7. ஸப்பாணகவக்³கோ³

1. ஸஞ்சிச்சஸிக்கா²பத³வண்ணனா

382. ஸப்பாணகவக்³க³ஸ்ஸ பட²மஸிக்கா²பதே³ உஸும் ஸரம் அஸ்ஸதி கி²பதீதி இஸ்ஸாஸோ, த⁴னுஸிப்பகுஸலோதி ஆஹ ‘‘த⁴னுக்³க³ஹாசரியோ’’தி. படிஸத்துவித⁴மனத்த²ம் த⁴னும் க³ண்ஹந்தீதி த⁴னுக்³க³ஹா, தேஸம் ஆசரியோ த⁴னுக்³க³ஹாசரியோ. அப்பமத்தேன வத்தம் காதப்³ப³ந்தி யதா² தே பாணா ந மரந்தி, ஏவம் ஸூபட்டி²தஸ்ஸதினா ஸேனாஸனே வத்தம் காதப்³ப³ம். ஸேஸமேத்த² உத்தானமேவ. அங்கா³னிபி மனுஸ்ஸவிக்³க³ஹே வுத்தனயேன வேதி³தப்³பா³னீதி.

ஸஞ்சிச்சஸிக்கா²பத³வண்ணனா நிட்டி²தா.

2. ஸப்பாணகஸிக்கா²பத³வண்ணனா

387. து³தியே உத³கஸண்டா²னகப்பதே³ஸேதி யத்த² பூ⁴மிபா⁴கே³ உத³கம் நிக்கி²த்தம் ஸந்திட்ட²தி, ந ஸஹஸா பரிக்க²யம் க³ச்ச²தி, தாதி³ஸே பதே³ஸே. ஸேஸமேத்த² உத்தானமேவ. அங்கா³னி ஸிஞ்சனஸிக்கா²பதே³ வுத்தனயானேவ.

ஸப்பாணகஸிக்கா²பத³வண்ணனா நிட்டி²தா.

3. உக்கோடனஸிக்கா²பத³வண்ணனா

392. ததியே யதா²பதிட்டி²தபா⁴வேன பதிட்டா²தும் ந தே³ந்தீதி தேஸம் பவத்திஆகாரத³ஸ்ஸனத்த²ம் வுத்தம். யம் பன த⁴ம்மேன அதி⁴கரணம் நிஹதம், தம் ஸுனிஹதமேவ. ஸசே விப்பகதே கம்மே படிக்கோஸதி, தம் ஸஞ்ஞாபேத்வாவ காதப்³ப³ம். இதரதா² கம்மஞ்ச குப்பதி, காரகானஞ்ச ஆபத்தி. ஸேஸமேத்த² உத்தானமேவ. யதா²த⁴ம்மம் நிஹதபா⁴வோ, ஜானனா, உக்கோடனாதி இமானி பனேத்த² தீணி அங்கா³னி.

உக்கோடனஸிக்கா²பத³வண்ணனா நிட்டி²தா.

4. து³ட்டு²ல்லஸிக்கா²பத³வண்ணனா

399. சதுத்தே² தஸ்ஸேவாதி யோ ஆபன்னோ, தஸ்ஸேவ. ஆரோசேதீதி படிச்சா²த³னத்த²மேவ மா கஸ்ஸசி ஆரோசேஸீதி வத³தி. வத்து²புக்³க³லோதி ஆபன்னபுக்³க³லோ. யேனஸ்ஸ ஆரோசிதந்தி யேன து³தியேன அஸ்ஸ ததியஸ்ஸ ஆரோசிதம். கோடி சி²ன்னா ஹோதீதி யஸ்மா படிச்சா²த³னபச்சயா ஆபத்திம் ஆபஜ்ஜித்வாவ து³தியேன ததியஸ்ஸ ஆரோசிதம், தஸ்மா தப்பச்சயா புன தேன ஆபஜ்ஜிதப்³பா³பத்தியா அபா⁴வதோ ஆபத்தியா கோடி சி²ன்னா நாம ஹோதி.

