8. ஸஹத⁴ம்மிகவக்³கோ³

1. ஸஹத⁴ம்மிகஸிக்கா²பத³வண்ணனா

434. ஸஹத⁴ம்மிகவக்³க³ஸ்ஸ பட²மஸிக்கா²பதே³ வாசாய வாசாய ஆபத்தீதி அனாத³ரியப⁴யா லேஸேன ஏவம் வத³ந்தஸ்ஸ ஆபத்தி. ஸேஸமேத்த² உத்தானமேவ. உபஸம்பன்னஸ்ஸ பஞ்ஞத்தேன வசனம், அஸிக்கி²துகாமதாய ஏவம் வசனந்தி இமானி பனேத்த² த்³வே அங்கா³னி.

ஸஹத⁴ம்மிகஸிக்கா²பத³வண்ணனா நிட்டி²தா.

2. விலேக²னஸிக்கா²பத³வண்ணனா

438. து³தியே வினயஸ்ஸ பரியாபுணனம் வினயபரியத்தீதி ஆஹ ‘‘வினயம் பரியாபுணந்தான’’ந்திஆதி³. ஸுகு³த்தோதி யதா² கரண்ட³கே பக்கி²த்தமணிக்க²ந்தோ⁴ விய ந நஸ்ஸதி விபத்திம் ந பாபுணாதி, ஏவம் ஸுட்டு² கோ³பிதோ. ஸுரக்கி²தோதி தஸ்ஸேவ பரியாயவசனம். யதா² ஹி கிலேஸசோரேஹி அவிலும்பனீயோ ஹோதி, ஏவம் ஸப்³ப³தா³ ஸூபட்டி²தஸ்ஸதிதாய ஸுட்டு² ரக்கி²தோ. குக்குச்சபகதானந்தி கப்பியாகப்பியம் நிஸ்ஸாய உப்பன்னகுக்குச்சேன அபி⁴பூ⁴தானம். ஸாரஜ்ஜனம் ஸாரதோ³, ப்³யாமோஹப⁴யம். விக³தோ ஸாரதோ³ ஏதஸ்ஸாதி விஸாரதோ³. ஸஹத⁴ம்மேனாதி ஸகாரணேன வசனேன. ஸுனிக்³க³ஹிதம் நிக்³க³ண்ஹாதீதி யதா² ந புன ஸீஸம் உக்கி²பந்தி, அத² கோ² அப்படிபா⁴னா மங்குபூ⁴தாயேவ ஹோந்தி, ஏவம் ஸுட்டு² நிக்³க³ண்ஹாதி.

அலஜ்ஜிதாதி ய-காரலோபேன நித்³தே³ஸோ, அலஜ்ஜிதாயாதி வுத்தம் ஹோதி. அஞ்ஞாணதாதிஆதீ³ஸுபி ஏஸேவ நயோ. மந்தோ³ மோமூஹோதி அஞ்ஞாணபா⁴வேன மந்தோ³, அவிஸயதோ மோமூஹோ, மஹாமூள்ஹோதி அத்தோ².

அத்தபச்சத்தி²காதி அத்தனோ பச்சத்தி²கா. வஜ்ஜிபுத்தகா த³ஸவத்து²தீ³பகா. பரூபஹாரஅஞ்ஞாணகங்கா²பரவிதாரணாதி³வாதா³தி ஏத்த² யே அரஹத்தம் படிஜானந்தானம் அப்பத்தே பத்தஸஞ்ஞீனம் அதி⁴மானிகானம் குஹகானம் வா அரஹத்தம் படிஜானந்தானம் ஸுக்கவிஸ்ஸட்டி²ம் தி³ஸ்வா மாரகாயிகா தே³வதா ‘‘அரஹதோ அஸுசிம் உபஸம்ஹரந்தீ’’தி மஞ்ஞந்தி ஸேய்யதா²பி புப்³ப³ஸேலியா அபரஸேலியா ச, தே பரூபஹாரவாதா³. யேஸம் பன அரஹதோ இத்தி²புரிஸாதீ³னம் நாமகோ³த்தாதீ³ஸு ஞாணப்பவத்தியா அபா⁴வேன அத்தி² அரஹதோ அஞ்ஞாணம், தத்தே²வ ஸன்னிட்டா²னாபா⁴வேன அத்தி² அரஹதோ கங்கா², யஸ்மா சஸ்ஸ தானி வத்தூ²னி பரே விதாரேந்தி பகாஸேந்தி ஆசிக்க²ந்தி, தஸ்மா அத்தி² அரஹதோ பரவிதாரணாதி இமா திஸ்ஸோ லத்³தி⁴யோ ஸேய்யதா²பி ஏதரஹி புப்³ப³ஸேலியானம், தே அஞ்ஞாணகங்கா²பரவிதாரணவாதா³. நிக்³க³ஹோ பன நேஸம் கதா²வத்து²ப்பகரணே வுத்தனயேனேவ வேதி³தப்³போ³.

