2. பாரிவாஸிகக்க²ந்த⁴கம்

பாரிவாஸிகவத்தகதா²வண்ணனா

75. பாரிவாஸிகக்க²ந்த⁴கே நவகதரம் பாரிவாஸிகந்தி அத்தனோ நவகதரம் பாரிவாஸிகம். பாரிவாஸிகஸ்ஸ ஹி அத்தனோ நவகதரம் பாரிவாஸிகம் ட²பேத்வா அஞ்ஞே மூலாயபடிகஸ்ஸனாரஹமானத்தாரஹமானத்தசாரிகஅப்³பா⁴னாரஹாபி பகதத்தட்டா²னேயேவ திட்ட²ந்தி. தேனாஹ ‘‘அந்தமஸோ மூலாயபஅகஸ்ஸனாரஹாதீ³னம்பீ’’தி. பாதே³ க⁴ம்ஸேந்தி ஏதேனாதி பாத³க⁴ம்ஸனம், ஸக்க²ரகத²லாதி³. ‘‘அனுஜானாமி, பி⁴க்க²வே, திஸ்ஸோ பாத³க⁴ம்ஸனியோ ஸக்க²ரம் கத²லம் ஸமுத்³த³பே²ணக’’ந்தி (சூளவ. 269) ஹி வுத்தம். ஸத்³தி⁴விஹாரிகாதீ³னம்பி ஸாதி³யந்தஸ்ஸாதி ஸத்³தி⁴விஹாரிகானம்பி அபி⁴வாத³னாதி³ம் ஸாதி³யந்தஸ்ஸ. ‘‘மா மம் கா³மப்பவேஸனம் ஆபுச்ச²தா²’’தி வுத்தே அனாபுச்சா²பி கா³மம் பவிஸிதும் வட்டதி. யோ யோ வுட்³டோ⁴தி பாரிவாஸிகேஸு பி⁴க்கூ²ஸு யோ யோ வுட்³டோ⁴. நவகதரஸ்ஸ ஸாதி³துந்தி பாரிவாஸிகனவகதரஸ்ஸ அபி⁴வாத³னாதி³ம் ஸாதி³தும்.

தத்தே²வாதி ஸங்க⁴னவகட்டா²னேயேவ. அத்தனோ பாளியா பவாரேதப்³ப³ந்தி அத்தனோ வஸ்ஸக்³கே³ன பத்தபாளியா பவாரேதப்³ப³ம், ந பன ஸப்³பே³ஸு பவாரிதேஸூதி அத்தோ². யதி³ பன ந க³ண்ஹாதி ந விஸ்ஸஜ்ஜேதீதி யதி³ புரிமதி³வஸே அத்தனோ ந க³ண்ஹாதி க³ஹேத்வா ச ந விஸ்ஸஜ்ஜேதி. சதுஸ்ஸாலப⁴த்தந்தி போ⁴ஜனஸாலாயம் படிபாடியா தி³ய்யமானப⁴த்தம். ஹத்த²பாஸே டி²தேனாதி தா³யகஸ்ஸ ஹத்த²பாஸே டி²தேன.

76. அஞ்ஞோ ஸாமணேரோ ந க³ஹேதப்³போ³தி உபஜ்ஜா²யேன ஹுத்வா அஞ்ஞோ ஸாமணேரோ ந க³ஹேதப்³போ³. உபஜ்ஜ²ம் த³த்வா க³ஹிதஸாமணேராபீதி பகதத்தகாலே உபஜ்ஜ²ம் த³த்வா க³ஹிதஸாமணேராபி. லத்³த⁴ஸம்முதிகேன ஆணத்தோபி க³ருத⁴ம்மேஹி அஞ்ஞேஹி வா ஓவதி³தும் லப⁴தீதி ஆஹ ‘‘படிப³லஸ்ஸ வா பி⁴க்கு²ஸ்ஸ பா⁴ரோ காதப்³போ³’’தி. ஆக³தா பி⁴க்கு²னியோ வத்தப்³பா³தி ஸம்ப³ந்தோ⁴. ஸவசனீயந்தி ஸதோ³ஸம். ஜேட்ட²கட்டா²னம் ந காதப்³ப³ந்தி பதா⁴னட்டா²னம் ந காதப்³ப³ம். கிம் தந்தி ஆஹ ‘‘பாதிமோக்கு²த்³தே³ஸகேன வா’’திஆதி³.

ரஜேஹி ஹதா உபஹதா பூ⁴மி ஏதிஸ்ஸாதி ரஜோஹதபூ⁴மி, ரஜோகிண்ணபூ⁴மீதி அத்தோ². பச்சயந்தி வஸ்ஸாவாஸிகலாப⁴ம் ஸந்தா⁴ய வுத்தம். ஏகபஸ்ஸே ட²த்வாதி பாளிம் விஹாய பி⁴க்கூ²னம் பச்ச²தோ ட²த்வா. ஸேனாஸனம் ந லப⁴தீதி ஸேய்யாபரியந்தபா⁴கி³தாய வஸ்ஸக்³கே³ன க³ண்ஹிதும் ந லப⁴தி. அஸ்ஸாதி ப⁴வேய்ய. ‘‘ஆக³ந்துகேன ஆரோசேதப்³ப³ம், ஆக³ந்துகஸ்ஸ ஆரோசேதப்³ப³’’ந்தி அவிஸேஸேன வுத்தத்தா ஸசே த்³வே பாரிவாஸிகா க³தட்டா²னே அஞ்ஞமஞ்ஞம் பஸ்ஸந்தி, உபோ⁴ஹிபி அஞ்ஞமஞ்ஞஸ்ஸ ஆரோசேதப்³ப³ம். யதா² ப³ஹி தி³ஸ்வா ஆரோசிதஸ்ஸ பி⁴க்கு²னோ விஹாரம் ஆக³தே புன ஆரோசனகிச்சம் நத்தி², ஏவம் அஞ்ஞம் விஹாரம் க³தேனபி தத்த² புப்³பே³ ஆரோசிதஸ்ஸ புன ஆரோசனகிச்சம் நத்தீ²தி வத³ந்தி.

81. அவிஸேஸேனாதி பாரிவாஸிகஸ்ஸ உக்கி²த்தகஸ்ஸ ச அவிஸேஸேன. ஓப³த்³த⁴ந்தி பலிபு³த்³த⁴ம்.

83. ஸஹவாஸோதி வுத்தப்பகாரே ச²ன்னே பகதத்தேன பி⁴க்கு²னா ஸத்³தி⁴ம் ஸயனமேவ அதி⁴ப்பேதம், ந ஸேஸஇரியாபத²கப்பனம். ஸேஸமேத்த² ஸுவிஞ்ஞேய்யமேவ.

பாரிவாஸிகக்க²ந்த⁴கவண்ணனா நிட்டி²தா.