400. ‘‘அனுபஸம்பன்னஸ்ஸ ஸுக்கவிஸ்ஸட்டி² ச காயஸம்ஸக்³கோ³ சாதி அயம் து³ட்டு²ல்லஅஜ்ஜா²சாரோ நாமா’’தி இத³ம் து³ட்டு²ல்லாரோசனஸிக்கா²பத³ட்ட²கதா²ய ந ஸமேதி. வுத்தஞ்ஹி தத்த² (பாசி. அட்ட². 82) ‘‘அனுபஸம்பன்னஸ்ஸ து³ட்டு²ல்லம் வா அது³ட்டு²ல்லம் வா அஜ்ஜா²சாரந்தி ஏத்த² ஆதி³தோ பஞ்ச ஸிக்கா²பதா³னி து³ட்டு²ல்லோ நாம அஜ்ஜா²சாரோ, ஸேஸானி அது³ட்டு²ல்லோ, ஸுக்கவிஸ்ஸட்டி²காயஸம்ஸக்³க³து³ட்டு²ல்லஅத்தகாமா பனஸ்ஸ அஜ்ஜா²சாரோ நாமா’’தி. ‘‘ஆரோசனே அனுபஸம்பன்னஸ்ஸ து³ட்டு²ல்லம் அஞ்ஞதா² அதி⁴ப்பேதம், படிச்சா²த³னே அஞ்ஞதா²’’தி ஏத்தா²பி விஸேஸகாரணம் ந தி³ஸ்ஸதி, தஸ்மா அட்ட²கதா²ய புப்³பே³னாபரம் ந ஸமேதி. அவிரோத⁴ம் இச்ச²ந்தேன பன வீமம்ஸிதப்³ப³மேத்த² காரணம். ஸேஸமேத்த² உத்தானமேவ. உபஸம்பன்னஸ்ஸ து³ட்டு²ல்லாபத்திஜானனம், படிச்சா²தே³துகாமதாய நாரோசேஸ்ஸாமீதி து⁴ரனிக்கே²போதி இமானி பனேத்த² த்³வே அங்கா³னி.

து³ட்டு²ல்லஸிக்கா²பத³வண்ணனா நிட்டி²தா.

5. ஊனவீஸதிவஸ்ஸஸிக்கா²பத³வண்ணனா

402. பஞ்சமே ரூபஸுத்தந்தி ஹேரஞ்ஞிகானம் ஸுத்தம். து³ருத்தானந்தி அக்கோஸவஸேன து³ருத்தானம், து³ருத்தத்தாயேவ து³ராக³தானம். வசனபதா²னந்தி ஏத்த² வசனமேவ தத³த்த²ம் ஞாதுகாமானம் ஞாபேதுகாமானஞ்ச பதோ²தி வசனபதோ². து³க்க²மானந்தி து³க்கே²ன க²மிதப்³பா³னம்.