சத்தாரோ மக்³கா³ ச ப²லானி சாதி உக்கட்ட²னித்³தே³ஸவஸேன வுத்தம், சதஸ்ஸோ படிஸம்பி⁴தா³ திஸ்ஸோ விஜ்ஜா ச² அபி⁴ஞ்ஞாதி அயம்பி அதி⁴க³மஸத்³த⁴ம்மோயேவ. ச-காரோ வா அவுத்தஸம்பிண்ட³னத்தோ² த³ட்ட²ப்³போ³. கேசி தே²ராதி த⁴ம்மகதி²கா. ஆஹம்ஸூதி பம்ஸுகூலிகத்தே²ரா ஏவம் ஆஹம்ஸு.

கதா³ பனாயம் கதா² உத³பாதீ³தி? அயஞ்ஹேத்த² அனுபுப்³பி³கதா² (அ. நி. அட்ட². 1.1.130) – இமஸ்மிம் கிர தீ³பே சண்டா³லதிஸ்ஸமஹாப⁴யே ஸக்கோ தே³வராஜா மஹாஉளும்பம் மாபேத்வா பி⁴க்கூ²னம் ஆரோசாபேஸி ‘‘மஹந்தம் ப⁴யம் ப⁴விஸ்ஸதி, ந ஸம்மா தே³வோ வஸ்ஸிஸ்ஸதி, பி⁴க்கூ² பச்சயேஹி கிலமந்தா பரியத்திம் ஸந்தா⁴ரேதும் ந ஸக்கி²ஸ்ஸந்தி, பரதீரம் க³ந்த்வா அய்யேஹி ஜீவிதம் ரக்கி²தும் வட்டதி. இமம் மஹாஉளும்பம் ஆருய்ஹ க³ச்ச²த² ப⁴ந்தே, யேஸம் ஏத்த² நிஸஜ்ஜட்டா²னம் நப்பஹோதி, தே கட்ட²க²ண்டே³பி உரம் ட²பேத்வா க³ச்ச²ந்து, ஸப்³பே³ஸம் ப⁴யம் ந ப⁴விஸ்ஸதீ’’தி. ததா³ ஸமுத்³த³தீரம் பத்வா ஸட்டி² பி⁴க்கூ² கதிகம் கத்வா ‘‘அம்ஹாகம் ஏத்த² க³மனகிச்சம் நத்தி², மயம் இதே⁴வ ஹுத்வா தேபிடகம் ரக்கி²ஸ்ஸாமா’’தி ததோ நிவத்தித்வா த³க்கி²ணமலயஜனபத³ம் க³ந்த்வா கந்த³மூலபண்ணேஹி ஜீவிகம் கப்பேந்தா வஸிம்ஸு, காயே வஹந்தே நிஸீதி³த்வா ஸஜ்ஜா²யம் கரோந்தி, அவஹந்தே வாலிகம் உஸ்ஸாரேத்வா பரிவாரேத்வா ஸீஸானி ஏகட்டா²னே கத்வா பரியத்திம் ஸம்மஸந்தி. இமினா நியாமேன த்³வாத³ஸ ஸம்வச்ச²ரானி ஸாட்ட²கத²ம் தேபிடகம் பரிபுண்ணம் கத்வா தா⁴ரயிம்ஸு.

