1. மஹாக²ந்த⁴கம்

போ³தி⁴கதா²வண்ணனா

இதா³னி உப⁴தோவிப⁴ங்கா³னந்தரம் ஸங்க³ஹமாரோபிதஸ்ஸ மஹாவக்³க³சூளவக்³க³ஸங்க³ஹிதஸ்ஸ க²ந்த⁴கஸ்ஸ அத்த²ஸம்வண்ணனம் ஆரபி⁴துகாமோ ‘‘உபி⁴ன்னம் பாதிமோக்கா²ன’’ந்திஆதி³மாஹ. தத்த² உபி⁴ன்னம் பாதிமோக்கா²னந்தி உபி⁴ன்னம் பாதிமோக்க²விப⁴ங்கா³னம். பாதிமோக்க²க்³க³ஹணேன ஹேத்த² தேஸம் விப⁴ங்கோ³ அபே⁴தே³ன க³ஹிதோ. யம் க²ந்த⁴கம் ஸங்கா³யிம்ஸூதி ஸம்ப³ந்தோ⁴. க²ந்தா⁴னம் ஸமூஹோ க²ந்த⁴கோ, க²ந்தா⁴னம் வா பகாஸனதோ தீ³பனதோ க²ந்த⁴கோ. ‘‘க²ந்தா⁴’’தி சேத்த² பப்³ப³ஜ்ஜுபஸம்பதா³தி³வினயகம்மஸங்கா²தா சாரித்தவாரித்தஸிக்கா²பத³ஸங்கா²தா ச பஞ்ஞத்தியோ அதி⁴ப்பேதா. பப்³ப³ஜ்ஜாதீ³னி ஹி ப⁴க³வதா பஞ்ஞத்தத்தா ‘‘பஞ்ஞத்தியோ’’தி வுச்சந்தி. பஞ்ஞத்தியஞ்ச க²ந்த⁴ஸத்³தோ³ தி³ஸ்ஸதி ‘‘தா³ருக்க²ந்தோ⁴ அக்³கி³க்க²ந்தோ⁴’’திஆதீ³ஸு விய. அபிச பா⁴க³ராஸட்ட²தாபேத்த² யுஜ்ஜதியேவ தாஸம் பஞ்ஞத்தீனம் பா⁴க³தோ ராஸிதோ ச விப⁴த்தத்தா. க²ந்த⁴கோவிதா³தி பஞ்ஞத்திபா⁴க³ராஸட்ட²வஸேன க²ந்த⁴ட்டே² கோவிதா³.

பத³பா⁴ஜனீயே யேஸம் பதா³னம் அத்தா² யேஹி அட்ட²கதா²னயேஹி பகாஸிதாதி யோஜேதப்³ப³ம். தே சே புன வதே³ய்யாமாதி தே சே அட்ட²கதா²னயே புனபி வதே³ய்யாம. அத² வா பத³பா⁴ஜனீயே யேஸம் பதா³னம் யே அத்தா² ஹேட்டா² பகாஸிதா, தே சே அத்தே² புன வதே³ய்யாமாதி யோஜேதப்³ப³ம். இமஸ்மிம் பக்கே² ஹி-ஸத்³தோ³ பத³பூரணே த³ட்ட²ப்³போ³. பரியோஸானந்தி ஸம்வண்ணனாபரியோஸானம். உத்தானா சேவ யே அத்தா²தி யே அத்தா² புப்³பே³ அபகாஸிதாபி உத்தானா அக³ம்பீ⁴ரா.

1. விஸேஸகாரணம் நத்தீ²தி ‘‘யேன ஸமயேன ஆயஸ்மதோ ஸாரிபுத்தத்தே²ரஸ்ஸ ஸிக்கா²பத³பஞ்ஞத்தியாசனஹேதுபூ⁴தோ பரிவிதக்கோ உத³பாதி³, தேன ஸமயேனா’’திஆதி³னா வுத்தகாரணம் விய இத⁴ விஸேஸகாரணம் நத்தி². அயமபி⁴லாபோதி ‘‘தேன ஸமயேனா’’தி அயமபி⁴லாபோ. கிம் பனேதஸ்ஸ வசனே பயோஜனந்தி யதி³ விஸேஸகாரணம் நத்தி², ஏதஸ்ஸ வசனே கிம் பயோஜனந்தி அதி⁴ப்பாயோ. நிதா³னத³ஸ்ஸனம் பயோஜனந்தி யோஜேதப்³ப³ம். தமேவ விபா⁴வேதும் ‘‘யா ஹி ப⁴க³வதா’’திஆதி³ வுத்தம்.

மஹாவேலா விய மஹாவேலா, விபுலவாலுகபுஞ்ஜதாய மஹந்தோ வேலாதடோ வியாதி அத்தோ². தேனாஹ ‘‘மஹந்தே வாலிகராஸிம்ஹீதி அத்தோ²’’தி. உரு மரு ஸிகதா வாலுகா வண்ணு வாலிகாதி இமே ஸத்³தா³ ஸமானத்தா², ப்³யஞ்ஜனமேவ நானம். தேனாஹ ‘‘உரூதி வாலிகா வுச்சதீ’’தி.

இதோ பட்டா²ய ச –

யஸ்மா ஸுத்தந்தபாளீனம், அத்தோ² ஸங்கே²பவண்ணிதோ;

தஸ்மா மயம் கரிஸ்ஸாம, தாஸம் அத்த²ஸ்ஸ தீ³பனம்.

நஜ்ஜாதி (உதா³. அட்ட². 1) நத³தி ஸந்த³தீதி நதீ³, தஸ்ஸா நஜ்ஜா, நதி³யா நின்னகா³யாதி அத்தோ². நேரஞ்ஜராயாதி ‘‘நேலஞ்ஜலாயா’’தி வத்தப்³பே³ ல-காரஸ்ஸ ர-காரம் கத்வா ‘‘நேரஞ்ஜராயா’’தி வுத்தம், கத்³த³மஸேவாலபணகாதி³தோ³ஸரஹிதஸலிலாயாதி அத்தோ². கேசி ‘‘நீலம்ஜலாயாதி வத்தப்³பே³ நேரஞ்ஜராயாதி வுத்த’’ந்தி வத³ந்தி, நாமமேவ வா ஏதம் தஸ்ஸா நதி³யாதி வேதி³தப்³ப³ம். தஸ்ஸா நதி³யா தீரே யத்த² ப⁴க³வா விஹாஸி, தம் த³ஸ்ஸேதும் ‘‘போ³தி⁴ருக்க²மூலே’’தி வுத்தம். ‘‘போ³தி⁴ வுச்சதி சதூஸு மக்³கே³ஸு ஞாண’’ந்தி (சூளவ. க²க்³க³விஸாணஸுத்தனித்³தே³ஸ 121) ஏத்த² மக்³க³ஞாணம் போ³தீ⁴தி வுத்தம், ‘‘பப்போதி போ³தி⁴ம் வரபூ⁴ரிமேத⁴ஸோ’’தி (தீ³. நி. 3.217) ஏத்த² ஸப்³ப³ஞ்ஞுதஞ்ஞாணம். தது³ப⁴யம்பி போ³தி⁴ம் ப⁴க³வா ஏத்த² பத்தோதி ருக்கோ²பி ‘‘போ³தி⁴ருக்கோ²’’த்வேவ நாமம் லபி⁴. அத² வா ஸத்த போ³ஜ்ஜ²ங்கே³ பு³ஜ்ஜ²தீதி ப⁴க³வா போ³தி⁴. தேன பு³ஜ்ஜ²ந்தேன ஸன்னிஸ்ஸிதத்தா ஸோ ருக்கோ² ‘‘போ³தி⁴ருக்கோ²’’தி நாமம் லபி⁴. அட்ட²கதா²யம் பன ஏகதே³ஸேனேவ அத்த²ம் த³ஸ்ஸேதும் ‘‘போ³தி⁴ வுச்சதி சதூஸு மக்³கே³ஸு ஞாண’’ந்திஆதி³ வுத்தம். மூலேதி ஸமீபே. பட²மாபி⁴ஸம்பு³த்³தோ⁴தி அனுனாஸிகலோபேனாயம் நித்³தே³ஸோதி ஆஹ ‘‘பட²மம் அபி⁴ஸம்பு³த்³தோ⁴’’தி. பட²மந்தி ச பா⁴வனபும்ஸகனித்³தே³ஸோ, தஸ்மா அபி⁴ஸம்பு³த்³தோ⁴ ஹுத்வா ஸப்³ப³பட²மம் போ³தி⁴ருக்க²மூலே விஹரதீதி ஏவமேத்த² ஸம்ப³ந்தோ⁴ வேதி³தப்³போ³.

அத² கோ² ப⁴க³வாதி ஏத்த² அதா²தி தஸ்மிம் ஸமயேதி ஏவமத்தோ² க³ஹேதப்³போ³ அனேகத்த²த்தா நிபாதானம், யஸ்மிம் ஸமயே அபி⁴ஸம்பு³த்³தோ⁴ ஹுத்வா போ³தி⁴ருக்க²மூலே விஹரதி, தஸ்மிம் ஸமயேதி அத்தோ². தேனேவ உதா³னபாளியம் (உதா³. 2) ‘‘தேன கோ² பன ஸமயேன ப⁴க³வா ஸத்தாஹம் ஏகபல்லங்கேன நிஸின்னோ ஹோதி விமுத்திஸுக²படிஸம்வேதீ³’’தி வுத்தம். அதா²தி வா பச்சா²தி இமஸ்மிம் அத்தே² நிபாதோ, தஸ்மா அபி⁴ஸம்போ³தி⁴தோ பச்சா²தி ஏவமத்தோ² க³ஹேதப்³போ³. கோ²தி பத³பூரணே நிபாதோ. ஸத்த அஹானி ஸத்தாஹம். அச்சந்தஸம்யோகே³ சேதம் உபயோக³வசனம். யஸ்மா ப⁴க³வா தம் ஸத்தாஹம் நிரந்தரதாய அச்சந்தமேவ ப²லஸமாபத்திஸுகே²ன விஹாஸி, தஸ்மா ‘‘ஸத்தாஹ’’ந்தி அச்சந்தஸம்யோக³வஸேன உபயோக³வசனம் வுத்தம். ஏகபல்லங்கேனாதி விஸாக²புண்ணமாய அனத்த²ங்க³தேயேவ ஸூரியே அபராஜிதபல்லங்கவஸேன வஜிராஸனே நிஸின்னகாலதோ பட்டா²ய ஸகிம்பி அனுட்ட²ஹித்வா யதா²பு⁴ஜிதேன ஏகேனேவ பல்லங்கேன.

விமுத்திஸுக²படிஸம்வேதீ³தி ஏத்த² தத³ங்க³விக்க²ம்ப⁴னஸமுச்சே²த³படிப்பஸ்ஸத்³தி⁴னிஸ்ஸரணவிமுத்தீஸு பஞ்சஸு படிப்பஸ்ஸத்³தி⁴விமுத்திஸங்கா²தா ப⁴க³வதோ ப²லவிமுத்தி அதி⁴ப்பேதாதி ஆஹ ‘‘விமுத்திஸுக²ம் ப²லஸமாபத்திஸுக²ம் படிஸம்வேத³யமானோ’’தி. விமுத்தீதி ச உபக்கிலேஸேஹி படிப்பஸ்ஸத்³தி⁴வஸேன சித்தஸ்ஸ விமுத்தபா⁴வோ, சித்தமேவ வா ததா² விமுத்தம் வேதி³தப்³ப³ம். தாய விமுத்தியா ஜாதம், ஸம்பயுத்தம் வா ஸுக²ம் விமுத்திஸுக²ம். ‘‘யாயம், ப⁴ந்தே, உபேக்கா² ஸந்தே ஸுகே² வுத்தா ப⁴க³வதா’’தி (ம. நி. 2.88) வசனதோ உபேக்கா²பி சேத்த² ஸுக²மிச்சேவ வேதி³தப்³பா³. ததா² ஹி வுத்தம் ஸம்மோஹவினோத³னியம் (விப⁴. அட்ட². 232) ‘‘உபேக்கா² பன ஸந்தத்தா, ஸுக²மிச்சேவ பா⁴ஸிதா’’தி. ப⁴க³வா ஹி சதுத்த²ஜ்ஜா²னிகம் அரஹத்தப²லஸமாபத்திம் ஸமாபஜ்ஜதி, ந இதரம். அத² வா ‘‘தேஸம் வூபஸமோ ஸுகோ²’’திஆதீ³ஸு (தீ³. நி. 2.221, 272) யதா² ஸங்கா²ரது³க்க²வூபஸமோ ‘‘ஸுகோ²’’தி வுச்சதி, ஏவம் ஸகலகிலேஸது³க்கூ²பஸமபா⁴வதோ அக்³க³ப²லே லப்³ப⁴மானா படிப்பஸ்ஸத்³தி⁴விமுத்தி ஏவ இத⁴ ‘‘ஸுக²’’ந்தி வேதி³தப்³பா³.

அதா²தி அதி⁴காரத்தே² நிபாதோ, கோ²தி பத³பூரணே. தேஸு அதி⁴காரத்தே²ன ‘‘அதா²’’தி இமினா விமுத்திஸுக²படிஸம்வேத³னதோ அஞ்ஞம் அதி⁴காரம் த³ஸ்ஸேதி. கோ பனேஸோதி? படிச்சஸமஉப்பாத³மனஸிகாரோ. ரத்தியாதி அவயவஸம்ப³ந்தே⁴ ஸாமிவசனம். பட²மந்தி அச்சந்தஸம்யோக³த்தே² உபயோக³வசனம். ப⁴க³வா ஹி தஸ்ஸா ரத்தியா ஸகலம்பி பட²மம் யாமம் தேனேவ மனஸிகாரேன யுத்தோ அஹோஸீதி.

பச்சயாகாரந்தி அவிஜ்ஜாதி³பச்சயத⁴ம்மம். படிச்சாதி படிமுக²ம் க³ந்த்வா, காரணஸாமக்³கி³ம் அபடிக்கி²பித்வாதி அத்தோ². படிமுக²க³மனஞ்ச பச்சயஸ்ஸ காரணஸாமக்³கி³யா அங்க³பா⁴வேன ப²லஸ்ஸ உப்பாத³னமேவ. அபடிக்கி²பித்வாதி பன வினா தாய காரணஸாமக்³கி³யா அங்க³பா⁴வம் அக³ந்த்வா ஸயமேவ ந உப்பாதே³தீதி அத்தோ². ஏதேன காரணப³ஹுதா த³ஸ்ஸிதா. அவிஜ்ஜாதி³ஏகேகஹேதுஸீஸேன ஹி ஹேதுஸமூஹோ நித்³தி³ட்டோ². ஸஹிதேதி ஸமுதி³தே, அவினிப்³பு⁴த்தேதி அத்தோ². அவிஜ்ஜாதி³கோ ஹி பச்சயத⁴ம்மோ ஸஹிதேயேவ அஞ்ஞமஞ்ஞம் அவினிப்³போ⁴க³வுத்தித⁴ம்மே உப்பாதே³தி. இமினா பச்சயுப்பன்னத⁴ம்மப³ஹுதா த³ஸ்ஸிதா. உப⁴யேனபி ‘‘ஏகம் ந ஏகதோ’’திஆதி³னயோ (விப⁴. அட்ட². 226 ஸங்கா²ரபத³னித்³தே³ஸ; விஸுத்³தி⁴. 2.617) தீ³பிதோ ஹோதி. ஏகதோ ஹி காரணதோ ந இத⁴ கிஞ்சி ஏகம் ப²லமத்தி², ந அனேகம், நாபி அனேகேஹி காரணேஹி ஏகம், அனேகேஹி பன காரணேஹி அனேகமேவ ஹோதி. ததா² ஹி அனேகேஹி உதுபத²வீபீ³ஜஸலிலஸங்கா²தேஹி காரணேஹி அனேகமேவ ரூபக³ந்த⁴ரஸாதி³அங்குரஸங்கா²தம் ப²லமுப்பஜ்ஜமானம் தி³ஸ்ஸதி. யம் பனேதம் ‘‘அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாண’’ந்தி ஏகேகஹேதுப²லதீ³பனம் கதம், தத்த² பயோஜனம் ந விஜ்ஜதி.

ப⁴க³வா ஹி கத்த²சி பதா⁴னத்தா கத்த²சி பாகடத்தா கத்த²சி அஸாதா⁴ரணத்தா தே³ஸனாவிலாஸஸ்ஸ ச வேனேய்யானஞ்ச அனுரூபதோ ஏகமேவ ஹேதும் வா ப²லம் வா தீ³பேதி. ‘‘ப²ஸ்ஸபச்சயா வேத³னா’’தி ஹி ஏகமேவ ஹேதும் ப²லஞ்சாஹ. ப²ஸ்ஸோ ஹி வேத³னாய பதா⁴னஹேது யதா²ப²ஸ்ஸம் வேத³னாவவத்தா²னதோ. வேத³னா ச ப²ஸ்ஸஸ்ஸ பதா⁴னப²லம் யதா²வேத³னம் ப²ஸ்ஸவவத்தா²னதோ. ‘‘ஸேம்ஹஸமுட்டா²னா ஆபா³தா⁴’’தி (மஹானி. 5) பாகடத்தா ஏகம் ஹேதும் ஆஹ. பாகடோ ஹி ஏத்த² ஸேம்ஹோ, ந கம்மாத³யோ. ‘‘யே கேசி, பி⁴க்க²வே, அகுஸலா த⁴ம்மா, ஸப்³பே³தே அயோனிஸோமனஸிகாரமூலகா’’தி அஸாதா⁴ரணத்தா ஏகம் ஹேதும் ஆஹ. அஸாதா⁴ரணோ ஹி அயோனிஸோமனஸிகாரோ அகுஸலானம், ஸாதா⁴ரணானி வத்தா²ரம்மணாதீ³னீதி. தஸ்மா அவிஜ்ஜா தாவேத்த² விஜ்ஜமானேஸுபி அஞ்ஞேஸு வத்தா²ரம்மணஸஹஜாதத⁴ம்மாதீ³ஸு ஸங்கா²ரகாரணேஸு ‘‘அஸ்ஸாதா³னுபஸ்ஸினோ தண்ஹா பவட்³ட⁴தீ’’தி (ஸம். நி. 2.52) ச ‘‘அவிஜ்ஜாஸமுத³யா ஆஸவஸமுத³யோ’’தி (ம. நி. 1.104) ச வசனதோ அஞ்ஞேஸம்பி தண்ஹாதீ³னம் ஸங்கா²ரஹேதூனம் ஹேதூதி பதா⁴னத்தா, ‘‘அவித்³வா, பி⁴க்க²வே, அவிஜ்ஜாக³தோ புஞ்ஞாபி⁴ஸங்கா²ரம்பி அபி⁴ஸங்க²ரோதீ’’தி பாகடத்தா அஸாதா⁴ரணத்தா ச ஸங்கா²ரானம் ஹேதுபா⁴வேன தீ³பிதாதி வேதி³தப்³பா³. ஏவம் ஸப்³ப³த்த² ஏகேகஹேதுப²லதீ³பனே யதா²ஸம்ப⁴வம் நயோ நேதப்³போ³. தேனாஹு போராணா –

‘‘ஏகம் ந ஏகதோ இத⁴, நானேகமனேகதோபி நோ ஏகம்;

ப²லமத்தி² அத்தி² பன ஏக-ஹேதுப²லதீ³பனே அத்தோ²’’தி.

பச்சேதுமரஹதீதி படிச்சோ. யோ ஹி நம் பச்சேதி அபி⁴ஸமேதி, தஸ்ஸ அச்சந்தமேவ து³க்க²வூபஸமாய ஸம்வத்ததி. ஸம்மா ஸஹ ச உப்பாதே³தீதி ஸமுப்பாதோ³. பச்சயத⁴ம்மோ ஹி அத்தனோ ப²லம் உப்பாதே³ந்தோ ஸம்புண்ணமேவ உப்பாதே³தி, ந விகலம். யே ச த⁴ம்மே உப்பாதே³தி, தே ஸப்³பே³ ஸஹேவ உப்பாதே³தி, ந ஏகேகம். இதி படிச்சோ ச ஸோ ஸமுப்பாதோ³ சாதி படிச்சஸமுப்பாதோ³தி ஏவம்பேத்த² அத்தோ² த³ட்ட²ப்³போ³. வித்தா²ரோதி படிச்சஸமுப்பாத³பத³வண்ணனாபபஞ்சோ. மயம்பி தம் அதிபபஞ்சப⁴யா இத⁴ ந த³ஸ்ஸயிஸ்ஸாம, ஏவம் பரதோ வக்க²மானம்பி வித்தா²ரம். அனுலோமபடிலோமந்தி பா⁴வனபும்ஸகனித்³தே³ஸோ ‘‘விஸமம் சந்தி³மஸூரியா பரிவத்தந்தீ’’திஆதீ³ஸு (அ. நி. 4.70) விய. ஸ்வேவாதி ஸோ ஏவ பச்சயாகாரோ. புரிமனயேன வா வுத்தோதி ‘‘அவிஜ்ஜாபச்சயா ஸங்கா²ரா’’திஆதி³னா நயேன வுத்தோ பச்சயாகாரோ. பவத்தியாதி ஸம்ஸாரப்பவத்தியா. மனஸி அகாஸீதி யோ யோ பச்சயத⁴ம்மோ யஸ்ஸ யஸ்ஸ பச்சயுப்பன்னத⁴ம்மஸ்ஸ யதா² யதா² ஹேதுபச்சயாதி³னா பச்சயபா⁴வேன பச்சயோ ஹோதி, தம் ஸப்³ப³ம் அவிபரீதம் அபரிஹாபேத்வா அனவஸேஸதோ பச்சவேக்க²ணவஸேன சித்தே அகாஸீதி அத்தோ².

அவிஜ்ஜாபச்சயாதிஆதீ³ஸு (விப⁴. அட்ட². 225; விஸுத்³தி⁴. 2.586-587; உதா³. அட்ட². 1) அவிந்தி³யம் காயது³ச்சரிதாதி³ம் விந்த³தீதி அவிஜ்ஜா, விந்தி³யம் காயஸுசரிதாதி³ம் ந விந்த³தீதி அவிஜ்ஜா, த⁴ம்மானம் அவிபரீதஸபா⁴வம் அவிதி³தம் கரோதீதி அவிஜ்ஜா, அந்தவிரஹிதே ஸம்ஸாரே ப⁴வாதீ³ஸு ஸத்தே ஜவாபேதீதி அவிஜ்ஜா, அவிஜ்ஜமானேஸு ஜவதி, விஜ்ஜமானேஸு ந ஜவதீதி அவிஜ்ஜா, விஜ்ஜாபடிபக்கா²தி வா அவிஜ்ஜா. ஸா ‘‘து³க்கே² அஞ்ஞாண’’ந்திஆதி³னா சதுப்³பி³தா⁴ வேதி³தப்³பா³. படிச்ச நம் ந வினா ப²லம் ஏதி உப்பஜ்ஜதி சேவ பவத்ததி சாதி பச்சயோ, உபகாரட்டோ² வா பச்சயோ. அவிஜ்ஜா ச ஸா பச்சயோ சாதி அவிஜ்ஜாபச்சயோ, தஸ்மா அவிஜ்ஜாபச்சயா. ஸங்க²ரோந்தீதி ஸங்கா²ரா, லோகியா குஸலாகுஸலசேதனா. தே புஞ்ஞாபுஞ்ஞானேஞ்சாபி⁴ஸங்கா²ரவஸேன திவிதா⁴ வேதி³தப்³பா³. விஜானாதீதி விஞ்ஞாணம், தம் லோகியவிபாகவிஞ்ஞாணவஸேன பா³த்திம்ஸவித⁴ம். நமதீதி நாமம், வேத³னாதி³க்க²ந்த⁴த்தயம். ருப்பதீதி ரூபம், பூ⁴தரூபம் சக்கா²தி³உபாதா³ரூபஞ்ச. ஆயதந்தி, ஆயதஞ்ச ஸம்ஸாரது³க்க²ம் நயதீதி ஆயதனம். பு²ஸதீதி ப²ஸ்ஸோ. வேத³யதீதி வேத³னா. இத³ம்பி த்³வயம் த்³வாரவஸேன ச²ப்³பி³த⁴ம், விபாகவஸேன க³ஹணே பா³த்திம்ஸவித⁴ம். தஸ்ஸதி பரிதஸ்ஸதீதி தண்ஹா, ஸா காமதண்ஹாதி³வஸேன ஸங்கே²பதோ திவிதா⁴, வித்தா²ரதோ அட்ட²ஸதவிதா⁴ ச. உபாதி³யதீதி உபாதா³னம், தம் காமுபாதா³னாதி³வஸஏன சதுப்³பி³த⁴ம்.

