4. ஸமத²க்க²ந்த⁴கம்

ஸம்முகா²வினயகதா²வண்ணனா

187. ஸமத²க்க²ந்த⁴கே ஸஞ்ஞாபேதீதி ஏத்த² ஸம்-ஸத்³தூ³பபதோ³ ஞா-ஸத்³தோ³ தோஸனவிஸிட்டே² அவபோ³த⁴னே வத்ததீதி ஆஹ ‘‘பரிதோஸேத்வா ஜானாபேதீ’’தி.

ஸதிவினயாதி³கதா²வண்ணனா

195-200. தே³ஸனாமத்தமேவேதந்தி ‘‘பஞ்சிமானீ’’தி ஏதம் தே³ஸனாமத்தம். ஸதிவேபுல்லப்பத்தஸ்ஸ கீ²ணாஸவஸ்ஸ தா³தப்³போ³ வினயோ ஸதிவினயோ. அமூள்ஹஸ்ஸ தா³தப்³போ³ வினயோ அமூள்ஹவினயோ. படிஞ்ஞாதேன கரணம் படிஞ்ஞாதகரணம்.

212. திணவத்தா²ரகஸதி³ஸத்தாதி தம்ஸதி³ஸதாய தப்³போ³ஹாரோதி த³ஸ்ஸேதி யதா² ‘‘ஏஸ ப்³ரஹ்மத³த்தோ’’தி.

அதி⁴கரணகதா²வண்ணனா

216. விவாதா³தி⁴கரணஸ்ஸ கிம் மூலந்திஆதீ³ஸு விவாத³மூலானீதி விவாத³ஸ்ஸ மூலானி. கோத⁴னோதி குஜ்ஜ²னலக்க²ணேன கோதே⁴ன ஸமன்னாக³தோ. உபனாஹீதி வேரஅப்படினிஸ்ஸக்³க³லக்க²ணேன உபனாஹேன ஸமன்னாக³தோ. அகா³ரவோதி (தீ³. நி. அட்ட². 3.323; ம. நி. அட்ட². 3.44) கா³ரவவிரஹிதோ. அப்பதிஸ்ஸோதி அப்பதிஸ்ஸயோ அனீசவுத்தி. ஏத்த² பன யோ பி⁴க்கு² ஸத்த²ரி த⁴ரமானே தீஸு காலேஸு உபட்டா²னம் ந யாதி, ஸத்த²ரி அனுபாஹனே சங்கமந்தே ஸஉபாஹனோ சங்கமதி, நீசே சங்கமே சங்கமந்தே உச்சே சங்கமதி, ஹேட்டா² வஸந்தே உபரி வஸதி, ஸத்து² த³ஸ்ஸனட்டா²னே உபோ⁴ அம்ஸே பாருபதி, ச²த்தம் தா⁴ரேதி, உபாஹனம் தா⁴ரேதி, நஹாயதி, உச்சாரம் வா பஸ்ஸாவம் வா கரோதி, பரினிப்³பு³தே வா பன சேதியம் வந்தி³தும் ந க³ச்ச²தி, சேதியஸ்ஸ பஞ்ஞாயனட்டா²னே ஸத்து²த³ஸ்ஸனட்டா²னே வுத்தம் ஸப்³ப³ம் கரோதி, அஞ்ஞேஹி ச பி⁴க்கூ²ஹி ‘‘கஸ்மா ஏவம் கரோஸி, ந இத³ம் வட்டதி, ஸம்மாஸம்பு³த்³த⁴ஸ்ஸ நாம லஜ்ஜிதும் வட்டதீ’’தி வுத்தே ‘‘துண்ஹீ ஹோஹி, பு³த்³தோ⁴ பு³த்³தோ⁴தி வத³ஸி, கிம் பு³த்³தோ⁴ நாமா’’தி ப⁴ணதி, அயம் ஸத்த²ரி அகா³ரவோ நாம.

