1. பாராஜிககண்ட³ம் (பி⁴க்கு²னீவிப⁴ங்க³வண்ணனா)

1. பட²மபாராஜிகஸிக்கா²பத³வண்ணனா

656. பி⁴க்கு²னீவிப⁴ங்கே³ யோதி யோ பி⁴க்கு²னீனம் விப⁴ங்கோ³. மிகா³ரனத்தாதி மஜ்ஜ²பத³லோபேனேதம் வுத்தந்தி ஆஹ ‘‘மிகா³ரமாதுயா பன நத்தா ஹோதீ’’தி. மிகா³ரமாதாதி விஸாகா²யேதம் அதி⁴வசனம். நவகம்மாதி⁴ட்டா²யிகந்தி நவகம்மஸம்விதா⁴யிகம். ப்³யஞ்ஜனானம் படிவிஜ்ஜி²தப்³போ³ ஆகாரோ நாதிக³ம்பீ⁴ரோ, யதா²ஸுதம் தா⁴ரணமேவ தத்த² கரணீயந்தி ஸதியா ப்³யாபாரோ அதி⁴கோ, பஞ்ஞா தத்த² கு³ணீபூ⁴தாதி வுத்தம் ‘‘ஸதிபுப்³ப³ங்க³மாய பஞ்ஞாயா’’தி. ஸதி புப்³ப³ங்க³மா ஏதிஸ்ஸாதி ஸதிபுப்³ப³ங்க³மா. புப்³ப³ங்க³மதா சேத்த² பதா⁴னபா⁴வோ ‘‘மனோபுப்³ப³ங்க³மா’’திஆதீ³ஸு விய. அத்த²க்³க³ஹணே பன பஞ்ஞாய ப்³யாபாரோ அதி⁴கோ படிவிஜ்ஜி²தப்³ப³ஸ்ஸ அத்த²ஸ்ஸ அதிக³ம்பீ⁴ரத்தாதி ஆஹ ‘‘பஞ்ஞாபுப்³ப³ங்க³மாய ஸதியா’’தி. ஆலஸியவிரஹிதாதி கோஸஜ்ஜரஹிதா. யதா² அஞ்ஞா குஸீதா நிஸின்னட்டா²னே நிஸின்னாவ ஹோந்தி, டி²தட்டா²னே டி²தாவ, ஏவம் அஹுத்வா விப்பா²ரிகேன சித்தேன ஸப்³ப³கிச்சம் நிப்பா²தே³தி.

ஸப்³பா³ பி⁴க்கு²னியோ ஸத்து²லத்³தூ⁴பஸம்பதா³ ஸங்க⁴தோ லத்³தூ⁴பஸம்பதா³தி து³விதா⁴. க³ருத⁴ம்மபஅக்³க³ஹணேன ஹி லத்³தூ⁴பஸம்பதா³ மஹாபஜாபதிகோ³தமீ ஸத்து²ஸந்திகாவ லத்³தூ⁴பஸம்பத³த்தா ஸத்து²லத்³தூ⁴பஸம்பதா³ நாம. ஸேஸா ஸப்³பா³பி ஸங்க⁴தோ லத்³தூ⁴பஸம்பதா³. தாபி ஏகதோஉபஸம்பன்னா உப⁴தோஉபஸம்பன்னாதி து³விதா⁴. தத்த² யா தா மஹாபஜாபதிகோ³தமியா ஸத்³தி⁴ம் நிக்க²ந்தா பஞ்சஸதா ஸாகியானியோ, தா ஏகதோஉபஸம்பன்னா பி⁴க்கு²ஸங்க⁴தோ ஏவ லத்³தூ⁴பஸம்பத³த்தா, இதரா உப⁴தோஉபஸம்பன்னா உப⁴தோஸங்கே⁴ உபஸம்பன்னத்தா. ஏஹிபி⁴க்கு²னீபா⁴வேன உபஸம்பன்னா பன பி⁴க்கு²னியோ ந ஸந்தி தாஸம் ததா² உபஸம்பதா³ய அபா⁴வதோ. யதி³ ஏவம் ‘‘ஏஹி பி⁴க்கு²னீ’’தி இத⁴ கஸ்மா வுத்தந்தி? தே³ஸனாய ஸோதபதிதபா⁴வதோ. அயஞ்ஹி ஸோதபதிததா நாம கத்த²சி லப்³ப⁴மானஸ்ஸபி அக்³க³ஹணேன ஹோதி, யதா² அபி⁴த⁴ம்மே மனோதா⁴துனித்³தே³ஸே (த⁴. ஸ. 160-161) லப்³ப⁴மானம்பி ஜா²னங்க³ம் பஞ்சவிஞ்ஞாணஸோதே பதிதாய ந உத்³த⁴டம் கத்த²சி தே³ஸனாய அஸம்ப⁴வதோ, யதா² தத்தே²வ வத்து²னித்³தே³ஸே (த⁴. ஸ. 984 ஆத³யோ) ஹத³யவத்து². கத்த²சி அலப்³ப⁴மானஸ்ஸபி க³ஹணவஸேன யதா²டி²தகப்பீனித்³தே³ஸே. யதா²ஹ –

