4. பவாரணக்க²ந்த⁴கம்

அபா²ஸுகவிஹாரகதா²வண்ணனா

209. பவாரணக்க²ந்த⁴கே ஆதி³தோ லாபோ ஆலாபோ, வசனபடிவசனவஸேன ஸமம் லாபோ ஸல்லாபோ. பிண்டா³ய படிக்கமேய்யாதி கா³மே பிண்டா³ய சரித்வா பச்சாக³ச்சே²ய்ய. அவக்காரபாதிம் தோ⁴வித்வா உபட்டா²பேய்யாதி அதிரேகபிண்ட³பாதம் அபனேத்வா ட²பனத்தா²ய ஏகம் ஸமுக்³க³பாதிம் தோ⁴வித்வா ட²பேய்ய. ஸமுக்³க³பாதி நாம ஸமுக்³க³புடஸதி³ஸா பாதி. அப்பஹரிதேதி அபரூள்ஹஹரிதே, யஸ்மிம் டா²னே பிண்ட³பாதஜ்ஜோ²த்த²ரணேன வினஸ்ஸனத⁴ம்மானி திணானி நத்தி², தஸ்மிந்தி அத்தோ². தேன நித்திணஞ்ச மஹாதிணக³ஹனஞ்ச யத்த² ஸகடேனபி ச²ட்³டி³தே பிண்ட³பாதே திணானி ந வினஸ்ஸந்தி, தஞ்ச டா²னம் பரிக்³க³ஹிதம் ஹோதி. பூ⁴தகா³மஸிக்கா²பத³ஸ்ஸ ஹி அவிகோபனத்த²மேதம் வுத்தம். அப்பாணகேதி நிப்பாணகே, பிண்ட³பாதஜ்ஜோ²த்த²ரணேன மரிதப்³ப³பாணகரஹிதே வா மஹாஉத³கக்க²ந்தே⁴. பரித்தோத³கே ஏவ ஹி ப⁴த்தபக்கே²பேன ஆலுளிதே ஸுகு²மபாணகா மரந்தி, ந மஹாதளாகாதீ³ஸூதி. பாணகானுரக்க²ணத்த²ஞ்ஹி ஏதம் வுத்தம். ஓபிலாபேய்யாதி நிமுஜ்ஜாபேய்ய.

வச்சக⁴டந்தி ஆசமனகும்பீ⁴. ரித்தந்தி ரித்தகம். துச்ச²ந்தி தஸ்ஸேவ வேவசனம். அவிஸய்ஹந்தி உக்கி²பிதும் அஸக்குணேய்யம் அதிபா⁴ரிகம். ஹத்த²விகாரேனாதி ஹத்த²ஸஞ்ஞாய. ஹத்தே²ஹி உக்கி²பனம் ஹத்த²விலங்க⁴னம். தேனாஹ ‘‘ஹத்து²க்கே²பகேனா’’தி. அத² வா விலங்கே⁴தி தே³ஸந்தரம் பாபேதி ஏதேனாதி விலங்க⁴கோ, ஹத்தோ² ஏவ விலங்க⁴கோ ஹத்த²விலங்க⁴கோ, தேன ஹத்த²விலங்க⁴கேன, அஞ்ஞமஞ்ஞம் ஸம்ஸிப்³பி³தஹத்தே²னாதி வுத்தம் ஹோதி. த்³வே ஹி ஜனா ஹத்தே²ன ஹத்த²ம் ஸம்ஸிப்³பே³த்வா த்³வீஸு ஹத்தே²ஸு ட²பேத்வா உட்ட²பேந்தா ஹத்த²விலங்க⁴கேன உட்ட²பேந்தி நாம. தித்தி²யஸமாதா³னந்தி தித்தி²யேஹி ஸமாதா³தப்³ப³ம்.

அபா²ஸுகவிஹாரகதா²வண்ணனா நிட்டி²தா.

பவாரணாபே⁴த³கதா²வண்ணனா

212. த்³வேமா, பி⁴க்க²வே, பவாரணா சாதுத்³த³ஸிகா ச பன்னரஸிகா சாதி ஏத்த² புரிமவஸ்ஸம்வுத்தா²னம் புப்³ப³கத்திகபுண்ணமா, தேஸம்யேவ ஸசே ப⁴ண்ட³னகாரகேஹி உபத்³து³தா பவாரணம் பச்சுக்கட்³ட⁴ந்தி, அத² கத்திகமாஸஸ்ஸ காளபக்க²சாதுத்³த³ஸோ வா பச்சி²மகத்திகபுண்ணமா வா, பச்சி²மவஸ்ஸம்வுத்தா²னஞ்ச பச்சி²மகத்திகபுண்ணமா ஏவ வாதி இமே தயோ பவாரணதி³வஸாதி வேதி³தப்³பா³. இத³ஞ்ச பகதிசாரித்தவஸேன வுத்தம், ததா²ரூபபச்சயே பன ஸதி த்³வின்னம் கத்திகபுண்ணமானம் புரிமேஸு சாதுத்³த³ஸேஸுபி பவாரணம் காதும் வட்டதி, தேனேவ மஹாவிஹாரே பி⁴க்கூ² சாதுத்³த³ஸியா பவாரேத்வா பன்னரஸியா காயஸாமக்³கி³ம் தே³ந்தி, சேதியகி³ரிமஹத³ஸ்ஸனத்த²ம்பி அட்ட²மியா க³ச்ச²ந்தி, தம்பி சாதுத்³த³ஸியம் பவாரேதுகாமானஞ்ஞேவ ஹோதி.