யோ பன த⁴ம்மஸவனே ஸங்கு⁴ட்டே² ஸக்கச்சம் ந க³ச்ச²தி, ஸக்கச்சம் த⁴ம்மம் ந ஸுணாதி, நித்³தா³யதி வா ஸல்லபந்தோ வா நிஸீத³தி, ஸக்கச்சம் ந க³ண்ஹாதி ந வாசேதி, ‘‘கிம் த⁴ம்மே அகா³ரவம் கரோஸீ’’தி வுத்தே ‘‘துண்ஹீ ஹோஹி, த⁴ம்மோ த⁴ம்மோதி வத³ஸி, கிம் த⁴ம்மோ நாமா’’தி வத³தி, அயம் த⁴ம்மே அகா³ரவோ நாம. யோ பன தே²ரேன பி⁴க்கு²னா அனஜ்ஜி²ட்டோ² த⁴ம்மம் தே³ஸேதி உத்³தி³ஸதி பஞ்ஹம் கதே²தி, வுட்³டே⁴ பி⁴க்கூ² க⁴ட்டேந்தோ க³ச்ச²தி திட்ட²தி நிஸீத³தி, து³ஸ்ஸபல்லத்தி²கம் வா ஹத்த²பல்லத்தி²கம் வா கரோதி, ஸங்க⁴மஜ்ஜே² உபோ⁴ அம்ஸே பாருபதி, ச²த்துபாஹனம் தா⁴ரேதி, ‘‘பி⁴க்கு²ஸங்க⁴ஸ்ஸ லஜ்ஜிதும் வட்டதீ’’தி வுத்தேபி ‘‘துண்ஹீ ஹோஹி, ஸங்கோ⁴ ஸங்கோ⁴தி வத³ஸி, கிம் ஸங்கோ⁴, மிக³ஸங்கோ⁴ அஜஸங்கோ⁴’’திஆதீ³னி வத³தி, அயம் ஸங்கே⁴ அகா³ரவோ நாம. ஏகபி⁴க்கு²ஸ்மிம்பி ஹி அகா³ரவே கதே ஸங்கே⁴ கதோயேவ ஹோதி. திஸ்ஸோ ஸிக்கா² பன அபூரயமானோ ஸிக்கா²ய ந பரிபூரகாரீ நாம.

அஹிதாய து³க்கா²ய தே³வமனுஸ்ஸானந்தி (தீ³. நி. அட்ட². 3.325; ம. நி. அட்ட². 3.42; அ. நி. அட்ட². 3.6.36) ஏகஸ்மிம் விஹாரே த்³வின்னம் பி⁴க்கூ²னம் உப்பன்னவிவாதோ³ கத²ம் தே³வமனுஸ்ஸானம் அஹிதாய து³க்கா²ய ஸம்வத்ததி? கோஸம்ப³கக்க²ந்த⁴கே விய ஹி த்³வீஸு பி⁴க்கூ²ஸு விவாத³ம் ஆபன்னேஸு தஸ்மிம் விஹாரே தேஸம் அந்தேவாஸிகா விவத³ந்தி, தேஸம் ஓவாத³ம் க³ண்ஹந்தோ பி⁴க்கு²னிஸங்கோ⁴ விவத³தி, ததோ தேஸம் உபட்டா²கா விவத³ந்தி, அத² மனுஸ்ஸானம் ஆரக்க²தே³வதா த்³வே கோட்டா²ஸா ஹோந்தி. தத்த² த⁴ம்மவாதீ³னம் ஆரக்க²தே³வதா த⁴ம்மவாதி³னியோ ஹோந்தி, அத⁴ம்மவாதீ³னம் அத⁴ம்மவாதி³னியோ. ததோ ஆரக்க²தே³வதானம் மித்தா பு⁴ம்மதே³வதா பி⁴ஜ்ஜந்தி. ஏவம் பரம்பராய யாவ ப்³ரஹ்மலோகா ட²பேத்வா அரியஸாவகே ஸப்³பே³ தே³வமனுஸ்ஸா த்³வே கோட்டா²ஸா ஹோந்தி. த⁴ம்மவாதீ³ஹி பன அத⁴ம்மவாதி³னோவ ப³ஹுதரா ஹோந்தி. ததோ ‘‘யம் ப³ஹுகேஹி க³ஹிதம், தம் தச்ச²’’ந்தி த⁴ம்மம் விஸ்ஸஜ்ஜேத்வா ப³ஹுதரா அத⁴ம்மம் க³ண்ஹந்தி. தே அத⁴ம்மம் புரக்க²த்வா விஹரந்தா அபாயேஸு நிப்³ப³த்தந்தி. ஏவம் ஏகஸ்மிம் விஹாரே த்³வின்னம் பி⁴க்கூ²னம் உப்பன்னோ விவாதோ³ ப³ஹூனம் அஹிதாய து³க்கா²ய ஹோதி. அஜ்ஜ²த்தம் வாதி அத்தனி வா அத்தனோ பரிஸாய வா. ப³ஹித்³தா⁴ வாதி பரஸ்மிம் வா பரஸ்ஸ பரிஸாய வா. ஆயதிம் அனவஸ்ஸவாயாதி ஆயதிம் அனுப்பாதா³ய.

