3. நிஸ்ஸக்³கி³யகண்ட³ம் (பி⁴க்கு²னீவிப⁴ங்க³வண்ணனா)

733. நிஸ்ஸக்³கி³யேஸு பட²மம் உத்தானமேவ.

740. து³தியே ‘‘அய்யாய த³ம்மீதி ஏவம் படிலத்³த⁴ந்தி நிஸ்ஸட்ட²படிலத்³த⁴ம். தேனேவ மாதிகாட்ட²கதா²யம்பி ‘‘நிஸ்ஸட்ட²ம் படிலபி⁴த்வாபி யதா²தா³னேயேவ உபனேதப்³ப³’’ந்தி வுத்தம். யதா²தா³னேயேவ உபனேதப்³ப³ந்தி யதா² தா³யகேன தி³ன்னம், ததா² உபனேதப்³ப³ம், அகாலசீவரபக்கே²யேவ ட²பேதப்³ப³ந்தி வுத்தம் ஹோதி. ஏத்த² ச பா⁴ஜாபிதாய லத்³த⁴சீவரமேவ நிஸ்ஸக்³கி³யம் ஹோதி, தம் வினயகம்மம் கத்வாபி அத்தனா ந லப⁴தி. ஸேஸமேத்த² உத்தானமேவ. அகாலசீவரதா, ததா²ஸஞ்ஞிதா, காலசீவரந்தி அதி⁴ட்டா²ய லேஸேன பா⁴ஜாபனம், படிலாபோ⁴தி இமானி பனேத்த² சத்தாரி அங்கா³னி.

743. ததியே மேதந்தி மே ஏதம். ஸகஸஞ்ஞாய க³ஹிதத்தா பாசித்தியம் து³க்கடஞ்ச வுத்தம். இதரதா² ப⁴ண்ட³க்³கே⁴ன காரேதப்³ப³ம். உபஸம்பன்னதா, பரிவத்திதசீவரஸ்ஸ விகப்பனுபக³தா, ஸகஸஞ்ஞாய அச்சி²ந்த³னம் வா அச்சி²ந்தா³பனம் வாதி இமானி பனேத்த² தீணி அங்கா³னி.

748-752. சதுத்தே² ஆஹடஸப்பிம் த³த்வாதி அத்தனோ த³த்வா. யமகம் பசிதப்³ப³ந்தி ஸப்பிஞ்ச தேலஞ்ச ஏகதோ கத்வா பசிதப்³ப³ம். லேஸேன க³ஹேதுகாமதா, அஞ்ஞஸ்ஸ விஞ்ஞாபனம், படிலாபோ⁴தி இமானி பனேத்த² தீணி அங்கா³னி.

753. பஞ்சமே ஸாதி து²ல்லனந்தா³. அயந்தி அயம் ஸிக்க²மானா. சேதாபேத்வாதி ஜானாபேத்வா இச்சேவ அத்தோ²தி இத⁴ வுத்தம், மாதிகாட்ட²கதா²யம் (கங்கா². அட்ட². அஞ்ஞசேதாபனஸிக்கா²பத³வண்ணனா) பன ‘‘அஞ்ஞம் சேதாபேத்வாதி அத்தனோ கப்பியப⁴ண்டே³ன இத³ம் நாம ஆஹராதி அஞ்ஞம் பரிவத்தாபேத்வா’’தி வுத்தம், தஸ்மா ‘‘சேதாபேத்வா’’தி இமஸ்ஸ பரிவத்தாபேத்வாதிபி அத்தோ² த³ட்ட²ப்³போ³. அஞ்ஞம் சேதாபேய்யாதி ‘‘ஏவம் மே இத³ம் த³த்வா அஞ்ஞம்பி ஆஹரிஸ்ஸதீ’’தி மஞ்ஞமானா ‘‘ந மே இமினா அத்தோ², இத³ம் நாம மே ஆஹரா’’தி ததோ அஞ்ஞம் சேதாபேய்ய.

758. ச²ட்டே² த⁴ம்மகிச்சந்தி புஞ்ஞகம்மம். பாவாரிகஸ்ஸாதி து³ஸ்ஸவாணிஜகஸ்ஸ. யாய சேதாபிதம், தஸ்ஸாயேவ நிஸ்ஸக்³கி³யம் நிஸ்ஸட்ட²படிலாபோ⁴ ச, தஸ்மா தாய பி⁴க்கு²னியா நிஸ்ஸட்ட²ம் படிலபி⁴த்வா யதா²தா³னே உபனேதப்³ப³ம், ந அத்தனா க³ஹேதப்³ப³ம். அஞ்ஞஸ்ஸத்தா²யாதி சீவராதீ³ஸு அஞ்ஞதரஸ்ஸத்தா²ய. அஞ்ஞுத்³தி³ஸிகேனாதி புரிமஸ்ஸேவத்த²தீ³பனம். பரிக்கா²ரேனாதி கப்பியப⁴ண்டே³ன.

764. ஸத்தமே ஸயம் யாசிதகேனாதி ஸயம் யாசிதகேனாபீதி அத்தோ². தேனேவ பாளியம் ‘‘தேன ச பரிக்கா²ரேன ஸயம்பி யாசித்வா’’தி வுத்தம், ததோயேவ மாதிகாட்ட²கதா²யம் ‘‘ஸஞ்ஞாசிகேனாதி ஸயம் யாசிதகேனாபீ’’தி அத்தோ² வுத்தோ.

768-773. அட்ட²மனவமத³ஸமானி உத்தானத்தா²னேவ.

784. ஏகாத³ஸமே யஸ்மா பவாரிதட்டா²னே விஞ்ஞத்தி நாம ந படிஸேதே⁴தப்³பா³, தஸ்மா ப⁴க³வா த⁴ம்மனிமந்தனவஸேன பவாரிதட்டா²னே ‘‘வதே³ய்யாஸி யேனத்தோ²’’தி வுத்தாய ‘‘சதுக்கம்ஸபரமம் விஞ்ஞாபேதப்³ப³’’ந்தி பரிச்சே²த³ம் த³ஸ்ஸேதீதி வேதி³தப்³ப³ம். தேனேவ மாதிகாட்ட²கதா²யம் (கங்கா². அட்ட². க³ருபாவுரணஸிக்கா²பத³வண்ணனா) ‘‘சேதாபேதப்³ப³ந்தி ட²பேத்வா ஸஹத⁴ம்மிகே ச ஞாதகபவாரிதே ச அஞ்ஞேன கிஸ்மிஞ்சிதே³வ கு³ணே பரிதுட்டே²ன வதே³ய்யாஸி யேனத்தோ²தி வுத்தாய விஞ்ஞாபேதப்³ப³’’ந்தி வுத்தம்.

788. த்³வாத³ஸமம் உத்தானத்த²மேவ.

பி⁴க்கு²னீவிப⁴ங்கே³ நிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

நிஸ்ஸக்³கி³யகண்ட³ம் நிட்டி²தம்.