ப⁴யே வூபஸந்தே ஸத்தஸதா பி⁴க்கூ² அத்தனோ க³தட்டா²னே ஸாட்ட²கதே² தேபிடகே ஏகக்க²ரம்பி ஏகப்³யஞ்ஜனம்பி அவினாஸேத்வா இமமேவ தீ³பமாக³ம்ம கல்லகா³மஜனபதே³ மண்ட³லாராமவிஹாரம் பவிஸிம்ஸு. தே²ரானம் ஆக³தபவத்திம் ஸுத்வா இமஸ்மிம் தீ³பே ஓஹீனா ஸட்டி² பி⁴க்கூ² ‘‘தே²ரே பஸ்ஸிஸ்ஸாமா’’தி க³ந்த்வா தே²ரேஹி ஸத்³தி⁴ம் தேபிடகம் ஸோதே⁴ந்தா ஏகக்க²ரம்பி ஏகப்³யஞ்ஜனம்பி அஸமேந்தம் நாம ந பஸ்ஸிம்ஸு. தஸ்மிம் டா²னே தே²ரானம் அயம் கதா² உத³பாதி³ ‘‘பரியத்தி நு கோ² ஸாஸனஸ்ஸ மூலம், உதா³ஹு படிபத்தீ’’தி. பம்ஸுகூலிகத்தே²ரா ‘‘படிபத்தி மூல’’ந்தி ஆஹம்ஸு, த⁴ம்மகதி²கா ‘‘பரியத்தீ’’தி. அத² நே தே²ரா ‘‘தும்ஹாகம் த்³வின்னம்பி ஜனானம் வசனமத்தேனேவ ந ஸக்கா விஞ்ஞாதும், ஜினபா⁴ஸிதம் ஸுத்தம் ஆஹரதா²’’தி ஆஹம்ஸு. ஸுத்தம் ஆஹரிதும் ந பா⁴ரோதி –

‘‘இமே ச, ஸுப⁴த்³த³, பி⁴க்கூ² ஸம்மா விஹரேய்யும், அஸுஞ்ஞோ லோகோ அரஹந்தேஹி அஸ்ஸா’’தி (தீ³. நி. 2.214). ‘‘படிபத்திமூலகம், மஹாராஜ, ஸத்து²ஸாஸனம், படிபத்திஸாரகம், மஹாராஜ, ஸத்து²ஸாஸனம், படிபத்தி திட்ட²ந்தீ திட்ட²தீ’’தி (மி. ப. 4.1.7) –

ஸுத்தம் ஆஹரிம்ஸு.

இமம் ஸுத்தம் ஸுத்வா த⁴ம்மகதி²கா அத்தனோ வாத³ட்ட²பனத்தா²ய இமம் ஸுத்தம் ஆஹரிம்ஸு –

‘‘யாவ திட்ட²ந்தி ஸுத்தந்தா, வினயோ யாவ தி³ப்பதி;

தாவ த³க்க²ந்தி ஆலோகம், ஸூரியே அப்³பு⁴ட்டி²தே யதா².

‘‘ஸுத்தந்தேஸு அஸந்தேஸு, பமுட்டே² வினயம்ஹி ச;

தமோ ப⁴விஸ்ஸதி லோகே, ஸூரியே அத்த²ங்க³தே யதா².

‘‘ஸுத்தந்தே ரக்கி²தே ஸந்தே, படிபத்தி ஹோதி ரக்கி²தா;

படிபத்தியம் டி²தோ தீ⁴ரோ, யோக³க்கே²மா ந த⁴ம்ஸதீ’’தி.

