7. ஸேகி²யகண்ட³ம்

1. பரிமண்ட³லவக்³க³வண்ணனா

ஸேகி²யேஸு ஸிக்கி²தஸிக்கே²னாதி சதூஹி மக்³கே³ஹி திஸ்ஸோ ஸிக்கா² ஸிக்கி²த்வா டி²தேன, ஸப்³ப³ஸோ பரினிட்டி²தகிச்சேனாதி வுத்தம் ஹோதி. தாதி³னாதி அட்ட²ஹி லோகத⁴ம்மேஹி அகம்பியட்டே²ன தாதி³னா.

576. ஸிக்கா² கரணீயாதி ‘‘ஏவம் நிவாஸேஸ்ஸாமீ’’தி ஆராமேபி அந்தரக⁴ரேபி ஸப்³ப³த்த² ஸிக்கா² கத்தப்³பா³. ஏத்த² ச யஸ்மா வத்தக்க²ந்த⁴கே வுத்தவத்தானிபி ஸிக்கி²தப்³ப³த்தா ஸேகி²யானேவ ஹோந்தி, தஸ்மா பாராஜிகாதீ³ஸு விய பரிச்சே²தோ³ ந கதோ, சாரித்தனயத³ஸ்ஸனத்த²ஞ்ச ‘‘யோ பன பி⁴க்கு² ஓலம்பே³ந்தோ நிவாஸேய்ய, து³க்கட’’ந்தி ஏவம் ஆபத்தினாமேன அவத்வா ‘‘ஸிக்கா² கரணீயா’’தி ஏவம் ஸப்³ப³ஸிக்கா²பதே³ஸு பாளி ஆரோபிதா. பத³பா⁴ஜனே பன ‘‘ஆபத்தி து³க்கடஸ்ஸா’’தி வுத்தத்தா ஸப்³ப³த்த² அனாத³ரியகரணே து³க்கடம் வேதி³தப்³ப³ம். வுத்தந்தி மஹாஅட்ட²கதா²யம் வுத்தம். யஸ்மா அட்ட²ங்கு³லமத்தம் ஓதாரேத்வா நிவத்த²மேவ நிஸின்னஸ்ஸ சதுரங்கு³லமத்தம் ஹோதி, தஸ்மா உபோ⁴பேதே அட்ட²கதா²வாதா³ ஏகபரிச்சே²தா³. தே ஸப்³பே³தி நிவாஸனதோ³ஸா.

தம் பனாதி தம் அனாத³ரியம். கிஞ்சாபி குருந்தி³வாத³ம் பச்சா² வத³ந்தேன ‘‘பரிமண்ட³லம் நிவாஸேதும் அஜானந்தஸ்ஸ அனாபத்தீ’’தி அயமத்தோ² பதிட்டா²பிதோ, ததா²பி நிவாஸனவத்தம் ஸாது⁴கம் உக்³க³ஹேதப்³ப³மேவ. ஸஞ்சிச்ச அனுக்³க³ண்ஹந்தஸ்ஸ அனாத³ரியம் ஸியா. தேனேவ மாதிகாட்ட²கதா²யம் (கங்கா². அட்ட². பரிமண்ட³லஸிக்கா²பத³வண்ணனா) வுத்தம் ‘‘அஜானந்தஸ்ஸாதி பரிமண்ட³லம் நிவாஸேதும் அஜானந்தஸ்ஸ அனாபத்தி, அபிச நிவாஸனவத்தம் உக்³க³ஹேதப்³ப³’’ந்தி.