மக்கீ²தி பரேஸம் கு³ணமக்க²னலக்க²ணேன மக்கே²ன ஸமன்னாக³தோ. பளாஸீதி யுக³க்³கா³ஹலக்க²ணேன பளாஸேன ஸமன்னாக³தோ. இஸ்ஸுகீதி பரஸக்காராதீ³னம் இஸ்ஸாயனலக்க²ணாய இஸ்ஸாய ஸமன்னாக³தோ. மச்ச²ரீதி ஆவாஸமச்ச²ரியாதீ³ஹி ஸமன்னாக³தோ. ஸடோ²தி கேராடிகோ. மாயாவீதி கதபாபபடிச்சா²த³கோ. பாபிச்சோ²தி அஸந்தஸம்பா⁴வனிச்ச²கோ து³ஸ்ஸீலோ. மிச்சா²தி³ட்டீ²தி நத்தி²கவாதீ³ அஹேதுகவாதீ³ அகிரியவாதீ³. ஸந்தி³ட்டி²பராமாஸீதி ஸயம் தி³ட்ட²மேவ பராமஸதி க³ண்ஹாதி. ஆதா⁴னக்³கா³ஹீதி த³ள்ஹக்³கா³ஹீ. து³ப்படினிஸ்ஸக்³கீ³தி ந ஸக்கா ஹோதி க³ஹிதம் நிஸ்ஸஜ்ஜாபேதும். ஏத்த² ச கோத⁴னோ ஹோதி உபனாஹீதிஆதி³னா புக்³க³லாதி⁴ட்டா²னனயேன கோதூ⁴பனாஹாத³யோ அகுஸலத⁴ம்மா விவாத³மூலானீதி த³ஸ்ஸிதானி, ததா² து³ட்ட²சித்தா விவத³ந்தீதிஆதி³னா லோப⁴தோ³ஸமோஹா. அது³ட்ட²சித்தா விவத³ந்தீதிஆதி³னா ச அலோபா⁴த³யோ விவாத³மூலானீதி த³ஸ்ஸிதானி.

217. து³ப்³ப³ண்ணோதி பம்ஸுபிஸாசகோ விய ஜா²மகா²ணுவண்ணோ. து³த்³த³ஸ்ஸிகோதி விஜாதமாதுயாபி அமனாபத³ஸ்ஸனோ. ஓகோடிமகோதி லகுண்ட³கோ. காணோதி ஏகக்கி²காணோ வா உப⁴யக்கி²காணோ வா. குணீதி ஏகஹத்த²குணீ வா உப⁴யஹத்த²குணீ வா. க²ஞ்ஜோதி ஏகபாத³க²ஞ்ஜோ வா உப⁴யபாத³க²ஞ்ஜோ வா. பக்க²ஹதோதி ஹதபக்கோ² பீட²ஸப்பீ.

220. விவாதா³தி⁴கரணம் குஸலம் அகுஸலம் அப்³யாகதந்தி விவாதா³தி⁴கரணம் கிம் குஸலம் அகுஸலம் உதா³ஹு அப்³யாகதந்தி புச்ச²தி. விவாதா³தி⁴கரணம் ஸியா குஸலந்திஆதி³ விஸ்ஸஜ்ஜனம். ஏஸ நயோ ஸேஸேஸுபி. விவத³ந்தி ஏதேனாதி விவாதோ³தி ஆஹ ‘‘யேன விவத³ந்தி, ஸோ சித்துப்பாதோ³ விவாதோ³’’தி. கத²ம் பன ஸோ சித்துப்பாதோ³ அதி⁴கரணம் நாமாதி ஆஹ ‘‘ஸமதே²ஹி ச அதி⁴கரணீயதாய அதி⁴கரண’’ந்தி, ஸமதே²ஹி ஸமேதப்³ப³தாய அதி⁴கரணந்தி அத்தோ². விவாத³ஹேதுபூ⁴தஸ்ஸ ஹி சித்துப்பாத³ஸ்ஸ வூபஸமேன தப்பப⁴வஸ்ஸ ஸத்³த³ஸ்ஸபி வூபஸமோ ஹோதீதி சித்துப்பாத³ஸ்ஸ ஸமதே²ஹி அதி⁴கரணீயதா பரியாயோ ஸம்ப⁴வதி.

