4. பாசித்தியகண்ட³ம் (பி⁴க்கு²னீவிப⁴ங்க³வண்ணனா)

1. லஸுணவக்³க³வண்ணனா

793-797. பாசித்தியேஸு லஸுணவக்³க³ஸ்ஸ பட²மே ஜாதிம் ஸரதீதி ஜாதிஸ்ஸரோ. ஸபா⁴வேனேவாதி ஸூபஸம்பாகாதி³ம் வினாவ. ப³த³ரஸாளவம் நாம ப³த³ரப²லானி ஸுக்கா²பேத்வா சுண்ணேத்வா கத்தப்³பா³ கா²த³னீயவிகதி. ஸேஸமேத்த² உத்தானமேவ. ஆமகலஸுணஞ்சேவ அஜ்ஜோ²ஹரணஞ்சாதி இமானி பனேத்த² த்³வே அங்கா³னி.

798-802. து³தியததியசதுத்தா²னி உத்தானத்தா²னேவ.

812. பஞ்சமே த்³வின்னம் பப்³பா³னம் உபரீதி ஏத்த² த்³வின்னம் அங்கு³லீனம் ஸஹ பவேஸனே ஏகேகாய அங்கு³லியா ஏகேகம் பப்³ப³ம் கத்வா த்³வின்னம் பப்³பா³னம் உபரி. ஏகங்கு³லிபவேஸனே த்³வின்னம் பப்³பா³னம் உபரி ந வட்டதீதி வேதி³தப்³ப³ம். மஹாபச்சரியம்பி அயமேவ நயோ த³ஸ்ஸிதோ. உத³கஸுத்³தி⁴பச்சயேன பன ஸதிபி ப²ஸ்ஸஸாதி³யனே யதா²வுத்தபரிச்சே²தே³ அனாபத்தி.

815-817. ச²ட்டே² ஆஸும்பி⁴த்வாதி பாதேத்வா. த³தி⁴மத்தூ²தி த³தி⁴மண்ட³ம் த³தி⁴ம்ஹி பஸன்னோத³கம். பு⁴ஞ்ஜந்தஸ்ஸ பி⁴க்கு²னோ ஹத்த²பாஸே டா²னம், பானீயஸ்ஸ வா விதூ⁴பனஸ்ஸ வா க³ஹணந்தி இமானி பனேத்த² த்³வே அங்கா³னி.

822. ஸத்தமே ‘‘படிக்³க³ண்ஹாதி, ஆபத்தி து³க்கடஸ்ஸா’’தி இத³ம் புப்³ப³பயோக³து³க்கடஸ்ஸ நித³ஸ்ஸனமத்தந்தி ஆஹ ‘‘ந கேவலம் படிக்³க³ஹணேயேவ ஹோதீ’’திஆதி³. பமாணந்தி பாசித்தியாபத்தியா பமாணம். இமேஹியேவ த்³வீஹி பாசித்தியம் ஹோதி, நாஞ்ஞேஹி ப⁴ஜ்ஜனாதீ³ஹீதி அத்தோ². வுத்தமேவத்த²ம் வித்தா²ரதோ த³ஸ்ஸேதும் ‘‘தஸ்மா’’திஆதி³மாஹ. தம் புப்³பா³பரவிருத்³த⁴ந்தி புனபி வுத்தந்தி வுத்தவாத³ம் ஸந்தா⁴யாஹ. அஞ்ஞாய விஞ்ஞத்தியா லத்³த⁴ம்பி ஹி அனாணத்தியா விஞ்ஞத்தியா இமிஸ்ஸா அவிஞ்ஞத்தியா லத்³த⁴பக்க²ம் ப⁴ஜதி, தஸ்மா ஹேட்டா² அவிஞ்ஞத்தியா லத்³தே⁴ கரணகாராபனேஸு விஸேஸம் அவத்வா இத⁴ விஸேஸவசனம் புப்³பா³பரவிருத்³த⁴ம். யதி³ சேத்த² கரணே பாசித்தியம், காராபனேபி பாசித்தியேனேவ ப⁴விதப்³ப³ம். அத² காராபனே து³க்கடம், கரணேபி து³க்கடேனேவ ப⁴விதப்³ப³ம். ந ஹி கரணே வா காராபனே வா விஸேஸோ அத்தி², தஸ்மா அஞ்ஞாய விஞ்ஞத்தியா லத்³த⁴ம் ஸயம் ப⁴ஜ்ஜனாதீ³னி கத்வாபி காராபேத்வாபி பு⁴ஞ்ஜந்தியா து³க்கடமேவாதி இத³மேத்த² ஸன்னிட்டா²னம். அவிஸேஸேன வுத்தந்தி கரணகாராபனானம் ஸாமஞ்ஞதோ வுத்தம். ஸேஸமேத்த² உத்தானமேவ. ஸத்தன்னம் த⁴ஞ்ஞானம் அஞ்ஞதரஸ்ஸ விஞ்ஞாபனம் வா விஞ்ஞாபாபனம் வா, படிலாபோ⁴, ப⁴ஜ்ஜனாதீ³னி கத்வா வா காரேத்வா வா அஜ்ஜோ²ஹரணந்தி இமானி பனேத்த² தீணி அங்கா³னி.

