³ம்ஹி தயோ ஆகாரே ஸுத்தவட்³ட⁴னேன வினா ந ஸக்கா காதுந்தி ஆஹ ‘‘ஸுத்தவட்³ட⁴னஆகாரமேவ த³ஸ்ஸேதீ’’தி. ஸுவீதாத³யோ ஹி ஆகாரே வினாபி ஸுத்தவட்³ட⁴னேன ஸக்கா காதும். ஸேஸமேத்த² உத்தானமேவ. அஞ்ஞாதகஅப்பவாரிதானம் தந்தவாயே உபஸங்கமித்வா விகப்பமாபஜ்ஜனதா, சீவரஸ்ஸ அத்துத்³தே³ஸிகதா, தஸ்ஸ வசனேன ஸுத்தவட்³ட⁴னம், சீவரஸ்ஸ படிலாபோ⁴தி இமானேத்த² சத்தாரி அங்கா³னி.

மஹாபேஸகாரஸிக்கா²பத³வண்ணனா நிட்டி²தா.

8. அச்சேகசீவரஸிக்கா²பத³வண்ணனா

646. அட்ட²மே அஸம்மோஹத்த²ந்தி த³ஸாஹானாக³தபதே³ அஸம்மோஹத்த²ம். பட²மபத³ஸ்ஸாதி த³ஸாஹானாக³தபத³ஸ்ஸ. தானி தி³வஸானீதி தேஸு தி³வஸேஸு. உப்பஜ்ஜேய்யாதி ஸங்க⁴தோ வா க³ணதோ வா உஜுகம் அத்தனோயேவ வா உப்பஜ்ஜேய்ய. பஞ்சமிதோதி ஏத்த² வஸ்ஸம் வஸந்தஸ்ஸ ஸங்க⁴ஸ்ஸ பஞ்சமிதோ புப்³பே³ உப்பன்னம் அச்சேகசீவரம் பஞ்சமியம் விப⁴ஜித்வா க³ஹிதம் அச்சேகசீவரபரிஹாரமேவ லப⁴தி. உஜுகம் அத்தனோயேவ உப்பன்னம் சே, பஞ்சமியம் உப்பன்னமேவ அச்சேகசீவரபரிஹாரம் லப⁴தி, ந ததோ புப்³பே³தி த³ட்ட²ப்³ப³ம்.

ஸத்³தா⁴மத்தகந்தி த⁴ம்மஸ்ஸவனாதீ³ஹி தங்க²ணுப்பன்னம் ஸத்³தா⁴மத்தகம். ஆரோசிதம் சீவரந்தி ஆரோசேத்வா தி³ன்னசீவரம். ச²ட்டி²யம் உப்பன்னசீவரஸ்ஸ ஏகாத³ஸமோ அருணோ சீவரகாலே உட்டா²தீதி ஆஹ ‘‘ச²ட்டி²தோ பட்டா²யா’’திஆதி³. ட²பிதசீவரம்பீதி பதா⁴னசீவரத³ஸ்ஸனமுகே²ன ஸப்³ப³ம்பி அதிரேகசீவரம் வுத்தம். அத² ‘‘சீவரமாஸேபி அதிரேகசீவரம் நிக்கி²பிதும் வட்டதீ’’தி இத³ம் குதோ லத்³த⁴ந்தி சே? ‘‘விஸும் அனனுஞ்ஞாதேபி இமஸ்மிம் ஸிக்கா²பதே³ ‘சீவரகாலஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்ச மாஸா’தி வத³ந்தேன ததியகதி²னஸிக்கா²பதே³ ‘அகாலசீவரம் நாம அனத்த²தே கதி²னே ஏகாத³ஸமாஸே உப்பன்னம், அத்த²தே கதி²னே ஸத்தமாஸே உப்பன்ன’ந்தி வத³ந்தேன ச அனுஞ்ஞாதமேவ ஹோதீ’’தி வத³ந்தி. ‘‘அட்ட²கதா²வசனப்பமாணேன க³ஹேதப்³ப³’’ந்தி ச கேசி.

