8. ரூபியஸிக்கா²பத³வண்ணனா

583-584. ரூபியஸிக்கா²பதே³ பன ஸத்து²வண்ணோதி ஸத்து²னா ஸமானவண்ணோ. ஸத்து²னோ வண்ணோ ஸத்து²வண்ணோ, ஸத்து²வண்ணோ விய வண்ணோ அஸ்ஸாதி ஸத்து²வண்ணோதி மஜ்ஜ²பத³லோபீஸமாஸோ த³ட்ட²ப்³போ³. பாகதிகோ நாம ஏதரஹி பகதிகஹாபணோ. ருக்க²ப²லபீ³ஜமயோதி திந்திணிகாதி³ருக்கா²னம் ப²லபீ³ஜேன கதோ. இச்சேதம் ஸப்³ப³ம்பீதி யதா²வுத்தபே⁴த³ம் ஸப்³ப³ம்பி சதுப்³பி³த⁴ம் நிஸ்ஸக்³கி³யவத்து² ஹோதீதி ஸம்ப³ந்தோ⁴. ஜாதரூபமாஸகோதி ஸுவண்ணகஹாபணோ.

க³ண்ஹேய்யாதி அத்தனோ அத்தா²ய தீ³யமானம் வா கத்த²சி டி²தம் வா நிப்பரிக்³க³ஹம் தி³ஸ்வா ஸயம் க³ண்ஹேய்ய. ‘‘இத³ம் அய்யஸ்ஸ ஹோதூ’’தி ஏவம் ஸம்முகா² வா ‘‘அஸுகஸ்மிம் நாம டா²னே மம ஹிரஞ்ஞஸுவண்ணம் அத்தி², தம் துய்ஹம் ஹோதூ’’தி ஏவம் பரம்முகா² டி²தம் வா கேவலம் வாசாய வா ஹத்த²முத்³தா³ய வா ‘‘துய்ஹ’’ந்தி வத்வா பரிச்சத்தஸ்ஸ காயவாசாஹி அப்படிக்கி²பித்வா சித்தேன ஸாதி³யனம் உபனிக்கி²த்தஸாதி³யனம் நாம. ‘‘ஸாதி³யதீ’’தி வுத்தமேவத்த²ம் விபா⁴வேதி ‘‘க³ண்ஹிதுகாமோ ஹோதீ’’தி. ‘‘இத³ம் கு³த்தட்டா²ன’’ந்தி ஆசிக்கி²தப்³ப³ந்தி பச்சயபரிபோ⁴க³ம்யேவ ஸந்தா⁴ய ஆசிக்கி²தப்³ப³ம். ‘‘இத⁴ நிக்கி²பாஹீ’’தி வுத்தே ‘‘உக்³க³ண்ஹாபேய்ய வா’’தி வுத்தலக்க²ணேன நிஸ்ஸக்³கி³யம் ஹோதீதி ஆஹ – ‘‘இத⁴ நிக்கி²பாஹீதி ந வத்தப்³ப³’’ந்தி. பரதோ ‘‘இமம் க³ண்ஹா’’தி ந வத்தப்³ப³ந்தி ஏத்தா²பி ஏஸேவ நயோ. கப்பியஞ்ச அகப்பியஞ்ச நிஸ்ஸாய டி²தமேவ ஹோதீதி யஸ்மா ததோ உப்பன்னபச்சயபரிபோ⁴கோ³ கப்பதி, தஸ்மா கப்பியம் நிஸ்ஸாய டி²தம். யஸ்மா பன து³ப்³பி³சாரணாய ததோ உப்பன்னபச்சயபரிபோ⁴கோ³பி ந கப்பதி, தஸ்மா அகப்பியம் நிஸ்ஸாய டி²தந்தி வேதி³தப்³ப³ம்.

