9. ராஜவக்³கோ³

1. அந்தேபுரஸிக்கா²பத³வண்ணனா

497-499. ராஜவக்³க³ஸ்ஸ பட²மஸிக்கா²பதே³ அட்ட²கதா²யம் ஸப்³ப³ம் உத்தானத்த²மேவ. பாளியம் பன அயமனுத்தானபத³த்தோ². கதம் வா கரிஸ்ஸந்தி வாதி மேது²னவீதிக்கமனம் கதம் வா கரிஸ்ஸந்தி வா. இமேஸந்தி பத³ம் விப⁴த்திவிபரிணாமம் கத்வா உப⁴யத்த² யோஜேதப்³ப³ம் ‘‘இமேஹி கதம் இமே கரிஸ்ஸந்தீ’’தி. ரதனந்தி மணிரதனாதீ³ஸு யம்கிஞ்சி. உப⁴தோதி த்³வீஹி பக்கே²ஹி. ‘‘உப⁴தோ ஸுஜாதோ’’தி ஏத்தகே வுத்தே யேஹி கேஹிசி த்³வீஹி பா⁴கே³ஹி ஸுஜாததா விஞ்ஞாயேய்ய, ஸுஜாத-ஸத்³தோ³ ச ‘‘ஸுஜாதோ சாருத³ஸ்ஸனோ’’திஆதீ³ஸு ஆரோஹஸம்பத்திபரியாயோதி ஜாதிவஸேனேவ ஸுஜாததம் விபா⁴வேதும் ‘‘மாதிதோ ச பிதிதோ சா’’தி வுத்தம். அனோரஸபுத்தவஸேனபி லோகே மாதுபிதுஸமஞ்ஞா தி³ஸ்ஸதி, இத⁴ பன ஸா ஓரஸபுத்தவஸேனேவ இச்சி²தாதி த³ஸ்ஸேதும் ‘‘ஸம்ஸுத்³த⁴க³ஹணிகோ’’தி வுத்தம். க³ப்³ப⁴ம் க³ண்ஹாதி தா⁴ரேதீதி க³ஹணீ, க³ப்³பா⁴ஸயஸஞ்ஞிதோ மாதுகுச்சி²ப்பதே³ஸோ. ஸம்ஸுத்³தா⁴ க³ஹணீ அஸ்ஸாதி ஸம்ஸுத்³த⁴க³ஹணிகோ, ஸம்ஸுத்³தா⁴ தஸ்ஸ மாதுகுச்சீ²தி வுத்தம் ஹோதி. ‘‘ஸமவேபாகினியா க³ஹணியா’’தி ஏத்த² பன யதா²பு⁴த்தஸ்ஸ ஆஹாரஸ்ஸ விபாசனவஸேன க³ண்ஹனதோ அச²ட்³ட³னதோ கம்மஜதேஜோதா⁴து ‘‘க³ஹணீ’’தி வுச்சதி.

யாவ ஸத்தமா பிதாமஹயுகா³தி ஏத்த² பிது பிதா பிதாமஹோ, பிதாமஹஸ்ஸ யுக³ம் பிதாமஹயுக³ம். ‘‘யுக³’’ந்தி ஆயுப்பமாணம் வுச்சதி. அபி⁴லாபமத்தமேவ சேதம், அத்த²தோ பன பிதாமஹோயேவ பிதாமஹயுக³ம். பிதா ச மாதா ச பிதரோ, பிதூனம் பிதரோ பிதாமஹா, தேஸம் யுகோ³ பிதாமஹயுகோ³, தஸ்மா யாவ ஸத்தமா பிதாமஹயுகா³, பிதாமஹத்³வந்தா³தி ஏவமேத்த² அத்தோ² த³ட்ட²ப்³போ³. ஏவஞ்ஹி பிதாமஹக்³க³ஹணேனேவ மாதாமஹோபி க³ஹிதோ ஹோதி. யுக³-ஸத்³தோ³ சேத்த² ஏகஸேஸேன த³ட்ட²ப்³போ³ யுகோ³ ச யுகோ³ ச யுகோ³தி. ஏவஞ்ஹி தத்த² தத்த² த்³வந்த³ம் க³ஹிதமேவ ஹோதி, தஸ்மா ததோ உத்³த⁴ம் ஸப்³பே³பி புப்³ப³புரிஸா பிதாமஹயுக³க்³க³ஹணேனேவ க³ஹிதா. ஏவம் யாவ ஸத்தமோ பிதாமஹயுகோ³, தாவ ஸம்ஸுத்³த⁴க³ஹணிகோ.