ஸசித்தகந்தி வத்து²விஜானனசித்தேன பண்ணத்திவிஜானனசித்தேன ச ஸசித்தகம் ‘‘அனாத³ரியம் படிச்சா’’தி வுத்தத்தா. ‘‘பாணாதிபாதாதி³ விய நிவாஸனதோ³ஸோ லோகக³ரஹிதோ ந ஹோதீதி பண்ணத்திவஜ்ஜ’’ந்தி பு²ஸ்ஸதே³வத்தே²ரோ ஆஹ. உபதிஸ்ஸத்தே²ரோ பன ‘‘யஸ்மா அனாத³ரியவஸேனேவ ஆபஜ்ஜிதப்³ப³த்தா கேவலம் அகுஸலமேவ, தஞ்ச பகதியா வஜ்ஜம், ஸஞ்சிச்ச வீதிக்கமனஞ்ச தோ³மனஸ்ஸிதஸ்ஸேவ ஹோதி, தஸ்மா லோகவஜ்ஜம் அகுஸலசித்தம் து³க்க²வேத³ன’’ந்தி ஆஹ. அனாத³ரியம், அனாபத்திகாரணாபா⁴வோ, அபரிமண்ட³லனிவாஸனந்தி இமானி பனேத்த² தீணி அங்கா³னி. யதா² சேத்த², ஏவம் ஸப்³ப³த்த² புரிமானி த்³வே தத்த² தத்த² வுத்தபடிபக்க²கரணஞ்சாதி தீணியேவ ஹோந்தி.

577. து³தியாதீ³ஸு அனேகப்பகாரம் கி³ஹிபாருதந்தி ஸேதபடபாருதம் பரிப்³பா³ஜகபாருதம் ஏகஸாடகபாருதந்திஆதி³ அனேகப்பபே⁴த³ம் கி³ஹிபாருதம். தஸ்ஸத்தோ² க²ந்த⁴கேயேவ ஆவி ப⁴விஸ்ஸதி. விஹாரேபீதி பு³த்³து⁴பட்டா²னாதி³காலம் ஸந்தா⁴ய வுத்தம்.

578. ‘‘ஸுப்படிச்ச²ன்னோ’’தி வுத்தத்தா ‘‘ஸஸீஸம் பாருதோ ஸப்³ப³தா² ஸுப்படிச்ச²ன்னத்தா ஸுப்படிச்ச²ன்னோ நாம ஹோதீ’’தி யஸ்ஸ ஸியா, தம் ஸந்தா⁴யாஹ ‘‘ந ஸஸீஸம் பாருதேனா’’திஆதி³.

582. ஏகஸ்மிம் பன டா²னே ட²த்வாதி ஏத்த² ‘‘க³ச்ச²ந்தோபி பரிஸ்ஸயாபா⁴வம் ஓலோகேதும் லப⁴தியேவ, ததா² கா³மே பூஜ’’ந்தி தீஸுபி க³ண்டி²பதே³ஸு வுத்தம்.

பரிமண்ட³லவக்³க³வண்ணனா நிட்டி²தா.

2. உஜ்ஜக்³கி⁴கவக்³க³வண்ணனா

586. து³தியவக்³கே³ ஹஸனீயஸ்மிம் வத்து²ஸ்மிந்தி ஹாஸஜனகே காரணே.

உஜ்ஜக்³கி⁴கவக்³க³வண்ணனா நிட்டி²தா.

3. க²ம்ப⁴கதவக்³க³வண்ணனா

603. ததியவக்³கே³ பத்தே ஸஞ்ஞா பத்தஸஞ்ஞா, ஸா அஸ்ஸ அத்தீ²தி பத்தஸஞ்ஞீ, அத்தனோ பா⁴ஜனே உபனிப³ந்த⁴ஸஞ்ஞீ ஹுத்வாதி அத்தோ². ப்³யஞ்ஜனம் பன அனாதி³யித்வா அத்த²மத்தமேவ த³ஸ்ஸேதும் ‘‘பத்தே ஸஞ்ஞம் கத்வா’’தி வுத்தம்.

604. ஓலோணீதி ஏகா ப்³யஞ்ஜனவிகதி. ‘‘யோ கோசி ஸுத்³தோ⁴ கஞ்ஜிகதக்காதி³ரஸஓ’’தி கேசி. ஸாகஸூபேய்ய-க்³க³ஹணேன யா காசி ஸூபேய்யஸாகேஹி கதா ப்³யஞ்ஜனவிகதி வுத்தா. மம்ஸரஸாதீ³னீதி ஆதி³-ஸத்³தே³ன அவஸேஸா ஸப்³பா³பி ப்³யஞ்ஜனவிகதி ஸங்க³ஹிதாதி த³ட்ட²ப்³ப³ம். தேனேவ மாதிகாட்ட²கதா²யம் (கங்கா². அட்ட². ஸமஸூபகபடிக்³க³ஹணஸிக்கா²பத³வண்ணனா) வுத்தம் ‘‘ட²பேத்வா பன ஸூபம் அவஸேஸா ஸப்³பா³பி ஸூபேய்யா ப்³யஞ்ஜனவிகதி ரஸரஸோ நாம ஹோதீ’’தி.

