6. ஸுராபானவக்³கோ³

1. ஸுராபானஸிக்கா²பத³வண்ணனா

326-328. ஸுராபானவக்³க³ஸ்ஸ பட²மஸிக்கா²பதே³ வதியாதி கா³மபரிக்கே²பவதியா. பாளியம் பிட்ட²ஸுராதீ³ஸு பிட்ட²ம் பா⁴ஜனே பக்கி²பித்வா தஜ்ஜம் உத³கம் த³த்வா மத்³தி³த்வா கதா பிட்ட²ஸுரா. ஏவம் பூவே ஓத³னே ச பா⁴ஜனே பக்கி²பித்வா தஜ்ஜம் உத³கம் த³த்வா மத்³தி³த்வா கதா பூவஸுரா ஓத³னஸுராதி ச வுச்சதி. ‘‘கிண்ணா’’தி பன தஸ்ஸா ஸுராய பீ³ஜம் வுச்சதி. யே ஸுராமோத³காதிபி வுச்சந்தி, தே பக்கி²பித்வா கதா கிண்ணபக்கி²த்தா. ஹரீதகீஸாஸபாதி³னானாஸம்பா⁴ரேஹி ஸம்யோஜிதா ஸம்பா⁴ரஸம்யுத்தா.

மது⁴கதாலனாளிகேராதி³புப்ப²ரஸோ சிரபரிவாஸிதோ புப்பா²ஸவோ. பனஸாதி³ப²லரஸோ ப²லாஸவோ. முத்³தி³காரஸோ மத்⁴வாஸவோ. உச்சு²ரஸோ கு³ளாஸவோ. ஹரீதகாமலககடுகப⁴ண்டா³தி³னானாஸம்பா⁴ரானம் ரஸோ சிரபரிவாஸிதோ ஸம்பா⁴ரஸம்யுத்தோ. பீ³ஜதோ பட்டா²யாதி ஸம்பா⁴ரே படியாதே³த்வா சாடியம் பக்கி²த்தகாலதோ, தாலனாளிகேராதீ³னம் புப்ப²ரஸஸ்ஸ க³ஹிதஅபி⁴னவகாலதோயேவ ச பட்டா²ய.

329. லோணஸோவீரகம் ஸுத்தஞ்ச அனேகேஹி பே⁴ஸஜ்ஜேஹி அபி⁴ஸங்க²தோ அமஜ்ஜபூ⁴தோ ஆஸவவிஸேஸோ. வாஸக்³கா³ஹாபனத்த²ந்தி ஸுக³ந்தி⁴பா⁴வக்³கா³ஹாபனத்த²ம். அசித்தகம் லோகவஜ்ஜந்தி ஏத்த² யம் வத்தப்³ப³ம், தம் பட²மபாராஜிகவண்ணனாயம் வுத்தனயேன வேதி³தப்³ப³ம். ஸேஸமேத்த² உத்தானமேவ. மஜ்ஜபா⁴வோ, தஸ்ஸ பானஞ்சாதி இமானி பனேத்த² த்³வே அங்கா³னி.

ஸுராபானஸிக்கா²பத³வண்ணனா நிட்டி²தா.

2. அங்கு³லிபதோத³கஸிக்கா²பத³வண்ணனா

330. து³தியே பி⁴க்கு²னீபி அனுபஸம்பன்னட்டா²னே டி²தாதி ஏத்த² பி⁴க்கு²பி பி⁴க்கு²னியா அனுபஸம்பன்னட்டா²னே டி²தோதி வேதி³தப்³போ³. ஸேஸமேத்த² உத்தானமேவ. ஹஸாதி⁴ப்பாயதா, உபஸம்பன்னஸ்ஸ காயேன காயாமஸனந்தி இமானி பனேத்த² த்³வே அங்கா³னி.

அங்கு³லிபதோத³கஸிக்கா²பத³வண்ணனா நிட்டி²தா.

3. ஹஸத⁴ம்மஸிக்கா²பத³வண்ணனா

335. ததியம் உத்தானத்த²மேவ. உபரிகோ³ப்ப²கதா, ஹஸாதி⁴ப்பாயேன கீளனந்தி இமானி பனேத்த² த்³வே அங்கா³னி.

ஹஸத⁴ம்மஸிக்கா²பத³வண்ணனா நிட்டி²தா.