ப⁴வதி பா⁴வயதி சாதி ப⁴வோ, ஸோ கம்மோபபத்திபே⁴த³தோ து³விதோ⁴. ஜனனம் ஜாதி. ஜீரணம் ஜரா. மரந்தி தேனாதி மரணம். ஸோசனம் ஸோகோ. பரிதே³வனம் பரிதே³வோ. து³க்க²யதீதி து³க்க²ம். உப்பாத³ட்டி²திவஸேன த்³வேதா⁴ க²னதீதி வா து³க்க²ம். து³ம்மனஸ்ஸ பா⁴வோ தோ³மனஸ்ஸம். பு⁴ஸோ ஆயாஸோ உபாயாஸோ. ஸம்ப⁴வந்தீதி நிப்³ப³த்தந்தி. ந கேவலஞ்ச ஸோகாதீ³ஹேவ, அத² கோ² ஸப்³ப³பதே³ஹி ‘‘ஸம்ப⁴வந்தீ’’தி பத³ஸ்ஸ யோஜனா காதப்³பா³. ஏவஞ்ஹி அவிஜ்ஜாபச்சயா ஸங்கா²ரா ஸம்ப⁴வந்தீதி பச்சயபச்சயுப்பன்னவவத்தா²னம் த³ஸ்ஸிதம் ஹோதி. தேனேவாஹ ‘‘அவிஜ்ஜாபச்சயா ஸங்கா²ரா ஸம்ப⁴வந்தீதி இமினா நயேன ஸப்³ப³பதே³ஸு அத்தோ² வேதி³தப்³போ³’’தி. ஏவமேதஸ்ஸ…பே… ஸமுத³யோ ஹோதீதி ஏத்த² பன அயமத்தோ². ஏவந்தி நித்³தி³ட்ட²னயனித³ஸ்ஸனம். தேன அவிஜ்ஜாதீ³ஹேவ காரணேஹி, ந இஸ்ஸரனிம்மானாதீ³ஹீதி த³ஸ்ஸேதி. ஏதஸ்ஸாதி யதா²வுத்தஸ்ஸ. கேவலஸ்ஸாதி அஸம்மிஸ்ஸஸ்ஸ, ஸகலஸ்ஸ வா. து³க்க²க்க²ந்த⁴ஸ்ஸாதி து³க்க²ஸமூஹஸ்ஸ, ந ஸத்தஸ்ஸ நாபி ஸுப⁴ஸுகா²தீ³னம். ஸமுத³யோ ஹோதீதி நிப்³ப³த்தி ஸம்ப⁴வதி.

அச்சந்தமேவ ஸங்கா²ரேஹி விரஜ்ஜதி ஏதேனாதி விராகோ³, அரியமக்³கோ³தி ஆஹ ‘‘விராக³ஸங்கா²தேன மக்³கே³னா’’தி. அஸேஸம் நிரோதா⁴ அஸேஸனிரோதா⁴, அஸேஸேத்வா நிஸ்ஸேஸேத்வா நிரோதா⁴ ஸமுச்சி²ந்த³னா அனுஸயப்பஹானவஸேன அக்³க³மக்³கே³ன அவிஜ்ஜாய அச்சந்தஸமுக்³கா⁴ததோதி அத்தோ². யதி³பி ஹேட்டி²மமக்³கே³ஹிபி பஹீயமானா அவிஜ்ஜா அச்சந்தஸமுக்³கா⁴தவஸேனேவ பஹீயதி, ததா²பி ந அனவஸேஸதோ பஹீயதி. அபாயக³மனீயா ஹி அவிஜ்ஜா பட²மமக்³கே³ன பஹீயதி, ததா² ஸகிதே³வ இமஸ்மிம் லோகே ஸப்³ப³த்த² ச அனரியபூ⁴மியம் உபபத்தியா பச்சயபூ⁴தா அவிஜ்ஜா யதா²க்கமம் து³தியததியமக்³கே³ஹி பஹீயதி, ந இதராதி, அரஹத்தமக்³கே³னேவ பன ஸா அனவஸேஸம் பஹீயதீதி. அனுப்பாத³னிரோதோ⁴ ஹோதீதி ஸப்³பே³ஸம் ஸங்கா²ரானம் அனவஸேஸம் அனுப்பாத³னிரோதோ⁴ ஹோதி. ஹேட்டி²மேன ஹி மக்³க³த்தயேன கேசி ஸங்கா²ரா நிருஜ்ஜ²ந்தி, கேசி ந நிருஜ்ஜ²ந்தி அவிஜ்ஜாய ஸாவஸேஸனிரோதா⁴, அக்³க³மக்³கே³ன பனஸ்ஸா அனவஸேஸனிரோதா⁴ ந கேசி ஸங்கா²ரா ந நிருஜ்ஜ²ந்தீதி. ஏவம் நிருத்³தா⁴னந்தி ஏவம் அனுப்பாத³னிரோதே⁴ன நிருத்³தா⁴னம். கேவல-ஸத்³தோ³ நிரவஸேஸவாசகோ ச ஹோதி ‘‘கேவலா அங்க³மக³தா⁴’’திஆதீ³ஸு. அஸம்மிஸ்ஸவாசகோ ச ‘‘கேவலா ஸாலயோ’’திஆதீ³ஸு. தஸ்மா உப⁴யதா²பி அத்த²ம் வத³தி ‘‘ஸகலஸ்ஸ, ஸுத்³த⁴ஸ்ஸ வா’’தி. தத்த² ஸகலஸ்ஸாதி அனவஸேஸஸ்ஸ ஸப்³ப³ப⁴வாதி³க³தஸ்ஸ. ஸத்தவிரஹிதஸ்ஸாதி பரபரிகப்பிதஜீவரஹிதஸ்ஸ.

அபிசேத்த² கிஞ்சாபி ‘‘அவிஜ்ஜானிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴’’தி ஏத்தாவதாபி ஸகலஸ்ஸ து³க்க²க்க²ந்த⁴ஸ்ஸ அனவஸேஸதோ நிரோதோ⁴ வுத்தோ ஹோதி, ததா²பி யதா² அனுலோமே யஸ்ஸ யஸ்ஸ பச்சயத⁴ம்மஸ்ஸ அத்தி²தாய யோ யோ பச்சயுப்பன்னத⁴ம்மோ ந நிருஜ்ஜ²தி பவத்ததி ஏவாதி இமஸ்ஸ அத்த²ஸ்ஸ த³ஸ்ஸனத்த²ம் ‘‘அவிஜ்ஜாபச்சயா ஸங்கா²ரா…பே… ஸமுத³யோ ஹோதீ’’தி வுத்தம். ஏவம் தப்படிபக்க²தோ தஸ்ஸ தஸ்ஸ பச்சயஸ்ஸ அபா⁴வே ஸோ ஸோ பச்சயுப்பன்னத⁴ம்மோ நிருஜ்ஜ²தி ந பவத்ததீதி த³ஸ்ஸனத்த²ம் இத⁴ ‘‘அவிஜ்ஜானிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴, விஞ்ஞாணனிரோதா⁴ நாமரூபனிரோதோ⁴…பே… து³க்க²க்க²ந்த⁴ஸ்ஸ நிரோதோ⁴ ஹோதீ’’தி வுத்தம், ந பன அனுலோமே விய காலத்தயபரியாபன்னஸ்ஸ து³க்க²க்க²ந்த⁴ஸ்ஸ நிரோத⁴த³ஸ்ஸனத்த²ம். அனாக³தஸ்ஸேவ ஹி அரியமக்³க³பா⁴வனாய அஸதி உப்பஜ்ஜனாரஹஸ்ஸ து³க்க²க்க²ந்த⁴ஸ்ஸ அரியமக்³க³பா⁴வனாய நிரோதோ⁴ இச்சி²தோதி அயம்பி விஸேஸோ வேதி³தப்³போ³.

யதா³ ஹவேதி ஏத்த² ஹவேதி ப்³யத்தந்தி இமஸ்மிம் அத்தே² நிபாதோ. கேசி பன ‘‘ஹவேதி ஆஹவே யுத்³தே⁴’’தி அத்த²ம் வத³ந்தி, ‘‘யோதே⁴த² மாரம் பஞ்ஞாவுதே⁴னா’’தி (த⁴. ப. 40) ஹி வசனதோ கிலேஸமாரேன யுஜ்ஜ²னஸமயேதி தேஸம் அதி⁴ப்பாயோ. ஆரம்மணூபனிஜ்ஜா²னலக்க²ணேனாதி ஆரம்மணூபனிஜ்ஜா²னஸபா⁴வேன. லக்க²ணூபனிஜ்ஜா²னலக்க²ணேனாதி ஏத்தா²பி ஏஸேவ நயோ. தத்த² ஆரம்மணூபனிஜ்ஜா²னம் நாம அட்ட² ஸமாபத்தியோ கஸிணாரம்மணஸ்ஸ உபனிஜ்ஜா²யனதோ. லக்க²ணூபனிஜ்ஜா²னம் நாம விபஸ்ஸனாமக்³க³ப²லானி. விபஸ்ஸனா ஹி தீணி லக்க²ணானி உபனிஜ்ஜா²யதீதி லக்க²ணூபனிஜ்ஜா²னம், மக்³கோ³ விபஸ்ஸனாய ஆக³தகிச்சம் ஸாதே⁴தீதி லக்க²ணூபனிஜ்ஜா²னம், ப²லம் தத²லக்க²ணம் நிரோத⁴ஸச்சம் உபனிஜ்ஜா²யதீதி லக்க²ணூபனிஜ்ஜா²னம். நோ கல்லோ பஞ்ஹோதி அயுத்தோ பஞ்ஹோ, து³ப்பஞ்ஹோ ஏஸோதி அத்தோ². ஆதி³ஸத்³தே³ன –

‘‘பு²ஸதீதி அஹம் ந வதா³மி. பு²ஸதீதி சாஹம் வதே³ய்யம், தத்ரஸ்ஸ கல்லோ பஞ்ஹோ ‘கோ நு கோ², ப⁴ந்தே, பு²ஸதீ’தி? ஏவஞ்சாஹம் ந வதா³மி, ஏவம் மம் அவத³ந்தம் யோ ஏவம் புச்சே²ய்ய ‘கிம்பச்சயா நு கோ², ப⁴ந்தே, ப²ஸ்ஸோ’தி, ஏஸ கல்லோ பஞ்ஹோ. தத்ர கல்லம் வேய்யாகரணம் ‘ஸளாயதனபச்சயா ப²ஸ்ஸோ, ப²ஸ்ஸபச்சயா வேத³னா’தி. கோ நு கோ², ப⁴ந்தே, வேத³யதீதி? நோ கல்லோ பஞ்ஹோதி ப⁴க³வா அவோச, வேத³யதீதி அஹம் ந வதா³மி, வேத³யதீதி சாஹம் வதே³ய்யம், தத்ரஸ்ஸ கல்லோ பஞ்ஹோ ‘கோ நு கோ², ப⁴ந்தே, வேத³யதீ’தி? ஏவஞ்சாஹம் ந வதா³மி. ஏவம் மம் அவத³ந்தம் யோ ஏவம் புச்சே²ய்ய ‘கிம்பச்சயா நு கோ², ப⁴ந்தே, வேத³னா’தி, ஏஸ கல்லோ பஞ்ஹோ. தத்ர கல்லம் வேய்யாகரணம் ‘ப²ஸ்ஸபச்சயா வேத³னா, வேத³னாபச்சயா தண்ஹா’’’தி (ஸம். நி. 2.12) –

ஏவமாதி³ம் பாளிஸேஸம் ஸங்க³ண்ஹாதி.

ஆதி³னா ச நயேனாதி ஏத்த² ஆதி³-ஸத்³தே³ன பன ‘‘கதமா நு கோ², ப⁴ந்தே, ஜாதி, கஸ்ஸ ச பனாயம் ஜாதீதி. ‘நோ கல்லோ பஞ்ஹோ’தி ப⁴க³வா அவோசா’’தி ஏவமாதி³ம் ஸங்க³ண்ஹாதி. நனு சேத்த² ‘‘கதமம் நு கோ², ப⁴ந்தே, ஜராமரண’’ந்தி (ஸம். நி. 2.35) இத³ம் ஸுபுச்சி²தந்தி? கிஞ்சாபி ஸுபுச்சி²தம், யதா² பன ஸதஸஹஸ்ஸக்³க⁴னகே ஸுவண்ணதா²லகே வட்³டி⁴தஸ்ஸ ஸுபோ⁴ஜனஸ்ஸ மத்த²கே ஆமலகமத்தே கூ³த²பிண்டே³ ட²பிதே ஸப்³ப³ம் போ⁴ஜனம் து³ப்³போ⁴ஜனம் ஹோதி ச²ட்³டே³தப்³ப³ம், ஏவமேவ ‘‘கஸ்ஸ ச பனித³ம் ஜராமரண’’ந்தி இமினா ஸத்தூபலத்³தி⁴வாத³பதே³ன கூ³த²பிண்டே³ன தம் போ⁴ஜனம் து³ப்³போ⁴ஜனம் விய அயம்பி ஸப்³போ³ து³ப்பஞ்ஹோ ஜாதோதி.

ஸோளஸ கங்கா²தி ‘‘அஹோஸிம் நு கோ² அஹம் அதீதமத்³தா⁴னம், ந நு கோ² அஹோஸிம், கிம் நு கோ² அஹோஸிம், கத²ம் நு கோ² அஹோஸிம், கிம் ஹுத்வா கிம் அஹோஸிம் நு கோ² அஹம் அதீதமத்³தா⁴னம், ப⁴விஸ்ஸாமி நு கோ² அஹம் அனாக³தமத்³தா⁴னம், ந நு கோ² ப⁴விஸ்ஸாமி, கிம் நு கோ² ப⁴விஸ்ஸாமி, கத²ம் நு கோ² ப⁴விஸ்ஸாமி, கிம் ஹுத்வா கிம் ப⁴விஸ்ஸாமி நு கோ² அஹம் அனாக³தமத்³தா⁴னம், அஹம் நு கோ²ஸ்மி, நோ நு கோ²ஸ்மி, கிம் நு கோ²ஸ்மி, கத²ம் நு கோ²ஸ்மி, அயம் நு கோ² ஸத்தோ குதோ ஆக³தோ, ஸோ குஹிம் கா³மீ ப⁴விஸ்ஸதீ’’தி (ஸம். நி. 2.20; ம. நி. 1.18) ஏவமாக³தா அதீதானாக³தபச்சுப்பன்னவிஸயா ஸோளஸவிதா⁴ கங்கா².

தத்த² (ம. நி. அட்ட². 1.18; ஸம். நி. அட்ட². 2.2.20) அஹோஸிம் நு கோ², ந நு கோ²தி ஸஸ்ஸதாகாரஞ்ச அதி⁴ச்சஸமுப்பத்திஆகாரஞ்ச நிஸ்ஸாய அதீதே அத்தனோ விஜ்ஜமானதஞ்ச அவிஜ்ஜமானதஞ்ச கங்க²தி, கிம் காரணந்தி ந வத்தப்³ப³ம். உம்மத்தகோ விய ஹி பா³லபுது²ஜ்ஜனோ யதா² ததா² வா பவத்ததி. அபிச அயோனிஸோமனஸிகாரோயேவேத்த² காரணம். ஏவம் அயோனிஸோமனஸிகாரஸ்ஸ பன கிம் காரணந்தி? ஸ்வேவ புது²ஜ்ஜனபா⁴வோ அரியானம் அத³ஸ்ஸனாதீ³னி வா. நனு ச புது²ஜ்ஜனோபி யோனிஸோ மனஸி கரோதீதி. கோ வா ஏவமாஹ ‘‘ந மனஸி கரோதீ’’தி. ந பன தத்த² புது²ஜ்ஜனபா⁴வோ காரணம், ஸத்³த⁴ம்மஸவனகல்யாணமித்தாதீ³னி தத்த² காரணானி. ந ஹி மச்ச²மம்ஸாதீ³னி அத்தனோ பகதியா ஸுக³ந்தா⁴னி, அபி⁴ஸங்கா²ரபச்சயா பன ஸுக³ந்தா⁴னிபி ஹோந்தி.

கிம் நு கோ² அஹோஸிந்தி ஜாதிலிங்கு³பபத்தியோ நிஸ்ஸாய ‘‘க²த்தியோ நு கோ² அஹோஸிம், ப்³ராஹ்மணவேஸ்ஸஸுத்³த³க³ஹட்ட²பப்³ப³ஜிததே³வமனுஸ்ஸானம் அஞ்ஞதரோ’’தி கங்க²தி.

கத²ம் நு கோ²தி ஸண்டா²னாகாரம் நிஸ்ஸாய ‘‘தீ³கோ⁴ நு கோ² அஹோஸிம், ரஸ்ஸஓதா³தகண்ஹப்பமாணிகஅப்பமாணிகாதீ³னம் அஞ்ஞதரோ’’தி கங்க²தி. கேசி பன ‘‘இஸ்ஸரனிம்மானாதி³ம் நிஸ்ஸாய ‘கேன நு கோ² காரணேன அஹோஸி’ந்தி ஹேதுதோ கங்க²தீ’’தி வத³ந்தி.

கிம் ஹுத்வா கிம் அஹோஸிந்தி ஜாதிஆதீ³னி நிஸ்ஸாய ‘‘க²த்தியோ ஹுத்வா நு கோ² ப்³ராஹ்மணோ அஹோஸிம்…பே… தே³வோ ஹுத்வா மனுஸ்ஸோ’’தி அத்தனோ பரம்பரம் கங்க²தி. ஸப்³ப³த்தே²வ பன அத்³தா⁴னந்தி காலாதி⁴வசனமேதம், தஞ்ச பு⁴ம்மத்தே² உபயோக³வசனம் த³ட்ட²ப்³ப³ம்.

ப⁴விஸ்ஸாமி நு கோ², ந நு கோ²தி ஸஸ்ஸதாகாரஞ்ச உச்சே²தா³காரஞ்ச நிஸ்ஸாய அனாக³தே அத்தனோ விஜ்ஜமானதஞ்ச அவிஜ்ஜமானதஞ்ச கங்க²தி. ஸேஸமேத்த² வுத்தனயமேவ.

அஹம் நு கோ²ஸ்மீதி அத்தனோ அத்தி²பா⁴வம் கங்க²தி. யுத்தம் பனேதந்தி? யுத்தம் அயுத்தந்தி கா ஏத்த² சிந்தா. அபிசேத்த² இத³ம் வத்து²ம்பி உதா³ஹரந்தி, சூளமாதாய கிர புத்தோ முண்டோ³, மஹாமாதாய புத்தோ அமுண்டோ³. தம் ஸுத்தம் முண்டே³ஸும். ஸோ உட்டா²ய ‘‘அஹம் நு கோ² சூளமாதாய புத்தோ’’தி சிந்தேஸி. ஏவம் ‘‘அஹம் நு கோ²ஸ்மீ’’தி கங்கா² ஹோதி.

நோ நு கோ²ஸ்மீதி அத்தனோ நத்தி²பா⁴வம் கங்க²தி. தத்ராபி இத³ம் வத்து² – ஏகோ கிர மச்சே² க³ண்ஹந்தோ உத³கே சிரட்டா²னேன ஸீதிபூ⁴தம் அத்தனோ ஊரும் ‘‘மச்சோ²’’தி சிந்தேத்வா பஹரி. அபரோ ஸுஸானபஸ்ஸே கே²த்தம் ரக்க²ந்தோ பீ⁴தோ ஸங்குடிதோ ஸயி. ஸோ படிபு³ஜ்ஜி²த்வா அத்தனோ ஜண்ணுகானி ‘‘த்³வே யக்கா²’’தி சிந்தேத்வா பஹரி, ஏவம் ‘‘நோ நு கோ²ஸ்மீ’’தி கங்க²தி.

கிம் நு கோ²ஸ்மீதி க²த்தியோவ ஸமானோ அத்தனோ க²த்தியபா⁴வம் கங்க²தி கண்ணோ விய ஸூதபுத்தஸஞ்ஞீ. ஏஸ நயோ ஸேஸேஸு. தே³வோ பன ஸமானோ தே³வபா⁴வம் அஜானந்தோ நாம நத்தி². ஸோபி பன ‘‘அஹம் ரூபீ நு கோ² அரூபீ நு கோ²’’திஆதி³னா நயேன கங்க²தி. க²த்தியாத³யோ கஸ்மா ந ஜானந்தீதி சே? அப்பச்சக்கா² தேஸம் தத்த² தத்த² குலே உப்பத்தி. க³ஹட்டா²பி ச பாதலிகாத³யோ பப்³ப³ஜிதஸஞ்ஞினோ. பப்³ப³ஜிதாபி ‘‘குப்பம் நு கோ² மே கம்ம’’ந்திஆதி³னா நயேன க³ஹட்ட²ஸஞ்ஞினோ. மனுஸ்ஸாபி ச ஏகச்சே ராஜானோ விய அத்தனி தே³வஸஞ்ஞினோ ஹோந்தி.

கத²ம் நு கோ²ஸ்மீதி வுத்தனயமேவ. கேவலஞ்ஹேத்த² அப்³ப⁴ந்தரே ஜீவோ நாம அத்தீ²தி க³ஹேத்வா தஸ்ஸ ஸண்டா²னாகாரம் நிஸ்ஸாய ‘‘தீ³கோ⁴ நு கோ²ஸ்மி, ரஸ்ஸசதுரஸ்ஸச²ளம்ஸஅட்ட²ம்ஸஸோளஸம்ஸாதீ³னம் அஞ்ஞதரப்பகாரோ’’தி கங்க²ந்தோ ‘‘கத²ம் நு கோ²ஸ்மீ’’தி கங்க²தீதி வேதி³தப்³போ³. ஸரீரஸண்டா²னம் பன பச்சுப்பன்னம் அஜானந்தோ நாம நத்தி².

குதோ ஆக³தோ, ஸோ குஹிம் கா³மீ ப⁴விஸ்ஸதீதி அத்தபா⁴வஸ்ஸ ஆக³திக³திட்டா²னம் கங்க²தி.

வபயந்தீதி விஅபயந்தி, இகாரலோபேனாயம் நித்³தே³ஸோ. ப்³யபயந்தீதி வுத்தம் ஹோதி. தேனாஹ ‘‘வபயந்தி அபக³ச்ச²ந்தீ’’தி. அபக³மனஞ்ச அனுப்பத்தினிரோத⁴வஸேனாதி ஆஹ ‘‘நிருஜ்ஜ²ந்தீ’’தி.

3. கதா³ பனஸ்ஸ போ³தி⁴பக்கி²யத⁴ம்மா சதுஸச்சத⁴ம்மா வா பாதுப⁴வந்தி உப்பஜ்ஜந்தி பகாஸந்தீதி? விபஸ்ஸனாமக்³க³ஞாணேஸு பவத்தமானேஸு. தத்த² விபஸ்ஸனாஞாணே தாவ விபஸ்ஸனாஞாணஸம்பயுத்தா ஸதிஆத³யோ விபஸ்ஸனாஞாணஞ்ச யதா²ரஹம் அத்தனோ அத்தனோ விஸயேஸு தத³ங்க³ப்பஹானவஸேன ஸுப⁴ஸஞ்ஞாதி³கே பஜஹந்தா காயானுபஸ்ஸனாதி³வஸேன விஸும் விஸும் உப்பஜ்ஜந்தி. மக்³க³க்க²ணே பன தே நிப்³பா³னமாலம்பி³த்வா ஸமுச்சே²த³வஸேன படிபக்கே² பஜஹந்தா சதூஸுபி அரியஸச்சேஸு அஸம்மோஹபடிவேத⁴ஸாத⁴னவஸேன ஸகிதே³வ உப்பஜ்ஜந்தி. ஏவம் தாவேத்த² போ³தி⁴பக்கி²யத⁴ம்மானம் உப்பஜ்ஜனட்டே²ன பாதுபா⁴வோ வேதி³தப்³போ³. அரியஸச்சத⁴ம்மானம் பன லோகியானம் விபஸ்ஸனாக்க²ணே விபஸ்ஸனாய ஆரம்மணகரணவஸேன லோகுத்தரானம் தத³தி⁴முத்ததாவஸேன மக்³க³க்க²ணே நிரோத⁴ஸச்சஸ்ஸ ஆரம்மணாபி⁴ஸமயவஸேன ஸப்³பே³ஸம்பி கிச்சாபி⁴ஸமயவஸேன பாகடபா⁴வதோ பகாஸனட்டே²ன பாதுபா⁴வோ வேதி³தப்³போ³.

இதி ப⁴க³வா ஸதிபி ஸப்³பா³காரேன ஸப்³ப³த⁴ம்மானம் அத்தனோ ஞாணஸ்ஸ பாகடபா⁴வே படிச்சஸமுப்பாத³முகே²ன விபஸ்ஸனாபி⁴னிவேஸஸ்ஸ கதத்தா நிபுணக³ம்பீ⁴ரஸுது³த்³த³ஸதாய பச்சயாகாரஸ்ஸ தம் பச்சவேக்கி²த்வா உப்பன்னப³லவஸோமனஸ்ஸோ படிபக்க²ஸமுச்சே²த³விபா⁴வனேன ஸத்³தி⁴ம் அத்தனோ தத³பி⁴ஸமயானுபா⁴வதீ³பகமேவேத்த² உதா³னம் உதா³னேஸி.