824. அட்ட²மே நிப்³பி³ட்டோ²தி பதிட்டா²பிதோ. கேணீதி ரஞ்ஞோ தா³தப்³ப³ஸ்ஸ ஆயஸ்ஸேதம் அதி⁴வசனம். டா²னந்தரந்தி கா³மஜனபதா³தி³டா²னந்தரம். ஸேஸமேத்த² உத்தானமேவ. உச்சாராதி³பா⁴வோ, அனவலோகனம், வளஞ்ஜனட்டா²னம், திரோகுட்டபாகாரதா, ச²ட்³ட³னம் வா ச²ட்³டா³பனம் வாதி இமானி பனேத்த² பஞ்ச அங்கா³னி.

830. நவமே ஸப்³பே³ஸந்தி பி⁴க்கு²ஸ்ஸ பி⁴க்கு²னியா ச. இத⁴ கே²த்தபாலகா ஆராமாதி³கோ³பகா ச ஸாமிகா ஏவ.

836. த³ஸமே ஏகபயோகே³னாதி ஏகதி³ஸாவலோகனபயோகே³ன. தேஸம்யேவாதி யேஸம் நச்சம் பஸ்ஸதி. கிஞ்சாபி ஸயம் நச்சனாதீ³ஸு பாசித்தியம் பாளியம் ந வுத்தம், ததா²பி அட்ட²கதா²பமாணேன க³ஹேதப்³ப³ந்தி த³ஸ்ஸேதும் ‘‘ஸப்³ப³அட்ட²கதா²ஸு வுத்த’’ந்தி ஆஹ. ‘‘ஆராமே ட²த்வாதி ந கேவலம் ட²த்வா, ததோ ததோ க³ந்த்வாபி ஸப்³பி³ரியாபதே²ஹி லப⁴தி, ‘ஆராமே டி²தா’தி பன ஆராமபரியாபன்னபா⁴வத³ஸ்ஸனத்த²ம் வுத்தம். இதரதா² நிஸின்னாபி ந லபே⁴ய்யா’’தி தீஸுபி க³ண்டி²பதே³ஸு வுத்தம். ஸேஸமேத்த² உத்தானமேவ. நச்சாதீ³னம் அஞ்ஞதரதா, அஞ்ஞத்ர அனுஞ்ஞாதகாரணா க³மனம், த³ஸ்ஸனம் வா ஸவனம் வாதி இமானி பனேத்த² தீணி அங்கா³னி.

லஸுணவக்³க³வண்ணனா நிட்டி²தா.

2. அந்த⁴காரவக்³க³வண்ணனா

841. அந்த⁴காரவக்³க³ஸ்ஸ பட²மே தா³னே வா பூஜாய வாதி தா³னனிமித்தம் வா பூஜானிமித்தம் வா. மந்தேதீதி கதே²தி. ரத்தந்த⁴காரதா, புரிஸஸ்ஸ ஹத்த²பாஸே டா²னம் வா ஸல்லபனம் வா, ஸஹாயாபா⁴வோ, ரஹோபேக்க²தாதி இமானி பனேத்த² சத்தாரி அங்கா³னி.