ந தேன கிஞ்சி கப்பியப⁴ண்ட³ம் சேதாபிதந்தி ஏத்த² சேதாபிதம் சே, நத்தி² பரிபோ⁴கு³பாயோ, தஸ்மா ஏவம் வுத்தம். அகப்பியஞ்ஹி நிஸ்ஸக்³கி³யம் வத்து²ம் உக்³க³ண்ஹித்வா தம் அனிஸ்ஸஜ்ஜித்வாவ சேதாபிதம் கப்பியப⁴ண்ட³ம் ஸங்க⁴ஸ்ஸ நிஸ்ஸட்ட²ம்பி ஸப்³பே³ஸம் ந கப்பதி. கேசி பன ‘‘யஸ்மா நிஸ்ஸக்³கி³யம் வத்து²ம் படிக்³க³ஹேத்வா சேதாபிதம் கப்பியப⁴ண்ட³ம் ஸங்க⁴ஸ்ஸ நிஸ்ஸஜ்ஜாமீதி நிஸ்ஸட்ட²ம் வினாவ உபாயம் பரிபு⁴ஞ்ஜிதும் வட்டதி, தஸ்மா ‘ந தேன கிஞ்சி கப்பியப⁴ண்ட³ம் சேதாபித’ந்தி வுத்த’’ந்தி வத³ந்தி. ‘‘ஆராமிகானம் வா பத்தபா⁴க³ந்தி இத³ம் கி³ஹீனம் ஹத்த²க³தோபி ஸோயேவ பா⁴கோ³தி கத்வா வுத்தம். ஸசே பன தேன அஞ்ஞம் பரிவத்தேத்வா ஆராமிகா தே³ந்தி, பரிபு⁴ஞ்ஜிதும் வட்டதீ’’தி மஜ்ஜி²மக³ண்டி²பதே³ சூளக³ண்டி²பதே³ ச வுத்தம். ததோ ஹரித்வாதி அஞ்ஞேஸம் பத்தபா⁴க³தோ ஹரித்வா. கஸிணபரிகம்மந்தி ஆலோககஸிணபரிகம்மம். மஞ்சபீடா²தீ³னி வாதி ஏத்த² ‘‘ததோ க³ஹிதமஞ்சபீடா²தீ³னி பரிவத்தேத்வா அஞ்ஞம் சே க³ஹிதம், வட்டதீ’’தி வத³ந்தி. சா²யாபீதி போ⁴ஜனஸாலாதீ³னம் சா²யாபி. பரிச்சே²தா³திக்கந்தாதி கே³ஹபரிச்சே²த³ம் அதிக்கந்தா, சா²யாய க³தக³தட்டா²னம் கே³ஹம் நாம ந ஹோதீதி அதி⁴ப்பாயோ. மக்³கே³னபீதி ஏத்த² ‘‘ஸசே அஞ்ஞோ மக்³கோ³ நத்தி², மக்³க³ம் அதி⁴ட்ட²ஹித்வா க³ந்தும் வட்டதீ’’தி வத³ந்தி. கீதாயாதி தேன வத்து²னா கீதாய. உபனிக்கே²பம் ட²பேத்வா ஸங்கோ⁴ பச்சயே பரிபு⁴ஞ்ஜதீதி ஸசே உபாஸகோ ‘‘அதிப³ஹு ஏதம் ஹிரஞ்ஞம், இத³ம், ப⁴ந்தே, அஜ்ஜேவ ந வினாஸேதப்³ப³’’ந்தி வத்வா ஸயம் உபனிக்கே²பம் ட²பேதி, அஞ்ஞேன வா ட²பாபேதி, ஏதம் உபனிக்கே²பம் ட²பேத்வா ததோ உத³யம் பரிபு⁴ஞ்ஜந்தோ ஸங்கோ⁴ பச்சயே பரிபு⁴ஞ்ஜதி, தேன வத்து²னா க³ஹிதத்தா ‘‘அகப்பிய’’ந்தி வுத்தம்.