இமஸ்மிம் ஸுத்தே ஆஹடே பம்ஸுகூலிகத்தே²ரா துண்ஹீ அஹேஸும். த⁴ம்மகதி²கத்தே²ரானம்யேவ வசனம் புரதோ அஹோஸி. யதா² ஹி க³வஸதஸ்ஸ க³வஸஹஸ்ஸஸ்ஸ வா அந்தரே பவேணிபாலிகாய தே⁴னுயா அஸதி ஸோ வம்ஸோ ஸா பவேணீ ந க⁴டீயதி, ஏவமேவ ஆரத்³த⁴விபஸ்ஸகானம் பி⁴க்கூ²னம் ஸதேபி ஸஹஸ்ஸேபி விஜ்ஜமானே பரியத்தியா அஸதி அரியமக்³க³படிவேதோ⁴ நாம ந ஹோதி. யதா² ச நிதி⁴கும்பி⁴யா ஜானனத்தா²ய பாஸாணபிட்டே² அக்க²ரேஸு உபனிப³த்³தே⁴ஸு யாவ அக்க²ரானி த⁴ரந்தி, தாவ நிதி⁴கும்பீ⁴ நட்டா² நாம ந ஹோதி, ஏவமேவ பரியத்தியா த⁴ரமானாய ஸாஸனம் அந்தரஹிதம் நாம ந ஹோதீதி. தஸ்ஸாதே⁴ய்யோதி தஸ்ஸாயத்தோ.

439. ஸோ பனாதி ஸோ பாதிமோக்கோ². ஸேஸமேத்த² உத்தானமேவ. க³ரஹிதுகாமதா, உபஸம்பன்னஸ்ஸ ஸந்திகே ஸிக்கா²பத³விவண்ணனஞ்சாதி இமானி பனேத்த² த்³வே அங்கா³னி.

விலேக²னஸிக்கா²பத³வண்ணனா நிட்டி²தா.

3. மோஹனஸிக்கா²பத³வண்ணனா

443. ததியம் உத்தானமேவ. மோஹாரோபனம், மோஹேதுகாமதா, வுத்தனயேன ஸுதபா⁴வோ, மோஹனந்தி இமானி பனேத்த² சத்தாரி அங்கா³னி.

மோஹனஸிக்கா²பத³வண்ணனா நிட்டி²தா.

4. பஹாரஸிக்கா²பத³வண்ணனா

452. சதுத்தே² ரத்தசித்தோதி காயஸம்ஸக்³க³ராகே³ன ரத்தசித்தோ. ஸசே பன மேது²னராகே³ன ரத்தோ பஹாரம் தே³தி, து³க்கடமேவ. ஸேஸமேத்த² உத்தானமேவ. குபிததா, ந மோக்கா²தி⁴ப்பாயதா, உபஸம்பன்னஸ்ஸ பஹாரதா³னந்தி இமானி பனேத்த² தீணி அங்கா³னி.

பஹாரஸிக்கா²பத³வண்ணனா நிட்டி²தா.

5. தலஸத்திகஸிக்கா²பத³வண்ணனா

457. பஞ்சமே ந பஹரிதுகாமதாய தி³ன்னத்தா து³க்கடந்தி ஏத்த² பஹரிதுகாமதாய பஹடே புரிமஸிக்கா²பதே³ன பாசித்தியம், உச்சாரேதுகாமதாய கேவலம் உக்³கி³ரணமத்தே கதே இமினா பாசித்தியம். இமினா பன விரஜ்ஜி²த்வா பஹாரோ தி³ன்னோ, தஸ்மா து³க்கடம். கிமித³ம் து³க்கடம் பஹாரபச்சயா, உதா³ஹு உக்³கி³ரணபச்சயாதி? தத்த² கேசி தாவ வத³ந்தி ‘‘பஹாரபச்சயா ஏவ து³க்கடம், உக்³கி³ரணபச்சயா பாசித்தியந்தி ஸது³க்கடம் பாசித்தியம் யுஜ்ஜதி. புரிமஞ்ஹி உக்³கி³ரணம், பச்சா² பஹாரோ, ந ச பச்சா² பஹாரம் நிஸ்ஸாய புரிமம் உக்³கி³ரணம் அனாபத்திவத்து²கம் ப⁴விதுமரஹதீ’’தி.