பவாரணாதா³னானுஜானனகதா²வண்ணனா

213. ஸசே பன வுட்³ட⁴தரோ ஹோதீதி ஸசே பவாரணதா³யகோ பி⁴க்கு² வுட்³ட⁴தரோ ஹோதி. தேன ச பி⁴க்கு²னாதி பவாரணதா³யகேன பி⁴க்கு²னா.

அனாபத்திபன்னரஸககதா²வண்ணனா

222. பன்னரஸகேஸு பவாரிதமத்தேதி பவாரிதஸமனந்தரம். அவுட்டி²தாய பரிஸாயாதி பவாரேத்வா பச்சா² அஞ்ஞமஞ்ஞம் கதே²ந்தியா. ஏகச்சாய வுட்டி²தாயாதி ஏகச்சேஸு யதா²னிஸின்னேஸு ஏகச்சேஸு ஸகஸகட்டா²னம் க³தேஸு. புன பவாரிதப்³ப³ந்தி புனபி ஸப்³பே³ஹி ஸமாக³ந்த்வா பவாரேதப்³ப³ம். ஆக³ச்ச²ந்தி ஸமஸமா, தேஸம் ஸந்திகே பவாரேதப்³ப³ந்தி க³தே அனானேத்வா நிஸின்னானஞ்ஞேவ ஸந்திகே பவாரேதப்³ப³ம். ஸப்³பா³ய வுட்டி²தாய பரிஸாய ஆக³ச்ச²ந்தி ஸமஸமா, தேஸம் ஸந்திகே பவாரேதப்³ப³ந்தி யதி³ ஸப்³பே³ வுட்ட²ஹித்வா க³தா ஸன்னிபாதேதுஞ்ச ந ஸக்கா, ஏகச்சே ஸன்னிபாதேத்வா பவாரேதும் வட்டதி, ஞத்திம் ட²பேத்வா கத்தப்³ப³ஸங்க⁴கம்மாபா⁴வா வக்³க³ம் ந ஹோதி. உபோஸதே²பி ஏஸேவ நயோ.

பவாரணாட²பனகதா²வண்ணனா

237. ‘‘நத்தி² தி³ன்ன’’ந்திஆதி³னயப்பவத்தா த³ஸவத்து²கா மிச்சா²தி³ட்டி². ‘‘ஹோதி ததா²க³தோ பரம் மரணா, ந ஹோதி ததா²க³தோ பரம் மரணா’’திஆதி³னா ஸஸ்ஸதுச்சே²த³ஸங்கா²தம் அந்தம் க³ண்ஹாதீதி அந்தக்³கா³ஹிகா.

ப⁴ண்ட³னகாரகவத்து²கதா²வண்ணனா

240. சதுத்தே² கதே ஸுணந்தீதி சதுத்தே² பன்னரஸிகுபோஸதே² கதே அம்ஹாகம் பவாரணம் ட²பேஸ்ஸந்தீதி ஸுணந்தி. ஏவம்பி த்³வே சாதுத்³த³ஸிகா ஹோந்தீதி ததியேன ஸத்³தி⁴ம் த்³வே சாதுத்³த³ஸிகா ஹோந்தி.

பவாரணாஸங்க³ஹகதா²வண்ணனா

241. அயம் பவாரணாஸங்க³ஹோ ஏகஸ்ஸ தி³ன்னோபி ஸப்³பே³ஸம் தி³ன்னோவ ஹோதீதி ஆஹ ‘‘ஏகஸ்ஸபி வஸேன தா³தப்³போ³’’தி. ஆக³ந்துகா தேஸம் ஸேனாஸனம் க³ஹேதும் ந லப⁴ந்தீதி ஸசேபி ஸட்டி²வஸ்ஸபி⁴க்கூ² ஆக³ச்ச²ந்தி, தேஸம் ஸேனாஸனம் க³ஹேதும் ந லப⁴ந்தி. பவாரேத்வா பன அந்தராபி சாரிகம் பக்கமிதும் லப⁴ந்தீதி பவாரணாஸங்க³ஹே கதே அந்தரா பக்கமிதுகாமா ஸங்க⁴ம் ஸன்னிபாதாபேத்வா பவாரேதும் லப⁴ந்தி. ஸேஸமேத்த² பாளிதோ அட்ட²கதா²தோ ச ஸுவிஞ்ஞேய்யமேவ.

பவாரணக்க²ந்த⁴கவண்ணனா நிட்டி²தா.