அக்கி²த்தோதி ‘‘அபனேத² ஏதம், கிம் இமினா’’தி ஏவம் அக்கி²த்தோ அனவக்கி²த்தோ. அனுபகுட்டோ²தி ந உபகுட்டோ², ந அக்கோஸம் வா நிந்த³ம் வா பத்தபுப்³போ³. கேன காரணேனாதி ஆஹ ‘‘ஜாதிவாதே³னா’’தி. ஏத்த² ச ‘‘உப⁴தோ…பே… பிதாமஹயுகா³’’தி ஏதேன தஸ்ஸ யோனிதோ³ஸாபா⁴வோ த³ஸ்ஸிதோ ஸம்ஸுத்³த⁴க³ஹணிகபா⁴வகித்தனதோ, ‘‘அக்கி²த்தோ’’தி இமினா கிரியாபராதா⁴பா⁴வோ. கிரியாபராதே⁴ன ஹி ஸத்தா கே²பம் பாபுணந்தி. ‘‘அனுபகுட்டோ²’’தி இமினா அயுத்தஸம்ஸக்³கா³பா⁴வோ. அயுத்தஸம்ஸக்³க³ஞ்ஹி படிச்ச ஸத்தா அக்கோஸம் லப⁴ந்தி. ஸேஸமேத்த² உத்தானமேவ. க²த்தியதா, அபி⁴ஸித்ததா, உபி⁴ன்னம்பி ஸயனிக⁴ரதோ அனிக்க²ந்ததா, அப்படிஸம்விதி³ததா, இந்த³கீ²லாதிக்கமோதி இமானி பனேத்த² பஞ்ச அங்கா³னி.

அந்தேபுரஸிக்கா²பத³வண்ணனா நிட்டி²தா.

2. ரதனஸிக்கா²பத³வண்ணனா

502. து³தியே மஹாலதம் நாமாதி பதிகுலம் க³ச்ச²ந்தியா கிர தஸ்ஸா பிதா மஹாலதாபிளந்த⁴னம் நாம காராபேஸி. தஸ்மிம் பிளந்த⁴னே சதஸ்ஸோ வஜிரனாளியோ தத்த² தத்த² அப்பேதப்³ப³ட்டா²னே அப்பனவஸேன வினியோக³ம் அக³மம்ஸு, முத்தானம் ஏகாத³ஸ நாளியோ, பவாளஸ்ஸ த்³வாவீஸதி நாளியோ, மணீனம் தேத்திம்ஸ நாளியோ. இதி ஏதேஹி ச அஞ்ஞேஹி ச வேளுரியலோஹிதங்கமஸாரக³ல்லாதீ³ஹி ஸத்தவண்ணேஹி ச ரதனேஹி நிட்டா²னம் அக³மாஸி. தம் ஸீஸே படிமுக்கம் யாவ பாத³பிட்டி²யா ப⁴ஸ்ஸதி, பஞ்சன்னம் ஹத்தீ²னம் ப³லம் தா⁴ரயமானாவ இத்தீ² நம் தா⁴ரேதும் ஸக்கோதி. தம் ஸந்தா⁴யேதம் வுத்தம்.