650. இதா³னி பட²மகதி²னாதி³ஸிக்கா²பதே³ஹி தஸ்ஸ தஸ்ஸ சீவரஸ்ஸ லப்³ப⁴மானம் பரிஹாரம் இதே⁴வ உபஸம்ஹரித்வா த³ஸ்ஸேந்தோ ‘‘இதி அதிரேகசீவரஸ்ஸ த³ஸாஹம் பரிஹாரோ’’திஆதி³மாஹ. ‘‘அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்ச மாஸா’’தி அயமேவ பாடோ² க³ஹேதப்³போ³. கேசி பனேத்த² ‘‘காமஞ்சேஸ ‘த³ஸாஹபரமம் அதிரேகசீவரம் தா⁴ரேதப்³ப³’ந்தி இமினாவ ஸித்³தோ⁴, அட்டு²ப்பத்திவஸேன பன அபுப்³ப³ம் விய அத்த²ம் த³ஸ்ஸேத்வா ஸிக்கா²பத³ம் ட²பித’’ந்தி பாட²ம் வத்வா ‘‘த³ஸதி³வஸாதி⁴கோ மாஸோ, த³ஸதி³வஸாதி⁴கா பஞ்ச மாஸாதி பாடே²ன ப⁴விதப்³ப³’’ந்தி வத³ந்தி, தம் ந க³ஹேதப்³ப³ம் தஸ்ஸ பமாத³பாட²த்தா. ந ஹி த³ஸாஹேன அஸம்பத்தாய கத்திகதேமாஸிகபுண்ணமாய சீவரகாலதோ புப்³பே³ த³ஸ தி³வஸா அதி⁴கா ஹோந்தி. ஏவஞ்ஹி ஸதி ‘‘நவாஹானாக³தம் கத்திகதேமாஸிகபுண்ணம’’ந்தி வத்தப்³ப³ம்.

மாதிகாட்ட²கதா²யம்பி (கங்கா². அட்ட². அச்சேகசீவரஸிக்கா²பத³வண்ணனா) ‘‘பவாரணமாஸஸ்ஸ ஜுண்ஹபக்க²பஞ்சமிதோ பட்டா²ய உப்பன்னஸ்ஸ சீவரஸ்ஸ நிதா⁴னகாலோ த³ஸ்ஸிதோ ஹோதீ’’தி வத்வா ‘‘காமஞ்சேஸ ‘த³ஸாஹபரமம் அதிரேகசீவரம் தா⁴ரேதப்³ப³’ந்தி இமினாவ ஸித்³தோ⁴, அட்டு²ப்பத்திவஸேன பன அபுப்³ப³ம் விய அத்த²ம் த³ஸ்ஸேத்வா ஸிக்கா²பத³ம் ட²பித’’ந்தி பாடோ² த³ஸ்ஸிதோ, ஸோபி பமாத³பாடோ²யேவ. ‘‘ஜுண்ஹபக்க²பஞ்சமிதோ பட்டா²யா’’தி ச வுத்தத்தா தத்தே²வ புப்³பா³பரவிரோதோ⁴பி ஸியா, ச²ட்டி²தோ பட்டா²யாதி வத்தப்³ப³ம். ஏவஞ்ஹி ஸதி ‘‘த³ஸாஹபரமஸிக்கா²பதே³னேவ ஸித்³த⁴’’ந்தி ஸக்கா வத்தும். இமமேவ ச பமாத³பாட²ம் க³ஹேத்வா ப⁴த³ந்தபு³த்³த⁴த³த்தாசரியேன ச –

‘‘தஸ்ஸாச்சாயிகவத்த²ஸ்ஸ, கதி²னே து அனத்த²தே;

பரிஹாரேகமாஸோவ, த³ஸாஹபரமோ மதோ.

‘‘அத்த²தே கதி²னே தஸ்ஸ, பஞ்ச மாஸா பகாஸிதா;

பரிஹாரோ முனிந்தே³ன, த³ஸாஹபரமா பனா’’தி. –

வுத்தம்.

