10. ராஜஸிக்கா²பத³வண்ணனா

537-539. ராஜஸிக்கா²பதே³ பன ‘‘அஜ்ஜண்ஹோ’’தி பாடே² ‘‘அஜ்ஜுண்ஹோ’’திபி பட²ந்தி. போ⁴கோ³தி பு⁴ஞ்ஜிதப்³போ³. யம் வுத்தம் மாதிகாட்ட²கதா²யம் ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீதி இத³ம் ஆக³மனஸுத்³தி⁴ம் த³ஸ்ஸேதும் வுத்தம். ஸசே ஹி ‘இத³ம் இத்த²ன்னாமஸ்ஸ பி⁴க்கு²னோ தே³ஹீ’தி பேஸேய்ய, ஆக³மனஸ்ஸ அஸுத்³த⁴த்தா அகப்பியவத்து²ம் ஆரப்³ப⁴ பி⁴க்கு²னா கப்பியகாரகோபி நித்³தி³ஸிதப்³போ³ ந ப⁴வேய்யா’’தி, தத்த² ஆக³மனஸ்ஸ ஸுத்³தி⁴யா வா அஸுத்³தி⁴யா வா விஸேஸப்பயோஜனம் ந தி³ஸ்ஸதி. ஸதிபி ஹி ஆக³மனஸ்ஸ அஸுத்³த⁴பா⁴வே தூ³தோ அத்தனோ குஸலதாய கப்பியவோஹாரேன வத³தி, ‘‘கப்பியகாரகோ ந நித்³தி³ஸிதப்³போ³’’தி இத³ம் நத்தி², ந ச தூ³தேன கப்பியவோஹாரவஸேன வுத்தே தா³யகேன இத³ம் கத²ம் பேஸிதந்தி ஈதி³ஸீ விசாரணா உபலப்³ப⁴தி, அவிசாரேத்வா ச தம் ந ஸக்கா ஜானிதும், யதி³ பன ஆக³மனஸ்ஸ அஸுத்³த⁴த்தா கப்பியகாரகோ நித்³தி³ஸிதப்³போ³ ந ப⁴வேய்ய, சீவரானம் அத்தா²ய தூ³தஸ்ஸ ஹத்தே² அகப்பியவத்து²ஸ்மிம் பேஸிதே ஸப்³ப³த்த² தா³யகேன கத²ம் பேஸிதந்தி புச்சி²த்வாவ கப்பியகாரகோ நித்³தி³ஸிதப்³போ³ ப⁴வேய்ய. தஸ்மா அஸதிபி ஆக³மனஸுத்³தி⁴யம் ஸசே ஸோ தூ³தோ அத்தனோ குஸலதாய கப்பியவோஹாரவஸேன வத³தி, தூ³தஸ்ஸேவ வசனம் க³ஹேதப்³ப³ம். யதி³ ஹி ஆக³மனஸுத்³தி⁴யேவேத்த² பமாணம், மூலஸாமிகேன கப்பியவோஹாரவஸேன பேஸிதஸ்ஸ தூ³தஸ்ஸ அகப்பியவோஹாரவஸேன வத³தோபி கப்பியகாரகோ நித்³தி³ஸிதப்³போ³ ப⁴வேய்ய, தஸ்மா ஸப்³ப³த்த² தூ³தவசனமேவ பமாணந்தி க³ஹேதப்³ப³ம்.

