5. கு²த்³த³கவத்து²க்க²ந்த⁴கம்

கு²த்³த³கவத்து²கதா²வண்ணனா

243. கு²த்³த³கவத்து²க்க²ந்த⁴கே அட்ட²பதா³காரேனாதி அட்ட²பத³ப²லகாகாரேன, ஜூதப²லகஸதி³ஸந்தி வுத்தம் ஹோதி. மல்லகமூலஸண்டா²னேனாதி கே²ளமல்லகமூலஸண்டா²னேன.

245. முத்தோலம்ப³காதீ³னந்தி ஆதி³-ஸத்³தே³ன குண்ட³லாதி³ம் ஸங்க³ண்ஹாதி. பலம்ப³கஸுத்தந்தி யஞ்ஞோபசிதாகாரேன ஓலம்ப³கஸுத்தம்.

246. சிக்கலேனாதி ஸிலேஸேன.

248. ஸாது⁴கீ³தந்தி அனிச்சதாதி³படிஸம்யுத்தகீ³தம்.

249. சதுரஸ்ஸேன வத்தேனாதி பரிபுண்ணேன உச்சாரணவத்தேன. தரங்க³வத்தாதீ³னம் உச்சாரணவிதா⁴னானி நட்ட²ப்பயோகா³னி. பா³ஹிரலோமிந்தி பா⁴வனபும்ஸகனித்³தே³ஸோ, யதா² தஸ்ஸ உண்ணபாவாரஸ்ஸ ப³ஹித்³தா⁴ லோமானி தி³ஸ்ஸந்தி, ததா² தா⁴ரேந்தஸ்ஸ து³க்கடந்தி வுத்தம் ஹோதி.

251. இமானி சத்தாரி அஹிராஜகுலானீதி (அ. நி. அட்ட². 2.4.67) இத³ம் த³ட்ட²விஸே ஸந்தா⁴ய வுத்தம். யே ஹி கேசி த³ட்ட²விஸா, ஸப்³பே³ தே இமேஸம் சதுன்னம் அஹிராஜகுலானம் அப்³ப⁴ந்தரக³தாவ ஹோந்தி. அத்தகு³த்தியாதி அத்தனோ கு³த்தத்தா²ய. அத்தரக்கா²யாதி அத்தனோ ரக்க²ணத்தா²ய. அத்தபரித்தம்காதுந்தி அத்தனோ பரித்தாணத்தா²ய அத்தபரித்தம் நாம காதும் அனுஜானாமீதி அத்தோ².

இதா³னி யதா² தம் பரித்தம் காதப்³ப³ம், தம் த³ஸ்ஸேதும் ‘‘ஏவஞ்ச பன பி⁴க்க²வே’’திஆதி³மாஹ. தத்த² (ஜா. அட்ட². 2.2.105) விரூபக்கே²ஹீதி விரூபக்க²னாக³குலேஹி. ஸேஸேஸுபி ஏஸேவ நயோ. ஸஹயோகே³ சேதம் கரணவசனம், ஏதேஹி ஸஹ மய்ஹம் மித்தபா⁴வோதி வுத்தம் ஹோதி அபாத³கேஹீதி அபாத³கஸத்தேஹி. ஸேஸேஸுபி ஏஸேவ நயோ. ஸப்³பே³ ஸத்தாதி இதோ புப்³பே³ ஏத்தகேன டா²னேன ஓதி³ஸ்ஸகமேத்தம் கதே²த்வா இதா³னி அனோதி³ஸ்ஸகமேத்தம் கதே²தும் இத³மாரத்³த⁴ம். தத்த² ஸத்தா பாணா பூ⁴தாதி ஸப்³பா³னேதானி புக்³க³லவேவசனானேவ. ப⁴த்³ரானி பஸ்ஸந்தூதி ப⁴த்³ரானி ஆரம்மணானி பஸ்ஸந்து. மா கஞ்சி பாபமாக³மாதி கஞ்சி ஸத்தம் பாபகம் லாமகம் மா ஆக³ச்ச²து.

அப்பமாணோ பு³த்³தோ⁴தி ஏத்த² பு³த்³தோ⁴தி பு³த்³த⁴கு³ணா வேதி³தப்³பா³, தே ஹி அப்பமாணா நாம. ஸேஸத்³வயேஸுபி ஏஸேவ நயோ, பமாணவந்தானீதி கு³ணப்பமாணேன யுத்தானி. உண்ணனாபீ⁴தி லோமஸனாபி⁴கோ மக்கடகோ. ஸரபூ³தி க⁴ரகோ³ளிகா. கதா மே ரக்கா² கதம் மே பரித்தந்தி மயா ஏத்தகஸ்ஸ ஜனஸ்ஸ ரக்கா² ச பரித்தாணஞ்ச கதம். படிக்கமந்து பூ⁴தானீதி ஸப்³பே³பி மே கதபரித்தாணா ஸத்தா அபக³ச்ச²ந்து, மா மம் விஹேட²யிம்ஸூதி அத்தோ². ஸோஹந்தி யஸ்ஸ மம ஏதேஹி ஸப்³பே³ஹிபி மேத்தம், ஸோ அஹம் ப⁴க³வதோ நமோ கரோமி, விபஸ்ஸீஆதீ³னஞ்ச ஸத்தன்னம் ஸம்மாஸம்பு³த்³தா⁴னம் நமோ கரோமீதி ஸம்ப³ந்தோ⁴.

அஞ்ஞம்ஹி சே²தப்³ப³ம்ஹீதி ராகா³னுஸயம் ஸந்தா⁴ய வத³தி. தாதி³ஸம் வா து³க்க²ந்தி முட்டி²ஆதீ³ஹி து³க்க²ம் உப்பாதே³ந்தஸ்ஸ.