585. பதிதோகாஸம் அஸமன்னாஹரந்தேன பாதேதப்³ப³ந்தி இத³ம் நிரபேக்க²பா⁴வத³ஸ்ஸனபரந்தி வேதி³தப்³ப³ம், தஸ்மா பதிதட்டா²னே ஞாதேபிஸ்ஸ கூ³த²ம் ச²ட்³டே³ந்தஸ்ஸ விய நிரபேக்க²பா⁴வோயேவேத்த² பமாணந்தி வேதி³தப்³ப³ம். அஸந்தஸம்பா⁴வனாயாதி அத்தனி அவிஜ்ஜமானஉத்தரிமனுஸ்ஸத⁴ம்மாரோசனம் ஸந்தா⁴ய வுத்தம். தே²ய்யபரிபோ⁴கோ³ நாம அனரஹஸ்ஸ பரிபோ⁴கோ³. ப⁴க³வதா ஹி அத்தனோ ஸாஸனே ஸீலவதோ பச்சயா அனுஞ்ஞாதா, ந து³ஸ்ஸீலஸ்ஸ. தா³யகானம்பி ஸீலவதோ ஏவ பரிச்சாகோ³, ந து³ஸ்ஸீலஸ்ஸ அத்தனோ காரானம் மஹப்ப²லபா⁴வஸ்ஸ பச்சாஸீஸனதோ. இதி ஸத்தா²ரா அனனுஞ்ஞாதத்தா தா³யகேஹி ச அபரிச்சத்தத்தா து³ஸ்ஸீலஸ்ஸ பரிபோ⁴கோ³ தே²ய்யபரிபோ⁴கோ³. இணவஸேன பரிபோ⁴கோ³ இணபரிபோ⁴கோ³, படிக்³கா³ஹகதோ த³க்கி²ணாவிஸுத்³தி⁴யா அபா⁴வதோ இணம் க³ஹேத்வா பரிபோ⁴கோ³ வியாதி அத்தோ². தஸ்மாதி ‘‘ஸீலவதோ’’திஆதி³னா வுத்தமேவத்த²ம் காரணபா⁴வேன பச்சாமஸதி. சீவரம் பரிபோ⁴கே³ பரிபோ⁴கே³தி காயதோ மோசேத்வா மோசேத்வா பரிபோ⁴கே³. புரேப⁴த்த…பே… பச்சி²மயாமேஸு பச்சவேக்கி²தப்³ப³ந்தி ஸம்ப³ந்தோ⁴. ததா² அஸக்கோந்தேன யதா²வுத்தகாலவிஸேஸவஸேன ஏகஸ்மிம் தி³வஸே சதுக்க²த்தும் திக்க²த்தும் த்³விக்க²த்தும் ஸகிம்யேவ வா பச்சவேக்கி²தப்³ப³ம்.

ஸசஸ்ஸ அபச்சவேக்க²தோவ அருணோ உக்³க³ச்ச²தி, இணபரிபோ⁴க³ட்டா²னே திட்ட²தீதி ஏத்த² ‘‘ஹிய்யோ யம் மயா சீவரம் பரிபு⁴த்தம், தம் யாவதே³வ ஸீதஸ்ஸ படிகா⁴தாய…பே… ஹிரிகோபீனப்படிச்சா²த³னத்த²ம், ஹிய்யோ யோ மயா பிண்ட³பாதோ பரிபு⁴த்தோ, ஸோ நேவ த³வாயாதிஆதி³னா ஸசே அதீதபரிபோ⁴க³பச்சவேக்க²ணம் ந கரேய்ய, இணபரிபோ⁴க³ட்டா²னே திட்ட²தீ’’தி வத³ந்தி, வீமம்ஸிதப்³ப³ம். ஸேனாஸனம்பி பரிபோ⁴கே³ பரிபோ⁴கே³தி பவேஸே பவேஸே. ஏவம் பன அஸக்கோந்தேன புரேப⁴த்தாதீ³ஸு பச்சவேக்கி²தப்³ப³ம். தம் ஹேட்டா² வுத்தனயேனேவ ஸக்கா விஞ்ஞாதுந்தி இத⁴ விஸும் ந வுத்தம். ஸதிபச்சயதாதி ஸதியா பச்சயபா⁴வோ, படிக்³க³ஹணஸ்ஸ பரிபோ⁴க³ஸ்ஸ ச பச்சவேக்க²ணஸதியா பச்சயபா⁴வோ யுஜ்ஜதி, பச்சவேக்கி²த்வாவ படிக்³க³ஹேதப்³ப³ம் பரிபு⁴ஞ்ஜிதப்³ப³ஞ்சாதி அத்தோ². தேனேவாஹ ‘‘ஸதிம் கத்வா’’திஆதி³. ஏவம் ஸந்தேபீதி யதி³பி த்³வீஸுபி டா²னேஸு பச்சவேக்க²ணா யுத்தா, ஏவம் ஸந்தேபி. அபரே பனாஹு ‘‘ஸதிபச்சயதாதி ஸதிபே⁴ஸஜ்ஜபரிபோ⁴க³ஸ்ஸ பச்சயபா⁴வே பச்சயேதி அத்தோ². ஏவம் ஸந்தேபீதி பச்சயே ஸதிபீ’’தி, தம் தேஸம் மதிமத்தம். ததா² ஹி பச்சயஸன்னிஸ்ஸிதஸீலம் பச்சவேக்க²ணாய விஸுஜ்ஜ²தி, ந பச்சயஸப்³பா⁴வமத்தேன.

