3. ஸமுச்சயக்க²ந்த⁴கம்

ஸுக்கவிஸ்ஸட்டி²கதா²வண்ணனா

97. ஸமுச்சயக்க²ந்த⁴கே வுத்தனயேன வத்தம் ஸமாதா³தப்³ப³ந்தி பாரிவாஸிகக்க²ந்த⁴கவண்ணனாயம் வுத்தனயேன த்³வீஹி பதே³ஹி ஏகேன வா ஸமாதா³தப்³ப³ம். வேதி³யாமீதி சித்தேன ஸம்படிச்சி²த்வா ஸுக²ம் அனுப⁴வாமி, ந தப்பச்சயா அஹம் து³க்கி²தோதி அதி⁴ப்பாயோ. வுத்தனயேனேவ ஸங்க⁴மஜ்ஜே² நிக்கி²பிதப்³ப³ந்தி பாரிவாஸிகக்க²ந்த⁴கே வுத்தனயேன ‘‘மானத்தம் நிக்கி²பாமி, வத்தம் நிக்கி²பாமீ’’தி இமேஹி த்³வீஹி ஏகேன வா நிக்கி²பிதப்³ப³ம். தஸ்ஸ ஆரோசேத்வா நிக்கி²பிதப்³ப³ந்தி அனாரோசனேன வத்தபே⁴த³து³க்கடபரிமோசனத்த²ம் வுத்தம். த்³வே லேட்³டு³பாதே அதிக்கமித்வாதி பி⁴க்கூ²னம் ஸஜ்ஜா²யனஸத்³த³ஸவனூபசாரவிஜஹனத்த²ம் வுத்தம், மஹாமக்³க³தோ ஓக்கம்மாதி மக்³க³ப்படிபன்னபி⁴க்கூ²னம் உபசாரவிஜஹனத்த²ம், கு³ம்பே³ன வா வதியா வா படிச்ச²ன்னட்டா²னேதி த³ஸ்ஸனூபசாரவிஜஹனத்த²ம். அனிக்கி²த்தவத்தேன அந்தோஉபசாரக³தானம் ஸப்³பே³ஸம்பி ஆரோசேதப்³ப³த்தா ‘‘அயம் நிக்கி²த்தவத்தஸ்ஸ பரிஹாரோ’’தி வுத்தம். தத்த² நிக்கி²த்தவத்தஸ்ஸாதி வத்தம் நிக்கி²பித்வா பரிவஸந்தஸ்ஸாதி அத்தோ². அயம் பனேத்த² தே²ரஸ்ஸ அதி⁴ப்பாயோ – வத்தம் நிக்கி²பித்வா பரிவஸந்தஸ்ஸ உபசாரக³தானம் ஸப்³பே³ஸம் ஆரோசனகிச்சம் நத்தி², தி³ட்ட²ரூபானம் ஸுதஸத்³தா³னம் ஆரோசேதப்³ப³ம், அதி³ட்ட²அஸுதானம்பி அந்தோத்³வாத³ஸஹத்த²க³தானம் ஆரோசேதப்³ப³ம். இத³ம் வத்தம் நிக்கி²பித்வா பரிவஸந்தஸ்ஸ லக்க²ணந்தி.

பரிவாஸகதா²வண்ணனா

102. ‘‘ஸதியேவ அந்தராயே அந்தராயிகஸஞ்ஞீ சா²தே³தி, அச்ச²ன்னா ஹோதி. அந்தராயிகஸ்ஸ பன அனந்தராயிகஸஞ்ஞாய சா²த³யதோ அச்ச²ன்னாவா’’திபி பாடோ². அவேரீதி ஹிதகாமோ. உத்³த⁴ஸ்தே அருணேதி உட்டி²தே அருணே. ஸுத்³த⁴ஸ்ஸ ஸந்திகேதி ஸபா⁴க³ஸங்கா⁴தி³ஸேஸம் அனாபன்னஸ்ஸ ஸந்திகே. வத்து²ந்தி அஸுசிமோசனாதி³வீதிக்கமம்.

