உபோஸதா²தி³புச்சா²விஸ்ஸஜ்ஜனாவண்ணனா

332. ‘‘ஸங்க⁴ம், ப⁴ந்தே, பவாரேமீதிஆதி³ பவாரணாகதா² நாமா’’தி க³ண்டி²பதே³ஸு வுத்தம்.

அத்த²வஸபகரணவண்ணனா

334. பட²மபாராஜிகவண்ணனாயமேவ வுத்தந்தி ‘‘ஸங்க⁴ஸுட்டு²தாயா’’திஆதீ³னம் அத்த²வண்ணனம் ஸந்தா⁴ய வுத்தம். த³ஸக்க²த்தும் யோஜனாய பத³ஸதம் வுத்தந்தி ஏகமூலகனயே த³ஸக்க²த்தும் யோஜனாய கதாய ஸங்க²லிகனயே வுத்தபதே³ஹி ஸத்³தி⁴ம் பத³ஸதம் வுத்தந்தி ஏவமத்தோ² க³ஹேதப்³போ³. அஞ்ஞதா² ஏகமூலகே ஏவ நயே ந ஸக்கா பத³ஸதம் லத்³து⁴ம். ஏகமூலகனயேஹி புரிமபச்சி²மபதா³னி ஏகதோ கத்வா ஏகேகஸ்மிம் வாரே நவ நவ பதா³னி வுத்தானீதி த³ஸக்க²த்தும் யோஜனாய நவுதி பதா³னியேவ லப்³ப⁴ந்தி. தஸ்மா தானி நவுதி பதா³னி ஸங்க²லிகனயே ப³த்³த⁴சக்கவஸேன யோஜிதே த³ஸ பதா³னி லப்³ப⁴ந்தீதி தேஹி ஸத்³தி⁴ம் பத³ஸதந்தி ஸக்கா வத்தும். இதோ அஞ்ஞதா² பன உபோ⁴ஸுபி நயேஸு விஸும் விஸும் அத்த²ஸதம் த⁴ம்மஸதஞ்ச யதா² லப்³ப⁴தி, ததா² பட²மபாராஜிகஸம்வண்ணனாயமேவ அம்ஹேஹி த³ஸ்ஸிதம், தம் தத்த² வுத்தனயேனேவ க³ஹேதப்³ப³ம். புரிமபச்சி²மபதா³னி ஏகத்தேன க³ஹேத்வா ‘‘பத³ஸத’’ந்தி வுத்தத்தா ‘‘தத்த² பச்சி²மஸ்ஸ பச்சி²மஸ்ஸ பத³ஸ்ஸ வஸேன அத்த²ஸதம், புரிமஸ்ஸ புரிமஸ்ஸ வஸேன த⁴ம்மஸத’’ந்தி வுத்தம். தஸ்மிம் பத³ஸதே ‘‘ஸங்க⁴ஸுட்டூ²’’திஆதி³னா வுத்தபுரிமபதா³னம் வஸேன த⁴ம்மஸதம், ‘‘ஸங்க⁴பா²ஸூ’’திஆதி³னா வுத்தபச்சி²மபதா³னம் வஸேன அத்த²ஸதந்தி அதி⁴ப்பாயோ.

மஹாவக்³க³வண்ணனா நிட்டி²தா.