506. ஆவஸத²ஸ்ஸ பன ஸுப்பபாதோ வா முஸலபாதோ வா உபசாரோ நாமாதி யோஜேதப்³ப³ம். ஆவஸதோ²தி சேத்த² அந்தோஆராமே வா ஹோது அஞ்ஞத்த² வா, அத்தனோ வஸனட்டா²னம் வுச்சதி. ச²ந்தே³னபி ப⁴யேனபீதி வட்³ட⁴கீஆதீ³ஸு ச²ந்தே³ன, ராஜவல்லபே⁴ஸு ப⁴யேன. தமேவ பி⁴க்கு²ம் ஆஸங்கந்தீதி விஸ்ஸரித்வா க³மனகாலே அத்தனோ பச்ச²தோ அஞ்ஞஸ்ஸாபா⁴வா ஆஸங்கந்தி. பதிரூபம் நாம ரதனஸம்மதே பம்ஸுகூலக்³க³ஹணம் வா ரதனே நிருஸ்ஸுக்கக³மனம் வா. யதி³ ஹி தம் ரதனஸம்மதம் ஆமாஸம் சே, ‘‘நத்தி² ஏதஸ்ஸ ஸாமீ’’தி பம்ஸுகூலம் க³ஹேஸ்ஸதி. அனாமாஸம் சே, ‘‘நத்தி² ஏதஸ்ஸ ஸாமீ’’தி பம்ஸுகூலசி²ன்னபலிபோ³தோ⁴ நிரபேக்கோ² க³மிஸ்ஸதி. ஸமாத³பேத்வாதி அஞ்ஞம் ஸமாத³பேத்வா, ‘‘உத்³தி³ஸ்ஸ அரியா திட்ட²ந்தி, ஏஸா அரியானயாசனா’’தி (ஜா. 1.7.59) வுத்தனயேன யாசித்வாதி அத்தோ². ஸேஸமேத்த² உத்தானமேவ. அனனுஞ்ஞாதகரணம், பரஸந்தகதா, விஸ்ஸாஸக்³கா³ஹபம்ஸுகூலஸஞ்ஞானம் அபா⁴வோ, உக்³க³ஹணம் வா உக்³க³ஹாபனம் வாதி இமானி பனேத்த² சத்தாரி அங்கா³னி.

ரதனஸிக்கா²பத³வண்ணனா நிட்டி²தா.

3. விகாலகா³மப்பவிஸனஸிக்கா²பத³வண்ணனா

508. ததியே அரியமக்³க³ஸ்ஸாதி ஏத்த² ஸக்³க³மக்³கோ³பி ஸங்க³ஹேதப்³போ³. அனிய்யானிகத்தா ஸக்³க³மோக்க²மக்³கா³னம் திரச்சா²னபூ⁴தா ஹி கதா² திரச்சா²னகதா². திரச்சா²னபூ⁴தந்தி திரோகரணபூ⁴தம் விப³ந்த⁴னபூ⁴தம். ராஜபடிஸம்யுத்தம் கத²ந்தி (தீ³. நி. அட்ட². 1.17; ம. நி. அட்ட². 2.223; ஸம். நி. அட்ட². 3.5.1080; அ. நி. அட்ட². 3.10.69-70) ராஜானம் ஆரப்³ப⁴ ‘‘மஹாஸம்மதோ மந்தா⁴தா த⁴ம்மாஸோகோ ஏவம்மஹானுபா⁴வோ’’திஆதி³னா நயேன பவத்தகத²ம். ஏத்த² ச ‘‘அஸுகோ ராஜா அபி⁴ரூபோ த³ஸ்ஸனீயோ’’திஆதி³னா நயேன கே³ஹஸ்ஸிதகதா²வ திரச்சா²னகதா² ஹோதி. ‘‘ஸோபி நாம ஏவம்மஹானுபா⁴வோ க²யம் க³தோ’’தி ஏவம் பவத்தா பன அனிச்சதாபடிஸம்யுத்தா கம்மட்டா²னபா⁴வே திட்ட²தி. சோரேஸுபி ‘‘மூலதே³வோ ஏவம்மஹானுபா⁴வோ, மேக⁴மாலோ ஏவம்மஹானுபா⁴வோ’’தி தேஸம் கம்மம் படிச்ச ‘‘அஹோ ஸூரா’’தி கே³ஹஸ்ஸிதகதா²வ திரச்சா²னகதா². யுத்³தே⁴பி ப⁴ரதயுத்³தா⁴தீ³ஸு ‘‘அஸுகேன அஸுகோ ஏவம் மாரிதோ ஏவம் வித்³தோ⁴’’தி காமஸ்ஸாத³வஸேனேவ கதா² திரச்சா²னகதா². ‘‘தேபி நாம க²யம் க³தா’’தி ஏவம் பவத்தா பன ஸப்³ப³த்த² கம்மட்டா²னமேவ ஹோதி.