‘‘காமா தே பட²மா ஸேனா’’திஆதி³னா நயேன வுத்தப்பகாரம் மாரஸேனந்தி –

‘‘காமா தே பட²மா ஸேனா, து³தியா அரதி வுச்சதி;

ததியா கு²ப்பிபாஸா தே, சதுத்தீ² தண்ஹா பவுச்சதி.

‘‘பஞ்சமீ தி²னமித்³த⁴ம் தே, ச²ட்டா² பீ⁴ரூ பவுச்சதி;

ஸத்தமீ விசிகிச்சா² தே, மக்கோ² த²ம்போ⁴ ச அட்ட²மா.

‘‘லாபோ⁴ ஸிலோகோ ஸக்காரோ, மிச்சா²லத்³தோ⁴ ச யோ யஸோ;

யோ சத்தானம் ஸமுக்கம்ஸே, பரே ச அவஜானதி.

‘‘ஏஸா நமுசி தே ஸேனா, கண்ஹஸ்ஸாபி⁴ப்பஹாரினீ;

ந நம் அஸூரோ ஜினாதி, ஜேத்வா ச லப⁴தே ஸுக²’’ந்தி. (ஸு. நி. 438-441; மஹானி. 28) –

இமினா நயேன வுத்தப்பகாரம் மாரஸேனம்.

தத்த² (ஸு. நி. அட்ட². 2.439-41; மஹானி. அட்ட². 28) யஸ்மா ஆதி³தோவ அகா³ரியபூ⁴தே ஸத்தே வத்து²காமேஸு கிலேஸகாமா மோஹயந்தி, தே அபி⁴பு⁴ய்ய அனகா³ரியபா⁴வம் உபக³தானம் பந்தேஸு வா ஸேனாஸனேஸு அஞ்ஞதரஞ்ஞதரேஸு வா அதி⁴குஸலேஸு த⁴ம்மேஸு அரதி உப்பஜ்ஜதி. வுத்தம்பி சேதம் ‘‘பப்³ப³ஜிதேன கோ², ஆவுஸோ, அபி⁴ரதி து³க்கரா’’தி (ஸம். நி. 4.331). ததோ தே பரபடிப³த்³த⁴ஜீவிகத்தா கு²ப்பிபாஸா பா³த⁴தி, தாய பா³தி⁴தானம் பரியேஸன தண்ஹா சித்தம் கிலமயதி, அத² நேஸம் கிலந்தசித்தானம் தி²னமித்³த⁴ம் ஓக்கமதி, ததோ விஸேஸமனதி⁴க³ச்ச²ந்தானம் து³ரபி⁴ஸம்ப⁴வேஸு அரஞ்ஞவனபத்தே²ஸு ஸேனாஸனேஸு விஹரதம் உத்ராஸஸஞ்ஞிதா பீ⁴ரு ஜாயதி, தேஸம் உஸ்ஸங்கிதபரிஸங்கிதானம் தீ³க⁴ரத்தம் விவேகரஸமனஸ்ஸாத³யமானானம் விஹரதம் ‘‘ந ஸியா நு கோ² ஏஸ மக்³கோ³’’தி படிபத்தியம் விசிகிச்சா² உப்பஜ்ஜதி, தம் வினோதே³த்வா விஹரதம் அப்பமத்தகேன விஸேஸாதி⁴க³மேன மானமக்க²த²ம்பா⁴ ஜாயந்தி, தேபி வினோதே³த்வா விஹரதம் ததோ அதி⁴கதரம் விஸேஸாதி⁴க³மம் நிஸ்ஸாய லாப⁴ஸக்காரஸிலோகா உப்பஜ்ஜந்தி, லாபா⁴தி³முச்சி²தா த⁴ம்மபதிரூபகானி பகாஸேந்தா மிச்சா²யஸம் அதி⁴க³ந்த்வா தத்த² டி²தா ஜாதிஆதீ³ஹி அத்தானம் உக்கம்ஸேந்தி பரம் வம்பே⁴ந்தி, தஸ்மா காமாதீ³னம் பட²மஸேனாதி³பா⁴வோ வேதி³தப்³போ³.

ஏவமேதம் த³ஸவித⁴ம் ஸேனம் உத்³தி³ஸித்வா யஸ்மா ஸா கண்ஹத⁴ம்மஸமன்னாக³தத்தா கண்ஹஸ்ஸ நமுசினோ உபகாராய ஸம்வத்ததி, தஸ்மா நம் ‘‘தவ ஸேனா’’தி நித்³தி³ஸந்தேன ‘‘ஏஸா நமுசி தே ஸேனா, கண்ஹஸ்ஸாபி⁴ப்பஹாரினீ’’தி வுத்தம். தத்த² அபி⁴ப்பஹாரினீதி ஸமணப்³ராஹ்மணானம் கா⁴தனீ நிப்போத²னீ, அந்தராயகரீதி அத்தோ². ந நம் அஸூரோ ஜினாதி, ஜேத்வா ச லப⁴தே ஸுக²ந்தி ஏவம் தவ ஸேனம் அஸூரோ காயே ச ஜீவிதே ச ஸாபேக்கோ² புரிஸோ ந ஜினாதி, ஸூரோ பன ஜினாதி, ஜேத்வா ச மக்³க³ஸுக²ம் ப²லஸுக²ஞ்ச அதி⁴க³ச்ச²தீதி அத்தோ². ஸோபி ப்³ராஹ்மணோதி ஸோபி கீ²ணாஸவப்³ராஹ்மணோ.

இதா³னி ‘‘தேன கோ² பன ஸமயேன ப⁴க³வா ஸத்தாஹம் ஏகபல்லங்கேன நிஸின்னோ ஹோதி விமுத்திஸுக²படிஸம்வேதீ³. அத² கோ² ப⁴க³வா தஸ்ஸ ஸத்தாஹஸ்ஸ அச்சயேன தம்ஹா ஸமாதி⁴ம்ஹா வுட்ட²ஹித்வா ரத்தியா பட²மம் யாமம் படிச்சஸமுப்பாத³ம் அனுலோமம் ஸாது⁴கம் மனஸாகாஸி. ரத்தியா மஜ்ஜி²மம் யாமம் படிச்சஸமுப்பாத³ம் படிலோமம் ஸாது⁴கம் மனஸாகாஸி. ரத்தியா பச்சி²மம் யாமம் படிச்சஸமுப்பாத³ம் அனுலோமபடிலோமம் ஸாது⁴கம் மனஸாகாஸீ’’தி ஏவம் வுத்தாய உதா³னபாளியா (உதா³. 1) இமிஸ்ஸா ச க²ந்த⁴கபாளியா அவிரோத⁴ம் த³ஸ்ஸேதும் ‘‘உதா³னே பனா’’திஆதி³ ஆரத்³த⁴ம். ஏத்த² தஸ்ஸ வஸேனாதி தஸ்ஸ பச்சயாகாரபஜானனஸ்ஸ பச்சயக்க²யாதி⁴க³மஸ்ஸ ச வஸேன. ஏகேகமேவ கோட்டா²ஸந்தி அனுலோமபடிலோமேஸு ஏகேகமேவ கோட்டா²ஸம். பாடிபத³ரத்தியா ஏவம் மனஸாகாஸீதி ரத்தியா தீஸுபி யாமேஸு அனுலோமபடிலோமம்யேவ மனஸாகாஸி. ப⁴க³வா கிர ட²பேத்வா ரதனக⁴ரஸத்தாஹம் ஸேஸேஸு ச²ஸு ஸத்தாஹேஸு அந்தரந்தரா த⁴ம்மம் பச்சவேக்கி²த்வா யேபு⁴ய்யேன விமுத்திஸுக²படிஸம்வேதீ³ விஹாஸி, ரதனக⁴ரஸத்தாஹே பன அபி⁴த⁴ம்மபவிசயவஸேனேவ விஹாஸி. தஸ்மா அந்தரந்தரா த⁴ம்மபச்சவேக்க²ணவஸேன உப்பாதி³தமனஸிகாரேஸு பாடிபத³ரத்தியா உப்பாதி³தம் மனஸிகாரம் ஸந்தா⁴ய இமிஸ்ஸம் க²ந்த⁴கபாளியம் ஏவம் வுத்தந்தி அதி⁴ப்பாயோ.

போ³தி⁴கதா²வண்ணனா நிட்டி²தா.

அஜபாலகதா²வண்ணனா

4. தஸ்ஸ ஸத்தாஹஸ்ஸ அச்சயேனாதி பல்லங்கஸத்தாஹஸ்ஸ அபக³மனேன. தம்ஹா ஸமாதி⁴ம்ஹா வுட்ட²ஹித்வாதி ததோ அரஹத்தப²லஸமாபத்திஸமாதி⁴தோ யதா²காலபரிச்சே²த³ம் வுட்ட²ஹித்வா. அஞ்ஞேபி பு³த்³த⁴த்தகராதி விஸாக²புண்ணமிதோ பட்டா²ய ரத்திந்தி³வம் ஏவம் நிச்சஸமாஹிதபா⁴வஹேதுபூ⁴தானம் பு³த்³த⁴கு³ணானம் உபரி அஞ்ஞேபி பு³த்³த⁴த்தஸாத⁴கா. ‘‘அயம் பு³த்³தோ⁴’’தி பு³த்³த⁴பா⁴வஸ்ஸ பரேஸம் விபா⁴வனா த⁴ம்மா கிம் நு கோ² ஸந்தீதி யோஜனா. ஏகச்சானம் தே³வதானந்தி யா அதி⁴க³தமக்³கா³ ஸச்சி²கதனிரோதா⁴ ஏகபதே³ஸேன பு³த்³த⁴கு³ணே ஜானந்தி, தா ட²பேத்வா தத³ஞ்ஞாஸம் தே³வதானம். அனிமிஸேஹீதி த⁴ம்மபீதிவிப்பா²ரவஸேன பஸாத³விபா⁴வனிச்சலத³லதாய நிமேஸரஹிதேஹி. ரதனசங்கமேதி தே³வதாஹி மாபிதே ரதனமயசங்கமே. ‘‘ரதனபூ⁴தானம் ஸத்தன்னம் பகரணானம் தத்த² ச அனுத்தரஸ்ஸ த⁴ம்மரதனஸ்ஸ ஸம்மஸனேன தம் டா²னம் ரதனக⁴ரசேதியம் நாம ஜாத’’ந்திபி வத³ந்தி. தேனேவ அட்ட²ஸாலினியம் (த⁴. ஸ. அட்ட². நிதா³னகதா²) ‘‘ரதனக⁴ரம் நாம ந ரதனமயம் கே³ஹம், ஸத்தன்னம் பன பகரணானம் ஸம்மஸிதட்டா²னம் ரதனக⁴ரந்தி வேதி³தப்³ப³’’ந்தி வுத்தம்.

கஸ்மா பனாயம் அஜபாலனிக்³ரோதோ⁴ நாம ஜாதோதி ஆஹ ‘‘தஸ்ஸ கிரா’’திஆதி³. கேசி பன ‘‘யஸ்மா தத்த² வேதே³ ஸஜ்ஜா²யிதும் அஸமத்தா² மஹல்லகப்³ராஹ்மணா பாகாரபரிக்கே²பயுத்தானி நிவேஸனானி கத்வா ஸப்³பே³ வஸிம்ஸு, தஸ்மாஸ்ஸ ‘அஜபாலனிக்³ரோதோ⁴’தி நாமம் ஜாத’’ந்தி வத³ந்தி. தத்ராயம் வசனத்தோ² – ந ஜபந்தீதி அஜபா, மந்தானம் அனஜ்ஜா²யகாதி அத்தோ². அஜபா லந்தி ஆதி³யந்தி நிவாஸம் ஏத்தா²தி அஜபாலோதி. அபரே பன வத³ந்தி ‘‘யஸ்மா மஜ்ஜ²ன்ஹிகே ஸமயே அந்தோ பவிட்டே² அஜே அத்தனோ சா²யாய பாலேதி ரக்க²தி, தஸ்மா ‘அஜபாலோ’திஸ்ஸ நாமம் ருள்ஹ’’ந்தி. ஸப்³ப³தா²பி நாமமேதம் தஸ்ஸ ருக்க²ஸ்ஸ.

விமுத்திஸுக²ம் படிஸம்வேதே³ந்தோதி த⁴ம்மம் விசினந்தோயேவ அந்தரந்தரா விமுத்திஸுக²ஞ்ச படிஸம்வேதே³ந்தோ. ‘‘த⁴ம்மம் விசினந்தோ விமுத்திஸுக²ஞ்ச படிஸம்வேதே³ந்தோ’’தி ஏவம் வா ஏத்த² பாடோ² க³ஹேதப்³போ³. உதா³னட்ட²கதா²யம்பி (உதா³. அட்ட². 4) ஹி அயமேவ பாடோ². த⁴ம்மம் விசினந்தோ சேத்த² ஏவம் அபி⁴த⁴ம்மே நயமக்³க³ம் ஸம்மஸி பட²மம் த⁴ம்மஸங்க³ணீபகரணம் நாம, ததோ விப⁴ங்க³ப்பகரணம், தா⁴துகதா²பகரணம், புக்³க³லபஞ்ஞத்திப்பகரணம், கதா²வத்து²ம் நாம, யமகம் நாம, ததோ மஹாபகரணம் பட்டா²னம் நாமாதி. தத்த²ஸ்ஸ ஸண்ஹஸுகு²மட்டா²னம்ஹி சித்தே ஓதிண்ணே பீதி உப்பஜ்ஜி, பீதியா உப்பன்னாய லோஹிதம் பஸீதி³, லோஹிதே பஸன்னே ச²வி பஸீதி³, ச²வியா பஸன்னாய புரத்தி²மகாயதோ கூடாகா³ராதி³ப்பமாணா ரஸ்மியோ உட்ட²ஹித்வா ஆகாஸே பக்க²ந்த³ம் ச²த்³த³ந்தனாக³குலம் விய பாசீனதி³ஸாய அனந்தானி சக்கவாளானி பக்க²ந்தா³. பச்சி²மகாயதோ உட்ட²ஹித்வா பச்சி²மதி³ஸாய, த³க்கி²ணம்ஸகூடதோ உட்ட²ஹித்வா த³க்கி²ணதி³ஸாய, வாமம்ஸகூடதோ உட்ட²ஹித்வா உத்தரதி³ஸாய அனந்தானி சக்கவாளானி பக்க²ந்தா³. பாத³தலேஹி பவாளங்குரவண்ணா ரஸ்மியோ நிக்க²மித்வா மஹாபத²விம் வினிப்³பி³ஜ்ஜ² உத³கம் த்³விதா⁴ பி⁴ந்தி³த்வா வாதக்க²ந்த⁴ம் பதா³லேத்வா அஜடாகாஸம் பக்க²ந்தா³. ஸீஸதோ ஸம்பரிவத்தியமானம் மணிதா³மம் விய நீலவண்ணரஸ்மிவட்டி உட்ட²ஹித்வா ச² தே³வலோகே வினிவிஜ்ஜி²த்வா நவ ப்³ரஹ்மலோகே அதிக்கம்ம அஜடாகாஸம் பக்க²ந்தா³. தஸ்மிம் தி³வஸே அபரிமாணேஸு சக்கவாளேஸு அபரிமாணா ஸத்தா ஸப்³பே³ ஸுவண்ணவண்ணாவ அஹேஸும். தம் தி³வஸஞ்ச பன ப⁴க³வதோ ஸரீரா நிக்க²ந்தா யாவஜ்ஜதி³வஸாபி கிர தா ரஸ்மியோ அனந்தலோகதா⁴துயோ க³ச்ச²ந்தியேவ. ந கேவலஞ்ச இமஸ்மிம்யேவ ஸத்தாஹே த⁴ம்மம் விசினந்தஸ்ஸ ஸரீரதோ ரஸ்மியோ நிக்க²மிம்ஸு, அத² கோ² ரதனக⁴ரஸத்தாஹேபி பட்டா²னம் ஸம்மஸந்தஸ்ஸ ஏவமேவ ஸரீரதோ ரஸ்மியோ நிக்க²ந்தா ஏவாதி வேதி³தப்³ப³ம்.

வுத்தஞ்ஹேதம் அட்ட²ஸாலினியம் (த⁴. ஸ. அட்ட². நிதா³னகதா²) –

‘‘இமேஸு ச ஏகவீஸதியா தி³வஸேஸு ஏகதி³வஸேபி ஸத்து² ஸரீரதோ ரஸ்மியோ ந நிக்க²ந்தா, சதுத்தே² பன ஸத்தாஹே பச்சி²முத்தராய தி³ஸாய ரதனக⁴ரே நிஸீதி³. தத்த² த⁴ம்மஸங்க³ணிம் ஸம்மஸந்தஸ்ஸபி ஸரீரதோ ரஸ்மியோ ந நிக்க²ந்தா. விப⁴ங்க³ப்பகரணம், தா⁴துகத²ம், புக்³க³லபஞ்ஞத்திம், கதா²வத்து²ப்பகரணம், யமகப்பகரணம் ஸம்மஸந்தஸ்ஸபி ரஸ்மியோ ந நிக்க²ந்தா. யதா³ பன மஹாபகரணம் ஓருய்ஹ ‘ஹேதுபச்சயோ ஆரம்மணபச்சயோ…பே… அவிக³தபச்சயோ’தி ஸம்மஸனம் ஆரபி⁴, அத²ஸ்ஸ சதுவீஸதிஸமந்தபட்டா²னம் ஸம்மஸந்தஸ்ஸ ஏகந்ததோ ஸப்³ப³ஞ்ஞுதஞ்ஞாணம் மஹாபகரணே ஓகாஸம் லபி⁴. யதா² ஹி திமிரபிங்க³லமஹாமச்சோ² சதுராஸீதியோஜனஸஹஸ்ஸக³ம்பீ⁴ரே மஹாஸமுத்³தே³யேவ ஓகாஸம் லப⁴தி, ஏவமேவ ஸப்³ப³ஞ்ஞுதஞ்ஞாணம் ஏகந்ததோ மஹாபகரணேயேவ ஓகாஸம் லபி⁴.

‘‘ஸத்து² ஏவம் லத்³தோ⁴காஸேன ஸப்³ப³ஞ்ஞுதஞ்ஞாணேன யதா²ஸுக²ம் ஸண்ஹஸுகு²மத⁴ம்மம் ஸம்மஸந்தஸ்ஸ ஸரீரதோ நீலபீதலோஹிதோதா³தமஞ்ஜிட்ட²பப⁴ஸ்ஸரவஸேன ச²ப்³ப³ண்ணரஸ்மியோ நிக்க²மிம்ஸு. கேஸமஸ்ஸூஹி சேவ அக்கீ²னஞ்ச நீலட்டா²னேஹி நீலரஸ்மியோ நிக்க²மிம்ஸு, யாஸம் வஸேன க³க³னதலம் அஞ்ஜனசுண்ணஸமோகிண்ணம் விய உமாபுப்ப²னீலுப்பலத³லஸஞ்ச²ன்னம் விய வீதிபதந்தமணிதாலவண்டம் விய ஸம்பஸாரிதமேசகபடம் விய ச அஹோஸி. ச²விதோ சேவ அக்கீ²னஞ்ச பீதட்டா²னேஹி பீதரஸ்மியோ நிக்க²மிம்ஸு, யாஸம் வஸேன தி³ஸாபா⁴கா³ ஸுவண்ணரஸனிஸிஞ்சமானா விய ஸுவண்ணபடபஸாரிதா விய குங்குமசுண்ணகணிகாரபுப்ப²ஸம்பரிகிண்ணா விய ச விரோசிம்ஸு. மம்ஸலோஹிதேஹி சேவ அக்கீ²னஞ்ச ரத்தட்டா²னேஹி லோஹிதரஸ்மியோ நிக்க²மிம்ஸு, யாஸம் வஸேன தி³ஸாபா⁴கா³ சீனபிட்ட²சுண்ணரஞ்ஜிதா விய ஸுபக்கலாகா²ரஸனிஸிஞ்சமானா விய ரத்தகம்ப³லபரிக்கி²த்தா விய ஜயஸுமனபாரிப³த்³த⁴கப³ந்து⁴ஜீவககுஸுமஸம்பரிகிண்ணா விய ச விரோசிம்ஸு. அட்டீ²ஹி சேவ த³ந்தேஹி ச அக்கீ²னஞ்ச ஸேதட்டா²னேஹி ஓதா³தரஸ்மியோ நிக்க²மிம்ஸு, யாஸம் வஸேன தி³ஸாபா⁴கா³ ரஜதகுடேஹி ஆஸிஞ்சமானகீ²ரதா⁴ராஸம்பரிகிண்ணா விய பஸாரிதரஜதபடவிதானா விய வீதிபதந்தரஜததாலவண்டா விய குந்த³குமுத³ஸிந்து⁴வாரஸுமனமல்லிகாதி³குஸுமஸஞ்ச²ன்னா விய ச விரோசிம்ஸு. மஞ்ஜிட்ட²பப⁴ஸ்ஸரா பன தம்ஹா தம்ஹா ஸரீரப்பதே³ஸா நிக்க²மிம்ஸு. இதி தா ச²ப்³ப³ண்ணரஸ்மியோ நிக்க²மித்வா க⁴னமஹாபத²விம் க³ண்ஹிம்ஸு.

‘‘சதுனஹுதாதி⁴கத்³வியோஜனஸதஸஹஸ்ஸப³ஹலா மஹாபத²வீ நித்³த⁴ந்தஸுவண்ணபிண்டி³ விய அஹோஸி. பத²விம் பி⁴ந்தி³த்வா ஹேட்டா² உத³கம் க³ண்ஹிம்ஸு. பத²வீஸந்தா⁴ரகம் அட்ட²னஹுதாதி⁴கசதுயோஜனஸதஸஹஸ்ஸப³ஹலம் உத³கம் ஸுவண்ணகலஸேஹி ஆஸிஞ்சமானவிலீனஸுவண்ணம் விய அஹோஸி. உத³கம் வினிவிஜ்ஜி²த்வா வாதம் அக்³க³ஹேஸும். ச²ன்னவுதாதி⁴கனவயோஜனஸதஸஹஸ்ஸப³ஹலோ வாதோ ஸமுஸ்ஸிதஸுவண்ணக்க²ந்தோ⁴ விய அஹோஸி. வாதம் வினிவிஜ்ஜி²த்வா ஹேட்டா² அஜடாகாஸம் பக்க²ந்தி³ம்ஸு. உபரிபா⁴கே³ன உக்³க³ந்த்வாபி சதுமஹாராஜிகே க³ண்ஹிம்ஸு. தே வினிவிஜ்ஜி²த்வா தாவதிம்ஸே, ததோ யாமே, ததோ துஸிதே, ததோ நிம்மானரதீ, ததோ பரனிம்மிதவஸவத்தீ, ததோ நவ ப்³ரஹ்மலோகே, ததோ வேஹப்ப²லே, ததோ பஞ்ச ஸுத்³தா⁴வாஸே வினிவிஜ்ஜி²த்வா சத்தாரோ ஆருப்பே க³ண்ஹிம்ஸு. சத்தாரோ ச ஆருப்பே வினிவிஜ்ஜி²த்வா அஜடாகாஸம் பக்க²ந்தி³ம்ஸு.

‘‘திரியபா⁴கே³ஹி அனந்தா லோகதா⁴துயோ பக்க²ந்தி³ம்ஸு, ஏத்தகே டா²னே சந்த³ம்ஹி சந்த³ப்பபா⁴ நத்தி², ஸூரியே ஸூரியப்பபா⁴ நத்தி², தாரகரூபேஸு தாரகரூபப்பபா⁴ நத்தி², தே³வதானம் உய்யானவிமானகப்பருக்கே²ஸு ஸரீரே ஆப⁴ரணேஸூதி ஸப்³ப³த்த² பபா⁴ நத்தி². திஸஹஸ்ஸிமஹாஸஹஸ்ஸிலோகதா⁴துயா ஆலோகப²ரணஸமத்தோ² மஹாப்³ரஹ்மாபி ஸூரியுக்³க³மனே க²ஜ்ஜோபனகோ விய அஹோஸி, சந்த³ஸூரியதாரகரூபதே³வதுய்யானவிமானகப்பருக்கா²னம் பரிச்சே²த³மத்தகமேவ பஞ்ஞாயித்த². ஏத்தகம் டா²னம் பு³த்³த⁴ரஸ்மீஹியேவ அஜ்ஜோ²த்த²டம் அஹோஸி. அயஞ்ச நேவ பு³த்³தா⁴னம் அதி⁴ட்டா²னித்³தி⁴, ந பா⁴வனாமயித்³தி⁴. ஸண்ஹஸுகு²மத⁴ம்மம் பன ஸம்மஸதோ லோகனாத²ஸ்ஸ லோஹிதம் பஸீதி³, வத்து²ரூபம் பஸீதி³, ச²விவண்ணோ பஸீதி³. சித்தஸமுட்டா²னா வண்ணதா⁴து ஸமந்தா அஸீதிஹத்த²மத்தே பதே³ஸே நிச்சலா அட்டா²ஸீ’’தி.

