3. த்³வேபா⁴க³ஸிக்கா²பத³வண்ணனா

552. த்³வேபா⁴க³ஸிக்கா²பதே³ பன த்³வே பா⁴கா³தி உக்கட்ட²பரிச்சே²தோ³ காளகானம் அதி⁴கக்³க³ஹணஸ்ஸ படிக்கே²பவஸேன ஸிக்கா²பத³ஸ்ஸ பஞ்ஞத்தத்தா. ததியம் ஓதா³தானம் சதுத்த²ம் கோ³சரியானந்தி அயம் ஹேட்டி²மபரிச்சே²தோ³ தேஸம் அதி⁴கக்³க³ஹணே படிக்கே²பாபா⁴வதோ, தஸ்மா காளகானம் பா⁴க³த்³வயதோ அதி⁴கம் ந வட்டதி, ஸேஸானம் பன வுத்தப்பமாணதோ அதி⁴கம்பி வட்டதி. ‘‘காளகானம்யேவ ச அதி⁴கக்³க³ஹணஸ்ஸ படிக்கி²த்தத்தா காளகானம் உபட்³ட⁴ம் ஓதா³தானம் வா கோ³சரியானம் வா உபட்³ட⁴ம் க³ஹேத்வாபி காதும் வட்டதீ’’தி வத³ந்தி, ‘‘அனாபத்தி ப³ஹுதரம் ஓதா³தானம் ப³ஹுதரம் கோ³சரியானம் ஆதி³யித்வா கரோதி, ஸுத்³த⁴ம் ஓதா³தானம் ஸுத்³த⁴ம் கோ³சரியானம் ஆதி³யித்வா கரோதீ’’தி இமினா தம் ஸமேதி. ‘‘காளகே ஓதா³தே ச ட²பேத்வா ஸேஸா கோ³சரியேஸுயேவ ஸங்க³ஹம் க³ச்ச²ந்தீ’’தி வத³ந்தி. த்³வே கோட்டா²ஸா காளகானந்தி ஏத்த² பன ‘‘ஏகஸ்ஸபி காளகலோமஸ்ஸ அதிரேகபா⁴வே நிஸ்ஸக்³கி³யம் ஹோதீ’’தி மாதிகாட்ட²கதா²யம் (கங்கா². அட்ட². த்³வேபா⁴க³ஸிக்கா²பத³வண்ணனா) த்தம், தம் ‘‘தா⁴ரயித்வா த்³வே துலா ஆதா³தப்³பா³’’தி வசனதோ துலாதா⁴ரணாய ந ஸமேதி. ந ஹி லோமே க³ணேத்வா துலாதா⁴ரணா கரீயதி, அத² க³ணேத்வாவ தா⁴ரயிதப்³ப³ம் ஸியா, கிம் துலாதா⁴ரணாய, தஸ்மா ஏவமேத்த² அதி⁴ப்பாயோ யுத்தோ ஸியா – அசித்தகத்தா ஸிக்கா²பத³ஸ்ஸ புப்³பே³ துலாய தா⁴ரயித்வா ட²பிதேஸு ஏகம்பி லோமம் தத்த² பதேய்ய, நிஸ்ஸக்³கி³யந்தி. அஞ்ஞதா² து³ப்³பி³ஞ்ஞேய்யபா⁴வதோ த்³வே துலா நாதா³தப்³பா³, ஊனகதராவ ஆதா³தப்³பா³ ஸியும்.

த்³வேபா⁴க³ஸிக்கா²பத³வண்ணனா நிட்டி²தா.