11. பஞ்சஸதிகக்க²ந்த⁴கம்

ஸங்கீ³தினிதா³னகதா²வண்ணனா

437. பஞ்சஸதிகக்க²ந்த⁴கே பாவாய குஸினாரந்தி (தீ³. நி. அட்ட². 2.231) பாவானக³ரே பிண்டா³ய சரித்வா குஸினாரம் க³மிஸ்ஸாமீதி அத்³தா⁴னமக்³க³ப்படிபன்னோ. மந்தா³ரவபுப்ப²ம் க³ஹேத்வாதி மஹாசாடிப்பமாணம் புப்ப²ம் ஆக³ந்துகத³ண்ட³கே ட²பேத்வா ச²த்தம் விய க³ஹேத்வா. அத்³த³ஸம் கோ²தி ஆக³ச்ச²ந்தம் தூ³ரதோவ அத்³த³ஸம். தி³ஸ்வா ச பன ‘‘புச்சி²ஸ்ஸாமி நம் ப⁴க³வதோ பவத்தி’’ந்தி சித்தம் உப்பாதே³த்வா ‘‘ஸசே கோ² பன நிஸின்னகோவ புச்சி²ஸ்ஸாமி, ஸத்த²ரி அகா³ரவோ கதோ ப⁴விஸ்ஸதீ’’தி உட்ட²ஹித்வா டி²தட்டா²னதோ அபக்கம்ம ச²த்³த³ந்தோ நாக³ராஜா மணிசம்மம் விய த³ஸப³லத³த்தியம் மேக⁴வண்ணபம்ஸுகூலசீவரம் பாருபித்வா த³ஸனக²ஸமோதா⁴னஸமுஜ்ஜலம் அஞ்ஜலிம் ஸிரஸ்மிம் பதிட்டா²பேத்வா ஸத்த²ரி கதேன கா³ரவேன ஆஜீவகஸ்ஸ அபி⁴முகோ² ஹுத்வா ‘‘அபாவுஸோ அம்ஹாகம் ஸத்தா²ரம் ஜானாஸீ’’தி ஆஹ. கிம் பன ஸத்து² பரினிப்³பா³னம் ஜானந்தோ புச்சி² அஜானந்தோதி? ஆவஜ்ஜனப்படிப³த்³த⁴ம் கீ²ணாஸவானம் ஜானனம். அனாவஜ்ஜிதத்தா பனேஸ அஜானந்தோ புச்சீ²தி ஏகே. தே²ரோ ஸமாபத்திப³ஹுலோ ரத்திட்டா²னதி³வாட்டா²னலேணமண்ட³பாதீ³ஸு நிச்சம் ஸமாபத்திப²லேனேவ யாபேதி. குலஸந்தகம்பி கா³மம் பவிஸித்வா த்³வாரே ஸமாபஜ்ஜித்வா ஸமாபத்திதோ வுட்டி²தோவ பி⁴க்க²ம் க³ண்ஹாதி. தே²ரோ கிர ‘‘இமினா மே பச்சி²மேன அத்தபா⁴வேன மஹாஜனானுக்³க³ஹம் கரிஸ்ஸாமி, யே மய்ஹம் பி⁴க்க²ம் வா தே³ந்தி, க³ந்த⁴மாலாதீ³ஹி வா ஸக்காரம் கரோந்தி, தேஸம் தம் மஹப்ப²லம் ஹோதூ’’தி ஏவம் கரோதி. தஸ்மா ஸமாபத்திப³ஹுலதாய ந ஜானி. இதி அஜானந்தோவ புச்சீ²தி வத³ந்தி, தம் ந க³ஹேதப்³ப³ம். ந ஹேத்த² அஜானனகாரணம் அத்தி². அபி⁴லக்கி²தம் ஸத்து² பரினிப்³பா³னம் அஹோஸி த³ஸஸஹஸ்ஸிலோகதா⁴துகம்பனாதீ³ஹி நிமித்தேஹி. தே²ரஸ்ஸ பன பரிஸாய கேஹிசி பி⁴க்கூ²ஹி ப⁴க³வா தி³ட்ட²புப்³போ³, கேஹிசி ந தி³ட்ட²புப்³போ³. தத்த² யேஹி தி³ட்ட²புப்³போ³, தேபி பஸ்ஸிதுகாமாவ. யேஹிபி அதி³ட்ட²புப்³போ³, தேபி பஸ்ஸிதுகாமாவ. தத்த² யேஹி ந தி³ட்ட²புப்³போ³, தே அபி⁴த³ஸ்ஸனகாமதாய க³ந்த்வா ‘‘குஹிம் ப⁴க³வா’’தி புச்ச²ந்தா ‘‘பரினிப்³பு³தோ’’தி ஸுத்வா ஸந்தா⁴ரேதும் ந ஸக்கி²ஸ்ஸந்தி. சீவரம் ச²ட்³டே³த்வா ஏகவத்தா² வா து³ன்னிவத்தா² வா உரானி படிபிஸந்தா பரோதி³ஸ்ஸந்தி. தத்த² மனுஸ்ஸா ‘‘மஹாகஸ்ஸபேன ஸத்³தி⁴ம் ஆக³தபம்ஸுகூலிகா ஸயம்பி இத்தி²யோ விய பரோத³ந்தி, தே கிம் அம்ஹே ஸமஸ்ஸாஸேந்தீ’’தி மய்ஹம் தோ³ஸம் த³ஸ்ஸந்தி. இத³ம் பன ஸுஞ்ஞம் மஹாரஞ்ஞம், இத⁴ யதா² ததா² ரோத³ந்தேஸு தோ³ஸோ நத்தி². புரிமதரம் ஸுத்வா நாம ஸோகோபி தனுகோ ஹோதீதி பி⁴க்கூ²னம் ஸதுப்பாத³லாப⁴த்த²ம் ஜானந்தோவ புச்சி².