நனு ச ‘‘பரிபோ⁴கே³ கரோந்தஸ்ஸ அனாபத்தீ’’தி இமினா பாதிமோக்க²ஸம்வரஸீலம் வுத்தம், தஸ்மா பச்சயஸன்னிஸ்ஸிதஸீலஸ்ஸ பாதிமோக்க²ஸம்வரஸீலஸ்ஸ ச கோ விஸேஸோதி? வுச்சதே – புரிமேஸு தாவ தீஸு பச்சயேஸு விஸேஸோ பாகடோயேவ, கி³லானபச்சயே பன யதா² வதிம் கத்வா ருக்க²மூலே கோ³பிதே தஸ்ஸ ப²லானிபி ரக்கி²தானியேவ ஹோந்தி, ஏவமேவ பச்சவேக்க²ணாய பச்சயஸன்னிஸ்ஸிதஸீலே ரக்கி²தே தப்படிப³த்³த⁴ம் பாதிமோக்க²ஸம்வரஸீலம்பி நிப்ப²ன்னம் நாம ஹோதி. கி³லானபச்சயம் அபச்சவேக்கி²த்வா பரிபு⁴ஞ்ஜந்தஸ்ஸ ஸீலம் பி⁴ஜ்ஜமானம் பாதிமோக்க²ஸம்வரஸீலமேவ பி⁴ஜ்ஜதி, பச்சயஸன்னிஸ்ஸிதஸீலம் பன பச்சா²ப⁴த்தபுரிமயாமாதீ³ஸு யாவ அருணுக்³க³மனா அபச்சவேக்க²ந்தஸ்ஸேவ பி⁴ஜ்ஜதி. புரேப⁴த்தஞ்ஹி அபச்சவேக்கி²த்வாபி கி³லானபச்சயம் பரிபு⁴ஞ்ஜந்தஸ்ஸ அனாபத்தி, இத³மேதேஸம் நானாகரணம்.