அச்சேகசீவரகாலே உப்பன்னத்தா ‘‘அச்சேகசீவரஸதி³ஸே’’தி வுத்தம். ‘‘பஞ்சமியம் உப்பன்னம் அனச்சேகசீவரம் த³ஸாஹம் அதிக்காமயதோ சீவரகாலதோ புப்³பே³யேவ ஆபத்தி ஹோதி, ந சீவரகாலாதிக்கமே, தஸ்மா சீவரகாலாதிக்கமே புன ஆபஜ்ஜிதப்³பா³ய ஆபத்தியா அபா⁴வம் ஸந்தா⁴ய ‘அனச்சேகசீவரே அனச்சேகசீவரஸஞ்ஞீ அனாபத்தீ’தி வுத்த’’ந்தி தீஸுபி க³ண்டி²பதே³ஸு வுத்தம். விகப்பனுபக³பச்சி²மப்பமாணஸ்ஸ அச்சேகசீவரஸ்ஸ அத்தனோ ஸந்தகதா, த³ஸாஹானாக³தாய கத்திகதேமாஸிகபுண்ணமாய உப்பன்னபா⁴வோ, அனதி⁴ட்டி²தஅவிகப்பிததா, சீவரகாலாதிக்கமோதி இமானேத்த² சத்தாரி அங்கா³னி.

அச்சேகசீவரஸிக்கா²பத³வண்ணனா நிட்டி²தா.

9. ஸாஸங்கஸிக்கா²பத³வண்ணனா

652. நவமே அந்தரக⁴ரேதி அந்தரே க⁴ரானி ஏத்த², ஏதஸ்ஸாதி வா அந்தரக⁴ரந்தி லத்³த⁴வோஹாரே கோ³சரகா³மே. தேனாஹ ‘‘அந்தோகா³மே’’தி. பாளியம் விப்பவஸந்தீதி இத³ம் யஸ்மிம் விஹாரே வஸந்தா அந்தரக⁴ரே சீவரம் நிக்கி²பிம்ஸு, ததோ அஞ்ஞத்த² வஸந்தே ஸந்தா⁴ய வுத்தம். தஸ்மிஞ்ஹி விஹாரே அந்தரக⁴ரே சீவரம் நிக்கி²பித்வா வஸிதும் அனுஞ்ஞாதத்தா தத்த² வாஸோ விப்பவாஸோ நாம ந ஹோதி. து³ப்³ப³லசோளா து³ச்சோளா விரூபசோளா வா, து³ச்சோளத்தா ஏவ லூக²சீவரா.

653. ‘‘பட²மம் ஜா²னம் உபஸம்பஜ்ஜ விஹரதீ’’தி இமஸ்ஸ விப⁴ங்கே³ ‘‘உபஸம்பஜ்ஜா’’தி உத்³த⁴ரிதப்³பே³ ‘‘உபஸம்பஜ்ஜ’’ந்தி உத்³த⁴ரித்வா ‘‘யோ பட²மஸ்ஸ ஜா²னஸ்ஸ லாபோ⁴ படிலாபோ⁴’’திஆதி³ வுத்தம், தம் ஸந்தா⁴யாஹ ‘‘உபஸம்பஜ்ஜந்திஆதீ³ஸு வியா’’தி. ஆதி³-ஸத்³தே³ன ‘‘அனாபுச்ச²ம் வா பக்கமேய்யா’’திஆதீ³னம் ஸங்க³ஹோ த³ட்ட²ப்³போ³. உபக³ந்த்வாதி உப-ஸத்³த³ஸ்ஸ அத்த²மாஹ. வஸித்வாதி அக²ண்ட³ம் வஸித்வா. ‘‘யேன யஸ்ஸ ஹி ஸம்ப³ந்தோ⁴, தூ³ரட்ட²ம்பி ச தஸ்ஸ த’’ந்தி வசனதோ ‘‘இமஸ்ஸ…பே… இமினா ஸம்ப³ந்தோ⁴’’தி வுத்தம். தத்த² இமஸ்ஸாதி ‘‘உபவஸ்ஸ’’ந்தி பத³ஸ்ஸ. நிக்கி²பேய்யாதி ட²பேய்ய.