அஜ்ஜ ஸத்தாஹபரினிப்³பு³தோதி அஜ்ஜ தி³வஸதோ படிலோமதோ ஸத்தமே அஹனி பரினிப்³பு³தோ. ததோ மே இத³ந்தி ததோ ஸமணஸ்ஸ கோ³தமஸ்ஸ பரினிப்³பு³தட்டா²னதோ. அவீதராகா³தி புது²ஜ்ஜனா சேவ ஸோதாபன்னஸகதா³கா³மினோ ச. தேஸஞ்ஹி தோ³மனஸ்ஸம் அப்பஹீனம், தஸ்மா தேபி பா³ஹா பக்³க³ய்ஹ கந்த³ந்தி, உபோ⁴ ஹத்தே² ஸீஸே ட²பேத்வா ரோத³ந்தி. சி²ன்னபாதம் பபதந்தீதி சி²ன்னானம் பாதோ விய சி²ன்னபாதோ, தம் சி²ன்னபாதம், பா⁴வனபும்ஸகனித்³தே³ஸோயம், மஜ்ஜே² சி²ன்னா விய ஹுத்வா யதோ வா ததோ வா பதந்தீதி அத்தோ². ஆவட்டந்தீதி அபி⁴முக²பா⁴வேன வட்டந்தி. யத்த² பதிதா, ததோ கதிபயரதனட்டா²னம் வட்டனவஸேனேவ க³ந்த்வா புன யதா²பதிதமேவ டா²னம் வட்டனவஸேன ஆக³ச்ச²ந்தி. விவட்டந்தீதி யத்த² பதிதா, ததோ நிவட்டந்தி, பதிதட்டா²னதோ பரபா⁴க³ம் வட்டமானா க³ச்ச²ந்தீதி அத்தோ². அபிச புரதோ வட்டனம் ஆவட்டனம், பஸ்ஸதோ பச்ச²தோ ச வட்டனம் விவட்டனம். தஸ்மா த்³வே பாதே³ பஸாரேத்வா ஸகிம் புரதோ ஸகிம் பச்ச²தோ ஸகிம் வாமதோ ஸகிம் த³க்கி²ணதோ ஸம்பரிவட்டமானாபி ஆவட்டந்தி விவட்டந்தீதி வுச்சந்தி. வீதராகா³தி பஹீனதோ³மனஸ்ஸா இட்டா²னிட்டே²ஸு நிப்³பி³காரதாய ஸிலாத²ம்ப⁴ஸதி³ஸா அனாகா³மிகீ²ணாஸவா. காமஞ்ஹி தோ³மனஸ்ஸே அஸதிபி ஏகச்சோ ராகோ³ ஹோதியேவ, ராகே³ பன அஸதி தோ³மனஸ்ஸஸ்ஸ அஸம்ப⁴வோயேவ. ததே³கட்ட²பா⁴வதோ ஹி ராக³ப்பஹானேன பஹீனதோ³மனஸ்ஸா வுத்தா, ந கீ²ணாஸவா ஏவ.