இமினா சீவரசேதாபன்னேனாதிஆதி³னா பன இமமத்த²ம் த³ஸ்ஸேதி – கப்பிய வஸேன ஆக³தம்பி சீவரமூலம் ஈதி³ஸேன தூ³தவசனேன அகப்பியம் ஹோதி, தஸ்மா தம் படிக்கி²பிதப்³ப³ந்தி. தேனேவாஹ – ‘‘தேன பி⁴க்கு²னா ஸோ தூ³தோ ஏவமஸ்ஸ வசனீயோ’’திஆதி³. ஸுவண்ணம், ரஜதம், கஹாபணோ, மாஸகோதி இமானி ஹி சத்தாரி நிஸ்ஸக்³கி³யவத்தூ²னி, முத்தா, மணி, வேளுரியோ, ஸங்கோ², ஸிலா, பவாளம், லோஹிதங்கோ, மஸாரக³ல்லம், ஸத்த த⁴ஞ்ஞானி, தா³ஸிதா³ஸம், கே²த்தம், வத்து², புப்பா²ராமப²லாராமாத³யோதி இமானி து³க்கடவத்தூ²னி ச அத்தனோ வா சேதியஸங்க⁴க³ணபுக்³க³லானம் வா அத்தா²ய ஸம்படிச்சி²தும் ந வட்டந்தி, தஸ்மா தம் ஸாதி³தும் ந வட்டதீதி த³ஸ்ஸனத்த²ம் ‘‘ந கோ² மயம், ஆவுஸோ, சீவரசேதாபன்னம் படிக்³க³ண்ஹாமா’’தி வுத்தம், ‘‘சீவரஞ்ச கோ² மயம் படிக்³க³ண்ஹாமா’’தி இத³ம் பன அத்தானம் உத்³தி³ஸ்ஸ ஆப⁴தத்தா வத்தும் வட்டதி, தஸ்மா வுத்தம். ‘‘வேய்யாவச்சகரோ நித்³தி³ஸிதப்³போ³’’தி இத³ம் ‘‘அத்தி² பனாயஸ்மதோ கோசி வேய்யாவச்சகரோ’’தி கப்பியவசனேன வுத்தத்தா அனுஞ்ஞாதம். ஸசே பன தூ³தோ ‘‘கோ இமம் க³ண்ஹாதீ’’தி வா ‘‘கஸ்ஸ தே³மீ’’தி வா வத³தி, ந நித்³தி³ஸிதப்³போ³. ‘‘ஆராமிகோ வா உபாஸகோ வா’’தி இத³ம் ஸாருப்பதாய வுத்தம், ட²பேத்வா பன பஞ்ச ஸஹத⁴ம்மிகே யோ கோசி கப்பியகாரகோ வட்டதி. ‘‘ஏஸோ கோ², ஆவுஸோ, பி⁴க்கூ²னம் வேய்யாவச்சகரோ’’தி இத³ம் பி⁴க்கு²ஸ்ஸ கப்பியவசனத³ஸ்ஸனத்த²ம் வுத்தம். ஏவமேவ ஹி வத்தப்³ப³ம், ‘‘ஏதஸ்ஸ தே³ஹீ’’திஆதி³ ந வத்தப்³ப³ம். ஸோ வா சேதாபேஸ்ஸதி வாதி ஏத்த² ஏகோ வா-ஸத்³தோ³ பத³பூரணோ, ‘‘ஸஞ்ஞத்தோ ஸோ மயா’’திஆதி³ பன தூ³தேன ஏவம் ஆரோசிதேயேவ தம் சோதே³தும் வட்டதி, நேவாஸ்ஸ ஹத்தே² த³த்வா க³தமத்தகாரணேனாதி த³ஸ்ஸனத்த²ம் வுத்தம்.

ஏதானி ஹி வசனானி…பே… ந வத்தப்³போ³தி ஏத்த² ‘‘ஏவம் வத³ந்தோ படிக்கி²த்தஸ்ஸ கதத்தா வத்தபே⁴தே³ து³க்கடம் ஆபஜ்ஜதி, சோத³னா பன ஹோதியேவா’’தி மஹாக³ண்டி²பதே³ மஜ்ஜி²மக³ண்டி²பதே³ ச வுத்தம். உத்³தி³ட்ட²சோத³னாபரிச்சே²த³ம் த³ஸ்ஸேத்வாதி ‘‘து³தியம்பி வத்தப்³போ³’’திஆதி³னா த³ஸ்ஸேத்வா. புச்சி²யமானோதி ஏத்த² புச்சி²யமானேனாதி அத்தோ² க³ஹேதப்³போ³தி ஆஹ ‘‘கரணத்தே² பச்சத்தவசன’’ந்தி. ஆக³தகாரணம் ப⁴ஞ்ஜதீதி ஆக³தகாரணம் வினாஸேதி.