4. அனாத³ரியஸிக்கா²பத³வண்ணனா

344. சதுத்தே² கா³ரய்ஹோ ஆசரியுக்³க³ஹோ ந க³ஹேதப்³போ³தி யஸ்மா உச்சு²ரஸோ ஸத்தாஹகாலிகோ, தஸ்ஸ கஸடோ யாவஜீவிகோ, த்³வின்னம்யேவ ஸமவாயோ உச்சு²யட்டி², தஸ்மா விகாலே உச்சு²யட்டி²ம் கா²தி³தும் வட்டதி கு³ளஹரீதகம் வியாதி ஏவமாதி³கோ கா³ரய்ஹாசரியவாதோ³ ந க³ஹேதப்³போ³. லோகவஜ்ஜே ஆசரியுக்³க³ஹோ ந வட்டதீதி லோகவஜ்ஜஸிக்கா²பதே³ ஆபத்திட்டா²னே யோ ஆசரியவாதோ³, ஸோ ந க³ஹேதப்³போ³, லோகவஜ்ஜம் அதிக்கமித்வா ‘‘இத³ம் அம்ஹாகம் ஆசரியுக்³க³ஹோ’’தி வத³ந்தஸ்ஸ உக்³க³ஹோ ந வட்டதீதி அதி⁴ப்பாயோ. ஸுத்தானுலோமம் நாம அட்ட²கதா². பவேணியா ஆக³தஸமோதா⁴னம் க³ச்ச²தீதி ‘‘பவேணியா ஆக³தோ ஆசரியுக்³க³ஹோவ க³ஹேதப்³போ³’’தி ஏவம் வுத்தே மஹாஅட்ட²கதா²வாதே³யேவ ஸங்க³ஹம் க³ச்ச²தீதி அதி⁴ப்பாயோ. ஸேஸமேத்த² உத்தானமேவ. உபஸம்பன்னஸ்ஸ பஞ்ஞத்தேன வசனம், அனாத³ரியகரணந்தி இமானி பனேத்த² த்³வே அங்கா³னி.

அனாத³ரியஸிக்கா²பத³வண்ணனா நிட்டி²தா.

5. பி⁴ம்ஸாபனஸிக்கா²பத³வண்ணனா

345. பஞ்சமம் உத்தானத்த²மேவ. உபஸம்பன்னதா, தஸ்ஸ த³ஸ்ஸனஸவனவிஸயே பி⁴ம்ஸாபேதுகாமதாய வாயமனந்தி இமானி பனேத்த² த்³வே அங்கா³னி.

பி⁴ம்ஸாபனஸிக்கா²பத³வண்ணனா நிட்டி²தா.

6. ஜோதிஸிக்கா²பத³வண்ணனா

350. ச²ட்டே² ப⁴க்³கா³ நாம ஜனபதி³னோ ராஜகுமாரா, தேஸம் நிவாஸோ ஏகோபி ஜனபதோ³ ருள்ஹீஸத்³தே³ன ‘‘ப⁴க்³கா³’’தி வுச்சதி. தேன வுத்தம் ‘‘ப⁴க்³கா³தி ஜனபத³ஸ்ஸ நாம’’ந்தி. ஸுஸுமாரகி³ரேதி ஏவம்னாமகே நக³ரே. தஸ்ஸ கிர நக³ரஸ்ஸ மாபனத்த²ம் வத்து²விஜ்ஜாசரியேன நக³ரட்டா²னஸ்ஸ பரிக்³க³ண்ஹனதி³வஸே அவிதூ³ரே ஸுஸுமாரோ ஸத்³த³மகாஸி கி³ரம் நிச்சா²ரேஸி. அத² அனந்தராயேன நக³ரே மாபிதே தமேவ ஸுஸுமாரகி³ரணம் ஸுப⁴னிமித்தம் கத்வா ஸுஸுமாரகி³ரம்த்வேவஸ்ஸ நாமம் அகம்ஸு. கேசி பன ‘‘ஸுஸுமாரஸண்டா²னத்தா ஸுஸுமாரோ நாம ஏகோ கி³ரி, ஸோ தஸ்ஸ நக³ரஸ்ஸ ஸமீபே, தஸ்மா தம் ஸுஸுமாரகி³ரி ஏதஸ்ஸ அத்தீ²தி ‘ஸுஸுமாரகி³ரீ’தி வுச்சதீ’’தி வத³ந்தி. ததா² வா ஹோது அஞ்ஞதா² வா, நாமமேதம் தஸ்ஸ நக³ரஸ்ஸாதி ஆஹ ‘‘ஸுஸுமாரகி³ரந்தி நக³ரஸ்ஸ நாம’’ந்தி. பே⁴ஸகளாதி க⁴ம்பண்ட³னாமகோ க³ச்ச²விஸேஸோ. கேசி ‘‘ஸேதருக்கோ²’’திபி வத³ந்தி. தேஸம் ப³ஹுலதாய பன தம் வனம் பே⁴ஸகளாவனந்த்வேவ பஞ்ஞாயித்த². ‘‘பே⁴ஸக³ளாவனே’’திபி பாடோ². ‘‘பே⁴ஸோ நாம ஏகோ யக்கோ² அயுத்தகாரீ, தஸ்ஸ ததோ க³ளிதட்டா²னதாய தம் வனம் பே⁴ஸக³ளாவனம் நாம ஜாத’’ந்தி ஹி கேசி.