842-846. து³தியததியசதுத்தா²னி உத்தானத்தா²னேவ.

856-857. பஞ்சமே அனோவஸ்ஸகம் அதிக்காமேந்தியாதி ச²ன்னஸ்ஸ அந்தோ நிஸீதி³த்வா பக்கமந்திம் ஸந்தா⁴ய வுத்தம். ‘‘உபசாரோ த்³வாத³ஸஹத்தோ²’’தி வத³ந்தி. பல்லங்கஸ்ஸ அனோகாஸேதி ஊருப³த்³தா⁴ஸனஸ்ஸ அனோகாஸே அப்பஹோந்தே. புரேப⁴த்ததா, அந்தரக⁴ரே நிஸஜ்ஜா, ஆஸனஸ்ஸ பல்லங்கோகாஸதா, அஞ்ஞத்ர அனுஞ்ஞாதகாரணா அனாபுச்ச²னம், வுத்தபரிச்சே²தா³திக்கமோதி இமானி பனேத்த² பஞ்ச அங்கா³னி.

859-864. ச²ட்ட²ஸத்தமாதீ³னி உத்தானத்தா²னேவ.

அந்த⁴காரவக்³க³வண்ணனா நிட்டி²தா.

3. நக்³க³வக்³க³வண்ணனா

883-887. நக்³க³வக்³க³ஸ்ஸ பட²மது³தியானி உத்தானத்தா²னேவ.

893. ததியே விஸிப்³பே³த்வாதி து³ஸ்ஸிப்³பி³தம் புன ஸிப்³ப³னத்தா²ய விஸிப்³பே³த்வா விஜடேத்வா. அஞ்ஞத்ர சதூஹபஞ்சாஹாதி விஸிப்³பி³ததி³வஸதோ பஞ்ச தி³வஸே அதிக்கமித்வா. நிவாஸனபாவுரணூபக³சீவரதா, உபஸம்பன்னாய ஸந்தகதா, ஸிப்³ப³னத்தா²ய விஸிப்³ப³னம் வா விஸிப்³பா³பனம் வா, அஞ்ஞத்ர அனுஞ்ஞாதகாரணா பஞ்சாஹாதிக்கமோ, து⁴ரனிக்கே²போதி இமானி பனேத்த² பஞ்ச அங்கா³னி.

898. சதுத்தே² பஞ்சன்னம் சீவரானந்தி திசீவரம் உத³கஸாடிகா ஸங்கச்சிகாதி இமேஸம் பஞ்சன்னம் சீவரானம். பஞ்சன்னம் சீவரானம் அஞ்ஞதரதா, பஞ்சாஹாதிக்கமோ, அனுஞ்ஞாதகாரணாபா⁴வோ, அபரிவத்தனந்தி இமானி பனேத்த² சத்தாரி அங்கா³னி.

902. பஞ்சமம் உத்தானத்த²மேவ.

907. ச²ட்டே² சீவரலாப⁴ந்தி லபி⁴தப்³ப³சீவரம். விகப்பனுபக³பச்சி²மதா, ஸங்க⁴ஸ்ஸ பரிணதபா⁴வோ, வினா ஆனிஸம்ஸத³ஸ்ஸனேன அந்தராயகரணந்தி இமானி பனேத்த² தீணி அங்கா³னி.

911. ஸத்தமம் உத்தானத்த²மேவ.