ஏவம் நிஸின்னேதி தம்ஹா ஸமாதி⁴ம்ஹா வுட்ட²ஹித்வா நிஸின்னே. ஏகோ ப்³ராஹ்மணோதி நாமகோ³த்தவஸேன அனபி⁴ஞ்ஞாதோ அபாகடோ ஏகோ ப்³ராஹ்மணோ. ‘‘ஹும் ஹு’’ந்தி கரோந்தோ விசரதீதி ஸப்³ப³ம் அசோக்க²ஜாதிகம் பஸ்ஸித்வா ஜிகு³ச்ச²ந்தோ ‘‘ஹும் ஹு’’ந்தி கரோந்தோ விசரதி. ஏதத³வோசாதி (உதா³. அட்ட². 4) ஏதம் இதா³னி வத்தப்³ப³ம் ‘‘கித்தாவதா நு கோ²’’திஆதி³வசனம் அவோச. தத்த² கித்தாவதாதி கித்தகேன பமாணேன. நு-தி ஸம்ஸயத்தே² நிபாதோ, கோ²-தி பத³பூரணே. போ⁴-தி ப்³ராஹ்மணானம் ஜாதிஸமுதா³க³தம் ஆலபனம். ததா² ஹி வுத்தம் ‘‘போ⁴வாதி³ நாம ஸோ ஹோதி, ஸசே ஹோதி ஸகிஞ்சனோ’’தி (த⁴. ப. 396; ஸு. நி. 625). கோ³தமாதி ப⁴க³வந்தம் கோ³த்தேன ஆலபதி. கத²ம் பனாயம் ப்³ராஹ்மணோ ஸம்பதி ஸமாக³தோ ப⁴க³வதோ கோ³த்தம் ஜானாதீதி? நாயம் ஸம்பதி ஸமாக³தோ, ச²ப்³ப³ஸ்ஸானி பதா⁴னகரணகாலே உபட்ட²ஹந்தேஹி பஞ்சவக்³கி³யேஹி ஸத்³தி⁴ம் சரமானோ அபரபா⁴கே³ தம் வதம் ச²ட்³டே³த்வா உருவேலாயம் ஸேனனிக³மே ஏகோ அது³தியோ ஹுத்வா பிண்டா³ய சரமானோபி தேன ப்³ராஹ்மணேன தி³ட்ட²புப்³போ³ சேவ ஸல்லபிதபுப்³போ³ ச, தேன ஸோ புப்³பே³ பஞ்சவக்³கி³யேஹி க³ய்ஹமானம் ப⁴க³வதோ கோ³த்தம் அனுஸ்ஸரந்தோ ‘‘போ⁴ கோ³தமா’’தி ப⁴க³வந்தம் கோ³த்தேன ஆலபதி. யதோ பட்டா²ய வா ப⁴க³வா மஹாபி⁴னிக்க²மனம் நிக்க²ந்தோ அனோமானதீ³தீரே பப்³ப³ஜி, ததோ பபு⁴தி ‘‘ஸமணோ கோ³தமோ’’தி சந்தோ³ விய ஸூரியோ விய பாகடோ பஞ்ஞாதோ ஹோதி, ந ச தஸ்ஸ கோ³த்தஜானனே காரணம் க³வேஸிதப்³ப³ம். ப்³ராஹ்மணகரணாதி ப்³ராஹ்மணம் கரோந்தீதி ப்³ராஹ்மணகரணா, ப்³ராஹ்மணபா⁴வகராதி அத்தோ². ஏத்த² ச ‘‘கித்தாவதா’’தி ஏதேன யேஹி த⁴ம்மேஹி ப்³ராஹ்மணோ ஹோதி, தேஸம் த⁴ம்மானம் பரிமாணம் புச்ச²தி. ‘‘கதமே’’தி பன இமினா தேஸம் ஸரூபம் புச்ச²தி.

உதா³னம் உதா³னேஸீதி ‘‘யோ ப்³ராஹ்மணோ’’திஆதி³கம் உதா³னம் உதா³னேஸி, ந பன தஸ்ஸ ப்³ராஹ்மணஸ்ஸ த⁴ம்மம் தே³ஸேஸி. கஸ்மா? த⁴ம்மதே³ஸனாய அபா⁴ஜனபா⁴வதோ. ததா² ஹி தஸ்ஸ ப்³ராஹ்மணஸ்ஸ இமம் கா³த²ம் ஸுத்வா ந ஸச்சாபி⁴ஸமயோ அஹோஸி. யதா² ச இமஸ்ஸ, ஏவம் உபகஸ்ஸ ஆஜீவகஸ்ஸ பு³த்³த⁴கு³ணப்பகாஸனம் ஸுத்வா. த⁴ம்மசக்கப்பவத்தனதோ ஹி புப்³ப³பா⁴கே³ ப⁴க³வதா பா⁴ஸிதம் பரேஸம் ஸுணந்தானம்பி தபுஸ்ஸப⁴ல்லிகானம் ஸரணதா³னம் விய வாஸனாபா⁴கி³யமேவ ஜாதம், ந அஸேக்க²பா⁴கி³யம் வா நிப்³பே³த⁴பா⁴கி³யம் வா. ஏஸா ஹி த⁴ம்மதாதி. வேதே³ஹி வா அந்தந்தி ஏத்த² அந்தம் நாம ஸப்³ப³ஸங்கா²ரபரியோஸானம் நிப்³பா³னம். இமே உஸ்ஸதா³ நத்தீ²தி ஸப்³ப³ஸோ இமே பஹீனத்தா ந ஸந்தி.

அஜபாலகதா²வண்ணனா நிட்டி²தா.

முசலிந்த³கதா²வண்ணனா

5. முசலிந்த³மூலேதி (உதா³. அட்ட². 11) ஏத்த² முசலிந்தோ³ வுச்சதி நீபருக்கோ², யோ ‘‘நிசுலோ’’திபி வுச்சதி, தஸ்ஸ ஸமீபேதி அத்தோ². கேசி பன ‘‘முசலோதி தஸ்ஸ ருக்க²ஸ்ஸ நாமம், வனஜேட்ட²கதாய பன முசலிந்தோ³தி வுத்த’’ந்தி வத³ந்தி. உத³பாதீ³தி ஸகலசக்கவாளக³ப்³ப⁴ம் பூரேந்தோ மஹாமேகோ⁴ உத³பாதி³. ஏவரூபோ கிர மேகோ⁴ த்³வீஸுயேவ காலேஸு வஸ்ஸதி சக்கவத்திம்ஹி வா உப்பன்னே பு³த்³தே⁴ வா, இத⁴ பு³த்³து⁴ப்பாத³காலே உத³பாதி³. போக்க²ரணியா நிப்³ப³த்தோதி போக்க²ரணியா ஹேட்டா² நாக³ப⁴வனம் அத்தி², தத்த² நிப்³ப³த்தோ. ஸகப⁴வனாதி அத்தனோ நாக³ப⁴வனதோ. ஏவம் போ⁴கே³ஹி பரிக்கி²பித்வாதி ஸத்த வாரே அத்தனோ ஸரீரபோ⁴கே³ஹி ப⁴க³வதோ காயம் பரிவாரேத்வா. உபரிமுத்³த⁴னி மஹந்தம் ப²ணம் விஹச்சாதி ப⁴க³வதோ முத்³த⁴ப்பதே³ஸஸ்ஸ உபரி அத்தனோ மஹந்தம் ப²ணம் பஸாரேத்வா. ‘‘ப²ணம் கரித்வா’’திபி பாடோ², ஸோயேவத்தோ².

தஸ்ஸ கிர நாக³ராஜஸ்ஸ ஏதத³ஹோஸி ‘‘ப⁴க³வா ச மய்ஹம் ப⁴வனஸமீபே ருக்க²மூலே நிஸின்னோ, அயஞ்ச ஸத்தாஹவத்³த³லிகா வத்ததி, வாஸாகா³ரமஸ்ஸ லத்³து⁴ம் வட்டதீ’’தி. ஸோ ஸத்தரதனமயம் பாஸாத³ம் நிம்மினிதும் ஸக்கோந்தோபி ‘‘ஏவம் கதே காயஸாரோ க³ஹிதோ ந ப⁴விஸ்ஸதி, த³ஸப³லஸ்ஸ காயவேய்யாவச்சம் கரிஸ்ஸாமீ’’தி மஹந்தம் அத்தபா⁴வம் கத்வா ஸத்தா²ரம் ஸத்தக்க²த்தும் போ⁴கே³ஹி பரிக்கி²பித்வா உபரி ப²ணம் தா⁴ரேஸி. ‘‘தஸ்ஸ பரிக்கே²பப்³ப⁴ந்தரம் லோஹபாஸாதே³ ப⁴ண்டா³கா³ரக³ப்³ப⁴ப்பமாணம் அஹோஸீ’’தி இத⁴ வுத்தம். மஜ்ஜி²மட்ட²கதா²யம் (ம. நி. அட்ட². 1.284) பன –

‘‘பரிக்கே²பஸ்ஸ அந்தோ ஓகாஸோ ஹேட்டா² லோஹபாஸாத³ப்பமாணோ அஹோஸி, ‘இச்சி²திச்சி²தேன இரியாபதே²ன ஸத்தா² விஹரிஸ்ஸதீ’தி நாக³ராஜஸ்ஸ அஜ்ஜா²ஸயோ அஹோஸி, தஸ்மா ஏவம் மஹந்தம் ஓகாஸம் பரிக்கி²பி, மஜ்ஜே² ரதனபல்லங்கோ பஞ்ஞத்தோ ஹோதி, உபரி ஸுவண்ணதாரகவிசித்தம் ஸமோஸரிதக³ந்த⁴தா³மகுஸுமசேலவிதானம் அஹோஸி, சதூஸு கோணேஸு க³ந்த⁴தேலேன தீ³பா ஜலிதா, சதூஸு தி³ஸாஸு விவரித்வா சந்த³னகரண்ட³கா ட²பிதா’’தி –

வுத்தம். இச்சி²திச்சி²தேன இரியாபதே²ன விஹரிஸ்ஸதீதி ச நாக³ராஜஸ்ஸ அஜ்ஜா²ஸயமத்தமேதம், ப⁴க³வா பன யதா²னிஸின்னோவ ஸத்தாஹம் வீதினாமேஸி.

கிஞ்சாபி…பே… சிந்தேதும் யுத்தந்தி ஏத்த² கேசி வத³ந்தி ‘‘உண்ஹக்³க³ஹணம் போ⁴க³பரிக்கே²பஸ்ஸ விபுலபா⁴வகரணே காரணகித்தனம். கு²த்³த³கே ஹி தஸ்மிம் ப⁴க³வந்தம் நாக³ராஜஸ்ஸ ஸரீரஸம்பூ⁴தா உஸ்மா பா³தே⁴ய்ய, விபுலபா⁴வகரணேன பன தாதி³ஸம் மா உண்ஹம் பா³த⁴யித்தா²’’தி. ஸஉபஸக்³க³பத³ஸ்ஸ அத்தோ² உபஸக்³கே³ன வினாபி விஞ்ஞாயதீதி ஆஹ ‘‘வித்³த⁴ந்தி உப்³பி³த்³த⁴’’ந்தி, ஸா சஸ்ஸ உப்³பி³த்³த⁴தா உபக்கிலேஸவிக³மேன தூ³ரபா⁴வேன உபட்டா²னந்தி ஆஹ ‘‘மேக⁴விக³மேன தூ³ரீபூ⁴த’’ந்தி. இந்த³னீலமணி விய தி³ப்³ப³தி ஜோததீதி தே³வோ, ஆகாஸோ. விதி³த்வாதி ‘‘இதா³னி விக³தவலாஹகோ ஆகாஸோ, நத்தி² ப⁴க³வதோ ஸீதாதி³உபத்³த³வோ’’தி ஞத்வா. வினிவேடே²த்வாதி அபனேத்வா. அத்தனோ ரூபந்தி அத்தனோ நாக³ரூபம். படிஸம்ஹரித்வாதி அந்தரதா⁴பேத்வா. மாணவகவண்ணந்தி குமாரகரூபம்.

ஏதமத்த²ம் விதி³த்வாதி ‘‘விவேகஸுக²படிஸம்வேதி³னோ யத்த² கத்த²சி ஸுக²மேவ ஹோதீ’’தி ஏதம் அத்த²ம் ஸப்³பா³காரேன ஜானித்வா. இமம் உதா³னந்தி இமம் விவேகஸுகா²னுபா⁴வதீ³பகம் உதா³னம் உதா³னேஸி. ஸுதத⁴ம்மஸ்ஸாதி விஸ்ஸுதத⁴ம்மஸ்ஸ. தேனாஹ ‘‘பகாஸிதத⁴ம்மஸ்ஸா’’தி. அகுப்பனபா⁴வோதி அகுப்பனஸபா⁴வோ.

முசலிந்த³கதா²வண்ணனா நிட்டி²தா.

ராஜாயதனகதா²வண்ணனா

6. ஓஸத⁴ஹரீதகம் உபனேஸீதி ந கேவலம் ஓஸத⁴ஹரீதகமேவ, த³ந்தகட்ட²ம்பி உபனேஸி. பச்சக்³கே⁴தி ஏத்த² புரிமம் அத்த²விகப்பம் கேசி ந இச்ச²ந்தி, தேனேவ ஆசரியத⁴ம்மபாலத்தே²ரேன வுத்தம் ‘‘பச்சக்³கே⁴தி அபி⁴னவே. பச்சேகம் மஹக்³க⁴தாய பச்சக்³கே⁴தி கேசி, தம் ந ஸுந்த³ரம். ந ஹி பு³த்³தா⁴ ப⁴க³வந்தோ மஹக்³க⁴ம் படிக்³க³ண்ஹந்தி பரிபு⁴ஞ்ஜந்தி வா’’தி.

ராஜாயதனகதா²வண்ணனா நிட்டி²தா.

ப்³ரஹ்மயாசனகதா²வண்ணனா

7. ஆசிண்ணஸமாசிண்ணோதி ஆசரிதோ சேவ ஆசரந்தேஹி ச ஸம்மதே³வ ஆசரிதோதி அத்தோ². ஏதேன அயம் பரிவிதக்கோ ஸப்³ப³பு³த்³தா⁴னம் பட²மாபி⁴ஸம்போ³தி⁴யம் உப்பஜ்ஜதேவாதி அயமேத்த² த⁴ம்மதாதி த³ஸ்ஸேதி. க³ம்பீ⁴ரோபி த⁴ம்மோ படிபக்க²வித⁴மனேன ஸுபாகடோ ப⁴வேய்ய, படிபக்க²வித⁴மனம் பன ஸம்மாபடிபத்திபடிப³த்³த⁴ம், ஸா ஸத்³த⁴ம்மஸவனாதீ⁴னா, தம் ஸத்த²ரி த⁴ம்மே ச பஸாதா³யத்தம். ஸோ விஸேஸதோ லோகே ஸம்பா⁴வனீயஸ்ஸ க³ருகாதப்³ப³ஸ்ஸ அபி⁴பத்த²னாஹேதுகோதி பரம்பராய ஸத்தானம் த⁴ம்மஸம்படிபத்தியா ப்³ரஹ்முனோ யாசனானிமித்தந்தி தம் த³ஸ்ஸேந்தோ ‘‘ப்³ரஹ்முனா யாசிதே தே³ஸேதுகாமதாயா’’திஆதி³மாஹ.

அதி⁴க³தோதி படிவித்³தோ⁴, ஸயம்பூ⁴ஞாணேன ‘‘இத³ம் து³க்க²’’ந்திஆதி³னா யதா²பூ⁴தம் அவபு³த்³தோ⁴தி அத்தோ². த⁴ம்மோதி சதுஸச்சத⁴ம்மோ தப்³பி³னிமுத்தஸ்ஸ படிவிஜ்ஜி²தப்³ப³த⁴ம்மஸ்ஸ அபா⁴வதோ. க³ம்பீ⁴ரோதி மஹாஸமுத்³தோ³ விய மகஸதுண்ட³ஸூசியா அஞ்ஞத்ர ஸமுபசிதபரிபக்கஞாணஸம்பா⁴ரேஹி அஞ்ஞேஸம் ஞாணேன அலப்³ப⁴னேய்யபதிட்டோ². க³ம்பீ⁴ரத்தாவ து³த்³த³ஸோ து³க்கே²ன த³ட்ட²ப்³போ³, ந ஸக்கா ஸுகே²ன த³ட்டு²ம். யோ ஹி அலப்³ப⁴னேய்யபதிட்டோ², ஸோ ஓகா³ஹிதும் அஸக்குணேய்யதாய ஸரூபதோ ச விஸேஸதோ ச ஸுகே²ன பஸ்ஸிதும் ந ஸக்கா, அத² கோ² கிச்சே²ன கேனசி கதா³சிதே³வ த³ட்ட²ப்³போ³. து³த்³த³ஸத்தாவ து³ரனுபோ³தோ⁴ து³க்கே²ன அவபு³ஜ்ஜி²தப்³போ³, ந ஸக்கா ஸுகே²ன அவபு³ஜ்ஜி²தும். யஞ்ஹி த³ட்டு²மேவ ந ஸக்கா, தஸ்ஸ ஓகா³ஹேத்வா அனுபு³ஜ்ஜ²னே கதா² ஏவ நத்தி² அவபோ³த⁴ஸ்ஸ து³க்கரபா⁴வதோ. இமஸ்மிம் டா²னே ‘‘தம் கிம் மஞ்ஞத², பி⁴க்க²வே, கதமம் நு கோ² து³க்கரதரம் வா து³ரபி⁴ஸம்ப⁴வதரம் வா’’தி (ஸம். நி. 5.1115) ஸுத்தபத³ம் வத்தப்³ப³ம்.

ஸந்தோதி அனுபஸந்தஸபா⁴வானம் கிலேஸானம் ஸங்கா²ரானஞ்ச அபா⁴வதோ வூபஸந்தஸப்³ப³பரிளாஹதாய ஸந்தோ நிப்³பு³தோ, ஸந்தாரம்மணதாய வா ஸந்தோ. ஏத்த² ச நிரோத⁴ஸச்சம் ஸந்தம் ஆரம்மணந்தி ஸந்தாரம்மணம், மக்³க³ஸச்சம் ஸந்தம் ஸந்தாரம்மணஞ்சாதி ஸந்தாரம்மணம். பதா⁴னபா⁴வம் நீதோதி பணீதோ. அத² வா பணீதோதி அதித்திகரணட்டே²ன அதப்பகோ ஸாது³ரஸபோ⁴ஜனம் விய. ஸந்தபணீதபா⁴வேனேவ சேத்த² அஸேசனகதாய அதப்பகதா த³ட்ட²ப்³பா³. இத³ஞ்ஹி த்³வயம் லோகுத்தரமேவ ஸந்தா⁴ய வுத்தம். அதக்காவசரோதி உத்தமஞாணவிஸயத்தா தக்கேன அவசரிதப்³போ³ ஓகா³ஹிதப்³போ³ ந ஹோதி, ஞாணேனேவ அவசரிதப்³போ³. ததோ ஏவ நிபுணஞாணகோ³சரதாய ஸண்ஹஸுகு²மஸபா⁴வத்தா ச நிபுணோ ஸண்ஹோ. பண்டி³தவேத³னீயோதி பா³லானம் அவிஸயத்தா ஸம்மாபடிபத³ம் படிபன்னேஹி பண்டி³தேஹி ஏவ வேதி³தப்³போ³.

அல்லீயந்தி அபி⁴ரமிதப்³ப³ட்டே²ன ஸேவியந்தீதி ஆலயா, பஞ்ச காமகு³ணாதி ஆஹ ‘‘ஸத்தா பஞ்சகாமகு³ணே அல்லீயந்தி, தஸ்மா தே ஆலயாதி வுச்சந்தீ’’தி. தத்த² பஞ்சகாமகு³ணே அல்லீயந்தீதி பஞ்சகாமகு³ணே ஸேவந்தீதி அத்தோ². தேதி பஞ்ச காமகு³ணா. ரமந்தீதி ரதிம் விந்த³ந்தி கீளந்தி லளந்தி. ஆலீயந்தி அபி⁴ரமணவஸேன ஸேவந்தீதி ஆலயா, அட்ட²ஸதம் தண்ஹாவிசரிதானி, தேஹி ஆலயேஹி ரமந்தீதி ஆலயராமாதி ஏவம்பேத்த² அத்தோ² த³ட்ட²ப்³போ³. இமே ஹி ஸத்தா யதா² காமகு³ணே, ஏவம் ராக³ம்பி அஸ்ஸாதே³ந்தி அபி⁴னந்த³ந்தியேவ. யதே²வ ஹி ஸுஸஜ்ஜிதபுப்ப²ப²லப⁴ரிதருக்கா²தி³ஸம்பன்னம் உய்யானம் பவிட்டோ² ராஜா தாய தாய ஸம்பத்தியா ரமதி, ஸம்முதி³தோ ஆமோதி³தபமோதி³தோ ஹோதி, ந உக்கண்ட²தி, ஸாயம்பி நிக்க²மிதும் ந இச்ச²தி, ஏவமிமேஹி காமாலயதண்ஹாலயேஹி ஸத்தா ரமந்தி, ஸம்ஸாரவட்டே ஸம்மோதி³தா அனுக்கண்டி²தா வஸந்தி. தேன நேஸம் ப⁴க³வா து³வித⁴ம்பி ஆலயம் உய்யானபூ⁴மிம் விய த³ஸ்ஸேந்தோ ‘‘ஆலயராமா’’திஆதி³மாஹ. ரதாதி நிரதா. ஸுட்டு² முதி³தாதி அதிவிய முதி³தா அனுக்கண்ட²னதோ.

டா²னம் ஸந்தா⁴யாதி டா²னஸத்³த³ம் ஸந்தா⁴ய. அத்த²தோ பன டா²னந்தி ச படிச்சஸமுப்பாதோ³ ஏவ அதி⁴ப்பேதோ. திட்ட²தி ஏத்த² ப²லம் ததா³யத்தவுத்திதாயாதி டா²னம், ஸங்கா²ராதீ³னம் பச்சயபூ⁴தா அவிஜ்ஜாத³யோ. இமேஸம் ஸங்கா²ராதீ³னம் பச்சயாதி இத³ப்பச்சயா, அவிஜ்ஜாத³யோவ. இத³ப்பச்சயா ஏவ இத³ப்பச்சயதா யதா² தே³வோ ஏவ தே³வதா. இத³ப்பச்சயானம் வா அவிஜ்ஜாதீ³னம் அத்தனோ ப²லம் படிச்ச பச்சயபா⁴வோ உப்பாத³னஸமத்த²தா இத³ப்பச்சயதா. தேன ஸமத்த²பச்சயலக்க²ணோ படிச்சஸமுப்பாதோ³ த³ஸ்ஸிதோ ஹோதி. படிச்ச ஸமுப்பஜ்ஜதி ப²லம் ஏதஸ்மாதி படிச்சஸமுப்பாதோ³. பத³த்³வயேனபி த⁴ம்மானம் பச்சயட்டோ² ஏவ விபா⁴விதோ. ஸங்கா²ராதி³பச்சயானஞ்ஹி அவிஜ்ஜாதீ³னம் ஏதம் அதி⁴வசனம் இத³ப்பச்சயதாபடிச்சஸமுப்பாதோ³தி. ஸப்³ப³ஸங்கா²ரஸமதோ²திஆதி³ ஸப்³ப³ம் அத்த²தோ நிப்³பா³னமேவ. யஸ்மா ஹி தம் ஆக³ம்ம படிச்ச அரியமக்³க³ஸ்ஸ ஆரம்மணபச்சயபா⁴வஹேது ஸப்³ப³ஸங்கா²ரவிப்ப²ந்தி³தானி ஸம்மந்தி வூபஸம்மந்தி, தஸ்மா ‘‘ஸப்³ப³ஸங்கா²ரஸமதோ²’’தி வுச்சதி. ஸப்³ப³ஸங்க²தவிஸம்யுத்தே ஹி நிப்³பா³னே ஸங்கா²ரவூபஸமபரியாயோ ஞாயாக³தோயேவாதி. இத³ம் பனேத்த² நிப்³ப³சனம் – ஸப்³பே³ ஸங்கா²ரா ஸம்மந்தி ஏத்தா²தி ஸப்³ப³ஸங்கா²ரஸமதோ²தி.