252. ஜாலானி பரிக்கி²பாபேத்வாதி பரிஸ்ஸயமோசனத்த²ஞ்சேவ பமாதே³ன க³ளிதானம் ஆப⁴ரணாதீ³னம் ரக்க²ணத்த²ஞ்ச ஜாலானி கரண்ட³காகாரேன பரிக்கி²பாபேத்வா. சந்த³னக³ண்டி² ஆக³ந்த்வா ஜாலே லக்³கா³தி ஏகோ கிர ரத்தசந்த³னருக்கோ² க³ங்கா³ய உபரிதீரே ஜாதோ க³ங்கோ³த³கேன தோ⁴தமூலோ பதித்வா தத்த² தத்த² பாஸாணேஸு ஸம்பி⁴ஜ்ஜமானோ விப்பகிரி. ததோ ஏகா க⁴டப்பமாணா க⁴டிகா பாஸாணேஸு க⁴ம்ஸியமானா உத³கஊமீஹி போதி²யமானா மட்டா² ஹுத்வா அனுபுப்³பே³ன வுய்ஹமானா ஸேவாலபரியோனத்³தா⁴ ஆக³ந்த்வா தஸ்மிம் ஜாலே லக்³கி³. தம் ஸந்தா⁴யேதம் வுத்தம். லேக²ந்தி லிகி²தக³ஹிதம் சுண்ணம். உட்³டி³த்வாதி வேளுபரம்பராய உத்³த⁴ம் பாபேத்வா, உட்டா²பேத்வாதி வுத்தம் ஹோதி. ஓஹரதூதி இத்³தி⁴யா ஓதாரேத்வா க³ண்ஹது.

பூரணகஸ்ஸபாத³யோ ச² ஸத்தா²ரோ. தத்த² (தீ³. நி. அட்ட². 1.151-152; ம. நி. அட்ட². 1.312) பூரணோதி தஸ்ஸ ஸத்து²படிஞ்ஞஸ்ஸ நாமம். கஸ்ஸபோதி கோ³த்தம். ஸோ கிர அஞ்ஞதரஸ்ஸ குலஸ்ஸ ஏகூனதா³ஸஸதம் பூரயமானோ ஜாதோ. தேனஸ்ஸ ‘‘பூரணோ’’தி நாமம் அகம்ஸு. மங்க³லதா³ஸத்தா சஸ்ஸ கதம் ‘‘து³க்கட’’ந்தி வத்தா நத்தி², அகதம் வா ‘‘ந கத’’ந்தி. ஸோ ‘‘கிமஹம் ஏத்த² வஸாமீ’’தி பலாயி. அத²ஸ்ஸ சோரா வத்தா²னி அச்சி²ந்தி³ம்ஸு. ஸோ பண்ணேன வா திணேன வா படிச்சா²தே³தும்பி அஜானந்தோ ஜாதரூபேனேவ ஏகம் கா³மம் பாவிஸி. மனுஸ்ஸா தம் தி³ஸ்வா ‘‘அயம் ஸமணோ அரஹா அப்பிச்சோ², நத்தி² இமினா ஸதி³ஸோ’’தி பூவப⁴த்தாதீ³னி க³ஹேத்வா உபஸங்கமந்தி. ஸோ ‘‘மய்ஹம் ஸாடகம் அனிவத்த²பா⁴வேன இத³ம் உப்பன்ன’’ந்தி ததோ பட்டா²ய ஸாடகம் லபி⁴த்வாபி ந நிவாஸேஸி, ததே³வ பப்³ப³ஜ்ஜம் அக்³க³ஹேஸி. தஸ்ஸ ஸந்திகே அஞ்ஞேபி அஞ்ஞேபீதி பஞ்சஸதா மனுஸ்ஸா பப்³ப³ஜிம்ஸு. ஏவமயம் க³ணாசரியோ ஹுத்வா ‘‘ஸத்தா²’’தி லோகே பாகடோ அஹோஸி.

மக்க²லீதி தஸ்ஸ நாமம். கோ³ஸாலாய ஜாதத்தா கோ³ஸாலோதி து³தியனாமம். தம் கிர ஸகத்³த³மாய பூ⁴மியா தேலக⁴டம் க³ஹேத்வா க³ச்ச²ந்தம் ‘‘தாத மா க²லீ’’தி ஸாமிகோ ஆஹ. ஸோ பமாதே³ன க²லித்வா பதித்வா ஸாமிகஸ்ஸ ப⁴யேன பலாயிதும் ஆரத்³தோ⁴. ஸாமிகோ உபதா⁴வித்வா ஸாடககண்ணே அக்³க³ஹேஸி, ஸோ ஸாடகம் ச²ட்³டே³த்வா அசேலகோ ஹுத்வா பலாயி. ஸேஸம் பூரணஸதி³ஸமேவ.

அஜிதோதி தஸ்ஸ நாமம். கேஸகம்ப³லம் தா⁴ரேதீதி கேஸகம்ப³லோ. இதி நாமத்³வயம் ஸம்ஸந்தி³த்வா ‘‘அஜிதோ கேஸகம்ப³லோ’’தி வுச்சதி. தத்த² கேஸகம்ப³லோ நாம மனுஸ்ஸானம் கேஸேஹி கதகம்ப³லோ. ததோ படிகிட்ட²தரம் வத்த²ம் நாம நத்தி². யதா²ஹ ‘‘ஸேய்யதா²பி, பி⁴க்க²வே, யானி கானிசி தந்தாவுதானம் வத்தா²னம், கேஸகம்ப³லோ தேஸம் படிகிட்டோ² அக்கா²யதி. கேஸகம்ப³லோ, பி⁴க்க²வே, ஸீதே ஸீதோ உண்ஹே உண்ஹோ து³ப்³ப³ண்ணோ து³க்³க³ந்தோ⁴ து³க்க²ஸம்ப²ஸ்ஸோ’’தி (அ. நி. 3.138).

பகுதோ⁴தி தஸ்ஸ நாமம். கச்சாயனோதி கோ³த்தம். இதி நாமகோ³த்தம் ஸம்ஸந்தி³த்வா ‘‘பகுதோ⁴ கச்சாயனோ’’தி வுச்சதி. ஸீதூத³கபடிக்கி²த்தகோ ஏஸ, வச்சம் கத்வாபி உத³ககிச்சம் ந கரோதி, உண்ஹோத³கம் வா கஞ்ஜியம் வா லபி⁴த்வா கரோதி, நதி³ம் வா மக்³கோ³த³கம் வா அதிக்கம்ம ‘‘ஸீலம் மே பி⁴ன்ன’’ந்தி வாலிகதூ²பம் கத்வா ஸீலம் அதி⁴ட்டா²ய க³ச்ச²தி. ஏவரூபனிஸ்ஸிரிகலத்³தி⁴கோ ஏஸ.