ஸுக்கவிஸ்ஸட்டீ²தி வத்து² சேவ கோ³த்தஞ்சாதி ஸுக்கவிஸ்ஸட்டீ²தி இத³ம் அஸுசிமோசனலக்க²ணஸ்ஸ வீதிக்கமஸ்ஸ பகாஸனதோ வத்து² சேவ ஹோதி, ஸஜாதியஸாதா⁴ரணவிஜாதியவினிவத்தஸபா⁴வாய ஸுக்கவிஸ்ஸட்டி²யா ஏவ பகாஸனதோ கோ³த்தஞ்ச ஹோதீதி அத்தோ². க³ம் தாயதீதி ஹி கோ³த்தம். ஸங்கா⁴தி³ஸேஸோதி நாமஞ்சேவ ஆபத்தி சாதி ஸங்கா⁴தி³ஸேஸோதி தேன தேன வீதிக்கமேன ஆபன்னஸ்ஸ ஆபத்தினிகாயஸ்ஸ நாமப்பகாஸனதோ நாமஞ்சேவ ஹோதி ஆபத்திஸபா⁴க³த்தா ஆபத்தி ச.

தத³னுரூபம் கம்மவாசம் கத்வா மானத்தம் தா³தப்³ப³ந்தி –

‘‘ஸுணாது மே, ப⁴ந்தே, ஸங்கோ⁴, அயம் இத்த²ன்னாமோ பி⁴க்கு² ஏகம் ஆபத்திம் ஆபஜ்ஜி ஸஞ்சேதனிகம் ஸுக்கவிஸ்ஸட்டி²ம் ஏகாஹபடிச்ச²ன்னம், ஸோ ஸங்க⁴ம் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸம் யாசி. ஸங்கோ⁴ இத்த²ன்னாமஸ்ஸ பி⁴க்கு²னோ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸம் அதா³ஸி. ஸோ பரிவுத்த²பரிவாஸோ. அயம் இத்த²ன்னாமோ பி⁴க்கு² ஏகம் ஆபத்திம் ஆபஜ்ஜி ஸஞ்சேதனிகம் ஸுக்கவிஸ்ஸட்டி²ம் அப்படிச்ச²ன்னம், ஸோ ஸங்க⁴ம் தாஸம் ஆபத்தீனம் ஸஞ்சேதனிகானம் ஸுக்கவிஸ்ஸட்டீ²னம் படிச்ச²ன்னாய ச அப்படிச்ச²ன்னாய ச சா²ரத்தம் மானத்தம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ த்³வின்னம் ஆபத்தீனம் ஸஞ்சேதனிகானம் ஸுக்கவிஸ்ஸட்டீ²னம் படிச்ச²ன்னாய ச அப்படிச்ச²ன்னாய ச சா²ரத்தம் மானத்தம் த³தே³ய்ய, ஏஸா ஞத்தி.

ஸுணாது மே, ப⁴ந்தே…பே… ஸோ பரிவுத்த²பரிவாஸோ. அயம் இத்த²ன்னாமோ பி⁴க்கு² ஏகம் ஆபத்திம் ஆபஜ்ஜி ஸஞ்சேதனிகம் ஸுக்கவிஸ்ஸட்டி²ம் அப்படிச்ச²ன்னம், ஸோ ஸங்க⁴ம் தாஸம்…பே… யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ த்³வின்னம் ஆபத்தீனம் ஸஞ்சேதனிகானம் ஸுக்கவிஸ்ஸட்டீ²னம் படிச்ச²ன்னாய ச அப்படிச்ச²ன்னாய ச சா²ரத்தம் மானத்தம் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ த்³வின்னம் ஆபத்தீனம் ஸஞ்சேதனிகானம் ஸுக்கவிஸ்ஸட்டீ²னம் படிச்ச²ன்னாய ச அப்படிச்ச²ன்னாய ச சா²ரத்தம் மானத்தஸ்ஸ தா³னம், ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய.

து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே…

தி³ன்னம் ஸங்கே⁴ன இத்த²ன்னாமஸ்ஸ பி⁴க்கு²னோ த்³வின்னம் ஆபத்தீனம் ஸஞ்சேதனிகானம் ஸுக்கவிஸ்ஸட்டீ²னம் படிச்ச²ன்னாய ச அப்படிச்ச²ன்னாய ச சா²ரத்தம் மானத்தம், க²மதி ஸங்க⁴ஸ்ஸ, தஸ்மா துண்ஹீ. ஏவமேதம் தா⁴ரயாமீதி –

ஏவம் கம்மவாசம் கத்வா மானத்தம் தா³தப்³ப³ம். சிண்ணமானத்தஸ்ஸ ச இமினாவ நயேன கம்மவாசம் யோஜேத்வா அப்³பா⁴னம் காதப்³ப³ம்.

அஞ்ஞஸ்மிந்தி ஸுத்³த⁴ந்தபரிவாஸவஸேன ஆபத்திவுட்டா²னதோ அஞ்ஞஸ்மிம். த³ஸஸதம் ஆபத்தியோ ரத்திஸதம் சா²த³யித்வாதி யோஜேதப்³ப³ம்.