ஏத்த² கேசி வத³ந்தி ‘‘ஆக³தகாரணம் நாம சீவரக்³க³ஹணம், தம் ப⁴ஞ்ஜதீதி வுத்தத்தா புன தம் சீவரம் யேன கேனசி ஆகாரேன க³ஹேதும் ந வட்டதீ’’தி. கேசி பன ‘‘ஆக³தகாரணம் நாம காயவாசாஹி சோத³னா, தம் ப⁴ஞ்ஜதீதி வுத்தத்தா புன தம் யேன கேனசி ஆகாரேன சோதே³தும் ந லப⁴தி. ஸசே ஸயமேவ தே³தி, மூலஸாமிகோ வா தா³பேதி, க³ஹேதும் வட்டதீ’’தி வத³ந்தி. அபரே பன ‘‘ஆக³தகாரணம் நாம டா²னம், தம் ப⁴ஞ்ஜதீதி வுத்தத்தா யதா² ‘அத்தோ² மே, ஆவுஸோ, சீவரேனா’தி ஏகாய சோத³னாய த்³வே டா²னானி ப⁴ஞ்ஜதி, ஏவமிதா⁴பி ஸசே ஆஸனே நிஸீத³தி, ஏகாய நிஸஜ்ஜாய த்³வே டா²னானி ப⁴ஞ்ஜதி. ஆமிஸம் சே படிக்³க³ண்ஹாதி, ஏகேன படிக்³க³ஹணேன த்³வே டா²னானி ப⁴ஞ்ஜதி. த⁴ம்மம் சே பா⁴ஸதி, த⁴ம்மதே³ஸனாஸிக்கா²பதே³ வுத்தபரிச்சே²தா³ய ஏகாய வாசாய த்³வே டா²னானி ப⁴ஞ்ஜதீ’’தி வத³ந்தி. இமேஸம் பன ஸப்³பே³ஸம்பி வாத³ம் ‘‘அயுத்த’’ந்தி படிக்கி²பித்வா தீஸுபி க³ண்டி²பதே³ஸு இத³ம் வுத்தம் ‘‘ஆக³தகாரணம் நாம டா²னமேவ, தஸ்மா ‘ந கத்தப்³ப³’ந்தி வாரிதஸ்ஸ கதத்தா நிஸஜ்ஜாதீ³ஸு கதேஸு ச²ஸு டா²னேஸு ஏகம் டா²னம் ப⁴ஞ்ஜதீ’’தி.

தத்ர தத்ர டா²னே திட்ட²தீதி இத³ம் சோத³கஸ்ஸ டி²தட்டா²னதோ அபக்கம்ம தத்ர தத்ர உத்³தி³ஸ்ஸ டா²னம்யேவ ஸந்தா⁴ய வுத்தம். ‘‘ஸாமம் வா க³ந்தப்³ப³ம், தூ³தோ வா பாஹேதப்³போ³’’தி இத³ம் ஸபா⁴வதோ சோதே³தும் அனிச்ச²ந்தேனபி காதப்³ப³மேவாதி வத³ந்தி. முக²ம் விவரித்வா ஸயமேவ கப்பியகாரகத்தம் உபக³தோதி முக²வேவடிககப்பியகாரகோ. அவிசாரேதுகாமதாயாதி இமஸ்மிம் பக்கே² ‘‘நத்த²ம்ஹாகம் கப்பியகாரகோ’’தி இத³ம் ‘‘தாதி³ஸம் கரோந்தோ கப்பியகாரகோ நத்தீ²’’தி இமினா அதி⁴ப்பாயேன வுத்தம்.