ஸஞ்சயோதி தஸ்ஸ நாமம். பே³லட்ட²ஸ்ஸ புத்தோ பே³லட்ட²புத்தோ. ‘‘அம்ஹாகம் க³ண்ட²னகிலேஸோ பலிபு³ந்த⁴னகிலேஸோ நத்தி², கிலேஸக³ண்டி²ரஹிதா மய’’ந்தி ஏவம்வாதி³தாய லத்³த⁴னாமவஸேன நிக³ண்டோ². நாடஸ்ஸ புத்தோதி நாடபுத்தோ.

பிண்டோ³லபா⁴ரத்³வாஜோதி (உதா³. அட்ட². 36) பிண்ட³ம் உலமானோ பரியேஸமானோ பப்³ப³ஜிதோதி பிண்டோ³லோ. ஸோ கிர பரிஜிண்ணபோ⁴கோ³ ப்³ராஹ்மணோ ஹுத்வா மஹந்தம் பி⁴க்கு²ஸங்க⁴ஸ்ஸ லாப⁴ஸக்காரம் தி³ஸ்வா பிண்ட³த்தா²ய நிக்க²மித்வா பப்³ப³ஜிதோ. ஸோ மஹந்தம் கபல்லபத்தம் ‘‘பத்த’’ந்தி க³ஹேத்வா சரதி, கபல்லபூரம் யாகு³ம் பிவதி, ப⁴த்தம் பு⁴ஞ்ஜதி, பூவக²ஜ்ஜகஞ்ச கா²த³தி. அத²ஸ்ஸ மஹக்³க⁴ஸபா⁴வம் ஸத்து² ஆரோசயிம்ஸு. ஸத்தா² தஸ்ஸ பத்தத்த²விகம் நானுஜானி. தே²ரோ ஹேட்டா²மஞ்சே பத்தம் நிகுஜ்ஜித்வா ட²பேதி. ஸோ ட²பேந்தோபி க⁴ம்ஸேந்தோவ பணாமேத்வா ட²பேதி, க³ண்ஹந்தோபி க⁴ம்ஸேந்தோவ ஆகட்³டி⁴த்வா க³ண்ஹாதி. தம் க³ச்ச²ந்தே க³ச்ச²ந்தே காலே க⁴ம்ஸனேன பரிக்கீ²ணம் நாளிகோத³னமத்தஸ்ஸேவ க³ண்ஹனகம் ஜாதம். ததோ ஸத்து² ஆரோசேஸும். அத²ஸ்ஸ ஸத்தா² பத்தத்த²விகம் அனுஜானி. தே²ரோ அபரேன ஸமயேன இந்த்³ரியபா⁴வனம் பா⁴வேந்தோ அக்³க³ப²லே அரஹத்தே பதிட்டா²ஸி. இதி ஸோ புப்³பே³ ஸவிஸேஸம் பிண்ட³த்தா²ய உலதீதி பிண்டோ³லோ. கோ³த்தேன பன பா⁴ரத்³வாஜோதி உப⁴யம் ஏகதோ கத்வா ‘‘பிண்டோ³லபா⁴ரத்³வாஜோ’’தி வுச்சதி.

‘‘அத² கோ² ஆயஸ்மா பிண்டோ³லபா⁴ரத்³வாஜோ…பே… ஏதத³வோசா’’தி கஸ்மா ஏவமாஹம்ஸு? ஸோ கிர (த⁴. ப. அட்ட². 2.180 தே³வோரோஹணவத்து²) ஸேட்டி² நேவ ஸம்மாதி³ட்டி², ந மிச்சா²தி³ட்டி², மஜ்ஜ²த்ததா⁴துகோ. ஸோ சிந்தேஸி ‘‘மய்ஹம் கே³ஹே சந்த³னம் ப³ஹு, கிம் நு கோ² இமினா கரிஸ்ஸாமீ’’தி. அத²ஸ்ஸ ஏதத³ஹோஸி ‘‘இமஸ்மிம் லோகே ‘மயம் அரஹந்தோ, மயம் அரஹந்தோ’தி வத்தாரோ ப³ஹூ, அஹம் ஏகம் அரஹந்தம்பி ந ஜானாமி, கே³ஹே ப⁴மம் யோஜேத்வா பத்தம் லிகா²பேத்வா ஸிக்காய ட²பேத்வா வேளுபரம்பராய ஸட்டி²ஹத்த²மத்தே ஆகாஸே ஓலம்பா³பேத்வா ‘ஸசே அரஹா அத்தி², ஆகாஸேனாக³ந்த்வா க³ண்ஹாதூ’தி வக்கா²மி. யோ தம் க³ஹேஸ்ஸதி, தஸ்ஸ ஸபுத்ததா³ரோ ஸரணம் க³மிஸ்ஸாமீ’’தி. ஸோ சிந்திதனியாமேனேவ பத்தம் லிகா²பேத்வா வேளுபரம்பராய உஸ்ஸாபேத்வா ‘‘யோ இமஸ்மிம் லோகே அரஹா, ஸோ ஆகாஸேன ஆக³ந்த்வா இமம் பத்தம் க³ண்ஹாதூ’’தி ஆஹ.