‘‘கதமோ ச புக்³க³லோ டி²தகப்பீ? அயஞ்ச புக்³க³லோ ஸோதாபத்திப²லஸச்சி²கிரியாய படிபன்னோ அஸ்ஸ, கப்பஸ்ஸ ச உட்³ட³ய்ஹனவேலா அஸ்ஸ, நேவ தாவ கப்போ உட்³ட³ய்ஹேய்ய, யாவாயம் புக்³க³லோ ந ஸோதாபத்திப²லம் ஸச்சி²கரேய்யா’’தி (பு. ப. 17).

ஏவமிதா⁴பி அலப்³ப⁴மானக³ஹணவஸேன வேதி³தப்³ப³ம். பரிகப்பவசனஞ்ஹேதம் ‘‘ஸசே ப⁴க³வா பி⁴க்கு²னீபா⁴வயோக்³யம் கஞ்சி மாதுகா³மம் ‘ஏஹி பி⁴க்கு²னீ’தி வதே³ய்ய, ஏவம் பி⁴க்கு²னீபா⁴வோ ஸியா’’தி.

கஸ்மா பன ப⁴க³வா ஏவம் ந கதே²ஸீதி? ததா² கதாதி⁴காரானம் அபா⁴வதோ. யே பன ‘‘அனாஸன்னாஸன்னிஹிதபா⁴வதோ’’தி காரணம் வத்வா ‘‘பி⁴க்கூ² ஏவ ஹி ஸத்து² ஆஸன்னசாரினோ ஸதா³ ஸன்னிஹிதா ச ஹோந்தி, தஸ்மா தே ஏவ ‘ஏஹிபி⁴க்கூ²’தி வத்தப்³ப³தம் அரஹந்தி, ந பி⁴க்கு²னியோ’’தி வத³ந்தி, தம் தேஸம் மதிமத்தம் ஸத்து² ஆஸன்னதூ³ரபா⁴வஸ்ஸ ப⁴ப்³பா³ப⁴ப்³ப³பா⁴வஸித்³த⁴த்தா. வுத்தஞ்ஹேதம் ப⁴க³வதா –