605. ஸமபுண்ணந்தி அதி⁴ட்டா²னுபக³ஸ்ஸ பத்தஸ்ஸ அந்தோமுக²வட்டிலேக²ம் அனதிக்காமேத்வா ரசிதம். ஸமப⁴ரிதந்தி தஸ்ஸேவ வேவசனம். ப²லாப²லாதீ³தி ஆதி³-ஸத்³தே³ன ஓத³னாதி³ம்பி ஸங்க³ண்ஹாதி. ஹேட்டா² ஓரோஹதீதி ஸமந்தா ஓகாஸஸப்³பா⁴வதோ சாலியமானம் ஹேட்டா² ப⁴ஸ்ஸதி. மத்த²கே தூ²பீகதம் பூவமேவ வடம்ஸகஸதி³ஸத்தா ‘‘பூவவடம்ஸக’’ந்தி வுத்தம். புப்ப²வடம்ஸகாதீ³ஸுபி ஏஸேவ நயோ.

யஸ்மா ‘‘ஸமதித்திகோ பிண்ட³பாதோ படிக்³க³ஹேதப்³போ³’’தி வசனம் பிண்ட³பாதோ ஸம்புண்ணோ படிக்³க³ஹேதப்³போ³தி தீ³பேதி, தஸ்மா அத்தனோ ஹத்த²க³தே பத்தே பிண்ட³பாதோ தி³ய்யமானோ தூ²பீகதோபி சே ஹோதி, வட்டதீதி தீ³பேதி. ‘‘தூ²பீகதம் பிண்ட³பாதம் படிக்³க³ண்ஹாதி, ஆபத்தி து³க்கடஸ்ஸா’’தி ஹி வசனம் பட²மம் தூ²பீகதம் பிண்ட³பாதம் பச்சா² படிக்³க³ண்ஹதோ ஆபத்தீதி தீ³பேதி. ‘‘பத்தே படிக்³க³ண்ஹதோ ச தூ²பீகதம் ஹோதி, வட்டதி அதூ²பீகதஸ்ஸ படிக்³க³ஹிதத்தா, பயோகோ³ பன நத்தி² அஞ்ஞத்ர புப்³ப³தே³ஸா’’தி கேனசி வுத்தம், தம் ந ஸாரதோ பச்சேதப்³ப³ம். ‘‘ந தூ²பீகதம் பிண்ட³பாதம் படிக்³க³ண்ஹாதீ’’தி வசனம் பட²மம் தூ²பீகதஸ்ஸேவ பச்சா² படிக்³க³ண்ஹனம் தீ³பேதி. ந ஹி ஹத்த²க³தேபி பத்தே தி³ய்யமானம் தூ²பீகதம் க³ண்ஹந்தோ தூ²பீகதம் பிண்ட³பாதம் படிக்³க³ண்ஹந்தோ நாம ந ஹோதி, ந ச தேன ஸமதித்திகோ பிண்ட³பாதோ படிக்³க³ஹிதோதி ஸக்கா விஞ்ஞாதும். ‘‘தூ²பீகத’’ந்தி ச பா⁴வனபும்ஸகனித்³தே³ஸே க³ய்ஹமானே அயமத்தோ² ஸுட்டு²தரம் பாகடோயேவாதி.

க²ம்ப⁴கதவக்³க³வண்ணனா நிட்டி²தா.