ஏத்தாவதா ச புரிமிகாய உபக³ந்த்வா அக²ண்ட³ம் கத்வா வுத்த²வஸ்ஸேன ஆரஞ்ஞகேஸு ஸேனாஸனேஸு விஹரந்தேன ஸகலம் கத்திகமாஸம் திசீவரேன விப்பவஸிதும் அனுஞ்ஞாதம் ஹோதி. அனத்த²தகதி²னஸ்ஸ ஹி சீவரமாஸே விப்பவாஸோ ந வட்டதி அத்த²தகதி²னானம்யேவ அஸமாதா³னசாரஸ்ஸ அனுஞ்ஞாதத்தா. கேசி பன ‘‘அனத்த²தகதி²னானம் சீவரமாஸேபி அஸமாதா³னசாரோ லப்³ப⁴தீ’’தி வத்வா ப³ஹுதா⁴ பபஞ்சேந்தி, தம் ந க³ஹேதப்³ப³ம். ப்³யஞ்ஜனவிசாரணந்தி ‘‘உபவஸ்ஸ உபவஸ்ஸித்வா’’திஆதி³விசாரணம். தஸ்ஸபீதி ‘‘வுத்த²வஸ்ஸான’’ந்தி விப⁴ங்க³பத³ஸ்ஸ. வுத்த²வஸ்ஸானந்தி ச நித்³தா⁴ரணே ஸாமிவசனம். தேனாஹ – ‘‘ஏவரூபானம் பி⁴க்கூ²னம் அப்³ப⁴ந்தரே’’தி. ஸேனாஸனேஸூதி ஏத்த² ததா²ரூபேஸூதி ஸம்ப³ந்தி⁴தப்³ப³ம்.

பரிக்கே²பாரஹட்டா²னதோதி ஏத்த² ‘‘பரிக்கே²பாரஹட்டா²னம் நாம த்³வே லேட்³டு³பாதா’’தி வத³ந்தி, தம் ந க³ஹேதப்³ப³ம். அபரிக்கி²த்தஸ்ஸ பன கா³மஸ்ஸ பரியந்தே டி²தக⁴ரூபசாரதோ பட்டா²ய ஏகோ லேட்³டு³பாதோ பரிக்கே²பாரஹட்டா²னந்தி இத³மேத்த² ஸன்னிட்டா²னம். தேனேவ விஸுத்³தி⁴மக்³கே³பி (விஸுத்³தி⁴. 1.31) வுத்தம் ‘‘அபரிக்கி²த்தஸ்ஸ பட²மலேட்³டு³பாததோ பட்டா²யா’’தி. ஸப்³ப³பட²மந்தி கா³மாபி⁴முக²தி³ஸாபா⁴க³தோ ஸப்³ப³பட²மம். தம் பரிச்சே²த³ம் கத்வாதி தம் பட²மஸேனாஸனாதி³ம் பரிச்சே²த³ம் கத்வா. இத³ஞ்ச வினயத⁴ரானம் மதேன வுத்தம், மஜ்ஜி²மபா⁴ணகானம் மதேன பன ‘‘ஸேனாஸனாதீ³னம் உபசாரே டி²தஸ்ஸ ஏகலேட்³டு³பாதம் முஞ்சித்வா மினிதப்³ப³’’ந்தி மஜ்ஜி²மபா⁴ணகா வத³ந்தி. தேனேவ மஜ்ஜி²மனிகாயட்ட²கதா²யம் ‘‘விஹாரஸ்ஸபி கா³மஸ்ஸேவ உபசாரம் நீஹரித்வா உபி⁴ன்னம் லேட்³டு³பாதானம் அந்தரா மினிதப்³ப³’’ந்தி வுத்தம். பஞ்சத⁴னுஸதிகந்தி ஆரோபிதேன ஆசரியத⁴னுனா பஞ்சத⁴னுஸதப்பமாணம். ததோ ததோ மக்³க³ம் பித³ஹதீதி தத்த² தத்த² கு²த்³த³கமக்³க³ம் பித³ஹதி. து⁴தங்க³சோரோதி இமினா இமஸ்ஸபி ஸிக்கா²பத³ஸ்ஸ அங்க³ஸம்பத்தியா அபா⁴வம் தீ³பேதி.