பரிவாஸகதா²வண்ணனா நிட்டி²தா.

அத்தனோ ஸீமம் ஸோதே⁴த்வா விஹாரஸீமாயாதி விஹாரே ப³த்³த⁴ஸீமமேவ ஸந்தா⁴ய வுத்தம். விஹாரூபசாரதோபி த்³வே லேட்³டு³பாதா அதிக்கமிதப்³பா³தி பி⁴க்கு²விஹாரம் ஸந்தா⁴ய வத³தி கா³மூபசாராதிக்கமேனேவ பி⁴க்கு²னீவிஹாரூபசாராதிக்கமஸ்ஸ ஸித்³த⁴த்தா. விஹாரஸ்ஸ சாதி பி⁴க்கு²விஹாரஸ்ஸ. கா³மஸ்ஸாதி ந வுத்தந்தி கா³மஸ்ஸ உபசாரம் முஞ்சிதும் வட்டதீதி ந வுத்தம், தஸ்மா கா³மூபசாரேபி வட்டதீதி அதி⁴ப்பாயோ.

தத்தே²வ டா²னம் பச்சாஸீஸந்தீதி பி⁴க்கூ²னம் டா²னம் பச்சாஸீஸந்தி. பரிவாஸவத்தாதீ³னந்தி பரிவாஸனிஸ்ஸயபடிப்பஸ்ஸத்³தி⁴ஆதீ³னம். யுத்ததரம் தி³ஸ்ஸதீதி இமினா அனிக்கி²த்தவத்தபி⁴க்கு²னா விய பி⁴க்கு²னியாபி அந்தோஉபசாரஸீமக³தானம்யேவ ஆரோசேதப்³ப³ம், ந கா³மே டி²தானம்பி க³ந்த்வா ஆரோசேதப்³ப³ந்தி தீ³பேதி. தஸ்மிம் கா³மேதி யஸ்மிம் கா³மே பி⁴க்கு²னுபஸ்ஸயோ ஹோதி, தஸ்மிம் கா³மே. ப³ஹி உபசாரஸீமாய ட²த்வாதி உபசாரஸீமதோ ப³ஹி ட²த்வா. ஸம்மன்னித்வா தா³தப்³பா³தி ஏத்த² ஸம்மன்னித்வா தி³ன்னாய ஸஹவாஸேபி ரத்திச்சே²தோ³ ந ஹோதி.

படிச்ச²ன்னபரிவாஸகதா²வண்ணனா

108. விஸும் மானத்தம் சரிதப்³ப³ந்தி மூலாயபடிகஸ்ஸனம் அகத்வா விஸும் கம்மவாசாய மானத்தம் க³ஹேத்வா சரிதப்³ப³ம்.

ஸுக்கவிஸ்ஸட்டி²கதா²வண்ணனா நிட்டி²தா.

அக்³க⁴ஸமோதா⁴னபரிவாஸகதா²வண்ணனா

134. ஏகாபத்திமூலகந்தி ‘‘ஏகா ஆபத்தி ஏகாஹப்படிச்ச²ன்னா, ஏகா ஆபத்தி த்³வீஹப்படிச்ச²ன்னா’’திஆதி³னா வுத்தனயம் ஸந்தா⁴ய வத³தி. ஆபத்திவட்³ட⁴னகந்தி ‘‘ஏகா ஆபத்தி ஏகாஹப்படிச்ச²ன்னா, த்³வே ஆபத்தியோ த்³வீஹப்படிச்ச²ன்னா’’திஆதி³னா வுத்தம் ஆபத்திவட்³ட⁴னகனயம் ஸந்தா⁴ய.

த்³வேபி⁴க்கு²வாரஏகாத³ஸகாதி³கதா²வண்ணனா

181. து²ல்லச்சயாதீ³ஹி மிஸ்ஸகந்தி ஏகவத்து²ம்ஹி புப்³ப³பா⁴கே³ ஆபன்னது²ல்லச்சயது³க்கடேஹி மிஸ்ஸகம். மக்க²த⁴ம்மோ நாம சா²தே³துகாமதா.

182. ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜதி பரிமாணம்பீதிஆதி³ ஜாதிவஸேனேகவசனம், பா⁴வனபும்ஸகனித்³தே³ஸோ வா. ஸேஸமேத்த² பாளிதோ அட்ட²கதா²தோ ச ஸுவிஞ்ஞேய்யமேவ.

ஸமுச்சயக்க²ந்த⁴கவண்ணனா நிட்டி²தா.