916. அட்ட²மே கும்ப⁴தூ²ணம் நாம கும்ப⁴ஸத்³தோ³, தேன சரந்தி கீளந்தி, தம் வா ஸிப்பம் ஏதேஸந்தி கும்ப⁴தூ²ணிகா. தேனாஹ ‘‘க⁴டகேன கீளனகா’’தி. தீ³க⁴னிகாயட்ட²கதா²யம் (தீ³. நி. அட்ட². 1.13) பன ‘‘கும்ப⁴தூ²ணம் நாம சதுரஸ்ஸஅம்ப³ணகதாள’’ந்தி வுத்தம். சதுரஸ்ஸஅம்ப³ணகதாளம் நாம ருக்க²ஸாரத³ந்தாதீ³ஸு யேன கேனசி சதுரஸ்ஸஅம்ப³ணம் கத்வா சதூஸு பஸ்ஸேஸு சம்மேன ஓனந்தி⁴த்வா கதவாதி³தப⁴ண்ட³ம். பி³ம்பி³ஸகந்திபி தஸ்ஸேவ வேவசனம், தம் வாதே³ந்தி, தம் வா ஸிப்பம் ஏதேஸந்தி கும்ப⁴தூ²ணிகா. தேனாஹ ‘‘பி³ம்பி³ஸகவாத³காதிபி வத³ந்தீ’’தி. ஸமணசீவரதா, ட²பேத்வா ஸஹத⁴ம்மிகே மாதாபிதரோ ச அஞ்ஞேஸம் தா³னம், அதாவகாலிகதாதி இமானி பனேத்த² தீணி அங்கா³னி.

920. நவமம் உத்தானத்த²மேவ.

927. த³ஸமே த⁴ம்மிகம் கதி²னுத்³தா⁴ரந்தி ஸப்³பா³ஸம் பி⁴க்கு²னீனம் அகாலசீவரம் தா³துகாமேன உபாஸகேன யத்தகோ அத்தா²ரமூலகோ ஆனிஸம்ஸோ, ததோ அதி⁴கம் வா ஸமகம் வா த³த்வா யாசிதகேன ஸமக்³கே³ன பி⁴க்கு²னிஸங்கே⁴ன யம் கதி²னம் ஞத்திது³தியேன கம்மேன அந்தரா உத்³த⁴ரீயதி, தஸ்ஸ ஸோ உத்³தா⁴ரோ த⁴ம்மிகோதி வுச்சதி, ஏவரூபம் கதி²னுத்³தா⁴ரந்தி அத்தோ². ஸேஸம் உத்தானத்த²மேவ.

நக்³க³வக்³க³வண்ணனா நிட்டி²தா.

932. துவட்டவக்³கே³ ஸப்³ப³ம் உத்தானமேவ.

5. சித்தாகா³ரவக்³க³வண்ணனா

978. சித்தாகா³ரவக்³க³ஸ்ஸ பட²மே கீளனஉபவனந்தி அந்தோனக³ரே டி²தம் ஸந்தா⁴ய வுத்தம், கீளனுய்யானந்தி ப³ஹினக³ரே டி²தம் ஸந்தா⁴ய. பாடேக்கா ஆபத்தியோதி கீ³வாய பரிவட்டனப்பயோக³க³ணனாய ஆபத்தியோ, ந உம்மீலனக³ணனாய. ‘‘அஜ்ஜா²ராமே ராஜாகா³ராதீ³னி கரோந்தி, தானி பஸ்ஸந்தியா அனாபத்தீ’’தி வசனதோ ‘‘அந்தோஆராமே தத்த² தத்த² க³ந்த்வா நச்சாதீ³னி பஸ்ஸிதும் லப⁴தீ’’திபி ஸித்³த⁴ம்.

982. து³தியாதீ³னி உத்தானத்தா²னேவ.

1015. நவமே ஹத்தி²ஆதீ³ஸு ஸிப்ப-ஸத்³தோ³ பச்சேகம் யோஜேதப்³போ³, ததா² ஆத²ப்³ப³ணாதீ³ஸு மந்த-ஸத்³தோ³. தத்த² ஆத²ப்³ப³ணமந்தோ நாம ஆத²ப்³ப³ணவேத³விஹிதோ பரூபகா⁴தகரோ மந்தோ, கீ²லனமந்தோ நாம தா³ருஸாரகீ²லம் மந்தேத்வா பத²வியம் பவேஸேத்வா மாரணமந்தோ, அக³த³ப்பயோகோ³ விஸயோஜனம். நாக³மண்ட³லந்தி ஸப்பானம் பவேஸனிவாரணத்த²ம் மண்ட³லப³த்³த⁴மந்தோ.

1018. த³ஸமம் உத்தானத்த²மேவ.

சித்தாகா³ரவக்³க³வண்ணனா நிட்டி²தா.