4. ஸக்கச்சவக்³க³வண்ணனா

608. சதுத்த²வக்³கே³ ஸபதா³னந்தி ஏத்த² தா³னம் வுச்சதி அவக²ண்ட³னம், அபேதம் தா³னதோ அபதா³னம், அனவக²ண்ட³னந்தி அத்தோ². ஸஹ அபதா³னேன ஸபதா³னம், அவக²ண்ட³னவிரஹிதம், அனுபடிபாடியாதி வுத்தம் ஹோதி. தேனாஹ ‘‘தத்த² தத்த² ஓதி⁴ம் அகத்வா அனுபடிபாடியா’’தி.

611. யஸ்மிம் ஸமயே ‘‘பாணோ ந ஹந்தப்³போ³’’தி ராஜானோ பே⁴ரிம் சராபேந்தி, அயம் மாகா⁴தஸமயோ நாம. இத⁴ அனாபத்தியம் கி³லானோ ந ஆக³தோ, தஸ்மா கி³லானஸ்ஸபி ஆபத்தி. ஸூபோத³னவிஞ்ஞத்திஸிக்கா²பதே³ அஸஞ்சிச்ச அஸ்ஸதியாதி ஏத்த² ‘‘முகே² பக்கி²பித்வா புன விப்படிஸாரீ ஹுத்வா ச²ட்³டே³ந்தஸ்ஸ அருசியா பவிஸந்தே ‘அஸஞ்சிச்சா’தி வுச்சதி, விஞ்ஞத்திம்பி அவிஞ்ஞத்திம்பி ஏதஸ்மிம் டா²னே டி²தம் ஸஹஸா க³ஹேத்வா பு⁴ஞ்ஜந்தே ‘அஸ்ஸதியா’தி வுச்சதீ’’தி தீஸுபி க³ண்டி²பதே³ஸு வுத்தம்.

614-615. உஜ்ஜா²னே ஸஞ்ஞா உஜ்ஜா²னஸஞ்ஞா, ஸா அஸ்ஸ அத்தீ²தி உஜ்ஜா²னஸஞ்ஞீ. ‘‘மயூரண்ட³ம் அதிமஹந்த’’ந்தி வசனதோ மயூரண்ட³ப்பமாணோ கப³ளோ ந வட்டதி. கேசி பன ‘‘மயூரண்ட³தோ மஹந்தோ ந வட்டதீ’’தி வத³ந்தி, தம் ந க³ஹேதப்³ப³ம், ‘‘நாதிமஹந்த’’ந்தி ச அதிமஹந்தஸ்ஸேவ படிக்கி²த்தத்தா கு²த்³த³கே ஆபத்தி ந தி³ஸ்ஸதி. ‘‘மயூரண்ட³ம் அதிமஹந்தம், குக்குடண்ட³ம் அதிகு²த்³த³கம், தேஸம் வேமஜ்ஜ²ப்பமாணோ’’தி இமினா பன ஸாருப்பவஸேன கு²த்³த³கம்பி படிக்கி²பித்வா பரிச்சே²தோ³ ந த³ஸ்ஸிதோதி வேதி³தப்³ப³ம்.

ஸக்கச்சவக்³க³வண்ணனா நிட்டி²தா.

5. கப³ளவக்³க³வண்ணனா

618. பஞ்சமவக்³கே³ ஸப்³ப³ம் ஹத்த²ந்தி ஏத்த² ஹத்த²-ஸத்³தோ³ ததே³கதே³ஸேஸு அங்கு³லீஸு த³ட்ட²ப்³போ³ ‘‘ஹத்த²முத்³தா³’’திஆதீ³ஸு விய, ஸமுதா³யே பவத்தவோஹாரஸ்ஸ அவயவேபி வத்தனதோ ஏகங்கு³லிம்பி முகே² பக்கி²பிதும் ந வட்டதி.

கப³ளவக்³க³வண்ணனா நிட்டி²தா.

6. ஸுருஸுருவக்³க³வண்ணனா

627. ச²ட்ட²வக்³கே³ ஸீதீகதோதி ஸீதட்டோ, ஸீதபீளிதோதி வுத்தம் ஹோதி. ஸிலகபு³த்³தோ⁴தி பரிஹாஸவசனமேதம். ஸிலகஞ்ஹி கஞ்சி தி³ஸ்வா ‘‘பு³த்³தோ⁴ அய’’ந்தி வோஹரந்தி.