மயம் பனேத்த² ஏவம் தக்கயாம ‘‘உக்³கி³ரணஸ்ஸ அத்தனோ ஸபா⁴வேனேவ அஸண்டி²தத்தா தப்பச்சயா பாசித்தியேன ந ப⁴விதப்³ப³ம், அஸுத்³த⁴சித்தேன கதபயோக³த்தா பன ந ஸக்கா ஏத்த² அனாபத்தியா ப⁴விதுந்தி து³க்கடம் வுத்தம். ‘ந பஹரிதுகாமதாய தி³ன்னத்தா’தி இமினா ச பஹாரபச்சயா புரிமஸிக்கா²பதே³ன பாசித்தியாஸம்ப⁴வே காரணம் வுத்தம், ந பன பஹாரபச்சயா து³க்கடஸம்ப⁴வே. ந ஹி அபஹரிதுகாமதாய பஹாரே தி³ன்னே புரிமஸிக்கா²பதே³ன பஹாரபச்சயா பாசித்தியேன து³க்கடேன வா ப⁴விதும் யுத்த’’ந்தி. ‘‘திரச்சா²னாதீ³னம் அஸுசிகரணாதி³ம் தி³ஸ்வா குஜ்ஜி²த்வாபி உக்³கி³ரந்தஸ்ஸ மோக்கா²தி⁴ப்பாயோ ஏவா’’தி வத³ந்தி. ஸேஸமேத்த² உத்தானமேவ. குபிததா, ந மோக்கா²தி⁴ப்பாயதா, உபஸம்பன்னஸ்ஸ தலஸத்திஉக்³கி³ரணந்தி இமானி பனேத்த² தீணி அங்கா³னி.

தலஸத்திகஸிக்கா²பத³வண்ணனா நிட்டி²தா.

6. அமூலகஸிக்கா²பத³வண்ணனா

459. ச²ட்ட²ம் உத்தானத்த²மேவ. உபஸம்பன்னதா, ஸங்கா⁴தி³ஸேஸஸ்ஸ அமூலகதா, அனுத்³த⁴ம்ஸனா, தங்க²ணவிஜானனாதி இமானி பனேத்த² சத்தாரி அங்கா³னி.

அமூலகஸிக்கா²பத³வண்ணனா நிட்டி²தா.

7. ஸஞ்சிச்சஸிக்கா²பத³வண்ணனா

464. ஸத்தமம்பி உத்தானத்த²மேவ. உபஸம்பன்னதா, அபா²ஸுகாமதா, குக்குச்சுப்பாத³னந்தி இமானி பனேத்த² தீணி அங்கா³னி.

ஸஞ்சிச்சஸிக்கா²பத³வண்ணனா நிட்டி²தா.

8. உபஸ்ஸுதிஸிக்கா²பத³வண்ணனா

471. அட்ட²மே ஸுதிஸமீபந்தி ஸத்³த³ஸமீபம். ஸுய்யதீதி ஹி ஸுதி, ஸத்³த³ஸ்ஸேதம் அதி⁴வசனம். தஸ்ஸ ஸமீபம் உபஸ்ஸுதி, ஸத்³த³ஸமீபந்தி வுத்தம் ஹோதி. க³ண்டி²பதே³ஸு ச ஸுய்யதீதி ஸுதீதி ஸத்³தோ³வ வுத்தோ. யத்த² பன டி²தேன ஸக்கா ஹோதி ஸத்³த³ம் ஸோதும், தத்த² திட்ட²ந்தோ ஸத்³த³ஸமீபே டி²தோ நாம ஹோதீதி ஆஹ ‘‘யத்த² ட²த்வா’’திஆதி³. கேசி பன ‘‘ஸுணாதி ஏத்தா²தி ஸுதி. யத்த² டி²தோ ஸுணாதி, தஸ்ஸ டா²னஸ்ஸேதம் நாமம். தஸ்ஸ ஸமீபம் உபஸ்ஸுதீ’’தி வத³ந்தி, ஏவம் பன க³ய்ஹமானே யஸ்மிம் டா²னே டி²தோ ஸுணாதி, தஸ்ஸ ஆஸன்னே அஞ்ஞஸ்மிம் பதே³ஸே திட்ட²தீதி ஆபஜ்ஜதி. அட்ட²கதா²யஞ்ச உபஸ்ஸுதி-ஸத்³த³ஸ்ஸேவ அத்த²ம் த³ஸ்ஸேதும் ‘‘யத்த² ட²த்வா ஸக்கா ஹோதி, தேஸம் வசனம் ஸோது’’ந்தி வுத்தம், ந ஸுதி-ஸத்³த³ஸ்ஸ. தஸ்மா புப்³ப³னயோவேத்த² பஸத்த²தரோ. அத² வா உபேச்ச ஸுய்யதி ஏத்தா²தி உபஸ்ஸுதி, டா²னம். யம் டா²னம் உபக³தேன ஸக்கா ஹோதி கதே²ந்தானம் ஸத்³த³ம் ஸோதும், தத்தா²தி ஏவமத்தோ² க³ஹேதப்³போ³. மந்தேந்தந்தி பு⁴ம்மத்தே² உபயோக³வசனந்தி ஆஹ ‘‘மந்தயமானே’’தி.