ததா³ ச² ஸத்தா²ரோ ‘‘அம்ஹாகம் ஏஸ அனுச்ச²விகோ, அம்ஹாகமேவ நம் தே³ஹீ’’தி வதி³ம்ஸு. ஸோ ‘‘ஆகாஸேனாக³ந்த்வா க³ண்ஹதா²’’தி ஆஹ. ச²ட்டே² தி³வஸே நிக³ண்டோ² நாடபுத்தோ அந்தேவாஸிகே பேஸேஸி ‘‘க³ச்ச²த² ஸேட்டி²ம் ஏவம் வதே³த² ‘அம்ஹாகம் ஆசரியஸ்ஸேவ அனுச்ச²விகோ, மா அப்பமத்தகஸ்ஸ காரணா ஆகாஸேன ஆக³மனம் கரி, தே³ஹி கிர தே பத்த’ந்தி’’. தே க³ந்த்வா ஸேட்டி²ம் ததா² வதி³ம்ஸு. ஸேட்டி² ‘‘ஆகாஸேனாக³ந்த்வா க³ண்ஹிதும் ஸமத்தோ²வ க³ண்ஹாதூ’’தி ஆஹ. நாடபுத்தோ ஸயம் க³ந்துகாமோ ஹுத்வா அந்தேவாஸிகானம் ஸஞ்ஞம் அதா³ஸி ‘‘அஹம் ஏகம் ஹத்த²ஞ்ச பாத³ஞ்ச உக்கி²பித்வா உப்பதிதுகாமோ விய ப⁴விஸ்ஸாமி, தும்ஹே மம் ‘ஆசரிய கிம் கரோத², தா³ருமயபத்தஸ்ஸ காரணா படிச்ச²ன்னம் அரஹத்தகு³ணம் மஹாஜனஸ்ஸ மா த³ஸ்ஸயித்தா²’தி வத்வா மம் ஹத்தே²ஸு ச பாதே³ஸு ச க³ஹேத்வா ஆகட்³ட⁴ந்தா பூ⁴மியம் பாதேய்யாதா²’’தி. ஸோ தத்த² க³ந்த்வா ஸேட்டி²ம் ஆஹ ‘‘மஹாஸேட்டி² அயம் பத்தோ அஞ்ஞேஸம் நானுச்ச²விகோ, மா தே அப்பமத்தகஸ்ஸ காரணா மம ஆகாஸே உப்பதனம் ருச்சி, தே³ஹி மே பத்த’’ந்தி. ப⁴ந்தே, ஆகாஸேன உப்பதித்வாவ க³ண்ஹதா²தி. ததோ நாடபுத்தோ ‘‘தேன ஹி அபேத² அபேதா²’’தி அந்தேவாஸிகே அபனேத்வா ‘‘ஆகாஸே உப்பதிஸ்ஸாமீ’’தி ஏகம் ஹத்த²ஞ்ச பாத³ஞ்ச உக்கி²பி. அத² நம் அந்தேவாஸிகா ‘‘ஆசரிய, கிம் நாமேதம் கரோத², ச²வஸ்ஸ தா³ருமயபத்தஸ்ஸ காரணா படிச்ச²ன்னகு³ணேன தும்ஹேஹி மஹாஜனஸ்ஸ த³ஸ்ஸிதேன கோ அத்தோ²’’தி தம் ஹத்த²பாதே³ஸு க³ஹேத்வா ஆகட்³டி⁴த்வா பூ⁴மியம் பாதேஸும். ஸோ ஸேட்டி²ம் ஆஹ ‘‘மஹாஸேட்டி², இமே மே உப்பதிதும் ந தே³ந்தி, தே³ஹி மே பத்த’’ந்தி. உப்பதித்வாவ க³ண்ஹத² ப⁴ந்தேதி. ஏவம் தித்தி²யா ச² தி³வஸானி வாயமித்வாபி பத்தம் ந லபி⁴ம்ஸுயேவ.

அத² ஸத்தமே தி³வஸே ஆயஸ்மதோ ச மோக்³க³ல்லானஸ்ஸ ஆயஸ்மதோ ச பிண்டோ³லபா⁴ரத்³வாஜஸ்ஸ ‘‘ராஜக³ஹே பிண்டா³ய சரிஸ்ஸாமா’’தி க³ந்த்வா ஏகஸ்மிம் பிட்டி²பாஸாணே ட²த்வா சீவரம் பாருபனகாலே து⁴த்தகா கத²ம் ஸமுட்டா²பேஸும் ‘‘ஹம்போ⁴ புப்³பே³ ச² ஸத்தா²ரோ ‘மயம் அரஹந்தாம்ஹா’தி விசரிம்ஸு, ராஜக³ஹஸேட்டி²னோ பன அஜ்ஜ ஸத்தமோ தி³வஸோ பத்தம் உஸ்ஸாபேத்வா ட²பயதோ ‘ஸசே அரஹா அத்தி², ஆகாஸேனாக³ந்த்வா க³ண்ஹாதூ’தி வத³ந்தஸ்ஸ, ஏகோபி ‘அஹம் அரஹா’தி ஆகாஸே உப்பதந்தோ நத்தி², அஜ்ஜ நோ லோகே அரஹந்தானம் நத்தி²பா⁴வோ ஞாதோ’’தி. தம் கத²ம் ஸுத்வா ஆயஸ்மா மஹாமோக்³க³ல்லானோ ஆயஸ்மந்தம் பிண்டோ³லபா⁴ரத்³வாஜம் ஆஹ ‘‘ஸுதம் தே, ஆவுஸோ பா⁴ரத்³வாஜ, இமேஸம் வசனம், இமே பு³த்³த⁴ஸாஸனம் பரிக்³க³ண்ஹந்தா விய வத³ந்தி, த்வஞ்ச மஹித்³தி⁴கோ மஹானுபா⁴வோ, க³ச்சே²தம் பத்தம் ஆகாஸேன க³ந்த்வா க³ண்ஹாஹீ’’தி. ‘‘ஆவுஸோ மோக்³க³ல்லான, த்வம் ‘இத்³தி⁴மந்தானம் அக்³கோ³’தி பாகடோ, த்வம் ஏதம் க³ண்ஹ, தயி பன அக்³க³ண்ஹந்தே அஹம் க³ண்ஹிஸ்ஸாமீ’’தி ஆஹ. அத² ஆயஸ்மா மஹாமோக்³க³ல்லானோ ‘‘க³ண்ஹாவுஸோ’’தி ஆஹ. இதி தே லோகஸ்ஸ அரஹந்தேஹி அஸுஞ்ஞபா⁴வத³ஸ்ஸனத்த²ம் ஏவமாஹம்ஸு.