ஸப்³பே³ஹேவ பியேஹீதிஆதீ³ஸு பியாயிதப்³ப³தோ பியேஹி மனவட்³ட⁴னதோ மனாபேஹி மாதாபிதாபா⁴தாப⁴கி³னீஆதி³கேஹி. நானாபா⁴வோதி ஜாதியா நானாபா⁴வோ, ஜாதிஅனுரூபக³மனேன விஸும் பா⁴வோ, அஸம்ப³த்³த⁴பா⁴வோதி அத்தோ². வினாபா⁴வோதி மரணேன வினாபா⁴வோ, சுதியா தேனத்தபா⁴வேன அபுனபவத்தனதோ விப்பயோகோ³தி அத்தோ². அஞ்ஞதா²பா⁴வோதி ப⁴வேன அஞ்ஞதா²பா⁴வோ, ப⁴வந்தரக்³க³ஹணேன ‘‘காமாவசரஸத்தோ ரூபாவசரோ ஹோதீ’’திஆதி³னா தத்தா²பி ‘‘மனுஸ்ஸோ தே³வோ ஹோதீ’’திஆதி³னா ச புரிமாகாரதோ அஞ்ஞாகாரதாதி அத்தோ². தந்தி தஸ்மா. குதேத்த² லப்³பா⁴தி குதோ குஹிம் கஸ்மிம் நாம டா²னே ஏத்த² ஏதஸ்மிம் க²ந்த⁴ப்பவத்தே யம் தம் ஜாதம்…பே… மா பலுஜ்ஜீதி லத்³து⁴ம் ஸக்கா, ந ஸக்கா ஏவ தாதி³ஸஸ்ஸ காரணஸ்ஸ அபா⁴வதோ. இத³ம் வுத்தம் ஹோதி – யஸ்மா ஸப்³பே³ஹேவ பியேஹி மனாபேஹி நானாபா⁴வோ, தஸ்மா த³ஸ பாரமியோ பூரேத்வாபி ஸம்போ³தி⁴ம் பத்வாபி த⁴ம்மசக்கம் பவத்தேத்வாபி யமகபாடிஹாரியம் த³ஸ்ஸேத்வாபி தே³வோரோஹணம் கத்வாபி யம் தம் ஜாதம் பூ⁴தம் ஸங்க²தம் பலோகத⁴ம்மம், தஞ்ச ததா²க³தஸ்ஸபி ஸரீரம் மா பலுஜ்ஜீதி நேதம் டா²னம் விஜ்ஜதி, ரோத³ந்தேனபி கந்த³ந்தேனபி ந ஸக்கா தம் காரணம் லத்³து⁴ந்தி.

தேன கோ² பனாவுஸோ, ஸமயேன ஸுப⁴த்³தோ³ நாம வுட்³ட⁴பப்³ப³ஜிதோதிஆதீ³ஸு யம் வத்தப்³ப³ம், தம் நிதா³னவண்ணனாயம் (ஸாரத்த². டீ. 1.பட²மமஹாஸங்கீ³திகதா²) வுத்தனயமேவ.

ஸங்கீ³தினிதா³னகதா²வண்ணனா நிட்டி²தா.