404. க³ப்³பே⁴ ஸயிதகாலேன ஸத்³தி⁴ம் வீஸதிமம் வஸ்ஸம் அஸ்ஸாதி க³ப்³ப⁴வீஸோ. ஹாயனவட்³ட⁴னந்தி க³ப்³ப⁴மாஸேஸு அதி⁴கேஸு உத்தரிஹாயனம், ஊனேஸு வட்³ட⁴னந்தி வேதி³தப்³ப³ம். ஏகூனவீஸதிவஸ்ஸந்தி த்³வாத³ஸமாஸே மாதுகுச்சி²ஸ்மிம் வஸித்வா மஹாபவாரணாய ஜாதகாலதோ பட்டா²ய ஏகூனவீஸதிவஸ்ஸம். பாடிபத³தி³வஸேதி பச்சி²மிகாய வஸ்ஸூபக³மனதி³வஸே. ‘‘திம்ஸரத்திதி³வோ மாஸோ’’தி (அ. நி. 3.71; 8.43; விப⁴. 1023) வசனதோ ‘‘சத்தாரோ மாஸா பரிஹாயந்தீ’’தி வுத்தம். வஸ்ஸம் உக்கட்³ட⁴ந்தீதி வஸ்ஸம் உத்³த⁴ம் கட்³ட⁴ந்தி, ததியே ஸம்வச்ச²ரே ஏகமாஸம் அதி⁴கமாஸவஸேன பரிச்சஜந்தா வஸ்ஸம் உத்³த⁴ம் கட்³ட⁴ந்தீதி அத்தோ², தஸ்மா ததியோ ஸம்வச்ச²ரோ தேரஸமாஸிகோ ஹோதி, ஸம்வச்ச²ரஸ்ஸ பன த்³வாத³ஸமாஸிகத்தா அட்டா²ரஸஸு வஸ்ஸேஸு அதி⁴கமாஸே விஸும் க³ஹேத்வா ‘‘ச² மாஸா வட்³ட⁴ந்தீ’’தி வுத்தம். ததோதி ச²மாஸதோ. நிக்கங்கா² ஹுத்வாதி அதி⁴கமாஸேஹி ஸத்³தி⁴ம் பரிபுண்ணவீஸதிவஸ்ஸத்தா நிப்³பே³மதிகா ஹுத்வா. யம் பன வுத்தம் தீஸு க³ண்டி²பதே³ஸு ‘‘அட்டா²ரஸன்னம்யேவ வஸ்ஸானம் அதி⁴கமாஸே க³ஹேத்வா க³ணிதத்தா ஸேஸவஸ்ஸத்³வயஸ்ஸபி அதி⁴கானி தி³வஸானி ஹோந்தேவ, தானி அதி⁴கதி³வஸானி ஸந்தா⁴ய ‘நிக்கங்கா² ஹுத்வா’தி வுத்த’’ந்தி, தம் ந க³ஹேதப்³ப³ம். ந ஹி த்³வீஸு வஸ்ஸேஸு அதி⁴கதி³வஸானி நாம விஸும் உபலப்³ப⁴ந்தி ததியே வஸ்ஸே வஸ்ஸுக்கட்³ட⁴னவஸேன அதி⁴கமாஸே பரிச்சத்தேயேவ அதிரேகமாஸஸம்ப⁴வதோ. தஸ்மா த்³வீஸு வஸ்ஸேஸு அதிரேகதி³வஸானி நாம விஸும் ந ஸம்ப⁴வந்தி.

நனு ச ‘‘தே த்³வே மாஸே க³ஹேத்வா வீஸதிவஸ்ஸானி பரிபுண்ணானி ஹோந்தீ’’தி கஸ்மா வுத்தம், ஏகூனவீஸதிவஸ்ஸம்ஹி புன அபரஸ்மிம் வஸ்ஸே பக்கி²த்தே வீஸதிவஸ்ஸானி பரிபுண்ணானி ஹோந்தீதி ஆஹ ‘‘ஏத்த² பன…பே… வுத்த’’ந்தி. அனேகத்த²த்தா நிபாதானம் பன-ஸத்³தோ³ ஹி-ஸத்³த³த்தே², ஏத்த² ஹீதி வுத்தம் ஹோதி. இத³ஞ்ஹி வுத்தஸ்ஸேவத்த²ஸ்ஸ ஸமத்த²னவஸேன வுத்தம். இமினா ச இமம் தீ³பேதி ‘‘யம் வுத்தம் ‘ஏகூனவீஸதிவஸ்ஸம் ஸாமணேரம் நிக்க²மனீயபுண்ணமாஸிம் அதிக்கம்ம பாடிபத³தி³வஸே உபஸம்பாதே³ந்தீ’தி, தத்த² க³ப்³ப⁴மாஸேபி அக்³க³ஹேத்வா த்³வீஹி மாஸேஹி அபரிபுண்ணவீஸதிவஸ்ஸம் ஸந்தா⁴ய ‘ஏகூனவீஸதிவஸ்ஸ’ந்தி வுத்தம், தஸ்மா அதி⁴கமாஸேஸு த்³வீஸு க³ஹிதேஸு வீஸதிவஸ்ஸானி பரிபுண்ணானி நாம ஹோந்தீ’’தி. தஸ்மாதி யஸ்மா க³ப்³ப⁴மாஸாபி க³ணனூபகா³ ஹோந்தி, தஸ்மா. ஏகவீஸதிவஸ்ஸோ ஹோதீதி ஜாததி³வஸதோ பட்டா²ய வீஸதிவஸ்ஸோ ஸமானோ க³ப்³ப⁴மாஸேஹி ஸத்³தி⁴ம் ஏகவீஸதிவஸ்ஸோ ஹோதி.