திக்க²த்தும் ராஜக³ஹம் அனுபரியாயீதி திக்க²த்தும் ராஜக³ஹம் அனுக³ந்த்வா பரிப்³ப⁴மி. ‘‘ஸத்தக்க²த்து’’ந்திபி வத³ந்தி. தே²ரோ கிர அபி⁴ஞ்ஞாபாத³கம் ஜா²னம் ஸமாபஜ்ஜித்வா உட்டா²ய திகா³வுதம் பிட்டி²பாஸாணம் அந்தந்தேன பரிச்சி²ந்த³ந்தோ தூலபிசு விய ஆகாஸே உட்டா²பேத்வா ராஜக³ஹனக³ரஸ்ஸ உபரி ஸத்தக்க²த்தும் அனுபரியாயி. ஸோ திகா³வுதப்பமாணஸ்ஸ நக³ரஸ்ஸ அபிதா⁴னம் விய பஞ்ஞாயி. நக³ரவாஸினோ ‘‘பாஸாணோ நோ அவத்த²ரித்வா க³ண்ஹாதீ’’தி பீ⁴தா ஸுப்பாதீ³னி மத்த²கே கத்வா தத்த² தத்த² நிலீயிம்ஸு. ஸத்தமே வாரே தே²ரோ பிட்டி²பாஸாணம் பி⁴ந்தி³த்வா அத்தானம் த³ஸ்ஸேதி. மஹாஜனோ தே²ரம் தி³ஸ்வா ‘‘ப⁴ந்தே பிண்டோ³லபா⁴ரத்³வாஜ, தவ பாஸாணம் கா³ள்ஹம் கத்வா க³ண்ஹ, மா நோ ஸப்³பே³ நாஸயீ’’தி ஆஹ. தே²ரோ பாஸாணம் பாத³ந்தேன கி²பித்வா விஸ்ஸஜ்ஜேஸி. ஸோ க³ந்த்வா யதா²டா²னேயேவ பதிட்டா²ஸி. தே²ரோ ஸேட்டி²ஸ்ஸ கே³ஹமத்த²கே அட்டா²ஸி. தம் தி³ஸ்வா ஸேட்டி² உரேன நிபஜ்ஜித்வா ‘‘ஓதர ஸாமீ’’தி வத்வா ஆகாஸதோ ஓதிண்ணம் தே²ரம் நிஸீதா³பேத்வா பத்தம் க³ஹேத்வா சதுமது⁴ரபுண்ணம் கத்வா தே²ரஸ்ஸ அதா³ஸி. தே²ரோ பத்தம் க³ஹேத்வா விஹாராபி⁴முகோ² பாயாஸி. அத²ஸ்ஸ யே அரஞ்ஞக³தா பாடிஹாரியம் நாத்³த³ஸம்ஸு, தே ஸன்னிபதித்வா ‘‘ப⁴ந்தே, அம்ஹாகம்பி பாடிஹாரியம் த³ஸ்ஸேஹீ’’தி தே²ரம் அனுப³ந்தி⁴ம்ஸு. ஸோ தேஸம் தேஸம் பாடிஹாரியம் த³ஸ்ஸேந்தோ விஹாரம் அக³மாஸி. ஸத்தா² தம் அனுப³ந்தி⁴த்வா உன்னாதே³ந்தஸ்ஸ மஹாஜனஸ்ஸ ஸத்³த³ம் ஸுத்வா ‘‘ஆனந்த³, கஸ்ஸேஸோ ஸத்³தோ³’’தி புச்சி². தேன வுத்தம் ‘‘அஸ்ஸோஸி கோ² ப⁴க³வா…பே… கிம் நு கோ² ஸோ, ஆனந்த³, உச்சாஸத்³தோ³ மஹாஸத்³தோ³’’தி.

விகுப்³ப³னித்³தி⁴யா பாடிஹாரியம் படிக்கி²த்தந்தி ஏத்த² விகுப்³ப³னித்³தி⁴ நாம ‘‘ஸோ பகதிவண்ணம் விஜஹித்வா குமாரகவண்ணம் வா த³ஸ்ஸேதி நாக³வண்ணம் வா, விவித⁴ம்பி ஸேனாப்³யூஹம் த³ஸ்ஸேதீ’’தி (படி. ம. 3.13) ஏவமாக³தா பகதிவண்ணவிஜஹனவிகாரவஸேன பவத்தா இத்³தி⁴. அதி⁴ட்டா²னித்³தி⁴ பன ‘‘பகதியா ஏகோ ப³ஹுகம் ஆவஜ்ஜதி ஸதம் வா ஸஹஸ்ஸம் வா ஸதஸஹஸ்ஸம் வா, ஆவஜ்ஜித்வா ஞாணேன அதி⁴ட்டா²தி ‘ப³ஹுகோ ஹோமீ’’’தி (படி. ம. 3.10 த³ஸஇத்³தி⁴னித்³தே³ஸ) ஏவம் விப⁴ஜித்வா த³ஸ்ஸிதா அதி⁴ட்டா²னவஸேன நிப்ப²ன்னா இத்³தி⁴.