அபிச அன்னாதீ³ஸு ‘‘ஏவம் வண்ணவந்தம் க³ந்த⁴வந்தம் ரஸவந்தம் ப²ஸ்ஸஸம்பன்னம் கா²தி³ம்ஹ பு⁴ஞ்ஜிம்ஹ பிவிம்ஹ பரிபு⁴ஞ்ஜிம்ஹா’’தி காமஸ்ஸாத³வஸேன கதே²தும் ந வட்டதி, ஸாத்த²கம் பன கத்வா ‘‘புப்³பே³ ஏவம் வண்ணாதி³ஸம்பன்னம் அன்னம் பானம் வத்த²ம் ஸயனம் மாலாக³ந்த⁴ம் ஸீலவந்தானம் அத³ம்ஹ, சேதியபூஜம் அகரிம்ஹா’’தி கதே²தும் வட்டதி. ஞாதிகதா²தீ³ஸுபி ‘‘அம்ஹாகம் ஞாதகா ஸூரா ஸமத்தா²’’தி வா ‘‘புப்³பே³ மயம் ஏவம் விசித்ரேஹி யானேஹி விசரிம்ஹா’’தி வா அஸ்ஸாத³வஸேன வத்தும் ந வட்டதி, ஸாத்த²கம் பன கத்வா ‘‘தேபி நோ ஞாதகா க²யம் க³தா’’தி வா ‘‘புப்³பே³ மயம் ஏவரூபா உபாஹனா ஸங்க⁴ஸ்ஸ அத³ம்ஹா’’தி வா கதே²தப்³ப³ம். கா³மகதா²பி ஸுனிவிட்ட²து³ன்னிவிட்ட²ஸுபி⁴க்க²து³ப்³பி⁴க்கா²தி³வஸேன வா ‘‘அஸுககா³மவாஸினோ ஸூரா ஸமத்தா²’’தி வா ஏவம் அஸ்ஸாத³வஸேன ந வட்டதி, ஸாத்த²கம் பன கத்வா ‘‘ஸத்³தா⁴ பஸன்னா’’தி வா ‘‘க²யவயம் க³தா’’தி வா வத்தும் வட்டதி. நிக³மனக³ரஜனபத³கதா²ஸுபி ஏஸேவ நயோ.

இத்தி²கதா²பி வண்ணஸண்டா²னாதீ³னி படிச்ச அஸ்ஸாத³வஸேன ந வட்டதி, ‘‘ஸத்³தா⁴ பஸன்னா, க²யம் க³தா’’தி ஏவம் வத்தும் வட்டதி. ஸூரகதா²பி ‘‘நந்தி³மித்தோ நாம யோதோ⁴ ஸூரோ அஹோஸீ’’தி அஸ்ஸாத³வஸேன ந வட்டதி, ‘‘ஸத்³தோ⁴ அஹோஸி, க²யம் க³தோ’’தி ஏவமேவ வட்டதி. விஸிகா²கதா²பி ‘‘அஸுகா விஸிகா² ஸுனிவிட்டா² து³ன்னிவிட்டா² ஸூரா ஸமத்தா²’’தி அஸ்ஸாத³வஸேனேவ ந வட்டதி, ‘‘ஸத்³தா⁴ பஸன்னா, க²யம் க³தா’’இச்சேவ வட்டதி.

கும்ப⁴ட்டா²னகதா²தி குடட்டா²னகதா² உத³கதித்த²கதா² வுச்சதி, கும்ப⁴தா³ஸீகதா² வா. ஸாபி ‘‘பாஸாதி³கா நச்சிதும் கா³யிதும் சே²கா’’தி அஸ்ஸாத³வஸேன ந வட்டதி, ‘‘ஸத்³தா⁴ பஸன்னா’’திஆதி³னா நயேனேவ வட்டதி. புப்³ப³பேதகதா²தி அதீதஞாதிகதா². தத்த² வத்தமானஞாதிகதா²ஸதி³ஸோவ வினிச்ச²யோ.

நானத்தகதா²தி புரிமபச்சி²மகதா²விமுத்தா அவஸேஸா நானாஸபா⁴வா நிரத்த²ககதா². லோகக்கா²யிகாதி ‘‘அயம் லோகோ கேன நிம்மிதோ, அஸுகேன பஜாபதினா ப்³ரஹ்முனா இஸ்ஸரேன வா நிம்மிதோ, காகோ ஸேதோ அட்டீ²னம் ஸேதத்தா, ப³கா ரத்தா லோஹிதஸ்ஸ ரத்தத்தா’’தி ஏவமாதி³கா லோகாயதவிதண்ட³ஸல்லாபகதா². உப்பத்திடி²திஸம்ஹாராதி³வஸேன லோகம் அக்கா²யதீதி லோகக்கா²யிகா. ஸமுத்³த³க்கா²யிகா நாம கஸ்மா ஸமுத்³தோ³ ஸாக³ரோ, ஸாக³ரஸ்ஸ ரஞ்ஞோ புத்தேஹி க²தத்தா ஸாக³ரோ. க²தோ அம்ஹேஹீதி ஹத்த²முத்³தா³ய நிவேதி³தத்தா ஸமுத்³தோ³தி ஏவமாதி³கா நிரத்த²கா ஸமுத்³த³க்கா²யிககதா².