406. அஞ்ஞம் உபஸம்பாதே³தீதி உபஜ்ஜா²யோ கம்மவாசாசரியோ வா ஹுத்வா உபஸம்பாதே³தி. ஸேஸமேத்த² உத்தானமேவ. ஊனவீஸதிவஸ்ஸதா, ஊனகஸஞ்ஞிதா, உபஸம்பாத³னந்தி இமானி பனேத்த² தீணி அங்கா³னி.

ஊனவீஸதிவஸ்ஸஸிக்கா²பத³வண்ணனா நிட்டி²தா.

6. தே²ய்யஸத்த²ஸிக்கா²பத³வண்ணனா

407. ச²ட்ட²ஸிக்கா²பத³ம் உத்தானத்த²மேவ. தே²ய்யஸத்த²கபா⁴வோ, ஜானனம், ஸம்விதா⁴னம், அவிஸங்கேதேன க³மனந்தி இமானி பனேத்த² சத்தாரி அங்கா³னி.

தே²ய்யஸத்த²ஸிக்கா²பத³வண்ணனா நிட்டி²தா.

412. ஸத்தமே நத்தி² கிஞ்சி வத்தப்³ப³ம்.

8. அரிட்ட²ஸிக்கா²பத³வண்ணனா

417. அட்ட²மே பா³த⁴யிம்ஸூதி ஹனிம்ஸு. தம்தம்ஸம்பத்தியா விப³ந்த⁴னவஸேன ஸத்தஸந்தானஸ்ஸ அந்தரே வேமஜ்ஜே² ஏதி ஆக³ச்ச²தீதி அந்தராயோ, தி³ட்ட²த⁴ம்மிகாதி³அனத்தோ². அனதிக்கமனட்டே²ன தஸ்மிம் அந்தராயே நியுத்தா, அந்தராயம் வா ப²லம் அரஹந்தி, அந்தராயஸ்ஸ வா கரணஸீலாதி அந்தராயிகா. தேனாஹ ‘‘அந்தராயம் கரோந்தீதி அந்தராயிகா’’தி. ஆனந்தரியத⁴ம்மாதி ஆனந்தரிகஸபா⁴வா சேதனாத⁴ம்மா. தத்ராயம் வசனத்தோ² – சுதிஅனந்தரப²லம் அனந்தரம் நாம, தஸ்மிம் அனந்தரே நியுத்தா, தம்னிப்³ப³த்தனேன அனந்தரகரணஸீலா, அனந்தரப்பயோஜனாதி வா ஆனந்தரிகா, தே ஏவ ஆனந்தரியாதி வுத்தா. கம்மானி ஏவ அந்தராயிகாதி கம்மந்தராயிகா. மோக்க²ஸ்ஸேவ அந்தராயம் கரோதி, ந ஸக்³க³ஸ்ஸாதி மிச்சா²சாரலக்க²ணாபா⁴வதோ வுத்தம். ந ஹி பி⁴க்கு²னியா த⁴ம்மரக்கி²தபா⁴வோ அத்தி². பாகதிகபி⁴க்கு²னீவஸேன சேதம் வுத்தம். அரியாய பன பவத்தம் அபாயஸம்வத்தனிகமேவ, நந்த³மாணவகோ சேத்த² நித³ஸ்ஸனம். உபி⁴ன்னம் ஸமானச்ச²ந்த³தாவஸேன வா ந ஸக்³க³ந்தராயிகதா, மோக்க²ந்தராயிகதா பன மோக்க²த்தா²ய படிபத்தியா விதூ³ஸனதோ. அபி⁴ப⁴வித்வா பன பவத்தியம் ஸக்³க³ந்தராயிகதாபி ந ஸக்கா நிவாரேதுந்தி.