யஸ்மா ச தம் ஆக³ம்ம ஸப்³பே³ உபத⁴யோ படினிஸ்ஸட்டா² ஸமுச்சே²த³வஸேன பரிச்சத்தா ஹோந்தி, அட்ட²ஸதப்பபே⁴தா³ ஸப்³பா³பி தண்ஹா கீ²யந்தி, ஸப்³பே³ கிலேஸராகா³ விரஜ்ஜந்தி, ஜராமரணாதி³பே⁴த³ம் ஸப்³ப³ம் வட்டது³க்க²ம் நிருஜ்ஜ²தி, தஸ்மா ‘‘ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴’’தி வுச்சதி, யா பனேஸா தண்ஹா தேன தேன ப⁴வேன ப⁴வந்தரம் ப⁴வனிகந்திபா⁴வேன வினதி ஸம்ஸிப்³ப³தி, ப²லேன வா ஸத்³தி⁴ம் கம்மம் வினதி ஸம்ஸிப்³ப³தீதி கத்வா வானந்தி வுச்சதி, ததோ நிக்க²ந்தம் வானதோதி நிப்³பா³னம். கிலமதோ²தி காயகிலமதோ². விஹேஸாபி காயவிஹேஸாயேவ, சித்தே பன உப⁴யம்பேதம் பு³த்³தா⁴னம் நத்தி² போ³தி⁴மூலேயேவ ஸமுச்சி²ன்னத்தா. ஏத்த² ச சிரனிஸஜ்ஜாசிரபா⁴ஸனேஹி பிட்டி²ஆகி³லாயனதாலுக³லஸோஸாதி³வஸேன காயகிலமதோ² சேவ காயவிஹேஸா ச வேதி³தப்³பா³, ஸா ச கோ² தே³ஸனாய அத்த²ம் அஜானந்தானஞ்ச அப்படிபஜ்ஜந்தானஞ்ச வஸேன. ஜானந்தானம் பன படிபஜ்ஜந்தானஞ்ச தே³ஸனாய காயபரிஸ்ஸமோபி ஸத்து² அபரிஸ்ஸமோவ, தேனாஹ ப⁴க³வா ‘‘ந ச மம் த⁴ம்மாதி⁴கரணம் விஹேஸேதீ’’தி. தேனேவ வுத்தம் ‘‘யா அஜானந்தானம் தே³ஸனா நாம, ஸோ மம கிலமதோ² அஸ்ஸா’’தி.

அபிஸ்ஸூதி ஸம்பிண்ட³னத்தே² நிபாதோ. ஸோ ந கேவலம் ஏதத³ஹோஸி, இமாபி கா³தா² படிப⁴ம்ஸூதி தீ³பேதி. ப⁴க³வந்தந்தி படிஸத்³த³யோகே³ன ஸாமிஅத்தே² உபயோக³வசனந்தி ஆஹ ‘‘ப⁴க³வதோ’’தி. வுத்³தி⁴ப்பத்தா அச்ச²ரியா வா அனச்ச²ரியா. வுத்³தி⁴அத்தோ²பி ஹி அ-காரோ ஹோதி யதா² ‘‘அஸேக்கா² த⁴ம்மா’’தி. கப்பானம் சத்தாரி அஸங்க்²யேய்யானி ஸதஸஹஸ்ஸஞ்ச ஸதே³வகஸ்ஸ லோகஸ்ஸ த⁴ம்மஸம்விபா⁴க³கரணத்த²மேவ பாரமியோ பூரேத்வா இதா³னி ஸமதி⁴க³தத⁴ம்மரஜ்ஜஸ்ஸ தத்த² அப்போஸ்ஸுக்கதாபத்திதீ³பனத்தா கா³தா²த்த²ஸ்ஸ அனுஅச்ச²ரியதா தஸ்ஸ வுத்³தி⁴ப்பத்தி ச வேதி³தப்³பா³. அத்த²த்³வாரேன ஹி கா³தா²னம் அனச்ச²ரியதா. கோ³சரா அஹேஸுந்தி உபட்ட²ஹம்ஸு, உபட்டா²னஞ்ச விதக்கயிதப்³ப³தாதி ஆஹ ‘‘பரிவிதக்கயிதப்³ப³பா⁴வம் பாபுணிம்ஸூ’’தி.

கிச்சே²னாதி ந து³க்க²ப்படிபதா³ய. பு³த்³தா⁴னஞ்ஹி சத்தாரோபி மக்³கா³ ஸுக²ப்படிபதா³வ ஹோந்தி. பாரமீபூரணகாலே பன ஸராக³ஸதோ³ஸஸமோஹஸ்ஸேவ ஸதோ ஆக³தாக³தானம் யாசகானம் அலங்கதப்படியத்தம் ஸீஸம் கந்தித்வா க³லலோஹிதம் நீஹரித்வா ஸுஅஞ்ஜிதானி அக்கீ²னி உப்பாடேத்வா குலவம்ஸப்பதீ³பம் புத்தம் மனாபசாரினிம் ப⁴ரியந்தி ஏவமாதீ³னி தே³ந்தஸ்ஸ அஞ்ஞானி ச க²ந்திவாதி³ஸதி³ஸேஸு அத்தபா⁴வேஸு சே²ஜ்ஜபே⁴ஜ்ஜாதீ³னி பாபுணந்தஸ்ஸ ஆக³மனீயபடிபத³ம் ஸந்தா⁴யேதம் வுத்தம். ஹ-இதி வா ப்³யத்தந்தி ஏதஸ்மிம் அத்தே² நிபாதோ. ஏகம்ஸத்தே²தி கேசி. ஹ ப்³யத்தம் ஏகம்ஸேன வா அலம் நிப்பயோஜனம் ஏவம் கிச்சே²ன அதி⁴க³தம் த⁴ம்மம் தே³ஸேதுந்தி யோஜனா. ஹலந்தி வா அலந்தி இமினா ஸமானத்த²ம் பத³ம் ‘‘ஹலந்தி வதா³மீ’’திஆதீ³ஸு விய. ‘‘பகாஸித’’ந்திபி பட²ந்தி, தே³ஸிதந்தி அத்தோ². ஏவம் கிச்சே²ன அதி⁴க³தஸ்ஸ த⁴ம்மஸ்ஸ அலம் தே³ஸிதம் பரியத்தம் தே³ஸிதம், கோ அத்தோ² தே³ஸிதேனாதி வுத்தம் ஹோதி. ராக³தோ³ஸபரேதேஹீதி ராக³தோ³ஸபு²ட்டே²ஹி, பு²ட்ட²விஸேன விய ஸப்பேன ராகே³ன தோ³ஸேன ச ஸம்பு²ட்டே²ஹி அபி⁴பூ⁴தேஹீதி அத்தோ². அத² வா ராக³தோ³ஸபரேதேஹீதி ராக³தோ³ஸானுக³தேஹி, ராகே³ன ச தோ³ஸேன ச அனுப³ந்தே⁴ஹீதி அத்தோ².

படிஸோதகா³மிந்தி (தீ³. நி. அட்ட². 2.65; ம. நி. அட்ட². 1.281; ஸம். நி. அட்ட². 1.1.172) நிச்சகா³ஹாதீ³னம் படிஸோதம் அனிச்சம் து³க்க²மனத்தா அஸுப⁴ந்தி ஏவம் க³தம் பவத்தம் சதுஸச்சத⁴ம்மந்தி அத்தோ². ராக³ரத்தாதி காமராகே³ன ப⁴வராகே³ன தி³ட்டி²ராகே³ன ச ரத்தா. ந த³க்க²ந்தீதி அனிச்சம் து³க்க²மனத்தா அஸுப⁴ந்தி இமினா ஸபா⁴வேன ந பஸ்ஸிஸ்ஸந்தி, தே அபஸ்ஸந்தே கோ ஸக்கி²ஸ்ஸதி அனிச்சந்திஆதி³னா ஸபா⁴வேன யாதா²வதோ த⁴ம்மம் ஜானாபேதுந்தி அதி⁴ப்பாயோ. ராக³தோ³ஸபரேததாபி நேஸம் ஸம்முள்ஹபா⁴வேனேவாதி ஆஹ ‘‘தமோக²ந்தே⁴ன ஆவுடா’’தி, அவிஜ்ஜாராஸினா அஜ்ஜோ²த்த²டாதி அத்தோ².

அப்போஸ்ஸுக்கதாய சித்தம் நமதீதி கஸ்மா பனஸ்ஸ ஏவம் சித்தம் நமி, நனு ஏஸ ‘‘முத்தோஹம் மோசேஸ்ஸாமி, திண்ணோஹம் தாரேஸ்ஸாமி,

கிம் மே அஞ்ஞாதவேஸேன, த⁴ம்மம் ஸச்சி²கதேனித⁴;

ஸப்³ப³ஞ்ஞுதம் பாபுணித்வா, தாரயிஸ்ஸம் ஸதே³வக’’ந்தி. (பு³. வம். 2.55) –

பத்த²னம் கத்வா பாரமியோ பூரேத்வா ஸப்³ப³ஞ்ஞுதம் பத்தோதி? ஸச்சமேவ, ததே³வ பச்சவேக்க²ணானுபா⁴வேன பனஸ்ஸ ஏவம் சித்தம் நமி. தஸ்ஸ ஹி ஸப்³ப³ஞ்ஞுதம் பத்வா ஸத்தானம் கிலேஸக³ஹனதம் த⁴ம்மஸ்ஸ ச க³ம்பீ⁴ரதம் பச்சவேக்க²ந்தஸ்ஸ ஸத்தானம் கிலேஸக³ஹனதா ச த⁴ம்மக³ம்பீ⁴ரதா ச ஸப்³பா³காரேன பாகடா ஜாதா. அத²ஸ்ஸ ‘‘இமே ஸத்தா கஞ்ஜியபுண்ணலாபு³ விய தக்கப⁴ரிதசாடி விய வஸாதேலபீதபிலோதிகா விய அஞ்ஜனமக்கி²தஹத்தோ² விய ச கிலேஸப⁴ரிதா அதிஸம்கிலிட்டா² ராக³ரத்தா தோ³ஸது³ட்டா² மோஹமுள்ஹா, தே கிம் நாம படிவிஜ்ஜி²ஸ்ஸந்தீ’’தி சிந்தயதோ கிலேஸக³ஹனபச்சவேக்க²ணானுபா⁴வேனபி ஏவம் சித்தம் நமி.

‘‘அயம் த⁴ம்மோ பத²வீஸந்தா⁴ரகஉத³கக்க²ந்தோ⁴ விய க³ம்பீ⁴ரோ, பப்³ப³தேன படிச்சா²தே³த்வா ட²பிதோ ஸாஸபோ விய து³த்³த³ஸோ, ஸததா⁴ பி⁴ன்னஸ்ஸ வாலஸ்ஸ கோடி விய அணு. மயா ஹி இமம் த⁴ம்மம் படிவிஜ்ஜி²தும் வாயமந்தேன அதி³ன்னம் தா³னம் நாம நத்தி², அரக்கி²தம் ஸீலம் நாம நத்தி², அபரிபூரிதா காசி பாரமீ நாம நத்தி², தஸ்ஸ மே நிருஸ்ஸாஹம் விய மாரப³லம் வித⁴மந்தஸ்ஸபி பத²வீ ந கம்பித்த², பட²மயாமே புப்³பே³னிவாஸம் அனுஸ்ஸரந்தஸ்ஸபி ந கம்பித்த², மஜ்ஜி²மயாமே தி³ப்³ப³சக்கு²ம் விஸோதே⁴ந்தஸ்ஸபி ந கம்பித்த², பச்சி²மயாமே பன படிச்சஸமுப்பாத³ம் படிவிஜ்ஜ²ந்தஸ்ஸேவ மே த³ஸஸஹஸ்ஸிலோகதா⁴து கம்பித்த². இதி மாதி³ஸேனபி திக்க²ஞாணேன கிச்சே²னேவாயம் த⁴ம்மோ படிவித்³தோ⁴, தம் லோகியமஹாஜனா கத²ம் படிவிஜ்ஜி²ஸ்ஸந்தீ’’தி த⁴ம்மக³ம்பீ⁴ரதாய பச்சவேக்க²ணானுபா⁴வேனபி ஏவம் சித்தம் நமீதி வேதி³தப்³ப³ம்.

அபிச ப்³ரஹ்முனா யாசிதே தே³ஸேதுகாமதாயபிஸ்ஸ ஏவம் சித்தம் நமி. ஜானாதி ஹி ப⁴க³வா ‘‘மம அப்போஸ்ஸுக்கதாய சித்தே நமமானே மஹாப்³ரஹ்மா த⁴ம்மதே³ஸனம் யாசிஸ்ஸதி, இமே ச ஸத்தா ப்³ரஹ்மக³ருகா, தே ‘ஸத்தா² கிர த⁴ம்மம் ந தே³ஸேதுகாமோ அஹோஸி, அத² நம் மஹாப்³ரஹ்மா யாசித்வா தே³ஸாபேதி, ஸந்தோ வத போ⁴ த⁴ம்மோ பணீதோ’தி மஞ்ஞமானா ஸுஸ்ஸூஸிஸ்ஸந்தீ’’தி. இத³ம்பிஸ்ஸ காரணம் படிச்ச அப்போஸ்ஸுக்கதாய சித்தம் நமி, நோ த⁴ம்மதே³ஸனாயாதி வேதி³தப்³ப³ம்.

8. ஸஹம்பதிஸ்ஸாதி ஸோ கிர கஸ்ஸபஸ்ஸ ப⁴க³வதோ ஸாஸனே ஸஹகோ நாம தே²ரோ பட²மஜ்ஜா²னம் நிப்³ப³த்தேத்வா பட²மஜ்ஜா²னபூ⁴மியம் கப்பாயுகப்³ரஹ்மா ஹுத்வா நிப்³ப³த்தோ, தத்ர நம் ஸஹம்பதி ப்³ரஹ்மாதி ஸஞ்ஜானந்தி. தம் ஸந்தா⁴யாஹ ‘‘ப்³ரஹ்முனோ ஸஹம்பதிஸ்ஸா’’தி. நஸ்ஸதி வதாதி ஸோ கிர இமம் ஸத்³த³ம் ததா² நிச்சா²ரேதி, யதா² த³ஸஸஹஸ்ஸிலோகதா⁴துப்³ரஹ்மானோ ஸுத்வா ஸப்³பே³ ஸன்னிபதிம்ஸு. அப்பரஜக்க²ஜாதிகாதி பஞ்ஞாமயே அக்கி²ம்ஹி அப்பம் பரித்தம் ராக³தோ³ஸமோஹரஜம் ஏதேஸம் ஏவம்ஸபா⁴வாதி அப்பரஜக்க²ஜாதிகா. அப்பம் ராகா³தி³ரஜம் யேஸம் தே ஸபா⁴வா அப்பரஜக்க²ஜாதிகாதி ஏவமேத்த² அத்தோ² த³ட்ட²ப்³போ³. அஸ்ஸவனதாதி ‘‘ஸயம் அபி⁴ஞ்ஞா’’திஆதீ³ஸு விய கரணத்தே² பச்சத்தவசனம், அஸ்ஸவனதாயாதி அத்தோ². ப⁴விஸ்ஸந்தீதி புரிமபு³த்³தே⁴ஸு த³ஸபுஞ்ஞகிரியவஸேன கதாதி⁴காரா பரிபாகக³தபது³மானி விய ஸூரியரஸ்மிஸம்ப²ஸ்ஸம் த⁴ம்மதே³ஸனம்யேவ ஆகங்க²மானா சதுப்பதி³ககா³தா²வஸானே அரியபூ⁴மிம் ஓக்கமனாரஹா ந ஏகோ, ந த்³வே, அனேகஸதஸஹஸ்ஸா த⁴ம்மஸ்ஸ அஞ்ஞாதாரோ ப⁴விஸ்ஸந்தீதி த³ஸ்ஸேதி.

பாதுரஹோஸீதி பாதுப⁴வி. ஸமலேஹி சிந்திதோதி ஸமலேஹி பூரணகஸ்ஸபாதீ³ஹி ச²ஹி ஸத்தா²ரேஹி சிந்திதோ. தே ஹி புரேதரம் உப்பஜ்ஜித்வா ஸகலஜம்பு³தீ³பே கண்டகே பத்த²ரமானா விய விஸம் ஸிஞ்சமானா விய ச ஸமலம் மிச்சா²தி³ட்டி²த⁴ம்மம் தே³ஸயிம்ஸு. தே கிர பு³த்³த⁴கோலாஹலானுஸ்ஸவேன ஸஞ்ஜாதகுதூஹலா லோகம் வஞ்சேத்வா கோஹஞ்ஞே ட²த்வா ஸப்³ப³ஞ்ஞுதம் படிஜானந்தா யம் கிஞ்சி அத⁴ம்மம்யேவ த⁴ம்மோதி தீ³பேஸும். அபாபுரேதந்தி விவர ஏதம். அமதஸ்ஸ த்³வாரந்தி அமதஸ்ஸ நிப்³பா³னஸ்ஸ த்³வாரபூ⁴தம் அரியமக்³க³ம். இத³ம் வுத்தம் ஹோதி – ஏதம் கஸ்ஸபஸ்ஸ ப⁴க³வதோ ஸாஸனந்தரதா⁴னதோ பபு⁴தி பிஹிதம் நிப்³பா³னனக³ரஸ்ஸ மஹாத்³வாரம் அரியமக்³க³ம் ஸத்³த⁴ம்மதே³ஸனாஹத்தே²ன அபாபுர விவர உக்³கா⁴டேஹீதி. ஸுணந்து த⁴ம்மம் விமலேனானுபு³த்³த⁴ந்தி இமே ஸத்தா ராகா³தி³மலானம் அபா⁴வதோ விமலேன ஸம்மாஸம்பு³த்³தே⁴ன அனுபு³த்³த⁴ம் சதுஸச்சத⁴ம்மம் ஸுணந்து தாவ ப⁴க³வாதி யாசதி.

ஸேலபப்³ப³தோ உச்சோ ஹோதி தி²ரோ ச, ந பம்ஸுபப்³ப³தோ மிஸ்ஸகபப்³ப³தோ வாதி ஆஹ ‘‘ஸேலே யதா² பப்³ப³தமுத்³த⁴னிட்டி²தோ’’தி. தஸ்ஸத்தோ² ‘‘ஸேலமயே ஏகக்³க⁴னே பப்³ப³தமுத்³த⁴னி யதா²டி²தோவ. ந ஹி தத்த² டி²தஸ்ஸ த³ஸ்ஸனத்த²ம் கீ³வுக்கி²பனபஸாரணாதி³கிச்சம் அத்தீ²’’தி. ததூ²பமந்தி தப்படிபா⁴க³ம் ஸேலபப்³ப³தூபமம். த⁴ம்மமயம் பாஸாத³ந்தி லோகுத்தரத⁴ம்மமாஹ. ஸோ ஹி ஸப்³ப³ஸோ பஸாதா³வஹோ ஸப்³ப³த⁴ம்மே அதிக்கம்ம அப்³பு⁴க்³க³தட்டே²ன பாஸாத³ஸதி³ஸோ ச, பஞ்ஞாபரியாயோ வா இத⁴ த⁴ம்ம-ஸத்³தோ³. பஞ்ஞா ஹி அப்³பு⁴க்³க³தட்டே²ன பாஸாதோ³தி அபி⁴த⁴ம்மே நித்³தி³ட்டா². ததா² சாஹ –

‘‘பஞ்ஞாபாஸாத³மாருய்ஹ, அஸோகோ ஸோகினிம் பஜம்;

பப்³ப³தட்டோ²வ பூ⁴மட்டே², தீ⁴ரோ பா³லே அவேக்க²தீ’’தி. (த⁴. ப. 28);

அயம் பனேத்த² ஸங்கே²பத்தோ² – யதா² ஸேலபப்³ப³தமுத்³த⁴னி யதா²டி²தோவ சக்கு²மா புரிஸோ ஸமந்ததோ ஜனதம் பஸ்ஸேய்ய, ததா² த்வம்பி ஸுமேத⁴ ஸுந்த³ரபஞ்ஞ ஸப்³ப³ஞ்ஞுதஞ்ஞாணேன ஸமந்தசக்கு² ப⁴க³வா த⁴ம்மமயம் பஞ்ஞாமயம் பாஸாத³மாருய்ஹ ஸயம் அபேதஸோகோ ஸோகாவதிண்ணம் ஜாதிஜராபி⁴பூ⁴தம் ஜனதம் அவேக்க²ஸ்ஸு உபதா⁴ரய உபபரிக்கா²தி. அயம் பனேத்த² அதி⁴ப்பாயோ – யதா² ஹி பப்³ப³தபாதே³ ஸமந்தா மஹந்தம் கே²த்தம் கத்வா தத்த² கேதா³ரபாளீஸு குடிகாயோ கத்வா ரத்திம் அக்³கி³ம் ஜாலேய்யும், சதுரங்க³ஸமன்னாக³தஞ்ச அந்த⁴காரம் அஸ்ஸ, அத² தஸ்ஸ பப்³ப³தஸ்ஸ மத்த²கே ட²த்வா சக்கு²மதோ புரிஸஸ்ஸ பூ⁴மிம் ஓலோகயதோ நேவ கே²த்தம், ந கேதா³ரபாளியோ, ந குடியோ, ந தத்த² ஸயிதமனுஸ்ஸா பஞ்ஞாயேய்யும் அனுஜ்ஜலபா⁴வதோ, குடிகாஸு பன அக்³கி³ஜாலாமத்தமேவ பஞ்ஞாயேய்ய உஜ்ஜலபா⁴வதோ, ஏவம் த⁴ம்மபாஸாத³ம் ஆருய்ஹ ஸத்தனிகாயம் ஓலோகயதோ ததா²க³தஸ்ஸ யே தே அகதகல்யாணா ஸத்தா, தே ஏகவிஹாரே த³க்கி²ணஜாணுபஸ்ஸே நிஸின்னாபி பு³த்³த⁴சக்கு²ஸ்ஸ ஆபாத²ம் நாக³ச்ச²ந்தி ஞாணக்³கி³னா அனுஜ்ஜலபா⁴வதோ அனுளாரபா⁴வதோ ச, ரத்திம் கி²த்தா ஸரா விய ஹோந்தி. யே பன கதகல்யாணா வேனேய்யபுக்³க³லா, தே ஏவஸ்ஸ தூ³ரேபி டி²தா ஆபாத²மாக³ச்ச²ந்தி பரிபக்கஞாணக்³கி³தாய ஸமுஜ்ஜலபா⁴வதோ உளாரஸந்தானதாய ச, ஸோ அக்³கி³ விய ஹிமவந்தபப்³ப³தோ விய ச. வுத்தம்பி சேதம் –

‘‘தூ³ரே ஸந்தோ பகாஸேந்தி, ஹிமவந்தோவ பப்³ப³தோ;

அஸந்தேத்த² ந தி³ஸ்ஸந்தி, ரத்திம் கி²த்தா யதா² ஸரா’’தி. (த⁴. ப. 304);

உட்டே²ஹீதி ப⁴க³வதோ த⁴ம்மதே³ஸனத்த²ம் சாரிகசரணம் யாசந்தோ ப⁴ணதி. உட்டே²ஹீதி வா த⁴ம்மதே³ஸனாய அப்போஸ்ஸுக்கதாஸங்கா²தஸங்கோசாபத்திதோ கிலாஸுபா⁴வதோ உட்ட²ஹ. வீராதிஆதீ³ஸு ப⁴க³வா ஸாதிஸயசதுப்³பி³த⁴ஸம்மப்பதா⁴னவீரியவந்ததாய வீரோ, தே³வபுத்தமச்சுகிலேஸாபி⁴ஸங்கா²ரானம் விஜிதத்தா விஜிதஸங்கா³மோ, ஜாதிகந்தாராதி³தோ வேனேய்யஸத்த²ம் வாஹனஸமத்த²தாய நிப்³பா³னஸங்கா²தம் கே²மப்பதே³ஸம் ஸம்பாபனஸமத்த²தாய ஸத்த²வாஹோ, காமச்ச²ந்த³இணஸ்ஸ அபா⁴வதோ அணணோதி வேதி³தப்³போ³. யோ ஹி பரேஸம் இணம் க³ஹேத்வா வினாஸேதி, ஸோ தேஹி ‘‘இணம் தே³ஹீ’’தி தஜ்ஜமானோபி ப²ருஸம் வுச்சமானோபி வம்ப⁴மானோபி வதி⁴யமானோபி கிஞ்சி படிப்பஹரிதும் ந ஸக்கோதி, ஸப்³ப³ம் திதிக்க²தி. திதிக்க²காரணஞ்ஹிஸ்ஸ தம் இணம் ஹோதி, ஏவமேவ யோ யம்ஹி காமச்ச²ந்தே³ன ரஜ்ஜதி, தண்ஹாக³ஹணேன தம் வத்து²ம் க³ண்ஹாதி, ஸோ தேன ப²ருஸம் வுச்சமானோபி வம்ப⁴மானோபி வதி⁴யமானோபி கிஞ்சி படிப்பஹரிதும் ந ஸக்கோதி, ஸப்³ப³ம் திதிக்க²தி. திதிக்க²காரணஞ்ஹிஸ்ஸ ஸோ காமச்ச²ந்தோ³ ஹோதி க⁴ரஸாமிகேஹி விஹேடி²யமானானம் இத்தீ²னம் விய. கஸ்மா? இணஸதி³ஸத்தா காமச்ச²ந்த³ஸ்ஸ.