கு²த்³தா³னுகு²த்³த³கஸிக்கா²பத³கதா²வண்ணனா

441. ஸமூஹனேய்யாதி ஆகங்க²மானோ ஸமூஹனது, யதி³ இச்ச²தி, ஸமூஹனேய்யாதி அத்தோ². கஸ்மா பன ‘‘ஸமூஹனதா²’’தி ஏகம்ஸேனேவ அவத்வா ‘‘ஆகங்க²மானோ ஸமூஹனேய்யா’’தி விகப்பவசனேனேவ ப⁴க³வா ட²பேஸீதி? மஹாகஸ்ஸபஸ்ஸ ஞாணப³லஸ்ஸ தி³ட்ட²த்தா. பஸ்ஸதி ஹி ப⁴க³வா ‘‘ஸமூஹனதா²தி வுத்தேபி ஸங்கீ³திகாலே கஸ்ஸபோ ந ஸமூஹனிஸ்ஸதீ’’தி, தஸ்மா விகப்பேனேவ ட²பேஸி. யதி³ அஸமூஹனனம் தி³ட்ட²ம், ததே³வ ச இச்சி²தம், அத² கஸ்மா ப⁴க³வா ‘‘ஆகங்க²மானோ ஸமூஹனதூ’’தி அவோசாதி? ததா²ரூபபுக்³க³லஜ்ஜா²ஸயவஸேன. ஸந்தி ஹி கேசி கு²த்³தா³னுகு²த்³த³கானி ஸிக்கா²பதா³னி ஸமாதா³ய வத்திதும் அனிச்ச²ந்தா, தேஸம் ததா² அவுச்சமானே ப⁴க³வதி விகா⁴தோ உப்பஜ்ஜேய்ய, தம் தேஸம் ப⁴விஸ்ஸதி தீ³க⁴ரத்தம் அஹிதாய து³க்கா²ய. ததா² பன வுத்தே தேஸம் விகா⁴தோ ந உப்பஜ்ஜேய்ய, அம்ஹாகமேவாயம் தோ³ஸோ, யதோ அம்ஹேஸுயேவ கேசி ஸமூஹனனம் ந இச்ச²ந்தீதி. கேசி ‘‘ஸகலஸ்ஸ பன ஸாஸனஸ்ஸ ஸங்கா⁴யத்தபா⁴வகரணத்த²ம் ததா² வுத்த’’ந்தி வத³ந்தி. யம் கிஞ்சி ஸத்தா²ரா ஸிக்கா²பத³ம் பஞ்ஞத்தம், தம் ஸமணா ஸக்யபுத்தியா ஸிரஸா ஸம்படிச்சி²த்வா ஜீவிதம் விய ரக்க²ந்தி. ததா² ஹி தே ‘‘கு²த்³தா³னுகு²த்³த³கானி ஸிக்கா²பதா³னி ஆகங்க²மானோ ஸங்கோ⁴ ஸமூஹனதூ’’தி வுத்தேபி ந ஸமூஹனிம்ஸு. அஞ்ஞத³த்து² புரதோ விய தஸ்ஸ அச்சயேபி ரக்கி²ம்ஸுயேவாதி ஸத்து² ஸாஸனஸ்ஸ ஸங்க⁴ஸ்ஸ ச மஹந்தபா⁴வத³ஸ்ஸனத்த²ம்பி ததா² வுத்தந்தி த³ட்ட²ப்³ப³ம். ததா² ஹி ஆயஸ்மா ஆனந்தோ³ அஞ்ஞேபி வா பி⁴க்கூ² ‘‘கதமம் பன, ப⁴ந்தே, கு²த்³த³கம், கதமம் அனுகு²த்³த³க’’ந்தி ந புச்சி²ம்ஸு ஸமூஹனஜ்ஜா²ஸயஸ்ஸேவ அபா⁴வதோ, தேனேவ ஏகஸிக்கா²பத³ம்பி அபரிச்சஜித்வா ஸப்³பே³ஸம் அனுக்³க³ஹேதப்³ப³பா⁴வத³ஸ்ஸனத்த²ம் ‘‘சத்தாரி பாராஜிகானி ட²பேத்வா அவஸேஸானி கு²த்³தா³னுகு²த்³த³கானீ’’திஆதி³மாஹம்ஸு. ஏவஞ்ஹி வத³ந்தேஹி ‘‘கு²த்³தா³னுகு²த்³த³கா இமே நாமா’’தி அவினிச்சி²தத்தா ஸப்³பே³ஸம் அனுக்³க³ஹேதப்³ப³பா⁴வோ த³ஸ்ஸிதோ ஹோதி.