‘‘ஸங்கா⁴டிகண்ணே சேபி மே, பி⁴க்க²வே, பி⁴க்கு² க³ஹேத்வா பிட்டி²தோ பிட்டி²தோ அனுப³ந்தோ⁴ அஸ்ஸ பாதே³ பாத³ம் நிக்கி²பந்தோ, ஸோ ச ஹோதி அபி⁴ஜ்ஜா²லு காமேஸு திப்³ப³ஸாராகோ³ ப்³யாபன்னசித்தோ பது³ட்ட²மனஸங்கப்போ முட்ட²ஸ்ஸதி அஸம்பஜானோ அஸமாஹிதோ விப்³ப⁴ந்தசித்தோ பாகதிந்த்³ரியோ, அத² கோ² ஸோ ஆரகாவ மய்ஹம், அஹஞ்ச தஸ்ஸ. தம் கிஸ்ஸ ஹேது? த⁴ம்மஞ்ஹி ஸோ, பி⁴க்க²வே, பி⁴க்கு² ந பஸ்ஸதி, த⁴ம்மம் அபஸ்ஸந்தோ ந மம் பஸ்ஸதி. யோஜனஸதே சேபி ஸோ, பி⁴க்க²வே, பி⁴க்கு² விஹரேய்ய, ஸோ ச ஹோதி அனபி⁴ஜ்ஜா²லு காமேஸு ந திப்³ப³ஸாராகோ³ அப்³யாபன்னசித்தோ அப்பது³ட்ட²மனஸங்கப்போ உபட்டி²தஸ்ஸதி ஸம்பஜானோ ஸமாஹிதோ ஏகக்³க³சித்தோ ஸம்வுதிந்த்³ரியோ, அத² கோ² ஸோ ஸந்திகேவ மய்ஹம், அஹஞ்ச தஸ்ஸ. தம் கிஸ்ஸ ஹேது? த⁴ம்மஞ்ஹி ஸோ, பி⁴க்க²வே, பி⁴க்கு² பஸ்ஸதி, த⁴ம்மம் பஸ்ஸந்தோ மம் பஸ்ஸதீ’’தி (இதிவு. 92).

தஸ்மா அகாரணம் தே³ஸதோ ஸத்து² ஆஸன்னானாஸன்னதா. அகதாதி⁴காரதாய பன பி⁴க்கு²னீனம் ஏஹிபி⁴க்கு²னூபஸம்பதா³ய அயோக்³யதா வேதி³தப்³பா³.

யதி³ ஏவம் யம் தம் தே²ரீகா³தா²ஸு ப⁴த்³தா³ய குண்ட³லகேஸாய வுத்தம் –

‘‘நிஹச்ச ஜாணும் வந்தி³த்வா, ஸம்முகா² அஞ்ஜலிம் அகம்;

ஏஹி ப⁴த்³தே³தி மம் அவச, ஸா மே ஆஸூபஸம்பதா³’’தி. (தே²ரீகா³. 109);

ததா² அபதா³னேபி –

‘‘ஆயாசிதோ ததா³ ஆஹ, ஏஹி ப⁴த்³தே³தி நாயகோ;

ததா³ஹம் உபஸம்பன்னா, பரித்தம் தோயமத்³த³ஸ’’ந்தி. (அப. தே²ரீ 2.3.44);

தம் கத²ந்தி? நயித³ம் ஏஹிபி⁴க்கு²னீபா⁴வேன உபஸம்பத³ம் ஸந்தா⁴ய வுத்தம், உபஸம்பதா³ய பன ஹேதுபா⁴வதோ ‘‘யா ஸத்து² ஆணத்தி, ஸா மே ஆஸூபஸம்பதா³’’தி வுத்தா. ததா² ஹி வுத்தம் அட்ட²கதா²யம் (தே²ரீகா³. அட்ட². 111) ‘‘ஏஹி ப⁴த்³தே³ பி⁴க்கு²னுபஸ்ஸயம் க³ந்த்வா பி⁴க்கு²னீனம் ஸந்திகே பப்³ப³ஜ உபஸம்பஜ்ஜஸ்ஸூதி மம் அவச ஆணாபேஸி, ஸா ஸத்து² ஆணா மய்ஹம் உபஸம்பதா³ய காரணத்தா உபஸம்பதா³ ஆஸி அஹோஸீ’’தி. அபதா³னகா³தா²யம்பி ஏவமேவ அத்தோ² க³ஹேதப்³போ³. தஸ்மா பி⁴க்கு²னீனம் ஏஹிபி⁴க்கு²னூபஸம்பதா³ நத்தி²யேவாதி நிட்ட²மேத்த² க³ந்தப்³ப³ம். யதா² சேதம் ஸோதபதிதவஸேன ‘‘ஏஹி பி⁴க்கு²னீ’’தி வுத்தம், ஏவம் ‘‘தீஹி ஸரணக³மனேஹி உபஸம்பன்னாதி பி⁴க்கு²னீ’’தி இத³ம்பி ஸோதபதிதவஸேனேவ வுத்தந்தி த³ட்ட²ப்³ப³ம் ஸரணக³மனூபஸம்பதா³யபி பி⁴க்கு²னீனம் அஸம்ப⁴வதோ.