‘‘மேண்ட³கஸிக்கா²பதே³ வுத்தனயேன படிபஜ்ஜிதப்³ப³’’ந்தி வத்வா இதா³னி தம் மேண்ட³கஸிக்கா²பத³ம் த³ஸ்ஸேந்தோ ‘‘வுத்தஞ்ஹேத’’ந்திஆதி³மாஹ. இத³மேவ ஹி ‘‘ஸந்தி, பி⁴க்க²வே, ஸத்³தா⁴ பஸன்னா’’திஆதி³வசனம் பே⁴ஸஜ்ஜக்க²ந்த⁴கே மேண்ட³கவத்து²ஸ்மிம் (மஹாவ. 299) வுத்தத்தா ‘‘மேண்ட³கஸிக்கா²பத³’’ந்தி வுத்தம். தத்த² ஹி மேண்ட³கேன நாம ஸேட்டி²னா –

‘‘ஸந்தி, ப⁴ந்தே, மக்³கா³ கந்தாரா அப்போத³கா அப்பப⁴க்கா², ந ஸுகரா அபாதே²ய்யேன க³ந்தும், ஸாது⁴, ப⁴ந்தே, ப⁴க³வா பி⁴க்கூ²னம் பாதே²ய்யம் அனுஜானாதூ’’தி –

யாசிதேன ப⁴க³வதா –

‘‘அனுஜானாமி, பி⁴க்க²வே, பாதே²ய்யம் பரியேஸிதும். தண்டு³லோ தண்டு³லத்தி²கேன, முக்³கோ³ முக்³க³த்தி²கேன, மாஸோ மாஸத்தி²கேன, லோணம் லோணத்தி²கேன, கு³ளோ கு³ளத்தி²கேன, தேலம் தேலத்தி²கேன, ஸப்பி ஸப்பித்தி²கேனா’’தி –

வத்வா இத³ம் வுத்தம் –

‘‘ஸந்தி, பி⁴க்க²வே, மனுஸ்ஸா ஸத்³தா⁴ பஸன்னா, தே கப்பியகாரகானம் ஹத்தே² ஹிரஞ்ஞம் உபனிக்கி²பந்தி ‘இமினா அய்யஸ்ஸ யம் கப்பியம், தம் தே³தா²’தி. அனுஜானாமி, பி⁴க்க²வே, யம் ததோ கப்பியம், தம் ஸாதி³தும், ந த்வேவாஹம் பி⁴க்க²வே கேனசி பரியாயேன ஜாதரூபரஜதம் ஸாதி³தப்³ப³ம் பரியேஸிதப்³ப³ந்தி வதா³மீ’’தி.

ஹிரஞ்ஞம் உபனிக்கி²பந்தீதி ஏத்தா²பி பி⁴க்கு²ஸ்ஸ ஆரோசனம் அத்தி²யேவாதி க³ஹேதப்³ப³ம். அஞ்ஞதா² அனித்³தி³ட்ட²கப்பியகாரகத்தம் ப⁴ஜதீதி ந சோதே³தப்³போ³ ஸியா. யதி³ மூலம் ஸந்தா⁴ய சோதே³தி, தம் ஸாதி³தமேவ ஸியாதி ஆஹ ‘‘மூலம் அஸாதி³யந்தேனா’’தி.