634. விலீவச்ச²த்தந்தி வேணுவிலீவேஹி கதம் ச²த்தம். தத்த²ஜாதகத³ண்ட³கேன கதந்தி தாலபண்ணம் ஸஹ த³ண்ட³கேன சி²ந்தி³த்வா தமேவ ச²த்தத³ண்ட³ம் கரோந்தி கோ³பாலகாத³யோ விய, தம் ஸந்தா⁴யேதம் வுத்தம். ச²த்தபாது³காய வா டி²தம் ஹோதீதி ஏத்த² ச²த்தபாது³கா வுச்சதி ச²த்தாதா⁴ரோ. யஸ்மிம் ச²த்தம் அபதமானம் கத்வா ட²பேந்தி, தாதி³ஸிகாய ச²த்தபாது³காய டி²தம் ச²த்தம் ‘‘ச²த்த’’ந்தி அஜ்ஜா²ஹரிதப்³ப³ம். ‘‘ச²த்தம் ச²த்தபாது³காய டி²த’’ந்திபி பட²ந்தி, தத்தா²பி அயமேவத்தோ².

637. சாபோதி மஜ்ஜே² வங்கா காசத³ண்ட³ஸதி³ஸா த⁴னுவிகதி. கோத³ண்டோ³தி வட்டலத³ண்டா³ த⁴னுவிகதி. படிமுக்கந்தி பவேஸிதம் லக்³கி³தம்.

ஸுருஸுருவக்³க³வண்ணனா நிட்டி²தா.

7. பாது³கவக்³க³வண்ணனா

647. ஸத்தமவக்³கே³ படிச்ச²ன்னோ ஹுத்வாதி ஸோ கிர ரத்திபா⁴கே³ உய்யானம் க³ந்த்வா அம்ப³ம் அபி⁴ருஹித்வா ஸாகா²ய ஸாக²ம் அம்ப³ம் ஓலோகேந்தோ விசரி. தஸ்ஸ ததா² கரோந்தஸ்ஸேவ ரத்தி விபா⁴யி. ஸோ சிந்தேஸி ‘‘ஸசே இதா³னி ஓதரித்வா க³மிஸ்ஸாமி, தி³ஸ்வா மம் சோரோதி க³ஹேஸ்ஸந்தி, ரத்திபா⁴கே³ க³மிஸ்ஸாமீ’’தி. அதே²கம் விடபம் அபி⁴ருஹித்வா நிலீனோ அச்சி². தம் ஸந்தா⁴யேதம் வுத்தம். ஸோ ருக்க²தோ ஓதரந்தோ ஏகம் ஓலம்பி³னிஸாக²ம் க³ஹேத்வா தேஸம் உபி⁴ன்னம்பி அந்தரே பதிட்டா²ஸி. தம் ஸந்தா⁴ய வுத்தம் ‘‘தேஸம் த்³வின்னம்பி அந்தரா ருக்க²தோ பதிதோ’’தி. பாளியா அத்த²ம் ந ஜானந்தீதி அத்தனோ க³ஹணஸ்ஸ அத்த²ம் ந ஜானந்தி.

ஜாதகபாளியம் (ஜா. 1.4.33) பன அயம் கா³தா² –

‘‘ஸப்³ப³மித³ம் சரிமம் கதம், உபோ⁴ த⁴ம்மம் ந பஸ்ஸரே;

உபோ⁴ பகதியா சுதா, யோ சாயம் மந்தேஜ்ஜா²பேதி;