659. பி⁴க்கு²விப⁴ங்கே³ ‘‘காயஸம்ஸக்³க³ம் ஸாதி³யேய்யா’’தி அவத்வா ‘‘ஸமாபஜ்ஜேய்யா’’தி வுத்தத்தா ‘‘பி⁴க்கு² ஆபத்தியா ந காரேதப்³போ³’’தி வுத்தம். தப்³ப³ஹுலனயேனாதி கிரியாஸமுட்டா²னஸ்ஸேவ ப³ஹுலபா⁴வதோ. தி³ஸ்ஸதி ஹி தப்³ப³ஹுலனயேன தப்³போ³ஹாரோ யதா² ‘‘ப்³ராஹ்மணகா³மோ’’தி. ப்³ராஹ்மணகா³மேபி ஹி அந்தமஸோ ரஜகாதீ³னி பஞ்ச குலானி ஸந்தி. ஸாதி கிரியாஸமுட்டா²னதா.

662. ததே²வாதி காயஸம்ஸக்³க³ராகே³ன அவஸ்ஸுதோயேவாதி அத்தோ². ஸேஸமேத்த² உத்தானமேவ.

பட²மபாராஜிகஸிக்கா²பத³வண்ணனா நிட்டி²தா.

2. து³தியபாராஜிகஸிக்கா²பத³வண்ணனா

666. து³தியே ‘‘கிஸ்ஸ பன த்வம் அய்யே ஜானம் பாராஜிகம் த⁴ம்மம் அஜ்ஜா²பன்ன’’ந்தி வசனதோ ‘‘உத்³தி³ட்டா² கோ² அய்யாயோ அட்ட² பாராஜிகா த⁴ம்மா’’திஆதி³வசனதோ ச பி⁴க்கு²னீவிப⁴ங்க³ம் பத்வா ஸாதா⁴ரணானி ஸிக்கா²பதா³னி பி⁴க்கூ²னம் உப்பன்னவத்து²ஸ்மிம்யேவ ‘‘யா பன பி⁴க்கு²னீ ச²ந்த³ஸோ மேது²னம் த⁴ம்மம் படிஸேவேய்ய, அந்தமஸோ திரச்சா²னக³தேனபி, பாராஜிகா ஹோதி அஸம்வாஸா’’திஆதி³னா நயேன ஸவிஸேஸம்பி அவிஸேஸம்பி மாதிகம் ட²பேத்வா அனுக்கமேன பத³பா⁴ஜனம் ஆபத்திபே⁴த³ம் திகச்சே²த³ம் அனாபத்திவாரஞ்ச அனவஸேஸம் வத்வா வித்தா²ரேஸி. ஸங்கீ³திகாரகேஹி பன அஸாதா⁴ரணபஞ்ஞத்தியோயேவ இத⁴ வித்தா²ரிதாதி வேதி³தப்³பா³.

அத² உபரிமேஸு த்³வீஸு அபஞ்ஞத்தேஸு அட்ட²ன்னம் பாராஜிகானம் அஞ்ஞதரந்தி இத³ம் வசனம் ந யுஜ்ஜதீதி ஆஹ ‘‘இத³ஞ்ச பாராஜிகம் பச்சா² பஞ்ஞத்த’’ந்திஆதி³. யதி³ ஏவம் இமஸ்மிம் ஓகாஸே கஸ்மா ட²பிதந்தி ஆஹ ‘‘புரிமேன பன ஸத்³தி⁴ம் யுக³ளத்தா’’திஆதி³, புரிமேன ஸத்³தி⁴ம் ஏகஸம்ப³ந்த⁴பா⁴வதோ இத⁴ வுத்தந்தி அதி⁴ப்பாயோ. ‘‘அட்ட²ன்னம் பாராஜிகானம் அஞ்ஞதர’’ந்தி வசனதோ ச வஜ்ஜபடிச்சா²தி³கம் யா படிச்சா²தே³தி, ஸாபி வஜ்ஜபடிச்சா²தி³காயேவாதி த³ட்ட²ப்³ப³ம். கிஞ்சாபி வஜ்ஜபடிச்சா²த³னம் பேமவஸேன ஹோதி, ததா²பி ஸிக்கா²பத³வீதிக்கமசித்தம் தோ³மனஸ்ஸிதமேவ ஹோதீதி கத்வா ‘‘து³க்க²வேத³ன’’ந்தி வுத்தம். ஸேஸமேத்த² உத்தானமேவ.