அஹேதுகதி³ட்டி²அகிரியதி³ட்டி²னத்தி²கதி³ட்டி²யோவ நியதபா⁴வம் பத்தா நியதமிச்சா²தி³ட்டி²த⁴ம்மா. படிஸந்தி⁴த⁴ம்மாதி படிஸந்தி⁴சித்துப்பாத³மாஹ. பண்ட³காதி³க்³க³ஹணஞ்சேத்த² நித³ஸ்ஸனமத்தம் ஸப்³பா³யபி அஹேதுகபடிஸந்தி⁴யா விபாகந்தராயிகபா⁴வதோ. யாஹி அரியே உபவத³தி, தா சேதனா அரியூபவாதா³ ஜாதா. ததோ பரந்தி க²மாபனதோ உபரி. யம் பனேத்த² வத்தப்³ப³ம், தம் தி³ப்³ப³சக்கு²கதா²யம் வுத்தமேவ. ஸஞ்சிச்ச ஆபன்னா ஆபத்தியோதி ஸஞ்சிச்ச வீதிக்கந்தா ஸத்த ஆபத்திக்க²ந்தா⁴. ஸஞ்சிச்ச வீதிக்கந்தஞ்ஹி அந்தமஸோ து³க்கடது³ப்³பா⁴ஸிதம்பி ஸக்³க³மக்³க³ப²லானம் அந்தராயம் கரோதி. யாவ பி⁴க்கு²பா⁴வம் படிஜானாதி பாராஜிகம் ஆபன்னோ, ந வுட்டா²தி ஸேஸக³ருகாபத்திம் ஆபன்னோ, ந தே³ஸேதி லஹுகாபத்திம் ஆபன்னோ.

அயம் பி⁴க்கூ²தி அரிட்டோ² பி⁴க்கு². ரஸேன ரஸம் ஸம்ஸந்தி³த்வாதி அனவஜ்ஜேன பச்சயபரிபு⁴ஞ்ஜனரஸேன ஸாவஜ்ஜகாமகு³ணபரிபோ⁴க³ரஸம் ஸமானேத்வா. யோனிஸோ பச்சவேக்க²ணேன நத்தி² ஏத்த² ச²ந்த³ராகோ³தி நிச்ச²ந்த³ராகோ³, பச்சயபரிபோ⁴கோ³. உபனேந்தோ வியாதி ப³ந்த⁴னம் உபனேந்தோ விய. ‘‘க⁴டேந்தோ வியா’’திபி பாடோ². உபஸம்ஹரந்தோ வியாதி ஸதி³ஸதம் உபஸம்ஹரந்தோ விய ஏகந்தஸாவஜ்ஜே அனவஜ்ஜபா⁴வபக்கே²பனதோ. பாபகந்தி லாமகட்டே²ன து³க்³க³திஸம்பாபனட்டே²ன ச பாபகம். மஹாஸமுத்³த³ம் ப³ந்த⁴ந்தேன வியாதி ஸேதுகரணவஸேன மஹாஸாக³ரம் ப³ந்த⁴ந்தேன விய. ஸப்³ப³ஞ்ஞுதஞ்ஞாணேன ஸத்³தி⁴ம் படிவிருஜ்ஜ²ந்தோதி ஸப்³ப³ஞ்ஞுதஞ்ஞாணேன ‘‘ஸாவஜ்ஜ’’ந்தி தி³ட்ட²ம் ‘‘அனவஜ்ஜ’’ந்தி க³ஹணேன தேன ஸஹ படிவிருஜ்ஜ²ந்தோ. ஆணாசக்கேதி பட²மபாராஜிகஸிக்கா²பத³ஸங்கா²தே, ‘‘அப்³ரஹ்மசரியம் பஹாயா’’திஆதி³தே³ஸனாஸங்கா²தே ச ஆணாசக்கே.