ஏவம் பச்சயஸன்னிஸ்ஸிதஸீலஸ்ஸ விஸுத்³தி⁴ம் த³ஸ்ஸேத்வா தேனேவ பஸங்கே³ன ஸப்³பா³பி ஸுத்³தி⁴யோ த³ஸ்ஸேதும் ‘‘சதுப்³பி³தா⁴ ஹி ஸுத்³தீ⁴’’திஆதி³மாஹ. தத்த² ஸுஜ்ஜ²தி ஏதாயாதி ஸுத்³தி⁴, யதா²த⁴ம்மம் தே³ஸனாவ ஸுத்³தி⁴ தே³ஸனாஸுத்³தி⁴. வுட்டா²னஸ்ஸபி சேத்த² தே³ஸனாய ஏவ ஸங்க³ஹோ த³ட்ட²ப்³போ³. சி²ன்னமூலாபத்தீனம் பன அபி⁴க்கு²தாபடிஞ்ஞாவ தே³ஸனா. அதி⁴ட்டா²னவிஸிட்டோ² ஸம்வரோவ ஸுத்³தி⁴ ஸம்வரஸுத்³தி⁴. த⁴ம்மேன ஸமேன பச்சயானம் பரியேட்டி² ஏவ ஸுத்³தி⁴ பரியேட்டி²ஸுத்³தி⁴. சதூஸு பச்சயேஸு வுத்தவிதி⁴னா பச்சவேக்க²ணாவ ஸுத்³தி⁴ பச்சவேக்க²ணஸுத்³தி⁴. ஏஸ தாவ ஸுத்³தீ⁴ஸு ஸமாஸனயோ. ஸுத்³தி⁴மந்தேஸு ஸீலேஸு தே³ஸனா ஸுத்³தி⁴ ஏதஸ்ஸாதி தே³ஸனாஸுத்³தி⁴. ஸேஸேஸுபி ஏஸேவ நயோ. ந புன ஏவம் கரிஸ்ஸாமீதி ஏத்த² ஏவந்தி ஸம்வரபே⁴த³ம் ஸந்தா⁴யாஹ. பஹாயாதி வஜ்ஜேத்வா, அகத்வாதி அத்தோ². தா³தப்³ப³ட்டே²ன தா³யம், தம் ஆதி³யந்தீதி தா³யாதா³, அனனுஞ்ஞாதேஸு ஸப்³பே³ன ஸப்³ப³ம் பரிபோ⁴கா³பா⁴வதோ அனுஞ்ஞாதேஸுயேவ ச பரிபோ⁴க³ஸப்³பா⁴வபா⁴வதோ பி⁴க்கூ²ஹி பரிபு⁴ஞ்ஜிதப்³ப³பச்சயா ப⁴க³வதோ ஸந்தகா. த⁴ம்மதா³யாத³ஸுத்தஞ்சேத்த² ஸாத⁴கந்தி –

‘‘த⁴ம்மதா³யாதா³ மே, பி⁴க்க²வே, ப⁴வத², மா ஆமிஸதா³யாதா³. அத்தி² மே தும்ஹேஸு அனுகம்பா, ‘கிந்தி மே ஸாவகா த⁴ம்மதா³யாதா³ ப⁴வேய்யும், நோ ஆமிஸதா³யாதா³’’’தி (ம. நி. 1.29) –

ஏவம் பவத்தம் த⁴ம்மதா³யாத³ஸுத்தஞ்ச ஏத்த² ஏதஸ்மிம் அத்தே² ஸாத⁴கம்.

அவீதராகா³னம் தண்ஹாபரவஸதாய பச்சயபரிபோ⁴கே³ ஸாமிபா⁴வோ நத்தி², தத³பா⁴வேன வீதராகா³னம் தத்த² ஸாமிபா⁴வோ யதா²ருசி பரிபோ⁴க³ஸப்³பா⁴வதோ. ததா² ஹி தே படிகூலம்பி அப்படிகூலாகாரேன அப்படிகூலம்பி படிகூலாகாரேன தது³ப⁴யம்பி வஜ்ஜேத்வா அஜ்ஜு²பேக்க²னாகாரேன பச்சயே பரிபு⁴ஞ்ஜந்தி, தா³யகானஞ்ச மனோரத²ம் பரிபூரேந்தி. தேனாஹ – ‘‘தே ஹி தண்ஹாய தா³ஸப்³யம் அதீதத்தா ஸாமினோ ஹுத்வா பரிபு⁴ஞ்ஜந்தீ’’தி. யோ பனாயம் ஸீலவதோ பச்சவேக்கி²தபரிபோ⁴கோ³, ஸோ இணபரிபோ⁴க³ஸ்ஸ பச்சனீகத்தா ஆணண்யபரிபோ⁴கோ³ நாம ஹோதி. யதா² ஹி இணாயிகோ அத்தனோ ருசியா இச்சி²ததே³ஸம் க³ந்தும் ந லப⁴தி, ஏவம் இணபரிபோ⁴க³யுத்தோ லோகதோ நிஸ்ஸரிதும் ந லப⁴தீதி தப்படிபக்க²த்தா ஸீலவதோ பச்சவேக்கி²தபரிபோ⁴கோ³ ஆணண்யபரிபோ⁴கோ³தி வுச்சதி, தஸ்மா நிப்பரியாயதோ சதுபரிபோ⁴க³வினிமுத்தோ விஸும்யேவாயம் பரிபோ⁴கோ³தி வேதி³தப்³போ³. ஸோ இத⁴ விஸும் ந வுத்தோ, தா³யஜ்ஜபரிபோ⁴கே³யேவ வா ஸங்க³ஹம் க³ச்ச²தீதி. ஸீலவாபி ஹி இமாய ஸிக்கா²ய ஸமன்னாக³தத்தா ஸேக்கோ²த்வேவ வுச்சதி. ஸப்³பே³ஸந்தி அரியானம் புது²ஜ்ஜனானஞ்ச.

