அதி⁴கரணபே⁴த³வண்ணனா

340. யஸ்மா அதி⁴கரணம் உக்கோடேந்தோ ஸமத²ப்பத்தமேவ உக்கோடேதி, தஸ்மா ‘‘விவாதா³தி⁴கரணம் உக்கோடேந்தோ கதி ஸமதே² உக்கோடேதீ’’திஆதி³ வுத்தம்.

341. பாளிமுத்தகவினிச்ச²யேனேவாதி வினயலக்க²ணம் வினா கேவலம் த⁴ம்மதே³ஸனாமத்தவஸேனேவாதி அத்தோ². யேனாபி வினிச்ச²யேனாதி பாளிமுத்தகவினிச்ச²யமேவ ஸந்தா⁴ய வுத்தம். க²ந்த⁴கதோ ச பரிவாரதோ ச ஸுத்தேனாதி க²ந்த⁴கபரிவாரதோ ஆனீதஸுத்தேன. நிஜ்ஜா²பேந்தீதி பஞ்ஞாபேந்தி.

342. கிச்சம் நிஸ்ஸாய உப்பஜ்ஜனககிச்சானந்தி புப்³பே³ கதஉக்கே²பனீயாதி³கிச்சம் நிஸ்ஸாய உப்பஜ்ஜனககிச்சானம். கீதி³ஸானம்? யாவததியஸமனுபா⁴ஸனாதீ³னம்.

343. தம் ஹீதி தம் விவாதா³தி⁴கரணம்.

344. அதி⁴கரணேஸு யேன அதி⁴கரணேன ஸம்மந்தி, தம் த³ஸ்ஸேதும் வுத்தந்தி யதா³ அதி⁴கரணேஹி ஸம்மந்தி, ததா³ கிச்சாதி⁴கரணேனேவ ஸம்மந்தி, ந அஞ்ஞேஹி அதி⁴கரணேஹீதி த³ஸ்ஸனத்த²ம் வுத்தந்தி அதி⁴ப்பாயோ.

353. ‘‘ஸத்தன்னம் ஸமதா²னம் கதமே ச²த்திம்ஸ ஸமுட்டா²னா’’தி புச்சி²த்வாபி ‘‘கம்மஸ்ஸ கிரியா கரண’’ந்திஆதி³னா ஸம்முகா²வினயஸ்ஸ ஸமுட்டா²னானி அவிப⁴ஜித்வாவ ஸதிவினயாதீ³னம் ச²ன்னஞ்ஞேவ ச² ஸமுட்டா²னானி விப⁴த்தானி, தம் கஸ்மாதி ஆஹ ‘‘கிஞ்சாபி ஸத்தன்னம் ஸமதா²ன’’ந்திஆதி³. ஸதிவினயாதீ³னம் விய ஸங்க⁴ஸம்முக²தாதீ³னம் கிச்சயதா நாம நத்தீ²தி ஆஹ ‘‘கம்மஸங்க³ஹாபா⁴வேனா’’தி.