அட்டி²கங்கலம் நாம உரட்டி² வா பிட்டி²கண்டகம் வா ஸீஸட்டி² வா. தஞ்ஹி நிம்மம்ஸத்தா ‘‘கங்கல’’ந்தி வுச்சதி. விக³தமம்ஸாய ஹி அட்டி²ஸங்க²லிகாய ஏகட்டி²ம்ஹி வா கங்கல-ஸத்³தோ³ நிருள்ஹோ. அனுத³ஹனட்டே²னாதி அனுபாயபடிபத்தியா ஸம்பதி ஆயதிஞ்ச அனுத³ஹனட்டே²ன. மஹாபி⁴தாபனட்டே²ன அனவட்டி²தஸபா⁴வதாய, இத்தரபச்சுபட்டா²னட்டே²ன முஹுத்தகரணீயதாய, தாவகாலிகட்டே²ன பரேஹி அபி⁴ப⁴வனதாய, ஸப்³ப³ங்க³பச்சங்க³பலிப⁴ஞ்ஜனட்டே²ன பே⁴த³னாதி³அதி⁴கரணபா⁴வேன, உக்³கா⁴டஸதி³ஸதாய அதி⁴குட்டனட்டே²ன, அவணே வணம் உப்பாதே³த்வா அந்தோ அனுபவிஸனபா⁴வதாய வினிவிஜ்ஜ²னட்டே²ன, தி³ட்ட²த⁴ம்மிகஸம்பராயிகஅனத்த²னிமித்ததாய ஸாஸங்கஸப்படிப⁴யட்டே²ன.

பாளியம் ‘‘தா²மஸா பராமாஸா’’திஆதீ³ஸு ஏவமத்தோ² வேதி³தப்³போ³. தா²மஸாதி தி³ட்டி²தா²மேன, தஸ்ஸா தி³ட்டி²யா தா²மக³தபா⁴வேனாதி அத்தோ². பராமாஸாதி தி³ட்டி²பராமாஸேன, தி³ட்டி²ஸங்கா²தபராமாஸேனாதி அத்தோ². தி³ட்டி²யேவ ஹி த⁴ம்மஸபா⁴வம் அதிக்கமித்வா பரதோ ஆமஸனேன பராமாஸோ. அபி⁴னிவிஸ்ஸாதி தண்ஹாபி⁴னிவேஸபுப்³ப³ங்க³மேன தி³ட்டா²பி⁴னிவேஸேன ‘‘இத³மேத்த² ஸச்ச’’ந்தி அபி⁴னிவிஸித்வா. வோஹரதீதி கதே²தி. யதோ ச கோ² தே பி⁴க்கூ²தி யதா³ தே பி⁴க்கூ². ஏவம்ப்³யாகோ² அஹம், ப⁴ந்தே, ப⁴க³வதாதி இத³ம் ஏஸ அத்தனோ லத்³தி⁴ம் நிகூ³ஹிதுகாமதாய நத்தீ²தி வத்துகாமோபி ப⁴க³வதோ ஆனுபா⁴வேன ஸம்படிச்ச²தி. பு³த்³தா⁴னம் கிர ஸம்முகா² த்³வே கதா² கதே²தும் ஸமத்தோ² நாம நத்தி². கஸ்ஸ நு கோ² நாம த்வம் மோக⁴புரிஸாதி த்வம் மோக⁴புரிஸ கஸ்ஸ க²த்தியஸ்ஸ வா ப்³ராஹ்மணஸ்ஸ வா வேஸ்ஸஸ்ஸ வா ஸுத்³த³ஸ்ஸ வா க³ஹட்ட²ஸ்ஸ வா பப்³ப³ஜிதஸ்ஸ வா தே³வஸ்ஸ வா மனுஸ்ஸஸ்ஸ வா மயா ஏவம் த⁴ம்மம் தே³ஸிதம் ஆஜானாஸி. ஸேஸமேத்த² உத்தானமேவ. த⁴ம்மகம்மதா, ஸமனுபா⁴ஸனா, அப்படினிஸ்ஸஜ்ஜனந்தி இமானி பனேத்த² தீணி அங்கா³னி.