473. ஏகபரிச்சே²தா³னீதி ‘‘ஸியா கிரியம், ஸியா அகிரிய’’ந்தி இமினா நயேன ஏகபரிச்சே²தா³னி. இமானி ஹி தீணி ஸிக்கா²பதா³னி கதா³சி கிரியதோ ஸமுட்ட²ஹந்தி, கதா³சி அகிரியதோ, ந ஏகக்க²ணேயேவ கிரியாகிரியதோ ஸமுட்ட²ஹந்தி. ஸேஸமேத்த² உத்தானமேவ. உபஸம்பன்னதா, சோத³னாதி⁴ப்பாயோ, ஸவனந்தி இமானி பனேத்த² தீணி அங்கா³னி.

உபஸ்ஸுதிஸிக்கா²பத³வண்ணனா நிட்டி²தா.

9. கம்மபடிபா³ஹனஸிக்கா²பத³வண்ணனா

474. நவமம் உத்தானத்த²மேவ. த⁴ம்மகம்மதா, த⁴ம்மகம்மந்தி ஸஞ்ஞா, ச²ந்த³ம் த³த்வா கி²ய்யனந்தி இமானி பனேத்த² தீணி அங்கா³னி.

கம்மபடிபா³ஹனஸிக்கா²பத³வண்ணனா நிட்டி²தா.

10. ச²ந்த³ம் அத³த்வா க³மனஸிக்கா²பத³வண்ணனா

479. த³ஸமம் உத்தானத்த²மேவ. வினிச்ச²யகதா²ய பவத்தமானதா, த⁴ம்மகம்மதா, த⁴ம்மகம்மஸஞ்ஞிதா, ஸமானஸீமாயம் டி²ததா, ஸமானஸம்வாஸகதா, கோபேதுகாமதாய ஹத்த²பாஸவிஜஹனந்தி இமானி பனேத்த² ச² அங்கா³னி.

ச²ந்த³ம் அத³த்வா க³மனஸிக்கா²பத³வண்ணனா நிட்டி²தா.

11. து³ப்³ப³லஸிக்கா²பத³வண்ணனா

484. ஏகாத³ஸமம்பி உத்தானத்த²மேவ. உபஸம்பன்னதா, த⁴ம்மேன லத்³த⁴ஸம்முதிதா, ஸங்கே⁴ன ஸத்³தி⁴ம் விகப்பனுபக³சீவரதா³னம், பச்சா² கீ²யிதுகாமதாய கி²ய்யனாதி இமானி பனேத்த² சத்தாரி அங்கா³னி.

து³ப்³ப³லஸிக்கா²பத³வண்ணனா நிட்டி²தா.

489. த்³வாத³ஸமே நத்தி² கிஞ்சி வத்தப்³ப³ம்.

நிட்டி²தோ ஸஹத⁴ம்மிகவக்³கோ³ அட்ட²மோ.