6. பாடிதே³ஸனீயகண்ட³ம்

பாடிதே³ஸனீயஸிக்கா²பத³வண்ணனா

552. பாடிதே³ஸனீயேஸு பட²மே ‘‘கா³ரய்ஹம் ஆவுஸோதிஆதி³ படிதே³ஸேதப்³பா³காரத³ஸ்ஸன’’ந்தி வசனதோ பாளியம் ஆக³தனயேனேவ ஆபத்தி தே³ஸேதப்³பா³. அஸப்பாயந்தி ஸக்³க³மோக்கா²னம் அஹிதம் அனனுகூலம். ஸேஸமேத்த² உத்தானமேவ. பரிபுண்ணூபஸம்பன்னதா, அஞ்ஞாதிகதா, அந்தரக⁴ரே டி²தாய ஹத்த²தோ ஸஹத்தா² படிக்³க³ஹணம், யாவகாலிகதா, அஜ்ஜோ²ஹரணந்தி இமானி பனேத்த² பஞ்ச அங்கா³னி.

557-562. து³தியததியசதுத்தே²ஸு நத்தி² வத்தப்³ப³ம், அங்கே³ஸு பன து³தியே பரிபுண்ணூபஸம்பன்னதா, பஞ்சபோ⁴ஜனதா, அந்தரக⁴ரே டி²தாய அனுஞ்ஞாதப்பகாரதோ அஞ்ஞதா² வோஸாஸனா, அனிவாரணா, அஜ்ஜோ²ஹாரோதி இமானி பஞ்ச அங்கா³னி.

ததியே ஸேக்க²ஸம்மததா, புப்³பே³ அனிமந்திததா, அகி³லானதா, க⁴ரூபசாரோக்கமனம், ட²பேத்வா நிச்சப⁴த்தாதீ³னி அஞ்ஞம் ஆமிஸம் க³ஹேத்வா பு⁴ஞ்ஜனந்தி இமானி பஞ்ச அங்கா³னி.

சதுத்தே² யதா²வுத்தஆரஞ்ஞகஸேனாஸனதா, யாவகாலிகஸ்ஸ அதத்த²ஜாதகதா, அகி³லானதா, அகி³லானாவஸேஸகதா, அப்படிஸம்விதி³ததா, அஜ்ஜா²ராமே படிக்³க³ஹணம், அஜ்ஜோ²ஹரணந்தி இமானி ஸத்த அங்கா³னி.

பாடிதே³ஸனீயஸிக்கா²பத³வண்ணனா நிட்டி²தா.

பாடிதே³ஸனீயகண்ட³ம் நிட்டி²தம்.