யோ ச மந்தம் அதீ⁴யதீ’’தி. –

ஏவமாக³தா. தஸ்ஸாயமத்தோ² (ஜா. அட்ட². 3.4.33) – ஸப்³ப³மித³ம் சரிமம் கதந்தி யம் அம்ஹேஹி தீஹி ஜனேஹி கதம், ஸப்³ப³மித³ம் கிச்சம் லாமகம் நிம்மரியாத³ம் அத⁴ம்மிகம். ஏவம் அத்தனோ சோரபா⁴வம் தேஸஞ்ச மந்தேஸு அகா³ரவம் க³ரஹித்வா புன இதரே த்³வேயேவ க³ரஹந்தோ ‘‘உபோ⁴ த⁴ம்மம் ந பஸ்ஸரே’’திஆதி³மாஹ. தத்த² உபோ⁴தி இமே த்³வேபி ஜனா க³ருகாராரஹம் போராணகத⁴ம்மம் ந பஸ்ஸந்தி, ததோவ த⁴ம்மபகதிதோ சுதா. த⁴ம்மோ ஹி பட²முப்பத்திவஸேன பகதி நாம. வுத்தம்பி சேதம் –

‘‘த⁴ம்மோ ஹவே பாதுரஹோஸி புப்³பே³,

பச்சா² அத⁴ம்மோ உத³பாதி³ லோகே’’தி. (ஜா. 1.11.28);

யோ சாயந்தி யோ ச அயம் நீசே நிஸீதி³த்வா மந்தே அஜ்ஜா²பேதி, யோ ச உச்சே நிஸீதி³த்வா அதீ⁴யதீதி.

ஸாலீனந்தி அயம் கா³தா²பி –

‘‘ஸாலீனம் ஓத³னம் பு⁴ஞ்ஜே, ஸுசிம் மம்ஸூபஸேசனம்;

தஸ்மா ஏதம் ந ஸேவாமி, த⁴ம்மம் இஸீஹி ஸேவித’’ந்தி. (ஜா. 1.4.34) –

ஏவம் ஜாதகே ஆக³தா. தத்த² ஸுசிந்தி பண்ட³ரம் பரிஸுத்³த⁴ம். மம்ஸூபஸேசனந்தி நானப்பகாராய மம்ஸவிகதியா ஸித்தம் பு⁴ஞ்ஜே, பு⁴ஞ்ஜாமீதி அத்தோ². ஸேஸம் பாகடமேவ.

தி⁴ரத்தூ²தி தி⁴ அத்து², நிந்தா³ ப⁴வதூதி அத்தோ², க³ரஹாம தம் மயந்தி வுத்தம் ஹோதி. லத்³த⁴லாபோ⁴தி த⁴னலாப⁴ம் யஸலாப⁴ஞ்ச ஸந்தா⁴ய வத³தி. வினிபாதனஹேதுனாதி வினிபாதனஸ்ஸ ஹேதுபா⁴வேன. வுத்தி நாம ஹோதீதி யதா²வுத்தோ து³விதோ⁴பி லாபோ⁴ அபாயஸம்வத்தனிகதாய ஸம்பராயே வினிபாதனஹேதுபா⁴வேன பவத்தனதோ ஸம்பதி அத⁴ம்மசரணேன பவத்தனதோ ச வுத்தி நாம ஹோதீதி அத்தோ². ஏவரூபா யா வுத்தீதி ஏவரூபா த⁴னலாப⁴யஸலாப⁴ஸங்கா²தா யா வுத்தி. அத⁴ம்மசரணேன வாதி வா-ஸத்³தோ³ ஸம்பிண்ட³னத்தோ². த்வந்தி உபயோக³த்தே² பச்சத்தவசனம், தம் இச்சேவ வா பாடோ². அஸ்மாதி பாஸாணாதி⁴வசனமேதம்.

பாது³கவக்³க³வண்ணனா நிட்டி²தா.

ஸேஸம் உத்தானமேவ.

ஸேகி²யகண்ட³ம் நிட்டி²தம்.

அதி⁴கரணஸமதே²ஸு யம் வத்தப்³ப³ம், தம் அட்ட²கதா²யம் ஆக³தட்டா²னேயேவ த³ஸ்ஸயிஸ்ஸாம.

இதி ஸமந்தபாஸாதி³காய வினயட்ட²கதா²ய ஸாரத்த²தீ³பனியம்

பி⁴க்கு²விப⁴ங்க³வண்ணனா நிட்டி²தா.

மஹாவிப⁴ங்கோ³ நிட்டி²தோ.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

பி⁴க்கு²னீவிப⁴ங்க³வண்ணனா