‘‘அஞ்ஞாதகஅப்பவாரிதேஸு விய படிபஜ்ஜிதப்³ப³ந்தி இத³ம் அத்தனா சோத³னாடா²னஞ்ச ந காதப்³ப³ந்தி த³ஸ்ஸனத்த²ம் வுத்தம். அஞ்ஞம் பன கப்பியகாரகம் பேஸேத்வா லோகசாரித்தவஸேன அனுயுஞ்ஜித்வாபி கப்பியவத்து²ம் ஆஹராபேதும் வட்டதி அத்தானம் உத்³தி³ஸ்ஸ நிக்கி²த்தஸ்ஸ அத்தனோ ஸந்தகத்தா’’தி கேசி வத³ந்தி, தம் அட்ட²கதா²யம் ‘‘அஞ்ஞாதகஅப்பவாரிதேஸு விய படிபஜ்ஜிதப்³ப³ம். ஸசே ஸயமேவ சீவரம் ஆனேத்வா தே³ந்தி, க³ஹேதப்³ப³ம். நோ சே, கிஞ்சி ந வத்தப்³பா³’’தி த³ள்ஹம் கத்வா வுத்தத்தா ந க³ஹேதப்³ப³ந்தி அம்ஹாகம் க²ந்தி. ந ஹி அஞ்ஞாதகஅப்பவாரிதம் ஸயம் அவிஞ்ஞாபேத்வா அஞ்ஞேன விஞ்ஞாபேதும் வட்டதி, ந ச யத்த² அஞ்ஞம் பேஸேத்வா ஆஹராபேதும் வட்டதி, தத்த² ஸயம் க³ந்த்வா ந ஆஹராபேதப்³ப³ந்தி ஸக்கா வத்து²ம். யதி³ சேத்த² அஞ்ஞேன ஆஹராபேதும் வட்டதி, ‘‘அஞ்ஞாதகஅப்பவாரிதேஸு விய படிபஜ்ஜிதப்³ப³’’ந்திஆதி³வசனமேவ நிரத்த²கம் ஸியா. ‘‘தூ³தேனா’’தி இமஸ்ஸ ப்³யபி⁴சாரம் த³ஸ்ஸேதி ‘‘ஸயம் ஆஹரித்வாபீ’’தி. த³த³ந்தேஸூதி இமினா ஸம்ப³ந்தோ⁴. பிண்ட³பாதாதீ³னம் அத்தா²யாதி இமினா பன ‘‘சீவரசேதாபன்ன’’ந்தி இமஸ்ஸ ப்³யபி⁴சாரம் த³ஸ்ஸேதி. ‘‘ஏஸேவ நயோ’’தி வுத்தத்தா பிண்ட³பாதாதீ³னம் அத்தா²ய தி³ன்னேபி டா²னசோத³னாதி³ ஸப்³ப³ம் ஹேட்டா² வுத்தனயேனேவ காதப்³ப³ம்.

படிக்³க³ஹணேபி பரிபோ⁴கே³பி ஆபத்தீதி படிக்³க³ஹணே பாசித்தியம், பரிபோ⁴கே³ து³க்கடம். ஸ்வேவ ஸாபத்திகோதி து³க்கடாபத்திம் ஸந்தா⁴ய வத³தி. இத³ஞ்ச அட்ட²கதா²பமாணேனேவ க³ஹேதப்³ப³ம். ‘‘பரஸ்ஸ நித்³தோ³ஸபா⁴வத³ஸ்ஸனத்த²ம் ஸ்வேவ ஸாபத்திகோ ஸதோ³ஸோதி வுத்தம் ஹோதீ’’திபி வத³ந்தி. ‘‘சோதே³தீதி வுத்தத்தா பன ஆபத்தியா சோதே³தீதி கத்வா ஸ்வேவ ஸாபத்திகோதி இத³ம் து³க்கடம்யேவ ஸந்தா⁴ய வத்தும் யுத்த’’ந்தி தீஸுபி க³ண்டி²பதே³ஸு வுத்தம். படிக்³க³ஹணேபி பரிபோ⁴கே³பி ஆபத்தியேவாதி து³க்கடமேவ ஸந்தா⁴ய வுத்தம். தளாகஸ்ஸபி கே²த்தஸங்க³ஹிதத்தா தஸ்ஸ படிக்³க³ஹணேபி ஆபத்தி வுத்தா. சத்தாரோ பச்சயே ஸங்கோ⁴ பரிபு⁴ஞ்ஜதூதி தே³தீதி ஏத்த² ‘‘பி⁴க்கு²ஸங்கோ⁴ சத்தாரோ பச்சயே பரிபு⁴ஞ்சது, தளாகம் த³ம்மீ’’தி வா ‘‘சதுபச்சயபரிபோ⁴க³த்த²ம் தளாகம் த³ம்மீ’’தி வா வத³தி, வட்டதியேவ. ‘‘இதோ தளாகதோ உப்பன்னே சத்தாரோ பச்சயே த³ம்மீ’’தி வுத்தே பன வத்தப்³ப³மேவ நத்தி².