‘‘ஸாஸங்கானீ’’தி ஸம்மதானீதி சோரானம் நிவிட்டோ²காஸாதி³த³ஸ்ஸனேன ‘‘ஸாஸங்கானீ’’தி ஸம்மதானி. ஸன்னிஹிதப³லவப⁴யானீதி சோரேஹி மனுஸ்ஸானம் ஹதவிலுத்தாகோடிதபா⁴வத³ஸ்ஸனதோ ஸன்னிஹிதப³லவப⁴யானீதி அத்தோ². ஸசே பச்சி²மிகாயாதிஆதி³னா வுத்தமேவத்த²ம் ப்³யதிரேகமுகே²ன விபா⁴வேதி. யத்ர ஹி பிண்டா³யாதிஆதி³னா வுத்தப்பமாணமேவ விஸேஸேத்வா த³ஸ்ஸேதி. ஸாஸங்கஸப்படிப⁴யமேவாதி ஏத்த² ஸாஸங்கம் வா ஸப்படிப⁴யம் வா ஹோது, வட்டதியேவ.

பாளியம் ‘‘ஸியா ச தஸ்ஸ பி⁴க்கு²னோ கோசிதே³வ பச்சயோ தேன சீவரேன விப்பவாஸாய, சா²ரத்தபரமம் தேன பி⁴க்கு²னா தேன சீவரேன விப்பவஸிதப்³ப³’’ந்தி இமினா அந்தரக⁴ரே சீவரம் நிக்கி²பித்வா தஸ்மிம் விஹாரே வஸந்தஸ்ஸ அஞ்ஞத்த² க³மனகிச்சே ஸதி விஹாரதோ ப³ஹி சா²ரத்தம் விப்பவாஸோ அனுஞ்ஞாதோ. வஸனட்டா²னதோ ஹி அஞ்ஞத்த² சா²ரத்தம் விப்பவாஸோ வுத்தோ, ந தஸ்மிம் விஹாரே வஸந்தஸ்ஸ. தேன ச ‘‘புன கா³மஸீமம் ஓக்கமித்வாதி ஏத்த² ஸசே கோ³சரகா³மதோ புரத்தி²மாய தி³ஸாய ஸேனாஸனம், அயஞ்ச பச்சி²மதி³ஸம் க³தோ ஹோதீ’’திஆதி³ வுத்தம். ததோயேவ ச மாதிகாட்ட²கதா²யம்பி (கங்கா². அட்ட². ஸாஸங்கஸிக்கா²பத³வண்ணனா) ‘‘ததோ சே உத்தரி விப்பவஸேய்யா’’தி ஏத்த² ‘‘சா²ரத்ததோ உத்தரி தஸ்மிம் ஸேனாஸனே ஸத்தமம் அருணம் உட்டா²பேய்யா’’தி அத்தோ² வுத்தோ. ப⁴த³ந்தபு³த்³த⁴த³த்தாசரியேன பன பாகடதரம் கத்வா அயமேவத்தோ² வுத்தோ. வுத்தஞ்ஹி தேன –

‘‘யம் கா³மம் கோ³சரம் கத்வா, பி⁴க்கு² ஆரஞ்ஞகே வஸே;

தஸ்மிம் கா³மே ட²பேதும் தம், மாஸமேகந்து வட்டதி.

‘‘அஞ்ஞத்தே²வ வஸந்தஸ்ஸ, சா²ரத்தபரமம் மதம்;

அயமஸ்ஸ அதி⁴ப்பாயோ, படிச்ச²ன்னோ பகாஸிதோ’’தி.

‘‘கோஸம்பி³யம் அஞ்ஞதரோ பி⁴க்கு² கி³லானோ ஹோதீ’’தி ஆக³தத்தா ‘‘கோஸம்ப³கஸம்முதி அனுஞ்ஞாதா’’தி வுத்தம். கோஸம்ப³கஸ்ஸ பி⁴க்கு²னோ ஸம்முதி கோஸம்ப³கஸம்முதி. ஸேனாஸனம் ஆக³ந்த்வாதி வுஸிதவிஹாரஸ்ஸேவ ஸந்தா⁴ய வுத்தத்தா தஸ்மிம் கா³மூபசாரேபி அஞ்ஞஸ்மிம் விஹாரே அருணம் உட்டா²பேதும் ந வட்டதி. வஸித்வாதி அருணம் உட்டா²பேத்வா. க³தட்டா²னஸ்ஸ அதிதூ³ரத்தா ‘‘ஏவம் அஸக்கோந்தேனா’’தி வுத்தம். தத்தே²வாதி தஸ்மிம்யேவ க³தட்டா²னே.