253-254. ந அச்சு²பியந்தீதி ந ஸுப²ஸ்ஸிதானி ஹோந்தி. ரூபகாகிண்ணானீதி இத்தி²ரூபாதீ³ஹி ஆகிண்ணானி. பூ⁴மிஆதா⁴ரகேதி வலயாதா⁴ரகே. தா³ருஆதா⁴ரகத³ண்டா³தா⁴ரகேஸூதி ஏகதா³ருனா கதஆதா⁴ரகே ப³ஹூஹி த³ண்ட³கேஹி கதஆதா⁴ரகே வாதி அத்தோ², தீஹி த³ண்டே³ஹி கதோ பன ந வட்டதி. பூ⁴மியம் பன நிக்குஜ்ஜித்வா ஏகமேவ ட²பேதப்³ப³ந்தி ஏத்த² த்³வே ட²பேந்தேன உபரி ட²பிதபத்தம் ஏகேன பஸ்ஸேன பூ⁴மியம் பு²ஸாபேத்வா ட²பேதும் வட்டதீதி வத³ந்தி. ஆலிந்த³கமிட்³டி⁴காதீ³னந்தி பமுக²மிட்³டி⁴கானம். பரிவத்தித்வா தத்தே²வ பதிட்டா²தீதி ஏத்த² ‘‘பரிவத்தித்வா ததியவாரே தத்தே²வ மிட்³டி⁴யா பதிட்டா²தீ’’தி க³ண்டி²பதே³ஸு வுத்தம். பரிப⁴ண்ட³ம் நாம கே³ஹஸ்ஸ ப³ஹி குட்டபாத³ஸ்ஸ தி²ரபா⁴வத்த²ம் கதா தனுகமிட்³டி⁴கா வுச்சதி. தனுகமிட்³டி⁴காயாதி கு²த்³த³கமிட்³டி⁴காய. மிட்³ட⁴ந்தேபி ஆதா⁴ரகே ட²பேதும் வட்டதி. ‘‘அனுஜானாமி, பி⁴க்க²வே, ஆதா⁴ரக’’ந்தி ஹி வசனதோ மிட்³டா⁴தீ³ஸு யத்த² கத்த²சி ஆதா⁴ரகம் ட²பேத்வா தத்த² பத்தம் ட²பேதும் வட்டதி ஆதா⁴ரகே ட²பனோகாஸஸ்ஸ அனியமிதத்தாதி வத³ந்தி. ‘‘பத்தமாளோ நாம வட்டேத்வா பத்தானம் அக³மனத்த²ம் வட்டம் வா சதுரஸ்ஸம் வா இட்ட²காதீ³ஹி பரிக்கி²பித்வா கதோ’’தி க³ண்டி²பதே³ஸு வுத்தம்.

255. க⁴டிகந்தி உபரி யோஜிதம் அக்³க³ளம். தாவகாலிகம் பரிபு⁴ஞ்ஜிதும் வட்டதீதி ஸகிதே³வ க³ஹேத்வா தேன ஆமிஸம் பரிபு⁴ஞ்ஜித்வா ச²ட்³டே³தும் வட்டதீதி அதி⁴ப்பாயோ. க⁴டிகடாஹேதி பா⁴ஜனகபாலே. அபு⁴ம் மேதி ஏத்த² ப⁴வதீதி பூ⁴, வட்³டி⁴. ந பூ⁴தி அபூ⁴, அவட்³டி⁴. ப⁴யவஸேன பன ஸா இத்தீ² ‘‘அபு⁴’’ந்தி ஆஹ, வினாஸோ மய்ஹந்தி அத்தோ². ச²வஸீஸஸ்ஸ பத்தந்தி ச²வஸீஸமயம் பத்தம். பகதிவிகாரஸம்ப³ந்தே⁴ சேதம் ஸாமிவசனம், அபே⁴தே³பி வா பே⁴தூ³பசாரேனாயம் வோஹாரோ ‘‘ஸிலாபுத்தகஸ்ஸ ஸரீர’’ந்திஆதீ³ஸு விய.

சப்³பே³த்வாதி கா²தி³த்வா. ஏகம் உத³கக³ண்டு³ஸம் க³ஹேத்வாதி வாமஹத்தே²னேவ பத்தம் உக்கி²பித்வா முகே²ன க³ண்டு³ஸம் க³ஹேத்வா. உச்சி²ட்ட²ஹத்தே²னாதி ஸாமிஸேன ஹத்தே²ன. ஏத்தாவதாதி ஏகக³ண்டு³ஸக³ஹணமத்தேன. லுஞ்சித்வாதி ததோ மம்ஸம் உத்³த⁴ரித்வா. ஏதேஸு ஸப்³பே³ஸு பண்ணத்திம் ஜானாது வா மா வா, ஆபத்தியேவ.

256. கிண்ணசுண்ணேனாதி ஸுராகிண்ணசுண்ணேன. ‘‘அனுவாதம் பரிப⁴ண்ட³ந்தி கிலஞ்ஜாதீ³ஸு கரோந்தீ’’தி க³ண்டி²பதே³ஸு வுத்தம். பி³த³லகந்தி து³கு³ணகரணஸங்கா²தஸ்ஸ கிரியாவிஸேஸஸ்ஸ அதி⁴வசனம். கஸ்ஸ து³கு³ணகரணம்? யேன கிலஞ்ஜாதி³னா மஹந்தம் கதி²னம் அத்த²தம், தஸ்ஸ. தஞ்ஹி த³ண்ட³கதி²னப்பமாணேன பரியந்தே ஸம்ஹரித்வா து³கு³ணம் காதப்³ப³ம். படிக்³க³ஹந்தி அங்கு³லிகஞ்சுகம்.

257-259. பாதி நாம படிக்³க³ஹணஸண்டா²னேன கதோ பா⁴ஜனவிஸேஸோ. ந ஸம்மதீதி நப்பஹோதி.

260-262. நீசவத்து²கம் சினிதுந்தி ப³ஹிகுட்டஸ்ஸ ஸமந்ததோ நீசவத்து²கம் கத்வா சினிதும். அரஹடக⁴டியந்தம் நாம ஸகடசக்கஸண்டா²னம் அரே அரே க⁴டிகானி ப³ந்தி⁴த்வா ஏகேன த்³வீஹி வா பரிப்³ப⁴மியமானம் யந்தம்.

263. ஆவித்³த⁴பக்க²பாஸகந்தி கண்ணிகமண்ட³லஸ்ஸ ஸமந்தா ட²பிதபக்க²பாஸகம். மண்ட³லேதி கண்ணிகமண்ட³லே. பக்க²பாஸகே ட²பேத்வாதி ஸமந்தா பக்க²பாஸகப²லகானி ட²பேத்வா.