442. அத² கோ² ஆயஸ்மா மஹாகஸ்ஸபோ ஸங்க⁴ம் ஞாபேஸீதி ஏத்த² பன கேசி வத³ந்தி ‘‘ப⁴ந்தே நாக³ஸேன, கதமம் கு²த்³த³கம், கதமம் அனுகு²த்³த³கந்தி மிலிந்த³ரஞ்ஞா புச்சி²தே ‘து³க்கடம் மஹாராஜ, கு²த்³த³கம், து³ப்³பா⁴ஸிதம் அனுகு²த்³த³க’ந்தி (மி. ப. 4.2.1) வுத்தத்தா நாக³ஸேனத்தே²ரோ கு²த்³தா³னுகு²த்³த³கம் ஜானி, மஹாகஸ்ஸபத்தே²ரோ பன தம் அஜானந்தோ ‘ஸுணாது மே ஆவுஸோ’திஆதி³னா கம்மவாசம் ஸாவேஸீ’’தி, ந தம் ஏவம் க³ஹேதப்³ப³ம். நாக³ஸேனத்தே²ரோ ஹி பரேஸம் வாத³பதோ²பச்சே²த³னத்த²ம் ஸங்கீ³திகாலே த⁴ம்மஸங்கா³ஹகமஹாதே²ரேஹி க³ஹிதகோட்டா²ஸேஸு அந்திமகோட்டா²ஸமேவ க³ஹேத்வா மிலிந்த³ராஜானம் ஸஞ்ஞாபேஸி, மஹாகஸ்ஸபத்தே²ரோ பன ஏகஸிக்கா²பத³ம்பி அஸமூஹனிதுகாமதாய ததா² கம்மவாசம் ஸாவேஸி.

தத்த² கி³ஹிக³தானீதி கி³ஹிபடிஸம்யுத்தானீதி வத³ந்தி. கி³ஹீஸு க³தானி, தேஹி ஞாதானி கி³ஹிக³தானீதி ஏவம் பனேத்த² அத்தோ² த³ட்ட²ப்³போ³. தூ⁴மகாலோ ஏதஸ்ஸாதி தூ⁴மகாலிகம் சிதகதூ⁴மவூபஸமதோ பரம் அப்பவத்தனதோ. அப்பஞ்ஞத்தந்திஆதீ³ஸு (தீ³. நி. அட்ட². 2.136; அ. நி. அட்ட². 3.7.23) நவம் அத⁴ம்மிகம் கதிகவத்தம் வா ஸிக்கா²பத³ம் வா ப³ந்த⁴ந்தா அப்பஞ்ஞத்தம் பஞ்ஞபேந்தி நாம புராணஸந்த²தவத்து²ஸ்மிம் ஸாவத்தி²யம் பி⁴க்கூ² விய. உத்³த⁴ம்மம் உப்³பி³னயம் ஸாஸனம் தீ³பேந்தா பஞ்ஞத்தம் ஸமுச்சி²ந்த³ந்தி நாம வஸ்ஸஸதபரினிப்³பு³தே ப⁴க³வதி வேஸாலிகா வஜ்ஜிபுத்தகா விய. கு²த்³தா³னுகு²த்³த³கா பன ஆபத்தியோ ஸஞ்சிச்ச வீதிக்கமந்தா யதா²பஞ்ஞத்தேஸு ஸிக்கா²பதே³ஸு ஸமாதா³ய ந வத்தந்தி நாம அஸ்ஸஜிபுனப்³ப³ஸுகா விய. நவம் பன கதிகவத்தம் வா ஸிக்கா²பத³ம் வா அப³ந்த⁴ந்தா, த⁴ம்மதோ வினயதோ ஸாஸனம் தீ³பேந்தா, கு²த்³தா³னுகு²த்³த³கம்பி ச ஸிக்கா²பத³ம் அஸமூஹனந்தா அப்பஞ்ஞத்தம் ந பஞ்ஞபேந்தி, பஞ்ஞத்தம் ந ஸமுச்சி²ந்த³ந்தி, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்தந்தி நாம ஆயஸ்மா உபஸேனோ விய ஆயஸ்மா யஸோ காகண்ட³கபுத்தோ விய ச.