இதி ப⁴வோ இதி அப⁴வோதி யம் வா தம் வா நிரத்த²ககாரணம் வத்வா பவத்திதகதா² இதிப⁴வாப⁴வகதா². ஏத்த² ச ப⁴வோதி ஸஸ்ஸதம், அப⁴வோதி உச்சே²த³ம். ப⁴வோதி வுத்³தி⁴, அப⁴வோதி ஹானி. ப⁴வோதி காமஸுக²ம், அப⁴வோதி அத்தகிலமதோ². இதி இமாய ச²ப்³பி³தா⁴ய இதிப⁴வாப⁴வகதா²ய ஸத்³தி⁴ம் பா³த்திம்ஸ திரச்சா²னகதா² நாம ஹோதி. அத² வா பாளியம் ஸரூபதோ அனாக³தாபி அரஞ்ஞபப்³ப³தனதீ³தீ³பகதா² இதி-ஸத்³தே³ன ஸங்க³ஹேத்வா ச²த்திம்ஸ திரச்சா²னகதா²தி வுச்சதி. இதி வாதி ஹி ஏத்த² இதி-ஸத்³தோ³ பகாரத்தே², வா-ஸத்³தோ³ விகப்பத்தே². இத³ம் வுத்தம் ஹோதி – ‘‘ஏவம்பகாரம் இதோ அஞ்ஞம் வா தாதி³ஸம் நிரத்த²ககத²ம் கதே²ந்தீ’’தி. ஆதி³அத்தே² வா இதி-ஸத்³தோ³ ‘‘இதி வா இதி ஏவரூபா நச்சகீ³தவாதி³தவிஸூகத³ஸ்ஸனா படிவிரதோ’’திஆதீ³ஸு (தீ³. நி. 1.10, 194) விய, ஏவமாதி³ம் அஞ்ஞம்பி தாதி³ஸம் கத²ம் கதே²ந்தீதி அத்தோ².

512. அபரிக்கி²த்தஸ்ஸ கா³மஸ்ஸ உபசாரோ அதி³ன்னாதா³னே வுத்தனயேனேவ வேதி³தப்³போ³தி இமினா து³தியலேட்³டு³பாதோ இத⁴ உபசாரோதி த³ஸ்ஸேதி. ஸேஸமேத்த² உத்தானமேவ. ஸந்தம் பி⁴க்கு²ம் அனாபுச்ச²னா, அனுஞ்ஞாதகாரணாபா⁴வோ, விகாலே கா³மப்பவிஸனந்தி இமானி பனேத்த² தீணி அங்கா³னி.

விகாலகா³மப்பவிஸனஸிக்கா²பத³வண்ணனா நிட்டி²தா.

4. ஸூசிக⁴ரஸிக்கா²பத³வண்ணனா

517. சதுத்தே² தம் அஸ்ஸ அத்தீ²தி பட²மம் பி⁴ந்தி³த்வா பச்சா² தே³ஸேதப்³ப³த்தா தம் பே⁴த³னகம் தஸ்ஸ பாசித்தியஸ்ஸ அத்தீ²தி பே⁴த³னகம், பாசித்தியம். அஸ்ஸத்தி²அத்தே² அ-காரபச்சயோ த³ட்ட²ப்³போ³. வாஸிஜடேதி வாஸித³ண்ட³கே. ஸேஸமேத்த² உத்தானமேவ. ஸூசிக⁴ரதா, அட்டி²மயாதி³தா, அத்தனோ அத்தா²ய கரணம் வா காராபேத்வா வா படிலாபோ⁴தி இமானி பனேத்த² தீணி அங்கா³னி.

ஸூசிக⁴ரஸிக்கா²பத³வண்ணனா நிட்டி²தா.