264. ‘‘நமதகம் ஸந்த²தஸதி³ஸ’’ந்தி க³ண்டி²பதே³ஸு வுத்தம். சம்மக²ண்ட³பரிஹாரேன பரிபு⁴ஞ்ஜிதப்³ப³ந்தி அனதி⁴ட்ட²ஹித்வா பரிபு⁴ஞ்ஜிதப்³ப³ம். ஏத்தே²வ பவிட்டா²னீதி மளோரிகாய ஏவ அந்தோக³தா⁴னி. புப்³பே³ பத்தஸங்கோ³பனத்த²ம் ஆதா⁴ரகோ அனுஞ்ஞாதோ, இதா³னி பு⁴ஞ்ஜனத்த²ம்.

265. நிக்குஜ்ஜிதப்³போ³தி தேன தி³ன்னஸ்ஸ தே³ய்யத⁴ம்மஸ்ஸ அப்படிக்³க³ஹணத்த²ம் பத்தனிக்குஜ்ஜனகம்மவாசாய நிக்குஜ்ஜிதப்³போ³, ந அதோ⁴முக²ட²பனேன. தேனேவாஹ ‘‘ஏவஞ்ச பன, பி⁴க்க²வே, நிக்குஜ்ஜிதப்³போ³’’திஆதி³. அலாபா⁴யாதி சதுன்னம் பச்சயானம் அலாப⁴த்தா²ய. அனத்தா²யாதி உபத்³த³வாய அவட்³டி⁴யா.

266. பஸாதே³ஸ்ஸாமாதி ஆயாசிஸ்ஸாம. ஏதத³வோசாதி ‘‘அப்பதிரூபம் மயா கதம், ப⁴க³வா பன மஹந்தேபி அகு³ணே அசிந்தேத்வா மய்ஹம் அச்சயம் படிக்³க³ண்ஹிஸ்ஸதீ’’தி மஞ்ஞமானோ ஏதம் ‘‘அச்சயோ மம் ப⁴ந்தே’’திஆதி³வசனம் அவோச. தத்த² ஞாயபடிபத்திம் அதிச்ச ஏதி பவத்ததீதி அச்சயோ, அபராதோ⁴. மம் அச்சக³மாதி மம் அதிக்கம்ம அபி⁴ப⁴வித்வா பவத்தோ. புரிஸேன மத்³தி³த்வா அபி⁴ப⁴வித்வா பவத்திதோபி ஹி அபராதோ⁴ அத்த²தோ புரிஸம் அதிச்ச அபி⁴ப⁴வித்வா பவத்தோ நாம ஹோதி. படிக்³க³ண்ஹாதூதி க²மது. ஆயதிம் ஸம்வராயாதி அனாக³தே ஸம்வரணத்தா²ய புன ஏவரூபஸ்ஸ அபராத⁴ஸ்ஸ தோ³ஸஸ்ஸ க²லிதஸ்ஸ அகரணத்தா²ய. தக்³கா⁴தி ஏகம்ஸேன. யதா²த⁴ம்மம் படிகரோஸீதி யதா² த⁴ம்மோ டி²தோ, ததே²வ கரோஸி, க²மாபேஸீதி வுத்தம் ஹோதி. தம் தே மயம் படிக்³க³ண்ஹாமாதி தம் தவ அபராத⁴ம் மயம் க²மாம. வுட்³டி⁴ ஹேஸா, ஆவுஸோ வட்³ட⁴, அரியஸ்ஸ வினயேதி ஏஸா, ஆவுஸோ வட்³ட⁴, அரியஸ்ஸ வினயே பு³த்³த⁴ஸ்ஸ ப⁴க³வதோ ஸாஸனே வுட்³டி⁴ நாம. கதமா? அச்சயம் அச்சயதோ தி³ஸ்வா யதா²த⁴ம்மம் படிகரித்வா ஆயதிம் ஸம்வராபஜ்ஜனா. தே³ஸனம் பன புக்³க³லாதி⁴ட்டா²னம் கரோந்தோ ‘‘யோ அச்சயம் அச்சயதோ தி³ஸ்வா யதா²த⁴ம்மம் படிகரோதி, ஆயதிம் ஸம்வரம் ஆபஜ்ஜதீ’’தி ஆஹ.

268. போ³தி⁴ராஜகுமாரவத்து²ம்ஹி (ம. நி. அட்ட². 2.324 ஆத³யோ) கோகனதோ³தி கோகனத³ம் வுச்சதி பது³மம், ஸோ ச மங்க³லபாஸாதோ³ ஓலோகனபது³மம் த³ஸ்ஸேத்வா கதோ, தஸ்மா ‘‘கோகனதோ³’’தி ஸங்க²ம் லபி⁴. யாவ பச்சி²மஸோபானகளேவராதி ஏத்த² பச்சி²மஸோபானகளேவரந்தி பட²மஸோபானப²லகம் வுத்தம் தஸ்ஸ ஸப்³ப³பச்சா² து³ஸ்ஸேன ஸந்த²தத்தா. உபரிமஸோபானப²லகதோ பட்டா²ய ஹி ஸோபானம் ஸந்த²தம். அத்³த³ஸா கோ²தி ஓலோகனத்த²ம்யேவ த்³வாரகோட்ட²கே டி²தோ அத்³த³ஸ.