352. ஜோதிகரணேதி அக்³கி³கரணே. ஸேஸமேத்த² உத்தானமேவ. அகி³லானதா, அனுஞ்ஞாதகரணாபா⁴வோ, விஸிப்³பே³துகாமதா, ஸமாத³ஹனந்தி இமானி பனேத்த² சத்தாரி அங்கா³னி.

ஜோதிஸிக்கா²பத³வண்ணனா நிட்டி²தா.

7. நஹானஸிக்கா²பத³வண்ணனா

357. ஸத்தமஸிக்கா²பத³ஸ்ஸ பாளியம் அஸம்பி⁴ன்னேனாதி அமக்கி²தேன, அனட்டே²னாதி அத்தோ². ஓரேனத்³த⁴மாஸம் நஹாயேய்யாதி நஹாததி³வஸதோ பட்டா²ய அத்³த⁴மாஸே அபரிபுண்ணே நஹாயேய்ய. ஸேஸமேத்த² உத்தானமேவ. மஜ்ஜி²மதே³ஸோ, ஊனகத்³த⁴மாஸே நஹானம், ஸமயானம் வா நதீ³பாரக³மனஸ்ஸ வா ஆபதா³னம் வா அபா⁴வோதி இமானி பனேத்த² தீணி அங்கா³னி.

நஹானஸிக்கா²பத³வண்ணனா நிட்டி²தா.

8. து³ப்³ப³ண்ணகரணஸிக்கா²பத³வண்ணனா

368. அட்ட²மே ‘‘சம்மகாரனீலம் நாம பகதினீல’’ந்தி தீஸுபி க³ண்டி²பதே³ஸு வுத்தம். க³ண்டி²பதே³ பன ‘‘சம்மகாரா உத³கே திபுமலம் அயகூ³த²ஞ்ச பக்கி²பித்வா சம்மம் காளம் கரோந்தி, தம் சம்மகாரனீல’’ந்தி வுத்தம். ஸேஸமேத்த² உத்தானமேவ. வுத்தப்பகாரஸ்ஸ சீவரஸ்ஸ அகதகப்பதா, அனட்ட²சீவராதி³தா, நிவாஸனம் வா பாருபனம் வாதி இமானி பனேத்த² தீணி அங்கா³னி.

து³ப்³ப³ண்ணகரணஸிக்கா²பத³வண்ணனா நிட்டி²தா.

9. விகப்பனஸிக்கா²பத³வண்ணனா

374. நவமே அபச்சுத்³தா⁴ரணந்தி ‘‘மய்ஹம் ஸந்தகம் பரிபு⁴ஞ்ஜ வா விஸ்ஸஜ்ஜேஹி வா’’திஆதி³னா அகதபச்சுத்³தா⁴ரம். யேன வினயகம்மம் கதந்தி யேன ஸத்³தி⁴ம் வினயகம்மம் கதம். திம்ஸகவண்ணனாயந்தி நிஸ்ஸக்³கி³யவண்ணனாயம். பரிபோ⁴கே³ன காயகம்மம், அபச்சுத்³தா⁴ராபனேன வசீகம்மம். ஸேஸமேத்த² உத்தானமேவ. ஸாமம் விகப்பிதஸ்ஸ அபச்சுத்³தா⁴ரோ, விகப்பனுபக³சீவரதா, பரிபோ⁴கோ³தி இமானி பனேத்த² தீணி அங்கா³னி.

விகப்பனஸிக்கா²பத³வண்ணனா நிட்டி²தா.

10. சீவரஅபனிதா⁴னஸிக்கா²பத³வண்ணனா

377. த³ஸமம் உத்தானத்த²மேவ. உபஸம்பன்னஸ்ஸ ஸந்தகானம் பத்தாதீ³னம் அபனிதா⁴னம், விஹேஸேதுகாமதா வா ஹஸாதி⁴ப்பாயதா வாதி இமானி பனேத்த² த்³வே அங்கா³னி.

சீவரஅபனிதா⁴னஸிக்கா²பத³வண்ணனா நிட்டி²தா.

நிட்டி²தோ ஸுராபானவக்³கோ³ ச²ட்டோ².