5. மஞ்சபீட²ஸிக்கா²பத³வண்ணனா

522. பஞ்சமே சே²த³னகம் வுத்தனயமேவாதி சே²த³னமேவ சே²த³னகம், தம் தஸ்ஸ அத்தீ²தி சே²த³னகந்தி இமமத்த²ம் அதிதி³ஸ்ஸதி. ஸேஸமேத்த² உத்தானமேவ. பமாணாதிக்கந்தமஞ்சபீட²தா, அத்தனோ அத்தா²ய கரணம் வா காராபேத்வா வா படிலாபோ⁴தி இமானி பனேத்த² த்³வே அங்கா³னி.

மஞ்சபீட²ஸிக்கா²பத³வண்ணனா நிட்டி²தா.

6. தூலோனத்³த⁴ஸிக்கா²பத³வண்ணனா

526. ச²ட்டே² தூலம் பக்கி²பித்வாதி ஹேட்டா² சிமிலிகம் பத்த²ரித்வா தஸ்ஸ உபரி தூலம் பக்கி²பித்வாதி அத்தோ². போடகிதூலந்தி ஏரகதூலாதி³ யம்கிஞ்சி திணஜாதீனம் தூலம். ஸேஸமேத்த² உத்தானமேவ. தூலோனத்³த⁴மஞ்சபீட²தா, அத்தனோ அத்தா²ய கரணம் வா காராபேத்வா வா படிலாபோ⁴தி இமானி பனேத்த² த்³வே அங்கா³னி. அத்தனா காராபிதஸ்ஸ ஹி படிலாப⁴மத்தேனேவ பாசித்தியம். தேனேவ பத³பா⁴ஜனே ‘‘படிலாபே⁴ன உத்³தா³லேத்வா பாசித்தியம் தே³ஸேதப்³ப³’’ந்தி வுத்தம். கேனசி பன ‘‘படிலாபே⁴ன உத்³தா³லேத்வா பாசித்தியம் தே³ஸேதப்³ப³ந்தி ஏத்த² கிஞ்சாபி படிலாப⁴மத்தேனேவ பாசித்தியம் விய தி³ஸ்ஸதி, பரிபோ⁴கே³யேவ ஆபத்தி த³ட்ட²ப்³பா³. ‘அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’தி வசனம் ஏத்த² ஸாத⁴க’’ந்தி வுத்தம், தம் தஸ்ஸ மதிமத்தம். ந ஹி ‘‘அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’’தி இத³ம் அத்தனா காராபிதம் ஸந்தா⁴ய வுத்தம், கரணகாராபனபச்சயா ச இமினா ஸிக்கா²பதே³ன பாசித்தியம் வுத்தம், ந பரிபோ⁴க³பச்சயா. ‘‘ந, பி⁴க்க²வே, தூலோனத்³த⁴ம் மஞ்சம் வா பீட²ம் வா பரிபு⁴ஞ்ஜிதப்³ப³ம், யோ பரிபு⁴ஞ்ஜேய்ய, ஆபத்தி து³க்கடஸ்ஸா’’தி ஹி க²ந்த⁴கே வுத்தத்தா அத்தனா வா கதம் ஹோது அஞ்ஞேன வா, பரிபு⁴ஞ்ஜந்தஸ்ஸ பரிபோ⁴க³பச்சயா து³க்கடமேவ, ந பாசித்தியம்.

தூலோனத்³த⁴ஸிக்கா²பத³வண்ணனா நிட்டி²தா.

7. நிஸீத³னஸிக்கா²பத³வண்ணனா

531. ஸத்தமே யம் வத்தப்³ப³ம், தம் நிஸீத³னஸந்த²தஸிக்கா²பதே³ வுத்தமேவ. நிஸீத³னஸ்ஸ பமாணாதிக்கந்ததா, அத்தனோ அத்தா²ய கரணம் வா காராபேத்வா வா படிலாபோ⁴தி இமானி பனேத்த² த்³வே அங்கா³னி.

நிஸீத³னஸிக்கா²பத³வண்ணனா நிட்டி²தா.

537-542. அட்ட²மனவமத³ஸமேஸு நத்தி² வத்தப்³ப³ம், அங்கா³னிபி ஸத்தமேவ வுத்தனயேனேவ வேதி³தப்³பா³னி.

நிட்டி²தோ ராஜவக்³கோ³ நவமோ.

இதி ஸமந்தபாஸாதி³காய வினயட்ட²கதா²ய ஸாரத்த²தீ³பனியம்

கு²த்³த³கவண்ணனா ஸமத்தா.

பாசித்தியகண்ட³ம் நிட்டி²தம்.