222. ஆபத்தாதி⁴கரணம் ஸியா அகுஸலம் ஸியா அப்³யாகதந்தி அயம் விகப்போ பஞ்ஞத்திவஜ்ஜம்யேவ ஸந்தா⁴ய வுத்தோ, ந லோகவஜ்ஜந்தி த³ஸ்ஸேதும் ‘‘ஸந்தா⁴யபா⁴ஸிதவஸேனா’’திஆதி³மாஹ. கஸ்மா பனேத்த² ஸந்தா⁴யபா⁴ஸிதவஸேன அத்தோ² வேதி³தப்³போ³தி ஆஹ ‘‘யஸ்மிம் ஹீ’’திஆதி³. பத²வீக²ணனாதி³கேதி ஏத்த² ஆதி³-ஸத்³தே³ன பூ⁴தகா³மபாதப்³யதாதி³பஞ்ஞத்திவஜ்ஜம் ஸிக்கா²பத³ம் ஸங்க³ண்ஹாதி. யோ வினயே அபகதஞ்ஞுதாய வத்தஸீஸேன ஸம்முஞ்ஜனிஆதி³னா பத²வீக²ணனாதீ³னி கரோதி, ததா³ தஸ்ஸுப்பன்னசித்தம் ஸந்தா⁴ய வுத்தம் ‘‘குஸலசித்தம் அங்க³ம் ஹோதீ’’தி. அங்க³ம் ஹோதீதி ச வத்தஸீஸேன கரோந்தஸ்ஸபி ‘‘இமம் பத²விம் க²ணாமீ’’திஆதி³னா வீதிக்கமஜானனவஸேன பவத்தத்தா தம் குஸலசித்தம் ஆபத்தாதி⁴கரணம், குஸலசித்தம் ஆபத்தியா காரணம் ஹோதீதி அத்தோ². ந ஹி வீதிக்கமம் அஜானந்தஸ்ஸ பத²வீக²ணனாதீ³ஸு ஆபத்தி ஸம்ப⁴வதி. தஸ்மிம் ஸதீதி தஸ்மிம் குஸலசித்தே ஆபத்திபா⁴வேன க³ஹிதே ஸதீதி அதி⁴ப்பாயோ. தஸ்மாதி யஸ்மா குஸலசித்தே ஆபத்திபா⁴வேன க³ஹிதே ஸதி ‘‘நத்தி² ஆபத்தாதி⁴கரணம் குஸல’’ந்தி ந ஸக்கா வத்தும், தஸ்மா. நயித³ம் அங்க³ப்பஹோனகசித்தம் ஸந்தா⁴ய வுத்தந்தி ‘‘ஆபத்தாதி⁴கரணம் ஸியா அகுஸலம் ஸியா அப்³யாகதம், நத்தி² ஆபத்தாதி⁴கரணம் குஸல’’ந்தி இத³ம் ஆபத்திஸமுட்டா²பகபா⁴வேன அங்க³ப்பஹோனகம் ஆபத்தியா காரணபூ⁴தம் சித்தம் ஸந்தா⁴ய ந வுத்தம். கிம் பன ஸந்தா⁴ய வுத்தந்தி ஆஹ ‘‘இத³ம் பனா’’திஆதி³. பி⁴க்கு²ம்ஹி கம்மட்டா²னக³தசித்தேன நிபன்னே நித்³தா³யந்தே வா மாதுகா³மோ சே ஸேய்யம் கப்பேதி, தஸ்மிம் க²ணே ஸேய்யாகாரேன வத்தமானரூபமேவ ஆபத்தி, ந குஸலாதி³வஸப்பவத்தம் சித்தந்தி ஆஹ ‘‘அஸஞ்சிச்ச…பே… ஸஹஸேய்யாதி³வஸேன ஆபஜ்ஜதோ (பரி. 323 அத்த²தோ ஸமானம்) அப்³யாகதம் ஹோதீ’’தி. தஸ்மிஞ்ஹி க²ணே உட்டா²தப்³பே³ ஜாதே அனுட்டா²னதோ ததா³காரபவத்தோ ரூபக்க²ந்தோ⁴வ ஆபத்தி.