அம்ஹாகம் ஏகம் கப்பியகாரகம் ட²பேதா²தி வுத்தேதி இத³ம் ஈதி³ஸம்யேவ ஸந்தா⁴ய வுத்தம். கப்பியக்கமேன ஸம்படிச்சி²தேஸு கே²த்ததளாகாதீ³ஸு பன அவுத்தேபி கப்பியகாரகம் ட²பேதும் லப்³ப⁴தியேவ. யஸ்மா பரஸந்தகம் நாஸேதும் பி⁴க்கூ²னம் ந வட்டதி, தஸ்மா ‘‘ந ஸஸ்ஸகாலே’’தி வுத்தம். ‘‘ஜனபத³ஸ்ஸ ஸாமிகோதி இமினாவ யோ தம் ஜனபத³ம் விசாரேதி, தேனபி அச்சி²ந்தி³த்வா தி³ன்னம் வட்டதியேவா’’தி வத³ந்தி. உத³கவாஹகந்தி உத³கமாதிகம். கப்பியவோஹாரேபீதி ஏத்த² ‘‘விதா⁴னம் வக்கா²மா’’தி பாட²ஸேஸோ. உத³கவஸேனாதி உத³கபரிபோ⁴க³த்த²ம். ஸுத்³த⁴சித்தானந்தி கேவலம் உத³கபரிபோ⁴க³த்த²மேவாதி அதி⁴ப்பாயோ. அலஜ்ஜினா காராபிதே வத்தப்³ப³மேவ நத்தீ²தி ஆஹ ‘‘லஜ்ஜீபி⁴க்கு²னா’’தி. பகதிபா⁴கோ³ நாம இமஸ்மிம் ரட்டே² சதுஅம்ப³ணமத்தம். அகட்ட²புப்³ப³ம் நவஸஸ்ஸம் நாம. அபரிச்சி²ன்னபா⁴கே³தி ‘‘ஏத்தகே பூ⁴மிபா⁴கே³ ஏத்தகோ பா⁴கோ³ தா³தப்³போ³’’தி ஏவம் அபரிச்சி²ன்னபா⁴கே³.

ரஜ்ஜுயா வா த³ண்டே³ன வாதி ஏத்த² ‘‘பாதே³ஹிபி மினிதும் ந வட்டதீ’’தி வத³ந்தி. க²லே வா ட²த்வா ரக்க²தீதி ஏத்த² பன தே²னேத்வா க³ண்ஹந்தே தி³ஸ்வா ‘‘மா க³ண்ஹதா²’’தி நிவாரேந்தோ ரக்க²தி நாம. ஸசே பன அவிசாரேத்வா கேவலம் துண்ஹீபூ⁴தோவ ரக்க²ணத்தா²ய ஓலோகேந்தோ திட்ட²தி, வட்டதி. ஸசேபி தஸ்மிம் துண்ஹீபூ⁴தே சோரிகாய ஹரந்தி, ‘‘மயம் பி⁴க்கு²ஸங்க⁴ஸ்ஸ ஆரோசேஸ்ஸாமா’’தி ஏவம் வத்தும் வட்டதீதி வத³ந்தி. நீஹராபேதி படிஸாமேதீதி ஏத்தா²பி ‘‘ஸசே பரியாயேன வத³தி, வட்டதீ’’தி வத³ந்தி. அபுப்³ப³ஸ்ஸ அனுப்பாதி³தத்தா அஞ்ஞேஸம் வட்டதீதி ஆஹ ‘‘தஸ்ஸேவ தம் அகப்பிய’’ந்தி.