அரிட்ட²ஸிக்கா²பத³வண்ணனா நிட்டி²தா.

9. உக்கி²த்தஸம்போ⁴க³ஸிக்கா²பத³வண்ணனா

424. நவமே பயோக³க³ணனாயாதி தா³னக்³க³ஹணப்பயோக³க³ணனாய. ஸம்வாஸே கம்மபரியோஸானவஸேன, ஸஹஸேய்யாய ஏகஸ்மிம் நிபன்னே இதரஸ்ஸ நிபஜ்ஜனபயோக³வஸேன ஆபத்திபரிச்சே²தோ³ வேதி³தப்³போ³. ஏத்த² ச பத³பா⁴ஜனே ‘‘ஏகச்ச²ன்னே’’தி அவிஸேஸேன வுத்தத்தா நானூபசாரேபி ஏகச்ச²ன்னே நிபஜ்ஜந்தஸ்ஸ ஆபத்தி. தேனேவ மாதிகாட்ட²கதா²யம் (கங்கா². அட்ட². உக்கி²த்தஸம்போ⁴க³ஸிக்கா²பத³வண்ணனா) வுத்தம் ‘‘ஸஹ வா ஸேய்யம் கப்பேய்யாதி நானூபசாரேபி ஏகச்ச²ன்னே நிபஜ்ஜேய்யா’’தி. பண்ணத்திம் அஜானந்தேன அரஹதாபி கிரியாப்³யாகதசித்தேன ஆபஜ்ஜிதப்³ப³த்தா ‘‘திசித்த’’ந்தி வுத்தம். யம் பன கேனசி வுத்தம் ‘‘திசித்தந்தி ஏத்த² விபாகாப்³யாகதசித்தேன ஸஹ வா ஸேய்யம் கப்பேய்யாதி ஏவமத்தோ² த³ட்ட²ப்³போ³, அஞ்ஞதா² ஸசித்தகத்தா ஸிக்கா²பத³ஸ்ஸ கிரியாப்³யாகதம் ஸந்தா⁴ய ந யுஜ்ஜதீ’’தி, தம் ந க³ஹேதப்³ப³ம். ந ஹி ஸசித்தகஸிக்கா²பத³வீதிக்கமோ அரஹதோ ந ஸம்ப⁴வதி. தேனேவ பத²வீக²ணனாதீ³ஸு ஸசித்தகஸிக்கா²பதே³ஸு திசித்தமேவ வுத்தம். ஸேஸமேத்த² உத்தானமேவ. அகதானுத⁴ம்மதா, ஜானனா, ஸம்போ⁴கா³தி³கரணந்தி இமானி பனேத்த² தீணி அங்கா³னி.

உக்கி²த்தஸம்போ⁴க³ஸிக்கா²பத³வண்ணனா நிட்டி²தா.

10. கண்டகஸிக்கா²பத³வண்ணனா

428. த³ஸமே பிரேதி நிபாதபத³ம். ஸம்போ³த⁴னே வத்தமானம் பர-ஸத்³தே³ன ஸமானத்த²ம் வத³ந்தீதி ஆஹ ‘‘பர அமாமகா’’தி, அம்ஹாகம் அனஜ்ஜ²த்திகபூ⁴தாதி அத்தோ². பிரேதி வா ‘‘பரதோ’’தி இமினா ஸமானத்த²ம் நிபாதபத³ம், தஸ்மா சர பிரேதி பரதோ க³ச்ச², மா இத⁴ திட்டா²தி ஏவம்பேத்த² அத்தோ² வேதி³தப்³போ³. ஸேஸமேத்த² புரிமஸிக்கா²பத³த்³வயே வுத்தனயமேவ.

கண்டகஸிக்கா²பத³வண்ணனா நிட்டி²தா.

நிட்டி²தோ ஸப்பாணகவக்³கோ³ ஸத்தமோ.