து³தியபாராஜிகஸிக்கா²பத³வண்ணனா நிட்டி²தா.

668. ததியம் உத்தானத்த²மேவ.

4. சதுத்த²பாராஜிகஸிக்கா²பத³வண்ணனா

675. சதுத்தே² லோகஸ்ஸாத³மித்தஸந்த²வவஸேனாதி லோகஸ்ஸாத³ஸங்கா²தஸ்ஸ மித்தஸந்த²வஸ்ஸ வஸேன. வுத்தமேவத்த²ம் பரியாயந்தரேன விபா⁴வேதும் ‘‘காயஸம்ஸக்³க³ராகே³னா’’தி வுத்தம்.

திஸ்ஸித்தி²யோ மேது²னம் தம் ந ஸேவேதி (பரி. அட்ட². 481) யா திஸ்ஸோ இத்தி²யோ வுத்தா, தாஸுபி யம் தம் மேது²னம் நாம, தம் ந ஸேவதி. தயோ புரிஸேதி தயோ புரிஸேபி உபக³ந்த்வா மேது²னம் ந ஸேவதி. தயோ ச அனரியபண்ட³கேதி உப⁴தோப்³யஞ்ஜனஸங்கா²தே தயோ அனரியே, தயோ ச பண்ட³கேதி இமேபி ச² ஜனே உபக³ந்த்வா மேது²னம் ந ஸேவதி. ந சாசரே மேது²னம் ப்³யஞ்ஜனஸ்மிந்தி அனுலோமபாராஜிகவஸேனபி அத்தனோ நிமித்தே மேது²னம் நாசரதி. சே²ஜ்ஜம் ஸியா மேது²னத⁴ம்மபச்சயாதி ஸியா மேது²னத⁴ம்மபச்சயா பாராஜிகந்தி அயம் பஞ்ஹோ அட்ட²வத்து²கம்வ ஸந்தா⁴ய வுத்தோ. தஸ்ஸா ஹி மேது²னத⁴ம்மஸ்ஸ புப்³ப³பா⁴க³காயஸம்ஸக்³க³ம் ஆபஜ்ஜிதும் வாயமந்தியா மேது²னத⁴ம்மபச்சயா சே²ஜ்ஜம் ஹோதி. சே²தோ³யேவ சே²ஜ்ஜம்.

மேது²னத⁴ம்மஸ்ஸ புப்³ப³பா⁴க³த்தாதி இமினா மேது²னத⁴ம்மஸ்ஸ புப்³ப³பா⁴க³பூ⁴தோ காயஸம்ஸக்³கோ³யேவ தத்த² மேது²னத⁴ம்ம-ஸத்³தே³ன வுத்தோ, ந த்³வயம்த்³வயஸமாபத்தீதி தீ³பேதி. வண்ணாவண்ணோதி த்³வீஹி ஸுக்கவிஸ்ஸட்டி² வுத்தா. க³மனுப்பாத³னந்தி ஸஞ்சரித்தம். ஸப்³ப³பதே³ஸூதி ‘‘ஸங்கா⁴டிகண்ணக்³க³ஹணம் ஸாதி³யேய்யா’’திஆதீ³ஸு. ஸேஸமேத்த² உத்தானமேவ. காயஸம்ஸக்³க³ராகோ³, ஸஉஸ்ஸாஹதா, அட்ட²மஸ்ஸ வத்து²ஸ்ஸ பூரணந்தி இமானி பனேத்த² தீணி அங்கா³னி.

சதுத்த²பாராஜிகஸிக்கா²பத³வண்ணனா நிட்டி²தா.

பி⁴க்கு²னீவிப⁴ங்கே³ பாராஜிககண்ட³வண்ணனா நிட்டி²தா.

பாராஜிககண்ட³ம் நிட்டி²தம்.