கத²ம் புது²ஜ்ஜனானம் இமே பரிபோ⁴கா³ ஸம்ப⁴வந்தீதி? உபசாரவஸேன. யோ ஹி புது²ஜ்ஜனஸ்ஸபி ஸல்லேக²ப்படிபத்தியம் டி²தஸ்ஸ பச்சயகே³த⁴ம் பஹாய தத்த² அனுபலித்தேன சித்தேன பரிபோ⁴கோ³, ஸோ ஸாமிபரிபோ⁴கோ³ விய ஹோதி. ஸீலவதோ பன பச்சவேக்கி²தபரிபோ⁴கோ³ தா³யஜ்ஜபரிபோ⁴கோ³ விய ஹோதி தா³யகானம் மனோரத²ஸ்ஸ அவிராத⁴னதோ. தேனேவ வுத்தம் ‘‘தா³யஜ்ஜபரிபோ⁴கே³யேவ வா ஸங்க³ஹம் க³ச்ச²தீ’’தி. கல்யாணபுது²ஜ்ஜனஸ்ஸ பரிபோ⁴கே³ வத்தப்³ப³மேவ நத்தி² தஸ்ஸ ஸேக்க²ஸங்க³ஹதோ. ஸேக்க²ஸுத்தஞ்ஹேதஸ்ஸ அத்த²ஸ்ஸ ஸாத⁴கம்.

லஜ்ஜினா ஸத்³தி⁴ம் பரிபோ⁴கோ³ நாம லஜ்ஜிஸ்ஸ ஸந்தகம் க³ஹேத்வா பரிபோ⁴கோ³. அலஜ்ஜினா ஸத்³தி⁴ந்தி ஏத்தா²பி ஏஸேவ நயோ. ஆதி³தோ பட்டா²ய ஹி அலஜ்ஜீ நாம நத்தீ²தி இமினா தி³ட்ட²தி³ட்டே²ஸுயேவ ஆஸங்கா ந காதப்³பா³தி த³ஸ்ஸேதி. அத்தனோ பா⁴ரபூ⁴தா ஸத்³தி⁴விஹாரிகாத³யோ. ஸோபி நிவாரேதப்³போ³தி யோ பஸ்ஸதி, தேன நிவாரேதப்³போ³. யஸ்மா அலஜ்ஜீபரிபோ⁴கோ³ நாம லஜ்ஜினோ வுச்சதி, தஸ்மா ஆபத்தி நாம நத்தி² உபி⁴ன்னம்பி அலஜ்ஜீபா⁴வதோ, ‘‘அலஜ்ஜீபரிபோ⁴கோ³’’தி இத³ம் நாமமத்தமேவ ந லப்³ப⁴தீதி வுத்தம் ஹோதி. ‘‘ஆபத்தி பன அத்தி²யேவாதி வத³ந்தீ’’தி தீஸுபி க³ண்டி²பதே³ஸு வுத்தம்.