‘‘ஆபத்திம் ஆபஜ்ஜந்தோ குஸலசித்தோ வா ஆபஜ்ஜதி அகுஸலாப்³யாகதசித்தோ வா’’தி வசனதோ குஸலம்பி ஆபத்தாதி⁴கரணம் ஸியாதி சே? ந. யோ ஹி ஆபத்திம் ஆபஜ்ஜதீதி வுச்சதி, ஸோ தீஸு சித்தேஸு அஞ்ஞதரசித்தஸமங்கீ³ ஹுத்வா ஆபஜ்ஜதி, ந அஞ்ஞதா²தி த³ஸ்ஸனத்த²ம் ‘‘குஸலசித்தோ வா’’திஆதி³ வுத்தம். அயஞ்ஹேத்த² அத்தோ² – பத²வீக²ணனாதீ³ஸு குஸலசித்தக்க²ணே வீதிக்கமாதி³வஸேன பவத்தரூபஸம்ப⁴வதோ குஸலசித்தோ வா ததா²பவத்தரூபஸங்கா²தம் அப்³யாகதாபத்திம் ஆபஜ்ஜதி, ததா² அப்³யாகதசித்தோ வா அப்³யாகதரூபஸங்கா²தம் அப்³யாகதாபத்திம் ஆபஜ்ஜதி. பாணாதிபாதாதி³ம் அகுஸலசித்தோ வா அகுஸலாபத்திம் ஆபஜ்ஜதி, ரூபம் பனேத்த² அப்³போ³ஹாரிகம். ஸுபினந்தே ச பாணாதிபாதாதி³ம் கரோந்தோ ஸஹஸேய்யாதி³வஸேன ஆபஜ்ஜிதப்³பா³பத்திம் ஆபஜ்ஜந்தோ அகுஸலசித்தோ அப்³யாகதாபத்திம் ஆபஜ்ஜதீதி.

குஸலசித்தம் ஆபஜ்ஜேய்யாதி ஏளகலோமம் க³ஹேத்வா கம்மட்டா²னமனஸிகாரேன தியோஜனம் அதிக்கமந்தஸ்ஸ பஞ்ஞத்திம் அஜானித்வா பத³ஸோ த⁴ம்மம் வாசேந்தஸ்ஸ ச ஆபஜ்ஜிதப்³பா³பத்தியா குஸலசித்தம் ஆபஜ்ஜேய்ய. ந ச தத்த² விஜ்ஜமானம்பி குஸலசித்தம் ஆபத்தியா அங்க³ந்தி தஸ்மிம் விஜ்ஜமானம்பி குஸலசித்தம் ஆபத்தியா அங்க³ம் ந ஹோதி, ஸயம் ஆபத்தி ந ஹோதீதி அத்தோ². சலிதப்பவத்தானந்தி சலிதானம் பவத்தானஞ்ச. சலிதோ காயோ, பவத்தா வாசா. அஞ்ஞதரமேவ அங்க³ந்தி காயவாசானம் அஞ்ஞதரமேவ ஆபத்தீதி அத்தோ². தஞ்ச ரூபக்க²ந்த⁴பரியாபன்னத்தா அப்³யாகதந்தி இமினா அப்³யாகதமாபத்தாதி⁴கரணம், நாஞ்ஞந்தி த³ஸ்ஸேதி.