9. அஜ்ஜே²ஸனந்தி க³ருட்டா²னீயம் பயிருபாஸித்வா க³ருதரம் பயோஜனம் உத்³தி³ஸ்ஸ அபி⁴பத்த²னா அஜ்ஜே²ஸனா, ஸாபி அத்த²தோ யாசனா ஏவ. பு³த்³த⁴சக்கு²னாதி இந்த்³ரியபரோபரியத்தஞாணேன ச ஆஸயானுஸயஞாணேன ச. இமேஸஞ்ஹி த்³வின்னம் ஞாணானம் பு³த்³த⁴சக்கூ²தி நாமம், ஸப்³ப³ஞ்ஞுதஞ்ஞாணஸ்ஸ ஸமந்தசக்கூ²தி. ஹேட்டி²மானம் திண்ணம் மக்³க³ஞாணானம் த⁴ம்மசக்கூ²தி. அப்பரஜக்கே²திஆதீ³ஸு யேஸம் வுத்தனயேனேவ பஞ்ஞாசக்கு²ம்ஹி ராகா³தி³ரஜம் அப்பம், தே அப்பரஜக்கா². யேஸம் தம் மஹந்தம், தே மஹாரஜக்கா². யேஸம் ஸத்³தா⁴தீ³னி இந்த்³ரியானி திக்கா²னி, தே திக்கி²ந்த்³ரியா. யேஸம் தானி முதூ³னி, தே முதி³ந்த்³ரியா. யேஸம் தேயேவ ஸத்³தா⁴த³யோ ஆகாரா ஸுந்த³ரா, தே ஸ்வாகாரா. யே கதி²தகாரணம் ஸல்லக்கே²ந்தி, ஸுகே²ன ஸக்கா ஹோந்தி விஞ்ஞாபேதும், தே ஸுவிஞ்ஞாபயா. யே பரலோகஞ்சேவ வஜ்ஜஞ்ச ப⁴யதோ பஸ்ஸந்தி, தே பரலோகவஜ்ஜப⁴யத³ஸ்ஸாவினோ நாம.

உப்பலானி ஏத்த² ஸந்தீதி உப்பலினீ, க³ச்சோ²பி ஜலாஸயோபி, இத⁴ பன ஜலாஸயோ அதி⁴ப்பேதோ, தஸ்மா உப்பலினியந்தி உப்பலவனேதி ஏவமத்தோ² க³ஹேதப்³போ³. இதோ பரேஸுபி ஏஸேவ நயோ. அந்தோனிமுக்³க³போஸீனீதி யானி உத³கஸ்ஸ அந்தோ நிமுக்³கா³னேவ ஹுத்வா புஸ்ஸந்தி வட்³ட⁴ந்தி, தானி அந்தோனிமுக்³க³போஸீனி. உத³கம் அச்சுக்³க³ம்ம திட்ட²ந்தீதி உத³கம் அதிக்கமித்வா திட்ட²ந்தி. தத்த² யானி அச்சுக்³க³ம்ம டி²தானி ஸூரியரஸ்மிஸம்ப²ஸ்ஸம் ஆக³மயமானானி, தானி அஜ்ஜ புப்ப²னகானி. யானி ஸமோத³கம் டி²தானி, தானி ஸ்வே புப்ப²னகானி. யானி உத³கா அனுக்³க³தானி அந்தோனிமுக்³க³போஸீனி, தானி ததியதி³வஸே புப்ப²னகானி. உத³கா பன அனுக்³க³தானி அஞ்ஞானிபி ஸரோக³உப்பலாதீ³னி நாம அத்தி², யானி நேவ புப்பி²ஸ்ஸந்தி மச்ச²கச்ச²பப⁴க்கா²னேவ ப⁴விஸ்ஸந்தி, தானி பாளிம் நாருள்ஹானி, ஆஹரித்வா பன தீ³பேதப்³பா³னீதி அட்ட²கதா²யம் பகாஸிதானி. யதே²வ ஹி தானி சதுப்³பி³தா⁴னி புப்பா²னி, ஏவமேவ உக்³க⁴டிதஞ்ஞூ விபஞ்சிதஞ்ஞூ நேய்யோ பத³பரமோதி சத்தாரோ புக்³க³லா.

தத்த² யஸ்ஸ புக்³க³லஸ்ஸ ஸஹ உதா³ஹடவேலாய த⁴ம்மாபி⁴ஸமயோ ஹோதி, அயம் ‘‘சத்தாரோ ஸதிபட்டா²னா’’திஆதி³னா நயேன ஸங்கி²த்தேன மாதிகாய ட²பியமானாய தே³ஸனானுஸாரேன ஞாணம் பேஸேத்வா அரஹத்தம் க³ண்ஹிதும் ஸமத்தோ² புக்³க³லோ உக்³க⁴டிதஞ்ஞூதி வுச்சதி. யஸ்ஸ புக்³க³லஸ்ஸ ஸங்கி²த்தேன பா⁴ஸிதஸ்ஸ வித்தா²ரேன அத்தே² விப⁴ஜியமானே த⁴ம்மாபி⁴ஸமயோ ஹோதி, அயம் வுச்சதி புக்³க³லோ விபஞ்சிதஞ்ஞூ. யஸ்ஸ புக்³க³லஸ்ஸ உத்³தே³ஸதோ பரிபுச்ச²தோ யோனிஸோ மனஸிகரோதோ கல்யாணமித்தே ஸேவதோ ப⁴ஜதோ பயிருபாஸதோ அனுபுப்³பே³ன த⁴ம்மாபி⁴ஸமயோ ஹோதி, அயம் வுச்சதி புக்³க³லோ நேய்யோ. யஸ்ஸ புக்³க³லஸ்ஸ ப³ஹும்பி ஸுணதோ ப³ஹும்பி ப⁴ணதோ ப³ஹும்பி தா⁴ரயதோ ப³ஹும்பி வாசயதோ ந தாய ஜாதியா த⁴ம்மாபி⁴ஸமயோ ஹோதி, தேன அத்தபா⁴வேன மக்³க³ம் வா ப²லம் வா அந்தமஸோ ஜா²னம் வா விபஸ்ஸனம் வா நிப்³ப³த்தேதும் ந ஸக்கோதி, அயம் வுச்சதி புக்³க³லோ பத³பரமோ. தத்த² ப⁴க³வா உப்பலவனாதி³ஸதி³ஸம் த³ஸஸஹஸ்ஸிலோகதா⁴தும் ஓலோகேந்தோ அஜ்ஜ புப்ப²னகானி விய உக்³க⁴டிதஞ்ஞூ, ஸ்வே புப்ப²னகானி விய விபஞ்சிதஞ்ஞூ, ததியதி³வஸே புப்ப²னகானி விய நேய்யே, மச்ச²கச்ச²பப⁴க்க²புப்பா²னி விய பத³பரமே ச அத்³த³ஸ, பஸ்ஸந்தோ ச ‘‘ஏத்தகா அப்பரஜக்கா², ஏத்தகா மஹாரஜக்கா², தத்ராபி ஏத்தகா உக்³க⁴டிதஞ்ஞூ’’தி ஏவம் ஸப்³பா³காரதோவ அத்³த³ஸ.

தத்த² திண்ணம் புக்³க³லானம் இமஸ்மிஞ்ஞேவ அத்தபா⁴வே ப⁴க³வதோ த⁴ம்மதே³ஸனா அத்த²ம் ஸாதே⁴தி. பத³பரமானம் அனாக³தத்தா²ய வாஸனா ஹோதி. அத² ப⁴க³வா இமேஸம் சதுன்னம் புக்³க³லானம் அத்தா²வஹம் த⁴ம்மதே³ஸனம் விதி³த்வா தே³ஸேதுகம்யதம் உப்பாதே³த்வா புன ஸப்³பே³பி தீஸு ப⁴வேஸு ஸத்தே ப⁴ப்³பா³ப⁴ப்³ப³வஸேன த்³வே கோட்டா²ஸே அகாஸி. யே ஸந்தா⁴ய வுத்தம் ‘‘யே தே ஸத்தா கம்மாவரணேன ஸமன்னாக³தா விபாகாவரணேன ஸமன்னாக³தா கிலேஸாவரணேன ஸமன்னாக³தா அஸ்ஸத்³தா⁴ அச்ச²ந்தி³கா து³ப்பஞ்ஞா அப⁴ப்³பா³ நியாமம் ஓக்கமிதும் குஸலேஸு த⁴ம்மேஸு ஸம்மத்தம், இமே தே ஸத்தா அப⁴ப்³பா³. கதமே தே ஸத்தா ப⁴ப்³பா³? யே தே ஸத்தா ந கம்மாவரணேன…பே… இமே தே ஸத்தா ப⁴ப்³பா³’’தி (விப⁴. 826-827). தத்த² ஸப்³பே³பி அப⁴ப்³ப³புக்³க³லே பஹாய ப⁴ப்³ப³புக்³க³லேயேவ ஞாணேன பரிக்³க³ஹேத்வா ‘‘ஏத்தகா ராக³சரிதா, ஏத்தகா தோ³ஸ, மோஹ, விதக்க, ஸத்³தா⁴, பு³த்³தி⁴சரிதா’’தி ச² கோட்டா²ஸே அகாஸி, ஏவம் கத்வா த⁴ம்மம் தே³ஸேஸ்ஸாமீதி சிந்தேஸி. ஏத்த² ச அப்பரஜக்கா²தி³ப⁴ப்³பா³தி³வஸேன ஆவஜ்ஜேந்தஸ்ஸ ப⁴க³வதோ தே ஸத்தா புஞ்ஜபுஞ்ஜாவ ஹுத்வா உபட்ட²ஹந்தி, ந ஏகேகாதி த³ட்ட²ப்³ப³ம்.

பச்சபா⁴ஸீதி பதிஅபா⁴ஸி. அபாருதாதி விவடா. அமதஸ்ஸ த்³வாராதி அரியமக்³கோ³. ஸோ ஹி அமதஸங்கா²தஸ்ஸ நிப்³பா³னஸ்ஸ த்³வாரம், ஸோ மயா விவரித்வா ட²பிதோ மஹாகருணூபனிஸ்ஸயேன ஸயம்பூ⁴ஞாணேன அதி⁴க³தத்தாதி த³ஸ்ஸேதி. ‘‘அபாருதம் தேஸம் அமதஸ்ஸ த்³வார’’ந்தி கேசி பட²ந்தி. பமுஞ்சந்து ஸத்³த⁴ந்தி ஸப்³பே³ அத்தனோ ஸத்³த⁴ம் முஞ்சந்து விஸ்ஸஜ்ஜேந்து பவேதே³ந்து, மயா தே³ஸிதே த⁴ம்மே மயி ச அத்தனோ ஸத்³த³ஹனாகாரம் உட்டா²பேந்தூதி அத்தோ². பச்சி²மபத³த்³வயே அயமத்தோ² – அஹஞ்ஹி அத்தனோ பகு³ணம் ஸுப்பவத்திதம்பி இமம் பணீதம் உத்தமம் த⁴ம்மம் காயவாசாகிலமத²ஸஞ்ஞீ ஹுத்வா ந பா⁴ஸிம், ந பா⁴ஸிஸ்ஸாமீதி சிந்தேஸிம், இதா³னி பன ஸப்³போ³ ஜனோ ஸத்³தா⁴பா⁴ஜனம் உபனேது, பூரேஸ்ஸாமி நேஸம் ஸங்கப்பந்தி. அந்தரதா⁴யீதி ஸத்தா²ரம் க³ந்த⁴மாலாதீ³ஹி பூஜேத்வா அந்தரஹிதோ, ஸகட்டா²னமேவ க³தோதி அத்தோ². ஸத்து²ஸந்திகஞ்ஹி உபக³தானம் தே³வானம் ப்³ரஹ்மானஞ்ச தஸ்ஸ புரதோ அந்தரதா⁴னம் நாம ஸகட்டா²னக³மனமேவ.

ப்³ரஹ்மயாசனகதா²வண்ணனா நிட்டி²தா.

பஞ்சவக்³கி³யகதா²வண்ணனா

10. ஏதத³ஹோஸீதி ஏதம் அஹோஸி, ‘‘கஸ்ஸ நு கோ² அஹம் பட²மம் த⁴ம்மம் தே³ஸேய்ய’’ந்தி அயம் த⁴ம்மதே³ஸனாபடிஸம்யுத்தோ விதக்கோ உத³பாதீ³தி அத்தோ². ஆளாரோதி தஸ்ஸ நாமம். தீ³க⁴பிங்க³லோ கிரேஸ. ஸோ ஹி துங்க³ஸரீரதாய தீ³கோ⁴, பிங்க³லசக்கு²தாய பிங்க³லோ, தேனஸ்ஸ ‘‘ஆளாரோ’’தி நாமம் அஹோஸி. காலாமோதி கோ³த்தம். பண்டி³தோதி (ம. நி. அட்ட². 1.284) பண்டி³ச்சேன ஸமன்னாக³தோ, ஸமாபத்திபடிலாப⁴ஸம்ஸித்³தே⁴ன அதி⁴க³மபா³ஹுஸச்சஸங்கா²தேன பண்டி³தபா⁴வேன ஸமன்னாக³தோதி அத்தோ². ப்³யத்தோதி வேய்யத்தியேன ஸமன்னாக³தோ, ஸமாபத்திபடிலாப⁴பச்சயேன பாரிஹாரிகபஞ்ஞாஸங்கா²தேன ப்³யத்தபா⁴வேன ஸமன்னாக³தோதி அத்தோ². மேதா⁴வீதி டா²னுப்பத்தியா பஞ்ஞாய ஸமன்னாக³தோ. அத² வா மேதா⁴வீதி திஹேதுகபடிஸந்தி⁴பஞ்ஞாஸங்கா²தாய தம்தம்இதிகத்தப்³ப³தாபஞ்ஞாஸங்கா²தாய ச மேதா⁴ய ஸமன்னாக³தோதி ஏவமேத்த² அத்தோ² த³ட்ட²ப்³போ³. அப்பரஜக்க²ஜாதிகோதி ஸமாபத்தியா விக்க²ம்பி⁴தத்தா நிக்கிலேஸஜாதிகோ விஸுத்³த⁴ஸத்தோ. ஆஜானிஸ்ஸதீதி ஸல்லக்கே²ஸ்ஸதி படிவிஜ்ஜி²ஸ்ஸதி.

ப⁴க³வதோபி கோ² ஞாணம் உத³பாதீ³தி ப⁴க³வதோபி ஸப்³ப³ஞ்ஞுதஞ்ஞாணம் உப்பஜ்ஜி. ப⁴க³வா கிர தே³வதாய கதி²தேனேவ நிட்ட²ம் அக³ந்த்வா ஸயம்பி ஸப்³ப³ஞ்ஞுதஞ்ஞாணேன ஓலோகேந்தோ இதோ ஸத்தமதி³வஸமத்த²கே காலம் கத்வா ஆகிஞ்சஞ்ஞாயதனே நிப்³ப³த்தோதி அத்³த³ஸ. தம் ஸந்தா⁴யாஹ ‘‘ப⁴க³வதோபி கோ² ஞாணம் உத³பாதீ³’’தி. மஹாஜானியோதி ஸத்ததி³வஸப்³ப⁴ந்தரே பத்தப்³ப³மக்³க³ப²லதோ பரிஹீனத்தா மஹதீ ஜானி பரிஹானி அஸ்ஸாதி மஹாஜானியோ. அக்க²ணே நிப்³ப³த்தத்தா² இத⁴ த⁴ம்மதே³ஸனட்டா²னம் ஆக³மனபாதா³பி நத்தி², அதா²ஹம் தத்த² க³ச்சே²ய்யம், க³ந்த்வா தே³ஸியமானம் த⁴ம்மம்பிஸ்ஸ ஸோதும் ஸோதபஸாதோ³பி நத்தி², ஏவம் மஹாஜானியோ ஜாதோதி த³ஸ்ஸேதி. கிம் பன ப⁴க³வதா தம் அத்தனோ பு³த்³தா⁴னுபா⁴வேன த⁴ம்மம் ஞாபேதும் ந ஸக்காதி? ஆம ந ஸக்கா, ந ஹி பரதோகோ⁴ஸமந்தரேன ஸாவகானம் த⁴ம்மாபி⁴ஸமயோ ஸம்ப⁴வதி, அஞ்ஞதா² இதரபச்சயரஹிதஸ்ஸபி த⁴ம்மாபி⁴ஸமயேன ப⁴விதப்³ப³ம், ந ச தம் அத்தி². வுத்தஞ்ஹேதம் – ‘‘த்³வேமே, பி⁴க்க²வே, பச்சயா ஸம்மாதி³ட்டி²யா உப்பாதா³ய பரதோ ச கோ⁴ஸோ அஜ்ஜ²த்தஞ்ச யோனிஸோமனஸிகாரோ’’தி (அ. நி. 2.127).

உத³கோதி தஸ்ஸ நாமம், ராமஸ்ஸ பன புத்ததாய ராமபுத்தோ. அபி⁴தோ³ஸகாலகதோதி அட்³ட⁴ரத்தே காலகதோ. ப⁴க³வதோபி கோ² ஞாணம் உத³பாதீ³தி இதா⁴பி கிர ப⁴க³வா தே³வதாய கதி²தவசனேன ஸன்னிட்டா²னம் அகத்வா ஸப்³ப³ஞ்ஞுதஞ்ஞாணேன ஓலோகேந்தோ ‘‘ஹிய்யோ அட்³ட⁴ரத்தே காலம் கத்வா உத³கோ ராமபுத்தோ நேவஸஞ்ஞானாஸஞ்ஞாயதனே நிப்³ப³த்தோ’’தி அத்³த³ஸ, தஸ்மா ஏவம் வுத்தம். ஸேஸம் புரிமஸதி³ஸமேவ.

ப³ஹூபகாராதி ப³ஹுஉபகாரா. பதா⁴னபஹிதத்தம் உபட்ட²ஹிம்ஸூதி பதா⁴னத்தா²ய பேஸிதத்தபா⁴வம் வஸனட்டா²னே பரிவேணஸம்மஜ்ஜனேன பத்தசீவரம் க³ஹேத்வா அனுப³ந்த⁴னேன முகோ²த³கத³ந்தகட்ட²தா³னாதி³னா ச உபட்ட²ஹிம்ஸு. கே பனேதே பஞ்சவக்³கி³யா நாம? யே தே –

ராமோ த⁴ஜோ லக்க²ணோ சாபி மந்தீ;

கோண்ட³ஞ்ஞோ ச போ⁴ஜோ ஸுயாமோ ஸுத³த்தோ;

ஏதே ததா³ அட்ட² அஹேஸும் ப்³ராஹ்மணா;

ச²ளங்க³வா மந்தம் வியாகரிம்ஸூதி. (ம. நி. அட்ட². 1.284; ஜா. அட்ட². 1.நிதா³னகதா²; அப. அட்ட². 1.அவிதூ³ரேனிதா³னகதா²);

போ³தி⁴ஸத்தஸ்ஸ ஜாதகாலே ஸுபினபடிக்³கா³ஹகா சேவ லக்க²ணபடிக்³கா³ஹகா ச அட்ட² ப்³ராஹ்மணா. தேஸு தயோ த்³வேதா⁴ ப்³யாகரிம்ஸு ‘‘இமேஹி லக்க²ணேஹி ஸமன்னாக³தோ அகா³ரம் அஜ்ஜா²வஸமானோ ராஜா ஹோஹிதி சக்கவத்தீ, பப்³ப³ஜமானோ பு³த்³தோ⁴’’தி. பஞ்ச ப்³ராஹ்மணா ஏகம்ஸப்³யாகரணா அஹேஸும் ‘‘இமேஹி லக்க²ணேஹி ஸமன்னாக³தோ அகா³ரே ந திட்ட²தி, பு³த்³தோ⁴வ ஹோதீ’’தி. தேஸு புரிமா தயோ யதா²மந்தபத³ம் க³தா. ஏதே ஹி லக்க²ணமந்தஸங்கா²தவேத³வசனானுரூபம் படிபன்னா த்³வே க³தியோ ப⁴வந்தி அனஞ்ஞாதி வுத்தனியாமேன நிச்சி²னிதும் அஸக்கோந்தா வுத்தமேவ படிபஜ்ஜிம்ஸு, ந மஹாபுரிஸஸ்ஸ பு³த்³த⁴பா⁴வப்பத்திம் பச்சாஸீஸிம்ஸு. இமே பன கோண்ட³ஞ்ஞாத³யோ பஞ்ச ‘‘ஏகம்ஸதோ பு³த்³தோ⁴ ப⁴விஸ்ஸதீ’’தி ஜாதனிச்ச²யத்தா மந்தபத³ம் அதிக்கந்தா. தே அத்தனா லத்³த⁴ம் துட்டி²தா³னம் ஞாதகானம் விஸ்ஸஜ்ஜேத்வா ‘‘அயம் மஹாபுரிஸோ அகா³ரே ந அஜ்ஜா²வஸிஸ்ஸதி, ஏகந்தேன பு³த்³தோ⁴ ப⁴விஸ்ஸதீ’’தி நிப்³பே³மதிகா போ³தி⁴ஸத்தம் உத்³தி³ஸ்ஸ ஸமணபப்³ப³ஜ்ஜம் பப்³ப³ஜிதா, தேஸம் புத்தாதிபி வத³ந்தி, தம் அட்ட²கதா²யம் படிக்கி²த்தம். ஏதே கிர த³ஹரகாலேவ ப³ஹூ மந்தே ஜானிம்ஸு, தஸ்மா நே ப்³ராஹ்மணா ஆசரியட்டா²னே ட²பயிம்ஸு. தே ‘‘பச்சா² அம்ஹேஹி புத்ததா³ரஜடம் சி²ந்தி³த்வா ந ஸக்கா ப⁴விஸ்ஸதி பப்³ப³ஜிது’’ந்தி த³ஹரகாலேயேவ பப்³ப³ஜித்வா ரமணீயானி ஸேனாஸனானி பரிபு⁴ஞ்ஜந்தா விசரிம்ஸு. காலேன காலம் பன ‘‘கிம் போ⁴ மஹாபுரிஸோ மஹாபி⁴னிக்க²மனம் நிக்க²ந்தோ’’தி புச்ச²ந்தி. மனுஸ்ஸா ‘‘குஹிம் தும்ஹே மஹாபுரிஸம் பஸ்ஸிஸ்ஸத², தீஸு பாஸாதே³ஸு விவித⁴னாடகமஜ்ஜே² தே³வோ விய ஸம்பத்திம் அனுபோ⁴தீ’’தி வத³ந்தி. தே ஸுத்வா ‘‘ந தாவ மஹாபுரிஸஸ்ஸ ஞாணம் பரிபாகம் க³ச்ச²தீ’’தி அப்போஸ்ஸுக்கா விஹரிம்ஸுயேவ.