1021. ஆராமவக்³கே³ ஸப்³ப³ம் உத்தானத்த²மேவ.

1067. க³ப்³பி⁴னிவக்³கே³பி ஸப்³ப³ம் ஸுவிஞ்ஞேய்யமேவ.

8. குமாரிபூ⁴தவக்³க³வண்ணனா

1119. குமாரிபூ⁴தவக்³க³ஸ்ஸ பட²மே ஸப்³ப³பட²மா த்³வே மஹாஸிக்க²மானாதி க³ப்³பி⁴னிவக்³கே³ ஸப்³ப³பட²மம் வுத்தா த்³வே ஸிக்க²மானா. ஸிக்க²மானா இச்சேவ வத்தப்³பா³தி ஸம்முதிகம்மாதீ³ஸு ஏவம் வத்தப்³பா³. கி³ஹிக³தாதி வா குமாரிபூ⁴தாதி வா ந வத்தப்³பா³தி ஸசே வத³ந்தி, கம்மம் குப்பதீதி அதி⁴ப்பாயோ. இதோ பரம் நவமபரியோஸானம் உத்தானத்த²மேவ.

1163. த³ஸமே அபுப்³ப³ஸமுட்டா²னஸீஸந்தி பட²மபாராஜிகஸமுட்டா²னாதீ³ஸு தேரஸஸு ஸமுட்டா²னேஸு அனனுஞ்ஞாதஸமுட்டா²னம் ஸந்தா⁴ய வுத்தம். தஞ்ஹி இதோ புப்³பே³ தாதி³ஸஸ்ஸ ஸமுட்டா²னஸீஸஸ்ஸ அனாக³தத்தா ‘‘அபுப்³ப³ஸமுட்டா²னஸீஸ’’ந்தி வுத்தம்.

1166. ஏகாத³ஸமாதீ³னி உத்தானத்தா²னேவ.

குமாரிபூ⁴தவக்³க³வண்ணனா நிட்டி²தா.

9. ச²த்துபாஹனவக்³க³வண்ணனா

1214. ச²த்துபாஹனவக்³க³ஸ்ஸ ஏகாத³ஸமே உபசாரம் ஸந்தா⁴யாதி ஸமந்தா த்³வாத³ஸஹத்து²பசாரம் ஸந்தா⁴ய. ஸேஸம் ஸப்³ப³த்த² உத்தானமேவ.

ச²த்துபாஹனவக்³க³வண்ணனா நிட்டி²தா.

கி³ரக்³க³ஸமஜ்ஜாதீ³னி அசித்தகானி லோகவஜ்ஜானீதி வுத்தத்தா நச்சந்தி வா வண்ணகந்தி வா அஜானித்வாவ பஸ்ஸந்தியா வா நஹாயந்தியா வா ஆபத்திஸம்ப⁴வதோ வத்து²அஜானனசித்தேன அசித்தகானி, நச்சந்தி வா வண்ணகந்தி வா ஜானித்வா பஸ்ஸந்தியா வா நஹாயந்தியா வா அகுஸலேனேவ ஆபஜ்ஜனதோ லோகவஜ்ஜானீதி வேதி³தப்³பா³னி. சோரீவுட்டா²பனாதீ³னி சோரீதிஆதி³னா வத்து²ம் ஜானித்வா கரணே ஏவ ஆபத்திஸம்ப⁴வதோ ஸசித்தகானி, உபஸம்பதா³தீ³னம் ஏகந்தஅகுஸலசித்தேனேவ அகத்தப்³ப³த்தா பண்ணத்திவஜ்ஜானி. ‘‘இத⁴ ஸசித்தகாசித்தகதா பண்ணத்திஜானனாஜானனதாய அக்³க³ஹேத்வா வத்து²ஜானனாஜானனதாய க³ஹேதப்³பா³’’தி தீஸுபி க³ண்டி²பதே³ஸு வுத்தம். ஸேஸமேத்த² உத்தானத்த²மேவ.

பி⁴க்கு²னீவிப⁴ங்கே³ கு²த்³த³கவண்ணனா நிட்டி²தா.

பாசித்தியகண்ட³ம் நிட்டி²தம்.