யதி³ ஏவம் ‘‘ஸாபத்திகஸ்ஸ, பி⁴க்க²வே, நிரயம் வா வதா³மி திரச்சா²னயோனிம் வா’’தி வசனதோ அப்³யாகதஸ்ஸபி விபாகத⁴ம்மதா ஆபஜ்ஜேய்யாதி? நாபஜ்ஜேய்ய. அஸஞ்சிச்ச ஆபன்னா ஹி ஆபத்தியோ யாவ ஸோ ந ஜானாதி, தாவ அனந்தராயகரா, ஜானித்வா சா²தே³ந்தோ பன சா²த³னப்பச்சயா அஞ்ஞம் து³க்கடஸங்கா²தம் அகுஸலமாபத்தாதி⁴கரணமாபஜ்ஜதி, தஞ்ச அகுஸலஸபா⁴வத்தா ஸக்³க³மோக்கா²னம் அந்தராயகரணந்தி ஸாபத்திகஸ்ஸ அபாயகா³மிதா வுத்தா. அப்³யாகதம் பன ஆபத்தாதி⁴கரணம் அவிபாகத⁴ம்மமேவாதி நிட்ட²மேத்த² க³ந்தப்³ப³ம். தேனேவ போராணக³ண்டி²பதே³ஸுபி ‘‘புது²ஜ்ஜனோ கல்யாணபுது²ஜ்ஜனோ ஸேக்கோ² அரஹாதி சத்தாரோ புக்³க³லே த³ஸ்ஸேத்வா தேஸு அரஹதோ ஆபத்தாதி⁴கரணம் அப்³யாகதமேவ, ததா² ஸேக்கா²னம், ததா² கல்யாணபுது²ஜ்ஜனஸ்ஸ அஸஞ்சிச்ச வீதிக்கமகாலே அப்³யாகதமேவ. இதரஸ்ஸ அகுஸலம்பி ஹோதி அப்³யாகதம்பி. யஸ்மா சஸ்ஸ ஸஞ்சிச்ச வீதிக்கமகாலே அகுஸலமேவ ஹோதி, தஸ்மா வுத்தம் ‘நத்தி² ஆபத்தாதி⁴கரணம் குஸல’ந்தி. ஸப்³ப³த்த² ஏவம் அப்³யாகதந்தி விபாகாபா⁴வமத்தம் ஸந்தா⁴ய வுத்த’’ந்தி லிகி²தம். யஞ்ச ஆபத்தாதி⁴கரணம் அகுஸலம், தம்பி தே³ஸிதம் வுட்டி²தம் வா அனந்தராயகரம். யதா² ஹி அரியூபவாத³கம்மம் அகுஸலம்பி ஸமானம் அச்சயம் தே³ஸேத்வா க²மாபனேன பயோக³ஸம்பத்திபடிபா³ஹிதத்தா அவிபாகத⁴ம்மதம் ஆபன்னம் அஹோஸிகம்மம் ஹோதி, ஏவமித³ம்பி தே³ஸிதம் வுட்டி²தம் வா பயோக³ஸம்பத்திபடிபா³ஹிதத்தா அவிபாகத⁴ம்மதாய அஹோஸிகம்மபா⁴வேன அனந்தராயகரம் ஜாதம். தேனேவ ‘‘ஸாபத்திகஸ்ஸ, பி⁴க்க²வே, நிரயம் வா வதா³மி திரச்சா²னயோனிம் வா’’தி ஸாபத்திகஸ்ஸேவ அபாயகா³மிதா வுத்தா.

அதி⁴கரணவூபஸமனஸமத²கதா²வண்ணனா

228. விவாத³ஸங்கா²தே அத்தே² பச்சத்தி²கா அத்த²பச்சத்தி²கா.

229. ஸம்முகா²வினயஸ்மிந்தி ஸம்முகா²வினயபா⁴வே.

230. அந்தரேனாதி காரணேன.

231. உப்³பா³ஹிகாய கீ²யனகே பாசித்தி ந வுத்தா தத்த² ச²ந்த³தா³னஸ்ஸ நத்தி²தாய.

236. தஸ்ஸ கோ² தந்தி ஏத்த² கோ² தந்தி நிபாதமத்தம்.

238. ‘‘கா ச தத்த² தஸ்ஸபாபியஸிகாயா’’தி போத்த²கேஸு லிக²ந்தி. ‘‘கா ச தஸ்ஸபாபியஸிகா’’தி ஏவம் பனேத்த² பாடோ² வேதி³தப்³போ³.

242. கிச்சாதி⁴கரணம் ஏகேன ஸமதே²ன ஸம்மதீதி ஏத்த² ‘‘கிச்சமேவ கிச்சாதி⁴கரண’’ந்தி (பாரா. அட்ட². 2.385-86) வசனதோ அபலோகனகம்மாதீ³னமேதம் அதி⁴வசனம். தம் விவாதா³தி⁴கரணாதீ³னி விய ஸமதே²ஹி ஸமேதப்³ப³ம் ந ஹோதி, கிந்து ஸம்முகா²வினயேன ஸம்பஜ்ஜதி, தஸ்மா ஸம்மதீதி ஏத்த² ஸம்பஜ்ஜதீதி அத்தோ² க³ஹேதப்³போ³. ஸேஸமேத்த² ஸுவிஞ்ஞேய்யமேவ.

ஸமத²க்க²ந்த⁴கவண்ணனா நிட்டி²தா.