கஸ்மா பனேத்த² ப⁴க³வா ‘‘ப³ஹுகாரா கோ² மே பஞ்சவக்³கி³யா’’தி ஆஹ. கிம் உபகாரகானம்யேவ ஏஸ த⁴ம்மம் தே³ஸேதி, அனுபகாரகானம் ந தே³ஸேதீதி? நோ ந தே³ஸேதி. பரிசயவஸேன ஹேஸ ஆளாரஞ்சேவ காலாமம் உத³கஞ்ச ராமபுத்தம் ஓலோகேஸி. ஏதஸ்மிம் பன பு³த்³த⁴க்கே²த்தே ட²பேத்வா அஞ்ஞாஸிகோண்ட³ஞ்ஞம் அஞ்ஞோ பட²மம் த⁴ம்மம் ஸச்சி²காதும் ஸமத்தோ² நாம நத்தி². கஸ்மா? ததா²வித⁴உபனிஸ்ஸயத்தா. புப்³பே³ கிர புஞ்ஞகரணகாலே த்³வே பா⁴தரோ அஹேஸும். தே ச ஏகதோ ஸஸ்ஸம் அகம்ஸு. தத்த² ஜேட்ட²ஸ்ஸ ‘‘ஏகஸ்மிம் ஸஸ்ஸே நவ வாரே அக்³க³ஸஸ்ஸதா³னம் மயா தா³தப்³ப³’’ந்தி அஹோஸி. ஸோ வப்பகாலே பீ³ஜக்³க³ம் நாம த³த்வா க³ப்³ப⁴காலே கனிட்டே²ன ஸத்³தி⁴ம் மந்தேஸி ‘‘க³ப்³ப⁴காலே க³ப்³ப⁴ம் பா²லேத்வா த³ஸ்ஸாமீ’’தி. கனிட்டோ² ‘‘தருணஸஸ்ஸம் நாஸேதுகாமோஸீ’’தி ஆஹ. ஜேட்டோ² கனிட்ட²ஸ்ஸ அனனுவத்தனபா⁴வம் ஞத்வா கே²த்தம் விப⁴ஜித்வா அத்தனோ கோட்டா²ஸதோ க³ப்³ப⁴ம் பா²லேத்வா கீ²ரம் நீஹரித்வா ஸப்பிபா²ணிதேன யோஜேத்வா அதா³ஸி, புது²ககாலே புது²கம் காரேத்வா அதா³ஸி, லாயனே லாயனக்³க³ம், வேணிகரணே வேணக்³க³ம், வேணியோ புரிஸபா⁴ரவஸேன ப³ந்தி⁴த்வா கலாபகரணே கலாபக்³க³ம், க²லே கலாபானம் ட²பனதி³வஸே க²லக்³க³ம், மத்³தி³த்வா வீஹீனம் ராஸிகரணதி³வஸே க²லப⁴ண்ட³க்³க³ம், கோட்டா²கா³ரே த⁴ஞ்ஞஸ்ஸ பக்கி²பனதி³வஸே கோட்ட²க்³க³ந்தி ஏவம் ஏகஸ்மிம் ஸஸ்ஸே நவ வாரே அக்³க³தா³னம் அதா³ஸி. கனிட்டோ² பன க²லதோ த⁴ஞ்ஞம் உத்³த⁴ரித்வா க³ஹணதி³வஸே அதா³ஸி. தேஸு ஜேட்டோ² அஞ்ஞாஸிகோண்ட³ஞ்ஞத்தே²ரோ ஜாதோ, கனிட்டோ² ஸுப⁴த்³த³பரிப்³பா³ஜகோ. இதி ஏகஸ்மிம் ஸஸ்ஸே நவன்னம் அக்³க³தா³னானம் தி³ன்னத்தா ட²பேத்வா தே²ரம் அஞ்ஞோ பட²மம் த⁴ம்மம் ஸச்சி²காதும் ஸமத்தோ² நாம நத்தி². ‘‘நவன்னம் அக்³க³தா³னானம் தி³ன்னத்தா’’தி இத³ஞ்ச தஸ்ஸ ரத்தஞ்ஞூனம் அக்³க³பா⁴வத்தா²ய கதாபி⁴னீஹாரானுரூபம் பவத்திதஸாவகபாரமியா சிண்ணந்தே பவத்திதத்தா வுத்தம். திண்ணம்பி ஹி போ³தி⁴ஸத்தானம் தம்தம்பாரமியா ஸிகா²ப்பத்தகாலே பவத்திதம் புஞ்ஞம் அபுஞ்ஞம் வா க³ருதரவிபாகமேவ ஹோதி, த⁴ம்மஸ்ஸ ச ஸப்³ப³பட²மம் ஸச்சி²கிரியாய வினா கத²ம் ரத்தஞ்ஞூனம் அக்³க³பா⁴வஸித்³தீ⁴தி? ‘‘ப³ஹுகாரா கோ² மே பஞ்சவக்³கி³யா’’தி இத³ம் பன உபகாரானுஸ்ஸரணமத்தகேனேவ வுத்தம்.

இஸிபதனே மிக³தா³யேதி தஸ்மிம் கிர பதே³ஸே அனுப்பன்னே பு³த்³தே⁴ பச்சேகஸம்பு³த்³தா⁴ க³ந்த⁴மாத³னபப்³ப³தே ஸத்தாஹம் நிரோத⁴ஸமாபத்தியா வீதினாமேத்வா நிரோதா⁴ வுட்டா²ய நாக³லதாத³ந்தகட்ட²ம் கா²தி³த்வா அனோதத்தத³ஹே முக²ம் தோ⁴வித்வா பத்தசீவரமாதா³ய ஆகாஸேன ஆக³ந்த்வா நிபதந்தி. தத்த² சீவரம் பாருபித்வா நக³ரே பிண்டா³ய சரித்வா கதப⁴த்தகிச்சா க³மனகாலேபி ததோயேவ உப்பதித்வா க³ச்ச²ந்தி. இதி இஸயோ ஏத்த² நிபதந்தி உப்பதந்தி சாதி தம் டா²னம் ‘‘இஸிபதன’’ந்தி ஸங்க²ம் க³தம், மிகா³னம் பன அப⁴யத்தா²ய தி³ன்னத்தா ‘‘மிக³தா³யோ’’தி வுச்சதி. தேன வுத்தம் ‘‘இஸிபதனே மிக³தா³யே’’தி. அஞ்ஞே பு³த்³தா⁴ பட²மம் த⁴ம்மதே³ஸனத்தா²ய க³ச்ச²ந்தா ஆகாஸேன க³ந்த்வா தத்தே²வ ஓதரந்தி, அம்ஹாகம் பன ப⁴க³வா உபகஸ்ஸ ஆஜீவகஸ்ஸ உபனிஸ்ஸயம் தி³ஸ்வா ‘‘உபகோ இமம் அத்³தா⁴னம் படிபன்னோ, ஸோ மம் தி³ஸ்வா ஸல்லபித்வா க³மிஸ்ஸதி, அத² புன நிப்³பி³ன்னோ ஆக³ம்ம அரஹத்தம் ஸச்சி²கரிஸ்ஸதீ’’தி ஞத்வா அட்டா²ரஸயோஜனம் மக்³க³ம் பத³ஸாவ அக³மாஸி. தேன வுத்தம் ‘‘யேன பா³ராணஸீ, தேன சாரிகம் பக்காமீ’’தி.

11. அந்தரா ச க³யம் அந்தரா ச போ³தி⁴ந்தி க³யாய ச போ³தி⁴ஸ்ஸ ச விவரே திகா³வுதந்தரே டா²னே. போ³தி⁴மண்ட³தோ ஹி க³யா தீணி கா³வுதானி, பா³ராணஸீ அட்டா²ரஸ யோஜனானி. உபகோ போ³தி⁴மண்ட³ஸ்ஸ ச க³யாய ச அந்தரே ப⁴க³வந்தம் அத்³த³ஸ. அந்தரா-ஸத்³தே³ன பன யுத்தத்தா உபயோக³வசனம் கதம். ஈதி³ஸேஸு ச டா²னேஸு அக்க²ரசிந்தகா ‘‘அந்தரா கா³மஞ்ச நதி³ஞ்ச யாதீ’’தி ஏவம் ஏகமேவ அந்தரா-ஸத்³த³ம் பயுஜ்ஜந்தி, ஸோ து³தியபதே³னபி யோஜேதப்³போ³ ஹோதி, அயோஜியமானே உபயோக³வசனம் ந பாபுணாதி ஸாமிவசனஸ்ஸ பஸங்கே³ அந்தரா-ஸத்³த³யோகே³ன உபயோக³வசனஸ்ஸ இச்சி²தத்தா. இத⁴ பன யோஜேத்வா ஏவ வுத்தோ. அத்³தா⁴னமக்³க³ந்தி அத்³தா⁴னஸங்கா²தம் மக்³க³ம், தீ³க⁴மக்³க³ந்தி அத்தோ². அத்³தா⁴னக³மனஸமயஸ்ஸ விப⁴ங்கே³ ‘‘அத்³த⁴யோஜனம் க³ச்சி²ஸ்ஸாமீதி பு⁴ஞ்ஜிதப்³ப³’’ந்திஆதி³வசனதோ (பாசி. 218) அத்³த⁴யோஜனம்பி அத்³தா⁴னமக்³கோ³ ஹோதி. போ³தி⁴மண்ட³தோ பன க³யா திகா³வுதம். விப்பஸன்னானீதி ஸுட்டு² பஸன்னானி. இந்த்³ரியானீதி மனச்ச²ட்டா²னி இந்த்³ரியானி. பரிஸுத்³தோ⁴தி நித்³தோ³ஸோ. பரியோதா³தோதி தஸ்ஸேவ வேவசனம். நிருபக்கிலேஸதாயேவ ஹி ஏஸ ‘‘பரியோதா³தோ’’தி வுத்தோ, ந ஸேதபா⁴வேன. ஏதஸ்ஸ பரியோதா³ததம் தி³ஸ்வாவ இந்த்³ரியானம் விப்பஸன்னதம் அஞ்ஞாஸி, நயக்³கா³ஹீபஞ்ஞா கிரேஸா தஸ்ஸ ஆஜீவகஸ்ஸ.

ஸப்³பா³பி⁴பூ⁴தி ஸப்³ப³ம் தேபூ⁴மகத⁴ம்மம் அபி⁴ப⁴வித்வா டி²தோ. ஸப்³ப³விதூ³தி ஸப்³ப³ம் சதுபூ⁴மகத⁴ம்மம் அவேதி³ம் அஞ்ஞாஸிம் ஸப்³ப³ஸோ ஞேய்யாவரணஸ்ஸ பஹீனத்தா. ஸப்³பே³ஸு த⁴ம்மேஸு அனூபலித்தோதி ஸப்³பே³ஸு தேபூ⁴மகத⁴ம்மேஸு ரஜ்ஜனது³ஸ்ஸனமுய்ஹனாதி³னா கிலேஸலேபேன அலித்தோ. ஸப்³ப³ஞ்ஜஹோதி ஸப்³ப³ம் தேபூ⁴மகத⁴ம்மம் ஜஹித்வா டி²தோ. அப்பஹாதப்³ப³ம்பி ஹி குஸலாப்³யாகதம் தப்படிப³த்³த⁴கிலேஸப்பஹானேன பஹீனத்தா ந ஹோதீதி ஜஹிதமேவ ஹோதி. தண்ஹக்க²யே விமுத்தோதி தண்ஹக்க²யே நிப்³பா³னே ஆரம்மணகரணவஸேன விமுத்தோ. ஸயம் அபி⁴ஞ்ஞாயாதி ஸப்³ப³ம் சதுபூ⁴மகத⁴ம்மம் அத்தனாவ ஜானித்வா. கமுத்³தி³ஸேய்யந்தி கம் அஞ்ஞம் ‘‘அயம் மே ஆசரியோ’’தி உத்³தி³ஸேய்யம்.

ந மே ஆசரியோ அத்தீ²தி லோகுத்தரத⁴ம்மே மய்ஹம் ஆசரியோ நாம நத்தி². கிஞ்சாபி ஹி லோகியத⁴ம்மானம்பி யாதி³ஸோ லோகனாத²ஸ்ஸ அதி⁴க³மோ, ந தாதி³ஸோ அதி⁴க³மோ பரூபதே³ஸோ அத்தி², லோகுத்தரத⁴ம்மே பனஸ்ஸ லேஸோபி நத்தி². நத்தி² மே படிபுக்³க³லோதி மய்ஹம் ஸீலாதீ³ஹி கு³ணேஹி படினிதி⁴பூ⁴தோ புக்³க³லோ நாம நத்தி². ஸம்மாஸம்பு³த்³தோ⁴தி ஹேதுனா நயேன சத்தாரி ஸச்சானி ஸயம் பு³த்³தோ⁴. ஸீதிபூ⁴தோதி ஸப்³ப³கிலேஸக்³கி³னிப்³பா³பனேன ஸீதிபூ⁴தோ, கிலேஸானம் யேவ நிப்³பு³தத்தா நிப்³பு³தோ.

காஸினம் புரந்தி காஸிரட்டே² நக³ரம். ஆஹஞ்ச²ந்தி ஆஹனிஸ்ஸாமி. அமதது³ந்து³பி⁴ந்தி வேனேய்யானம் அமதாதி⁴க³மாய உக்³கோ⁴ஸனாதி³ம் கத்வா ஸத்து² த⁴ம்மதே³ஸனா ‘‘அமதது³ந்து³பீ⁴’’தி வுத்தா, த⁴ம்மசக்கபடிலாபா⁴ய தம் அமதபே⁴ரிம் பஹரிஸ்ஸாமீதி க³ச்சா²மீதி வுத்தம் ஹோதி.

அரஹஸி அனந்தஜினோதி அனந்தஜினோபி ப⁴விதும் யுத்தோதி அத்தோ². அனந்தஞாணோ ஜிதகிலேஸோதி அனந்தஜினோ. ஹுபேய்யபாவுஸோதி ஆவுஸோ ஏவம்பி நாம ப⁴வேய்ய, ஏவம்விதே⁴ நாம ரூபரதனே ஈதி³ஸேன ஞாணேன ப⁴விதப்³ப³ந்தி அதி⁴ப்பாயோ. அயஞ்ஹிஸ்ஸ பப்³ப³ஜ்ஜாய பச்சயோ ஜாதோ. கதாதி⁴காரோ ஹேஸ. ததா² ஹி ப⁴க³வா தேன ஸமாக³மனத்த²ம் பத³ஸாவ தம் மக்³க³ம் படிபஜ்ஜி. பக்காமீதி வங்கஹாரஜனபத³ம் நாம அக³மாஸி.

தத்தே²கம் மிக³லுத்³த³ககா³மகம் நிஸ்ஸாய வாஸம் கப்பேஸி, ஜேட்ட²கலுத்³த³கோ தம் உபட்டா²ஸி. தஸ்மிஞ்ச ஜனபதே³ சண்டா³ மக்கி²கா ஹோந்தி. அத² நம் ஏகாய சாடியா வஸாபேஸும். மிக³லுத்³த³கோ தூ³ரம் மிக³வம் க³ச்ச²ந்தோ ‘‘அம்ஹாகம் அரஹந்தே மா பமஜ்ஜீ’’தி சாபம் நாம தீ⁴தரம் ஆணாபேத்வா அக³மாஸி ஸத்³தி⁴ம் புத்தபா⁴துகேஹி. ஸா சஸ்ஸ தீ⁴தா த³ஸ்ஸனீயா ஹோதி கோட்டா²ஸஸம்பன்னா. து³தியதி³வஸே உபகோ க⁴ரம் ஆக³தோ தம் தா³ரிகம் ஸப்³ப³ம் உபசாரம் கத்வா பரிவிஸிதும் உபக³தம் தி³ஸ்வா ராகே³ன அபி⁴பூ⁴தோ பு⁴ஞ்ஜிதும்பி அஸக்கோந்தோ பா⁴ஜனேன ப⁴த்தம் ஆதா³ய வஸனட்டா²னம் க³ந்த்வா ப⁴த்தம் ஏகமந்தம் நிக்கி²பித்வா ‘‘ஸசே சாபம் லபா⁴மி, ஜீவாமி. நோ சே, மராமீ’’தி நிராஹாரோ ஸயி. ஸத்தமே தி³வஸே மாக³விகோ ஆக³ந்த்வா தீ⁴தரம் உபகஸ்ஸ பவத்திம் புச்சி². ஸா ‘‘ஏகதி³வஸமேவ ஆக³ந்த்வா புன நாக³தபுப்³போ³’’தி ஆஹ.

மாக³விகோ ஆக³தவேஸேனேவ நம் உபஸங்கமித்வா புச்சி²ஸ்ஸாமீதி தங்க²ணம்யேவ க³ந்த்வா ‘‘கிம், ப⁴ந்தே, அபா²ஸுக’’ந்தி பாதே³ பராமஸந்தோ புச்சி². உபகோ நித்து²னந்தோ பரிவத்ததியேவ. ஸோ ‘‘வத³ ப⁴ந்தே, யம் மயா ஸக்கா காதும், ஸப்³ப³ம் கரிஸ்ஸாமீ’’தி ஆஹ. உபகோ ‘‘ஸசே சாபம் லபா⁴மி, ஜீவாமி, நோ சே, மய்ஹமேவ மரணம் ஸேய்யோ’’தி ஆஹ. ஜானாஸி கிர, ப⁴ந்தே, கிஞ்சி ஸிப்பந்தி? ந ஜானாமீதி. ந, ப⁴ந்தே, கிஞ்சி ஸிப்பம் அஜானந்தேன ஸக்கா க⁴ராவாஸம் அதி⁴ட்டா²துந்தி. ஸோ ஆஹ ‘‘நாஹம் கிஞ்சி ஸிப்பம் ஜானாமி, அபிச தும்ஹாகம் மம்ஸஹாரகோ ப⁴விஸ்ஸாமி, மம்ஸஞ்ச விக்கிணிஸ்ஸாமீ’’தி. மாக³விகோ ‘‘அம்ஹாகம்பி ஏததே³வ ருச்சதீ’’தி உத்தரஸாடகம் த³த்வா க⁴ரம் ஆனேத்வா தீ⁴தரம் அதா³ஸி. தேஸம் ஸம்வாஸமன்வாய புத்தோ விஜாயி, ‘‘ஸுப⁴த்³தோ³’’திஸ்ஸ நாமம் அகம்ஸு. சாபா தஸ்ஸ ரோத³னகாலே ‘‘மம்ஸஹாரகஸ்ஸ புத்த மிக³லுத்³த³கஸ்ஸ புத்த மா ரோதி³ மா ரோதீ³’’திஆதீ³னி வத³மானா புத்ததோஸனகீ³தேன உபகம் உப்பண்டே³ஸி. ‘‘ப⁴த்³தே³ த்வம் மம் அனாதோ²தி மஞ்ஞஸி, அத்தி² மே அனந்தஜினோ நாம ஸஹாயோ, தஸ்ஸாஹம் ஸந்திகம் க³மிஸ்ஸாமீ’’தி ஆஹ. சாபா ‘‘ஏவமயம் அட்டீயதீ’’தி ஞத்வா புனப்புனம் கதே²ஸி. ஸோ ஏகதி³வஸம் அனாரோசேத்வாவ மஜ்ஜி²மதே³ஸாபி⁴முகோ² பக்காமி.

ப⁴க³வா ச தேன ஸமயேன ஸாவத்தி²யம் விஹரதி ஜேதவனே, அத² கோ² ப⁴க³வா படிகச்சேவ பி⁴க்கூ² ஆணாபேஸி ‘‘யோ, பி⁴க்க²வே, அனந்தஜினோதி புச்ச²மானோ ஆக³ச்ச²தி, தஸ்ஸ மம் த³ஸ்ஸேய்யாதா²’’தி. உபகோபி கோ² ‘‘குஹிம் அனந்தஜினோ வஸதீ’’தி புச்ச²ந்தோ அனுபுப்³பே³ன ஸாவத்தி²ம் ஆக³ந்த்வா விஹாரமஜ்ஜே² ட²த்வா ‘‘குஹிம் அனந்தஜினோ’’தி புச்சி². தம் பி⁴க்கூ² ப⁴க³வதோ ஸந்திகம் நயிம்ஸு. ஸோ ச ப⁴க³வந்தம் தி³ஸ்வா ‘‘ஸஞ்ஜானாத² மம் ப⁴க³வா’’தி ஆஹ. ஆம உபக ஸஞ்ஜானாமி, குஹிம் பன த்வம் வஸித்தா²தி. வங்கஹாரஜனபதே³, ப⁴ந்தேதி. உபக மஹல்லகோஸி ஜாதோ, பப்³ப³ஜிதும் ஸக்கி²ஸ்ஸஸீதி. பப்³ப³ஜிஸ்ஸாமி, ப⁴ந்தேதி. ப⁴க³வா பப்³பா³ஜேத்வா தஸ்ஸ கம்மட்டா²னம் அதா³ஸி. ஸோ கம்மட்டா²னே கம்மம் கரோந்தோ அனாகா³மிப²லே பதிட்டா²ய காலம் கத்வா அவிஹேஸு நிப்³ப³த்தோ, நிப்³ப³த்திக்க²ணேயேவ ச அரஹத்தம் பாபுணி. அவிஹே நிப்³ப³த்தமத்தா ஹி ஸத்த ஜனா அரஹத்தம் பாபுணிம்ஸு, தேஸம் ஸோ அஞ்ஞதரோ. வுத்தஞ்ஹேதம் –

‘‘அவிஹம் உபபன்னாஸே, விமுத்தா ஸத்த பி⁴க்க²வோ;

ராக³தோ³ஸபரிக்கீ²ணா, திண்ணா லோகே விஸத்திகம்.

‘‘உபகோ பலக³ண்டோ³ ச, புக்குஸாதி ச தே தயோ;

ப⁴த்³தி³யோ க²ண்ட³தே³வோ ச, பா³ஹுரக்³கி³ ச ஸங்கி³யோ;

தே ஹித்வா மானுஸம் தே³ஹம், தி³ப்³ப³யோக³ம் உபச்சகு³’’ந்தி. (ஸம். நி. 1.50, 105);

12. ஸண்ட²பேஸுந்தி ‘‘நேவ அபி⁴வாதே³தப்³போ³’’திஆதி³னா கதிகம் அகம்ஸு. பா³ஹுல்லிகோதி சீவரபா³ஹுல்லாதீ³னம் அத்தா²ய படிபன்னோ. பதா⁴னவிப்³ப⁴ந்தோதி பதா⁴னதோ புப்³பே³ அனுட்டி²தது³க்கரசரணதோ விப்³ப⁴ந்தோ ப⁴ட்டோ² பரிஹீனோ. ஆவத்தோ பா³ஹுல்லாயாதி சீவராதி³ப³ஹுபா⁴வத்தா²ய ஆவத்தோ. அபிச கோ² ஆஸனம் ட²பேதப்³ப³ந்தி அபிச கோ² பனஸ்ஸ உச்சகுலே நிப்³ப³த்தஸ்ஸ ஆஸனமத்தம் ட²பேதப்³ப³ந்தி வதி³ம்ஸு. அஸண்ட²ஹந்தாதி பு³த்³தா⁴னுபா⁴வேன பு³த்³த⁴தேஜேன அபி⁴பூ⁴தா அத்தனோ கதிகாய டா²தும் அஸக்கோந்தா. நாமேன ச ஆவுஸோவாதே³ன ச ஸமுதா³சரந்தீதி ‘‘கோ³தமா’’தி ச ‘‘ஆவுஸோ’’தி ச வத³ந்தி, ‘‘ஆவுஸோ கோ³தம, மயம் உருவேலாயம் பதா⁴னகாலே துய்ஹம் பத்தசீவரம் க³ஹேத்வா விசரிம்ஹ, முகோ²த³கம் த³ந்தகட்ட²ம் அத³ம்ஹ, வுத்த²பரிவேணம் ஸம்மஜ்ஜிம்ஹ, பச்சா² தே கோ வத்தபடிபத்திம் அகாஸி, கச்சி அம்ஹேஸு பக்கந்தேஸு ந சிந்தயித்தா²’’தி ஏவரூபம் கத²ம் கதே²ந்தீதி அத்தோ².

ந சிரஸ்ஸேவாதி அசிரேனேவ. குலபுத்தாதி து³விதா⁴ குலபுத்தா ஜாதிகுலபுத்தா ஆசாரகுலபுத்தா ச, ஏதே பன உப⁴யதா²பி குலபுத்தாயேவ. அகா³ரஸ்மாதி க⁴ரா. அகா³ராய ஹிதம் அகா³ரியம், கஸிகோ³ரக்கா²தி³ குடும்ப³போஸனகம்மம் வுச்சதி. நத்தி² ஏத்த² அகா³ரியந்தி அனகா³ரியம். பப்³ப³ஜ்ஜாயேதம் அதி⁴வசனம். பப்³ப³ஜந்தீதி உபக³ச்ச²ந்தி உபஸங்கமந்தி. தத³னுத்தரந்தி தம் அனுத்தரம். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானம், அரஹத்தப²லந்தி வுத்தம் ஹோதி. தஸ்ஸ ஹி அத்தா²ய குலபுத்தா பப்³ப³ஜந்தி. தி³ட்டே²வ த⁴ம்மேதி தஸ்மிம்யேவ அத்தபா⁴வே. ஸயம் அபி⁴ஞ்ஞா ஸச்சி²கத்வாதி அத்தனோயேவ பஞ்ஞாய பச்சக்க²ம் கத்வா, அபரப்பச்சயம் கத்வாதி அத்தோ². உபஸம்பஜ்ஜ விஹரிஸ்ஸதா²தி பாபுணித்வா ஸம்பாதே³த்வா விஹரிஸ்ஸத².