நனு ச து³ப்³பி³சாரிதமத்தேன தஸ்ஸேவ தம் அகப்பியம், ந ஸப்³பே³ஸம் ரூபியஸம்வோஹாரே சதுத்த²பத்தோ விய. வுத்தஞ்ஹி தத்த² (பாரா. அட்ட². 2.589) ‘‘யோ பன ரூபியம் அஸம்படிச்சி²த்வா ‘தே²ரஸ்ஸ பத்தம் கிணித்வா தே³ஹீ’தி பஹிதகப்பியகாரகேன ஸத்³தி⁴ம் கம்மாரகுலம் க³ந்த்வா பத்தம் தி³ஸ்வா ‘இமே கஹாபணே க³ஹேத்வா இமம் தே³ஹீ’தி கஹாபணே தா³பேத்வா க³ஹிதோ, அயம் பத்தோ ஏதஸ்ஸேவ பி⁴க்கு²னோ ந வட்டதி து³ப்³பி³சாரிதத்தா, அஞ்ஞேஸம் பன வட்டதி மூலஸ்ஸ அஸம்படிச்சி²தத்தா’’தி. தஸ்மா யம் தே ஆஹரந்தி, ஸப்³பே³ஸம் அகப்பியம். கஸ்மா? கஹாபணானம் விசாரிதத்தாதி இத³ம் கஸ்மா வுத்தந்தி? ஏத்த² கேசி வத³ந்தி ‘‘கஹாபணே ஸாதி³யித்வா விசாரிதம் ஸந்தா⁴ய ஏவம் வுத்த’’ந்தி. ஸங்கி⁴கத்தா ச நிஸ்ஸஜ்ஜிதும் ந ஸக்கா, தஸ்மா ஸப்³பே³ஸம் ந கப்பதீதி தேஸம் அதி⁴ப்பாயோ. கேசி பன ‘‘அஸாதி³யித்வாபி கஹாபணானம் விசாரிதத்தா ரூபியஸம்வோஹாரோ கதோ ஹோதி, ஸங்கி⁴கத்தா ச நிஸ்ஸஜ்ஜிதும் ந ஸக்கா, தஸ்மா ஸப்³பே³ஸம் ந கப்பதீ’’தி வத³ந்தி. க³ண்டி²பதே³ஸு பன தீஸுபி இத³ம் வுத்தம் ‘‘சதுத்த²பத்தோ கி³ஹிஸந்தகானம்யேவ கஹாபணானம் விசாரிதத்தா அஞ்ஞேஸம் கப்பதி, இத⁴ பன ஸங்கி⁴கானம் விசாரிதத்தா ஸப்³பே³ஸம் ந கப்பதீ’’தி. ஸப்³பே³ஸம்பி வாதோ³ தேன தேன பரியாயேன யுஜ்ஜதியேவ.

சதுஸாலத்³வாரேதி போ⁴ஜனஸாலம் ஸந்தா⁴ய வுத்தம். பரியாயேன கதி²தத்தாதி ‘‘க³ண்ஹா’’தி அவத்வா ‘‘ஸீமா க³தா’’தி பரியாயேன கதி²தத்தா. பகதிபூ⁴மிகரணத்த²ம் ‘‘ஹேட்டா² க³ஹிதம் பம்ஸு’’ந்திஆதி³ வுத்தம். தா³ஸம் த³ம்மீதி ஏத்த² ‘‘மனுஸ்ஸம் த³ம்மீதி வுத்தே வட்டதீ’’தி வத³ந்தி. குக்குடஸூகரா…பே… வட்டதீதி ஏத்த² குக்குடஸூகரேஸு தீ³யமானேஸு ‘‘இமேஹி அம்ஹாகம் அத்தோ² நத்தி², ஸுக²ம் ஜீவந்து, அரஞ்ஞே விஸ்ஸஜ்ஜேதா²’’தி வத்தும் வட்டதி. ‘‘கே²த்தவத்து²படிக்³க³ஹணா படிவிரதோ ஹோதீ’’திஆதி³வசனதோ (தீ³. நி. 1.10, 194) கே²த்தாதீ³னம் படிக்³க³ஹணே அயம் ஸப்³போ³ வினிச்ச²யோ வுத்தோ. கப்பியகாரகஸ்ஸ பி⁴க்கு²னா நித்³தி³ட்ட²பா⁴வோ, தூ³தேன அப்பிததா, ததுத்தரி வாயாமோ, தேன வாயாமேன படிலாபோ⁴தி இமானேத்த² சத்தாரி அங்கா³னி.

ராஜஸிக்கா²பத³வண்ணனா நிட்டி²தா.

நிட்டி²தோ சீவரவக்³கோ³ பட²மோ.