443. ப⁴க³வதா ஓளாரிகே நிமித்தே கயிரமானேதி வேஸாலிம் நிஸ்ஸாய சாபாலே சேதியே விஹரந்தேன ப⁴க³வதா –

‘‘ரமணீயா, ஆனந்த³, வேஸாலீ, ரமணீயம் உதே³னசேதியம், ரமணீயம் கோ³தமகசேதியம், ரமணீயம் ஸத்தம்ப³சேதியம், ரமணீயம் ப³ஹுபுத்தசேதியம், ரமணீயம் ஸாரந்த³த³சேதியம், ரமணீயம் சாபாலசேதியம். யஸ்ஸ கஸ்ஸசி, ஆனந்த³, சத்தாரோ இத்³தி⁴பாதா³ பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴, ஸோ ஆகங்க²மானோ கப்பம் வா திட்டே²ய்ய கப்பாவஸேஸம் வா. ததா²க³தஸ்ஸ கோ² பன, ஆனந்த³, சத்தாரோ இத்³தி⁴பாதா³ பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴, ஸோ ஆகங்க²மானோ, ஆனந்த³, ததா²க³தோ கப்பம் வா திட்டே²ய்ய கப்பாவஸேஸம் வா’’தி (தீ³. நி. 2.166) –

ஏவம் ஓளாரிகே நிமித்தே கயிரமானே.

மாரேன பரியுட்டி²தசித்தோதி மாரேன அஜ்ஜோ²த்த²டசித்தோ. மாரோ ஹி யஸ்ஸ ஸப்³பே³ன ஸப்³ப³ம் த்³வாத³ஸ விபல்லாஸா அப்பஹீனா, தஸ்ஸ சித்தம் பரியுட்டா²தி. தே²ரஸ்ஸ ச சத்தாரோ விபல்லாஸா அப்பஹீனா, தேனஸ்ஸ மாரோ சித்தம் பரியுட்டா²ஸி. ஸோ பன சித்தபரியுட்டா²னம் கரோந்தோ கிம் கரோதீதி? பே⁴ரவம் ரூபாரம்மணம் வா த³ஸ்ஸேதி, ஸத்³தா³ரம்மணம் வா ஸாவேதி, ததோ ஸத்தா தம் தி³ஸ்வா வா ஸுத்வா வா ஸதிம் விஸ்ஸஜ்ஜேத்வா விவடமுகா² ஹோந்தி, தேஸம் முகே²ன ஹத்த²ம் பவேஸேத்வா ஹத³யம் மத்³த³தி, ததோ விஸஞ்ஞாவ ஹுத்வா திட்ட²ந்தி. தே²ரஸ்ஸ பனேஸ முகே²ன ஹத்த²ம் பவேஸேதும் கிம் ஸக்கி²ஸ்ஸதி, பே⁴ரவாரம்மணம் பன த³ஸ்ஸேஸி, தம் தி³ஸ்வா தே²ரோ நிமித்தோபா⁴ஸம் ந படிவிஜ்ஜி².

கு²த்³தா³னுகு²த்³த³கஸிக்கா²பத³கதா²வண்ணனா நிட்டி²தா.

ப்³ரஹ்மத³ண்ட³கதா²வண்ணனா

445. உஜ்ஜவனிகாயாதி படிஸோதகா³மினியா. ரஜோஹரணந்தி ரஜோபுஞ்ச²னீ. ந குலவம் க³மேந்தீதி நிரத்த²கவினாஸனம் ந க³மேந்தி. குச்சி²தோ லவோ குலவோ, அனயவினாஸோதி வுத்தம் ஹோதி. ‘‘த⁴ம்மவினயஸங்கீ³தியா’’தி வத்தப்³பே³ ஸங்கீ³தியா வினயப்பதா⁴னத்தா ‘‘வினயஸங்கீ³தியா’’தி வுத்தம். வினயப்பதா⁴னா ஸங்கீ³தி வினயஸங்கீ³தி. ஸேஸமேத்த² ஸுவிஞ்ஞேய்யமேவாதி.

பஞ்சஸதிகக்க²ந்த⁴கவண்ணனா நிட்டி²தா.