இரியாயாதி து³க்கரஇரியாய. படிபதா³யாதி து³க்கரபடிபத்தியா. து³க்கரகாரிகாயாதி பஸதபஸதமுக்³க³யூஸாதி³ஆஹரணாதி³னா து³க்கரகரணேன. உத்தரி மனுஸ்ஸத⁴ம்மாதி மனுஸ்ஸத⁴ம்மதோ உபரி. அலம் அரியம் காதுந்தி அலமரியோ, அரியபா⁴வாய ஸமத்தோ²தி வுத்தம் ஹோதி, ஞாணத³ஸ்ஸனமேவ ஞாணத³ஸ்ஸனவிஸேஸோ, அலமரியோ ச ஸோ ஞாணத³ஸ்ஸனவிஸேஸோ சாதி அலமரியஞாணத³ஸ்ஸனவிஸேஸோ. ஞாணத³ஸ்ஸனந்தி ச தி³ப்³ப³சக்கு²பி விபஸ்ஸனாபி மக்³கோ³பி ப²லம்பி பச்சவேக்க²ணஞாணம்பி ஸப்³ப³ஞ்ஞுதஞ்ஞாணம்பி வுச்சதி. ‘‘அப்பமத்தோ ஸமானோ ஞாணத³ஸ்ஸனம் ஆராதே⁴தீ’’தி (ம. நி. 1.311) ஹி ஏத்த² தி³ப்³ப³சக்கு² ஞாணத³ஸ்ஸனம் நாம. ‘‘ஞாணத³ஸ்ஸனாய சித்தம் அபி⁴னீஹரதி அபி⁴னின்னாமேதீ’’தி (தீ³. நி. 1.235) ஏத்த² விபஸ்ஸனாஞாணம். ‘‘அப⁴ப்³பா³ தே ஞாணத³ஸ்ஸனாய அனுத்தராய ஸம்போ³தா⁴யா’’தி (அ. நி. 4.196) ஏத்த² மக்³கோ³. ‘‘அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி (ம. நி. 1.328) ஏத்த² ப²லம். ‘‘ஞாணஞ்ச பன மே த³ஸ்ஸனம் உத³பாதி³ ‘அகுப்பா மே சேதோவிமுத்தி, அயமந்திமா ஜாதி, நத்தி² தா³னி புனப்³ப⁴வோ’’’தி (ஸம். நி. 5.1081; மஹாவ. 16) ஏத்த² பச்சவேக்க²ணஞாணம். ‘‘ஞாணஞ்ச பன மே த³ஸ்ஸனம் உத³பாதி³ ‘ஸத்தாஹகாலகதோ ஆளாரோ காலாமோ’’’தி (ம. நி. 1.284; 2.340; மஹாவ. 10) ஏத்த² ஸப்³ப³ஞ்ஞுதஞ்ஞாணம். இத⁴ பன ஸப்³ப³ஞ்ஞுதஞ்ஞாணபத³ட்டா²னோ அரியமக்³கோ³ ஸப்³ப³ஞ்ஞுதஞ்ஞாணமேவ வா அதி⁴ப்பேதம்.

அபி⁴ஜானாத² மே நோதி அபி⁴ஜானாத² நு மே. ஏவரூபம் பபா⁴விதமேதந்தி ஏத்த² ஏவரூபம் வாக்யபே⁴த³ந்தி அத்தோ², அபி நு அஹம் உருவேலாயம் பதா⁴னே தும்ஹாகம் ஸங்க³ண்ஹனத்த²ம் அனுக்கண்ட²னத்த²ம் ரத்திம் வா தி³வா வா ஆக³ந்த்வா ‘‘ஆவுஸோ, மயம் யத்த² கத்த²சி க³மிஸ்ஸாமாதி மா விதக்கயித்த², மய்ஹம் ஓபா⁴ஸோ வா கம்மட்டா²னனிமித்தம் வா பஞ்ஞாயதீ’’தி ஏவரூபம் கஞ்சி வசனபே⁴த³ம் அகாஸிந்தி அதி⁴ப்பாயோ. தே ஏகபதே³னேவ ஸதிம் லபி⁴த்வா உப்பன்னகா³ரவா ‘‘அத்³தா⁴ ஏஸ பு³த்³தோ⁴ ஜாதோ’’தி ஸத்³த³ஹித்வா ‘‘நோ ஹேதம் ப⁴ந்தே’’தி ஆஹம்ஸு. அஸக்கி² கோ² ப⁴க³வா பஞ்சவக்³கி³யே பி⁴க்கூ² ஸஞ்ஞாபேதுந்தி ப⁴க³வா பஞ்சவக்³கி³யே பி⁴க்கூ² ‘‘பு³த்³தோ⁴ அஹ’’ந்தி ஜானாபேதும் அஸக்கி². அஞ்ஞா சித்தம் உபட்டா²பேஸுந்தி அஞ்ஞாய அரஹத்தப்பத்தியா சித்தம் உபட்ட²பேஸும் அபி⁴னீஹரிம்ஸு.

த⁴ம்மசக்கப்பவத்தனஸுத்தவண்ணனா

13. த்³வேமே, பி⁴க்க²வே, அந்தாதி த்³வே இமே, பி⁴க்க²வே, கோட்டா²ஸா, த்³வே பா⁴கா³தி அத்தோ². பா⁴க³வசனோ ஹேத்த² அந்த-ஸத்³தோ³ ‘‘புப்³ப³ந்தே ஞாணம் அபரந்தே ஞாண’’ந்திஆதீ³ஸு (த⁴. ஸ. 1063) விய. இமஸ்ஸ பன பத³ஸ்ஸ உச்சாரணஸமகாலம் பவத்தனிக்³கோ⁴ஸோ பு³த்³தா⁴னுபா⁴வேன ஹேட்டா² அவீசிம் உபரி ப⁴வக்³க³ம் பத்வா த³ஸஸஹஸ்ஸிலோகதா⁴தும் ப²ரித்வா அட்டா²ஸி. தஸ்மிம்யேவ ஸமயே பரிபக்ககுஸலமூலா ஸச்சாபி⁴ஸம்போ³தா⁴ய கதாதி⁴காரா அட்டா²ரஸகோடிஸங்கா² ப்³ரஹ்மானோ ஸமாக³ச்சி²ம்ஸு. பச்சி²மதி³ஸாய ஸூரியோ அத்த²மேதி, பாசீனதி³ஸாய ஆஸாள்ஹனக்க²த்தேன யுத்தோ புண்ணசந்தோ³ உக்³க³ச்ச²தி. தஸ்மிம் ஸமயே ப⁴க³வா த⁴ம்மசக்கப்பவத்தனஸுத்தம் ஆரப⁴ந்தோ ‘‘த்³வேமே, பி⁴க்க²வே, அந்தா’’திஆதி³மாஹ.

தத்த² பப்³ப³ஜிதேனாதி கி³ஹிப³ந்த⁴னம் சே²த்வா பப்³ப³ஜ்ஜுபக³தேன. ந ஸேவிதப்³பா³தி ந வளஞ்ஜேதப்³பா³ நானுயுஞ்ஜிதப்³பா³. யோ சாயம் காமேஸு காமஸுக²ல்லிகானுயோகோ³தி யோ ச அயம் வத்து²காமேஸு கிலேஸகாமஸுக²ஸ்ஸ அனுயோகோ³, கிலேஸகாமஸம்யுத்தஸ்ஸ ஸுக²ஸ்ஸ அனுக³தோதி அத்தோ². ஹீனோதி லாமகோ. க³ம்மோதி கா³மவாஸீனம் ஸந்தகோ தேஹி ஸேவிதப்³ப³தாய. போது²ஜ்ஜனிகோதி புது²ஜ்ஜனேன அந்த⁴பா³லஜனேன ஆசிண்ணோ. அனரியோதி ந அரியோ ந விஸுத்³தோ⁴ ந உத்தமோ, ந வா அரியானம் ஸந்தகோ. அனத்த²ஸம்ஹிதோதி ந அத்த²ஸம்ஹிதோ, ஹிதஸுகா²வஹகாரணம் அனிஸ்ஸிதோதி அத்தோ². அத்தகிலமதா²னுயோகோ³தி அத்தனோ கிலமத²ஸ்ஸ அனுயோகோ³, து³க்க²கரணம் து³க்கு²ப்பாத³னந்தி அத்தோ². து³க்கோ²தி கண்டகாபஸ்ஸயஸேய்யாதீ³ஹி அத்தபா³த⁴னேஹி து³க்கா²வஹோ. மஜ்ஜி²மா படிபதா³தி அரியமக்³க³ம் ஸந்தா⁴ய வுத்தம். மக்³கோ³ ஹி காமஸுக²ல்லிகானுயோகோ³ ஏகோ அந்தோ, அத்தகிலமதா²னுயோகோ³ ஏகோ அந்தோ, ஏதே த்³வே அந்தே ந உபேதி ந உபக³ச்ச²தி, விமுத்தோ ஏதேஹி அந்தேஹி, தஸ்மா ‘‘மஜ்ஜி²மா படிபதா³’’தி வுச்சதி. ஏதேஸம் மஜ்ஜே² ப⁴வத்தா மஜ்ஜி²மா, வட்டது³க்க²னிஸ்ஸரணத்தி²கேஹி படிபஜ்ஜிதப்³ப³தோ ச படிபதா³தி, ததா² லோபோ⁴ ஏகோ அந்தோ, தோ³ஸோ ஏகோ அந்தோ. ஸஸ்ஸதம் ஏகம் அந்தம், உச்சே²தோ³ ஏகோ அந்தோதி புரிமனயேனேவ வித்தா²ரேதப்³ப³ம்.

சக்கு²கரணீதிஆதீ³ஹி தமேவ படிபத³ம் தோ²மேதி. பஞ்ஞாசக்கு²ம் கரோதீதி சக்கு²கரணீ. ஸா ஹி சதுன்னம் ஸச்சானம் த³ஸ்ஸனாய ஸம்வத்ததி பரிஞ்ஞாபி⁴ஸமயாதி³பே⁴த³ஸ்ஸ த³ஸ்ஸனஸ்ஸ பவத்தனட்டே²னாதி ‘‘சக்கு²கரணீ’’தி வுச்சதி. தயித³ம் ஸதிபி படிபதா³ய அனஞ்ஞத்தே அவயவவஸேன ஸிஜ்ஜ²மானோ அத்தோ² ஸமுதா³யேன கதோ நாம ஹோதீதி உபசாரவஸேன வுத்தந்தி த³ட்ட²ப்³ப³ம். து³தியபத³ம் தஸ்ஸேவ வேவசனம். உபஸமாயாதி கிலேஸுபஸமத்தா²ய. அபி⁴ஞ்ஞாயாதி சதுன்னம் ஸச்சானம் அபி⁴ஜானனத்தா²ய. ஸம்போ³தா⁴யாதி தேஸம்யேவ ஸம்பு³ஜ்ஜ²னத்தா²ய. நிப்³பா³னாயாதி நிப்³பா³னஸச்சி²கிரியாய. அத² வா நிப்³பா³னாயாதி அனுபாதி³ஸேஸனிப்³பா³னாய. ‘‘உபஸமாயா’’தி ஹி இமினா ஸஉபாதி³ஸேஸனிப்³பா³னம் க³ஹிதம்.

இதா³னி தம் மஜ்ஜி²மப்படிபத³ம் ஸரூபதோ த³ஸ்ஸேதுகாமோ ‘‘கதமா ச ஸா’’தி புச்சி²த்வா ‘‘அயமேவா’’திஆதி³னா நயேன விஸ்ஸஜ்ஜேஸி. தத்த² அயமேவாதி அவதா⁴ரணவசனம் அஞ்ஞஸ்ஸ நிப்³பா³னகா³மிமக்³க³ஸ்ஸ அத்தி²பா⁴வபடிஸேத⁴னத்த²ம். ஸத்தாபடிக்கே²போ ஹி இத⁴ படிஸேத⁴னம் அலப்³ப⁴மானத்தா அஞ்ஞஸ்ஸ மக்³க³ஸ்ஸ. அரியோதி கிலேஸானம் ஆரகத்தா அரியோ நிருத்தினயேன. அரிபஹானாய ஸம்வத்ததீதிபி அரியோ அரயோ பாபத⁴ம்மா யந்தி அபக³ச்ச²ந்தி ஏதேனாதி கத்வா. அரியேன ப⁴க³வதா தே³ஸிதத்தா அரியஸ்ஸ அயந்திபி அரியோ, அரியபா⁴வப்படிலாபா⁴ய ஸம்வத்ததீதிபி அரியோ. ஏத்த² பன அரியகரோ அரியோதிபி உத்தரபத³லோபேன அரிய-ஸத்³த³ஸித்³தி⁴ வேதி³தப்³பா³. அட்ட²ஹி அங்கே³ஹி உபேதத்தா அட்ட²ங்கி³கோ. மக்³க³ங்க³ஸமுதா³யே ஹி மக்³க³வோஹாரோ, ஸமுதா³யோ ச ஸமுதா³யீஹி ஸமன்னாக³தோ நாம ஹோதி. அயம் பனேத்த² வசனத்தோ² – அத்தனோ அவயவபூ⁴தானி அட்ட²ங்கா³னி ஏதஸ்ஸ ஸந்தீதி அட்ட²ங்கி³கோதி. பரமத்த²தோ பன அங்கா³னியேவ மக்³கோ³ பஞ்சங்கி³கதூரியாதீ³னி விய, ந ச அங்க³வினிமுத்தோ ச²ளங்கோ³ வேதோ³ விய. கிலேஸே மாரேந்தோ க³ச்ச²தீதி மக்³கோ³ நிருத்தினயேன, நிப்³பா³னம் மக்³க³தி க³வேஸதீதி வா மக்³கோ³. அரியமக்³கோ³ ஹி நிப்³பா³னம் ஆரம்மணம் கரோந்தோ க³வேஸந்தோ விய ஹோதி. நிப்³பா³னத்தி²கேஹி மக்³கீ³யதீதி வா மக்³கோ³ விவட்டூபனிஸ்ஸயபுஞ்ஞகரணதோ பட்டா²ய தத³த்த²படிபத்திதோ. க³ம்மதி வா தேஹி படிபஜ்ஜீயதீதி மக்³கோ³. ஏத்த² பன ஆதி³அந்தவிபரியாயேன ஸத்³த³ஸித்³தி⁴ வேதி³தப்³பா³.

ஸேய்யதி²த³ந்தி நிபாதோ, தஸ்ஸ கதமோ ஸோ இதி சேதி அத்தோ², கதமானி வா தானி அட்ட²ங்கா³னீதி. ஸப்³ப³லிங்க³விப⁴த்திவசனஸாதா⁴ரணோ ஹி அயம் நிபாதோ. ஏகமேகம்பி அங்க³ம் மக்³கோ³யேவ. யதா²ஹ ‘‘ஸம்மாதி³ட்டி² மக்³கோ³ சேவ ஹேது சா’’தி (த⁴. ஸ. 1039). போராணாபி ப⁴ணந்தி ‘‘த³ஸ்ஸனமக்³கோ³ ஸம்மாதி³ட்டி², அபி⁴னிரோபனமக்³கோ³ ஸம்மாஸங்கப்போ…பே… அவிக்கே²பமக்³கோ³ ஸம்மாஸமாதீ⁴’’தி. நனு ச அங்கா³னி ஸமுதி³தானி மக்³கோ³ அந்தமஸோ ஸத்தங்க³விகலஸ்ஸ அரியமக்³க³ஸ்ஸ அபா⁴வதோதி? ஸச்சமேதம் ஸச்சஸம்படிவேதே⁴, மக்³க³ப்பச்சயதாய பன யதா²ஸகம் கிச்சகரணேன பச்சேகம்பி தானி மக்³கோ³யேவ, அஞ்ஞதா² ஸமுதி³தானம்பி தேஸம் மக்³க³கிச்சம் ந ஸம்ப⁴வேய்யாதி. ஸம்மாதி³ட்டி²ஆதீ³ஸு ஸம்மா பஸ்ஸதீதி ஸம்மாதி³ட்டி², ஸம்மா ஸங்கப்பேதி ஸம்பயுத்தத⁴ம்மே நிப்³பா³னஸங்கா²தே ஆரம்மணே அபி⁴னிரோபேதீதி ஸம்மாஸங்கப்போ, ஸம்மா வத³தி ஏதாயாதி ஸம்மாவாசா, ஸம்மா கரோதி ஏதேனாதி ஸம்மாகம்மம், ததே³வ ஸம்மாகம்மந்தோ, ஸம்மா ஆஜீவதி ஏதேனாதி ஸம்மாஆஜீவோ, ஸம்மா வாயமதி உஸ்ஸஹதீதி ஸம்மாவாயாமோ, ஸம்மா ஸரதி அனுஸ்ஸரதீதி ஸம்மாஸதி, ஸம்மா ஸமாதி⁴யதி சித்தம் ஏதேனாதி ஸம்மாஸமாதீ⁴தி ஏவம் நிப்³ப³சனம் வேதி³தப்³ப³ம். இதா³னி அயம் கோ² ஸா பி⁴க்க²வேதி தமேவ படிபத³ம் நிக³மேந்தோ ஆஹ. தஸ்ஸத்தோ² – ய்வாயம் சத்தாரோபி லோகுத்தரமக்³கே³ ஏகதோ கத்வா கதி²தோ அட்ட²ங்கி³கோ மக்³கோ³, அயம் கோ² ஸா பி⁴க்க²வே…பே… நிப்³பா³னாய ஸம்வத்ததீதி.

14. ஏவம் மஜ்ஜி²மபடிபத³ம் ஸரூபதோ த³ஸ்ஸேத்வா இதா³னி சத்தாரி அரியஸச்சானி த³ஸ்ஸேதும் ‘‘இத³ம் கோ² பன, பி⁴க்க²வே’’திஆதி³மாஹ. தத்த² (விஸுத்³தி⁴. 2.530) து³க்க²ந்தி ஏத்த² து³-இதி அயம் ஸத்³தோ³ குச்சி²தே தி³ஸ்ஸதி. குச்சி²தஞ்ஹி புத்தம் ‘‘து³புத்தோ’’தி வத³ந்தி, க²ம்-ஸத்³தோ³ பன துச்சே². துச்ச²ஞ்ஹி ஆகாஸம் ‘‘க²’’ந்தி வுச்சதி. இத³ஞ்ச பட²மஸச்சம் குச்சி²தம் அனேகஉபத்³த³வாதி⁴ட்டா²னதோ, துச்ச²ம் பா³லஜனபரிகப்பிதது⁴வஸுப⁴ஸுக²த்தபா⁴வவிரஹிததோ, தஸ்மா குச்சி²தத்தா துச்ச²த்தா ச ‘‘து³க்க²’’ந்தி வுச்சதி. யஸ்மா பனேதம் பு³த்³தா⁴த³யோ அரியா படிவிஜ்ஜ²ந்தி, தஸ்மா ‘‘அரியஸச்ச’’ந்தி வுச்சதி. அரியபடிவிஜ்ஜி²தப்³ப³ஞ்ஹி ஸச்சம் புரிமபதே³ உத்தரபத³லோபேன ‘‘அரியஸச்ச’’ந்தி வுத்தம். அரியஸ்ஸ ததா²க³தஸ்ஸ ஸச்சந்திபி அரியஸச்சம். ததா²க³தேன ஹி ஸயம் அதி⁴க³தத்தா பவேதி³தத்தா ததோ ஏவ ச அஞ்ஞேஹி அதி⁴க³மனீயத்தா தம் தஸ்ஸ ஹோதீதி. அத² வா ஏதஸ்ஸ அபி⁴ஸம்பு³த்³த⁴த்தா அரியபா⁴வஸித்³தி⁴தோ அரியஸாத⁴கம் ஸச்சந்திபி அரியஸச்சம் புப்³பே³ விய உத்தரபத³லோபேன. அவிதத²பா⁴வேன வா அரணீயத்தா அதி⁴க³ந்தப்³ப³த்தா அரியம் ஸச்சந்திபி அரியஸச்சம். ஸச்சத்த²ம் பன சதுன்னம்பி ஸச்சானம் பரதோ ஏகஜ்ஜ²ம் த³ஸ்ஸயிஸ்ஸாம.

இதா³னி தம் து³க்க²ம் அரியஸச்சம் ஸரூபதோ த³ஸ்ஸேதும் ‘‘ஜாதிபி து³க்கா²’’திஆதி³மாஹ. தத்ராயம் ஜாதி-ஸத்³தோ³ அனேகத்தோ². ததா² ஹேஸ ‘‘ஏகம்பி ஜாதிம் த்³வேபி ஜாதியோ’’தி (தீ³. நி. 1.31; ம. நி. 1.148) ஏத்த² ப⁴வே ஆக³தோ. ‘‘அத்தி², விஸாகே², நிக³ண்டா² நாம ஸமணஜாதீ’’தி (அ. நி. 3.71) ஏத்த² நிகாயே. ‘‘ஜாதி த்³வீஹி க²ந்தே⁴ஹி ஸங்க³ஹிதா’’தி (தா⁴து. 71) ஏத்த² ஸங்க²தலக்க²ணே. ‘‘யம் மாதுகுச்சி²ஸ்மிம் பட²மம் சித்தம் உப்பன்னம் பட²மம் விஞ்ஞாணம் பாதுபூ⁴தம், தது³பாதா³ய ஸாவஸ்ஸ ஜாதீ’’தி (மஹாவ. 124) ஏத்த² படிஸந்தி⁴யம். ‘‘ஸம்பதிஜாதோ, ஆனந்த³, போ³தி⁴ஸத்தோ’’தி (தீ³. நி. 2.31; ம. நி. 3.207) ஏத்த² பஸூதியம். ‘‘அக்கி²த்தோ அனுபகுட்டோ² ஜாதிவாதே³னா’’தி (தீ³. நி. 1.303) ஏத்த² குலே. ஸ்வாயமித⁴ க³ப்³ப⁴ஸேய்யகானம் படிஸந்தி⁴தோ பட்டா²ய யாவ மாதுகுச்சி²ம்ஹா நிக்க²மனம், தாவ பவத்தேஸு க²ந்தே⁴ஸு, இதரேஸம் படிஸந்தி⁴க்க²ணேஸ்வேவாதி த³ட்ட²ப்³போ³. அயம்பி ச பரியாயகதா²வ, நிப்பரியாயதோ பன தத்த² தத்த² நிப்³ப³த்தமானானம் ஸத்தானம் யே க²ந்தா⁴ பாதுப⁴வந்தி, தேஸம் பட²மபாதுபா⁴வோ ஜாதி நாம.

கஸ்மா பனேஸா து³க்கா²தி சே? அனேகேஸம் து³க்கா²னம் வத்து²பா⁴வதோ. அனேகானி ஹி து³க்கா²னி. ஸேய்யதி²த³ம் – து³க்க²து³க்க²ம் விபரிணாமது³க்க²ம் ஸங்கா²ரது³க்க²ம் படிச்ச²ன்னது³க்க²ம் அப்படிச்ச²ன்னது³க்க²ம் பரியாயது³க்க²ம் நிப்பரியாயது³க்க²ந்தி. தத்த² காயிகசேதஸிகா து³க்கா² வேத³னா ஸபா⁴வதோ ச நாமதோ ச து³க்க²த்தா து³க்க²து³க்க²ந்தி வுச்சதி. ஸுகா² வேத³னா விபரிணாமது³க்கு²ப்பத்திஹேதுதோ விபரிணாமது³க்க²ம். உபேக்கா² வேத³னா சேவ ஸேஸா ச தேபூ⁴மகா ஸங்கா²ரா உத³யப்³ப³யபீளிதத்தா ஸங்கா²ரது³க்க²ம். கண்ணஸூலத³ந்தஸூலராக³ஜபரிளாஹதோ³ஸஜபரிளாஹாதி³காயிகசேதஸிகா ஆபா³தா⁴ புச்சி²த்வா ஜானிதப்³ப³தோ உபக்கமஸ்ஸ ச அபாகடபா⁴வதோ படிச்ச²ன்னது³க்க²ம். த்³வத்திம்ஸகம்மகாரணாதி³ஸமுட்டா²னோ ஆபா³தோ⁴ அபுச்சி²த்வாவ ஜானிதப்³ப³தோ உபக்கமஸ்ஸ ச பாகடபா⁴வதோ அப்படிச்ச²ன்னது³க்க²ம். ட²பேத்வா து³க்க²து³க்க²ம் ஸேஸது³க்க²ம் ஸச்சவிப⁴ங்கே³ ஆக³தம் ஜாதிஆதி³ ஸப்³ப³ம்பி தஸ்ஸ தஸ்ஸ து³க்க²ஸ்ஸ வத்து²பா⁴வதோ பரியாயது³க்க²ம். து³க்க²து³க்க²ம் பன நிப்பரியாயது³க்க²ந்தி வுச்சதி. தத்ராயம் ஜாதி யம் தம் பா³லபண்டி³தஸுத்தாதீ³ஸு (ம. நி. 3.246 ஆத³யோ) ப⁴க³வதாபி உபமாவஸேன பகாஸிதம் ஆபாயிகம் து³க்க²ம், யஞ்ச ஸுக³தியம்பி மனுஸ்ஸலோகே க³ப்³போ⁴க்கந்திமூலகாதி³பே⁴த³ம் து³க்க²ம் உப்பஜ்ஜதி, தஸ்ஸ வத்து²பா⁴வதோ து³க்கா². தேனாஹு போராணா –

‘‘ஜாயேத² நோ சே நரகேஸு ஸத்தோ;

தத்த²க்³கி³தா³ஹாதி³கமப்பஸய்ஹம்;

லபே⁴த² து³க்க²ம் ந குஹிம் பதிட்ட²ம்;

இச்சாஹ து³க்கா²தி முனீத⁴ ஜாதிம்.