ஸாஸங்கஸிக்கா²பத³வண்ணனா நிட்டி²தா.

10. பரிணதஸிக்கா²பத³வண்ணனா

657-659. த³ஸமே உத்³தி³ஸ்ஸ ட²பிதபா⁴கே³தி அத்தனோ க⁴ரேபி உத்³தி³ஸித்வா விஸும் ட²பிதகோட்டா²ஸே. ‘‘ஏகம் மய்ஹம், ஏகம் இமஸ்ஸ தே³ஹீ’’தி ஏவம் ஏகவாசாய ஆபஜ்ஜிதப்³ப³த்தா ‘‘ஆபஜ்ஜேய்ய ஏகதோ’’தி வுத்தம். தும்ஹாகம் ஸப்பிஆதீ³னி ஆப⁴தானீதி தும்ஹாகம் அத்தா²ய ஆப⁴தானி ஸப்பிஆதீ³னி. பரிணதபா⁴வம் ஜானித்வாபி வுத்தவிதி⁴னா விஞ்ஞாபேந்தேன தேஸம் ஸந்தகமேவ விஞ்ஞாபிதம் நாம ஹோதீதி ஆஹ – ‘‘மய்ஹம்பி தே³தா²தி வத³தி, வட்டதீ’’தி.

660. புப்ப²ம்பி ஆரோபேதும் ந வட்டதீதி இத³ம் பரிணதம் ஸந்தா⁴ய வுத்தம். ஸசே பன ஏகஸ்மிம் சேதியே பூஜிதம் புப்ப²ம் க³ஹேத்வா அஞ்ஞஸ்மிம் சேதியே பூஜேதி, வட்டதி. டி²தம் தி³ஸ்வாதி ஸேஸகம் க³ஹேத்வா டி²தம் தி³ஸ்வா. இமஸ்ஸ ஸுனக²ஸ்ஸ மா தே³ஹி, ஏதஸ்ஸ தே³ஹீதி இத³ம் பரிணதேயேவ. திரச்சா²னக³தஸ்ஸ பரிச்சஜித்வா தி³ன்னே பன தம் பலாபேத்வா அஞ்ஞம் பு⁴ஞ்ஜாபேதும் வட்டதி. ‘‘கத்த² தே³மாதிஆதி³னா ஏகேனாகாரேன பாளியம் அனாபத்தி த³ஸ்ஸிதா, ஏவம் பன அபுச்சி²தேபி அபரிணதம் இத³ந்தி ஜானந்தேன அத்தனோ ருசியா யத்த² இச்ச²தி, தத்த² தா³பேதும் வட்டதீ’’தி தீஸுபி க³ண்டி²பதே³ஸு வுத்தம். யத்த² இச்ச²த², தத்த² தே³தா²தி ஏத்தா²பி ‘‘தும்ஹாகம் ருசியா’’தி வுத்தத்தா யத்த² இச்ச²தி, தத்த² தா³பேதும் லப⁴தி. பாளியம் ஆக³தனயேனேவாதி ‘‘யத்த² தும்ஹாகம் தே³ய்யத⁴ம்மோ’’திஆதி³னா நயேன. ஸங்க⁴பரிணதபா⁴வோ, தம் ஞத்வா அத்தனோ பரிணாமனம், படிலாபோ⁴தி இமானேத்த² தீணி அங்கா³னி.

பரிணதஸிக்கா²பத³வண்ணனா நிட்டி²தா.

நிட்டி²தோ பத்தவக்³கோ³ ததியோ.

இதி ஸமந்தபாஸாதி³காய வினயட்ட²கதா²ய ஸாரத்த²தீ³பனியம்

நிஸ்ஸக்³கி³யவண்ணனா நிட்டி²தா.

து³தியோ பா⁴கோ³ நிட்டி²தோ.