ப⁴க³வா துண்ஹீ அஹோஸீதி ‘‘கிஸ்ஸ நு கோ² அத்தா²ய ராஜகுமாரேன அயம் மஹாஸக்காரோ கதோ’’தி ஆவஜ்ஜேந்தோ புத்தபத்த²னாய கதபா⁴வம் அஞ்ஞாஸி. ஸோ ஹி ராஜபுத்தோ அபுத்தகோ. ஸுதஞ்சானேன அஹோஸி ‘‘பு³த்³தா⁴னம் கிர அதி⁴காரம் கத்வா மனஸா இச்சி²தம் லப⁴ந்தீ’’தி. ஸோ ‘‘ஸசாஹம் புத்தம் லபி⁴ஸ்ஸாமி, ஸம்மாஸம்பு³த்³தோ⁴ இமம் சேலபடிகம் அக்கமிஸ்ஸதி. நோ சே லபி⁴ஸ்ஸாமி, ந அக்கமிஸ்ஸதீ’’தி பத்த²னம் கத்வா ஸந்த²ராபேஸி. அத² ப⁴க³வா ‘‘நிப்³ப³த்திஸ்ஸதி நு கோ² ஏதஸ்ஸ புத்தோ’’தி ஆவஜ்ஜேத்வா ‘‘ந நிப்³ப³த்திஸ்ஸதீ’’தி அத்³த³ஸ. புப்³பே³ கிர ஸோ ஏகஸ்மிம் தீ³பே வஸமானோ ஸமானச்ச²ந்தே³ன ஸகுணபோதகே கா²தி³. ஸசஸ்ஸ மாதுகா³மோ புஞ்ஞவா ப⁴வேய்ய, புத்தம் லபே⁴ய்ய. உபோ⁴ஹி பன ஸமானச்ச²ந்தே³ஹி ஹுத்வா பாபகம்மம் கதம், தேனஸ்ஸ புத்தோ ந நிப்³ப³த்திஸ்ஸதீதி அஞ்ஞாஸி. து³ஸ்ஸே பன அக்கந்தே ‘‘பு³த்³தா⁴னம் அதி⁴காரம் கத்வா பத்தி²தம் லப⁴ந்தீதி லோகே அனுஸ்ஸவோ, மயா ச மஹாஅதி⁴காரோ கதோ, ந ச புத்தம் லபா⁴மி, துச்ச²ம் இத³ம் வசன’’ந்தி மிச்சா²க³ஹணம் க³ண்ஹேய்ய. தித்தி²யாபி ‘‘நத்தி² ஸமணானம் அகத்தப்³ப³ம் நாம, சேலபடிகம் மத்³த³ந்தா ஆஹிண்ட³ந்தீ’’தி உஜ்ஜா²யேய்யும். ஏதரஹி ச அக்கமந்தேஸு ப³ஹூ பி⁴க்கூ² பரசித்தவிது³னோ, தே ப⁴ப்³ப³தம் ஜானித்வா அக்கமிஸ்ஸந்தி, அப⁴ப்³ப³தம் ஜானித்வா ந அக்கமிஸ்ஸந்தி. அனாக³தே பன உபனிஸ்ஸயோ மந்தோ³ ப⁴விஸ்ஸதி, அனாக³தம் ந ஜானிஸ்ஸந்தி, தேஸு அக்கமந்தேஸு ஸசே பத்தி²தம் இஜ்ஜி²ஸ்ஸதி, இச்சேதம் குஸலம். நோ சே இஜ்ஜி²ஸ்ஸதி, ‘‘புப்³பே³ பி⁴க்கு²ஸங்க⁴ஸ்ஸ அதி⁴காரம் கத்வா இச்சி²திச்சி²தம் லப⁴ந்தி, இதா³னி ந லப⁴ந்தி, தேயேவ மஞ்ஞே பி⁴க்கூ² படிபத்திபூரகா அஹேஸும், இமே பன படிபத்திம் பூரேதும் ந ஸக்கோந்தீ’’தி மனுஸ்ஸா விப்படிஸாரினோ ப⁴விஸ்ஸந்தீதி இமேஹி தீஹி காரணேஹி ப⁴க³வா அக்கமிதும் அனிச்ச²ந்தோ துண்ஹீ அஹோஸி. பச்சி²மம் ஜனதம் ததா²க³தோ அனுகம்பதீதி இத³ம் பன தே²ரோ வுத்தேஸு காரணேஸு ததியம் காரணம் ஸந்தா⁴யாஹ. மங்க³லம் இச்ச²ந்தீதி மங்க³லிகா.

269. பீ³ஜனிந்தி சதுரஸ்ஸபீ³ஜனிம். தாலவண்டந்தி தாலபத்தாதீ³ஹி கதம் மண்ட³லிகபீ³ஜனிம்.

270-275. ‘‘ஏகபண்ணச்ச²த்தம் நாம தாலபத்த’’ந்தி க³ண்டி²பதே³ஸு வுத்தம். கம்மஸதேனாதி ஏத்த² ஸத-ஸத்³தோ³ அனேகபரியாயோ, அனேகேன கம்மேனாதி அத்தோ², மஹதா உஸ்ஸாஹேனாதி வுத்தம் ஹோதி. ருதீ⁴தி கு²த்³த³கவணம்.

278. ‘‘அகாயப³ந்த⁴னேன ஸஞ்சிச்ச அஸஞ்சிச்ச வா கா³மப்பவேஸனே ஆபத்தி. ஸரிதட்டா²னதோ ப³ந்தி⁴த்வா பவிஸிதப்³ப³ம் நிவத்திதப்³ப³ம் வா’’தி க³ண்டி²பதே³ஸு வுத்தம். முரஜவட்டிஸண்டா²னம் வேடே²த்வா கதந்தி ப³ஹூ ரஜ்ஜுகே ஏகதோ கத்வா நானாவண்ணேஹி ஸுத்தேஹி வேடே²த்வா முரஜவட்டிஸதி³ஸம் கதம். தேனேவ து³தியபாராஜிகவண்ணனாயம் (பாரா. அட்ட². 1.85 பாளிமுத்தகவினிச்ச²ய) வுத்தம் ‘‘ப³ஹூ ரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் ப³ஹுரஜ்ஜுகந்தி ந வத்தப்³ப³ம், தம் வட்டதீ’’தி. தத்த² யம் வத்தப்³ப³ம், தம் ஹேட்டா² வுத்தமேவ. முத்³தி³ககாயப³ந்த⁴னம் நாம சதுரஸ்ஸம் அகத்வா ஸஜ்ஜிதம். பாமங்க³த³ஸா சதுரஸ்ஸா. முதி³ங்க³ஸண்டா²னேனாதி வரகஸீஸாகாரேன. பாஸந்தோதி த³ஸாமூலம்.

280-282. முண்ட³வட்டீதி மல்லகம்மகராத³யோ. பமாணங்கு³லேனாதி வட்³ட⁴கீஅங்கு³லம் ஸந்தா⁴ய வுத்தம். ஸேஸமேத்த² பாளிதோ அட்ட²கதா²தோ ச ஸுவிஞ்ஞேய்யமேவ.

கு²த்³த³கவத்து²க்க²ந்த⁴கவண்ணனா நிட்டி²தா.