அத⁴ம்மியோதி அனேஸனாதீ³ஹி உப்பன்னோ. த⁴ம்மியோதி பி⁴க்கா²சரியாதீ³ஹி உப்பன்னோ. ஸங்க⁴ஸ்ஸேவ தே³தீதி ப⁴த்தம் அக்³க³ஹேத்வா அத்தனா லத்³த⁴ஸலாகம்யேவ தே³தி. ஸசே பன லஜ்ஜீ அலஜ்ஜிம் பக்³க³ண்ஹாதி…பே… அந்தரதா⁴பேதீதி ஏத்த² கேவலம் பக்³க³ண்ஹிதுகாமதாய ஏவம் காதும் ந வட்டதி, த⁴ம்மஸ்ஸ பன ஸாஸனஸ்ஸ ஸோதூனஞ்ச அனுக்³க³ஹத்தா²ய வட்டதீதி வேதி³தப்³ப³ம். புரிமனயேன ‘‘ஸோ ஆபத்தியா காரேதப்³போ³’’தி வுத்தத்தா இமஸ்ஸ ஆபத்தியேவாதி வத³ந்தி. உத்³தே³ஸக்³க³ஹணாதி³னா த⁴ம்மஸ்ஸ பரிபோ⁴கோ³ த⁴ம்மபரிபோ⁴கோ³. த⁴ம்மானுக்³க³ஹேன க³ண்ஹந்தஸ்ஸ ஆபத்தியா அபா⁴வேபி தே²ரோ தஸ்ஸ அலஜ்ஜிபா⁴வம்யேவ ஸந்தா⁴ய ‘‘பாபோ கிராய’’ந்திஆதி³மாஹ. தஸ்ஸ பன ஸந்திகேதி மஹாரக்கி²தத்தே²ரஸ்ஸ ஸந்திகே.

586. ராஜோரோதா⁴த³யோதிஆதி³ ‘‘இத³ம் க³ண்ஹிஸ்ஸாமீ’’தி சேதனாமத்தஸம்ப⁴வதோ வுத்தம். அஸ்ஸதியா தி³ன்னந்தி ஏத்த² அஸ்ஸதியா தி³ன்னம் நாம அபரிச்சத்தம் ஹோதி, தஸ்மா த³ஸந்தே ப³த்³த⁴கஹாபணாதி³ அஸ்ஸதியா தி³ன்னம் பி⁴க்கு²னா வத்த²ஸஞ்ஞாய படிக்³க³ஹிதஞ்ச, ததோ நேவ ரூபியம் தி³ன்னம், நாபி படிக்³க³ஹிதஞ்ச ஹோதீதி ஏத்த² ஆபத்திதே³ஸனாகிச்சம் நத்தி², தம் பன தா³யகானமேவ படிதா³தப்³ப³ம். தேன அகப்பியவத்து²னா தே சே தா³யகா ஸப்பிஆதீ³னி கிணித்வான ஸங்க⁴ஸ்ஸ தஸ்ஸ ச பி⁴க்கு²னோ தே³ந்தி, ஸப்³பே³ஸம் கப்பதி தா³யகானம்யேவ ஸந்தகத்தா. அட்ட²கதா²யம் பன புஞ்ஞகாமேஹி பரிச்சஜித்வா தி³ன்னமேவ ஸந்தா⁴ய ‘‘புஞ்ஞகாமா…பே… ரூபியே அரூபியஸஞ்ஞீ ரூபியம் படிக்³க³ண்ஹாதீதி வேதி³தப்³போ³’’தி வுத்தம், தஸ்மா பரிச்சஜித்வா தி³ன்னம் வத்த²ஸஞ்ஞாய க³ண்ஹதோபி நிஸ்ஸக்³கி³யமேவ. தேன யதி³ தே தா³யகா நோ ஆக³ந்த்வா க³ண்ஹந்தி, தா³யகே புச்சி²த்வா அத்தனோ அத்தா²ய சே பரிச்சத்தம், ஸங்கே⁴ நிஸ்ஸஜ்ஜித்வா ஆபத்தி தே³ஸேதப்³பா³. தவ சோளகம் பஸ்ஸாஹீஹி இமினா கி³ஹிஸந்தகேபி ‘‘இத³ம் க³ண்ஹதா²’’திஆதி³அகப்பியவோஹாரேன விதா⁴னம் பி⁴க்கு²னோ ந கப்பதீதி தீ³பேதி. ஏகபரிச்சே²தா³னீதி கிரியாகிரியபா⁴வதோ ஏகபரிச்சே²தா³னி. ஜாதரூபரஜதபா⁴வோ, அத்துத்³தே³ஸிகதா, கஹாபணாதீ³ஸு அஞ்ஞதரபா⁴வோதி இமானேத்த² தீணி அங்கா³னி.

ரூபியஸிக்கா²பத³வண்ணனா நிட்டி²தா.